Yookpeemɔi Ni Yɔɔ Nyam Yɛ Nyɔŋmɔ Kɛ Gbɔmɛi Ahiɛ
“Akpee yoo yɛ Kana . . . Ni akpee Yesu hu kɛ ekaselɔi lɛ kɛtee yookpeemɔ lɛ.”—YOHANE 2:1, 2.
1. Amaniɛbɔɔ ni kɔɔ Kana ni Yesu tee lɛ he lɛ gbalaa mɔ jwɛŋmɔ kɛyaa mɛni nɔ?
YESU, ekaselɔi lɛ ekomɛi, kɛ enyɛ le bɔ ni Nyɔŋmɔ webii ayookpeemɔ ni yɔɔ nyam lɛ yɔɔ miishɛɛ ha. Kristo fee eklɛŋklɛŋ naakpɛɛ nii ni abɔ he amaniɛ lɛ yɛ yookpeemɔ ko shishi, ni no ha nakai yookpeemɔ lɛ bafee nɔ ni sa kadimɔ jogbaŋŋ, ni eha mɛi ni tee shishi lɛ hu amii shɛ amɛhe. (Yohane 2:1-11) Ekolɛ otee Kristofoi ni miisumɔ koni amɛsɔmɔ Yehowa akɛ wu kɛ ŋa ni yɔɔ miishɛɛ lɛ ayookpeemɔ shishi pɛŋ. Ekolɛ ooto gbɛjianɔ kɛha yookpeemɔ ni tamɔ nakai aloo ooshwe ni oye obua onaanyo ko bɔni afee ni nibii aya nɔ jogbaŋŋ yɛ eyookpeemɔ loo ekpeemɔ lɛ shishi. Mɛni baaye abua koni nibii aya nɔ jogbaŋŋ yɛ yookpeemɔ lɛ shishi?
2. Mɛni Biblia lɛ wieɔ yɛ yookpeemɔ he?
2 Kristofoi eyɔse akɛ ŋaawoo ni yɔɔ Nyɔŋmɔ Wiemɔ ni ajɛ emumɔ mli aŋma lɛ mli lɛ yeɔ buaa waa yɛ nuu kɛ yoo gbalamlibotemɔ he gbɛjianɔtoo mli. (2 Timoteo 3:16, 17) Yɛ anɔkwale mli lɛ, Biblia lɛ kɛ gbɛ pɔtɛɛ ko emaaa shi akɛ no nɔ esa akɛ atsɔ atsu Kristofoi ayookpeemɔ he nii. Enɛ bɛ naakpɛɛ ejaakɛ esoro maŋ fɛɛ maŋ kɛ ekusum, ni maŋ fɛɛ maŋ hu kɛ emla, ni srɔtofeemɔ nɛɛ jɛ he ni maŋ lɛ yɔɔ kɛ be mli ni awo mla lɛ. Ákɛ nɔkwɛmɔnɔ lɛ, yɛ blema Israel lɛ, abɛ gbɛ pɔtɛɛ ko ni atsɔɔ nɔ akpeɔ yoo. No beaŋ lɛ, nɔ ni afeɔ ji kɛ́ mɔ miikpee yoo lɛ, ayemforowu lɛ kɛ eŋa ni ji ayemforo lɛ yaa lɛ nuu lɛ shĩa loo etsɛ shĩa. (1 Mose 24:67; Yesaia 61:10; Mateo 1:24) No mli lɛ, kɛ́ akɛ yoo lɛ ba shĩa ni mɛi na lɛ lɛ, belɛ kpeemɔ nɔŋŋ akpee lɛ lɛ, ni afeee nibii ni kɛ́ aakpee yoo ŋmɛnɛ ni afɔɔ feemɔ lɛ eko yɛ mli.
3. Mɛɛ nifeemɔ Yesu yawo he sɔlɛ yɛ Kana?
3 Israelbii lɛ bu nifeemɔ ni ji yoo ni akɛ lɛ baa shĩa lɛ akɛ eji gbalamlibotemɔ loo yookpeemɔ. No sɛɛ lɛ, aŋmɛɛɔ okpɔlɔ kɛnyaa mɛi ni ebote gbalashihilɛ mli lɛ ahe, ni okpɔlɔŋmɛɛ nɛɛ eko he sane ji nɔ ni yɔɔ Yohane 2:1 lɛ. Bibliai babaoo tsɔɔ kuku nɛɛ shishi akɛ: “Akpee yoo yɛ Kana.” Shi Hela wiemɔ ni atsɔɔ shishi akɛ akpee yoo lɛ shishi diɛŋtsɛ ji “gbalamlibotemɔ he okpɔlɔŋmɛɛ” aloo “yookpeemɔ he okpɔlɔŋmɛɛ.”a (Mateo 22:2-10; 25:10; Luka 14:8) Amaniɛbɔɔ lɛ haa anaa faŋŋ akɛ Yesu tee Yudafoi ayookpeemɔ he okpɔlɔŋmɛɛ ko shishi ni eha nifeemɔ lɛ sɔ. Kɛlɛ, oti ko ni sa kadimɔ ji akɛ, bɔ ni ato yookpeemɔi ni tee nɔ yɛ no beaŋ lɛ ahe gbɛjianɔ aha lɛ yɛ srɔto yɛ nɔ ni wɔnaa ŋmɛnɛ lɛ ahe.
4. Mɛɛ gbɛ nɔ Kristofoi komɛi tsɔɔ amɛboteɔ gbalashihilɛ mli, ni mɛni hewɔ?
4 Ŋmɛnɛ lɛ, yɛ maji babaoo anɔ lɛ, ayɛ mlai ni kɛ́ Kristofoi miitao amɛbote gbalashihilɛ mli lɛ, esa akɛ amɛye nɔ. Kɛ́ amɛtsu enɛ he nii lɛ, no lɛ amɛbaanyɛ amɛtsɔ gbɛ̀i srɔtoi ni mla ŋmɛɔ gbɛ lɛ ateŋ eko fɛɛ eko nɔ amɛbote gbalashihilɛ mli. Enɛ baanyɛ afee nifeemɔ kuku ko ni kojolɔ, maŋ onukpa, aloo jamɔŋ hiɛnyiɛlɔ ko ni Nɔyeli lɛ eha lɛ hegbɛ baakwɛ nɔ. Mɛi komɛi tsɔɔ nɛkɛ gbɛ nɔ amɛboteɔ gbalashihilɛ mli, ni amɛfɔ̃ɔ amɛwekumɛi loo amɛnanemɛi Kristofoi enyɔoo komɛi anine koni amɛbadamɔ amɛsɛɛ akɛ odasefoi aloo amɛbakwɛ amɛyisɛɛ yɛ nifeemɔ ni he hiaa nɛɛ shishi. (Yeremia 33:11; Yohane 3:29) Akɛni yookpeemɔ he okpɔlɔŋmɛɛ kɛ yookpeemɔ sɛɛ henaabuamɔ ni mɛi pii baa lɛ ahe gbɛjianɔtoo kãaa shi ní shika fitemɔ babaoo hu yɛ mli hewɔ lɛ, Kristofoi komɛi sumɔŋ ni kɛ́ amɛmiifee amɛnɔ̃ lɛ, amɛfɔ̃ mɛi pii anine kɛba shishi. Ekolɛ amɛbaaŋmɛ okpɔlɔ fioo ko ní amɛkɛ amɛnanemɛi ni amɛsumɔɔ amɛsane lɛ enyɔoo ko aná amɛhewɔ miishɛɛ. Esaaa akɛ wɔnuɔ he akɛ bɔ ni wɔbaasumɔ ni wɔfee wɔnɔ lɛ, nakai esa akɛ mɔ fɛɛ mɔ afee enɔ. Esa akɛ wɔkpɛlɛ nɔ akɛ wɔnanemɛi Kristofoi krokomɛi ni edara yɛ Nyɔŋmɔ he nilee gbɛfaŋ lɛ baanyɛ afee nɔ ko ni soro no yɛ wɔnɔ lɛ he.—Romabii 14:3, 4.
5. Mɛni hewɔ Kristofoi ni boteɔ gbalashihilɛ mli lɛ ateŋ mɛi babaoo sumɔɔ koni aha wiemɔ yɛ amɛyookpeemɔ lɛ shishi lɛ, ni mɛɛ saji otii jeɔ kpo yɛ nakai wiemɔ ni ahaa lɛ mli?
5 Kristofoi ni boteɔ gbalashihilɛ mli lɛ ateŋ mɛi babaoo sumɔɔ ni ajɛ Biblia lɛ mli aha wiemɔ yɛ amɛyookpeemɔ shishi.b Amɛle akɛ Yehowa ni to gbalashihilɛ shishi, ni ákɛ e-Wiemɔ lɛ kɛ ŋaawoi kpakpai haa yɛ bɔ ni aaafee aye omanye yɛ gbalashihilɛ mli ni aná miishɛɛ yɛ mli. (1 Mose 2:22-24; Marko 10:6-9; Efesobii 5:22-33) Kristofoi ni boteɔ gbalashihilɛ mli lɛ ateŋ mɛi babaoo sumɔɔ koni amɛnanemɛi kɛ amɛwekumɛi afata amɛhe kɛná miishɛɛ yɛ nakai gbi lɛ nɔ. Kɛlɛ, te esa akɛ wɔbu nibii srɔtoi ni mla biɔ yɛ mɛi ni taoɔ akɛ amɛbote gbalashihilɛ mli lɛ adɛŋ, kɛ gbɛ̀i srɔtoi ni atsɔɔ nɔ aboteɔ gbalashihilɛ mli kɛ kusum naa nɔ̃ ni afeɔ yɛ he ni wɔyɔɔ lɛ wɔha tɛŋŋ? Wɔbaasusu gbɛ ni atsɔɔ nɔ aboteɔ gbalashihilɛ mli yɛ hei srɔtoi ahe yɛ nikasemɔ nɛɛ mli. Ekolɛ, obaana srɔtofeemɔi komɛi yɛ nɔ ni ole aloo nɔ ni afeɔ yɛ he ni nyɛyɔɔ lɛ teŋ. Kɛlɛ, obaana akɛ saji kɛ nifeemɔi komɛi ni wɔbaasusu he lɛ tamɔ nɔ ni ole lɛ, ni ákɛ amɛhe hiaa Nyɔŋmɔ tsuji.
Atsuɔ Gbalashihilɛ ni Yɔɔ Nyam lɛ He Nii yɛ Mla Naa
6, 7. Mɛni hewɔ esa akɛ wɔsusu mlai ni kɔɔ gbalamlibotemɔ he lɛ ahe, ni mɛɛ gbɛ nɔ wɔɔtsɔ wɔtsɔɔ akɛ wɔfeɔ nakai?
6 Eyɛ mli akɛ Yehowa ni to gbalashihilɛ he gbɛjianɔ moŋ, shi adesai anɔyelii tsɔɔ nibii komɛi ni esa akɛ mɛi ni boteɔ gbalashihilɛ mli lɛ afee. Tɔmɔ bɛ enɛ he. Yesu kɛɛ akɛ: “Nyɛŋɔa Kaisare nii nyɛhaa Kaisare, ni nyɛŋɔa Nyɔŋmɔ nii nyɛhaa Nyɔŋmɔ.” (Marko 12:17) Nakai nɔŋŋ, bɔfo Paulo hu kɛ gbɛtsɔɔmɔ ha akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ. Ejaakɛ hegbɛ ko bɛ ni jɛɛɛ Nyɔŋmɔ ŋɔɔ; shi hegbɛi ni yɔɔ lɛ, Nyɔŋmɔ to.”—Romabii 13:1; Tito 3:1.
7 Yɛ maji babaoo anɔ lɛ, Kaisare ni ji maŋ nɔyelɔi lɛ ni tsɔɔ mɔ ni eshɛ gbãla. No hewɔ lɛ, kɛ́ Kristofoi enyɔ ni Ŋmalɛ etsĩii amɛnaa akɛ amɛkabote gbalashihilɛ mli kpɛ amɛyiŋ akɛ amɛbaafee nakai lɛ, amɛfeɔ nakai yɛ maŋ nɔ ni amɛyɔɔ lɛ mlai anaa. Ekolɛ enɛ baabi ni amɛya ni aha amɛ wolo ni tsɔɔ akɛ amɛbaanyɛ amɛbote gbalashihilɛ mli, loo amɛya mɔ ko ni Nɔyeli lɛ eha lɛ hegbɛ akɛ ekwɛ gbalamlibotemɔ nɔ lɛ ŋɔɔ koni etsu he nii eha amɛ, aloo ekolɛ ebaabi ni amɛya ni aha amɛ wolo ni tsɔɔ akɛ amɛbote gbalashihilɛ mli. Beni Kaisare Augusto bi koni maŋ fɛɛ maŋ “akane” emlibii lɛ, Maria kɛ Yosef tee Betlehem koni ‘aŋma amɛgbɛi’ loo ayakane amɛ.—Luka 2:1-5.
8. Mɛɛ nifeemɔi Yehowa Odasefoi tsiɔ amɛhe kɛjɛɔ he, ni mɛni hewɔ?
8 Kɛ́ Kristofoi bote gbalashihilɛ mli yɛ mla naa ni akpɛlɛ amɛnɔ ákɛ wu kɛ ŋa lɛ, Nyɔŋmɔ buɔ no akɛ efeɔ amɛ ekome ni ákɛ esaaa akɛ afeɔ nɔ ko kɛfiteɔ nakai tsakpãa lɛ. No hewɔ lɛ, Yehowa Odasefoi boteee gbalashihilɛ mli shii enyɔ kɛtsɔ mla naa nifeemɔi srɔtoi ni akpɛlɛɔ eko fɛɛ eko nɔ akɛ eji gbalamlibotemɔ ni amɛkɛ amɛhe aaawo mli lɛ nɔ, ni asaŋ kɛ́ amɛná afii 25 loo afii 50 yɛ gbalashihilɛ mli ni amɛmiiye he gbijurɔ lɛ, amɛkuuu sɛɛ amɛkãaa amɛhe kitã ni amɛkã amɛhe beni amɛboteɔ gbalashihilɛ mli lɛ. (Mateo 5:37) (Yɛ sɔlemɔi komɛi amli lɛ, kɛ́ mɔ bote gbalashihilɛ mli yɛ mla naa lɛ, abuuu akɛ eji gbãla, ni nɔ ni amɛkɛɔ ji akɛ ja osɔfo ejɔɔ nɔ ní ejaje akɛ amɛtsɔ wu kɛ ŋa dani ebatsɔɔ gbãla diɛŋtsɛ.) Yɛ maji babaoo amli lɛ, nɔyeli lɛ ŋmɛɔ gbɛ ni Yehowa Odasefoi asafoŋ onukpai kwɛɔ gbalamlibotemɔ nɔ. Kɛ́ onukpai nɛɛ ateŋ mɔ ko ná hegbɛ ni tamɔ nakai lɛ, ekã shi faŋŋ akɛ ebaasumɔ koni etsu he nii yɛ Maŋtsɛyeli Asa nɔ, ni asaŋ eha gbalashihilɛ he wiemɔ yɛ nifeemɔ lɛ shishi. Asa lɛ nɔ ji he ni atsuɔ anɔkwa jamɔ he nii yɛ, ni eji he ko ni sa jogbaŋŋ akɛ aaaha gbɛjianɔ nɛɛ ni Yehowa Nyɔŋmɔ to lɛ he wiemɔ yɛ.
9. (a) Mɛni Kristofoi ni boteɔ gbalashihilɛ mli yɛ mla naa lɛ baanyɛ afee? (b) Mɛɛ gbɛ nɔ asafoŋ onukpai ahe baanyɛ aba yookpeemɔ he gbɛjianɔtoo lɛ mli?
9 Yɛ maji krokomɛi anɔ lɛ, mla biɔ koni kɛ́ mɔ baabote gbalashihilɛ mli lɛ, eyafee yɛ maŋ nitsumɔhe ni kwɛɔ no nɔ lɛ, aloo yɛ mlalelɔi pɔtɛɛ komɛi ni nɔyeli lɛ eha amɛ nakai hegbɛ lɛ ateŋ mɔ ko nitsumɔhe. Bei pii lɛ, Kristofoi sumɔɔ koni kɛ́ amɛbote gbalashihilɛ mli yɛ mla naa lɛ, no sɛɛ lɛ amɛha ayaha amɛ wiemɔ ni kɔɔ gbalashihilɛ he yɛ Maŋtsɛyeli Asa lɛ nɔ, ni afeɔ enɛ yɛ nakai gbi lɛ nɔ nɔŋŋ aloo enɔ jetsɛremɔ. (Akɛni amɛboteɔ gbalashihilɛ mli yɛ Nyɔŋmɔ kɛ gbɔmɛi ní Kristofoi asafo lɛ hu fata he lɛ ahiɛ hewɔ lɛ, amɛsumɔŋ koni kɛ́ amɛbote gbalashihilɛ mli yɛ mla naa lɛ, gbii babaoo aho dani aha wiemɔ ni abaajɛ Biblia lɛ mli aha lɛ he.) Kɛ́ mɛi yaabote gbalashihilɛ mli yɛ mla naa ni amɛbaasumɔ koni aha amɛ wiemɔ yɛ Maŋtsɛyeli Asa pɔtɛɛ ko nɔ lɛ, no lɛ esa akɛ amɛtsɔ hiɛ amɛbi gbɛ kɛjɛ onukpai ni yɔɔ nakai asafo lɛ Sɔɔmɔ Ajinafoi Akuu lɛ mli lɛ adɛŋ. Nɔkwɛlɔi nɛɛ baakwɛ kɛji mɛi ni baabote gbalashihilɛ mli lɛ yɛ gbɛi kpakpa, ni amɛbaakwɛ hu koni be ni akɛbaakpee yoo lɛ akabote be ni akɛbaa asafoŋ kpeei lɛ mli aloo eefite nifeemɔi ni ato he gbɛjianɔ yɛ asa lɛ nɔ lɛ ateŋ eko. (1 Korintobii 14:33, 40) Kɛfata he lɛ, amɛbaasusu bɔ ni mɛi ni baabote gbalashihilɛ mli lɛ taoɔ amɛsaa asa lɛ nɔ kɛha nifeemɔ lɛ he, ni asaŋ amɛbaakwɛ kɛji ehe baahia akɛ amɛha asafo lɛ ale akɛ abaakpee yoo yɛ asa lɛ nɔ.
10. Mɛɛ gbɛ nɔ gbalashihilɛ mli ni aboteɔ yɛ mla naa lɛ saa gbalashihilɛ he wiemɔ ni ahaa lɛ he?
10 Esa akɛ onukpa ni baaha gbalashihilɛ he wiemɔ lɛ aha wiemɔ lɛ afee nɔ ni yɔɔ miishɛɛ, ní tswaa wekukpãa ni kã mɔ kɛ Nyɔŋmɔ teŋ lɛ emaa shi, ni asaŋ ehe aba nyam. Kɛ́ mɛi lɛ bote gbalashihilɛ mli yɛ mla naa lɛ, esa akɛ eha efee faŋŋ akɛ amɛbote gbalashihilɛ mli yɛ Kaisare mla naa. Kɛ́ beni amɛboteɔ gbalashihilɛ mli yɛ mla naa lɛ, ahaaa amɛkãmɔ amɛhe kitã lɛ, no lɛ amɛbaanyɛ amɛfee nakai beni wiemɔ lɛ yaa nɔ.c Ni kɛ́ beni amɛboteɔ gbalashihilɛ mli yɛ mla naa lɛ amɛkãmɔ amɛhe kitã, ni kɛlɛ amɛmiisumɔ koni amɛfee ekoŋŋ yɛ Yehowa kɛ asafo lɛ hiɛ lɛ, no lɛ esa akɛ wiemɔi ni amɛkɛbaatsu nii yɛ kitãkamɔ lɛ mli lɛ aha ana akɛ ‘aŋɔ amɛ atsa’ momo.—Mateo 19:6; 22:21.
11. Mɛɛ gbɛ nɔ atsɔɔ aboteɔ gbalashihilɛ mli yɛ hei komɛi, ni mɛɛ gbɛ nɔ enɛ saa gbalashihilɛ he wiemɔ ni ahaa lɛ he?
11 Yɛ hei komɛi lɛ, maŋ mla biii koni mɛi ni yaabote gbalashihilɛ mli lɛ atsɔ nibii ni tamɔ nakai amli, aloo ákɛ amɛyana nɔyeli lɛ najiaŋdamɔlɔ ko. Gbɛ ni atsɔɔ nɔ aboteɔ gbalashihilɛ mli yɛ jɛmɛ ji akɛ, mɛi ni taoɔ abote gbalashihilɛ mli lɛ baayahé wolo yɛ nitsumɔhe ni kwɛɔ gbalamlibotemɔ nɔ lɛ ni amɛkɛ amɛgbɛi baawo shishi. No sɛɛ lɛ, abaaha amɛ wolo ni tsɔɔ akɛ akpɛlɛ amɛgbãla lɛ nɔ. Ni kɛjɛ gbi nɔ ni akɛ nakai wolo lɛ baawo amɛdɛŋ lɛ, amɛbatsɔmɔ wu kɛ ŋa. Taakɛ wɔsusu he kɛtsɔ hiɛ lɛ, kɛ́ mɔ kɛ eŋa nɛɛ miisumɔ lɛ, amɛbaanyɛ amɛto gbɛjianɔ koni kɛ́ amɛnine shɛ wolo nɛɛ nɔ lɛ, amɛtsa mlu kɛya Maŋtsɛyeli Asa lɛ nɔ koni asafoŋ onukpa ko ni eda yɛ Nyɔŋmɔ he nilee gbɛfaŋ ajɛ Biblia lɛ mli aha amɛ wiemɔ. Mɔ ni baaha wiemɔ lɛ baaha mɛi ni naa ebakpe shi lɛ ale akɛ mɛi enyɔ lɛ kɛ amɛgbãla lɛ eyawo maŋ lɛ woji amli, ni no hewɔ lɛ, amɛji wu kɛ ŋa. Kɛ́ amɛbaasumɔ ni amɛkãmɔ kitã ko lɛ, no lɛ abaatsu he nii taakɛ atsɔɔ mli yɛ kuku 10 kɛ shishigbɛ niŋmaa ni fata he lɛ mli lɛ. Mɛi ni naa ebakpe shi yɛ Maŋtsɛyeli Asa lɛ nɔ lɛ baanya mɛi ni ebote gbalashihilɛ mli lɛ ahe, ni kɛfata he lɛ, amɛbaaná ŋaawoo ni abaajɛ Nyɔŋmɔ Wiemɔ lɛ mli akɛha lɛ he sɛɛ.—Salomo Lalai 3:11.
Gbalamlibotemɔ yɛ Kusum Naa kɛ Gbalamlibotemɔ yɛ Mla Naa
12. Mɛni ji kusum naa gbãla, ni kɛ́ mɛi bote gbãla mli yɛ kusum naa lɛ, mɛni nilee yɔɔ mli akɛ amɛaafee?
12 Yɛ maji komɛi anɔ lɛ, mɛi boteɔ gbalashihilɛ mli yɛ kusum naa. Jeee nuu kɛ yoo ni yɛ kɛkɛ ákɛ mɔ kɛ ehemɔ he wɔwieɔ lɛ, ni asaŋ jeee mɔ ko ni dãa pɛ akɛyama enɔ ni ekɛ nuu lɛ yɛ he awieɔ lɛ.d Kusum naa gbalashihilɛ ni wɔwieɔ he lɛ kɔɔ bɔ ni maŋbii komɛi kɛ gbãla haa lɛ he. Ekolɛ, gbalamlibotemɔ nɛɛ baabi ni nuu lɛ aha yoo lɛ yi nii fɛɛ ni wekumɛi akpɛlɛ nɔ. Kɛ́ nuu lɛ fee nakai ni yoo lɛ wekumɛi kpɛlɛ nɔ lɛ, yoo lɛ batsɔɔ eŋa, ni yɛ mla kɛ Ŋmalɛ naa lɛ, amɛji wu kɛ ŋa. Nɔyelii kpɛlɛɔ kusum naa gbalamlibotemɔ ni tamɔ nɛkɛ nɔ, ni amɛbuɔ lɛ akɛ eja yɛ mla naa, ni ákɛ esaaa akɛ afeɔ nɔ ko kɛfiteɔ lɛ. Kɛ́ mɛi gbe kusum naa gbalamlibotemɔ lɛ naa lɛ, amɛbaanyɛ amɛkɛ amɛgbãla lɛ ayawo maŋ lɛ woji amli koni aha amɛ enɔ wolo. Gbãla ni akɛyawoɔ maŋ woji amli lɛ nyɛɔ ebuɔ wu kɛ ŋa lɛ he, ni kɛ́ ŋa lɛ tsɔ okulafo hu lɛ, enyɛɔ ebuɔ ehe, ni amɛbii hu náa he sɛɛ nakai nɔŋŋ. Asafoŋ onukpai lɛ baawo mɛi ni boteɔ gbãla mli yɛ kusum naa lɛ hewalɛ koni kɛ́ aaahi lɛ, amɛkɛ amɛgbãla lɛ ayawo maŋ lɛ woji amli amrɔ nɔŋŋ. Naakpɛɛ sane ji akɛ, etamɔ nɔ ni beni akɛ Mose Mla lɛ tsuɔ nii lɛ, no mli lɛ aŋmalaa gbalamlibotemɔ kɛ fɔmɔ he saji awoɔ maŋ lɛ woji amli kɛtoɔ.—Mateo 1:1-16.
13. Beni abote gbala mli yɛ kusum naa sɛɛ lɛ, te esa akɛ atsu gbalashihilɛ he wiemɔ ni abaaha lɛ he nii aha tɛŋŋ?
13 Kɛ́ mɛi bote gbãla mli yɛ kusum naa lɛ, no feɔ amɛ ekome ákɛ wu kɛ ŋa yɛ gbɛ ni ja nɔ. Taakɛ wɔna kɛtsɔ hiɛ lɛ, Kristofoi ni tsɔɔ nɛkɛ gbɛ nɔ amɛboteɔ gbalashihilɛ mli lɛ baanyɛ ato gbɛjianɔ koni aha amɛ wiemɔ yɛ Maŋtsɛyeli Asa lɛ nɔ ní asaŋ amɛkãmɔ amɛhe kitã yɛ jɛmɛ. Kɛ́ amɛto gbɛjianɔ ni tamɔ nakai lɛ, no lɛ mɔ ni baaha wiemɔ lɛ baaha ale akɛ mɛi enyɔ lɛ ebote gbãla mli momo yɛ Kaisare mla naa. Shikome pɛ abaaha wiemɔ nɛɛ. Wɔnaa yɛ sane nɛɛ mli akɛ, shikome pɛ mɛi lɛ bote gbãla mli, ni no ji kusum naa gbãla ní mla fiɔ sɛɛ lɛ, ni nakai nɔŋŋ wiemɔ ni ajɛɔ Ŋmalɛ lɛ mli ahaa lɛ, shikome pɛ ahaa. Esaaa akɛ be shwieɔ mli dani ahaa wiemɔ lɛ, ni kɛ́ aaahi lɛ, ebaabi ni aha wiemɔ lɛ yɛ gbi ni mɛi lɛ boteɔ gbalashihilɛ mli lɛ nɔŋŋ nɔ. No haa Kristofoi agbalamlibotemɔ baa nyam yɛ akutsoŋbii lɛ ahiɛ.
14. Kɛ́ mla ŋmɛɔ gbɛ akɛ mɛi baanyɛ abote gbalashihilɛ mli yɛ kusum naa aloo yɛ mla naa lɛ, mɛni Kristofoi baanyɛ afee?
14 Yɛ maji komɛi anɔ lɛ, mla ŋmɛɔ gbɛ koni mɛi abote gbalashihilɛ mli yɛ kusum naa aloo yɛ mla naa. Yɛ mla naa gbalamlibotemɔ gbɛfaŋ lɛ, bei pii lɛ, maŋ nitsulɔ ko ni damɔ nɔyeli lɛ najiaŋ ni kwɛɔ nɔ, ni ekomɛi yɛ ni ahaa mɛi enyɔ lɛ kãmɔɔ amɛhe kitã akɛ amɛbaahi shi akɛ wu kɛ ŋa ni amɛkɛ amɛnine woɔ woji ashishi. Kristofoi komɛi sumɔɔ mla naa gbalamlibotemɔ lɛ fe kusum naa nɔ̃ lɛ. Yɛ mla naa lɛ, ehe ehiaaa ni mɔ kɛ ehe awo enyɔ lɛ fɛɛ mli; akpɛlɛɔ emli eko fɛɛ eko nɔ yɛ mla naa. Gbɛtsɔɔmɔ ni akɛha yɛ kuku 9 kɛ 10 ní kɔɔ gbalamlibotemɔ he wiemɔ ni ahaa lɛ he lɛ he baa sane nɛɛ hu mli. Sane oti ji akɛ, gbɛ ni tamɔ nɛkɛ ni atsɔɔ nɔ aboteɔ gbalashihilɛ mli lɛ yɛ nyam yɛ Nyɔŋmɔ kɛ gbɔmɛi ahiɛ. (Luka 20:25; 1 Petro 2:13, 14) Kɛlɛ, kɛ́ Kristofoi komɛi bote gbalashihilɛ mli yɛ kusum naa ní sɛɛ mli lɛ amɛhala akɛ amɛbaaya maŋ lɛ nitsumɔhe ni kwɛɔ gbalamlibotemɔ nɔ (jeee Maŋtsɛyeli Asa lɛ nɔ) koni amɛbote gbãla mli yɛ mla naa lɛ, no lɛ amɛ diɛŋtsɛ amɛsane ni. Jeee sɛɛkpee nɔ̃ ni abaafee lɛ baaha abu gbãla lɛ akɛ eji gbãla diɛŋtsɛ. Ahaŋ gbalamlibotemɔ he wiemɔ yɛ nifeemɔ lɛ shishi, ni asaŋ aŋmɛŋ yookpeemɔ he okpɔlɔ.
Ha Woo Ahi Ogbalashihilɛ lɛ Mli
15, 16. Mɛɛ gbɛ nɔ aaatsɔ aha woo ahi gbalashihilɛ mli?
15 Beni naagba ko te shi yɛ Persia maŋtsɛ ko gbalashihilɛ mli lɛ, Memukan ni ji eŋaawolɔ nukpa lɛ wo ŋaa koni awo akpɔ ni baaha ‘yeigbayei fɛɛ awo amɛwumɛi.’ (Ester 1:20) Ehe ehiaaa ni adesai amaŋtsɛ ko awo Kristofoi ni ebote gbalashihilɛ mli lɛ akpɔ ni tamɔ nakai; nɔ hewɔ ji akɛ amɛŋamɛi woɔ amɛ. Nakai nɔŋŋ Kristofoi wumɛi hu woɔ amɛŋamɛi ni amɛkafoɔ amɛ. (Abɛi 31:11, 30; 1 Petro 3:7) Esaaa akɛ wɔmɛɔ ni afii babaoo hoɔ dani wɔwowoo wɔhe yɛ wɔgbalashihilɛ lɛ mli. Esa akɛ wɔtsu enɛ he nii kɛjɛ gbi ni wɔbote gbalashihilɛ mli lɛ nɔ, hɛɛ kɛjɛ gbi ni wɔkpee yoo lɛ nɔ.
16 Jeee wu kɛ ŋa lɛ pɛ esa akɛ amɛjie bulɛ kpo yɛ yookpeemɔ gbi lɛ nɔ. Kɛ́ abaaha gbalamlibotemɔ he wiemɔ lɛ, no lɛ esa akɛ Kristofonyo asafoŋ onukpa ni baaha lɛ hu atsu enɛ he nii yɛ gbɛ ni woo yɔɔ mli nɔ. Esa akɛ ewie etsɔɔ mɛi ni boteɔ gbalashihilɛ mli lɛ. Gbɛ kome ni eeetsɔ nɔ ekɛ woo aha amɛ ji ní eeejie sasaŋsɔ̃ kɛ adesãi kɛjɛ ewiemɔ lɛ mli. Esaaa akɛ ewieɔ saji ni baawo mɛi ni boteɔ gbalashihilɛ mli lɛ kɛ mɛi ni eba amɛyisɛɛ kwɛmɔ lɛ hiɛgbele. Yɛ no najiaŋ lɛ, esa akɛ ebɔ mɔdɛŋ koni eha wiemɔ lɛ afee nɔ ni yɔɔ miishɛɛ ní tswaa mɔ emaa shi. Esa akɛ egbala jwɛŋmɔ kɛba Mɔ ni to gbalashihilɛ lɛ shishi kɛ E-ŋaawoo ni nɔ̃ bɛ lɛ nɔ. Yɛ anɔkwale mli lɛ, gbalashihilɛ he wiemɔ lɛ ni asafoŋ onukpa lɛ aaaha yɛ gbɛ ni yɔɔ nyam nɔ lɛ baaha gbalashihilɛ lɛ awo Yehowa Nyɔŋmɔ hiɛ nyam.
17. Mɛni hewɔ esa akɛ Kristofoi kɛ mlai atsu nii yɛ amɛgbalamlibotemɔ mli lɛ?
17 Ekolɛ okadi gbalashihilɛ he mlai ahe saji babaoo yɛ nikasemɔ nɛɛ mli. Eeenyɛ eba akɛ, jeee fɛɛ kɔɔ nɔ ni yaa nɔ yɛ he ni nyɛyɔɔ lɛ he. Kɛlɛ, esa akɛ wɔteŋ mɔ fɛɛ mɔ ana akɛ ehe miihia koni Yehowa Odasefoi abu mlai ni yɔɔ he ni amɛyɔɔ lɛ ni amɛŋɔ Kaisare nii amɛha lɛ yɛ amɛgbalamlibotemɔ mli. (Luka 20:25) Paulo woɔ wɔ hewalɛ akɛ: “Bɔ ni ji mɔ fɛɛ mɔ gbɛnaa lɛ, nyɛfea nyɛhaa lɛ: Mɔ gbɛfaŋ ni ji onia lɛ, nyɛtsũa onia; mɔ nɔ̃ ni ji too lɛ, too; . . . mɔ nɔ̃ ni ji woo lɛ, woo.” (Romabii 13:7) Hɛɛ, esa akɛ Kristofoi atsɔɔ akɛ amɛbuɔ gbɛjianɔ ni Nyɔŋmɔ eto eha wɔ ŋmɛnɛ lɛ, ni esa akɛ gbi ni amɛboteɔ gbalashihilɛ mli lɛ nɔ tɔ̃ɔ ana enɛ.
18. Mɛɛ yookpeemɔ he nifeemɔ ko esa akɛ wɔsusu he, ni nɛgbɛ wɔbaana enɛ he sane yɛ?
18 Kristofoi komɛi yɛ ni kɛ́ amɛkpee yoo lɛ, amɛŋmɛɔ okpɔlɔ aloo amɛtsɛ́ɔ henaabuamɔ ni amɛkɛ nibii bibii saraa mɛi ni bakwɛ amɛyisɛɛ lɛ anaa. Kɛ́ obaakai lɛ, Yesu tee okpɔlɔŋmɛɛ ni tamɔ nakai shishi. Kɛ́ mɛi ni boteɔ gbalashihilɛ mli lɛ to henaabuamɔ ni tamɔ nakai he gbɛjianɔ ni afɔ̃ wɔ nine lɛ, mɛɛ gbɛ nɔ ŋaawoo ni yɔɔ Biblia lɛ mli baanyɛ aye abua wɔ koni wɔha nifeemɔ nɛɛ hu awo Nyɔŋmɔ hiɛ nyam ni asaŋ eha awie mɛi ni boteɔ gbalashihilɛ mli lɛ kɛ Kristofoi asafo lɛ he ekpakpa? Wɔbaasusu sane nɛɛ he yɛ nikasemɔ ni nyiɛ sɛɛ lɛ mli.e
[Shishigbɛ niŋmai]
a Abaanyɛ akɛ nakai wiemɔ lɛ nɔŋŋ atsu nii kɛ́ aawie okpɔlɔŋmɛɛ krokomɛi ni kɔɔɔ gbalashihilɛ he lɛ ahe.—Ester 9:22, Septuagint.
b Wolo ni Yehowa Odasefoi kwɛɔ nɔ kɛhaa gbalashihilɛ he wiemɔ lɛ yitso ji “Gbalashihilɛ ni Yɔɔ Nyam yɛ Nyɔŋmɔ Hiɛ,” ni akɛ minitii 30 haa wiemɔ lɛ. Ŋmalɛ naa ŋaawoo kpakpai ni yɔɔ Yehowa Odasefoi awolo ni ji Nɔ Diɛŋtsɛ ni Kɛ Weku Miishɛɛ Baa kɛ ekrokomɛi ni amɛfee lɛ amli ajɛ ato wolo ni akwɛɔ nɔ kɛhaa wiemɔ lɛ he gbɛjianɔ. Wiemɔ lɛ he baa sɛɛnamɔ kɛhaa mɛi ni boteɔ gbalashihilɛ lɛ mli lɛ kɛ mɛi hu ni eba yookpeemɔ lɛ shishi lɛ.
c Kitãi ni woɔ Nyɔŋmɔ hiɛ nyam ní mɛi ni boteɔ gbalashihilɛ mli lɛ kãmɔɔ amɛhe lɛ ji nɔ ni nyiɛ sɛɛ nɛɛ, shi tsakemɔi baa mli kɛ́ maŋ lɛ mla bi ni afee nakai. Kitã ni ayemforowu lɛ kãa ji: “Mi [ayemforowu lɛ gbɛi] miiŋɔ bo [ayemforo lɛ gbɛi] akɛ mikpeemɔ ŋa, ni masumɔ bo, ni mahiɛ bo dɔdɔɔdɔ, taakɛ eji yɛ Nyɔŋmɔ mla ni yɔɔ Ŋmalɛ Krɔŋkrɔŋ lɛ mli kɛha wumɛi ni ji Kristofoi, bei abɔ ni wɔyi enyɔ lɛ fɛɛ wɔkɛaahi shi yɛ he kome yɛ shikpɔŋ lɛ nɔ taakɛ Nyɔŋmɔ gbalashihilɛ he gbɛjianɔtoo lɛ ji lɛ.” Kitã ni ayemforo lɛ kãa ji: “Mi [ayemforo lɛ gbɛi] miiŋɔ bo [ayemforowu lɛ gbɛi] akɛ mikpeemɔ wu, ni masumɔ bo, ni mahiɛ bo dɔdɔɔdɔ, ni mikɛ bulɛ ni mli kwɔ baaha bo, taakɛ eji yɛ Nyɔŋmɔ mla ni yɔɔ Ŋmalɛ Krɔŋkrɔŋ lɛ mli kɛha ŋamɛi ni ji Kristofoi, bei abɔ ni wɔyi enyɔ lɛ fɛɛ wɔkɛaahi shi yɛ hekome yɛ shikpɔŋ lɛ nɔ taakɛ Nyɔŋmɔ gbalashihilɛ he gbɛjianɔtoo lɛ ji lɛ.”
[Shishigbɛ niŋmai]
d Awie mɔ ko ni dãa pɛ akɛyama enɔ ni ekɛ nuu lɛ yɛ lɛ he saji babaoo yɛ blɔfo Buu-Mɔɔ ni ji May 1, 1962 lɛ baafa 287 lɛ mli.
e Kɛfata he lɛ, kwɛmɔ sane ni yitso ji “Ha Oyookpeemɔ Gbi lɛ Afee Nɔ ni Yɔɔ Miishɛɛ kɛ Nyam Babaoo” ní yɔɔ baafa 28 lɛ mli.
Ani Okaiɔ?
• Mɛni hewɔ esa akɛ wɔsusu mlai ni kɔɔ gbalamlibotemɔ kɛ bɔ ni gbalamlibotemɔ kɔɔ Nyɔŋmɔ he ehaa lɛ ahe lɛ?
• Kɛ́ Kristofoi bote gbalashihilɛ mli yɛ mla naa lɛ, mɛni amɛbaanyɛ amɛfee yɛ no sɛɛ nɔŋŋ?
• Mɛni hewɔ ahaa gbalashihilɛ he wiemɔ yɛ Maŋtsɛyeli Asa lɛ nɔ?
[Mfoniri ni yɔɔ baafa 18]
Yɛ blema Israel lɛ, kɛ́ mɔ miikpee yoo lɛ, ayemforowu lɛ kɛ eŋa ni ji ayemforo lɛ yaa lɛ nuu lɛ shĩa loo etsɛ shĩa
[Mfoniri ni yɔɔ baafa 21]
Kɛ́ Kristofoi bote gbalashihilɛ mli yɛ kusum naa ní amɛmiisumɔ lɛ, amɛbaanyɛ amɛto gbɛjianɔ koni ayaha amɛ wiemɔ yɛ Maŋtsɛyeli Asa lɛ nɔ