Mla Kpakpa Lɛ—Eji Jeŋ Muu Fɛɛ Tsɔɔmɔ

“No hewɔ lɛ, nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ.”—Mateo 7:12.

YESU KRISTO wie nɛkɛ wiemɔi nɛɛ aaafee afii akpei enyɔ ni eho nɛ yɛ e-Gɔŋ nɔ Shiɛmɔ ni ehe gbɛi lɛ mli. Kɛjɛ afii ohai abɔ ni eho lɛ mli kɛbaa nɛɛ lɛ, áwie nakai wiemɔ kuku lɛ he saji babaoo, ni aŋmala saji babaoo ni kɔɔ he. Ákɛ nɔkwɛmɔnɔ lɛ, ajie yi akɛ eji “Ŋmalɛ mli nɔ ni he hiaa fe fɛɛ,” “nii ni esa akɛ Kristofonyo afee eha enaanyo gbɔmɔ lɛ naamuu,” kɛ “jeŋba shishitoo mla titri ni he hiaa.” No hewɔ lɛ, ebafee nɔ ni ale jogbaŋŋ aahu akɛ afɔɔ lɛ tsɛmɔ ákɛ Mla Kpakpa.

Shi kɛlɛ, jeee mɛi ni afɔɔ amɛ tsɛmɔ akɛ Kristofoi lɛ pɛ ji mɛi ni kɛ shishinumɔ ni yɔɔ Mla Kpakpa lɛ sɛɛ lɛ tsuɔ nii. Yuda jamɔ, Buddha jamɔ kɛ Hela jeŋ nilee fɛɛ tsɔɔ jeŋba he shishitoo mla nɛɛ mli yɛ gbɛ kome loo yɛ gbɛ̀i srɔtoi babaoo nɔ. Nɔ ni ale jogbaŋŋ, titri lɛ nɔ ni gbɔmɛi ni yɔɔ Bokagbɛ Shɔŋŋ lɛ le ji wiemɔ ko ni Confucius ni akɛ woo haa lɛ yɛ Bokagbɛ ákɛ nilelɔ kɛ tsɔɔlɔ ni fe fɛɛ lɛ wie. Wɔnaa shishinumɔ ni yɔɔ sɛɛ lɛ mlitsɔɔmɔi srɔtoi etɛ yɛ The Analects ni ji Confucius Four Books lɛ mli nɔ ni ji etɛ lɛ mli. Beni Confucius haa saji ni nikaselɔi lɛ biɔ lɛ lɛ hetoo lɛ, ekɛɛ shii enyɔ sɔŋŋ akɛ: “Nɔ ni osumɔɔɔ ni afeɔ bo lɛ, kaafee mɛi krokomɛi.” Yɛ be kroko mli beni enikaselɔ Zigong shwã akɛ “Nɔ ni misumɔɔɔ ni mɛi krokomɛi feɔ mi lɛ, mi hu misumɔɔɔ ni mifeɔ amɛ” lɛ, tsɔɔlɔ lɛ kɛ shiŋŋfeemɔ jie naa nɛkɛ akɛ, “Hɛɛ, shi enɛ ji nɔ ko ni onyɛko he nii otsu lolo.”

Kɛ mɔ ko miikane wiemɔi nɛɛ, ebaanyɛ ena akɛ Confucius wiemɔ lɛ kɛ nɔ ni Yesu kɛɛ yɛ sɛɛ mli lɛ kpãaa gbee. Srɔtofeemɔ ni yɔɔ faŋŋ lɛ ji akɛ Mla Kpakpa ni Yesu wie lɛ biɔ nifeemɔi ni sa ni akɛfeɔ mɛi krokomɛi ekpakpa. Ŋɔɔ lɛ akɛ, ehe bahia ni mɛi afee nii ni kɛ wiemɔ ni ja ni Yesu wie lɛ akpã gbee, ní amɛsusu mɛi krokomɛi ahe, ní amɛfee nii ni baaha amɛye amɛbua amɛ, ní amɛhi shi yɛ gbɛtsɔɔmɔ nɛɛ naa daa gbi. Ani osusuɔ akɛ no baaha jeŋ ni wɔyɔɔ mli ŋmɛnɛŋmɛnɛ lɛ afee he ko ni hi jogbaŋŋ? Eka shi faŋŋ akɛ nakai ni.

Kɛji atsɔɔ mla nɛɛ yɛ gbɛ ni ja nɔ jio, jeee yɛ gbɛ ni ja nɔ jio, loo atsɔɔ yɛ gbɛ kroko nɔ jio, nɔ ni sa kadimɔ ji akɛ gbɔmɛi ni hiɔ shi yɛ bei srɔtoi kɛ hei srɔtoi kɛ shihilɛi srɔtoi amli lɛ kɛ amɛhe efɔ̃ shishinumɔ ni yɔɔ Mla Kpakpa lɛ sɛɛ lɛ nɔ babaoo. Enɛ tsɔɔ kɛkɛ akɛ, nɔ ni Yesu wie yɛ Gɔŋ nɔ Shiɛmɔ lɛ mli lɛ ji jeŋ muu fɛɛ nitsɔɔmɔ ni kɔɔ gbɔmɛi ni yɔɔ he fɛɛ he yɛ yinɔ fɛɛ yinɔ mli lɛ ahe.

Bi ohe akɛ: ‘Ani masumɔ ni akɛ mi aye kɛ bulɛ, ni hiɛaŋkwɛmɔ ko bɛ mli, yɛ anɔkwayeli mli? Ani masumɔ ni mahi shi yɛ jeŋ ko ni hewolonɔ su mli hetsɛ, awuiyeli, kɛ ta bɛ mli? Ani masumɔ ni mahi weku ko mli ni mɔ fɛɛ mɔ susuɔ mɛi krokomɛi ahenumɔi kɛ hilɛ-kɛhamɔ he?’ Yɛ anɔkwale mli lɛ, namɔ ekpɛlɛŋ nifeemɔi ni tamɔ enɛɛmɛi anɔ? Nɔ ni yɔɔ diɛŋtsɛ ni tsakeee ji akɛ mɛi fioo pɛ náa shihilɛi nɛɛ amli ŋɔɔmɔ. Yɛ mɛi babaoo agbɛfaŋ lɛ, amɛkɛ amɛhiɛ efɔŋ nibii ni tamɔ nɛkɛ nɔ po.

Afite Mla Kpakpa Lɛ

Yɛ yinɔsane bei fɛɛ mli lɛ, saji komɛi etee nɔ, ní tsɔɔ awui ni ayeɔ adesai, ní nɔ ni yɔɔ mli ji hiɛ ni akuɔ ashwieɔ hegbɛi ni mɛi babaoo yɔɔ lɛ nɔ kwraa. Nɔ ni fata enɛɛmɛi ahe ji nyɔji ni aná kɛjɛ Afrika lɛ ahe jarayeli, Nazi gbele nsarai, gbekɛbii ni anyɛɔ amɛnɔ koni amɛtsu nii, kɛ gbɔmɛi akui ni akpataa amɛhiɛ kwrakwra yɛ hei srɔtoi babaoo lɛ. Enɛɛmɛi ni haa mɔ he jɔ̃ɔ ehe ni aaaya nɔ atsĩ tã lɛ baanyɛ afa babaoo.

Ŋmɛnɛ, tsui naa sane ni ayeɔ ebote wɔtsɔnei ahe nilee lɛ mli. Mɛi fioo pɛ susuɔ mɛi krokomɛi ahe kɛji akɛ oshara ba amɛ diɛŋtsɛ amɛ toiŋjɔlɛ loo hegbɛi ni amɛsusuɔ akɛ amɛyɔɔ lɛ he. (2 Timoteo 3:1-5) Mɛni hewɔ ni mɛi ni fa babaoo efee pɛsɛmkunya, yiwalɔi, mɛi ni nuuu he amɛhaaa mɛi, ni amɛyeɔ amɛtsui naa sane nɛkɛ? Ani jeee no ji akɛ akuɔ hiɛ ashwieɔ Mla Kpakpa lɛ nɔ akɛ nɔ ni bɛ faŋŋ, jeŋba ni be eho, eyɛ mli moŋ akɛ ekã he eji nɔ ni ale yɛ hei babaoo lɛ? Mɔbɔ sane ji akɛ, nɛkɛ ji bɔ ni sane lɛ ji yɛ mɛi babaoo ni kɛɔ akɛ amɛheɔ Nyɔŋmɔ nɔ amɛyeɔ lɛ po ateŋ. Ni kɛ́ wɔɔkwɛ nii taakɛ nibii yaa nɔ ehaa lɛ, gbɔmɛi baaya nɔ afee mɛi ni yeɔ amɛtsui naa sane babaoo.

No hewɔ lɛ, sanebimɔi ni esa akɛ asusu he ji: Mɛni ji nɔ ni Mla Kpakpa ni aaahi shi yɛ naa lɛ tsɔɔ? Ani mɔ ko hiɔ shi yɛ naa lolo? Ni ani be ko baaba kɛ̃ ni adesai fɛɛ baahi shi yɛ Mla Kpakpa lɛ kɛ gbeekpamɔ naa? Bɔni afee ni oná sanebimɔi nɛɛ ahetoo lɛ, ofainɛ kanemɔ sane ni nyiɛ sɛɛ nɛɛ.

[Mfoniri ni yɔɔ baafa 3]

Confucius kɛ mɛi krokomɛi tsɔɔ Mla Kpakpa lɛ mli yɛ gbɛ̀i srɔtoi anɔ