Mɛɛ Gbɔmɛi Sa akɛ Nyɛtsɔmɔ?
1 Akɔntaabuu be ko miibɛŋkɛ kɛha adesai fɛɛ. Biblia lɛ tsɛɔ lɛ akɛ “[Yehowa] Nyɔŋmɔ gbi lɛ.” No ji be mli ni abaatsu ŋwɛi kojomɔ he nii ashi mɛi fɔji lɛ; eji kpɔmɔ be hu kɛha jalɔi. Abaaha gbɔmɛi fɛɛ ni yɔɔ wala mli yɛ nakai beaŋ lɛ abu bɔ ni amɛkɛ amɛwala tsu nii amɛha lɛ he akɔntaa. Akɛni no yɔɔ ejwɛŋmɔ mli hewɔ lɛ, Petro bi sane ni akɛpɛiɔ nii amli nɛɛ akɛ: “Mɛɛ gbɔmɛi sa akɛ nyɛtsɔmɔ?” Emaa bɔ ni ‘jeŋbai krɔŋkrɔŋi, kɛ Nyɔŋmɔ jamɔ hetuu-kɛhamɔ nifeemɔi, kɛ Yehowa gbi lɛ ni wɔɔha ehi wɔjwɛŋmɔ mli be fɛɛ be’ lɛ he hiaa ha, kɛ bɔ ni ehe hiaa ni ana wɔ ni ‘muji loo kpa ko bɛ wɔhe, yɛ toiŋjɔlɛ mli’ lɛ nɔ mi.—2 Pet. 3:11-14.
2 Jeŋbai Krɔŋkrɔŋi kɛ Nyɔŋmɔ Jamɔ Hetuu-Kɛhamɔ Nifeemɔi: Nɔ ni fata jeŋba kpakpa he ji nitsumɔi kpakpai ni tsɔɔ bulɛ kɛha Biblia shishitoo mlai. (Tito 2:7, 8) Esa akɛ Kristofonyo atsi ehe kɛjɛ je lɛŋ bii ajeŋba ni hiɛjoomɔ, kɛ heloonaa akɔnɔi tsirɛɔ lɛ lɛ ahe.—Rom. 13:11, 14.
3 Awieɔ “Nyɔŋmɔ jamɔ hetuu-kɛhamɔ” he akɛ “he ni akɛkpɛtɛɔ Nyɔŋmɔ he, ni jɛɔ tsui ni hiɛsɔɔ ni mli kwɔ ni ayɔɔ kɛha esui kpakpai lɛ kanyaa lɛ lɛ mli.” Ekaa ni wɔnaa yɛ sɔɔmɔ nitsumɔ lɛ mli lɛ ji gbɛ titri ni wɔtsɔɔ nɔ wɔjieɔ nɛkɛ su nɛɛ kpo. Yiŋtoo hewɔ ni wɔshiɛɔ lɛ yaa shɔŋŋ fe nitsumɔ ni wɔnuɔ he akɛ eji kɛkɛ; ejɛɔ suɔmɔ ni mli kwɔ ni wɔyɔɔ kɛha Yehowa lɛ mli. (Mar. 12:29, 30) Akɛni suɔmɔ ni tamɔ nɛkɛ kanyaa wɔ hewɔ lɛ, wɔnaa wɔsɔɔmɔ nitsumɔ lɛ akɛ wɔ Nyɔŋmɔ jamɔ hetuu-kɛhamɔ lɛ kpojiemɔ yɛ gbɛ kpakpa nɔ. Akɛni esa akɛ wɔ hetuu-kɛhamɔ lɛ atsa nɔ daa hewɔ lɛ, esa akɛ wɔna shiɛmɔ nitsumɔ lɛ hu mli gbɛfaŋnɔ daa. Esa akɛ efee wɔ daa otsi nitsumɔ gbɛjianɔtoo lɛ fã.—Heb. 13:15.
4 Yehowa gbi lɛ ni ‘wɔɔha ehi wɔjwɛŋmɔ mli’ lɛ tsɔɔ akɛ wɔɔha eye klɛŋklɛŋ gbɛhe yɛ wɔ daa gbi susumɔi amli, ni wɔkatsi kɛmiito sɛɛ, yɛ gbɛhe ni he ehiaaa mli. Etsɔɔ akɛ wɔɔha Maŋtsɛyeli lɛ he nibii aye klɛŋklɛŋ gbɛhe yɛ wɔshihilɛ mli.—Mat. 6:33.
5 Muji, kɛ Kpa Bɛ Wɔhe, yɛ Toiŋjɔlɛ Mli: Akɛ asafo babaoo lɛ fã lɛ, ‘wɔfɔ wɔtadei lɛ ahe ni wɔha eyɛ futaa yɛ Toobi lɛ la lɛ mli.’ (Kpoj. 7:14) “Muji” ni bɛ wɔhe lɛ tsɔɔ akɛ, belɛ, esa akɛ wɔkɛ shiŋŋ-feemɔ akwɛ wɔhe nɔ jogbaŋŋ ni je lɛŋ muji nibii lɛ eko akatara wɔshihilɛ ni he tse, ni wɔjɔɔ nɔ lɛ mli. Wɔhiɛɔ wɔhe ni “kpa” ko baaa wɔhe kɛtsɔ gbɛ ni wɔŋmɛɛɛ ni heloonaa sui gbohii asɛɛdii afite wɔ Kristofoi agbɔmɔtso lɛ nɔ. (Yak. 1:27; 1 Yoh. 2:15-17) Wɔjieɔ lɛ kpo hu akɛ wɔmiihi shi “yɛ hejɔlɛ mli” kɛtsɔ “Nyɔŋmɔ hejɔlɛ” lɛ ni wɔjieɔ lɛ kpo yɛ wɔkɛ mɛi krokomɛi asharamɔ mli lɛ nɔ.—Filip. 4:7; Rom. 12:18; 14:19.
6 Kɛ wɔkwɛ wɔhe nɔ jogbaŋŋ yɛ omanyeyeli mli ni je lɛ wooo wɔhe muji lɛ, no lɛ wɔjeŋba ‘tamɔŋ nibii agbɛjianɔtoo nɛɛ’ ni Yehowa ebu lɛ fɔ lɛ ‘jeŋba’ kɔkɔɔkɔ. Shi moŋ, wɔ nitsumɔi kpakpai lɛ baaye abua mɛi krokomɛi ni amɛna sɔrɔto ni yɔɔ “mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ teŋ.”—Rom. 12:2; Mal. 3:18.
7 Wɔ fɛɛ wɔtee kpokpaa nɔ kpee ni afee kɛtsara nɔ, ni yitso ji “Nyɛbua, Nyɛdamɔa Shi Shiŋŋ, Nyɛfea Hii” lɛ eko, ni ŋwanejee ko bɛ he akɛ mumɔŋ niyenii kpakpa ni wɔye lɛ ewo bɔ ni wɔsumɔɔ ni wɔjie Nyɔŋmɔ jamɔ hetuu-kɛhamɔ kpo lɛ mli hewalɛ. Mɛi heei pii yɛ suɔmɔ nɛɛ eko. Wɔbaanyɛ wɔtsɔmɔ jɔɔmɔ kɛha amɛ kɛ wɔye wɔbua amɛ ni amɛkɛ amɛhe wo shiɛmɔ nitsumɔ lɛ mli yɛ August mli.
8 Kɛ wɔtee nɔ wɔtsu “nitsumɔi kpakpai” daa lɛ, ewóɔ Yehowa gbɛi lɛ nɔ gojoo, ewoɔ asafo lɛ hewalɛ, ni mɛi krokomɛi hu naa he sɛɛ. (1 Pet. 2:12) Eba akɛ wɔɔhi shi akɛ nakai gbɔmɛi be fɛɛ be.