Nɛgbɛ Abaanyɛ Aná Anɔkwa Miishɛjemɔ yɛ?
“Nyɔŋmɔ kɛ wɔ-Nuŋtsɔ Yesu Kristo tsɛ lɛ, . . . shɛjeɔ wɔmii yɛ wɔmanehului lɛ fɛɛ mli.”—2 KORINTOBII 1:3, 4.
1. Mɛɛ shihilɛi baanyɛ aha miishɛjemɔ he ahia gbɔmɛi waa diɛŋtsɛ?
KUUMƆ hela baanyɛ aha mɔ ko anu he akɛ eshihilɛ efee shwɛm. Shikpɔŋhosomɔi, ahumii, kɛ hɔmɔ haa mɛi yeɔ ohia. Ta baanyɛ agbe weku mli bii, efite shiai, loo eha mɛi ashi amɛmaji amli ni amɛyatsɔmɔ abobalɔi yɛ maji krokomɛi anɔ. Jalɛ sane ni ayeee baanyɛ aha gbɔmɛi anu he akɛ he ko bɛ ni amɛbaanyɛ amɛtsɔ amɛhe kɛya kɛha yelikɛbuamɔ. Miishɛjemɔ he miihia gbɔmɛi ni haomɔi nɛɛ eba amɛnɔ lɛ waa diɛŋtsɛ. Nɛgbɛ abaanyɛ aná yɛ?
2. Mɛni hewɔ miishɛjemɔ ni Yehowa kɛhaa lɛ yɔɔ srɔto lɛ?
2 Aŋkroaŋkroi kɛ gbɛjianɔtoi komɛi bɔɔ mɔdɛŋ koni amɛkɛ miishɛjemɔ aha. Wɔkɛ hiɛsɔɔ yɔseɔ enɛ. Helooŋ gbɛfaŋ yelikɛbuamɔi ni akɛhaa lɛ yeɔ buaa kɛtsuɔ nibii ni he hiaa lɛ ahe nii yɛ be kukuoo mli. Shi Yehowa, anɔkwa Nyɔŋmɔ kome pɛ lɛ, baanyɛ asaa naagba lɛ fɛɛ ni ekɛ yelikɛbuamɔ ni he hiaa lɛ aha bɔni afee ni amanehului nɛɛ akaba dɔŋŋ. Biblia lɛ wieɔ ehe akɛ: “Ajɔɔ Nyɔŋmɔ kɛ wɔ-Nuŋtsɔ Yesu Kristo tsɛ lɛ, mɔ ni ji musuŋtsɔlɛi atsɛ kɛ miishɛjemɔ fɛɛ Nyɔŋmɔ lɛ, mɔ ni shɛjeɔ wɔmii yɛ wɔmanehului lɛ fɛɛ mli, koni wɔ hu wɔnyɛ wɔkɛ miishɛjemɔ, ni Nyɔŋmɔ ŋɔshɛjeɔ wɔ diɛŋtsɛ wɔmii lɛ, ashɛje mɛi ni naa amanehulu fɛɛ amanehulu lɛ amii.” (2 Korintobii 1:3, 4) Mɛɛ gbɛ nɔ Yehowa shɛjeɔ wɔmii yɛ?
Nɔ ni kɛ Naagbai Baa lɛ He Nitsumɔ
3. Miishɛjemɔ ni Nyɔŋmɔ kɛhaa lɛ tsuɔ nɔ ni kɛ adesai anaagbai ba lɛ he nii yɛ mɛɛ gbɛ nɔ?
3 Adesa weku muu lɛ fɛɛ ná emuu ni ayeee lɛ akɛ gboshinii yɛ Adam esha lɛ hewɔ, ni no kɛ naagbai babaoo ni naagbee lɛ ekɛ gbele baa lɛ ba. (Romabii 5:12) Akɛni Satan Abonsam ji “je nɛŋ lumɔ lɛ” hewɔ lɛ éha shihilɛ lɛ mli ewo wu. (Yohane 12:31; 1 Yohane 5:19) Yehowa fee babaoo fe shihilɛ ni ehiii ni adesai kɛkpeɔ lɛ he ŋkɔmɔ kɛkɛ ni eeeye. Etsu esuɔmɔ Bi koome lɛ kɛba akɛ kpɔmɔ nɔ koni ebakpɔ̃ mɛi, ni Ekɛɛ wɔ akɛ wɔbaanyɛ wɔye wɔhe kɛjɛ nibii ni ejɛ Adam esha lɛ mli kɛba lɛ amli kɛji akɛ wɔná E-Bi lɛ mli hemɔkɛyeli. (Yohane 3:16; 1 Yohane 4:10) Nyɔŋmɔ gba hu akɛ Yesu Kristo, ni aŋɔ hegbɛ fɛɛ aha lɛ yɛ ŋwɛi kɛ shikpɔŋ nɔ lɛ baakpata Satan kɛ eyiwalɛ nibii agbɛjianɔtoo lɛ fɛɛ hiɛ.—Mateo 28:18; 1 Yohane 3:8; Kpojiemɔ 6:2; 20:10.
4. (a) Mɛni Yehowa kɛha koni ewo hekɛnɔfɔɔ ni wɔyɔɔ yɛ eshiwoi ni kɔɔ kpɔmɔ he lɛ mli lɛ mli hewalɛ? (b) Mɛɛ gbɛ nɔ Yehowa tsɔɔ eyeɔ ebuaa wɔ koni wɔyoo be mli ni kpɔmɔ lɛ baaba?
4 Bɔni afee ni Nyɔŋmɔ awo hekɛnɔfɔɔ ni wɔyɔɔ yɛ eshiwoi lɛ amli lɛ mli hewalɛ lɛ, eŋma odaseyelii babaoo ni tsɔɔ akɛ nɔ fɛɛ nɔ ni egbaa lɛ baa mli lɛɛlɛŋ lɛ efɔ shi. (Yoshua 23:14) Ekɛ nɔ ni efee kɛkpɔ̃ etsuji kɛjɛ shihilɛi ni adesai susuɔ akɛ anyɛŋ akpɔ̃ mɛi kɛjɛ mli lɛ mli lɛ he saji efata Biblia lɛ he. (2 Mose 14:4-31; 2 Maŋtsɛmɛi 18:13–19:37) Ni Yehowa tsɔɔ kɛtsɔ Yesu Kristo nɔ akɛ gbɔmɛi ‘ahela fɛɛ hela’ ni aaatsa, kɛ gbohii ashi po ni aaatee lɛ fata eyiŋtoi lɛ ahe. (Mateo 9:35; 11:3-6) Mɛɛ be enɛɛmɛi fɛɛ baaba? Kɛha hetoohamɔ lɛ, nibii agbɛjianɔtoo momo nɛɛ naagbee ni tsɔɔ Nyɔŋmɔ ŋwɛi hee kɛ shikpɔŋ hee lɛ hiɛ lɛ mlitsɔɔmɔ yɛ Biblia lɛ mli. Yesu niiamlitsɔɔmɔ lɛ kɔɔ be ni wɔyɔɔ mli lɛ he.—Mateo 24:3-14; 2 Timoteo 3:1-5.
Miishɛjemɔ Kɛha Mɛi Komɛi ni Yɔɔ Amanehulu Mli
5. Beni Yehowa shɛjeɔ blema Israel mii lɛ, mɛni nɔ egbala amɛjwɛŋmɔ kɛma?
5 Wɔnaa bɔ ni Yehowa kɛ miishɛjemɔ ha blema Israel yɛ amanehulu be mli lɛ yɛ bɔ ni ekɛ amɛ ye ha lɛ mli. Etsɔɔ amɛ nɔ̃ Nyɔŋmɔ ni eji. Enɛ wo hekɛnɔfɔɔ ni amɛyɔɔ yɛ eshiwoi amli lɛ hewalɛ. Yehowa ha egbalɔi lɛ kɛ srɔtofeemɔi ni yɔɔ faŋŋ ni yɔɔ lɛ ni ji anɔkwa Nyɔŋmɔ ni hiɛ kã lɛ kɛ amagai ni nyɛɛɛ ahere amɛ diɛŋtsɛ kɛ amɛjálɔi lɛ ayiwala lɛ teŋ lɛ tsu nii. (Yesaia 41:10; 46:1; Yeremia 10:2-15) Beni Yehowa tsɔ Yesaia nɔ ekɛɛ akɛ, “Nyɛshɛjea, nyɛshɛjea mimaŋ lɛ mii” lɛ, etsirɛ egbalɔ lɛ koni ekɛ Edebɔɔ mli nitsumɔi lɛ amli nɔkwɛmɔnii kɛ niiamlitsɔɔmɔi atsu nii koni ekɛma Yehowa agbojee akɛ anɔkwa Nyɔŋmɔ kome pɛ lɛ nɔ mi.—Yesaia 40:1-31.
6. Mɛɛ okadii Yehowa kɛhaa yɛ bei komɛi amli ni tsɔɔ be mli ni abaaná kpɔmɔ?
6 Bei komɛi lɛ, Yehowa kɛ miishɛjemɔ haa kɛtsɔ be ni abaakpɔ̃ ewebii lɛ ni etsɔɔ lɛ nɔ, ni ji be ni bɛŋkɛ loo nɔ ni yɔɔ shɔŋŋ. Beni Israelbii ni awaa amɛyi lɛ akpɔmɔ kɛmiijɛ Mizraim lɛ bɛŋkɛɔ lɛ, ekɛɛ amɛ akɛ: “Eshwɛ amanehulu kome ni mikɛbaaba Farao kɛ Mizraim nɔ, ni no sɛɛ lɛ eeeha nyɛje biɛ nyɛya.” (2 Mose 11:1) Beni maji etɛ ni efee ekome batutua Yuda yɛ Maŋtsɛ Yehoshafat gbii lɛ amli lɛ, Yehowa kɛɛ amɛ akɛ Ebaawuu eha amɛ “wɔ́.” (2 Kronika 20:1-4, 14-17) Nɔ ni tamɔɔɔ nakai lɛ, Yesaia ŋma amɛkpɔmɔ kɛmiijɛ Babilon lɛ he sane efɔ̃ shi nɔ ni miihe ashɛ afii 200 kɛtsɔ hiɛ, ni akɛ ehe saji krokomɛi ha kɛtsɔ Yeremia nɔ aaafee afii 100 dani akpɔ̃ amɛ. Kwɛ bɔ ni nakai gbalɛi lɛ wo Nyɔŋmɔ tsuji lɛ hewalɛ ha beni amɛkpɔmɔ be lɛ bɛŋkɛɔ lɛ!—Yesaia 44:26–45:3; Yeremia 25:11-14.
7. Mɛni bei pii lɛ efataa kpɔmɔ he shiwoi lɛ ahe, ni te enɛ sa gbɔmɛi anɔkwafoi ni yɔɔ Israel lɛ ahe eha tɛŋŋ?
7 Esa kadimɔ waa akɛ bei pii lɛ saji ni kɔɔ Mesia lɛ he lɛ yɛ shiwoi ni shɛje Nyɔŋmɔ webii amii lɛ mli. (Yesaia 53:1-12) Enɛ kɛ hiɛnɔkamɔ ha gbɔmɛi anɔkwafoi lɛ yɛ yinɔi fɛɛ mli, beni amɛkɛ kaai babaoo kpeɔ lɛ. Wɔkaneɔ yɛ Luka 2:25 lɛ akɛ: “Naa, nuu ko yɛ Yerusalem ni atsɛɔ lɛ Simeon, ni nakai nuu lɛ jalɔ ji lɛ ni esheɔ Nyɔŋmɔ gbeyei, eekwɛ Israel miishɛjemɔ [yɛ anɔkwale mli lɛ, Mesia ni baa] lɛ gbɛ, ni mumɔ krɔŋkrɔŋ yɛ enɔ.” Simeon le Mesia lɛ he hiɛnɔkamɔi ni aŋma yɛ Ŋmalɛi lɛ amli lɛ, ni emlibaa gbɛ ni ekpa lɛ ná eshihilɛ nɔ hewalɛ. Eleee bɔ ni baafee ni ebaaba mli, ni ehiii shi koni ena yiwalaheremɔ ni agba he sane afɔ shi lɛ mlibaa diɛŋtsɛ, shi emii shɛ ehe beni ena mɔ ni baatsɔ Mɔ ni Nyɔŋmɔ ‘kɛbaahere mɛi ayiwala’ lɛ.—Luka 2:30.
Akɛ Miishɛjemɔ Ha Kɛtsɔ Kristo Nɔ
8. Mɛɛ gbɛ nɔ yelikɛbuamɔ ni Yesu kɛha lɛ yɔɔ srɔto yɛ nɔ ni mɛi babaoo susu akɛ no he hiaa amɛ lɛ he yɛ?
8 Beni Yesu Kristo tsuɔ eshikpɔŋ nɔ sɔɔmɔ nitsumɔ lɛ, jeee be fɛɛ be ekɛ yelikɛbuamɔ ni gbɔmɛi lɛ susuɔ akɛ ehe hiaa amɛ lɛ haa. Mɛi komɛi kpa Mesia ko ni baaha amɛye amɛhe kɛjɛ Roma nɔyeli lɛ shishi lɛ gbɛ. Shi Yesu fiii nɔyeli butumɔ sɛɛ; ekɛɛ amɛ koni ‘amɛŋɔ Kaisare nii amɛha Kaisare.’ (Mateo 22:21) Nyɔŋmɔ yiŋtoo lɛ tsɔɔ babaoo fe gbɔmɛi akpɔmɔ kɛmiijɛ maŋkwramɔŋ hewalɛ ko ni yeɔ amɛnɔ lɛ adɛŋ. Gbɔmɛi lɛ miisumɔ ni amɛwo Yesu maŋtsɛ, shi ekɛɛ amɛ akɛ ekɛ ‘esusuma baaha yɛ mɛi pii akpɔmɔ hewɔ.’ (Mateo 20:28; Yohane 6:15) Be shɛko ni abaawo lɛ maŋtsɛ, ni Yehowa ji mɔ ni kɛ nɔyeli hegbɛ lɛ baaha lɛ, shi jeee asafokui ni shihilɛ eje amɛtsine.
9. (a) Mɛni ji miishɛjemɔ shɛɛ sane ni Yesu jaje lɛ? (b) Mɛɛ gbɛ nɔ Yesu fee bɔ ni shɛɛ sane lɛ kɔɔ shihilɛi ni gbɔmɛi lɛ kɛkpeɔ lɛ he lɛ he nɔkwɛmɔnɔ yɛ? (d) Mɛɛ shishitoo nɔ̃ Yesu sɔɔmɔ nitsumɔ lɛ to shishi?
9 Miishɛjemɔ ni Yesu kɛba lɛ yɛ “Nyɔŋmɔ maŋtsɛyeli lɛ he sanekpakpa lɛ” mli. Enɛ ji shɛɛ sane ni Yesu jaje yɛ he fɛɛ he ni etee lɛ. (Luka 4:43) Ema bɔ ni nakai shɛɛ sane lɛ kɔɔ adesai adaa gbi naagbai ahe lɛ nɔ mi kɛtsɔ nɔ ni lɛ akɛ Mesia Nɔyelɔ lɛ baafee kɛha adesai lɛ he nɔkwɛmɔnɔ ni efee lɛ nɔ. Eha aŋkroaŋkroi ni naa amanehulu lɛ yiŋtoo hee ni amɛkɛaahi shi kɛtsɔ shwilafoi kɛ mumuii ni etsa (Mateo 12:22; Marko 10:51, 52), mɛi ni ekumɔ ni etsa (Marko 2:3-12), nanemɛi Israelbii ahelai ni yɔɔ nyaŋemɔ ni etsa (Luka 5:12, 13), kɛ amɛhe ni eha amɛye kɛjɛ helai krokomɛi ni mli wawai amli lɛ nɔ. (Marko 5:25-29) Ekɛ hejɔlɛ kpele ha wekui ni yeɔ ŋkɔmɔ lɛ kɛtsɔ amɛbii ashi ni etee kɛjɛ gbele mli lɛ nɔ. (Luka 7:11-15; 8:49-56) Efee nyɛmɔ ni eyɔɔ ni ekɛaakudɔ ahumii ni yɔɔ oshara kɛ nyɛmɔ ni eyɔɔ akɛ eeeha asafo babaoo ni hɔmɔ yeɔ amɛ lɛ niyenii lɛ he nɔkwɛmɔnɔ. (Marko 4:37-41; 8:2-9) Kɛfata he lɛ, Yesu tsɔɔ amɛ shihilɛ mli shishitoo mlai ni baaye abua amɛ ni amɛtsu naagbai ni yɔɔ lɛ ahe nii jogbaŋŋ, ní kɛ jalɛ nɔyeli ni yɔɔ Mesia lɛ shishi lɛ he hiɛnɔkamɔ baawo amɛtsui mli lɛ he nii. No hewɔ lɛ, beni Yesu tsuɔ esɔɔmɔ nitsumɔ lɛ, jeee mɛi ni kɛ hemɔkɛyeli bo lɛ toi lɛ amii pɛ kɛkɛ eshɛje, shi moŋ eto shishitoo nɔ ko hu ni baawo mɛi ni baahi shi yɛ afii akpei abɔ ni baaba lɛ mli lɛ hewalɛ.
10. Mɛni Yesu afɔleshaa lɛ nyɛɔ ehaa anáa?
10 Beni Yesu kɛ ewala akɛ adesa lɛ esha afɔle ni atee lɛ shi kɛtee ŋwɛi shihilɛ mli lɛ sɛɛ nɔ ni fe afii 60 lɛ, akɛ mumɔ tsirɛ bɔfo Yohane ni eŋma akɛ: “Mibii bibii, miiŋma nyɛ nii nɛɛ, koni nyɛkafee esha. Ni kɛ́ mɔ ko fee esha jiŋŋ, wɔyɛ mlidamɔlɔ yɛ tsɛ lɛ ŋɔɔ, Yesu Kristo, jalɔ lɛ; ni lɛ ji wɔhe eshai lɛ ahe kpatamɔnɔ; shi jeee wɔnɔ̃ lɛ kɛkɛ he, shi moŋ jeŋ muu lɛ fɛɛ nɔ̃ lɛ hu he.” (1 Yohane 2:1, 2) Yesu adesa afɔleshaa ni yeɔ emuu lɛ mli sɛɛnamɔi lɛ hewɔ lɛ, ehaa wɔnáa miishɛɛ diɛŋtsɛ. Wɔle akɛ wɔbaanyɛ wɔná eshaifaa, henilee ni mli tse, wɔkɛ Nyɔŋmɔ teŋ wekukpaa kpakpa, kɛ naanɔ wala he gbɛkpamɔ.—Yohane 14:6; Romabii 6:23; Hebribii 9:24-28; 1 Petro 3:21.
Mumɔ Krɔŋkrɔŋ lɛ ákɛ Miishɛjelɔ
11. Mɛɛ miishɛjemɔ he gbɛjianɔtoo kroko hu Yesu wo he shi dani egbo?
11 Beni Yesu kɛ ebɔfoi lɛ yɔɔ yɛ naagbee gbɛkɛ dani egbo afɔleshaa gbele lɛ, ewie gbɛjianɔ kroko hu ni eŋwɛi Tsɛ lɛ eto koni eshɛje amɛmii lɛ he. Yesu kɛɛ akɛ: “Mabi tsɛ lɛ, ni eeeha nyɛ hefatalɔ [miishɛjelɔ; Hela, pa·raʹkle·tos] kroko, koni ekɛ nyɛ ahi shi kɛya naanɔ; anɔkwale mumɔ lɛ.” Yesu ma nɔ mi kɛha amɛ akɛ: “Hefatalɔ lɛ, ni ji Mumɔ krɔŋkrɔŋ lɛ, . . . eeetsɔɔ nyɛ nii fɛɛ, ni eeekai nyɛ nii fɛɛ ni mikɛɛ nyɛ lɛ.” (Yohane 14:16, 17, 26) Mɛɛ gbɛ nɔ mumɔ krɔŋkrɔŋ lɛ shɛje amɛmii diɛŋtsɛ yɛ?
12. Mɛɛ gbɛ nɔ mumɔ krɔŋkrɔŋ lɛ gbɛfaŋnɔ akɛ yelikɛbualɔ kɛha Yesu kaselɔi lɛ ajwɛŋmɔŋ nikaimɔ lɛ kɛ miishɛjemɔ ebaha mɛi babaoo yɛ?
12 Bɔfoi lɛ anine eshɛ tsɔɔmɔi babaoo nɔ kɛjɛ Yesu ŋɔɔ. Yɛ anɔkwale mli lɛ, amɛhiɛ kpaŋ niiashikpamɔ lɛ nɔ, shi ani amɛbaakai nɔ ni ekɛɛ amɛ lɛ diɛŋtsɛ? Ani amɛhiɛ baakpa nitsɔɔmɔi ni he hiaa lɛ anɔ akɛni amɛjwɛŋmɔŋ nikaimɔ yeee emuu lɛ hewɔ? Yesu ma nɔ mi kɛha amɛ akɛ mumɔ krɔŋkrɔŋ lɛ ‘baakai amɛ nibii fɛɛ ni ekɛɛ amɛ lɛ.’ No hewɔ lɛ, aaafee Yesu gbele lɛ sɛɛ afii kpaanyɔ lɛ, Mateo nyɛ eŋma klɛŋklɛŋ Sanekpakpa lɛ, nɔ ni eŋma Yesu Gɔŋ nɔ Shiɛmɔ ni yɔɔ miishɛɛ, enɔkwɛmɔnii babaoo ni kɔɔ Maŋtsɛyeli lɛ he lɛ, kɛ eniiamlitsɔɔmɔ ni yɔɔ fitsofitso ni kɔɔ ba ni eba lɛ he lɛ yɛ mli lɛ. Nɔ ni fe afii 50 sɛɛ lɛ, bɔfo Yohane nyɛ eŋma sane ni ja ni tsɔɔ Yesu shihilɛ yɛ shikpɔŋ nɔ lɛ naagbee gbii fioo lɛ ahe saji ni yɔɔ faŋŋ lɛ efɔ shi. Kwɛ bɔ ni wiemɔi ni ajɛ mumɔŋ aŋma nɛɛ etee nɔ efee hewalɛwoo nɔ kɛbashi wɔbe nɛɛ mli!
13. Mɛɛ gbɛ nɔ mumɔ krɔŋkrɔŋ lɛ sɔmɔ akɛ tsɔɔlɔ kɛha mra be mli Kristofoi lɛ yɛ?
13 Kɛfata wiemɔi ni mumɔ krɔŋkrɔŋ lɛ kai kaselɔi lɛ he lɛ, etsɔɔ amɛ nii, ni eha amɛná Nyɔŋmɔ yiŋtoo lɛ he shishinumɔ babaoo. Beni Yesu kɛ ekaselɔi lɛ yɔɔ lolo lɛ, ekɛɛ amɛ nibii ni no mli lɛ amɛnuuu shishi jogbaŋŋ lɛ. Shi kɛlɛ, sɛɛ mli beni mumɔ krɔŋkrɔŋ lɛ tsirɛ Yohane, Petro, Yakobo, Yuda, kɛ Paulo lɛ, amɛŋmala Nyɔŋmɔ yiŋtoi lɛ ahe shishinumɔi heei lɛ amlitsɔɔmɔi. No hewɔ lɛ, mumɔ krɔŋkrɔŋ lɛ sɔmɔ akɛ tsɔɔlɔ, ni ekɛ nɔmimaa ni mli wa ha kaselɔi lɛ akɛ Nyɔŋmɔ miifi amɛsɛɛ.
14. Mumɔ krɔŋkrɔŋ lɛ ye ebua Yehowa webii lɛ yɛ mɛɛ gbɛ̀i anɔ?
14 Nikeenii ni ji mumɔ lɛ ni akɛha yɛ naakpɛɛ gbɛ nɔ lɛ hu kɛ odaseyeli ha akɛ Nyɔŋmɔ ejie eduromɔ lɛ kɛje heloonaa Israel nɔ kɛba Kristofoi asafo lɛ nɔ. (Hebribii 2:4) Nakai mumɔ lɛ yibii ni yɔɔ aŋkroaŋkroi ashihilɛi amli lɛ hu ji nɔ ko ni he hiaa ni akɛyɔseɔ mɛi ni ji Yesu kaselɔi diɛŋtsɛ lɛ. (Yohane 13:35; Galatabii 5:22-24) Ni mumɔ lɛ wo nakai asafo lɛ mli bii lɛ hewalɛ koni amɛfee odasefoi ni yɔɔ ekãa ni sheee gbeyei.—Bɔfoi lɛ Asaji 4:31.
Yelikɛbuamɔ ni Akɛha Beni Ayɔɔ Nɔnyɛɛ ni Naa Wa Shishi
15. (a) Mɛɛ nɔnyɛɛi Kristofoi kɛkpe yɛ blema kɛ amrɔ nɛɛ? (b) Mɛni hewɔ bei komɛi lɛ hewalɛwoo he baanyɛ ahia mɛi ni kɛ hewalɛwoo haa lɛ?
15 Mɛi fɛɛ ni etuu amɛhe amɛha Yehowa ni amɛyeɔ lɛ anɔkwa lɛ kɛ yiwaa ko kpeɔ. (2 Timoteo 3:12) Kɛlɛ, Kristofoi babaoo kɛ nɔnyɛɛ ni naa wa diɛŋtsɛ ekpe. Yɛ ŋmɛnɛŋmɛnɛ beaŋ lɛ, basabasafeelɔi ehao mɛi komɛi, ni amɛkɛ amɛ ewo yiwalɛ ŋsarai, tsuŋwoohei, kɛ gboklɛfoi ni tsuɔ nii dɛŋdɛŋ atsuŋwoohei amli yɛ shihilɛi ni ehiii kwraa mli. Nɔyelii diɛŋtsɛ etsɔmɔ shitee-kɛ-wolɔi, loo amɛŋmɛ mlakwalɔi agbɛ koni amɛtsu yiwalɛ nitsumɔi ni agbalaaa amɛtoi yɛ he. Kɛfata he lɛ, Kristofoi kɛ gbɔmɔtsoŋ naagbai ni naa wa loo weku mli naagbai ni naa wa ekpe. Nɔnyɛɛ hu baanyɛ aba Kristofonyo ni eda yɛ mumɔŋ ni yeɔ ebuaa nanemɛi heyelilɔi babaoo koni amɛtsu jaramɔ shihilɛi ahe nii lɛ nɔ. Yɛ shihilɛ ni tamɔ nɛkɛ mli lɛ, hewalɛwoo he baanyɛ ahia mɔ ni kɛ hewalɛwoo haa lɛ.
16. Mɛɛ gbɛ nɔ David nine shɛ yelikɛbuamɔ nɔ beni eyɔɔ nɔnyɛɛ kpele shishi lɛ?
16 Beni Maŋtsɛ Saul nyiɛ David sɛɛ koni egbe lɛ lɛ, David tee Nyɔŋmɔ ŋɔɔ akɛ e-Yelikɛbualɔ, ni ekpa fai akɛ: “Nyɔŋmɔ, bo mifaikpamɔ lɛ toi. Ofiji ashishi hɔ̃ɔŋ lɛ mli mibaa abo yɛ.” (Lala 54:4, 6; 57:2) Ani David nine shɛ yelikɛbuamɔ nɔ? Hɛɛ, enine shɛ nɔ. Yɛ nakai be lɛ mli lɛ, Yehowa kɛ gbalɔ Gad kɛ osɔfo Abiatar tsu nii koni amɛkɛ gbɛtsɔɔmɔ aha David, ni Ekɛ Saul bi Yonatan tsu nii koni ekɛwo oblanyo lɛ hewalɛ. (1 Samuel 22:1, 5; 23:9-13, 16-18) Yehowa ŋmɛ Filistibii lɛ hu agbɛ koni amɛbatutua shikpɔŋ lɛ, ni no jie Saul jwɛŋmɔ kɛjɛ esɛɛnyiɛmɔ nɔ.—1 Samuel 23:27, 28.
17. Beni Yesu yɔɔ nɔnyɛɛ ni naa wa waa shishi lɛ, nɛgbɛ etee kɛha yelikɛbuamɔ?
17 Yesu Kristo diɛŋtsɛ baje nɔnyɛɛ ni naa wa waa shishi beni eshihilɛ yɛ shikpɔŋ nɔ lɛ bɛŋkɛɔ enaagbee lɛ. Ele bɔ ni ejeŋba baanyɛ asa eŋwɛi Tsɛ lɛ gbɛi lɛ he eha kɛ nɔ ni ebaatsɔɔ kɛha adesai fɛɛ awɔsɛɛ shihilɛ lɛ diɛŋtsɛ. Ekɛ ekãa sɔle, ni ‘ehe jara lɛ’ po. Nyɔŋmɔ kwɛ koni Yesu nine ashɛ sɛɛfimɔ ni he hiaa lɛ nɔ yɛ nakai jaramɔ be lɛ mli.—Luka 22:41-44.
18. Mɛɛ miishɛjemɔ Nyɔŋmɔ kɛha mra be mli Kristofoi ni awa amɛyi waa lɛ?
18 Yiwaa ni Kristofoi lɛ kɛkpe beni ato klɛŋklɛŋ afii 100 lɛ mli asafoi lɛ ashishi lɛ naa wa aahu akɛ amɛ fɛɛ amɛshi Yerusalem, ja bɔfoi lɛ pɛ ni shiii. Agbala hii kɛ yei diɛŋtsɛ kɛjɛ amɛshiai amli. Mɛɛ miishɛjemɔ Nyɔŋmɔ kɛha amɛ? No ji nɔmimaa ni yɔɔ e-Wiemɔ lɛ mli ni tsɔɔ akɛ amɛyɛ “jwetri ni hi fe no aahu ni hiɔ shi daa” lɛ, nɔ ni ji naanɔ gboshinii ko ni yɔɔ ŋwɛi ni amɛkɛ Kristo baaná lɛ. (Hebribii 10:34; Efesobii 1:18-20) Beni amɛtee nɔ amɛshiɛ lɛ, amɛna odaseyeli ni tsɔɔ akɛ Nyɔŋmɔ mumɔ lɛ kɛ amɛ yɛ, ni amɛniiashikpamɔi lɛ ha amɛná yiŋtoo kroko hu ni amɛaadamɔ nɔ amɛná miishɛɛ.—Mateo 5:11, 12; Bɔfoi lɛ Asaji 8:1-40.
19. Eyɛ mli akɛ Paulo kɛ yiwaa ni naa wa kpe moŋ, shi te enu miishɛjemɔ ni Nyɔŋmɔ kɛhaa lɛ he eha tɛŋŋ?
19 Yɛ naagbee lɛ, Saulo (Paulo) ni no mli lɛ, lɛ diɛŋtsɛ eji mɔ ni waa mɔ yi waa lɛ, batsɔ mɔ ni awaa lɛ yi akɛni ebatsɔ Kristofonyo lɛ hewɔ. Yɛ Kipro ŋshɔkpɔ lɛ nɔ lɛ, ŋkunyaayelɔ ko bɔ mɔdɛŋ koni etsĩ Paulo shiɛmɔ nitsumɔ lɛ naa kɛtsɔ shishiumɔ kɛ apasa wiemɔi anɔ. Atswia Paulo tɛi yɛ Galata, ni ashi lɛ koni egbo. (Bɔfoi lɛ Asaji 13:8-10; 14:19) Akɛ kpãai yi lɛ yɛ Makedonia. (Bɔfoi lɛ Asaji 16:22, 23) Yɛ maŋ basabasafeemɔ ni ba yɛ Efeso lɛ sɛɛ lɛ, eŋma akɛ: “Wɔna nɔ tsɔ̃, fe bɔ ni wɔɔnyɛ po, ni wɔhiɛ kãaa wala nɔ tete; shi moŋ wɔ diɛŋtsɛ wɔna yɛ wɔmli faŋŋ akɛ wɔbaagboi, koni wɔkaŋɔ wɔhiɛ wɔfɔ wɔ diɛŋtsɛ wɔhe nɔ, shi moŋ wɔŋɔfɔ Nyɔŋmɔ ni teeɔ gbohii ashi lɛ nɔ.” (2 Korintobii 1:8, 9) Shi Paulo ŋma miishɛjemɔ wiemɔi ni atsɛ yisɛɛ yɛ nikasemɔ nɛɛ kuku ni ji 2 lɛ mli lɛ yɛ nakai wolo ni eŋma lɛ nɔŋŋ mli.—2 Korintobii 1:3, 4.
20. Mɛni wɔbaasusu he yɛ nikasemɔ ni nyiɛ sɛɛ lɛ mli?
20 Te ooofee tɛŋŋ oná gbɛfaŋnɔ yɛ miishɛjemɔ nɛɛ kɛhamɔ mli lɛ? Mɛi babaoo yɛ wɔbe nɛɛ mli ni enɛ he bahiaa amɛ kɛ́ amɛmiiye awerɛho yɛ oshara ni eshara mɛi akpei abɔ loo yɛ amanehulu ni eba amɛ pɛ amɛnɔ lɛ hewɔ. Yɛ nikasemɔ ni nyiɛ sɛɛ lɛ mli lɛ, wɔbaasusu bɔ ni wɔbaafee wɔkɛ miishɛjemɔ aha yɛ shihilɛi enyɔ nɛɛ fɛɛ mli lɛ he.
Ani Okaiɔ?
• Mɛni hewɔ miishɛjemɔ ni jɛ Nyɔŋmɔ ŋɔɔ lɛ nɔ bɛ lɛ?
• Mɛɛ miishɛjemɔ akɛha kɛtsɔ Kristo nɔ?
• Mɛɛ gbɛ nɔ mumɔ krɔŋkrɔŋ lɛ ji miishɛjelɔ yɛ?
• Okɛ miishɛjemɔi ni Nyɔŋmɔ kɛha etsuji beni amɛyɔɔ nɔnyɛɛ ni naa wa shishi lɛ he nɔkwɛmɔnii aha.
[Mfonirii ni yɔɔ baafa 15]
Biblia lɛ tsɔɔ wɔ akɛ Yehowa kɛ miishɛjemɔ ha kɛtsɔ ewebii lɛ ni ekpɔ̃ amɛ lɛ nɔ
[Mfonirii ni yɔɔ baafa 16]
Yesu kɛ miishɛjemɔ ha kɛtsɔ nitsɔɔmɔ, tsamɔ, kɛ gbohii ashi ni etee lɛ nɔ
[Mfoniri ni yɔɔ baafa 18]
Yesu nine shɛ yelikɛbuamɔ nɔ kɛjɛ ŋwɛi