Kasemɔ Amɛhemɔkɛyeli Lɛ

“Miheɔ Miyeɔ”

MARTA nyɛmi nuu lɛ gbonyobu ni akpɛ́ yɛ tɛsaa mli ni akɛ tɛ etsĩ naa lɛ etɛŋ yɛ ejwɛŋmɔŋ. Eeye awerɛho waa. Ewa kɛha lɛ akɛ eeehe eye akɛ Lazaro ní esumɔɔ esane waa lɛ egbo lɛɛlɛŋ. Enyɛmi nuu lɛ gbo nɛɛ gbii ejwɛ sɔŋŋ nɛ, ni enaaa hiɛ kwraa ejaakɛ eeye awerɛho, ni mɛi miisara lɛ koni amɛto etsui nɔ nine.

Ni amrɔ nɛɛ, Yesu ni no mli lɛ Lazaro sumɔɔ esane fe fɛɛ lɛ damɔ Marta hiɛ. Beni ena Yesu lɛ ewerɛ ni eho ehe lɛ mli wo wu, ejaakɛ Yesu pɛ ji mɔ ni yɔɔ shikpɔŋ lɛ nɔ ni kulɛ ebaanyɛ ehere enyɛmi nuu lɛ yiwala. Ni kɛlɛ Marta tsui nyɔ emli akɛ ekɛ Yesu ekpe yɛ Betania, ni ji maŋ ko ni yɔɔ gɔŋ fioo ko nɔ lɛ klotia lɛ. Taakɛ eji daa lɛ, Marta na yɛ Yesu hiɛ akɛ emusuŋ tsɔɔ lɛ, ni be fioo ni eye yɛ Yesu ŋɔɔ lɛ ha etsui nyɔ emli ni ewo lɛ hewalɛ. Yesu bi lɛ saji ni ha ekɛ ejwɛŋmɔ ma ehemɔkɛyeli lɛ kɛ hiɛnɔkamɔ ni eyɔɔ akɛ abaatee gbohii ashi lɛ nɔ. Amɛsanegbaa lɛ ha sane ko ni he hiaa waa fe saji fɛɛ ni Marta ewie pɛŋ lɛ jɛ enaa akɛ: “Miheɔ miyeɔ akɛ bo ji Kristo, Nyɔŋmɔ Bi lɛ ni baa je lɛ mli lɛ.”—Yohane 11:27, Ga Biblia hee.

Marta yɛ hemɔkɛyeli waa. Ehe saji fioo ni Biblia lɛ gbaa wɔ lɛ haa wɔkaseɔ nibii ni he hiaa waa ni baanyɛ aye abua wɔ koni wɔ hu wɔwaje wɔhemɔkɛyeli lɛ. Bɔni afee ni ona akɛ sane nɛɛ ji anɔkwale lɛ, ha wɔsusu klɛŋklɛŋ amaniɛ ni Biblia lɛ bɔɔ wɔ yɛ Marta he lɛ he wɔkwɛ.

“Oogba Ohe Naa ni Oohao Ohe”

Yɛ nyɔji fioo komɛi ni tsɔ hiɛ lɛ amli lɛ, no mli lɛ Lazaro yɛ wala mli ni eyɛ jogbaŋŋ. Yesu Kristo, ni ji gbɔmɔ ni he hiaa fe fɛɛ yɛ shikpɔŋ lɛ nɔ lɛ miiba ebasara amɛ yɛ Betania. Lazaro, Marta, kɛ Maria shihilɛ lɛ yɛ srɔto yɛ wekui krokomɛi lɛ anɔ he, ejaakɛ nyɛmimɛi etɛ nɛɛ edara shi etamɔ nɔ ni amɛkã he amɛyɛ shĩa kome. Niiamlitaolɔi komɛi kɛɔ akɛ ekolɛ Marta ji amɛteŋ onukpa akɛni etamɔ nɔ ni lɛ efee Yesu gbɔ ni bei komɛi lɛ atsĩɔ etã klɛŋklɛŋ lɛ hewɔ. (Yohane 11:5) Nɔ ko bɛ ni tsɔɔ akɛ amɛteŋ mɔ ko bote gbalashihilɛ mli. Kɛlɛ amɛbatsɔmɔ Yesu nanemɛi kpaakpa. Beni Yesu tsuɔ esɔɔmɔ nitsumɔ lɛ yɛ Yudea, he ni ate shi awo lɛ waa yɛ lɛ, amɛshĩa lɛ ji he ni eyahi. Ŋwanejee ko bɛ he akɛ, ehiɛ sɔ toiŋjɔlɛ kɛ yelikɛbuamɔ ni ená yɛ amɛshĩa lɛ waa.

Marta bɔ mɔdɛŋ waa koni eha amɛshĩa lɛ afee tsuiwoohe kɛ he ko ni haa mɔ hiɛ mɛɔ. Akɛni eji yoo ni hiɛ wa kɛ nitsumɔ hewɔ lɛ, etamɔ nɔ ni daa nɛɛ ebɛ dekã kwraa kɛ shĩa nitsumɔ. Nakai nɔŋŋ efee beni Yesu yasara amɛ lɛ. Oona kɛ onaaa nɛɛ, ebɔi gbɛjianɔtoo koni ehoo niyenii kpakpai srɔtoi eha egbɔ wulu lɛ, kɛ ekolɛ enanemɛi ni fata ehe kɛba lɛ. Gbɔfeemɔ ji nɔ ko ni he hiaa waa yɛ nakai beaŋ. Kɛ́ gbɔ ko bashɛ shi lɛ, ashɔɔ enaa, ajieɔ etokota, afɔɔ enaji ahe ahaa lɛ, ni akɛ mu ni jeɔ ŋma kpaa eyiteŋ. (Luka 7:44-47) Ahaa lɛ wɔɔhe kɛ niyenii kpakpa hu.

Akɛni gbɔ ni amɛná lɛ ji gbɔ krɛdɛɛ hewɔ lɛ, Marta kɛ Maria yɛ nitsumɔi babaoo ni esa akɛ amɛtsu. Akɛni Maria ji mɔ ko ni asusuɔ akɛ sane gbaa enaa waa fe Marta, ni ejwɛŋɔ kɛyaa shɔŋŋ hu hewɔ lɛ, ekã shi faŋŋ akɛ shishijee mli lɛ eye ebua enyɛmi yoo lɛ. Shi beni Yesu bashɛ shi lɛ, nibii tsake kwraa. Yesu bu esaramɔ lɛ akɛ hegbɛ ni ená ní ekɛaatsɔɔ amɛ nii—ni nakai pɛpɛɛpɛ efee! Yesu tamɔɔɔ jamɔŋ hiɛnyiɛlɔi ni hi shi yɛ ebeaŋ lɛ, ejaakɛ ejie bulɛ kpo etsɔɔ yei, ni ená he miishɛɛ akɛ etsɔɔ amɛ Nyɔŋmɔ Maŋtsɛyeli lɛ, ni ji eshiɛmɔ nitsumɔ lɛ saneyitso lɛ he nii. Akɛni Maria ná hegbɛ nɛɛ he miishɛɛ waa hewɔ lɛ, eyata Yesu naji anaa, ni ebo nɔ fɛɛ nɔ ni ewieɔ lɛ toi jogbaŋŋ.

Feemɔ bɔ ni Marta tsui nɔ bɔi womɔ lɛ he mfoniri okwɛ. Akɛni niyenii ni ebaahoo lɛ fa, ni eyɛ nibii pii ni esa akɛ efee eha egbɔi lɛ hewɔ lɛ, egba ehe naa ni ehao ehe fe tsutsu lɛ. Beni Marta náaa hiɛ kwraa ní eeya eeba, ní eena enyɛmi yoo lɛ ta shi ni ebawaaa lɛ lɛ, ani ehiɛ tsake, ehũ waa, loo etu ehiɛ? Ekolɛ nakai efee. Ekome enyɛŋ etsu nitsumɔ lɛ fɛɛ!

Agbɛnɛ Marta nyɛɛɛ etsui mli emɔ dɔŋŋ. Efo Yesu wiemɔ lɛ mli ni efɔ̃ enaa akɛ: “Nuŋtsɔ okwɛɛɛ akɛ minyɛmi lɛ eshi mi ni mikome misɔmɔo nɛɛ? No hewɔ lɛ kɛɛmɔ lɛ, ni lɛ hu ebafata mihe.” (Luka 10:40) Hiɛdɔɔ wiemɔi nɛ. Biblia shishitsɔɔmɔi pii tsɔɔ Marta sanebimɔ lɛ shishi akɛ: “Nuŋtsɔ, . . . jeee ohe sane ko ni lo?” Kɛkɛ ni ebi ni Yesu kɛ enyɛmi yoo lɛ awie, ní ekɛɛ lɛ ni ebaye ebua lɛ.

Ekolɛ hetoo ni Yesu ha Marta lɛ ha ehiɛ fee lɛ yaa, taakɛ bɔ ni mɛi babaoo ni kaneɔ Biblia lɛ hu nuɔ he lɛ. Ekɛ mlijɔlɛ kɛɛ lɛ akɛ: “Marta, Marta! oogba ohe naa ni oohao ohe yɛ nibii pii ahewɔ; shi nɔ kome ehia. Nɔ ni hi lɛ, Maria ekɔ lɛ, ni no lɛ ashɔŋ yɛ edɛŋ.” (Luka 10:41, 42) Te Yesu wiemɔ lɛ shishi lɛ? Ani eetsɔɔ akɛ Marta tiuɔ heloonaa nibii asɛɛ? Ani Yesu hiɛ esɔɔɔ mɔdɛŋ ni Marta bɔɔ koni ehoo niyenii ni ŋɔɔ lɛ?

Dabi. Yesu yɔse faŋŋ akɛ Marta hiɛ jwɛŋmɔ ni ja ni eetao ejie suɔmɔ kpo. Kɛfata he lɛ, Yesu nuuu he akɛ eji tɔmɔ akɛ aaaŋmɛ okpɔlɔ kpele kɛfee mɔ ko gbɔ. Mra mli lɛ Mateo ŋmɛ lɛ “okpɔlɔ kpeteŋkpele” ko, ni etee faa. (Luka 5:29) Jeee niyenii ni Marta hoɔ lɛ ji sane lɛ; moŋ lɛ, nɔ ni ekɛye klɛŋklɛŋ gbɛhe lɛ. Ekɛ ejwɛŋmɔ ema niyenii babaoo ni esa akɛ ehoo lɛ nɔ aahu akɛ eku ehiɛ eshwie nɔ ni he hiaa diɛŋtsɛ lɛ nɔ. Mɛni ji no?

Yesu, ni ji Yehowa Nyɔŋmɔ Bi koome lɛ eba amɛshĩa lɛ koni ebatsɔɔ amɛ anɔkwale lɛ. Enɛ he miihia fe nɔ fɛɛ nɔ, ní niyenii ni Marta hoɔ lɛ hu fata he. Ekã shi faŋŋ akɛ edɔ Yesu akɛ Marta miiha hegbɛ kpele ni ená akɛ ekɛaaha ehemɔkɛyeli lɛ mli awa lɛ miiŋmɛɛ lɛ, shi Yesu ŋmɛ lɛ gbɛ koni lɛ diɛŋtsɛ ehala nɔ ni esumɔɔ. Shi kulɛ esaaa ni ekɛɔ Yesu akɛ eha nakai hegbɛ lɛ aŋmɛɛ Maria hu.

No hewɔ lɛ, Yesu kɛ mlijɔlɛ jaje Marta, ni etĩ Marta gbɛ́i lɛ mli blɛoo koni ekɛjɔɔ etsui he, ni ema nɔ mi eha lɛ akɛ ehe ehiaaa ni ‘egba ehe naa ní ehao ehe yɛ nibii pii ahewɔ.’ Kulɛ niyenii fioo ko pɛ he baahia, titri lɛ akɛni Yesu eba koni ebatsɔɔ amɛ nii lɛ hewɔ. Belɛ, Yesu shɔŋ “nɔ ni hi,” ni ji hegbɛ ni amɛná akɛ etsɔɔ amɛ nii, ní Maria ekɔ lɛ yɛ edɛŋ kɔkɔɔkɔ!

Kristo sɛɛnyiɛlɔi ni yɔɔ ŋmɛnɛ lɛ baanyɛ akase nibii babaoo kɛjɛ nɔ ni tee nɔ yɛ Martamɛi ashĩa lɛ mli. Esaaa akɛ wɔhaa nɔ ko kwraa tsĩɔ wɔ gbɛ koni wɔkatsu ‘wɔmumɔŋ hiamɔ nii’ ahe nii. (Mateo 5:3) Eyɛ mli akɛ esa akɛ wɔkase ejurɔ ni Marta fee lɛ kɛ ehiɛ ni wa kɛ nitsumɔ lɛ moŋ, shi esaaa akɛ ‘wɔgbaa wɔhe naa ní wɔhaoɔ wɔhe’ yɛ nibii ni he ehiaaa tsɔ ni wɔbaafee kɛfee mɔ ko gbɔ ní baaha nɔ ni he hiaa titri lɛ aŋmɛɛ wɔ lɛ ahe. Jeee niyenii ni ŋɔɔ hoomɔ kɛ eyeli titri hewɔ wɔkɛ wɔnanemɛi Kristofoi lɛ bɔɔ lɛ, shi moŋ wɔkɛ amɛ bɔɔ koni wɔwowoo wɔhe hewalɛ ní wɔkɛ mumɔŋ duromɔ keenii ahahaa wɔhe. (Romabii 1:11, 12) Kɛ́ wɔŋmɛ okpɔlɔ fioo ko pɛ po lɛ, ebaanyɛ eha wɔnaanyobɔɔ lɛ afee nɔ ni tswaa mɔ emaa shi.

Nyɛmi Nuu ni Asumɔɔ Lɛ lɛ Gbo ni Atee Lɛ Shi

Ani Marta kpɛlɛ kãmɔ ni Yesu kɛha lɛ yɛ mlijɔlɛ mli lɛ nɔ, ni ekase nii kɛjɛ mli? Ekã shi faŋŋ akɛ efee nakai. Beni bɔfo Yohane wieɔ sane ko ni yɔɔ miishɛɛ waa ni kɔɔ Marta nyɛmi nuu lɛ he lɛ he lɛ, eje shishi akɛ: “Shi Yesu sumɔɔ Marta kɛ enyɛmi yoo lɛ kɛ Lazaro fɛɛ.” (Yohane 11:5) Taakɛ atsĩ tã kɛtsɔ hiɛ lɛ Yesu tee Betania, shi kɛjɛ beni eshi jɛmɛ nɛɛ, nyɔji abɔ eho. Ekã shi faŋŋ akɛ, ŋaa ni Yesu jɛ suɔmɔ mli ewo Marta lɛ hako Marta abɛ Yesu awo emli. Ekpɛlɛ ŋaawoo lɛ nɔ. Yɛ shihilɛ nɛɛ mli hu lɛ, efee hemɔkɛyeli he nɔkwɛmɔnɔ kpakpa eha wɔ, ejaakɛ wɔ fɛɛ lɛ ehe bahiaa ni ajaje wɔ yɛ be kɛ beaŋ.

Beni Lazaro he baye lɛ, Marta gbe ehe kɛkwɛ lɛ. Efee nɔ fɛɛ nɔ ni eeenyɛ koni ekɛha enyɛmi nuu lɛ he ajɔ lɛ ní ehe awa lɛ. Shi fɛɛ sɛɛ lɛ Lazaro hela lɛ tee nɔ emli wo wu. Lazaro nyɛmimɛi yei lɛ kwɛ lɛ nyɔɔŋnyɔɔŋ kɛ shwaneshwane. Ekã shi faŋŋ akɛ Marta baakwɛ enyɛmi nuu ni hiɛ eshale lɛ hiɛ shii abɔ, ni ebaakai afii babaoo ni amɛkɛhi shi, kɛ shihilɛi srɔtoi amli ni amɛtsɔmɔ lɛ.

Beni Marta kɛ Maria yɔse akɛ nibii eje fule lɛ, amɛtsu kɛtee Yesu ŋɔɔ. No mli lɛ Yesu miishiɛ yɛ he ko ni kɛ jɛmɛ jekɛmɔ aaafee gbii enyɔ gbɛnyiɛmɔ. Shɛɛ ni amɛkɛmaje Yesu lɛ yɛ kuku: “Nuŋtsɔ, naa, mɔ ni osumɔɔ lɛ he miiye.” (Yohane 11:1, 3) Amɛle akɛ Yesu sumɔɔ amɛnyɛmi nuu lɛ, ni amɛyɛ hemɔkɛyeli akɛ bɔ fɛɛ bɔ ni fee lɛ Yesu baaye ebua enaanyo lɛ. Ani amɛhiɛ kã nɔ akɛ Yesu baashɛ shi dani nu afe mã? Kɛ́ nakai ni lɛ, amɛgbɛkpamɔ lɛ eyabaaa mli. Lazaro gbo.

Marta kɛ Maria fó amɛnyɛmi nuu lɛ, amɛto efuu lɛ he gbɛjianɔ ni amɛhere gbɔi babaoo ni jɛ Betania kɛ ehewɔŋ amɛba amɛŋɔɔ lɛ. Loloolo lɛ, amɛnuko Yesu he. Ekã shi faŋŋ akɛ beni be shwieɔ mli lɛ, Marta hiɛ baafee lɛ yaa waa. Naagbee mli aahu yɛ Lazaro gbele lɛ sɛɛ gbii ejwɛ lɛ, Marta nu akɛ Yesu ebɛŋkɛ amɛkrowa lɛ. Akɛni Marta ji mɔ ko ni yɔɔ ekãa waa hewɔ lɛ, yɛ ewerɛhoyeli be nɛɛ mli po lɛ, ete shi pá ní etĩii he ekɛɛɛ Maria, ni esha foi kɛyanina Yesu.—Yohane 11:20.

Beni eyanina e-Nuŋtsɔ lɛ, ewie nɔ ni gbaa ekɛ Maria naa gbii abɔ sɔŋŋ nɛ lɛ he akɛ: “Nuŋtsɔ, eji oyɛ biɛ kulɛ, minyɛmi lɛ naaa agbo.” Ni kɛlɛ, Marta hemɔkɛyeli kɛ ehiɛnɔkamɔ etako. Ekɛshi sɛɛ akɛ: “Shi agbɛnɛ hu tete po mile akɛ, nɔ fɛɛ nɔ ni ooobi Nyɔŋmɔ lɛ, Nyɔŋmɔ aaahao.” Nɔŋŋ kɛkɛ ni Yesu wie nɔ ko ni baawaje Marta hiɛnɔkamɔ. Ekɛɛ lɛ akɛ: “Onyɛmi nuu lɛ baate shi.”—Yohane 11:21-23.

Marta susu akɛ Yesu miiwie gbohii ashi ni abaatee wɔsɛɛ lɛ he, ni no hewɔ lɛ eto he akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” (Yohane 11:24) Hemɔkɛyeli ni Marta yɔɔ yɛ tsɔɔmɔ nɛɛ mli lɛ sa kadimɔ waa. Yudafoi ajamɔŋ hiɛnyiɛlɔi komɛi ni atsɛɔ amɛ Sadukifoi lɛ heee amɛyeee akɛ abaatee gbohii ashi, eyɛ mli moŋ akɛ eji tsɔɔmɔ ni yɔɔ faŋŋ ni yɔɔ Ŋmalɛ ni ajɛ mumɔŋ aŋma lɛ mli. (Daniel 12:13; Marko 12:18) Shi Marta le akɛ Yesu tsɔɔ mɛi akɛ abaatee gbohii ashi, ni ákɛ etee mɛi komɛi po ni egboi ashi—eyɛ mli akɛ eteko mɔ ko ní egbo etsɛ tamɔ Lazaro shi pɛŋ. Marta leee nɔ ni Yesu eto eyiŋ akɛ ebaafee.

Kɛkɛ ni Yesu wie sane ko ni hiɛ kpaŋ nɔ kɔkɔɔkɔ akɛ: “Mi lɛ miji shitee lɛ kɛ wala lɛ.” Hɛɛ, Yehowa Nyɔŋmɔ kɛ hegbɛ eha e-Bi lɛ akɛ etee gbohii ashi yɛ shikpɔŋ muu lɛ fɛɛ nɔ wɔsɛɛ. Yesu bi Marta akɛ: “Oheɔ enɛ oyeɔ lo?” Kɛkɛ ni Marta ha hetoo taakɛ wɔsusu he yɛ shishijee gbɛ lɛ. Eheɔ eyeɔ akɛ Yesu ji Kristo, loo Mesia lɛ, ni ákɛ eji Yehowa Nyɔŋmɔ Bi, ni gbalɔi lɛ egba akɛ ebaaba je lɛ mli.—Yohane 5:28, 29; 11:25-27.

Ani Yehowa Nyɔŋmɔ kɛ e-Bi Yesu Kristo náa hemɔkɛyeli ni tamɔ nakai lɛ he miishɛɛ? Nibii ni nyiɛ sɛɛ kɛba ni Marta na kɛ ehiŋmɛi lɛ haa sanebimɔ nɛɛ hetoo kɛ mlijelɛ. Ewo foi kɛyatsɛ enyɛmi yoo lɛ. No sɛɛ beni Yesu kɛ Maria kɛ mɛi babaoo ni fata ehe kɛfoɔ lɛ wieɔ lɛ, Marta na akɛ nɔ ni eba lɛ ená Yesu nɔ hewalɛ waa. Ena akɛ Yesu hiŋmɛiaŋ etɔɔ nu ni eefo kɛmiitsɔɔ akɛ gbele shãa mɔ waa. Enu ni Yesu miifã ni ajie tɛ lɛ yɛ enyɛmi nuu lɛ gbonyobu lɛ naa.—Yohane 11:28-39.

Marta tsɔɔ akɛ amɛkafee nakai akɛni gbonyo lɛ eye gbii ejwɛ ni benɛ mli lɛ esha lɛ hewɔ, ni nilee yɛ mli nakai. Yesu kai lɛ akɛ: “Ani mikɛɛɛo akɛ: Kɛji ohe oye lɛ, ooona Nyɔŋmɔ anunyam lɛ?” Ehe eye, ni ena Yehowa Nyɔŋmɔ anunyam lɛ. Jɛmɛ nɔŋŋ lɛ, Yehowa ha e-Bi lɛ hewalɛ koni ekɛtee Lazaro shi kɛba wala mli! Bo lɛ susumɔ nibii ni nyiɛ sɛɛ kɛba nɛɛ ní Marta hiɛ kpaŋ nɔ ewala gbii abɔ fɛɛ lɛ ahe okwɛ: Yesu kɛ gbee ni wa bo akɛ, “Lazaro ee, jee kpo!”; beni Lazaro miite shi lɛ anu gbɛɛmɔi bibii kɛjɛ egbonyobu lɛ mli, fũu mamai lɛ fimɔ ehe, ni enyiɛ kɛba gbonyobu lɛ naa; Yesu fã akɛ, “nyɛfɛ̃nea lɛ, ni nyɛhaa eyaa”; ni ŋwanejee ko bɛ he akɛ, Marta kɛ Maria kɛ miishɛɛ babaoo fua amɛnyɛmi nuu lɛ. (Yohane 11:40-44) Awerɛho ni Marta yeɔ lɛ fɛɛ sɛɛ efo!

Amaniɛbɔɔ nɛɛ tsɔɔ akɛ gbohiiashitee lɛ jeee lamɔ folo ko kɛkɛ; eji Biblia mli tsɔɔmɔ ni haa mɔ tsui nyɔɔ emli, ni yinɔsane maa nɔ mi akɛ eba mli lɛɛlɛŋ. Yehowa kɛ e-Bi lɛ sumɔɔ akɛ amɛjɔɔ mɛi ni yɔɔ hemɔkɛyeli lɛ, taakɛ amɛfee amɛha Marta, Maria, kɛ Lazaro lɛ. Kɛ́ bo hu oná hemɔkɛyeli ni mli wa tamɔ Marta lɛ, amɛbaajɔɔ bo wɔsɛɛ.a

“Marta Sɔmɔ”

Yɛ saji nɛɛ asɛɛ lɛ, shikome pɛ Biblia lɛ tsĩ Marta tã ekoŋŋ. No mli lɛ eshwɛ nɔ ni shɛɛɛ otsi ni abaagbe Yesu. Akɛni Yesu le jaramɔ shihilɛ ni ekɛbaakpe lɛ jogbaŋŋ hewɔ lɛ, shikome ekoŋŋ lɛ eyahi Martamɛi aŋɔɔ yɛ Betania koni ewo etsui fioo. Ejɛɔ jɛmɛ enyiɛɔ kilomitai 3 kɛyaa Yerusalem. Yesu kɛ Lazaro tá niyenii ashi yɛ Simon, kpitiyelɔ lɛ we lɛ, ni jɛmɛ awie Marta he yɛ nɔ ni ji naagbee nɔ akɛ: “Marta sɔmɔ.”—Yohane 12:2.

Enɛ maa nɔ mi ehaa wɔ ekoŋŋ akɛ lɛɛlɛŋ akɛ Marta hiɛ wa kɛ nitsumɔ! Klɛŋklɛŋ ni atsĩ etã yɛ Biblia lɛ mli lɛ, no mli lɛ eetsu nii; beni atsĩ etã nɔ ni ji naagbee nɔ lɛ, no mli hu lɛ eetsu nii, ni ji akɛ eemia ehiɛ kɛmiisɔmɔ mɛi. Ŋmɛnɛ lɛ ayɛ yei ni tamɔ Marta yɛ Kristofoi asafoi lɛ amli—amɛhiɛ wa ni amɛfeɔ ejurɔ, ni amɛjɛɔ amɛsuɔmɔ mli amɛsɔmɔɔ mɛi kɛtsɔɔ akɛ amɛyɛ hemɔkɛyeli. Ekã shi faŋŋ akɛ Marta tee nɔ efee nakai pɛpɛɛpɛ. Kɛ́ nakai ni lɛ, ekɛ nilee tsu nii ejaakɛ etsɛŋ ni ekɛ naagbai baakpe.

Gbii fioo komɛi asɛɛ lɛ, agbe Yesu, ni ji e-Nuŋtsɔ ni esumɔɔ esane waa lɛ musuŋshaa naa. Kɛfata he lɛ, nakai osatofoi awuiyelɔi ni gbe Yesu lɛ nɔŋŋ etswa amɛfai shi akɛ ja amɛgbe Lazaro hu, ejaakɛ eshitee lɛ eha mɛi babaoo miihe Yesu nɔ amɛmiiye. (Yohane 12:9-11) Ni agbɛnɛ hu, beni be shwie mli lɛ gbele gbála Marta kɛ enyɛmimɛi ni esumɔɔ amɛ waa lɛ ateŋ. Wɔleee be ni enɛ ba mli kɛ bɔ ni eba lɛ eha, shi wɔbaanyɛ wɔná nɔmimaa yɛ sane nɛɛ he: Hemɔkɛyeli ni mli wa ni Marta yɔɔ lɛ ye ebua lɛ ni ehiɛ mli kɛyawula shi. Enɛ hewɔ ni esa akɛ Kristofoi ni yɔɔ ŋmɛnɛ lɛ akase Marta hemɔkɛyeli lɛ.

[Shishigbɛ niŋmaa]

[Mfoniri ni yɔɔ baafa 28]

Beni Marta miiye awerɛho po lɛ, eŋmɛ gbɛ ni Yesu ye ebua lɛ koni ekɛ ejwɛŋmɔ ama saji ni baawaje ehemɔkɛyeli lɛ anɔ

[Mfoniri ni yɔɔ baafa 30]

Beni Marta ‘gba ehe naa ni ehao ehe’ lɛ, ejɛ heshibaa mli ekpɛlɛ ni ajaje lɛ

[Mfoniri ni yɔɔ baafa 32]

Marta ná hemɔkɛyeli ni eyɔɔ yɛ Yesu mli lɛ he sɛɛ beni atee enyɛmi nuu lɛ shi lɛ