‘Naa! Wɔ-nyɔŋmɔ lɛ Nɛ’
Saji ni asusu he yɛ nikasemɔi enyɔ nɛɛ mli lɛ damɔ Tsi Obɛŋkɛ Yehowa wolo lɛ, ní ajie lɛ kpo yɛ kpokpaa wulu nɔ kpeei ni afee yɛ jeŋ fɛɛ yɛ afi 2002 kɛ afi 2003 lɛ nɔ.—Kwɛmɔ sane ni ji “Etsu Hiamɔ Nii ko ni Yɔɔ Mitsuiŋ lɛ He Nii” ni yɔɔ baafa 20 lɛ mli.
“Naa, wɔ-Nyɔŋmɔ lɛ ní wɔhiɛ kã enɔ, akɛ eeehere wɔyiwala lɛ nɛ! Mɔnɛ ji Yehowa . . . lɛ!”—YESAIA 25:9.
1, 2. (a) Te Yehowa tsɛ́ blematsɛ Abraham eha tɛŋŋ, ni mɛɛ sane ekolɛ enɛ baaha wɔbi? (b) Mɛɛ gbɛ nɔ Biblia lɛ maa nɔ mi kɛhaa wɔ akɛ abaanyɛ aná akɛ Nyɔŋmɔ teŋ wekukpaa ni bɛŋkɛ kpaakpa?
“MISHIEŊTSƐ.” Nakai ji bɔ ni Yehowa, ŋwɛi kɛ shikpɔŋ Bɔlɔ lɛ tsɛ́ blematsɛ Abraham. (Yesaia 41:8) Susumɔ he okwɛ—adesa folo kɛkɛ kɛ jeŋ muu fɛɛ Nuŋtsɔ Maŋtsɛ lɛ miibɔ naanyo! Ekolɛ obaabi akɛ, ‘Ani manyɛ mabɛŋkɛ Nyɔŋmɔ nakai?’
2 Biblia lɛ maa nɔ mi kɛhaa wɔ akɛ abaanyɛ aná akɛ Nyɔŋmɔ teŋ wekukpaa ni bɛŋkɛ kpaakpa. Aha Abraham ná wekukpaa ni bɛŋkɛ kpaakpa nɛɛ ejaakɛ ‘ehe Yehowa eye.’ (Yakobo 2:23) Ŋmɛnɛ hu, Yehowa ‘kɛ mɛi ni ja bɔɔ.’ (Abɛi 3:32) Biblia lɛ woɔ wɔ hewalɛ yɛ Yakobo 4:8 akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” Eyɛ faŋŋ akɛ, kɛ́ wɔfee nii ni he hiaa ni wɔtsi wɔbɛŋkɛ Yehowa lɛ, ebaatsu he nii. Yɛ anɔkwale mli lɛ, ebaatsi ebɛŋkɛ wɔ. Shi ani wiemɔi ni jɛ mumɔŋ nɛɛ tsɔɔ akɛ wɔ—eshafeelɔi, adesai ni yeee emuu lɛ—atsu he nii klɛŋklɛŋ? Dabi kwraa. Wɔbaanyɛ wɔná wɔkɛ Yehowa teŋ naanyobɔɔ akɛni wɔsuɔmɔ Nyɔŋmɔ lɛ etsu nibii enyɔ ni he hiaa ahe nii lɛ hewɔ.—Lala 25:14.
3. Mɛɛ nibii enyɔ ní Yehowa etsu he nii haa wɔnyɛɔ wɔkɛ lɛ bɔɔ naanyo?
3 Klɛŋklɛŋ lɛ, Yehowa to gbɛjianɔ koni Yesu “[aŋɔ] esusuma lɛ eha yɛ mɛi pii akpɔmɔ hewɔ.” (Mateo 20:28) Nakai kpɔmɔ afɔleshaa lɛ haa wɔnyɛɔ wɔbɛŋkɛɔ Nyɔŋmɔ. Biblia lɛ jajeɔ akɛ: “Wɔsumɔɔ lɛ, ejaakɛ lɛ tsutsu esumɔ wɔ.” (1 Yohane 4:19) Hɛɛ, akɛni Nyɔŋmɔ ‘tsutsu sumɔ wɔ’ hewɔ lɛ, eto shishitoo nɔ̃ efɔ̃ shi eha wɔ koni wɔkɛ lɛ abɔ naanyo. Nɔ ni ji enyɔ lɛ, Yehowa eha wɔle lɛ. Yɛ naanyo fɛɛ naanyo ní wɔbɔɔ lɛ mli lɛ, naanyobɔɔ lɛ damɔ le ni wɔleɔ mɔ lɛ, kɛ miishɛɛ kɛ bulɛ ní wɔnáa wɔhaa sui krɛdɛɛi ní eyɔɔ lɛ nɔ. Susumɔ nɔ ni enɛ tsɔɔ lɛ he okwɛ. Eji Yehowa ji Nyɔŋmɔ ni kɛ ehe etee ni anyɛɛɛ ale lɛ kulɛ, wɔnyɛŋ wɔbɛŋkɛ lɛ kɔkɔɔkɔ. Ni kɛlɛ, yɛ nɔ najiaŋ ni Yehowa kɛ ehe aaatee lɛ, eesumɔ moŋ ni wɔle lɛ. (Yesaia 45:19) Ehaa wɔleɔ lɛ yɛ e-Wiemɔ ni ji Biblia lɛ mli kɛ wiemɔ ni wɔbaanyɛ wɔnu shishi—odaseyeli ni tsɔɔ akɛ jeee akɛ esumɔɔ wɔ kɛkɛ, shi moŋ eetao ni wɔle lɛ ní wɔsumɔ lɛ akɛ wɔŋwɛi Tsɛ.
4. Te wɔbaanu he yɛ Yehowa he wɔha tɛŋŋ yɛ be mli ni wɔnáa wɔleɔ esui lɛ jogbaŋŋ lɛ?
4 Ani ona gbekɛ bibioo ko ní ekɛ enine miitsɔɔ etsɛ kɛmiitsɔɔ enanemɛi, ní no sɛɛ lɛ ekɛ miishɛɛ kɛ mlifilimɔ miikɛɛ akɛ, “Mipapa nɛ” dã? Nyɔŋmɔ jálɔi yɛ yiŋtoo fɛɛ ní amɛaadamɔ nɔ amɛnu he nakai yɛ Yehowa he. Biblia lɛ egba efɔ̃ shi akɛ be ko baaba ní gbɔmɛi anɔkwafoi kɛ miishɛɛ baawie akɛ: ‘Naa! wɔ-Nyɔŋmɔ lɛ nɛ.’ (Yesaia 25:8, 9) Babaoo ní wɔnáa Yehowa sui lɛ ahe shishinumɔ ní mli kwɔ lɛ, babaoo ni wɔnuɔ he akɛ wɔyɛ Tsɛ ní hi fe fɛɛ kɛ Naanyo ni bɛŋkɛ kpaakpa ní wɔbaanyɛ wɔná. Hɛɛ, Yehowa sui ashishinumɔ lɛ haa wɔ yiŋtoo babaoo ni wɔɔdamɔ nɔ wɔtsi wɔbɛŋkɛ lɛ kpaakpa. No hewɔ lɛ nyɛhaa wɔpɛia bɔ ni Biblia lɛ jieɔ Yehowa sui titrii—hewalɛ, jalɛsaneyeli, nilee, kɛ suɔmɔ kpo etsɔɔ lɛ mli wɔkwɛa. Yɛ nikasemɔ nɛɛ mli lɛ, wɔbaasusu sui nɛɛ ateŋ klɛŋklɛŋ etɛ lɛ ahe.
“Ehewalɛ Teke Nɔ”
5. Mɛni hewɔ eja gbɛ akɛ atsɛɔ Yehowa pɛ akɛ “Ofe” lɛ, ni mɛɛ gbɛ̀i anɔ ekɛ ehewalɛ kpele lɛ tsuɔ nii yɛ?
5 Yehowa ‘hewalɛ teke nɔ.’ (Hiob 37:23) Yeremia 10:6 kɛɔ akɛ: “Yehowa, mɔ ko mɔ ko bɛ ní tamɔo! bo lɛ oje agbo, ni ogbɛi lɛ hu je agbo kɛ hewalɛ.” Ákɛ mɔ ni tamɔɔɔ adebɔɔ nɔ̃ ko lɛ, Yehowa yɛ hewalɛ ni husu bɛ he. No hewɔ ni atsɛɔ lɛ pɛ akɛ “Ofe” lɛ. (Kpojiemɔ 15:3) Yehowa kɛ ehewalɛ kpele lɛ tsuɔ nii kɛbɔɔ nii, kɛkpataa nii ahiɛ, kɛbuɔ nii ahe, ni ekɛsaa. Susumɔ nɔkwɛmɔnii enyɔ pɛ he okwɛ—edebɔɔ hewalɛ kɛ ehewalɛ ni buɔ mɔ he lɛ.
6, 7. Te hulu lɛ hewalɛ da ha tɛŋŋ, ni mɛɛ anɔkwale ni he hiaa he odase eyeɔ?
6 Kɛ́ odamɔ agbonaa yɛ gbi ni hulu miitso waa lɛ, mɛni he onuɔ yɛ ohewolo nɔ? Hulu dɔlɛ. Shi yɛ anɔkwale mli lɛ, nɔ ni jɛɔ Yehowa adebɔɔ hewalɛ lɛ mli kɛbaa lɛ he onuɔ lɛ. Te hulu lɛ hewalɛ lɛ da ha tɛŋŋ? Dɔlɛ ni yɔɔ eteŋ tuuntu lɛ naawalɛ aaafee degree Celsius 15,000,000. Kɛji obaanyɛ otĩ hulu lɛ teŋ tuuntu ní shɛɔ aklotia yitso dalɛ ní okɛfɔ̃ biɛ yɛ shikpɔŋ nɛɛ nɔ lɛ, onyɛŋ odamɔ he ni kɛ nakai dɔlɛ jɛɛhe nyɛkɛsiɔɔ lɛ teŋ jɛkɛmɔ aaashɛ kilomitai 150 ní ofee shweshweeshwe! Hiŋmɛitswaa fɛɛ hiŋmɛitswaa lɛ, hulu lɛ jieɔ hewalɛ ní naa shɛɔ nuklea okplɛmii akpekpei ohai abɔ ahewalɛ kɛji afɛlɛ amɛ lɛ kpo. Ni kɛlɛ, shikpɔŋ lɛ bɔleɔ nakai nuklea flɔnɔɔ ní yɔɔ naakpɛɛ lɛ yɛ ekɛ lɛ teŋ jɛkɛmɔ ní sa pɛpɛɛpɛ mli. Kɛ́ ebɛŋkɛ lɛ fe nine lɛ, shikpɔŋ lɛ nɔ nu fɛɛ baatsɔ lamɔ; kɛ́ ekɛ lɛ teŋ jɛkɛ fe nine hu lɛ, fɛɛ baawa ni ebaatsɔ ais. Emli enyɔ nɛɛ fɛɛ eko baaha wɔ shibɔlemɔ ŋulami nɛɛ afee nɔ ni wala bɛ nɔ.
7 Eyɛ mli akɛ mɛi babaoo awala damɔ hulu lɛ nɔ moŋ, shi amɛsusuuu enitsumɔ he. No hewɔ lɛ, amɛkuɔ amɛhiɛ amɛshwieɔ nɔ ni hulu lɛ baanyɛ atsɔɔ wɔ lɛ nɔ. Lala 74:16 wieɔ Yehowa he akɛ: “Bo . . . osaa ŋulami kɛ hulu oto.” Hɛɛ, hulu lɛ woɔ Yehowa, ni “efee ŋwɛi kɛ shikpɔŋ” lɛ hiɛnyam. (Lala 146:6) Ni kɛlɛ, eji adebɔɔ nibii babaoo ni tsɔɔ wɔ Yehowa hewalɛ kpele lɛ he nii lɛ ateŋ ekome pɛ. Babaoo ni wɔkaseɔ Yehowa adebɔɔ hewalɛ lɛ he nii lɛ, babaoo ni woo ni wɔyɔɔ kɛhaa lɛ lɛ mli kwɔɔ ji no.
8, 9. (a) Mɛɛ suɔmɔ mfonirifeemɔŋ wiemɔ tsɔɔ wɔ bɔ ni Yehowa sumɔɔ koni ebu ejálɔi ahe ni ekwɛ amɛnɔ? (b) Mɛɛ kwɛmɔ Biblia beaŋ tookwɛlɔ kɛhaa etoo, ni mɛni enɛ tsɔɔ wɔ yɛ wɔ-Kwɛlɔ Kpeteŋkpele lɛ he?
8 Yehowa kɛ ehewalɛ kpeteŋkpele lɛ hu buɔ etsuji ahe ni ekɛkwɛɔ amɛnɔ. Biblia lɛ kɛ mfonirifeemɔŋ wiemɔi ni yɔɔ faŋŋ ni taa mɔ tsuiŋ tsu nii kɛtsɔɔ Yehowa hebuu kwɛmɔ he shiwoo lɛ mli. Akɛ nɔkwɛmɔnɔ lɛ, kadimɔ Yesaia 40:11 lɛ. Yehowa kɛ lɛ diɛŋtsɛ ehe to tookwɛlɔ he, ni ekɛ ewebii lɛ to tooi ahe. Wɔkaneɔ yɛ jɛmɛ akɛ: “Eeelɛ̀ etoiku lɛ tamɔ tookwɛlɔ; eeehiɛ etoobii lɛ yɛ ekpɔkɔiaŋ, ni eeehole amɛ eshãkã etsitsi, ni too nyɛmɛi lɛ hu, eeekpala amɛ blɛoo.” Ani obaanyɛ ofee nɔ ni atsɔɔ yɛ nakai kuku lɛ mli lɛ he mfoniri yɛ ojwɛŋmɔŋ?
9 Kooloi fioo pɛ yɔɔ ní amɛhe waaa tamɔ bɔ ni shia too ji lɛ pɛpɛɛpɛ. Esa akɛ Biblia beaŋ tookwɛlɔ lɛ aná ekãa ni ekɛbu etooi lɛ ahe kɛjɛ klaji, oshishibrishii, kɛ jatai ahe. (1 Samuel 17:34-36; Yohane 10:10-13) Shi bei shɛɔ ní ebiɔ ni akɛ mlijɔlɛ abu tooi lɛ ahe ni akwɛ amɛnɔ. Ákɛ nɔkwɛmɔnɔ lɛ, kɛ́ too ko fɔ́ yɛ he ko ni kɛ tooiku lɛ ateŋ jɛkɛ lɛ, te tookwɛlɔ lɛ baafee tɛŋŋ eha toobi ni afɔ́ lɛ eŋmɔŋ ni nyɛɛɛ ehe efã lɛ afee shweshweeshwe? Ekolɛ ebaahiɛ lɛ gbii abɔ ‘yɛ etsitsi’—eŋwɛigbɛ atade lɛ hei ní edɔrɔ eshwie nɔ lɛ. Shi te aaafee tɛŋŋ ni toobi bibioo aaabaje tookwɛlɔ lɛ tsitsi hu? Ekolɛ toobi lɛ baaba tookwɛlɔ lɛ masɛi ni ekɛ ehe baashɔɔ enaji ahe po. Kɛlɛ, tookwɛlɔ lɛ ji mɔ ni esa akɛ ekoto shi, ekpã enine mli, ewo toobi lɛ, ni ekɛ lɛ ashãkã etsitsi ni yɔɔ shweshweeshwe lɛ. Kwɛ bɔ ni enɛ feɔ bɔ ni wɔ-Kwɛlɔ Kpeteŋkpele lɛ sumɔɔ ní efã etsuji ahe ní ekwɛ amɛnɔ lɛ he mfoniri jogbaŋŋ ha!
10. Mɛɛ hebuu Yehowa kɛhaa ŋmɛnɛ, ni mɛni hewɔ hebuu nɛɛ he hiaa waa nakai lɛ?
10 Yehowa efee babaoo fe hebuu he shiwoo ní ekɛha kɛkɛ. Yɛ Biblia beaŋ lɛ, ejie lɛ kpo yɛ naakpɛɛ gbɛ̀i anɔ akɛ enyɛɔ “ejieɔ jalɔi yɛ kaa mli.” (2 Petro 2:9) Ni ŋmɛnɛ hu? Wɔle akɛ amrɔ nɛɛ ekɛ ehewalɛ tsuuu nii kɛbuuu wɔhe kɛjɛɛɛ amanehului fɛɛ amli. Shi ekɛ nɔ ko ni he hiaa waa haa—mumɔŋ hebuu. Wɔ-Nyɔŋmɔ ní yɔɔ suɔmɔ lɛ buɔ wɔhe kɛjɛɔ nibii ní yeɔ mɔ awui yɛ mumɔŋ lɛ ahe kɛtsɔ nibii ní he hiaa wɔ bɔni afee ní wɔnyɛ wɔdamɔ kaai anaa, ní wɔbaa wɔkɛ lɛ teŋ wekukpaa lɛ yi lɛ ní ekɛwulaa wɔ lɛ nɔ. Ákɛ nɔkwɛmɔnɔ lɛ, Luka 11:13 kɛɔ akɛ: “Kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.” Nakai hewalɛ ni fe fɛɛ lɛ baanyɛ asaa wɔ koni wɔnyɛ wɔkpee kaa fɛɛ kaa loo naagba ni ekolɛ wɔkɛbaakpe lɛ naa. (2 Korintobii 4:7) No hewɔ lɛ, Yehowa feɔ nii koni ekɛbáa wɔwala yi, jeee kɛha afii fioo ni sɛɛ etsɛɛɛ, shi moŋ kɛyaa naanɔ. Kɛ́ nakai gbɛkpamɔ lɛ yɛ wɔjwɛŋmɔ mli lɛ, yɛ anɔkwale mli lɛ ekolɛ wɔbaabu nɔnaa fɛɛ nɔnaa ni yɔɔ gbɛjianɔtoo nɛɛ mli lɛ akɛ nɔ ni “sɛɛ etsɛɛɛ ni emli waaa.” (2 Korintobii 4:17, NW) Ani ehaaa wɔbɛŋkɛ Nyɔŋmɔ ni kɛ ehewalɛ tsuɔ nii yɛ suɔmɔ mli yɛ wɔgbɛfaŋ lɛ?
“Yehowa Sumɔɔ Jalɛsaneyeli”
11, 12. (a) Mɛni hewɔ Yehowa jalɛsaneyeli lɛ gbalaa wɔ kɛbɛŋkɛɔ lɛ lɛ? (b) Te David mu sane naa yɛ Yehowa jalɛsaneyeli lɛ he eha tɛŋŋ, ni wiemɔi ni jɛ mumɔŋ nɛɛ baanyɛ ashɛje wɔmii yɛ mɛɛ gbɛ nɔ?
11 Yehowa feɔ nɔ ni ja kɛ nɔ ni sa, ni efeɔ nakai be fɛɛ be ní hiɛaŋkwɛmɔ bɛ mli. Ŋwɛi jalɛsaneyeli jeee su ko ni henumɔ bɛ mli ni yɔɔ nyanyaanya ní shwieɔ wɔ kɛyaa sɛɛ, shi moŋ eji su ni asumɔɔ waa ní gbalaa wɔ kɛbɛŋkɛɔ Yehowa. Biblia lɛ wieɔ musuŋtsɔlɛ su nɛɛ he faŋŋ. No hewɔ lɛ, nyɛhaa wɔsusua gbɛ̀i etɛ ni Yehowa tsɔɔ nɔ ekɛ ejalɛsaneyeli lɛ tsuɔ nii lɛ ekomɛi ahe wɔkwɛa.
12 Klɛŋklɛŋ lɛ, Yehowa jalɛsaneyeli lɛ tsirɛɔ lɛ ni efeɔ anɔkwafo ni eyeɔ etsuji anɔkwa. Lalatsɛ David diɛŋtsɛ nu bɔ ni Yehowa jalɛsaneyeli lɛ fã nɛɛ ji eha lɛ shishi. Te David jɛ lɛ diɛŋtsɛ eniiashikpamɔ, kɛ bɔ ni Nyɔŋmɔ feɔ nii ehaa lɛ kasemɔ mli emu sane naa eha tɛŋŋ? Ejaje akɛ: “Yehowa sumɔɔ jalɛsaneyeli, ni ekwaaa emɛi krɔŋkrɔŋi lɛ. Abáa amɛyi kɛyaa naanɔ.” (Lala 37:28) Mɛɛ shiwoo wiemɔ ni shɛjeɔ mɔ mii nɛ! Wɔ-Nyɔŋmɔ lɛ kwaŋ mɛi ni yeɔ lɛ anɔkwa lɛ kɔkɔɔkɔ. No hewɔ lɛ wɔbaanyɛ wɔkɛ wɔhe afɔ̃ ebɛŋkɛmɔ kɛ esuɔmɔ kwɛmɔ nɔ. Ejalɛsaneyeli lɛ maa enɛ nɔ mi!—Abɛi 2:7, 8.
13. Bɔ ni Yehowa susuɔ mɛi ni efi amɛ lɛ ahe ehaa lɛ jeɔ kpo yɛ Mla ni ekɛha Israelbii lɛ mli yɛ mɛɛ gbɛ nɔ?
13 Nɔ ni ji enyɔ lɛ, ŋwɛi jalɛsaneyeli nuɔ mɛi ni naa amanehulu lɛ ahiamɔ nii ahe. Anaa bɔ ni Yehowa susuɔ mɛi ni efi amɛ lɛ ahe ehaa lɛ yɛ Mla ní ekɛha Israel lɛ mli. Ákɛ nɔkwɛmɔnɔ lɛ, Mla lɛ to gbɛjianɔi ní akwɛ koni atsu awusãi kɛ okulafoi lɛ ahiamɔ nii lɛ ahe nii. (5 Mose 24:17-21) Akɛni Yehowa yɔseɔ bɔ ni shihilɛ lɛ mli baanyɛ awa kɛha wekui ní tamɔ nɛkɛ hewɔ lɛ, lɛ diɛŋtsɛ ebatsɔ amɛ-Kojolɔ kɛ Hebulɔ ní tamɔ tsɛ. (5 Mose 10:17, 18) Ebɔ Israelbii lɛ kɔkɔ akɛ kɛ́ amɛfee yei kɛ gbekɛbii ni bɛ hefãmɔ nɔ ko lɛ efɔŋ lɛ, ebaabo gbɔmɛi nɛɛ ayaafo lɛ toi. Taakɛ aŋma yɛ 2 Mose 22:22-24 lɛ, ejaje akɛ: “Mimlifu lɛ naa aaawa naakpa.” Yɛ be mli ni mlifu jeee Nyɔŋmɔ sui ni fe fɛɛ lɛ ateŋ ekome lɛ, nifeemɔi ni tsɔɔ jalɛ sane ní ajeɔ gbɛ ayeee lɛ teeɔ ejalɛ mlifu shi, titri lɛ kɛji afee enɛ ashi mɛi ni he waaa lɛ.—Lala 103:6.
14. Mɛni ji hiɛaŋ ni Yehowa kwɛɛɛ lɛ he odaseyeli diɛŋtsɛ ko ni sa kadimɔ waa?
14 Nɔ ni ji etɛ lɛ, Biblia lɛ maa nɔ mi kɛhaa wɔ yɛ 5 Mose 10:17 akɛ Yehowa “kwɛɛɛ mɛi ahiɛaŋ ni eheee nyɔɔŋnii.” Yehowa tamɔɔɔ adesai babaoo ní yɔɔ hewalɛ kɛ nɔyeli hegbɛ lɛ, ejaakɛ heloonaa ninámɔ loo kponɔgbɛ puemɔ náaa enɔ hewalɛ. Eye ehe kɛjɛ jwɛŋmɔŋ tsakemɔ kɛ mɛi ahiɛaŋkwɛmɔ mli. Mɛi ahiɛaŋ ni ekwɛɛɛ lɛ he odaseyeli ní sa kadimɔ waa ji enɛ: Ekɛ hegbɛ ní yɔɔ akɛ aaatsɔmɔ enɔkwa jálɔi, kɛ naanɔ wala ni abaanyɛ aná lɛ haaa hiɛnaanɔbii fioo ko pɛ. Shi moŋ, Bɔfoi lɛ Asaji 10:34, 35 jajeɔ akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” Nɛkɛ gbɛkpamɔ nɛɛ yɛ kɛha mɛi fɛɛ, ekɔɔɔ he eko bɔ ni amɛshihilɛ kɛ amɛhewolonɔ su ji, loo maŋ ni amɛyɔɔ mli. Ani enɛ jeee anɔkwa jalɛsaneyeli yɛ gbɛ ni nɔ kwɔ fe fɛɛ nɔ? Hɛɛ, Yehowa jalɛsaneyeli lɛ he shishinumɔ kpakpa ni wɔnáa lɛ gbalaa wɔ kɛbɛŋkɛɔ lɛ!
“Oo, Bɔ ni Nyɔŋmɔ . . . Ŋaa Mli Kwɔ Ha Nɛ!”
15. Mɛni ji ŋaalee, ni mɛɛ gbɛ nɔ Yehowa tsɔɔ ejieɔ lɛ kpo?
15 Atsirɛ bɔfo Paulo ni ejaje taakɛ aŋma yɛ Romabii 11:33 lɛ akɛ: “Oo, bɔ ni Nyɔŋmɔ . . . ŋaa kɛ nilee mli kwɔ ha nɛ!” Hɛɛ, yɛ be mli ni wɔsusuɔ Yehowa ŋaalee ni mli kwɔ lɛ fãi srɔtoi lɛ ahe lɛ, ehaa wɔyiɔ obɔ kɛ woo. Kɛlɛ, te wɔbaatsɔɔ su nɛɛ shishi wɔha tɛŋŋ? Ŋaalee buaa nilee, sɛɛyoomɔ, kɛ sane shishinumɔ fɛɛ naa ni efeɔ amɛ ekome kɛtsuɔ nii. Akɛni Yehowa kɛ nilee ní eyɔɔ lɛ mlilɛɛmɔ kɛ shishinumɔ ní eyɔɔ lɛ mlikwɔlɛ lɛ tsuɔ nii hewɔ lɛ, efeɔ yiŋkpɛi ni hi fe fɛɛ be fɛɛ be, ni etsuɔ he nii hu kɛtsɔɔ nifeemɔ gbɛ ni hi fe fɛɛ ni abaanyɛ asusu he lɛ nɔ.
16, 17. Mɛɛ gbɛ nɔ Yehowa adebɔɔ nibii lɛ yeɔ eŋaalee ni mli kwɔ lɛ he odase yɛ? Okɛ nɔkwɛmɔnɔ aha.
16 Mɛni ji Yehowa ŋaalee ni mli kwɔ lɛ he odaseyelii komɛi? Lala 104:24 kɛɔ akɛ: “Yehowa, kwɛ bɔ ni onitsumɔi lɛ fá ha! Nilee okɛfee fɛɛ; shikpɔŋ lɛ nɔ eyi tɔ́ kɛ onibɔɔ nii lɛ!” Lɛɛlɛŋ, babaoo ni wɔkaseɔ nibii ni Yehowa efee lɛ ahe nii lɛ, babaoo ni eŋaalee lɛ haa wɔnaa kpɛɔ wɔhe ji no. Susumɔ he okwɛ, jeŋ nilelɔi ekase nii babaoo kɛjɛ Yehowa adebɔɔ nibii lɛ amli! Ayɛ woloŋlee mli nikasemɔ ko po ní atsɛɔ lɛ biomimetics ní kaa akɛ eeekase ŋaa gbɛ̀i ní anaa yɛ adebɔɔ mli lɛ.
17 Ákɛ nɔkwɛmɔnɔ lɛ, ekolɛ óna bɔ ni anaanu ŋtaŋ yɔɔ fɛo lɛ, ni efee bo naakpɛɛ po. Eji ŋaa gbɛ ní yɔɔ naakpɛɛ diɛŋtsɛ. Kpãai bibii komɛi ní waaa lɛ yɛ hewalɛ kwraa fe dade kpãai nakai nɔŋŋ, ni eti hu fe kpãa hwiaa ní akɛloɔ atade ní tuŋtɛ nyɛɛɛ atsɔ mli lɛ. Mɛni diɛŋtsɛ ji nɔ ni no tsɔɔ? Feemɔ anaanu ŋtaŋ ní aha eda agbo tamɔ yáa ní wuoyaa lɛji kɛyaa wuo lɛ dalɛ pɛpɛɛpɛ lɛ he mfoniri okwɛ. Ŋtaŋ ní tamɔ nakai dalɛ baanyɛ amɔ kɔɔyɔŋ lɛlɛ ní miifiliki kɛ foi edamɔ shi! Hɛɛ, Yehowa fee nɛkɛ nibii nɛɛ fɛɛ yɛ “nilee” mli.
18. Anaa Yehowa ŋaalee lɛ yɛ bɔ ni ekɛ adesai tsu nii kɛŋma e-Wiemɔ ni ji Biblia lɛ yɛ mɛɛ gbɛ nɔ?
18 Abaanyɛ ana Yehowa ŋaalee lɛ he odaseyeli ni fe fɛɛ lɛ yɛ e-Wiemɔ, ni ji Biblia lɛ mli. Yɛ anɔkwale mli lɛ, ŋaawoo ni nilee yɔɔ mli ni yɔɔ ebaafai lɛ amli lɛ tsɔɔ gbɛ ni hi fe fɛɛ ni wɔɔtsɔ nɔ wɔhi shi. (Yesaia 48:17) Shi anaa Yehowa nilee ni anyɛŋ akɛ nɔ ko ato he lɛ hu yɛ gbɛ ní atsɔ nɔ aŋma Biblia lɛ mli. Yɛ mɛɛ gbɛ nɔ? Yehowa jɛ eŋaalee mli ehala adesai ní amɛŋma e-Wiemɔ lɛ. Eji ekɛ ŋwɛibɔfoi tsu nii ni amɛŋma Wiemɔ ni jɛ mumɔŋ lɛ kulɛ, ani Biblia lɛ mli saji baaŋɔɔ wɔnaa tamɔ bɔ ni eji bianɛ lɛ? Eji anɔkwale akɛ, kulɛ ŋwɛibɔfoi baanyɛ atsɔɔ Yehowa su jogbaŋŋ kɛjɛ amɛsusumɔ ní nɔ kwɔ lɛ mli, ní amɛjie amɛ diɛŋtsɛ amɛ hetuu-kɛ-hamɔ kɛha lɛ lɛ kpo. Shi kulɛ ani wɔbaanyɛ wɔna nibii anaa jogbaŋŋ, yɛ bɔ ni mumɔŋ bɔɔ nii ní eye emuu, ní amɛnilee, niiashikpamɔ, kɛ hewalɛ nɔ kwɔ kwraa fe wɔnɔ̃ lɛ saji ahesusumɔ ji lɛ naa?—Hebribii 2:6, 7.
19. Mɛɛ nɔkwɛmɔnɔ tsɔɔ akɛ adesai ni akɛtsu nii akɛ niŋmalɔi lɛ haa asumɔɔ Biblia lɛ ni anáa he miishɛɛ waa?
19 Adesai niŋmalɔi ní akɛtsu nii lɛ haa asumɔɔ Biblia lɛ ni anáa he miishɛɛ waa. Mɛi ní ŋmala lɛ ji hii ní yɔɔ henumɔi tamɔ wɔnɔ̃ lɛ nɔŋŋ. Akɛni amɛyeee emuu hewɔ lɛ, amɛkɛ kaai kɛ nɔnyɛɛi ní tamɔ wɔnɔ̃ lɛ nɔŋŋ kpe. Yɛ shihilɛi komɛi amli lɛ, amɛŋmala amɛ diɛŋtsɛ amɛhenumɔi kɛ shihilɛi ni amɛkɛkpe lɛ ahe saji. (2 Korintobii 12:7-10) No hewɔ lɛ amɛŋmala wiemɔi ní ŋwɛibɔfo ko kwraa nyɛŋ ekɛha. Ákɛ nɔkwɛmɔnɔ lɛ, susumɔ David wiemɔ ni aŋmala yɛ Lala 51 lɛ he okwɛ. Taakɛ eyiteŋgbɛ niŋmaa lɛ tsɔɔ lɛ, David fo lala nɛɛ beni efee esha ni hiɛdɔɔ yɔɔ mli lɛ sɛɛ. Ejie etsui mli saji akpo, ejie heshwamɔ kpo ni ekpa Nyɔŋmɔ fai kɛha eshaifaa. Kuku 4 kɛ 5 lɛ kɛɔ akɛ: “Juu mihe kwraa kɛjɛ minɔ̃ sha lɛ mli, ní otsuu mihe kɛjɛ mihe esha lɛ mli! Ejaakɛ minɔtɔmɔi lɛ, mi diɛŋtsɛ mile, ni mihe esha lɛ yɛ mihiɛ daa.” Kadimɔ kuku 7 lɛ: “Naa, nɔ̃ sha mli afɔ́ mi yɛ, ni esha mli minyɛ ŋɔ mi hɔ yɛ.” Kuku 19 lɛ kɛfataa he akɛ: “Nyɔŋmɔ afɔlei lɛ ji mumɔ ni werɛ eho ehe; tsui ní werɛ eho ehe ní tswiaa shi kɛ dɔlɛ lɛ, Nyɔŋmɔ, okpooŋ!” Ani onuuu niŋmalɔ lɛ hejaramɔ lɛ he? Yɛ adesa ni yeee emuu sɛɛ lɛ, namɔ baanyɛ ajie tsuiŋ henumɔi ni tamɔ nɛkɛ kpo?
20, 21. (a) Mɛni hewɔ abaanyɛ akɛɛ akɛ yɛ adesai niŋmalalɔi ni akɛtsu nii lɛ fɛɛ sɛɛ lɛ, Yehowa nilee yɔɔ Biblia lɛ mli lɛ? (b) Mɛni abaasusu he yɛ nikasemɔ ni nyiɛ sɛɛ lɛ mli?
20 Yehowa tsɔ adesai ni yeee emuu lɛ anɔ ekɛ nɔ̃ tuuntu ní he hiaa wɔ lɛ ha wɔ—saji ní aŋmala “ni jɛ Nyɔŋmɔ mumɔ lɛŋ,” ni kɛlɛ adesai nyɛɔ amɛnuɔ shishi yɛ gbɛ ni waaa nɔ lɛ. (2 Timoteo 3:16) Hɛɛ, mumɔ krɔŋkrɔŋ lɛ kudɔ nakai niŋmalalɔi lɛ. No hewɔ lɛ, amɛŋmala Yehowa nilee, jeee amɛ diɛŋtsɛ amɛnɔ̃. Anyɛɔ akɛ he fɔ̃ɔ nakai nilee lɛ nɔ kwraa kɛmɔɔ shi. Enɔ kwɔ kwraa fe wɔ diɛŋtsɛ wɔnilee aahu akɛ Nyɔŋmɔ jɛɔ suɔmɔ mli ewoɔ wɔ hewalɛ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ!” (Abɛi 3:5, 6) Kɛ́ wɔbo nakai ŋaawoo ni nilee yɔɔ mli lɛ toi lɛ, wɔbɛŋkɛɔ wɔ-Nyɔŋmɔ ni yɔɔ nilee fe fɛɛ lɛ kpaakpa.
21 Yehowa sui lɛ ateŋ nɔ ni asumɔɔ ní nɔ kwɔ fe fɛɛ ji suɔmɔ. Abaasusu bɔ ni Yehowa jieɔ suɔmɔ kpo etsɔɔ lɛ he yɛ nikasemɔ ni nyiɛ sɛɛ lɛ mli.
Ani Obaanyɛ Okai?
• Mɛɛ nibii Yehowa etsu he nii bɔni afee ni wɔnyɛ wɔkɛ lɛ abɔ naanyo?
• Mɛni ji Yehowa adebɔɔ hewalɛ kɛ ehewalɛ ni buɔ mɔ he lɛ he nɔkwɛmɔnii komɛi?
• Mɛɛ gbɛ̀i anɔ Yehowa tsɔɔ ejieɔ ejalɛsaneyeli lɛ kpo yɛ?
• Mɛɛ gbɛ nɔ anaa Yehowa nilee lɛ yɛ edebɔɔ nibii lɛ kɛ Biblia lɛ hu mli yɛ?
[Mfoniri ni yɔɔ baafa 10]
Yehowa kɛ suɔmɔ kwɛɔ etooi lɛ anɔ tamɔ bɔ ni tookwɛlɔ wóɔ toobi eshãkãa etsitsi lɛ
[Mfoniri ni yɔɔ baafa 13]
Anaa Yehowa nilee lɛ yɛ gbɛ ni atsɔ nɔ aŋma Biblia lɛ mli