Kpɛɛ Oyiŋ Yɛ Nilee Mli

1, 2. Ani ewa kɛha bo akɛ oookpɛ oyiŋ aloo ewaaa kɛhaaa bo, ni te onuɔ he ohaa tɛŋŋ yɛ yiŋ komɛi ni okpɛ momo lɛ ahe?

YIŊKPƐƐ! Yiŋkpɛɛ! Daa gbi lɛ, wɔkpɛɔ wɔyiŋ yɛ nibii babaoo he. Ani ewa kɛha bo akɛ oookpɛ oyiŋ aloo ewaaa kɛhaaa bo? Mɛi komɛi sumɔɔ akɛ amɛ diɛŋtsɛ amɛkpɛ amɛyiŋ yɛ saji ahe. Amɛsusuɔ akɛ amɛyɛ hegbɛ akɛ amɛ diɛŋtsɛ amɛkpɛɔ amɛyiŋ yɛ nɔ fɛɛ nɔ he, no hewɔ lɛ amɛsumɔɔɔ ni mɔ ko kpɛɔ yiŋ ehaa amɛ. Kɛlɛ, mɛi komɛi hu yɛ ni ewa kɛha amɛ akɛ amɛ diɛŋtsɛ amɛaakpɛ amɛyiŋ yɛ saji ni he hiaa lɛ ahe. Mɛi komɛi taoɔ ŋaawoo yɛ woji amli loo kɛjɛɔ ŋaawolɔi adɛŋ, ni bei komɛi po lɛ, amɛfiteɔ shika babaoo koni mɔ ko aye abua amɛ kɛkpɛ amɛyiŋ.

² Wɔteŋ mɛi babaoo kã teŋ yɛ sane nɛɛ mli. Bei komɛi lɛ, wɔnuɔ he akɛ jeee wɔ esa akɛ wɔkpɛ yiŋ yɛ saji komɛi ahe, ni akɛ, wɔnyɛŋ wɔfee nɔ ko yɛ he; shi bei komɛi hu lɛ, wɔbaanyɛ wɔdamɔ nibii ni wɔsumɔɔ lɛ anɔ wɔkpɛ wɔyiŋ. (Gal. 6:5) Kɛ́ nakai eji po lɛ, ekolɛ ole akɛ jeee yiŋ ni okpɛɔ lɛ fɛɛ nilee yɔɔ mli loo amɛhe yɔɔ sɛɛnamɔ.

 3. Mɛni Yehowa kɛha wɔ ni baaye abua wɔ koni wɔkpɛ wɔyiŋ yɛ nilee mli, shi mɛni hewɔ bei komɛi lɛ ebɛ mlɛo akɛ wɔɔkpɛ wɔyiŋ lɛ?

³ Akɛ Yehowa tsuji lɛ, eŋɔɔ wɔnaa akɛ ekɛ gbɛtsɔɔmɔi ni mli kã shi faŋŋ eha wɔ yɛ saji ni he hiaa yɛ wɔshihilɛ mli lɛ ahe. Wɔle akɛ, kɛ́ wɔkɛ gbɛtsɔɔmɔi nɛɛ tsu nii lɛ, ebaaha wɔkpɛ yiŋ ni baaha Yehowa tsui anyɔ emli, ni wɔbaaná he sɛɛ hu. Shi wɔbaanyɛ wɔkɛ naagbai loo shihilɛi komɛi akpe ni Biblia lɛ kɛ gbɛtsɔɔmɔ pɔtɛɛ ko hako yɛ he. Kɛ́ ebalɛ nakai lɛ, te esa akɛ wɔkpɛ wɔyiŋ wɔha tɛŋŋ? Akɛ nɔkwɛmɔnɔ lɛ, Biblia lɛ kɛɔ akɛ wɔkaju. (Efe. 4:28) Shi mɛni tuuntu ji juu? Mɛi komɛi kɛɔ akɛ kɛ́ mɔ ko kɔ nɔ ko ni jeee enɔ, ni nii lɛ jara waaa loo nii lɛ he miihia lɛ waa lɛ, no lɛ ejuko. Te wɔɔfee tɛŋŋ wɔkpɛ wɔyiŋ yɛ saji ni mɛi kɛɔ akɛ awoko mla pɔtɛɛ ko yɛ he lɛ ahe lɛ? Mɛni baaye abua wɔ ni wɔkpɛ wɔyiŋ yɛ saji ni tamɔ nɛkɛ lɛ ahe?

 4. Bei pii kɛ́ wɔmiitao wɔkpɛ wɔyiŋ lɛ, mɛɛ ŋaa awoɔ wɔ?

⁴ Bei pii lɛ, kɛ́ okɛɛ onyɛmi Kristofonyo ko akɛ ootao okpɛ oyiŋ yɛ sane ko ni he hiaa waa he lɛ, ekolɛ ebaakɛɛ bo akɛ esa akɛ okɛ jwɛŋmɔ ni sa akpɛ oyiŋ. Enɛ ji ŋaawoo kpakpa. Biblia lɛ bɔɔ wɔ kɔkɔ yɛ wɔhe oyai ni wɔɔye kɛkpɛ wɔyiŋ lɛ he akɛ: “Mɔ fɛɛ mɔ ni he tswaa shi lɛ, eyeɔ ohia.” (Abɛi 21:5, NW) Shi kɛ́ akɛɛ wɔkɛ jwɛŋmɔ ni sa akpɛ wɔyiŋ lɛ, te atsɔɔ tɛŋŋ? Ani nɔ ni etsɔɔ nɔŋŋ ji, wɔto wɔtsui shi, wɔjwɛŋ sane lɛ he jogbaŋŋ, wɔŋmɛ pɛpɛɛpɛ, ni wɔbɔ mɔdɛŋ akɛ wɔbaanu sane lɛ fɛɛ shishi dani wɔkpɛ wɔyiŋ? Enɛɛmɛi fɛɛ ahe miihia, shi jwɛŋmɔ ni sa ni wɔkɛaakpɛ wɔyiŋ lɛ biɔ babaoo fe enɛ.​—Rom. 12:3; 1 Pet. 4:7.

 5. Mɛni hewɔ akɛ jwɛŋmɔ ni sa fɔɔɔ wɔ lɛ?

⁵ Eji anɔkwale akɛ, akɛ jwɛŋmɔ ni sa fɔɔɔ wɔteŋ mɔ ko mɔ ko. Mɛni hewɔ? Ejaakɛ afɔ wɔ fɛɛ yɛ esha mli, ni wɔyeee emuu, ni enɛ hewɔ lɛ hela mɔɔ wɔ ni wɔnyɛɛɛ wɔsusu nii ahe yɛ gbɛ ni eye emuu nɔ. (Lala 51:7; Rom. 3:23) Kɛfata he lɛ, tsutsu ko lɛ, Satan ‘shwila’ wɔteŋ mɛi babaoo ajwɛŋmɔ, ni wɔleee Yehowa kɛ ejalɛ taomɔ nii lɛ ahe nɔ ko. (2 Kor. 4:4; Tito 3:3) Enɛ hewɔ lɛ, ekɔɔɔ he eko bei abɔ ni wɔbaahe kɛjwɛŋ sane ni esa akɛ wɔkpɛ wɔyiŋ yɛ he lɛ nɔ lɛ, ekolɛ wɔbaakpɛ yiŋ ni ejaaa, ejaakɛ wɔdamɔɔ nɔ ni wɔsusuɔ akɛ ehi ni nilee yɔɔ mli lɛ nɔ wɔkpɛɔ wɔyiŋ.​—Abɛi 14:12.

 6. Mɛni baaye abua wɔ ni wɔná jwɛŋmɔ ni sa?

⁶ Eyɛ mli akɛ wɔyeee emuu moŋ, shi Yehowa, wɔŋwɛi Tsɛ lɛ eye emuu yɛ nɔ fɛɛ nɔ mli. (5 Mose 32:4) Miishɛɛ sane ji akɛ, eye ebua wɔ ní wɔtsake bɔ ni wɔsusuɔ nii ahe wɔhaa lɛ, koni wɔná jwɛŋmɔ ni sa. (Nyɛkanea 2 Timoteo 1:7.) Akɛ Kristofoi lɛ, wɔmiisumɔ ni wɔsusu nii ahe, wɔjwɛŋ nii anɔ, ni wɔfee wɔnii fɛɛ yɛ nilee mli. Esa akɛ wɔbɔ mɔdɛŋ wɔkase bɔ ni Yehowa susuɔ nii ahe, enuɔ nii ahe, kɛ bɔ ni efeɔ enii ehaa lɛ.

7, 8. Gbaa niiashikpamɔ ko ni tsɔɔ akɛ mɔ ko baanyɛ ekɛ jwɛŋmɔ ni sa akpɛ eyiŋ, ekɔɔɔ he eko naagbai kɛ nɔnyɛi ni ekɛkpeɔ.

⁷ Nɔkwɛmɔnɔ ko nɛ. Efɔɔ kaa akɛ kɛ́ mɛi ni eyahi maŋ kroko nɔ lɛ fɔ lɛ, amɛkɛ gbekɛ lɛ yahaa amɛwekumɛi yɛ amɛmaŋ bɔni afee ni amɛnyɛ amɛya nɔ amɛtsu nii yɛ maŋ nɔ ni amɛyɔɔ lɛ ni amɛná shika.a Be ko lɛ, yoo ko ni yɔɔ maŋsɛɛ lɛ fɔ binuu fɛfɛo. Akɛ lɛ bɔi Biblia lɛ kasemɔ yɛ nakai beaŋ, ni ekɛ nɔ ni ekaseɔ lɛ tsuɔ nii. Enanemɛi kɛ ewekumɛi nyɛ ekɛ ewu lɛ nɔ ní amɛkɛ abifao lɛ ayaha nuu lɛ fɔlɔi yɛ amɛmaŋ. Shi yoo lɛ ekase yɛ Biblia lɛ mli akɛ, Nyɔŋmɔ miisumɔ ni lɛ kɛ ewu lɛ atsɔse gbekɛ lɛ, ni amɛkwɛ lɛ. (Lala 127:3; Efe. 6:4) Ani esa akɛ enyiɛ kusum ni mɛi babaoo naa lɛ akɛ eja lɛ sɛɛ, akɛni mɛi fɛɛ feɔ nakai lɛ hewɔ? Aloo esa akɛ ekɛ nɔ ni ekaseɔ yɛ Biblia lɛ mli lɛ atsu nii, kɛ́ no baaha ehe afĩ lɛ yɛ shika gbɛfaŋ loo mɛi awie ashi lɛ po? Kɛ́ bo ni lɛ, mɛni obaafee?

⁸ Bɔ ni nɔnyɛɛ ni mɛi kɛba yoo lɛ nɔ lɛ ha ehao sɔŋŋ hewɔ lɛ, eha Yehowa le bɔ ni enuɔ he ehaa lɛ yɛ sɔlemɔ mli, ni ebi ni etsɔɔ lɛ gbɛ. Beni ekɛ nyɛmi yoo ni kɛ lɛ kaseɔ nii lɛ kɛ mɛi krokomɛi ni yɔɔ asafo lɛ mli lɛ susu sane lɛ he lɛ, enu bɔ ni Yehowa susuɔ yɛ sane lɛ he lɛ shishi. Eyɔse hu akɛ, kɛ́ ekɛ ebi lɛ yaha ewu lɛ fɔlɔi lɛ, no haŋ gbekɛ lɛ aná suɔmɔ eha amɛ akɛ fɔlɔi beni edaa lɛ. Beni ejwɛŋ nɔ ni Biblia lɛ kɛɔ yɛ sane lɛ he lɛ he jogbaŋŋ sɛɛ lɛ, ekpɛ eyiŋ akɛ ekɛ gbekɛ lɛ eyaŋ, ejaakɛ nakai feemɔ ejaaa. Beni nuu lɛ na yelikɛbuamɔ ni asafoŋbii lɛ kɛhaa eŋa lɛ, kɛ bɔ ni gbekɛ lɛ yɔɔ miishɛɛ kɛ gbɔmɔtsoŋ hewalɛ kpakpa lɛ, eha akɛ lɛ bɔi Biblia lɛ kasemɔ, ni lɛ hu ebɔi asafoŋ kpeeiyaa.

9, 10. Kɛ́ akɛɛ wɔkɛ jwɛŋmɔ ni sa akpɛ wɔyiŋ lɛ, te atsɔɔ tɛŋŋ, ni te wɔɔfee tɛŋŋ wɔfee nakai lɛ?

⁹ Nɔkwɛmɔnɔ kome kɛkɛ nɛ, shi ehaa wɔnaa akɛ jeee nɔ ni wɔ loo mɛi susuɔ akɛ ehi lɛ sɛɛ ni wɔɔnyiɛ lɛ ji nɔ ni tsɔɔ akɛ wɔkɛ jwɛŋmɔ ni sa miikpɛ wɔyiŋ. Wɔjwɛŋmɔ kɛ wɔtsui ni yeee emuu lɛ baanyɛ afee tamɔ watsi ni etee oya fe nine loo ekpe sɛɛ. Kɛ́ wɔdi sɛɛ lɛ, ebaanyɛ ekɛ naagbai aba. (Yer. 17:9) Kɛ́ wɔsumɔɔɔ ni wɔnáa naagba lɛ, no lɛ esa akɛ wɔkwɛ akɛ bɔ ni wɔsusuɔ nii ahe lɛ kɛ Nyɔŋmɔ gbɛtsɔɔmɔi kpãa gbee.​—Nyɛkanea Yesaia 55:8, 9.

¹⁰ Biblia lɛ kɛ ŋaawoo ni nilee yɔɔ mli nɛɛ haa wɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!” (Abɛi 3:5, 6) Kadimɔ akɛ Biblia lɛ kɛɛ, “okɛ ohe akakpasa bo diɛŋtsɛ ojwɛŋmɔ.” Ni etsa nɔ akɛ, “kaimɔ [Yehowa].” Yehowa pɛ yɔɔ jwɛŋmɔ ni sa ni eye emuu. No hewɔ lɛ, be fɛɛ be ni ebaabi ni wɔkpɛ wɔyiŋ yɛ sane ko he lɛ, esa akɛ wɔkwɛ Biblia lɛ mli, ni wɔkwɛ Nyɔŋmɔ susumɔ yɛ sane lɛ he, koni wɔkpɛ wɔyiŋ tamɔ bɔ ni Nyɔŋmɔ baakpɛ eyiŋ lɛ. Kɛ́ wɔsusu nii ahe taakɛ Yehowa feɔ lɛ, no tsɔɔ akɛ wɔyɛ jwɛŋmɔ ni sa.

11. Mɛni esa akɛ mɔ ko afee koni enyɛ ekpɛ eyiŋ yɛ nilee mli?

¹¹ Ebɛ mlɛo akɛ wɔɔkase bɔ ni wɔɔfee wɔkpɛ wɔyiŋ yɛ nilee mli, ni wɔtsu wɔyiŋkpɛɛ lɛ he nii. Enɛ baanyɛ afee nɔ ni wa, titri lɛ kɛha mɛi ni abaptisi amɛ etsɛko loo mɛi ni kpaako amɛyaa amɛhiɛ yɛ anɔkwale lɛ mli lɛ. Shi amɛ fɛɛ amɛbaanyɛ amɛya amɛhiɛ. Biblia lɛ tsɛɔ mɛi ni tamɔ nɛkɛ lɛ akɛ “fufɔoo,” ejaakɛ amɛtamɔ abifabii ni miikase nyiɛmɔ. Susumɔ bɔ ni abifabii kaseɔ nyiɛmɔ fiofio lɛ he okwɛ. Dani amɛbaaye omanye lɛ, ja amɛfamɔ fiofio, ni amɛfee nakai shii abɔ. Nakai nɔŋŋ mumɔŋ abifabii ni miikase bɔ ni akɛ jwɛŋmɔ ni sa kpɛɔ yiŋ lɛ hu feɔ. Bɔfo Paulo kɛɛ akɛ, mɛi ni edara ji “mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.” Wiemɔ ni ji, “fɔ ni amɛfɔɔ feemɔ,” kɛ ‘eha ele’ lɛ fɛɛ tsɔɔ akɛ esa akɛ wɔya nɔ wɔmia wɔhiɛ, ni nakai esa akɛ mɛi hei afee.​—Nyɛkanea Hebribii 5:13, 14.

12. Te wɔɔfee tɛŋŋ wɔkase bɔ ni akpɛɔ yiŋ yɛ nilee mli lɛ?

¹² Taakɛ awie he kɛtsɔ hiɛ lɛ, daa gbi lɛ wɔkpɛɔ wɔyiŋ yɛ nibii babaoo he, ewuji kɛ bibii fɛɛ. Niiamlitaomɔ ko ni afee lɛ tsɔɔ akɛ, wɔsusuuu yiŋ ni wɔkpɛɔ daa gbi lɛ amli oha mlijaa 40 he kɛtsɔɔɔ hiɛ dani wɔfeɔ, ejaakɛ nakai nibii ni wɔfeɔ lɛ eka wɔhe. Akɛ nɔkwɛmɔnɔ lɛ, daa leebi lɛ esa akɛ okpɛ oyiŋ yɛ atade ni obaawo he. Ekolɛ obaasusu akɛ enɛ jeee nɔ ko, ni ehe ehiaaa ni osusu he pii, titri lɛ kɛ́ ooye oyai. Shi ehe miihia ni okwɛ akɛ nɔ ni owoɔ lɛ ji nɔ ni esa akɛ Yehowa tsulɔ awo lo. (2 Kor. 6:3, 4) Kɛ́ oyaahe atade lɛ, ekolɛ obaasusu bɔ ni akpɛ lɛ aha kɛ nɔ ni eba nɔ ehee lɛ he. Shi ani okwɛɔ akɛ eyɛ hiŋmɛi nɔ ni ejara hi? Kɛ́ wɔkpɛ yiŋ ni ja yɛ nibii bibii tamɔ enɛɛmɛi amli lɛ, ebaaha wɔtsɔse wɔhenumɔ nii lɛ, ni no baaye abua wɔ ni wɔkpɛ yiŋ ni ja yɛ saji wuji amli.​—Luka 16:10; 1 Kor. 10:31.

13. Mɛni baaye abua wɔ koni wɔnyɛ wɔtsu wɔyiŋkpɛi ahe nii?

¹³ Wɔ fɛɛ wɔle akɛ srɔtofeemɔ yɛ yiŋ ni ja ni aaakpɛ kɛ ehe nii ni aaatsu lɛ mli. Akɛ nɔkwɛmɔnɔ lɛ, mɛi komɛi ni miisumɔ ni amɛkpa tawa shɛremɔ lɛ nyɛɛɛ akpa, ejaakɛ shwelɛ ni amɛyɔɔ akɛ amɛkpa lɛ mli waaa. Esa akɛ wɔná shwelɛ ni mli wa ni wɔkɛtsu nɔ ni wɔkpɛ wɔyiŋ akɛ wɔbaafee lɛ he nii. Mɛi komɛi kɛ shwelɛ ni wɔyɔɔ kɛha nɔ ko feemɔ lɛ toɔ tabai ni yɔɔ wɔniji kɛ wɔnaji amli lɛ he. Babaoo ni wɔkɛ tabai nɛɛ tsuɔ nii lɛ, babaoo ni amɛnáa hewalɛ ji no. Kɛ́ wɔkɛfɔɔɔ nitsumɔ lɛ, amɛbaagbɔjɔ. Belɛ, mɛni baaye abua wɔ koni wɔha shwelɛ ni wɔyɔɔ kɛha nɔ ko feemɔ lɛ mli awa, ni wɔtsu wɔyiŋkpɛi ahe nii? Esa akɛ wɔkɛ wɔhe afɔ̃ Yehowa nɔ kɛha yelikɛbuamɔ.​—Nyɛkanea Filipibii 2:13.

14. Mɛni ye ebua Paulo ni enyɛ efee nɔ ni ele akɛ esa akɛ efee lɛ?

¹⁴ Paulo ná enɛ mli niiashikpamɔ. Be ko lɛ ewie akɛ: “Suɔmɔ lɛ miyɛ eko moŋ, shi ekpakpafeemɔ ni ebɔ mi.” Ele nɔ ni etaoɔ efee loo nɔ ni esa akɛ efee, shi bei komɛi lɛ nɔ ko haaa enyɛ efee. Ewie akɛ: “Mimligbɛ gbɔmɔ lɛ mii shɛɔ yɛ Nyɔŋmɔ mla lɛ he; shi minaa mla kroko yɛ mihenii lɛ amli ni kɛ mijwɛŋmɔ mla lɛ wuɔ ta ni eŋɔɔ mi nom ehaa esha mla lɛ ni yɔɔ mihenii lɛ amli lɛ.” Ani hiɛnɔkamɔ ko bɛ kɛha lɛ? Dabida. Ewie akɛ: “Miitsɔ wɔ-Nuŋtsɔ Yesu Kristo nɔ miida Nyɔŋmɔ shi.” (Rom. 7:18, 22-25) Ewie yɛ he kroko hu akɛ: “Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.”​—Fil. 4:13.

15. Mɛni hewɔ esa akɛ wɔkpɛ wɔyiŋ akɛ wɔbaafee nɔ ni ja lɛ?

¹⁵ Eyɛ faŋŋ akɛ, kɛ́ wɔmiitao ni wɔsa Nyɔŋmɔ hiɛ lɛ, esa akɛ wɔkpɛ wɔyiŋ akɛ wɔbaafee nɔ ni ja, ni wɔtsu wɔyiŋkpɛɛ lɛ he nii. Kaimɔ nɔ ni Elia kɛɛ Baal jálɔi lɛ kɛ Israelbii hemɔkɛyeli kwalɔi lɛ yɛ Karmel Gɔŋ lɛ nɔ lɛ. Ekɛɛ amɛ akɛ: “Mɛɛ beyinɔ nɔŋŋ nyɛdidãa yɛ saji enyɔ teŋ kɛyashi? Kɛji Yehowa ji Nyɔŋmɔ lɛ, nyɛnyiɛa esɛɛ; shi kɛji Baal ni lɛ, no lɛ nyɛnyiɛa esɛɛ!” (1 Maŋ. 18:21) Israelbii lɛ le akɛ esa akɛ amɛjá Yehowa pɛ, shi ‘amɛmiididãa yɛ saji enyɔ teŋ,’ ejaakɛ amɛmiijá Yehowa kɛ Baal fɛɛ. Shi esoro Yoshua kwraa, ejaakɛ yɛ afii ni tsɔ hiɛ lɛ amli lɛ, efee nɔkwɛmɔnɔ kpakpa eha Israelbii lɛ beni ekɛɛ amɛ akɛ: “Kɛji esaaa nyɛhiɛ akɛ nyɛaasɔmɔ Yehowa lɛ, no lɛ ŋmɛnɛ gbi nɛɛ nyɛkɔa mɔ ni nyɛaasɔmɔ . . . Shi mi lɛ, mikɛ miwe lɛ, wɔɔsɔmɔ Yehowa!” (Yosh. 24:15) Mɛni jɛ efai shi ni etswa lɛ mli kɛba? Yehowa ha Yoshua kɛ mɛi fɛɛ ni kɔ gbɛ ni ekɔ lɛ tee Shiwoo Shikpɔŋ, ni ji “shikpɔŋ ni fufɔ kɛ wo hoɔ yɛ nɔ” lɛ nɔ.​—Yosh. 5:6.

16, 17. Gbaa niiashikpamɔ ko ni tsɔɔ akɛ kɛ́ wɔkpɛ wɔyiŋ akɛ wɔkɛ nɔ ni Nyɔŋmɔ sumɔɔ lɛ baaye klɛŋklɛŋ gbɛhe lɛ, wɔnáa he sɛɛ.

¹⁶ Susumɔ sane nɛɛ henɔ ko ni ba yɛ ŋmɛnɛŋmɛnɛ beaŋ lɛ he okwɛ. Nyɛmi nuu ko ni abaptisi lɛ etsɛko lɛ kɛ eŋa yɛ bii etɛ ni darako. Gbi ko lɛ, mɔ ko ni ekɛtsuɔ nii lɛ kɛɛ lɛ akɛ amɛshi he ni amɛtsuɔ nii yɛ lɛ ni amɛyabi nitsumɔ yɛ he ko ni abaawo amɛ nyɔmɔ babaoo, ni abaaha amɛ nibii krokomɛi hu afata he. Wɔnyɛmi nuu lɛ jwɛŋ sane lɛ he waa, ni esɔle yɛ he. Eyɛ mli akɛ awooo lɛ nyɔmɔ babaoo yɛ he ni etsuɔ nii yɛ amrɔ nɛɛ moŋ, shi yiŋtoo hewɔ ni eyatao nitsumɔ yɛ jɛmɛ lɛ ji, koni ená otsii anaagbee lɛ ni enyɛ ekɛ eweku lɛ aya asafoŋ kpeei kɛ shiɛmɔ. Eyɔse akɛ kɛ́ eyabi nitsumɔ kroko lɛ, enaŋ nakai be lɛ​—kɛ́ ebaaná po lɛ, ja etsu nii yɛ jɛi kɛyashi be ko dã. Kɛ́ bo ni lɛ, mɛni obaafee?

¹⁷ Beni nyɛmi nuu lɛ jwɛŋ bɔ ni nitsumɔ lɛ baasa ekɛ Yehowa teŋ wekukpaa lɛ he lɛ sɛɛ lɛ, ekpoo nitsumɔ ni kulɛ abaawo lɛ nyɔmɔ babaoo lɛ. Kɛ́ okwɛ lɛ, sɛɛ mli lɛ, eshwa ehe akɛ ekpɛ eyiŋ nakai? Eshwaaa ehe kɔkɔɔkɔ. Enu he akɛ, sɛɛnamɔ yɛ he waa akɛ ekɛ eweku lɛ aaatsi amɛbɛŋkɛ Yehowa fe shika babaoo ni ebaaná lɛ. Ekɛ eŋa lɛ mii shɛ amɛhe waa beni amɛbiyoo nukpa ni eye afii nyɔŋma lɛ kɛɛ amɛ akɛ esumɔɔ amɛ, esumɔɔ nyɛmimɛi lɛ, ni esumɔɔ Yehowa hu waa lɛ. Gbekɛ yoo lɛ kɛɛ akɛ, eetao ejɔɔ ewala nɔ eha Yehowa ni abaptisi lɛ. Ená nɔkwɛmɔnɔ kpakpa ni etsɛ fee kɛtsɔ Yehowa jámɔ ni ekɛye klɛŋklɛŋ gbɛhe yɛ eshihilɛ mli lɛ he sɛɛ!

18. Mɛni hewɔ esa akɛ wɔkpɛ wɔyiŋ yɛ nilee mli daa gbi lɛ?

¹⁸ Taakɛ Mose nyiɛ Israelbii lɛ ahiɛ kɛtsɔ ŋa lɛ nɔ lɛ, Yesu Kristo, ni ji Mose Kpeteŋkpele lɛ hu etee nɔ enyiɛ Yehowa jálɔi anɔkwafoi lɛ ahiɛ yɛ Satan je nɛɛ mli afii babaoo. Ni taakɛ Yoshua nyiɛ Israelbii lɛ ahiɛ kɛtee Shiwoo Shikpɔŋ lɛ nɔ lɛ, etsɛŋ Yesu, ni ji Yoshua Kpeteŋkpele lɛ baakpata jeŋ fɔŋ nɛɛ hiɛ, ni enyiɛ esɛɛnyiɛlɔi lɛ ahiɛ kɛya jalɛ jeŋ hee ni awo he shi lɛ mli. (2 Pet. 3:13) No hewɔ lɛ, amrɔ nɛɛ jeee be ni esa akɛ wɔku wɔsɛɛ kɛya bɔ ni tsutsu lɛ wɔsusuɔ nii ahe, wɔsá jeŋba, nibii ni tsutsu lɛ wɔbuɔ akɛ amɛja kɛ nɔ wɔbuɔ akɛ amɛjaaa, kɛ otii ni kulɛ wɔkɛmamɔ wɔhiɛ lɛ ahe. Amrɔ nɛɛ ji be ni esa akɛ wɔle bɔ ni Nyɔŋmɔ sumɔɔ ni wɔhi shi wɔha. (Rom. 12:2; 2 Kor. 13:5) Eba akɛ, daa gbi lɛ obaakpɛ oyiŋ yɛ nilee mli koni Nyɔŋmɔ ajɔɔ bo kɛya naanɔ.​—Nyɛkanea Hebribii 10:38, 39.