Jiemɔ Yehowa Yi Daa Gbi
1 Wɔ Nyɔŋmɔ Yehowa lɛ, ji Bɔlɔ ni yɔɔ suɔmɔ, ni he yɔɔ naakpɛɛ, ni ji wala kɛ miishɛɛ fɛɛ Jɛɛhe. Yɛ egbojee hewɔ lɛ, esa yijiemɔ ni jɛɔ ebɔɔ nii fɛɛ aŋɔɔ kɛbaa lɛ lɛlɛŋ. Akɛ aŋkroaŋkroi lɛ, wɔmiisumɔ ni wɔkɛɛ taakɛ lalatsɛ lɛ kɛɛ akɛ: “Maha oyijiemɔ lɛ afa kɛya nɔ. Minaabu aaagba ojalɛ lɛ kɛ oyiwalaheremɔ lɛ he sane daa nɛɛ.” (Lala 71:14, 15) Bɔni afee ni wɔfee enɛ lɛ, esa akɛ wɔtao gbɛi ni wɔɔtsɔ nɔ wɔjie Yehowa yi gbi fɛɛ gbi, koni ekanya wɔ ni wɔwie ehe, ejalɛ, kɛ gbɛjianɔ ni eto kɛha yiwalaheremɔ lɛ he ekpakpa.
2 Mra be mli Kristofoi lɛ fee nɔkwɛmɔ nɔ kpakpa yɛ Yehowa yijiemɔ mli. Be mli ni awieɔ mɛi 3,000 ni abaptisi amɛ yɛ Pentekoste lɛ ahe lɛ, wɔkaneɔ yɛ Bɔfoi lɛ Asaji 2:46, 47 akɛ: “Daa gbi lɛ amɛkɛ jwɛŋmɔ kome yaa sɔlemɔwe lɛ, . . . ni amɛjieɔ Nyɔŋmɔ yi, ni amɛhiɛ ba nyam yɛ maŋ muu lɛ fɛɛ hiɛ. Ni [Yehowa, NW] ŋɔɔ mɛi ni ahere amɛyiwala lɛ efataa asafo lɛ he gbi fɛɛ gbi.” No mli lɛ amɛmiikase anɔkwalei ni yɔɔ naakpɛɛ ni kɔɔ Yehowa kɛ e-Mesia lɛ he lɛ he nii. Amɛmiishɛɛ lɛ gbalaa mɔ, ni ekanya mɛi krokomɛi lolo ni amɛbo toi ni amɛkase nii ni amɛjie Yehowa yi.
3 Hegbɛi Yɛ Daa Gbi: Ŋmɛnɛ, mɛi babaoo naa akɛ amɛbaanyɛ amɛjie Yehowa yi daa gbi kɛtsɔ trukaa odaseyeli nɔ. Gbɛjianɔ ni amɛtoɔ kɛtsɔɔ hiɛ lɛ yeɔ ebuaa koni amɛwo yibii babaoo. Nyɛmi yoo ko ni etswa efai shi akɛ eeena trukaa odaseyeli mli gbɛfaŋnɔ lɛ na akɛ mɔ ko kɛ nɔ ko ejwara ekar lɛ he samfɛji enyɔ kɛbote kar lɛ mli. Etsɛ koni abasaa, kɛkɛ ni esaa ehe koni eye tsɔne saalɔ lɛ odase. Nɔ ni fata ehesaamɔ lɛ he ji sɔlemɔ ni esɔle kɛha Yehowa gbɛtsɔɔmɔ. Nɔ ni jɛ mli ba ji, eye tsɔne saalɔ lɛ odase ŋmɛlɛtswaa kome ni eha lɛ Obaanyɛ Ohi Shi wolo lɛ.
4 Nyɛmi yoo kroko hu kɛ akutsoŋnyo kpeɔ daa yɛ be mli ni amɛkɛ amɛgbeei sheraa shi. Beni amɛkpe shikome ko lɛ, sanegbaa ko ni mli wa ni kɔɔ shihilɛ mli naagbai ahe lɛ tee nɔ yɛ amɛteŋ, ni no tee sanegbaa babaoo diɛŋtsɛ shi. Yɛ be ko sɛɛ lɛ, aje Biblia mli nikasemɔ shishi. Miishɛɛ sane ji akɛ, sɛɛ mli lɛ akutsoŋnyo lɛ kpɛlɛ nɔ akɛ kulɛ eboŋ Yehowa Odasefoi atoi eji amɛba eshinaa naa kulɛ, akɛni eheee Nyɔŋmɔ loo Biblia lɛ nɔ eyeee hewɔ.
5 Ewaaa haaa mɛi komɛi akɛ amɛaaye odase beni nihɔɔlɔi loo mɛi krokomɛi eba amɛshinaai anaa. Mɔ ko ni hɔɔ wala he inshuɔrans lɛ tee nyɛmi yoo ko ni yɔɔ Ireland lɛ ŋɔɔ. Etsɔɔ mli akɛ eekpa gbɛ akɛ eeena naanɔ wala mli ŋɔɔmɔ. Enɛ ji sane hee kwraa ni akɛ nuu ni atsɔse lɛ akɛ Roma Katoliknyo nɛɛ susuɔ he. Ehe Obaanyɛ Ohi Shi wolo lɛ, ni etee kpee yɛ otsi ni nyiɛ sɛɛ lɛ mli, ni ekpɛlɛ ni akɛ lɛ afee Biblia mli nikasemɔ. Amrɔ nɛɛ nɛkɛ nihɔɔlɔ nɛɛ ji nyɛmi nuu ni abaptisi lɛ.
6 Esa akɛ wɔ fɛɛ wɔha wɔhiɛ ahi wɔhe nɔ yɛ hegbɛi ni aaana kɛjie Yehowa yi daa gbi lɛ ahe. Ebaafee yelikɛbuamɔ akɛ wɔɔhiɛ woji tɛtrɛbii fioo loo dɛhiɛmɔ woji yɛ hei ni abaanyɛ ana ni akɛha gbɔi amrɔ nɔŋŋ yɛ lɛ. Yɛ hei komɛi lɛ be fioo ni abaaye yɛ sɛi ni ma shi nɔ lɛ baanyɛ eha ona hegbɛi kɛye mɛi krokomɛi ni mɛɔ koni amɛjɔɔ amɛhe minitii fioo ko lɛ odase. Odasefoi obalahii kɛ obalayei bibii ni yɔɔ skul lɛ kɛ Biblia kasemɔ he woji shwieɔ amɛ okpɔlɔ nɔ akɛ gbɛ ni amɛaatsɔ nɔ amɛkɛ mɔ ni naa enɛ ni biɔ saji lɛ aaagba sane. Ha Ŋmalɛ kome loo enyɔ ni abaawie he ni obaanyɛ okɛtsu nii lɛ ahi ojwɛŋmɔ mli. Bi ni Yehowa aye abua bo. Abaajɔɔ bo yɛ nakai feemɔ mli.—1 Yoh. 5:14.