Amɛyɛ He Miishɛɛ akɛ Amɛaafee Nyɔŋmɔ Suɔmɔnaa Nii
YESU fee nɔkwɛmɔnɔ kɛha Kristofoi fɛɛ yɛ sɔlemɔ ni esɔle kɛha e-Tsɛ lɛ mli akɛ: “Jeee bɔ ni mi misumɔɔ lɛ, shi moŋ bɔ ni bo osumɔɔ.” (Luka 22:42) Ŋmɛnɛ, Nyɔŋmɔ tsuji akpekpei abɔ kɛ nakai heshibaa wiemɔ ni tsɔɔ toiboo ni afeɔ ahaa Yehowa lɛ miitsu nii. Amɛteŋ mɛi komɛi ji mɛi 52 ni tee Buu-Mɔɔ Biblia Gilead Skul klas ni ji 120 lɛ. Yɛ March 11, 2006 lɛ, mɛi ni gbe nikasemɔ lɛ naa lɛ ná he miishɛɛ akɛ amɛaafee Nyɔŋmɔ suɔmɔnaa nii yɛ maji srɔtoi anɔ, yɛ shihilɛi ni mli wawai amli po.
Mɛni kanya mɛi ni gbe nikasemɔ lɛ naa lɛ ni amɛha Yehowa suɔmɔnaa nifeemɔ kudɔ amɛshihilɛ lɛ? Chris kɛ Leslie, ni ji gbalashihilɛ mli hefatalɔi ni aha amɛ nitsumɔ akɛ amɛyasɔmɔ akɛ maŋsɛɛ sanekpakpa shiɛlɔi yɛ Bolivia lɛ tsɔɔ mli yɛ nɛkɛ gbɛ nɔ akɛ: “Akɛni wɔkwa wɔhe hewɔ lɛ, wɔmiisumɔ ni wɔkɛ wɔhe aha kɛtsu nɔ fɛɛ nɔ yɛ Yehowa asafo lɛ mli.” (Marko 8:34) Jason kɛ Chere ni aha amɛ nitsumɔ yɛ Albania lɛ wie kɛfata he akɛ: “Nitsumɔi fɛɛ ni wɔnine eshɛ nɔ yɛ Yehowa asafo lɛ mli lɛ yɛ emli naagbai. Shi wɔyɔse akɛ ehi jogbaŋŋ akɛ wɔkɛ wɔhe aaafɔ̃ Yehowa nɔ kwraa.”
Awo Amɛ Hewalɛ Koni Amɛfee Yehowa Suɔmɔnaa Nii
George Smith, ni eji Betel weku lɛ mlinyo ni tsuɔ nii yɛ Art Department (Nitɛŋmɔ Nitsumɔhe) lɛ sɔle kɛje gbɛjianɔtoo lɛ shishi. Stephen Lett, ni eji Yehowa Odasefoi a-Nɔyeli Kuu lɛ mlinyo kɛ sɛinɔtalɔ kɛha skul lɛ naagbee nifeemɔ lɛ here mɛi fɛɛ ni eba jɛmɛ lɛ atuu. Afɔ̃ nine atsɛ́ mɛi kɛjɛ maji srɔtoi 23 nɔ kɛba Watchtower Educational Center ni yɔɔ Patterson yɛ New York lɛ kɛha nifeemɔ ni yɔɔ miishɛɛ nɛɛ. Nyɛminuu Lett kɛɛ mɛi ni egbe nikasemɔ naa lɛ akɛ amɛmiiya ni amɛyatsu “nitsumɔ ko ni baaná mɛi anɔ hewalɛ waa.” Egbala jwɛŋmɔ kɛtee “mɔji wuji”—tamɔ amale tsɔɔmɔi—ni maŋsɛɛ sanekpakpa shiɛlɔi heei lɛ baanyɛ amɛkɛ hewalɛ ni yɔɔ Ŋmalɛi lɛ amli lɛ akumɔ lɛ nɔ. (2 Korintobii 10:4, 5) Emu esane lɛ naa akɛ: “Kwɛ miishɛɛ ni nyɛbaaná ákɛ Yehowa kɛ nyɛ aaatsu nii kɛkumɔ mɔji wuji ni yɔɔ mɛi ni hiɛ tsui ni ja lɛ amli yɛ nyɛnitsumɔi lɛ amli lɛ!”
Harold Jackson, ni tsuɔ nii yɛ nitsumɔhe lɛ yitso lɛ wie saneyitso ni ji “Otii Fioo Komɛi ni Esa akɛ Nyɛkai” lɛ he. Etsɔɔ mli akɛ esaaa akɛ maŋsɛɛ sanekpakpa shiɛlɔi heei lɛ ahiɛ kpaa ‘Nyɔŋmɔ maŋtsɛyeli lɛ kɛ ejalɛ lɛ ni amɛaatao tsutsu’ lɛ nɔ kɔkɔɔkɔ. (Mateo 6:33) Esa akɛ amɛkai akɛ ‘suɔmɔ haa mɔ nane mɔɔ shi,’ ni eji nɔ titri ni haa ayeɔ omanye diɛŋtsɛ. (1 Korintobii 8:1) Ekɛɛ akɛ: “Nyɛhaa suɔmɔ akudɔa nyɛ yɛ nyɛkɛ mɛi krokomɛi asharamɔ mli.”
No sɛɛ lɛ, Geoffrey Jackson ni eji Nɔyeli Kuu lɛ mlinyo ni sɔmɔ akɛ maŋsɛɛ sanekpakpa shiɛlɔ kɛjɛ afi 1979 kɛyashi afi 2003 lɛ bi mɛi ni egbe nikasemɔ lɛ naa lɛ akɛ, “Ani Nyɛbaatsu Nyɛgbɛnaa Nii Ahe Nii?” Ema nɔ mi akɛ ehe miihia ni mɔ aná lɛ diɛŋtsɛ ehe kɛ shiɛmɔ nitsumɔ lɛ he jwɛŋmɔ kpakpa. Eji Kristofoi agbɛnaa nii akɛ amɛbɔ mɔdɛŋ ni amɛdũ anɔkwale wui lɛ ni amɛshwie nɔ nu. Ni kɛlɛ, eji Yehowa gbɛnaa nii akɛ eha eshwere yɛ mumɔŋ, ejaakɛ ‘Nyɔŋmɔ haa eshwereɔ.’ (1 Korintobii 3:6-9) Nyɛminuu Jackson kɛfata he akɛ: “Yehowa miikpa gbɛ akɛ nyɛbaaha nyɛhe awa yɛ mumɔŋ daa. Shi mɛni ji nyɛgbɛnaa nii ni he hiaa fe fɛɛ? No ji, ni nyɛsumɔ Yehowa kɛ mɛi ni nyɛyaa nyɛyasɔmɔ amɛ lɛ.”
Lawrence Bowen ni eji Gilead tsɔɔlɔ lɛ wie saneyitso ni ji “Nyɛlea Bɔ ni Sa akɛ Nyɛba Nyɛjeŋ Nyɛha” lɛ he. Ekai nikaselɔi lɛ akɛ Yehowa tsɔ naakpɛɛ gbɛ nɔ etsɔɔ Israelbii lɛ gbɛ ni ebu amɛhe yɛ ŋa lɛ nɔ. (2 Mose 13:21, 22) Ŋmɛnɛ, Kristofoi ni afɔ amɛ mu lɛ asafo ni ji “anɔkwale lɛ akulashiŋ kɛ enɔdaamɔnɔ lɛ” ji gbɛ kome ní etsɔɔ nɔ etsɔɔ wɔ gbɛ ní ebuɔ wɔhe. (1 Timoteo 3:14, 15) Ehe miihia ni maŋsɛɛ sanekpakpa shiɛlɔi heei lɛ ahiɛ anɔkwale lɛ ní kudɔɔ heshibalɔi ní ebuɔ amɛhe lɛ mli.
Wallace Liverance, ni eji Gilead tsɔɔlɔ kroko lɛ wo mɛi ni egbe nikasemɔ lɛ naa lɛ hewalɛ ni amɛhiɛ akakpa Nyɔŋmɔ wiemɔ ni amɛnuɔ yɛ ‘amɛsɛɛ’ lɛ nɔ. Wɔnuɔ Nyɔŋmɔ wiemɔ yɛ wɔ sɛɛ, kɛ shishinumɔ akɛ agbe Biblia lɛ ŋmaa naa afii ohai babaoo nɛ. Yehowa damɔ ewebii lɛ asɛɛ ni eetsɔ “tsulɔ anɔkwafo kɛ nilelɔ” lɛ nɔ ekɛ gbɛtsɔɔmɔ miiha amɛ taakɛ tookwɛlɔ jɛɔ tooku sɛɛ ni ekpalaa amɛ lɛ. (Yesaia 30:21; Mateo 24:45-47) Gilead Skul lɛ ha mɛi ni egbe nikasemɔ lɛ naa lɛ ahiɛ sɔ tsulɔ kuu nɛɛ waa diɛŋtsɛ. “Tsulɔ” lɛ efee New World Translation of the Holy Scriptures lɛ po. Wielɔ lɛ wo mɛi ni egbe nikasemɔ lɛ naa lɛ hewalɛ akɛ: “Nyɛŋɔa wolo ni eyi tɔ kɛ saji ni he hiaa nɛɛ, ni nyɛkɛtsua nii kɛtsɔɔ mɛi krokomɛi anii.”—Mateo 13:52.
Ní Aaafee Yehowa Suɔmɔnaa Nii yɛ Shiɛmɔ Nitsumɔ lɛ Mli
Yɛ wiemɔ ni saneyitso ji “Suɔmɔ ní Ayɔɔ akɛ Aaajaje Sanekpakpa lɛ Atsɔɔ” lɛ mli lɛ, Gilead tsɔɔlɔ Mark Noumair wie niiashikpamɔi komɛi ni mɛi ni egbe nikasemɔ lɛ naa lɛ ná beni amɛyɔɔ Gilead Skul lɛ he. (Romabii 1:15) Saji ni abi mɛi ni egbe nikasemɔ lɛ naa lɛ tsɔɔ akɛ amɛmiisumɔ waa akɛ amɛshiɛ yɛ shihilɛ fɛɛ shihilɛ mli.
Sanegbaa ni tee nɔ yɛ Kenneth Flodin kɛ nɔkwɛlɔi gbɛfalɔi etɛ ni miisɔmɔ amrɔ nɛɛ yɛ United States lɛ teŋ lɛ hu wo mɛi ni egbe nikasemɔ lɛ naa lɛ hewalɛ. Richard Keller kɛ Alejandro Lacayo, ní be ko ni eho lɛ amɛsɔmɔɔ yɛ Amerika Wuoyigbɛ kɛ Amerika Teŋgbɛ lɛ tsɔɔ bɔ ni amɛkpee kaai srɔtoi ni amɛkɛkpe lɛ naa, ni amɛtsɔɔ jɔɔmɔi komɛi ni amɛná beni amɛsɔmɔɔ akɛ maŋsɛɛ sanekpakpa shiɛlɔi lɛ. Moacir Felisbino gba tsɔsemɔ ni ená beni ekɛ maŋsɛɛ sanekpakpa shiɛlɔi fee ekome kɛtsu nii yɛ Brazil, he ni eda yɛ lɛ.
David Schafer bibii Robert Jones, Woodworth Mills, kɛ Christopher Slay ni ji maŋsɛɛ sanekpakpa shiɛlɔi ni yɔɔ niiashikpamɔ lɛ saji. Nyɛmimɛi hii etɛ lɛ gba bɔ ni amɛkase he ni akɛfɔ̃ɔ Yehowa nɔ yɛ fimɔ bei amli. Amɛma nɔ mi amɛha mɛi ni egbe nikasemɔ lɛ naa lɛ akɛ tsɔsemɔ ni Yehowa asafo lɛ kɛha amɛ lɛ ji nɔ ni saa amɛ jogbaŋŋ kɛha amɛmaŋsɛɛ sanekpakpa shiɛmɔ nitsumɔ lɛ. Nyɛminuu Mills mua sane lɛ naa akɛ: “Jeee nilee ni miná yɛ Gilead lɛ ji nɔ titri ni ye bua mi, shi moŋ heshibaa kɛ suɔmɔ ni mikase yɛ skul lɛ mli lɛ.”
Guy Pierce ni eji Nɔyeli Kuu lɛ mlinyo lɛ ha wiemɔ titri lɛ ni saneyitso ji “Yehowa Baaye Omanye.” Adam yeee omanye, shi ani no tsɔɔ akɛ Nyɔŋmɔ hu yeee omanye? Ani Nyɔŋmɔ bɔ Adam akɛ mɔ ni yeee emuu, taakɛ mɛi komɛi kɛɔ lɛ? Dabi kwraa, ejaakɛ “Nyɔŋmɔ fee gbɔmɔ bɔ ni ja pɛ.” (Jajelɔ 7:29) Wielɔ lɛ tsɔɔ mli akɛ emuuyeli mli ni Yesu hiɛ yɛ kaa ni naa wa fe fɛɛ mli yɛ shikpɔŋ lɛ nɔ lɛ ji odaseyeli ni tsɔɔ akɛ “Adam bɛ naajiemɔ loo yiŋtoo ko hewɔ ni eyeee omanye lɛ.” Toiboo he kaa ni Adam kɛkpe yɛ Eden abɔɔ lɛ mli lɛ mli waaa tamɔ kaa ni Yesu damɔ naa yɛ omanyeyeli mli lɛ. Fɛɛ sɛɛ lɛ, Adam yeee omanye. Shi kɛlɛ, Yehowa baaye omanye. Eyiŋtoi baaba mli. (Yesaia 55:11) Nyɛminuu Pierce kɛɛ maŋsɛɛ sanekpakpa shiɛlɔi heei lɛ akɛ: “Nyɛná hegbɛ akɛ nyɛkɛ he-kɛ-afɔleshaa mumɔ ni nyɛyɔɔ lɛ aaawo Yehowa hiɛ nyam. Eba akɛ Yehowa kɛ nyɛteŋ mɔ fɛɛ mɔ aaahi shi yɛ he fɛɛ he ni eeesɔmɔ yɛ akɛ maŋsɛɛ sanekpakpa shiɛlɔ lɛ.”
Beni Nyɛminuu Lett ni ji sɛinɔtalɔ lɛ kane ŋamɔi ni aŋma kɛjɛ Yehowa Odasefoi anitsumɔhe niji srɔtoi lɛ egbe naa lɛ, eha mɛi ni egbe nikasemɔ lɛ naa lɛ yijiemɔ woji kɛ hei ni amɛbaayatsu nii yɛ. Vernon Wisegarver, ni ji mɔ ko ni kɛ afii babaoo esɔmɔ yɛ Betel lɛ sɔle kɛmu nifeemɔ lɛ naa.
Mɛi 6,872 ni tee nifeemɔ lɛ shishi lɛ nu he akɛ nifeemɔ lɛ eha amɛná ekãa babaoo ni amɛkɛaafee Nyɔŋmɔ suɔmɔnaa nii. (Lala 40:9) Andrew kɛ Anna ni fata mɛi ni gbe nikasemɔ lɛ naa lɛ ahe lɛ kɛɛ akɛ: “Wɔjɔɔ wɔwala nɔ wɔha Yehowa. Wɔwo Yehowa shi akɛ wɔbaafee nɔ fɛɛ nɔ ni etao akɛ wɔfee lɛ. Ni amrɔ nɛɛ Yehowa efã akɛ wɔya Cameroon yɛ Afrika.” Amɛ kɛ mɛi krokomɛi ni gbe nikasemɔ lɛ naa lɛ miisumɔ akɛ amɛtsu nitsumɔ ni baaha amɛtsui anyɔ amɛ mli ni eha amɛná miishɛɛ hu lɛ. Hɛɛ, amɛyɛ he miishɛɛ akɛ amɛaafee Nyɔŋmɔ suɔmɔnaa nii.
[Akrabatsa ni yɔɔ baafa 17]
KLASBII LƐ AHE SAJI
Maji srɔtoi anɔ ni amɛjɛ kɛba: 6
Maji srɔtoi anɔ ni aha amɛ nitsumɔ yɛ mli: 20
Nikaselɔi lɛ ayifalɛ: 52
Afii abɔ ni amɛye lɛ mlijaa: 35.7
Afii abɔ ni amɛkɛhi anɔkwale lɛ mli lɛ mlijaa: 18.3
Afii abɔ ni amɛkɛsɔmɔ yɛ be-fɛɛ sɔɔmɔ nitsumɔ lɛ mli lɛ mlijaa: 14.5
[Mfoniri ni yɔɔ baafa 18]
Buu-Mɔɔ Biblia Gilead Skul Klasbii ni Ji 120 ni Gbe Nikasemɔ Naa
Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.