Wala Shihilɛ He Sane

Shihilɛ Kpakpa yɛ Yehowa Sɔɔmɔ Mli

TAAKƐ RUSSELL KURZEN GBA

Afɔ́ mi yɛ September 22, 1907 mli, afii kpawo sɛɛ dani gbi ni sa kadimɔ ni kɛ klɛŋklɛŋ jeŋ ta lɛ ba lɛ shɛ. No mli lɛ, wɔ weku lɛ yɛ nii waa yɛ gbɛ ní he hiaa fe fɛɛ nɔ. Be mli ni onu wɔ yinɔsane lɛ he saji fioo ko lɛ, misusuɔ akɛ okɛ mi baakpã gbee.

BENI Minaa Kurzen ji gbekɛ yoo fioo lɛ, no mli lɛ eje shishi momo eetao anɔkwa saji ni kɔɔ Nyɔŋmɔ he. Dani ehiɛ aaafã kɛyashɛ afii nyɔŋma-kɛ-etɛ kɛyaa lɛ, no mli lɛ etee sɔlemɔi srɔtoisrɔtoi yɛ Spiez, Switzerland maŋ ni yɔɔ fɛo lɛ mli. Yɛ afi 1887 mli, beni ebote gbalashihilɛ mli afii fioo komɛi asɛɛ lɛ, Kurzen weku lɛ fata mɛi ni fãa kɛyahi maŋ kroko mli lɛ he kɛyashɛ United States.

Weku lɛ yahi Ohio, ni jɛmɛ ji he ni Minaa nine shɛ jwetri ni etaoɔ lɛ nɔ yɛ, yɛ aaafee afi 1900 mli. Ena enɛ yɛ Charles Taze Russell wolo ni ji The Time Is at Hand, ni aŋma yɛ Germany wiemɔ mli lɛ mli. Eyɔse amrɔ nɔŋŋ akɛ, Biblia mli anɔkwale la miikpɛ yɛ nɔ ni ekane lɛ mli. Eyɛ mli akɛ Minaa nyɛɛɛ akane Blɔfo moŋ, shi eshɛ Blɔfo Buu-Mɔɔ lɛ eko. Enɛ hewɔ lɛ, ekase Biblia mli anɔkwalei lɛ, ni nakai beaŋ nɔŋŋ lɛ ekase Blɔfo wiemɔ hu. Minii náaa mumɔŋ nibii ahe miishɛɛ kwraa tamɔ eŋa lɛ.

Yɛ Minaa Kurzen bii 11 lɛ ateŋ lɛ, ebihii 2, John kɛ Adolph jie hiɛsɔɔ kpo yɛ mumɔŋ jwetri ni ena lɛ he. John ji mitsɛ, ni abaptisi lɛ yɛ afi 1904 mli, yɛ Biblia Kaselɔi, taakɛ ale Yehowa Odasefoi lɛ yɛ nakai beaŋ lɛ, akpee wulu ni afee yɛ St. Louis, Missouri lɛ shishi. Akɛni Biblia Kaselɔi lɛ ateŋ mɛi babaoo bɛ nɔ ko tsɔ hewɔ lɛ, akɛ be ni abaafee kpee wulu lɛ yato be ni akɛbaafee World’s Fair lɛ yɛ St. Louis lɛ, bɔni afee ni amɛná oketeke ni atse emlitamɔ he nyɔmɔwoo lɛ nɔ lɛ he sɛɛ. Sɛɛ mli yɛ afi 1907 mli lɛ, abaptisi mitsɛkwɛ Adolph yɛ kpee wulu ko ni afee yɛ Niagara Falls, New York lɛ shishi. Mitsɛ kɛ mitsɛkwɛ lɛ kɛ ekãa shiɛ nɔ ni amɛkase kɛjɛ Biblia lɛ mli lɛ, ni yɛ naagbee lɛ, amɛyi enyɔ lɛ fɛɛ batsɔmɔ be-fɛɛ sɔɔlɔi (mɛi ni atsɛɔ amɛ amrɔ nɛɛ akɛ gbɛgbalɔi lɛ).

No hewɔ lɛ, beni afɔ́ mi yɛ afi 1907 mli lɛ, no mli lɛ miweku lɛ yɛ nii jogbaŋŋ yɛ mumɔŋ momo. (Abɛi 10:22) Beni mifɔlɔi John kɛ Ida kɛ mi tee “Nyɛyaa Nyɛhiɛ Kɛya Kunimyeli Mli” kpokpaa wulu nɔ kpee ni afee yɛ Put-in-Bay, Ohio lɛ, no mli lɛ abifao ji mi. Joseph F. Rutherford, ni no mli lɛ eji sɔɔlɔ gbɛfalɔ yɛ nakai beaŋ lɛ, ji kpee lɛ sɛinɔtalɔ. Otsii fioo komɛi ni tsɔ hiɛ lɛ mli lɛ, eba Dalton, Ohio ni eba wɔshia lɛ ebasara wɔ ni eha Biblia Kaselɔi ni yɔɔ jɛmɛ lɛ wiemɔ.

Yɛ anɔkwale mli lɛ, mi diɛŋtsɛ minyɛɛɛ makai nibii ni ba yɛ nakai bei lɛ amli, shi mikaiɔ kpee wulu ni ayafee yɛ Mountain Lake Park, Maryland, yɛ afi 1911 lɛ mli lɛ. Jɛmɛ mi kɛ minyɛmiyoo Esther kɛ Charles Taze Russell, ni kwɛɔ Biblia Kaselɔi lɛ ajeŋ muu fɛɛ shiɛmɔ nitsumɔ lɛ nɔ yɛ nakai beaŋ lɛ kpe yɛ.

Yɛ June 28, 1914, ni ji gbi ni je lɛ ma eyi shi kɛbote ta mli yɛ gbe ni aju shi agbe Archduke Ferdinand kɛ eŋa yɛ Sarajevo hewɔ lɛ, mi kɛ miweku lɛ tee kpee yɛ toiŋjɔlɛ mli yɛ Columbus, Ohio. Kɛjɛ nakai shishijee afii lɛ amli kɛbaa nɛɛ, miná hegbɛ mitee Yehowa Odasefoi akpeei pii. Yɛ kpee lɛ ekomɛi ashishi lɛ, mɛi oha loo nɔ ni fa fioo fe nakai pɛ baa jɛmɛ. Afee henaabuamɔi krokomɛi ni dara waa yɛ je lɛŋ shwɛmɔhei ni dara waa lɛ ekomɛi amli.

Wɔshia lɛ yɛ He ko ni Sa

Kɛjɛ afi 1908 kɛyashi afi 1918 lɛ, wɔshia ni yɔɔ Dalton—yɛ Pittsburgh, Pennsylvania, kɛ Cleveland, Ohio teŋ lɛ—bafee he ni afeɔ Biblia Kaselɔi asafo bibioo lɛ kpee yɛ. Wɔshia lɛ batsɔ he ni wielɔi gbɛfalɔi babaoo batoɔ. Amɛfimɔɔ amɛkpɔŋɔi kɛ shwiilii lɛ yɛ wɔ nitoohe lɛ sɛɛ ni amɛgbaa wɔ niiashikpamɔi ni ŋɔɔ, kɛ mumɔŋ saji krokomɛi amɛtsɔɔ mɛi ni ebabua amɛhenaa yɛ jɛmɛ lɛ. Kwɛ hewalɛ ni nakai bei lɛ wo wɔ!

No mli lɛ, tsɔɔlɔ ji Ataa, shi etsui emɔ nitsɔɔmɔ nitsumɔ ni fe fɛɛ, ni ji Kristofoi asɔɔmɔ nitsumɔ lɛ waa. Ebɔɔ mɔdɛŋ koni etsɔɔ eweku lɛ Yehowa he nii, ni daa gbɛkɛ lɛ wɔfeɔ ekome kɛsɔleɔ akɛ weku. Yɛ afi 1919 fɛibe mli lɛ, Ataa hɔɔ wɔkpɔŋɔ kɛ shwiili lɛ, ni eyahe 1914 Ford ni jara ji dɔlai 175 bɔni afee ni enine anyɛ ashɛ gbɔmɛi babaoo nɔ yɛ shiɛmɔ nitsumɔ lɛ mli. Yɛ afi 1919 kɛ afi 1922 afii lɛ amli lɛ, nakai kar lɛ lóo wɔweku lɛ fɛɛ kɛtee Biblia Kaselɔi akpee ni sa kadimɔ waa ni afee yɛ Cedar Point, Ohio lɛ shishi.

Wɔweku muu lɛ fɛɛ—mi; Awo; Ataa; Esther; kɛ minyɛminuu fioo John—wɔ fɛɛ wɔkɛ wɔhe wo maŋshiɛmɔ nitsumɔ lɛ mli. Mikaiɔ gbi klɛŋklɛŋ kwraa ni shiatsɛ ko bi mi Biblia mli sane lɛ jogbaŋŋ. No mli lɛ miye aaafee afii kpawo. Nuu lɛ bi akɛ: “Gbekɛ nuu, mɛni ji Harmagedon?” Kɛtsɔ ataa yelikɛbuamɔ fioo nɔ lɛ, miha lɛ hetoo kɛjɛ Biblia lɛ mli.

Mikɛ Mihe Wo Be-Fɛɛ Sɔɔmɔ Nitsumɔ lɛ Mli

Yɛ afi 1931 mli lɛ, wɔweku lɛ tee kpee ni afee yɛ Columbus, Ohio lɛ, ni wɔná miishɛɛ akɛ wɔfata mɛi ni kpɛlɛ gbɛi hee ni ji Yehowa Odasefoi lɛ nɔ lɛ ahe. John ná miishɛɛ aahu akɛ, ekpɛ eyiŋ akɛ esa akɛ mi kɛ lɛ fɛɛ kɛ wɔhe awo gbɛgbamɔ nitsumɔ lɛ mli.a Wɔfee nakai, ni Awo, Ataa kɛ Esther hu fee nakai nɔŋŋ. Kwɛ jwetri ni wɔnine shɛ nɔ—weku ni efee ekome yɛ Nyɔŋmɔ Maŋtsɛyeli lɛ he sanekpakpa shiɛmɔ nitsumɔ ni yɔɔ miishɛɛ lɛ mli! Miyaa nɔ midaa Yehowa shi daa yɛ jɔɔmɔi ni minaa kɛjɛɔ edɛŋ lɛ hewɔ. Yɛ miishɛɛ ni wɔná lɛ fɛɛ sɛɛ lɛ, nibii pii ni baaha wɔná miishɛɛ yɛ wɔhiɛ lolo.

Yɛ February afi 1934 lɛ, mibɔi nitsumɔ yɛ Yehowa Odasefoi ajeŋ fɛɛ nitsumɔhe yitso lɛ, (ni atsɛɔ lɛ Betel lɛ) yɛ Brooklyn, New York. Otsii fioo komɛi asɛɛ lɛ, John bafata mihe yɛ jɛmɛ. Wɔhi tsũ kome mli aahu kɛyashi beni ekɛ Jessie ni ji eŋa ni esumɔɔ waa lɛ bote gbalashihilɛ mli yɛ afi 1953 mli.

Beni mi kɛ John etee Betel lɛ, no sɛɛ lɛ, wɔfɔlɔi kɛ amɛhe wo gbɛgbamɔ nitsumɔ lɛ mli yɛ hei srɔtoi yɛ maŋ lɛ mli, ni Esther kɛ ewu George Read, fata amɛhe. Wɔfɔlɔi lɛ tee nɔ amɛtsu gbɛgbamɔ nitsumɔ lɛ aahu kɛyashi amɛgbe amɛshikpɔŋ nɔ sɔɔmɔ nitsumɔ lɛ naa yɛ afi 1963 mli. Esther kɛ ewu lɛ ná weku kpakpa, ni miná wɔfase yei kɛ hii pii ni misumɔɔ amɛ naakpa.

Nitsumɔ kɛ Naanyobɔɔ yɛ Betel

John kɛ tsɔji ahe nilee ni eyɔɔ lɛ tsu nii yɛ Betel ni ekɛ Betelbii krokomɛi fee ekome kɛtsu gramafon bibii ahe nii. Yehowa Odasefoi akpei abɔ kɛ enɛɛmɛi tsu nii yɛ amɛ shia-kɛ-shia nitsumɔ lɛ mli. John ye ebua hu ni afee tsɔji ni kɛ woji balaa woji tɛtrɛbii lɛ ahe, kɛ nɔ ni ŋmaa nii yɛ woji tɛtrɛbii ni akɛmajeɔ aŋkroaŋkroi ni shɛɔ lɛ asɛɛ.

He ni akalaa woji yɛ lɛ ji he ni mije mi-Betel nitsumɔ lɛ shishi yɛ. Oblahii krokomɛi ni mikɛtsu nii yɛ woji afeemɔhe lɛ yɛ nakai beaŋ lɛ kã he amɛkɛ anɔkwayeli miisɔmɔ lolo yɛ Betel. Carey Barber kɛ Robert Hatzfeld fata mɛi nɛɛ ahe. Amɛteŋ mɛi komɛi ni mikɛ miishɛɛ kaiɔ amɛ jogbaŋŋ ni nɛkɛ be nɛɛ mli lɛ, amɛgboi lɛ ji Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, kɛ John Perry. Amɛkɛ afii babaoo tsu nitsumɔ nɛɛ aahu ni amɛgbigbiliii amɛmli, ni asaŋ amɛkpaaa “nɔwomɔ” gbɛ hu. Shi kɛlɛ, gbɛnaa nii ni tsii bakã nɛkɛ Kristofoi anɔkwafoi ni afɔ amɛ mu nɛɛ ateŋ mɛi saŋŋ nɔ, yɛ be mli ni gbɛjianɔtoo lɛ daa lɛ. Amɛteŋ mɛi komɛi po sɔmɔ akɛ Yehowa Odasefoi a-Nɔyeli Kuu lɛ mli bii.

Mikase nibii titrii komɛi kɛjɛ nɛkɛ nyɛmimɛi hii ni kɛ amɛhe shãa afɔle yɛ nitsumɔ lɛ mli lɛ ahe. Yɛ heloonaa nitsumɔ gbɛfaŋ lɛ, akɛ shika woɔ nitsulɔi nyɔmɔ. No ji amɛnyɔmɔwoo. Sɔɔmɔ yɛ Betel kɛ mumɔŋ jɔɔmɔi babaoo baa, ni mumɔŋ hii kɛ yei pɛ náa nakai nyɔmɔwoo lɛ he miishɛɛ.—1 Korintobii 2:6-16.

Nathan Knorr, ní ba Betel ákɛ gbekɛ yɛ afi 1923 mli lɛ ji woji akalamɔhe lɛ nɔkwɛlɔ yɛ afi 1930 afii lɛ amli. Enyiɛɔ kɛkpaa woji akalamɔhe lɛ mli be fɛɛ be ni eŋaa nitsulɔi lɛ fɛɛ ekomekomei. Wɔteŋ mɛi ni ba Betel ehee yɛ nakai beaŋ lɛ hiɛ sɔ nɛkɛ mɔ hesusumɔ nɛɛ waa. Yɛ afi 1936 mli lɛ akɛ wolo kalamɔ tsɔne hee jɛ Germany baha wɔ, ni etɔ nyɛmimɛi obalahii lɛ ekomɛi waa ní amɛnyɛɛɛ amɛtsara tsɔne lɛ fãi lɛ. Enɛ hewɔ lɛ, Nyɛmimuu Knorr wo enitsumɔ atade lɛ, ni ekɛ amɛ fee ekome kɛtsu nii fe nyɔŋ kome kɛyashi be mli ni tsɔne lɛ bɔi nitsumɔ.

Nyɛminuu Knorr ji mɔ ko ni tsuɔ nii waa bɔ ni wɔteŋ mɛi babaoo nyɛɛɛ wɔkɛ lɛ atsu nii pɛpɛɛpɛ. Shi ele bɔ ni ajɔɔ he ahaa hu. Be mli ni akɛ Yehowa Odasefoi ajeŋ muu fɛɛ shiɛmɔ nitsumɔ lɛ nɔkwɛmɔ wo edɛŋ yɛ January 1942 mli po sɛɛ lɛ, bei komɛi lɛ, ekɛ Betel weku lɛ mli bii lɛ kɛ Gilead maŋsɛɛ sanekpakpa shiɛmɔ skul lɛ mli nikaselɔi lɛ tswaa baseball yɛ nikasemɔhe ni bɛŋkɛ South Lansing, yɛ New York lɛ.

Yɛ April 1950 mli lɛ, Betel weku lɛ fa kɛtee ŋwɛitsu hee ní hiɛ nsɔɔdoi nyɔŋma lɛ mli, ni ji wɔɔhe tsũi lɛ amli, yɛ 124 Columbia Heights, Brooklyn, New York. Wɔ fɛɛ wɔyaa niyeli tsũ hee lɛ mli ni wɔtaraa shi kutuu ni wɔyeɔ nii. Wɔnyɛɛɛ wɔfee wɔ leebi jamɔ gbɛjianɔtoo lɛ yɛ afii etɛ ni akama nakai tsũ lɛ mli. Kwɛ miishɛɛ ni wɔná beni aku sɛɛ aje nakai gbɛjianɔtoo lɛ shishi ekoŋŋ lɛ! Nyɛminuu Knorr ha mita emasɛi yɛ sɛinɔtalɔ okpɔlɔ lɛ he bɔni afee ni manyɛ maye mabua lɛ ni ekai weku lɛ mli bii heei lɛ agbɛi. Mita nɛkɛ sɛi nɛɛ nɔ aahu afii 50 kɛha leebi jamɔ kɛ leebi niyenii. Kɛkɛ ni yɛ August 4, 2000 mli lɛ, aŋa nakai niyelihe tsũ lɛ naa, ni akɛ mi tee niyeli tsũi ni asaa mli lɛ ekome mli yɛ tsutsu Towers Hotel lɛ mli.

Yɛ afi 1950 afii lɛ amli lɛ, mitsu Linotype tsɔne ko he nii yɛ nitsumɔhe lɛ, ni mifeɔ dadei ni akɛ kalaa tsɛŋsii anɔ ni akɛfeɔ woji lɛ. Nakai nitsumɔ lɛ jeee nɔ ni misumɔɔ lɛ ateŋ eko, shi William Peterson, ní kwɛɔ nakai tsɔne lɛ nɔ lɛ kɛ mi hi shi jogbaŋŋ aahu akɛ eha miná he ni miyɔɔ lɛ he miishɛɛ. Kɛkɛ ni, yɛ afi 1960 mli lɛ, mɛi ni kɛ amɛhe baaha he bahia koni amɛyasha tsũ hee ni ama yɛ 107 Columbia Heights lɛ he. Miná he miishɛɛ waa akɛ mikɛ mihe baaha koni maye mabua ni akɛsaa tsũ hee nɛɛ kɛha wɔ Betel weku ni daa lɛ.

Be mli ni wɔsha 107 Columbia Heights tsũ lɛ he wɔgbe naa sɛɛ lɛ, miná miishɛɛ waa akɛ aha mi nitsumɔ akɛ mihere gbɔi ni baa ni amɛbakwɛ Betel lɛ atuu. Afii 40 ni eho ni mikɛsɔmɔ akɛ mɔ ni hereɔ gbɔi atuu lɛ yɛ miishɛɛ tamɔ bei abɔ ni mikɛhi Betel lɛ nɔŋŋ. Kɛji mɛi ni baa ni amɛbasara Betel loo Betel weku lɛ mli bii lɛ eko jio lɛ, eyɛ miishɛɛ akɛ wɔɔsusu nɔ ni ejɛ mɔdɛŋ ni wɔ fɛɛ wɔbɔɔ ni wɔkɛtsuɔ nii kɛha Maŋtsɛyeli lɛ nɔyaa lɛ mli kɛba lɛ he.

Biblia Mli Nikaselɔi ni Yɔɔ Ekãa

Wɔ Betel weku lɛ eshwere babaoo yɛ mumɔŋ ejaakɛ emli bii lɛ sumɔɔ Biblia lɛ. Beni miba Betel ehee lɛ, mibi Emma Hamilton, ni tsuɔ nii akɛ mɔ ko ni kaneɔ nii ni ejajeɔ emli tɔmɔi lɛ akɛ shii enyiɛ ekane Biblia muu lɛ fɛɛ. Eha hetoo akɛ: “Shii 32, kɛkɛ ni mikpa he akɔntaabuu.” Anton Koerber, ni ji Kristofonyo kroko ni yɔɔ ekãa ní sɔmɔ yɛ Betel yɛ nakai beaŋ nɔŋŋ lɛ fɔɔ kɛɛmɔ akɛ: “Ha Biblia lɛ ahi omasɛi be fɛɛ be.”

Beni Nyɛminuu Russell gbo yɛ afi 1916 mli lɛ, gbɛjianɔtoo lɛ mli gbɛnaa nii ni kã enɔ lɛ bakã Joseph F. Rutherford nɔ. Rutherford ji maŋ wielɔ ni he esa ni yɔɔ hewalɛ, ni ákɛ mlalelɔ lɛ, eye saji babaoo eha Yehowa Odasefoi lɛ yɛ Supreme Court of the United States lɛ. Beni Rutherford gbo yɛ afi 1942 mli lɛ, Nyɛminuu Knorr baye egbɛhe lɛ, ni etsu nii koni eha emaŋ wiemɔ hesaai lɛ aya hiɛ. Akɛni no mli lɛ, miyɛ tsũ ni bɛŋkɛ enɔ lɛ mli hewɔ lɛ, bei pii lɛ, minuɔ ni eesaa ehe yɛ ewiemɔi amli shii abɔ. Yɛ be ko sɛɛ lɛ, kɛtsɔ nakai mɔdɛŋbɔɔ lɛ nɔ lɛ, ebatsɔ maŋ wielɔ kpakpa.

Yɛ February 1942 mli lɛ, Nyɛminuu Knorr ye ebua ni ato gbɛjianɔ ko koni aye abua wɔ nyɛmimɛi hii fɛɛ ni yɔɔ Betel lɛ koni wɔnitsɔɔmɔ kɛ wiemɔ hesaai lɛ aya hiɛ. Skul lɛ gbala jwɛŋmɔ kɛtee Biblia mli pɛimɔ kɛ maŋ wiemɔ nɔ. Yɛ shishijee mli lɛ, aha wɔteŋ mɔ fɛɛ mɔ nifeemɔ koni ebaha wiemɔi kukuji yɛ Biblia mli gbɔmɛi komɛi ahe. Mi klɛŋklɛŋ wiemɔ lɛ kɔɔ nuu Mose lɛ he. Yɛ afi 1943 mli lɛ, aje skul ni tamɔ nakai nɔŋŋ shishi yɛ Yehowa Odasefoi asafoi lɛ amli, ni etsa nɔ aahu kɛbashi ŋmɛnɛ. Nɔ ni amaa nɔ mi lolo yɛ Betel lɛ ji ní aná Biblia mli nilee kɛ nitsɔɔmɔ gbɛi ni mɔɔ shi.

Yɛ February 1943 mli lɛ, Gilead maŋsɛɛ sanekpakpa shiɛmɔ skul lɛ klɛŋklɛŋ klas lɛ je shishi. Amrɔ nɛɛ, Gilead klas ni ji 111 egbe naa! Yɛ nɔ ni fe afii 58 ni ekɛtsu nii lɛ mli lɛ, skul lɛ etsɔse mɛi ni fa fe 7,000 koni amɛyasɔmɔ ákɛ maŋsɛɛ sanekpakpa shiɛlɔi yɛ jeŋ fɛɛ. Nɔ ni sa kadimɔ waa ji akɛ, beni skul lɛ je shishi yɛ afi 1943 mli lɛ, no mli lɛ, Yehowa Odasefoi ni fa fioo fe 100,000 pɛ yɔɔ jeŋ fɛɛ. Amrɔ nɛɛ, wɔyɛ mɛi ni fa fe 6,000,000 ní kɛ amɛhe ewo Nyɔŋmɔ Maŋtsɛyeli lɛ he sanekpakpa shiɛmɔ nitsumɔ lɛ mli!

Mihiɛ Sɔ Mimumɔŋ Gboshinii Lɛ

Beni eshwɛ fioo ni abaato Gilead shishi lɛ, akɛ nitsumɔ wo wɔyi etɛ ni jɛ Betel lɛ adɛŋ akɛ wɔyasara asafoi ni yɔɔ United States lɛ fɛɛ. Bɔni afee ni wɔha asafoi nɛɛ ahe awa yɛ mumɔŋ lɛ, wɔhiɔ jɛmɛ gbi kome, gbii komɛi, loo otsi kome. No mli lɛ atsɛɔ wɔ nyɛmimɛi lɛ asɔɔlɔi, gbɛi ni sɛɛ mli lɛ atsake lɛ ni afee lɛ kpokpaa nɔ sɔɔlɔ, loo kpokpaa nɔkwɛlɔ. Shi, beni agbele Gilead Skul lɛ sɛɛ etsɛɛɛ lɛ, aha miku misɛɛ koni mibatsɔɔ nii. Misɔmɔ akɛ tsɔɔlɔ yɛ klas 2 kɛyashi 5 nɔ, ni agbɛnɛ hu, mifee tsɔɔlɔi lɛ ateŋ mɔ kome yelikɛbualɔ ni mitsɔɔ klas ni ji 14 lɛ nii. Akɛni minyɛ migba skulbii lɛ Yehowa gbɛjianɔtoo lɛ ŋmɛnɛŋmɛnɛ beaŋ nifeemɔi ni yɔɔ miishɛɛ—ní amɛteŋ babaoo lɛ, minyɛɔ migbaa kɛjɛɔ mi diɛŋtsɛ miniiashikpamɔ mli—lɛ hewɔ lɛ, eha mihiɛ sɔ mimumɔŋ gboshinii lɛ jogbaŋŋ kɛmɔ shi.

Hegbɛ kroko ni miná he miishɛɛ waa yɛ afii lɛ amli ji Yehowa webii amajimaji ateŋ kpeei wuji ní mitee lɛ. Yɛ afi 1963 mli lɛ, mikɛ kpeeiyalɔi krokomɛi ni fa fe 500 ni yɔɔ jeŋ fɛɛ lɛ fã gbɛ kɛtee “Naanɔ Sanekpakpa” kpokpaa wuji anɔ kpeei lɛ ekomɛi. Kpeei wuji krokomɛi ni fee gbɛi ni mitee lɛ ji nɔ ni afee yɛ Warsaw, Poland, yɛ afi 1989 mli; Berlin, Germany, yɛ afi 1990 mli; kɛ Moscow, Russia, yɛ afi 1993 mli lɛ. Yɛ kpee nɛɛ eko fɛɛ eko shishi lɛ, miná hegbɛ mikɛ wɔnyɛmimɛi hii kɛ yei komɛi ní mia amɛhiɛ yɛ afii nyɔŋmai abɔ yiwaa yɛ Nazi nɔyeli, Kɔmunist nɔyeli, loo enyɔ lɛ fɛɛ shishi lɛ kpe. Kwɛ bɔ ni niiashikpamɔi ni tamɔ enɛɛmɛi woɔ mɔ hewalɛ ehaa!

Eji anɔkwale akɛ, mishihilɛ yɛ Yehowa sɔɔmɔ mli lɛ etee hiɛ babaoo! Mumɔŋ jɔɔmɔi ni ekɛhaa lɛ sɛɛ efooo. Ni akɛ nɔ ni tamɔɔɔ heloonaa nii lɛ, babaoo ni wɔgbaa nibii ni jara wa nɛɛ he sane lɛ, babaoo ni nii ni wɔyɔɔ lɛ fáa ji no. Bei komɛi lɛ, minuɔ ni mɛi komɛi miikɛɛ akɛ amɛná ni kulɛ atsɔseee amɛ akɛ Yehowa Odasefoi. Amɛkɛɔ akɛ amɛnuɔ he akɛ kulɛ amɛhiɛ baasɔ Biblia mli anɔkwalei lɛ babaoo kɛji tsutsu lɛ amɛná je lɛŋ shihilɛ mli niiashikpamɔ yɛ Nyɔŋmɔ gbɛjianɔtoo lɛ sɛɛ dã.

Kɛ́ minu ni oblahii kɛ oblayei miiwie nibii tamɔ enɛ he lɛ, egbaa minaa be fɛɛ be ejaakɛ amɛmiikɛɛ akɛ ehiii akɛ akɛ Yehowa gbɛ̀i lɛ ahe nilee aaatsɔse mɔ ko. Ni kɛlɛ, susumɔ jeŋbai gbohii kɛ susumɔi gbohii ni esa akɛ mɛi akpa beni amɛbale Biblia mli anɔkwale lɛ yɛ sɛɛ mli lɛ he okwɛ. Midaa shi be fɛɛ be akɛ mifɔlɔi tsɔse amɛbii etɛ lɛ yɛ jalɛ gbɛ lɛ nɔ. John hi shi akɛ Yehowa tsulɔ anɔkwafo kɛyashi egbo yɛ July 1980 mli, ni Esther kã he eji Odasefonyo anɔkwafo kɛba shi ŋmɛnɛ.

Kɛ́ mikwɛ misɛɛ lɛ, mináa miishɛɛ babaoo akɛ mikɛ Kristofoi nyɛmimɛi hii kɛ yei anɔkwafoi ebɔ naanyo. Amrɔ nɛɛ, mikɛ nɔ ni fe afii 67 ní yɔɔ miishɛɛ waa esɔmɔ yɛ Betel. Eyɛ mli akɛ miboteee gbalashihilɛ mli moŋ, shi miyɛ mumɔŋ bihii kɛ biyei babaoo, kɛ mumɔŋ nabii hu. Ni mináa miishɛɛ kɛji masusu wɔjeŋ muu fɛɛ mumɔŋ weku lɛ mli bii heei ni mikɛ amɛ ekpeko lɛ ahe, ni amɛteŋ mɔ fɛɛ mɔ jara wa waa. Kwɛ bɔ ni wiemɔi nɛɛ ji anɔkwale ha, akɛ: “Yehowa jɔɔmɔ lɛ, no feɔ mɔ niiatsɛ”!—Abɛi 10:22.

[Shishigbɛ niŋmaa]

[Mfoniri ni yɔɔ baafa 20]

Kɛjɛ abɛku kɛyaa ninejurɔ gbɛ: mitsɛ ni minyɛminuu, John ta eshuɔ nɔ, Esther, mi, kɛ minyɛ

[Mfonirii ni yɔɔ baafa 23]

Miitsɔɔ Gilead klas ko nii yɛ afi 1945

Ninejurɔ yɛ ŋwɛigbɛ: Gilead Skul tsɔɔlɔi Eduardo Keller, Fred Franz, mi, kɛ Albert Schroeder

[Mfoniri ni yɔɔ baafa 24]

Miisusu mishihilɛ ni etee hiɛ babaoo yɛ Yehowa sɔɔmɔ mli lɛ he