Harmagedon Nyɔŋmɔ Ta Ni Ekɛbaafo Tai Fɛɛ Asɛɛ

“Amɛbuɔ mɔ naanyo gbɔmɔ ni eeegbe lɛ lɛ akɛ eji yitsoŋwalɛ nifeemɔ; no hewɔ lɛ, kɛha amɛ lɛ ta ji nɔ ko ni shishinumɔ bɛ he ni ehiii kwraa, nɔ ko ni bɛ amɛwiemɔ mli po.” —ENƐ JI NƆ NI NORWAY NIIAMLIPƐILƆ FRIDTJOF NANSEN WIE YƐ GREENLAND SHIKWƐƐBII AHE YƐ AFI 1888.

WƆTEŊ namɔ sumɔŋ akɛ ehi maŋ ko ni abuɔ ta akɛ eji nɔ ko ni “shishinumɔ bɛ he ni ehiii kwraa” lɛ mli? Namɔ sumɔŋ akɛ ebaahi jeŋ ní aleee nɔ ni ji ta po, akɛni ta bako yɛ jɛmɛ pɛŋ hewɔ lɛ mli? Ekolɛ obaasusu akɛ jeŋ ni tamɔ nɛkɛ nyɛŋ aba, titri lɛ kɛji wɔkɛ wɔhiɛ fɔ̃ adesai anɔ akɛ amɛji mɛi ni kɛ enɛ baaba lɛ.

Shi kɛlɛ, Nyɔŋmɔ diɛŋtsɛ wo shi yɛ Yesaia gbalɛ lɛ mli akɛ ekɛ jeŋ ni tamɔ nakai baaba, ni ekɛɛ akɛ: “Amɛkɛ amɛklantei aaasɔ̃ kɔii ni amɛkɛ amɛkpɔlɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”—Yesaia 2:4.

Eyɛ faŋŋ akɛ kɛji shiwoo nɛɛ baaba mli lɛ, no lɛ ebaabi ní afee tsakemɔ wulu diɛŋtsɛ yɛ jeŋ ni ŋmɛnɛ lɛ asraafoi akpekpei 20 kɛ amɛhe woɔ ta mli, ni tai aaafee 20 hu miiya nɔ amrɔ nɛɛ yɛ mli lɛ mli. Efeee wɔ naakpɛɛ akɛ, Yehowa ni ji Nyɔŋmɔ ofe lɛ kɛ ehe baawo adesai asaji amli. Yehowa he ni ekɛbaawo saji amli nɛɛ baayagbe naa yɛ nɔ ni Biblia lɛ tsɛɔ lɛ Harmagedon lɛ mli.—Kpojiemɔ 16:14, 16.

Eyɛ mli akɛ yɛ wɔbei nɛɛ amli lɛ, akɛ wiemɔ “Harmagedon” lɛ etsu nii kɛdamɔ shi aha nuklea ni kpataa nii ahiɛ babaoo yɛ jeŋ fɛɛ moŋ, shi wiemɔ komekomei ashishitsɔɔmɔ wolo ko tsɔɔ wiemɔ nɛɛ shishi diɛŋtsɛ akɛ: “Eji he ni ekpakpafeelɔi kɛ efɔŋfeelɔi baawu ta kpeteŋkpele ko ni baafee naagbee ta yɛ.” Ani ekpakpa baaye efɔŋ nɔ kunim, aloo ta nɛɛ ji adesã ko kɛkɛ?

Kɛ́ wɔyɔse akɛ Biblia lɛ wieɔ shii abɔ akɛ efɔŋfeemɔ baaba naagbee lɛ, ebaanyɛ eha wɔtsɛ wɔtsui wɔŋmɛ wɔmli. Lalatsɛ lɛ gba akɛ: “Ha eshafeelɔi atã yɛ shikpɔŋ lɛ nɔ, . . . mɛi fɔji hu akahi shi dɔŋŋ.” (Lala 104:35) Abɛi awolo lɛ kɛɔ akɛ: “Mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.”—Abɛi 2:21, 22.

Biblia lɛ feɔ lɛ faŋŋ hu akɛ efɔŋfeelɔi lɛ eŋmɛŋ amɛhewalɛ lɛ he yɛ toiŋjɔlɛ mli; ni no hewɔ ni ebaabi ni Nyɔŋmɔ awu naagbee ta ni baajie efɔŋfeemɔi fɛɛ ni ta hu fata he lɛ kɛya lɛ. (Lala 2:2) Gbɛi ni Biblia lɛ kɛtsɛɔ ta ni yɔɔ srɔto kwraa nɛɛ, ni ji Harmagedon lɛ sa kadimɔ waa diɛŋtsɛ.

Blema Tai ni Awu yɛ Megido Niiaŋ

Wiemɔ “Harmagedon” lɛ shishi ji “Megido Gɔŋ.” Blema maŋ ni ji Megido kɛ agbɛnɛ Yezreel Ŋa ni kã emasɛi lɛ ji hei ni kɛjɛ blema tɔ̃ɔ lɛ, awu tai ni afã kome yeɔ afã kroko lɛ nɔ kunim butuu yɛ. Yinɔsaneŋmalɔ Eric H. Cline ŋma yɛ wolo ni ji The Battles of Armageddon (Harmagedon Tai) lɛ mli akɛ: “Yɛ yinɔsane mli fɛɛ lɛ, Megido kɛ Yezreel Jɔɔ lɛ batsɔmɔ hei ni awu tai ni tsɔɔ maji anɔyaa yɛ.”

Taakɛ Cline tsɔɔ mli lɛ, bei pii lɛ fãi ni kɛ amɛhe wuɔ ta lɛ ateŋ ekome yeɔ kunim butuu yɛ tai ni awu yɛ he ko ni bɛŋkɛ Megido lɛ mli. Aye Mongol asraafoi ni butu Asia maji babaoo yɛ afi 1200 Ŋ.B. afii lɛ amli lɛ anɔ kunim klɛŋklɛŋ kwraa yɛ jɔɔ nɛɛ mli. Britain asraafoi a-Tatsɛnukpa Edmund Allenby ye Turkeybii lɛ anɔ kunim yɛ klɛŋklɛŋ jeŋ ta lɛ mli yɛ he ko ni bɛŋkɛ Megido. Asraafoi anitsumɔi ahe yinɔsaneŋmalɔ ko tsɔɔ kunim ní Allenby ye lɛ mli akɛ, eji “ta ko ni ana naa oya yɛ be kukuoo mli kɛ ta hu ni aye mli kunim butuu yɛ yinɔsane mli fe fɛɛ.”

Yɛ Biblia beaŋ lɛ, awu tai ni afã kome ye afã kroko lɛ nɔ kunim butuu hu yɛ he ko ni bɛŋkɛ Megido. Jɛmɛ ji he ni Kojolɔ Barak ye Kanaanbii atai ni Sisera nyiɛ amɛhiɛ lɛ anɔ kunim yɛ. (Kojolɔi 4:14-16; 5:19-21) Gideon kɛ ehii fioo ni amɛyibɔ ji mɛi 300 lɛ ye Midianbii ata kpele ko nɔ kunim butuu yɛ jɛi niiaŋ. (Kojolɔi 7:19-22) Maŋtsɛ Saul kɛ ebi Yonatan gbo yɛ Gilboa Gɔŋ ni bɛŋkɛ jɛmɛ lɛ nɔ beni Filistibii ata lɛ ye Israelbii ata lɛ nɔ kunim lɛ.—1 Samuel 31:1-7.

Akɛni Megido kɛ jɔɔ ni kã emasɛi lɛ kã he ko ni hi jogbaŋŋ kɛha tawuu hewɔ lɛ, awu tai babaoo yɛ jɛmɛ yɛ afii 4,000 ni eho lɛ mli. Yinɔsaneŋmalɔ ko tsɔɔ akɛ, kɛ́ hooo kwraa lɛ awu tai 34 sɔŋŋ yɛ jɛi niiaŋ!

Ŋwanejee ko bɛ he akɛ Megido he yinɔsane kɛ bɔ ni he ni ekã lɛ hi jogbaŋŋ kɛha tawuu lɛ kɛ wiemɔ “Harmagedon” ni akɛtsu nii yɛ mfonirifeemɔŋ lɛ yɛ tsakpãa. Eyɛ mli akɛ wiemɔ Harmagedon lɛ jeɔ kpo shikome pɛ yɛ Biblia lɛ mli moŋ, shi shihilɛ ni awieɔ he yɛ Kpojiemɔ wolo lɛ mli ni wiemɔ nɛɛ baje kpo yɛ mli lɛ tsɔɔ faŋŋ akɛ, ebaasa adesai fɛɛ ni yɔɔ shikpɔŋ lɛ nɔ lɛ awala he.

Nɔ ni Biblia lɛ Kɛɔ yɛ Harmagedon He

Eyɛ mli akɛ aye kunim butuu yɛ tai ni awu yɛ he ko ni bɛŋkɛ Megido lɛ ateŋ babaoo mli moŋ, shi enɛɛmɛi ateŋ eko kwraa ejieee efɔŋfeemɔ kɛyaaa. Yɛ anɔkwale mli lɛ, tai nɛɛ eko kwraa bɛ ni ha mpleshii ni kã ekpakpafeelɔi kɛ efɔŋfeelɔi ateŋ lɛ tsu nibii ahe nii yɛ gbɛ ni ja kɛmɔ shi nɔ. Belɛ, esa akɛ nakai Harmagedon ta lɛ ajɛ Nyɔŋmɔ ŋɔɔ. Taakɛ Yesu wie be ko lɛ, “mɔ kpakpa ko bɛ akɛ ja mɔ kome, lɛ ji Nyɔŋmɔ.” (Luka 18:19) Kɛfata he lɛ, Biblia lɛ wieɔ Harmagedon he tɛ̃ɛ akɛ Nyɔŋmɔ ta.

Biblia mli wolo ni ji Kpojiemɔ lɛ kɛɔ akɛ, “maŋtsɛmɛi ni yɔɔ jeŋ muu lɛ fɛɛ lɛ” baabua amɛhe naa “kɛya Nyɔŋmɔ Ofe lɛ gbi wulu lɛ nɔ ta lɛ.” (Kpojiemɔ 16:14) Gbalɛ lɛ kɛfata he akɛ: “Ni ebua amɛnaa kɛtee he ko ni atsɛɔ jɛi yɛ Hebri wiemɔ mli akɛ Harmagedon lɛ.”a (Kpojiemɔ 16:16) Sɛɛ mli lɛ, Kpojiemɔ wolo lɛ tsɔɔ mli akɛ “shikpɔŋ lɛ nɔ maŋtsɛmɛi lɛ kɛ amɛtai” lɛ ‘aaabua amɛhe naa ní amɛkɛ mɔ ni tá okpɔŋɔ lɛ nɔ lɛ kɛ eta lɛ ayawu.’ (Kpojiemɔ 19:19) Okpɔŋɔnɔtalɔ nɛɛ jeee mɔ ko mɔ ko akɛ Yesu Kristo.—1 Timoteo 6:14, 15; Kpojiemɔ 19:11, 12, 16.

Te wɔbaamu sane naa yɛ ŋmalɛi kukuji nɛɛ ahe wɔha tɛŋŋ? No ji akɛ, Harmagedon ji ta ni Nyɔŋmɔ kɛ adesai toigbolɔi ata lɛ baawu. Mɛni hewɔ Yehowa kɛ e-Bi Yesu Kristo baawu ta ni tamɔ nakai? Nɔ kome ji akɛ, Harmagedon ‘baafite mɛi ni fiteɔ shikpɔŋ lɛ.’ (Kpojiemɔ 11:18) Kɛfata he lɛ, ekɛ jeŋ ko ni toiŋjɔlɛ yɔɔ mli baaba, ni no ji “shikpɔŋ hee ni jalɛ hiɔ mli” ni ‘wɔkwɛɔ lɛ gbɛ yɛ Nyɔŋmɔ shiwoo lɛ naa lɛ.’—2 Petro 3:13.

Mɛni Hewɔ Harmagedon He Hiaa?

Ani ewa kɛha bo akɛ ooohe oye akɛ Yehowa ni ji ‘suɔmɔ Nyɔŋmɔ’ lɛ baaha e-Bi ni ji “Hejɔlɛ lumɔ” lɛ awu ta? (2 Korintobii 13:11; Yesaia 9:5) Kɛ́ wɔnu yiŋtoo hewɔ ní amɛfeɔ enɛ lɛ shishi lɛ, ŋwanejee ko bɛ he akɛ no baaha nibii afee faŋŋ diɛŋtsɛ aha wɔ. Lala wolo lɛ wieɔ Yesu he akɛ tabilɔ ni ta okpɔŋɔ nɔ. Mɛni hewɔ ewuɔ ta lɛ? Lalatsɛ lɛ tsɔɔ mli akɛ, Kristo jeɔ kpo kɛbaa yɛ “anɔkwale kɛ mlijɔlɛ kɛ jalɛ” mli. Ewuɔ ta nɛɛ ejaakɛ esumɔɔ jalɛ ni enyɛɔ nifɔjianii.—Lala 45:5, 8.

Nakai nɔŋŋ hu Biblia lɛ wieɔ bɔ ni Yehowa baafee enii eha yɛ jalɛ sane ni ayeee ni yaa nɔ yɛ je lɛŋ ŋmɛnɛ lɛ he. Gbalɔ Yesaia ŋma akɛ: “NUŊTSƆ lɛ ena enɛ, ni esaaa ehiɛ akɛ jalɛsaneyeli bɛ. Eeewo jalɛ ákɛ dama, ni eeebu yiwalaheremɔ dadefai yɛ eyitso. Eeewo shwelɛ ni mli wa atade ákɛ hehaa nɔ̃ koni ekɛjaje nibii, ni ebaagbala efɔŋfeelɔi ni haa mɛi naa nɔ̃ lɛ atoi ni ebaatɔ amɛhe owele.”—Yesaia 59:15, 17, Today’s English Version.

Gbii abɔ ní efɔŋfeelɔi kã he amɛyeɔ nɔ lɛ, jalɔi naŋ toiŋjɔlɛ kɛ shweshweeshwe shihilɛ. (Abɛi 29:2; Jajelɔ 8:9) Yɛ anɔkwale mli lɛ, gbii abɔ ni mɛi ni tsuɔ nibii fɔji lɛ kã he amɛyɔɔ lɛ, wɔnyɛŋ wɔjie juu-kɛfɔ̃ kɛ efɔŋfeemɔ kɛya kɔkɔɔkɔ. No hewɔ lɛ, ja ajie mɛi fɔji lɛ kɛjɛ shihilɛ mli dani abaaná toiŋjɔlɛ daa, ni aya nɔ aye jalɛ sane hu be fɛɛ be. Salomo ŋma akɛ: “Gbɔmɔ fɔŋ lɛ, jalɔ kpɔmɔ nii ni.”—Abɛi 21:18.

Akɛni Nyɔŋmɔ ji Kojolɔ lɛ hewɔ lɛ, wɔbaanyɛ wɔná nɔmimaa akɛ kojomɔi fɛɛ ní ebaakojo mɛi fɔji lɛ baafee nɔ ni ja. Abraham bi akɛ: “Ani shikpɔŋ fɛɛ nɔ kojolɔ lɛ ekojoŋ jalɛ kojomɔ?” Abraham ná ele akɛ, Yehowa feɔ nɔ ni ja be fɛɛ be! (1 Mose 18:25) Kɛfata he lɛ, Biblia lɛ haa wɔleɔ akɛ Yehowa naaa mɛi fɔji ahiɛkpatamɔ he miishɛɛ; efeɔ nakai pɛ kɛji nɔ ko kwraa bɛ dɔŋŋ ni ebaafee yɛ sane lɛ he.—Ezekiel 18:32; 2 Petro 3:9.

Yɔsemɔ akɛ Harmagedon Ji Ta Diɛŋtsɛ

Namɔ gbɛfaŋ obaahi yɛ ta ni afã kome baaye afã kroko lɛ nɔ kunim butuu lɛ mli? Wɔteaŋ mɛi babaoo baasusu akɛ wɔfiɔ ekpakpafeelɔi ata lɛ sɛɛ. Shi te wɔɔfee tɛŋŋ wɔná nɔmimaa yɛ enɛ he? Gbalɔ Zefania woɔ wɔ hewalɛ akɛ: “Nyɛtaoa jalɛ sɛɛ gbɛ, nyɛtaoa heshibaa sɛɛ gbɛ.” (Zefania 2:3) Bɔfo Paulo wie akɛ, Nyɔŋmɔ suɔmɔnaa nii ji akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.”—1 Timoteo 2:4.

Klɛŋklɛŋ nifeemɔ ni kɛ mɔ yaa yiwalaheremɔ mli ji ní wɔkase anɔkwalei ni kɔɔ Yehowa kɛ eyiŋtoo akɛ ebaajie mɛi fɔji kɛjɛ shikpɔŋ lɛ nɔ lɛ ahe nii. Nifeemɔ ni ji enyɔ ji ní wɔtsu jalɛ nii bɔni afee ní wɔná Nyɔŋmɔ hiɛ duromɔ kɛ ehebuu.

Kɛ́ wɔtsu nifeemɔi ni he hiaa nɛɛ ahe nii lɛ, no lɛ wɔbaanyɛ wɔkpa Harmagedon ni ji ta diɛŋtsɛ ni baafo adesai atai fɛɛ asɛɛ lɛ gbɛ. Kɛji nakai ta lɛ ba naagbee lɛ, mɛi fɛɛ ni yɔɔ he fɛɛ he lɛ baabu ta akɛ eji nɔ ko ni shishinumɔ bɛ he ni ehiii kwraa. “Amɛkaseŋ tawuu dɔŋŋ!”—Yesaia 2:4.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 5]

Atsɛ́ɔ Nyɔŋmɔ he ni ekɛbaawo adesai asaji amli lɛ akɛ Harmagedon

[Mfoniri ni yɔɔ baafa 6]

Megido

[Mfoniri ni yɔɔ baafa 6]

Gideon kɛ ehii lɛ ye kunim butuu yɛ ta ko mli yɛ he ko ni bɛŋkɛ Megido

[Mfoniri ni yɔɔ baafa 6, 7]

Kɛ́ Harmagedon ta lɛ ba naagbee lɛ, mɛi fɛɛ ni yɔɔ he fɛɛ he lɛ baabu ta akɛ eji nɔ ko ni shishinumɔ bɛ he ni ehiii kwraa

[Mfoniri ni yɔɔ baafa 8]

Klɛŋklɛŋ nifeemɔ ni kɛ mɔ yaa yiwalaheremɔ mli ji ní wɔkase anɔkwalei ni kɔɔ Yehowa kɛ eyiŋtoo lɛ ahe nii