Nyɔŋmɔ Shishitoo Mlai Baanyɛ Aye Abua Bo
ŊWANEJEE ko bɛ he akɛ ole akɛ henumɔ ji nɔ ni kudɔɔ kooloi. Áfee tsɔji babaoo ní amɛtsu nii yɛ gbɛtsɔɔmɔi ni akɛha amɛ lɛ naa. Shi aje gbɛ abɔ adesai koni shishitoo mlai akudɔ amɛ. Te obaafee tɛŋŋ oná nɔmimaa yɛ enɛ he lɛ? Ojogbaŋŋ, Yehowa, ni ji shishitoo mla kpakpai fɛɛ a-Shishitolɔ lɛ bɔ amaniɛ beni ebɔ klɛŋklɛŋ adesai lɛ akɛ: “Nyɛhaa wɔfea gbɔmɔ yɛ wɔsubaŋ nɔ, tamɔ wɔhenɔ.” Mumɔ ji Bɔlɔ lɛ; ebɛ gbɔmɔtso ko tamɔ bɔ ni wɔyɔɔ eko lɛ, no hewɔ lɛ abɔ wɔ yɛ ‘esubaŋ nɔ’ kɛ shishinumɔ akɛ wɔbaanyɛ wɔjie esu kɛ baŋ kpo, ni wɔjie esui kpakpai lɛ ekomɛi akpo. Adesai yɛ nyɛmɔ ni amɛkɛaakudɔ amɛshihilɛi taakɛ shishitoo mlai baatsɔɔ, ni ji akɛ, yɛ nɔ ni amɛheɔ amɛyeɔ akɛ eji nifeemɔ gbɛ ni ja naa. Yehowa eha aŋmala nɛkɛ shishitoo mlai nɛɛ babaoo yɛ e-Wiemɔ lɛ mli.—1 Mose 1:26; Yohane 4:24; 17:17.
Mɔ ko baanyɛ akɛɛ akɛ: ‘Shi shishitoo mlai babaoo yɔɔ Biblia lɛ mli. Minyɛŋ male fɛɛ.’ Eji anɔkwale. Shi kɛlɛ, susumɔ anɔkwa sane nɛɛ he okwɛ: Yɛ be mli ni shishitoo mlai ni Nyɔŋmɔ kɛha lɛ fɛɛ he yɔɔ sɛɛnamɔ lɛ, ekomɛi ahe hiaa waa fe ekrokomɛi. Obaanyɛ ona enɛ kɛjɛ Mateo 22:37-39, he ni Yesu tsɔɔ yɛ akɛ, yɛ kitai lɛ kɛ shishitoo mlai krokomɛi ni yɔɔ Mose Mla lɛ mli lɛ sɛɛ lɛ, ekomɛi ahe miihia waa fe ekrokomɛi lɛ.
Mɛɛ shishitoo mlai ahe hiaa waa fe ekrokomɛi lɛ? Biblia mli shishitoo mlai titrii lɛ ji nɔ ni kɔɔ wɔkɛ Yehowa teŋ wekukpaa lɛ he tɛ̃ɛ lɛ. Kɛ́ wɔfee toiboo wɔha enɛɛmɛi lɛ, Bɔlɔ lɛ bafeɔ mɔ titri ni kɛ wɔjeŋba he gbɛtsɔɔmɔ haa. Kɛfata he lɛ, shishitoo mlai komɛi yɛ ni saa wɔkɛ mɛi krokomɛi ateŋ wekukpaa he. Enɛɛmɛi ni wɔkɛaatsu nii lɛ baaye abua wɔ koni wɔte shi wɔshi mi klɛŋklɛŋ su lɛ, ni bɔ fɛɛ bɔ ni abaatsɔɔ mli aha lɛ kɔɔɔ he eko.
Nyɛhaa wɔkɛ anɔkwalei ni he hiaa fe fɛɛ, ni yɔɔ Biblia lɛ mli lɛ ateŋ ekome ajea shishi. Mɛɛ anɔkwale ni, ni te esaa wɔhe ehaa tɛŋŋ?
“Mɔ ni Kwɔ Fe Fɛɛ yɛ Shikpɔŋ lɛ Nɔ Fɛɛ”
Ŋmalɛ Krɔŋkrɔŋ lɛ feɔ lɛ faŋŋ akɛ Yehowa ji wɔ-Bɔlɔ Kpeteŋkpele, Nyɔŋmɔ Ofe lɛ. Anyɛŋ akɛ lɛ aye hegbɔ loo akɛ mɔ ko ato enajiaŋ kɔkɔɔkɔ. Enɛ ji anɔkwale diɛŋtsɛ ni aŋma yɛ Biblia lɛ mli.—1 Mose 17:1; Jajelɔi 12:1.
Mɛi ni ŋmala Lalai awolo lɛ ateŋ mɔ kome kadi enɛ yɛ Yehowa he akɛ: “Bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” Blematsɛ Maŋtsɛ David ŋma akɛ: “Bo, Yehowa, onɔ̃ ji maŋtsɛyeli lɛ, ni bo ji mɔ ni ta nii fɛɛ nɔ ákɛ yitso!” Ni no tsirɛ gbalɔ Yeremia ni ale lɛ lɛ ni eŋma akɛ: “Yehowa, mɔ ko mɔ ko bɛ ní tamɔo! bo lɛ oje agbo, ni ogbɛi lɛ hu je agbo kɛ hewalɛ.”—Lala 83:19; 1 Kronika 29:11; Yeremia 10:6.
Te esa akɛ wɔkɛ anɔkwalei ni kɔɔ Nyɔŋmɔ he nɛɛ atsu nii yɛ wɔdaa gbi shihilɛ mli wɔha tɛŋŋ?
Mɔ ni sa akɛ efee mɔ titri yɛ wɔshihilɛ mli lɛ yɛ faŋŋ—wɔ-Bɔlɔ kɛ Wala Halɔ lɛ. Belɛ, ani efeŋ nɔ ni sa akɛ wɔɔte shi wɔshi henumɔ ni wɔɔná akɛ wɔgbala jwɛŋmɔ kɛba wɔ diɛŋtsɛ wɔnɔ—henumɔ ni baanyɛ aná mɛi komɛi anɔ hewalɛ fe mɛi krokomɛi lɛ? Shishitoo mlai ni nilee yɔɔ mli ni kudɔɔ mɔ lɛ ji ni ‘afee nii fɛɛ kɛwo Nyɔŋmɔ hiɛ nyam.’ (1 Korintobii 10:31) Gbalɔ Daniel fee nɔkwɛmɔnɔ kpakpa efɔ̃ shi yɛ enɛ gbɛfaŋ.
Yinɔsaji ni aŋmala ashwie shi haa wɔleɔ akɛ be ko lɛ, Babilon Maŋtsɛ Nebukadnezar hao yɛ lamɔ ko he ni ebi koni atsɔɔ lɛ shishi. Yɛ be mli ni mɔ fɛɛ mɔ yɔɔ hejaramɔ mli lɛ, Daniel kɛɛ maŋtsɛ lɛ nɔ ni etaoɔ ni ele lɛ. Ani Daniel kɛ yijiemɔ lɛ ha ehe? Dabi, ekɛ yijiemɔ lɛ ha “Nyɔŋmɔ [ni] yɔɔ ŋwɛi ní jieɔ teemɔŋ saji ashi” lɛ. Daniel tsa nɔ akɛ: “Jeee minii ní mile tsɔ fe hiɛkalɔi fɛɛ hewɔ ni ajie nɛkɛ teemɔŋ sane nɛɛ shi atsɔɔ mi.” Daniel ji mɔ ko ni kɛ shishitoo mla tsuɔ nii. Ebɛ naakpɛɛ mɔ akɛ yɛ Daniel wolo lɛ mli lɛ, awie ehe shii etɛ sɔŋŋ akɛ “nuu ni asumɔɔ osane naakpa” yɛ Nyɔŋmɔ hiɛ.—Daniel 2:28, 30; 9:23; 10:11, 19.
Kɛ́ okase Daniel lɛ, obaaná he sɛɛ. Nɔ titri ni he hiaa yɛ Daniel nɔkwɛmɔnɔ lɛ sɛɛnyiɛmɔ mli ji jwɛŋmɔ ni yɔɔ sɛɛ lɛ. Namɔ esa akɛ ajie eyi yɛ nɔ ni ofeɔ lɛ he? Bɔ fɛɛ bɔ ni oshihilɛ ji lɛ, obaanyɛ ofee nii ni ekɛ Biblia mli shishitoo mla ni he hiaa waa nɛɛ akpã gbee—Yehowa ji Nuntsɔ Maŋtsɛ lɛ. Nakai ni ooofee lɛ baaha ofee “nuu ni asumɔɔ osane naakpa” yɛ ehiɛ.
Agbɛnɛ, nyɛhaa wɔsusua shishijee shishitoo mlai enyɔ ni baanyɛ akudɔ wɔ yɛ adesai ateŋ sharamɔ mli lɛ he. Yɛ bɔ ni mɛi gbalaa jwɛŋmɔ kɛbaa amɛnɔ ní egbɛ eshwã lɛ fɛɛ sɛɛ lɛ, nɛkɛ mɔ kɛ mɔ teŋ sharamɔ nɛɛ ji nɔ ni kaa mɔ diɛŋtsɛ.
‘Kɛ Heshibaa Jwɛŋmɔ’
Mɛi ni kɛ amɛhe woɔ klɛŋklɛŋ gbɛhe mli lɛ efɔɔɔ miishɛɛ námɔ. Mɛi babaoo sumɔɔ shihilɛ ni hi fe fɛɛ, ni amɛmiitao no amrɔ nɔŋŋ. Yɛ amɛgbɛfaŋ lɛ, heshibaa ji gbɔjɔmɔ su ko. Amɛsusuɔ tsuishiŋmɛɛ he akɛ eji nɔ ko ni esa akɛ mɛi krokomɛi pɛ ajie lɛ kpo. Kɛ́ eba lɛ akɛ amɛná gbɛhe ko lɛ, no lɛ amɛŋmɛɔ nɔ fɛɛ nɔ feemɔ gbɛ. Ani osusuɔ akɛ nɔ kroko yɛ ni ooohala fe ni ooofee onii taakɛ amɛfeɔ lɛ?
Nyɔŋmɔ tsuji kɛ nakai su lɛ kpeɔ gbi fɛɛ gbi, shi esaaa akɛ no náa amɛnɔ hewalɛ. Kristofoi ni edara yɛ mumɔŋ lɛ kpɛlɛɔ shishitoo mla ni ji “jeee mɔ ni jieɔ ehe yi lɛ, ji mɔ ni sa, shi moŋ mɔ ni [Yehowa, NW] jieɔ eyi lɛ” nɔ.—2 Korintobii 10:18.
Kɛ́ okɛ shishitoo mla ni yɔɔ Filipibii 2:3, 4 lɛ tsu nii lɛ, ebaaye ebua. Nakai ŋmalɛ lɛ woɔ bo hewalɛ koni ‘okaŋmɛ mligbalamɔi loo yaka anunyam taomɔ gbɛ, shi moŋ okɛ heshibaa jwɛŋmɔ abu onanemɛi fe bo diɛŋtsɛ ohe.’ No hewɔ lɛ, ‘ofóŋ onɔ̃ mli, shi obaafó onaanyo nɔ̃ mli.’
Mɔ ko ni ná su kpakpa yɛ lɛ diɛŋtsɛ ehe, ní etsɔɔ bɔ ni eji yɛ gbɛ ni ja nɔ lɛ ji Gideon, kojolɔ ko ni hi shi yɛ blema Hebribii lɛ ateŋ lɛ. Etaooo ni etsɔ Israel hiɛnyiɛlɔ. Shi kɛlɛ, beni ahala Gideon koni etsu nakai gbɛhe lɛ he nii lɛ, egbala jwɛŋmɔ kɛtee bɔ ni esaaa akɛ mɔ ni sɔmɔɔ lɛ nɔ. Etsɔɔ mli akɛ: “Miweku lɛ ejwa yɛ Manase, ni mi ji gbekɛ kwraa yɛ mitsɛ we lɛ!”—Kojolɔi 6:12-16.
Kɛfata he lɛ, beni Yehowa ha Gideon ye kunim sɛɛ lɛ, Efraim hii lɛ kɛ lɛ bé. Te Gideon fee enii eha tɛŋŋ? Ani kunim ni eye lɛ ha enu he akɛ eji mɔ ko ni he hiaa waa? Dabi. Etsĩ hiɛkpatamɔ naa kɛtsɔ naajɔlɛ gbɛ ni ekɛha hetoo lɛ nɔ. ‘Mɛni mifee ni kɛ nyɛnɔ lɛ yeɔ hegbɔ?’ Gideon ná heshibaa jwɛŋmɔ.—Kojolɔi 8:1-3.
Eji anɔkwale akɛ, shihilɛi ni kɔɔ Gideon he lɛ ba afii babaoo ni eho nɛ. Shi, wɔbaaná he sɛɛ kɛji wɔsusu sane ni ba lɛ he. Obaanyɛ ona akɛ Gideon ná su ko ni yɔɔ srɔto yɛ nɔ ni ehe shi waa ŋmɛnɛ lɛ he, ni ehi shi yɛ naa ni ená he sɛɛ.
Su ni egbɛ eshwã ni gbalaa jwɛŋmɔ kɛbaa mɔ diɛŋtsɛ nɔ lɛ baanyɛ afite bɔ ni wɔnaa wɔhe akɛ wɔsa lɛ. Biblia mli shishitoo mlai lɛ baanyɛ ajaje nakai tɔtɔmɔi lɛ, ni ebaatsɔɔ wɔ bɔ ni wɔsu yɔɔ hã kɛji wɔkɛto wɔkɛ Bɔlɔ lɛ kɛ mɛi krokomɛi ateŋ sharamɔ he lɛ he.
Kɛ́ wɔkpɛtɛ Biblia shishitoo mlai ahe lɛ, wɔyeɔ nɛkɛ mi klɛŋklɛŋ su nɛɛ nɔ. Henumɔ loo gbɔmɛi ni wɔji lɛ kudɔɔɔ wɔ dɔŋŋ. Babaoo ni wɔkaseɔ jalɛ shishitoo mlai lɛ, babaoo ni wɔleɔ amɛ Shishitolɔ lɛ jogbaŋŋ. Hɛɛ, kadimɔ ni oookadi shishitoo mlai ni Nyɔŋmɔ kɛha lɛ jogbaŋŋ beni okaneɔ Biblia lɛ he baaba sɛɛnamɔ diɛŋtsɛ.—Kwɛmɔ akrabatsa lɛ mli.
Yehowa eha adesai anɔ ekwɔlɔ fe kooloi ni henumɔ tsirɛɔ amɛ kɛkɛ lɛ. Nyɔŋmɔ suɔmɔnaa nii ni wɔɔnyiɛ sɛɛ lɛ biɔ ni wɔkɛ ŋwɛi shishitoo mlai atsu nii. Nakai ni wɔɔfee lɛ baaha wɔkɛ wɔjeŋba he gbɛtsɔɔmɔ lɛ atsu nii jogbaŋŋ, gbɛtsɔɔmɔ nɔ̃ ni baakudɔ wɔ kɛbote Nyɔŋmɔ gbɛjianɔtoo hee ni ekɛbaaba lɛ mli. Biblia lɛ haa wɔ nɔ ni wɔɔdamɔ nɔ wɔkpa gbɛ akɛ etsɛŋ ni jeŋ fɛɛ gbɛjianɔtoo hee ko ni “jalɛ hiɔ mli lɛ” baaba.—2 Petro 3:13.
[Akrabatsa/Mfoniri ni yɔɔ baafa 6]
Biblia Shishitoo Mlai Komɛi ni Yeɔ Ebuaa
Yɛ weku lɛ mli:
“Mɔ ko mɔ ko akapele miiha ehe, shi moŋ mɔ fɛɛ mɔ apele aha enaanyo.”—1 Korintobii 10:24.
“Suɔmɔ . . . epeleee lɛ diɛŋtsɛ enɔ̃.”—1 Korintobii 13:4, 5.
“Nyɛteŋ mɔ fɛɛ mɔ asumɔ lɛ diɛŋtsɛ eŋa nakai, tamɔ lɛ diɛŋtsɛ ehe.”—Efesobii 5:33.
“Nyɛ yeigbayei lɛ, nyɛbaa nyɛhe shi nyɛhaa nyɛwumɛi.”—Kolosebii 3:18.
“Bó otsɛ ni fɔo lɛ toi, ni kaagbe onyɛ he guɔ, kɛ́ egbɔ lɛ.”—Abɛi 23:22.
Yɛ skul, nitsumɔhe, loo jarayeli mli:
“Shishiumɔ ŋsɛni lɛ, Yehowa miihĩ . . . Mɔ fɔŋ náa shishiumɔ nyɔmɔwoo.”—Abɛi 11:1, 18.
“Julɔ lɛ ekaju dɔŋŋ, shi moŋ ebɔ mɔdɛŋ ni ekɛ eniji atsu nitsumɔ kpakpa.”—Efesobii 4:28.
“Kɛ́ mɔ ko sumɔɔɔ akɛ etsuɔ nii lɛ, ekaye nii hu.”—2 Tesalonikabii 3:10.
“Ni nɔ fɛɛ nɔ ní nyɛfeɔ lɛ, nyɛjiea nyɛmusuŋ nyɛtsua, taakɛ [Yehowa, NW] nyɛtsuɔ nyɛhaa.”—Kolosebii 3:23.
“Wɔmiitao akɛ wɔba wɔjeŋ fɛfɛo yɛ nii fɛɛ mli.”—Hebribii 13:18.
Su ni ahiɛ yɛ ninámɔ he:
“Mɔ ni yeɔ oyai aná nii lɛ, eyeŋ ehe.”—Abɛi 28:20.
“Mɔ ni sumɔɔ shika lɛ, shika etɔŋ lɛ.”—Jajelɔ 5:9.
Ni mɔ aaajie bulɛ kpakpa kpo aha ehe:
‘Kɛji akɛ gbɔmɛi miitao amɛ diɛŋtsɛ amɛnunyam lɛ, ani eji anunyam?’—Abɛi 25:27.
“Ha mɔ kroko ajie oyi ni jeee bo diɛŋtsɛ odaa.”—Abɛi 27:2.
“Miikɛɛ nyɛteŋ mɔ fɛɛ mɔ akɛ, ekabu lɛ diɛŋtsɛ ehe tuutu fe bɔ ni sa akɛ ebuɔ ehe.”—Romabii 12:3.
“Kɛ́ efeɔ mɔ ko akɛ nɔ ko ji lɛ ni ejeee nɔ ko lɛ, lɛ diɛŋtsɛ ehe eshishiuɔ.”—Galatabii 6:3.
[Mfoniri ni yɔɔ baafa 5]
Daniel kɛ yijiemɔ ni sa hã Nyɔŋmɔ
[Mfoniri ni yɔɔ baafa 7]
Kɛ́ wɔkɛ mɛi krokomɛi ye yɛ Nyɔŋmɔ shishitoo mlai anaa lɛ, eyeɔ ebuaa ni wekukpaa kpakpa kɛ miishɛɛ hiɔ shi
[He ni Mfoniri ni yɔɔ baafa 7 lɛ Jɛ]
U.S. Fish & Wildlife Service, Washington, D.C./Robert Bridges