Ná Wolokasemɔ ni Hi Fe Fɛɛ ni Yɔɔ lɛ He Sɛɛ!

BIBLIA lɛ wieɔ Yehowa Nyɔŋmɔ he akɛ lɛ ji nibii fɛɛ ní adesai hu fata he lɛ a-Bɔlɔ. (1 Mose 1:27; Kpojiemɔ 4:11) Ákɛ Tsɔɔlɔ Kpeteŋkpele lɛ, etsɔse klɛŋklɛŋ adesai enyɔ ni ji Adam kɛ Hawa, ni ekɛ no feemɔ saa amɛ koni amɛnyɛ amɛhi shi yɛ Eden abɔɔ fɛfɛo lɛ mli. Eyiŋtoo ji akɛ ebaaya nɔ etsɔse amɛ, ni asaŋ ekwɛ amɛnɔ kɛya naanɔ. (1 Mose 1:28, 29; 2:15-17; Yesaia 30:20, 21) Mɛɛ gbɛkpamɔ ni nɔ̃ bɛ po nɛ!

Shi dɔlɛ sane ji akɛ, klɛŋklɛŋ adesai enyɔ lɛ eyamɔɔɔ gbɛkpamɔ nɛɛ mli. Amɛ toigbele lɛ ha adesai ashihilɛ kɛ jeŋba fɛɛ bɔi fitemɔ. (1 Mose 3:17-19; Romabii 5:12) Beni Biblia lɛ wieɔ yinɔbii ni hi shi afii fioo komɛi asɛɛ yɛ adesai abɔɔ sɛɛ lɛ ahe lɛ, ekɛɛ akɛ: “Ni Yehowa na akɛ gbɔmɛi anɔ fɔŋ feemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ.”—1 Mose 6:5.

Kɛjɛ be ni Yehowa mu sane naa akɛ nifɔjianii ahe kɛkɛ adesai kã nɛɛ, aaafee afii 4,500 eho, ni amrɔ nɛɛ adesai ashihilɛ lɛ efite kwraa fe tsutsu lɛ. Mɛi babaoo maleɔ yɛ gbɛ ni yɔɔ hiɛgbele nɔ, amɛjuɔ, ni asaŋ amɛtutuaa mɛi. Beni naagbai yaa nɔ efaa daa gbi lɛ, belɛ suɔmɔ ni mɛi yɔɔ kɛha amɛnanemɛi adesai lɛ moŋ he miijɔ. Ani ejeee anɔkwale akɛ naagbai eba wekukpãa ni kã mɛi kpotoo, ní weku mli bii hu fata he lɛ ateŋ lɛ he? Shi kɛlɛ, esaaa akɛ ashwaa Nyɔŋmɔ akɛ lɛ eha shihilɛ lɛ etsɔ bɔ ni eyɔɔ ŋmɛnɛ lɛ, ni asaŋ efɔko edɛŋ yɛ naagbai ni yaa nɔ ŋmɛnɛ lɛ ahe. Yehowa yɛ adesai ahilɛ-kɛhamɔ he miishɛɛ, ni efee klalo akɛ ebaatsɔse mɛi fɛɛ ni kwɛɔ lɛ gbɛ kɛha gbɛtsɔɔmɔ bɔni afee ni amɛná miishɛɛ yɛ shihilɛ mli lɛ. Aaafee afii 2,000 ni eho nɛ lɛ, etsu e-Bi Yesu Kristo kɛba shikpɔŋ lɛ nɔ, ni ekɛ nakai feemɔ tsɔɔ bɔ ni eyɔɔ he miishɛɛ akɛ eeetsɔse mɛi ni sumɔɔ akɛ amɛye omanye yɛ shihilɛ mli lɛ. Akɛni Tsɔɔlɔ Kpeteŋkpele lɛ kɛ afii akpekpei abɔ tsɔse Yesu hewɔ lɛ, Yesu fee tsɔsemɔ ni nɔ̃ bɛ he nɔkwɛmɔnɔ efɔ̃ shi.

Anɔkwa Kristojamɔ Tsɔseɔ Mɔ

Yesu Kristo to anɔkwa Kristojamɔ ní suɔmɔ mli ajɛɔ afeɔ nɔ fɛɛ nɔ lɛ shishi. Esa akɛ mɛi ni yɔɔ anɔkwa Kristojamɔ mli lɛ asusumɔi kɛ amɛnifeemɔi fɛɛ kɛ Nyɔŋmɔ suɔmɔnaa nii akpãa gbee, koni no kɛ woo kɛ anunyam abaha egbɛi lɛ. (Mateo 22:37-39; Hebribii 10:7) Yesu Tsɛ ni ji Yehowa ni ye ebua lɛ yɛ enitsɔɔmɔ ni kɔɔ gbɛ ni kɛmɔ yaa wala mli lɛ he lɛ mli. Wɔkaneɔ yelikɛbuamɔ ni Yesu ná kɛjɛ Nyɔŋmɔ ŋɔɔ lɛ he sane yɛ Yohane 8:29 ní kaneɔ akɛ: ‘Mɔ ni tsu mi lɛ kɛ mi yɛ, tsɛ lɛ shiko mikome, ejaakɛ mi lɛ, nɔ ni sa ehiɛ mifeɔ daa.’ Hɛɛ, Yesu Tsɛ ye ebua lɛ, ni ekɛ gbɛtsɔɔmɔ hu ha lɛ yɛ esɔɔmɔ nitsumɔ lɛ mli fɛɛ. Yesu mra be mli sɛɛnyiɛlɔi lɛ kɛ shihilɛ mli naagba ko ekpeee ni amɛnáaa he gbɛtsɔɔmɔ. Yehowa tsɔ e-Bi lɛ nɔ etsɔse amɛ. Yesu tsɔɔmɔi lɛ ní amɛkɛtsu nii kɛ enɔkwɛmɔnɔ lɛ hu sɛɛ ní amɛnyiɛ lɛ ha amɛtsɔmɔ gbɔmɛi kpakpai. Nakai nɔŋŋ eji yɛ ekaselɔi ni yɔɔ ŋmɛnɛ lɛ hu agbɛfaŋ.—Kwɛmɔ akrabatsa ni yitso ji “Hewalɛ ní Yesu kɛ Etsɔɔmɔi lɛ Ená yɛ Mɛi Anɔ” ní yɔɔ baafa 6 lɛ mli.

Nɔ̃ krɛdɛɛ ko ni yɔɔ anɔkwa Kristojamɔ he ji akɛ, akɛ tsɔsemɔ ni náa mɔ tsui kɛ ejwɛŋmɔ nɔ hewalɛ haa emlibii lɛ, ni no haa amɛfeɔ tsakemɔi yɛ amɛjeŋba mli. (Efesobii 4:23, 24) Ákɛ nɔkwɛmɔnɔ lɛ, susumɔ nɔ ni Yesu tsɔɔ yɛ anɔkwa ní esa akɛ gbalashihilɛ mli hefatalɔi aye amɛhe lɛ he okwɛ. Ewie akɛ: “Nyɛnu akɛ akɛɛ blemabii lɛ akɛ: ‘Kaafite gbala!’ Shi mi lɛ, miikɛɛ nyɛ akɛ: Mɔ fɛɛ mɔ ni kwɛɔ yoo ni ehe feɔ lɛ akɔnɔ lɛ, ekɛ lɛ efite gbala momo yɛ etsui mli.” (Mateo 5:27, 28) Yesu miiha ekaselɔi lɛ miile akɛ esa akɛ amɛha amɛtsui mli atse, ni ákɛ susumɔi kɛ akɔnɔi gbohii ní mɔ aaaná lɛ baanyɛ aye lɛ awui babaoo kɛ́ etsuko amɛhe nii po. Ani ejeee anɔkwale akɛ nifɔji ahesusumɔ baanyɛ aha mɔ kɛ ehe ayawo nifeemɔi ni Nyɔŋmɔ náaa he miishɛɛ ní asaŋ eyeɔ mɛi krokomɛi awui mli?

No hewɔ lɛ, Biblia lɛ woɔ ŋaa akɛ: “Nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ní etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.” (Romabii 12:2) Ekolɛ obaabi akɛ, ‘Ani abaanyɛ atsɔ tsɔsemɔ nɔ aha mɔ aná jwɛŋmɔ hee?’ Ní mɔ aaaná jwɛŋmɔ hee lɛ biɔ ni etsɔ gbɛ kroko ni ji shishitoo mlai kɛ gbɛtsɔɔmɔ ni yɔɔ Nyɔŋmɔ Wiemɔ lɛ mli lɛ akasemɔ nɔ ekɛkanya ejwɛŋmɔ. Abaanyɛ atsu enɛ he nii kɛtsɔ tsɔsemɔ ni Nyɔŋmɔ tsɔɔ e-Wiemɔ lɛ nɔ ekɛhaa lɛ ní aaakpɛlɛ nɔ lɛ nɔ.

Akanya Amɛ ni Amɛtsake

“Nyɔŋmɔ wiemɔ hiɛ kã ni eyɛ hewalɛ.” (Hebribii 4:12) Ekãhe eeená aŋkroaŋkroi anɔ hewalɛ, ní tsɔɔ akɛ ebe hoko. Ebaanyɛ ekanya mɔ koni etsake ejeŋba, ni ekpɛlɛ anɔkwa Kristojamɔ nɔ, koni ebatsɔ gbɔmɔ kpakpa. Nɔkwɛmɔnii ni nyiɛ sɛɛ nɛɛ maa sɛɛnamɔ ni yɔɔ Biblia kasemɔ he lɛ nɔ mi.

Emilia ní atsĩ etã yɛ sane ni tsɔ hiɛ lɛ mli lɛ wie akɛ: “Mi diɛŋtsɛ mimɔdɛŋbɔi lɛ eyafaaa bɔ ni no baanyɛ atsu naagba ni yɔɔ mishia lɛ he nii. Beni mikɛ Yehowa Odasefoi bɔi Biblia lɛ kasemɔ lɛ, mibayɔse akɛ hiɛnɔkamɔ yɛ, ni no ha mibɔi misubaŋ tsakemɔ. Mibale bɔ ni atoɔ tsui shi, ni mikpa mlifu kɛ bolɔmɔ hu. Sɛɛ mli lɛ, miwu bafata mihe yɛ nikasemɔ lɛ mli. Enáaa lɛ mlɛo akɛ eeekpa dãanumɔ, shi naagbee lɛ, enyɛ efee nakai. Enɛ ha wɔgbalashihilɛ lɛ bafee tamɔ nɔ ni kpaako wɔjeɔ shishi. Amrɔ nɛɛ, wɔji Kristofoi ni yɔɔ miishɛɛ, ni wɔmiidũ Biblia shishitoo mlai kpakpai lɛ wɔmiiwo wɔbii lɛ amli.”—5 Mose 6:7.

Tsɔsemɔ ni nine shɛɔ nɔ kɛjɛɔ anɔkwa Kristojamɔ mli lɛ baanyɛ aha mɔ aye ehe kɛjɛ subaŋi gbohii kɛ jeŋba shara he. Nakai ji bɔ ni eba lɛ yɛ Manuela gbɛfaŋ. Beni eye afii 13 lɛ, ejo foi kɛjɛ shia ni ebɔi wii shɛremɔ. Sɛɛ mli lɛ, ebɔi tsofa ni ji heroin kɛ nitsumɔ. Ekɛ hii kɛ yei bɔi bɔlɛnamɔ bɔni afee ni ená wɔɔhe kɛ agbɛnɛ hu shika. Bei komɛi lɛ, Manuel tutuaa mɛi ni eshɔ̃ɔ amɛnibii yɛ amɛdɛŋ akrana naa, ni etsɔɔ nɛkɛ gbɛ nɔ ekɛkwɛɔ ehe. Ekɛ tsofai ni yeɔ mɔ awui tsuɔ nii be fɛɛ be. Awoɔ lɛ tsuŋ kpitiokpitio yɛ yiwalɛ nibii ni efeɔ lɛ hewɔ. Be ko lɛ, awo lɛ tsuŋ afii ejwɛ, ni beni eyɔɔ tsuŋwoohe lɛ, ekɛ ehe wo tui ni ajuɔ shi ahɔ̃ɔ mli. Beni Manuel bote gbalashihilɛ mli lɛ, jeŋba ni ebaa lɛ ha etee nɔ ekɛ naagbai babaoo kpe. Ewie akɛ: “Yɛ naagbee lɛ, tsũ ni tsutsu ko lɛ alɛ̀ɔ wuɔi yɛ mli ji he ni wɔyahi. Mihiɛ kpako be ni miŋa kɛ ŋtayaa toɔ latɛ ni ehoɔ nii yɛ nɔ lɛ nɔ. Shihilɛ mli ni wɔyɔɔ yɛ no beaŋ lɛ tee nɔ efite aahu akɛ miwekumɛi wo miŋa hewalɛ koni eshi mi.”

Mɛni ha Manuel tsake? Etsɔɔ mli akɛ: “Be ko lɛ, nuu ko ní mile lɛ ba wɔshia lɛ ní eegba Biblia mli sane. Mihere lɛ hiɛmɛɛ kɛ yiŋtoo akɛ matsɔɔ lɛ akɛ Nyɔŋmɔ ko bɛ shihilɛ mli ni yɛ adesai ahe miishɛɛ. Mibuɔ shihilɛ mli ní miyɔɔ lɛ akɛ emaa enɛ nɔ mi. Bɔ ni Odasefonyo lɛ to etsui shi ni ekɛ mi wie yɛ bulɛ mli lɛ ha minaa kpɛ mihe, ni no ha mikpɛlɛ nɔ akɛ maya kpeei ni afeɔ yɛ Maŋtsɛyeli Asa lɛ nɔ lɛ shishi. Eyɛ mli akɛ mɛi ni yɔɔ jɛmɛ lɛ ateŋ mɛi komɛi le nɔ̃ gbɔmɔ ni miji moŋ, shi amɛkɛ naanyobɔɔ su baŋa mi. Amɛha minu he tamɔ miji amɛteŋ mɔ ko. Enɛ ha miná miishɛɛ waa. Su ni amɛjie lɛ kpo lɛ ta mitsuiŋ aahu akɛ mikpɛ miyiŋ akɛ makpa tsofai ni mikɛtsuɔ nii yɛ gbɛ fɔŋ nɔ lɛ, koni miyatao nitsumɔ kpakpa matsu. Beni akɛ mi ekase Biblia lɛ nyɔji ejwɛ sɛɛ lɛ, mihe basa kɛha shiɛmɔyaa, ni enɔ nyɔji ejwɛ sɛɛ lɛ, abaptisi mi ni mibatsɔ Yehowa Odasefonyo.”

Te anɔkwa Kristojamɔ he eba sɛɛnamɔ kɛha Manuel kɛ eweku lɛ eha tɛŋŋ? Ewie akɛ: “Kɛ jeee Biblia lɛ ni akɛtsɔse mi kulɛ, be nɛ migbo jeeŋmɔ. Bɔ ni Yesu tsɔɔ ní ahi shi aha lɛ eha mikɛ miweku lɛ efee ekome ekoŋŋ. Ehe ehiaaa ni mibii enyɔ lɛ hu atsɔ shihilɛ ni mitsɔ mli beni miji oblanyo lɛ mli. Mimii shɛɔ mihe waa yɛ wekukpãa kpakpa ni ebakã mi kɛ miŋa teŋ amrɔ nɛɛ hewɔ, ni midaa Yehowa shi yɛ enɛ he. Mitsutsu nanemɛi lɛ ateŋ mɛi komɛi ejwere mi, ni amɛkɛɛ mi akɛ amɛsusuɔ akɛ gbɛ ni mikɔ amrɔ nɛɛ nɔ̃ bɛ.”

Kristofoi ashihilɛ biɔ ni mɔ he atse yɛ jeŋbaŋ, gbɔmɔtsoŋ kɛ eshihilɛ fɛɛ mli. John ní yɔɔ he ko ni ohiafoi ayi fa waa, yɛ South Africa lɛ banu enɛ shishi. Etsɔɔ mli akɛ: “Bei komɛi lɛ, wɔbiyoo lɛ hiɔ shi otsi ni ejuuu ehe, ni enɛ jeee wɔteŋ mɔ ko he sane.” Eŋa tsɔɔ mli akɛ, no mli lɛ amɛshĩa lɛ mli woɔ muji kpɔtɔɔ. Shi beni atsɔse wɔ akɛ Kristofoi lɛ, nibii tsake. John kɛ ehe kpa julɔi akuu ko ni juɔ mɛi atsɔne ni amɛyahɔ̃ɔ lɛ kɛbɔɔ, ni no ha ená be babaoo eha eweku lɛ. Etsɔɔ mli akɛ: “Wɔbale akɛ, ákɛ Kristofoi lɛ, esa akɛ wɔgbɔmɔtsei kɛ wɔtadei ahe atse. Misumɔɔ wiemɔi ni yɔɔ 1 Petro 1:16 ní woɔ wɔ hewalɛ koni wɔhe atse ejaakɛ Yehowa Nyɔŋmɔ he tse lɛ waa. Amrɔ nɛɛ, wɔbɔɔ mɔdɛŋ koni wɔha wɔshia lɛ mli atse bɔ ni yɔɔ hiŋmɛi nɔ.”

Onine Baanyɛ Ashɛ Wolokasemɔ ni Hi Fe Fɛɛ Nɔ

Mɛi babaoo ená niiashikpamɔi tamɔ nɔ ni atsĩtsĩi tã kɛtsɔ hiɛ lɛ. Biblia lɛ ní akɛ mɛi kaseɔ lɛ eha amɛteŋ akpekpei abɔ ebale gbɛ ni atsɔɔ nɔ anáa shihilɛ kpakpa. Akɛni amɛyeɔ anɔkwa, ni amɛtsuɔ nii waa hewɔ lɛ, amɛnitsumɔtsɛmɛi sumɔɔ amɛsane. Amɛbatsɔmɔ akutseiaŋbii kɛ nanemɛi kpakpai ní susuɔ amɛnanemɛi adesai ahilɛ-kɛhamɔ he. Amɛtswa amɛfai shi akɛ amɛbaatsi amɛhe kɛjɛ nifɔjianii kɛ subaŋi gbohii ahe, koni amɛkwɛ ni amɛfee mɛi ni yɔɔ hewalɛ yɛ gbɔmɔtsoŋ, jwɛŋmɔŋ, kɛ henumɔŋ fɛɛ. Amɛfiteee shika yɛ sui gbohii tamɔ dãatɔɔ, asɔshwɛmɔ, tawa shɛremɔ kɛ amɛhenɔi lɛ ahe, shi moŋ amɛkɛ amɛshika lɛ feɔ nibii ni he baaba sɛɛnamɔ aha amɛ kɛ amɛwekui lɛ. (1 Korintobii 6:9-11; Kolosebii 3:18-23) Ŋwanejee bɛ he akɛ sɛɛnamɔi ni jɛɔ nibii ni Yehowa eha aŋmala ashwie shi yɛ Biblia lɛ mli lɛ kɛnitsumɔ mli kɛbaa lɛ haa anaa akɛ, ní mɔ aaahi shi akɛ anɔkwa Kristofonyo lɛ ji gbɛ ni hi fe fɛɛ ní ebaanyɛ ekɔ yɛ eshihilɛ mli, ni asaŋ no haa mɔ nine shɛɔ wolokasemɔ ni hi fe fɛɛ ni yɔɔ lɛ nɔ. Beni Biblia lɛ wieɔ gbɔmɔ ni hiɔ shi yɛ Nyɔŋmɔ mlai lɛ kɛ gbeekpamɔ naa lɛ he lɛ, ekɛɛ akɛ: “Nɔ fɛɛ nɔ ni efeɔ lɛ shwereɔ.”—Lala 1:3.

Eji hewalɛwoo akɛ wɔɔle akɛ Yehowa ni ji Nyɔŋmɔ Ofe lɛ yɛ he miishɛɛ ákɛ eeetsɔse wɔ. Ewie lɛ diɛŋtsɛ ehe akɛ: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ.” (Yesaia 48:17) Hɛɛ, Yehowa etsɔ e-Bi Yesu Kristo nɔkwɛmɔnɔ kɛ etsɔɔmɔi lɛ anɔ etsɔɔ wɔ gbɛ ni sa akɛ wɔnyiɛ nɔ. Beni Yesu yɔɔ shikpɔŋ lɛ nɔ lɛ, etsɔɔmɔi lɛ kɛ tsakemɔ wulu ba mɛi babaoo ni le lɛ lɛ ashihilɛ mli, ni nakai nɔŋŋ eji yɛ mɛi babaoo ni hiɔ shi yɛ etsɔɔmɔi lɛ anaa ŋmɛnɛ lɛ hu agbɛfaŋ. Mɛni hewɔ oheee be ni okɛkase tsɔɔmɔi nɛɛ ahe nii babaoo? Yehowa Odasefoi ni yɔɔ okutso lɛ mli lɛ yɛ he miishɛɛ akɛ amɛaaye amɛbua bo koni onine ashɛ wolokasemɔ ni he hiaa nɛɛ nɔ.

[Shishigbɛ niŋmaa]

[Akrabatsa/Mfoniri ni yɔɔ baafa 6]

Hewalɛ ní Yesu kɛ Etsɔɔmɔi lɛ Ená yɛ Mɛi Anɔ

Ákɛ toohelɔ nukpa lɛ, Zakeo tsɔ juu-kɛfɔ̃ kɛ ojotswaa nɔ ená nii. Shi beni ehi shi yɛ Yesu tsɔɔmɔi lɛ anaa lɛ, etsake ejeŋba.—Luka 19:1-10.

Saulo ni jɛ Tarso lɛ kpa Kristofoi ayiwaa ni ebatsɔ Kristofonyo, ni abale lɛ akɛ bɔfo Paulo.—Bɔfoi lɛ Asaji 22:6-21; Filipibii 3:4-9.

Tsutsu lɛ, Kristofoi ni hi shi yɛ Korinto lɛ ateŋ mɛi komɛi ji ‘ajwamaŋbɔlɔi, wɔŋjalɔi, gbalafitelɔi, mɛi ni kɛ amɛ diɛŋtsɛ amɛheloo feɔ yakayakanii, hii ni kɛ hii ni feɔ yakayakanii, julɔi, hiɛjoolɔi, dãatɔlɔi, mɛi ajɛlɔi, kɛ amimyelɔi.’ Shi kɛlɛ, beni amɛbatsɔmɔ anɔkwa Kristofoi lɛ ‘aju amɛhe, ni asaŋ atsuu amɛhe, ni abu amɛ bem hu yɛ Nuŋtsɔ Yesu gbɛi amli.’—1 Korintobii 6:9-11.

[Mfoniri ni yɔɔ baafa 7]

Biblia lɛ baanyɛ atsɔɔ bo gbɛ ni oootsɔ nɔ oye omanye