Tsɔɔmɔ Obii lɛ Anii

Samuel Tee Nɔ Efee Nɔ ni Ja

ANI ona mɛi komɛi ni miifee nibii ní ehiii pɛŋ?—a Samuel na mɛi komɛi ni miifee nakai. Ehi shi yɛ he ko ni okpaŋ gbɛ akɛ mɛi ni feɔ nibii ni ehiii baahi jɛi. Enɛ tee nɔ yɛ Nyɔŋmɔ kpeebuu, loo jamɔhe ni yɔɔ Shilo lɛ mli. Ha wɔkwɛ bɔ ni fee ni Samuel yahi kpeebuu lɛ mli nɔ ni fe afii 3,000 ni eho nɛ lɛ.

Dani abafɔ Samuel lɛ, no mli lɛ emami, ni ji Hana lɛ miitao bi waa. Gbi ko beni Hana tee kpeebuu lɛ mli lɛ, esɔle yɛ he etsɔɔ Nyɔŋmɔ. Ekɛ hiɛdɔɔ sɔle, ni enaabui kɛkɛ tsɔmɔɔ ehe. Enɛ ha osɔfonukpa Eli susu akɛ etɔ dãa. Shi beni Eli na akɛ etɔko dãa shi ewerɛ ni eho ehe lɛ, ejɔɔ lɛ kɛ wiemɔi nɛɛ akɛ: “Israel Nyɔŋmɔ lɛ aaahao onibimɔnii lɛ!”—1 Samuel 1:17.

Sɛɛ mli lɛ afɔ Samuel, ni Hana ná miishɛɛ aahu akɛ ekɛɛ ewu Elkana akɛ: ‘Kɛ́ mitse Samuel fufɔ nɔŋŋ lɛ, mikɛ lɛ aaaya kpeebuu lɛ mli koni eyasɔmɔ Nyɔŋmɔ yɛ jɛi.’ Ni nakai ji bɔ ni efee! No mli lɛ, eeenyɛ efee akɛ Samuel eye afii ejwɛ loo afii enumɔ.

Eli egbɔ naakpa, ni ebihii ni ji Hofni kɛ Pinehas lɛ jáaa Yehowa yɛ gbɛ ni ja nɔ. Amɛkɛ yei po ni baa kpeebuu lɛ mli lɛ wɔɔ! Mɛni osusuɔ akɛ kulɛ esa akɛ amɛtsɛ afee?— Hɛɛ, kulɛ esa akɛ egbala amɛtoi ni ekaŋmɛ amɛ gbɛ ni amɛfee nibii ni ehiii.

Kpeebuu lɛŋ oblanyo fioo Samuel da yɛ, ni eeenyɛ efee akɛ ele nibii ni ehiii ni Eli bihii lɛ fee lɛ. Ani Samuel kase nɔkwɛmɔnɔ gbonyo ni amɛfee lɛ?— Dabi, etee nɔ efee nɔ ni ja, taakɛ efɔlɔi etsɔɔ lɛ lɛ. Belɛ, ebɛ naakpɛɛ mɔ akɛ Yehowa mli fu Eli. Yehowa tsu gbalɔ ko ni eyakɛɛ Eli akɛ E-baagbala eweku lɛ toi, titrii lɛ ebihii fɔji lɛ.—1 Samuel 2:22-36.

Samuel tee nɔ ekɛ Eli sɔmɔ yɛ kpeebuu lɛ mli. Kɛkɛ ni gbi ko gbɛkɛ beni Samuel ewɔ lɛ, gbee ko tsɛ lɛ. No hewɔ lɛ, Samuel sha foi kɛtee Eli ŋɔɔ, shi Eli kɛɛ lɛ akɛ etsɛko lɛ. Gbee lɛ saa etsɛ lɛ ekoŋŋ. Shi beni gbee lɛ tsɛ lɛ nɔ ni tĩa shii etɛ sɛɛ lɛ, Eli kɛɛ Samuel akɛ ekɛɛ akɛ: “Wiemɔ, Yehowa! shi otsulɔ miibo toi!” Beni Samuel kɛɛ nakai lɛ, Yehowa kɛ lɛ wie. Ani ole nɔ ni Yehowa kɛɛ Samuel?—

Nyɔŋmɔ tsi eyiŋ ni eto akɛ ebaagbala Eli weku lɛ toi lɛ tã etsɔɔ Samuel hu. Enɔ jetsɛremɔ leebi lɛ, Samuel miishe gbeyei akɛ eeejaje nɔ ni Yehowa kɛɛ lɛ etsɔɔ Eli. Shi Eli kpa Samuel fai ekɛɛ akɛ: “Kaashiu mi nɔ.” No hewɔ lɛ, yɛ naagbee lɛ Samuel kɛɛ Eli nɔ fɛɛ nɔ ni Yehowa kɛɛ Ebaafee lɛ—taakɛ bɔ pɛ ni Egbalɔ lɛ etsɔ hiɛ ekɛɛ Eli lɛ. Eli to he eha lɛ akɛ: “Nɔ ni hi yɛ [Yehowa] hiɛ lɛ, efee!” Yɛ naagbee lɛ, agbe Hofni kɛ Pinehas, ni Eli hu gbo.—1 Samuel 3:1-18.

Shi dani eeebalɛ nakai lɛ, “Samuel bada, ni Yehowa kɛlɛ yɛ.” Beni Eli kɛ ebihii lɛ gboi lɛ, eeenyɛ efee akɛ no mli lɛ Samuel ji oblanyo, ni oblahiiaŋ ji be ni he hiaa waa yɛ gbekɛbii ashihilɛ mli. Ani osusuɔ akɛ Samuel ná lɛ mlɛo akɛ eeeya nɔ efee nɔ ni ja be mli ni mɛi krokomɛi efeee nakai lɛ?— Eyɛ mli akɛ ebɛ mlɛo moŋ, shi Samuel sɔmɔ Yehowa yɛ anɔkwayeli mli yɛ ewala gbii ni shwɛ lɛ fɛɛ amli.—1 Samuel 3:19-21.

Ni bo hu? Ani obaafee onii tamɔ Samuel, beni odaa lɛ? Ani obaaya nɔ ofee nɔ ni ja? Ani obaaya nɔ obo tsɔɔmɔi ni yɔɔ Biblia lɛ mli lɛ kɛ nɔ ni ofɔlɔi tsɔɔ bo lɛ atoi? Kɛ́ ofee nakai lɛ, obaaha Yehowa kɛ ofɔlɔi fɛɛ aná miishɛ.

[Shishigbɛ niŋmaa]

Sanebimɔi:

○ Te fee tɛŋŋ ni Samuel yasɔmɔ yɛ Yehowa kpeebuu lɛ mli lɛ?

○ Mɛɛ naagbai Samuel kɛkpe yɛ jɛi?

○ Mɛɛ nɔkwɛmɔnɔ Samuel fee efɔ̃ shi eha oblahii kɛ oblayei?