Nɔ Ni Wɔkaseɔ Kɛjɛɔ Yesu Ŋɔɔ

Yɛ Bɔ ni Esa akɛ Wɔkɛ Mɛi Krokomɛi Aye Aha lɛ Mli

Mɛni hewɔ esa akɛ ojie mlihilɛ kpo?

Ani ojieɔ mlihilɛ kpo kɛ́ mɛi ejieee mlihilɛ kpo amɛtsɔɔɔ bo po? Kɛ́ wɔmiisumɔ ni wɔkase Yesu lɛ, esa akɛ wɔjie mlihilɛ kpo wɔtsɔɔ mɛi ni nyɛ̃ɔ wɔ lɛ po. Yesu kɛɛ akɛ: “Kɛji nyɛsumɔ mɛi ni sumɔɔ nyɛ lɛ, mɛɛ shidaa nyɛyɔɔ? ejaakɛ eshafeelɔi hu sumɔɔ mɛi ni sumɔɔ amɛ. . . . Moŋ nyɛsumɔa nyɛhenyɛlɔi . . . , ni nyɛaatsɔmɔ Ŋwɛinyo lɛ bii, shi lɛ lɛ emli hi yɛ trumui kɛ mɛi fɔji anɔ.”—Luka 6:32-36; 10:25-37.

Mɛni hewɔ esa akɛ wɔkɛ tɔmɔi ake?

Kɛ́ wɔtɔ lɛ, wɔsumɔɔ ni Nyɔŋmɔ kɛke wɔ. Yesu tsɔɔ akɛ eja gbɛ akɛ wɔɔsɔle ni Nyɔŋmɔ kɛ wɔtɔmɔi ake wɔ. (Mateo 6:12) Shi Yesu tsɔɔ hu akɛ, Nyɔŋmɔ kɛ wɔtɔmɔi baake wɔ kɛ́ wɔ hu wɔkɛ mɛi krokomɛi atɔmɔi ke amɛ lɛ. Ekɛɛ akɛ: “Kɛji nyɛkɛ mɛi atɔmɔi fa amɛ lɛ, nyɛtsɛ ni yɔɔ ŋwɛi lɛ kɛaafa nyɛ hu. Shi kɛji nyɛkɛ mɛi atɔmɔi efaaa amɛ lɛ, nyɛtsɛ lɛ hu kɛ nyɛtɔmɔi lɛ efaŋ nyɛ.”—Mateo 6:14, 15.

Te wekui amlibii aaafee tɛŋŋ amɛná miishɛɛ?

Eyɛ mli akɛ Yesu boteee gbalashihilɛ mli moŋ, shi wɔbaanyɛ wɔkase bɔ ni wɔbaafee ni wɔha miishɛɛ ahi wɔweku lɛ mli lɛ he nii babaoo kɛjɛ edɛŋ. Yesu tsɔ ewiemɔi kɛ enifeemɔi anɔ efee nɔkwɛmɔnɔ efɔ̃ shi eha wɔ ni wɔnyiɛ sɛɛ. Ha wɔsusu saji otii etɛ ni nyiɛ sɛɛ nɛɛ ahe wɔkwɛ:

1. Esa akɛ wumɛi asumɔ amɛŋamɛi tamɔ amɛ diɛŋtsɛ amɛgbɔmɔtsei. Yesu fee nɔkwɛmɔnɔ efɔ̃ shi eha wumɛi. Ekɛɛ ekaselɔi lɛ akɛ: “Kitã hee miŋɔhaa nyɛ, akɛ nyɛsumɔ nyɛhe.” Te esa akɛ amɛfee lɛ amɛha tɛŋŋ? Ekɛshi sɛɛ akɛ: “Taakɛ bɔ ni misumɔ nyɛ lɛ.” (Yohane 13:34) Beni Biblia lɛ tsɔɔ bɔ ni esa akɛ wumɛi kɛ shishitoo mla nɛɛ atsu nii aha lɛ mli lɛ, ekɛɛ akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ . . . Nakai sa akɛ wumɛi hu asumɔ amɛ diɛŋtsɛ amɛŋamɛi, tamɔ amɛ diɛŋtsɛ amɛgbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛko lɛ diɛŋtsɛ eheloo dã, shi moŋ elɛ̀ɔ lɛ ni ehiɛɔ lɛ dɔdɔɔdɔ, taakɛ bɔ ni Nuŋtsɔ lɛ hiɛɔ asafo lɛ.”—Efesobii 5:25, 28, 29.

2. Esa akɛ gbalashihilɛ mli hefatalɔi aye amɛhe anɔkwa. Bɔlɛnamɔ ni yaa nɔ yɛ gbalashihilɛ mli hefatalɔ ko kɛ mɔ kroko ni jeee ehefatalɔ lɛ teŋ lɛ ji esha ni afeɔ ashiɔ Nyɔŋmɔ, ni efiteɔ wekui. Yesu kɛɛ akɛ: “Ani nyɛkaneko akɛ . . . ‘Enɛ hewɔ ni nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.’ Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli. . . . Shi miikɛɛ nyɛ akɛ: Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ yoo kroko lɛ, efite gbala.”—Mateo 19:4-9.

3. Esa akɛ gbekɛbii aba amɛhe shi amɛha amɛfɔlɔi. Eyɛ mli akɛ Yesu yeɔ emuu moŋ, shi ákɛ gbekɛ lɛ efee toiboo eha efɔlɔi ni yeee emuu lɛ. Biblia lɛ wie Yesu he beni eye afii 12 lɛ akɛ: “Ekɛ amɛ [efɔlɔi] yiŋ kɛtee Nazaret, ni eba ehe shi eha amɛ.”—Luka 2:51; Efesobii 6:1-3.

Mɛni hewɔ esa akɛ wɔkɛ shishitoo mlai nɛɛ atsu nii?

Yesu kɛɛ ekaselɔi lɛ yɛ nibii ni etsɔɔ amɛ lɛ he akɛ: “Kɛji nyɛle nii nɛɛ ni nyɛye nɔ lɛ, ajɔɔ nyɛ.” (Yohane 13:17) Kɛ́ wɔɔtsɔmɔ anɔkwa Kristofoi lɛ, no lɛ esa akɛ wɔkɛ ŋaawoo ni Yesu kɛha yɛ bɔ ni esa akɛ wɔkɛ mɛi krokomɛi aye aha lɛ he lɛ atsu nii. Ekɛɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.

Kɛ́ ootao ole enɛ he saji babaoo lɛ, kwɛmɔ Mɛni Biblia lɛ Tsɔɔ Diɛŋtsɛ?a wolo lɛ yitso 14 lɛ mli

[Shishigbɛ niŋmaa]

[Mfoniri ni yɔɔ baafa 16, 17]

Yesu abɛbua ni kɔɔ bi nyenyentswi lɛ he lɛ tsɔɔ wɔ bɔ ni mlihilɛ kɛ eshaifaa ahe hiaa ha.—Luka 15:11-32

[Mfoniri ni yɔɔ baafa 17]

Esa akɛ gbalashihilɛ mli hefatalɔi aye amɛhe anɔkwa