Nyɛmimɛi Hii Babaoo Ahe Miihia yɛ Gbɛgbamɔ Sɔɔmɔ lɛ Mli
1 Paulo wo wɔ hewalɛ ni ‘wɔteke nɔ yɛ Nuntsɔ lɛ nitsumɔ lɛ mli daa nɛɛ.’ (1 Kor. 15:58) Yɛ mɛi babaoo agbɛfaŋ lɛ, enɛ tsɔɔ gbɛgbamɔ nitsumɔ lɛ ni amɛkɛ amɛhe aaawo mli. Kɛjɛ September 1995 kɛbashi March afi nɛɛ, akɛ mɛi 296 bafata gbɛgbalɔi lɛ ahe!
2 Amrɔ nɛɛ, mɛi ni miisɔmɔ akɛ gbɛgbalɔi yɛ maŋ nɛɛ mli lɛ ateŋ mɛi babaoo ji nyɛmimɛi yei. (Lala 68:12) Mɛɛ miishɛɛ ebaaji eha asafo lɛ nɛkɛ, kɛ́ nyɛmimɛi hii babaoo baanyɛ abafata be-fɛɛ sɔɔlɔi lɛ ahe! (Lala 110:3) Shishinumɔ yɛ he akɛ esa akɛ nyɛmimɛi hii babaoo atsu heloonaa kɛ weku mli gbɛnaa nii ni he hiaa ahe nii. Mɛi krokomɛi hu tsuɔ nii waa koni amɛkɛtsu asafo lɛ mumɔŋ hiamɔ nii ahe nii. Wɔhiɛ sɔɔ hii nɛɛ ni miaa amɛhiɛ yɛ Maŋtsɛyeli lɛ hewɔ lɛ.—1 Tim. 4:10.
3 Fɛɛ sɛɛ lɛ, ani nyɛ ákɛ nyɛmimɛi hii lɛ babaoo baanyɛ ni nyɛkɛ nyɛhe awo gbɛgbamɔ nitsumɔ lɛ mli? Kɛ oŋa ji gbɛgbalɔ lɛ, ani obaanyɛ ofata ehe? Kɛ óba nitsumɔ mli hejɔɔmɔ lɛ, ani okpɛlɛŋ nɔ akɛ, gbɛ ko kwraa bɛ ni oootsɔ nɔ okɛ obe atsu nii ni otsui anyɔ omli fe akɛ okɛ ohe aaawo be-fɛɛ sɔɔmɔ lɛ mli? Kɛ kpaako ogbeɔ skul naa lɛ, ani okɛ hiɛdɔɔ kɛ sɔlemɔ esusu gbɛgbamɔ nitsumɔ lɛ ni oootsu lɛ he akɛ gbɛ ni oootsɔ nɔ okɛna sɔɔmɔ hegbɛi krokomɛi?—Efe. 5:15-17.
4 Nyɛmi nuu ko hɔɔ enitsumɔ ni yaa nɔ jogbaŋŋ lɛ ni etao be-fa nitsumɔ etsu bɔni afee ni enyɛ etsɔ gbɛgbalɔ. Kɛtsɔ hiɛnyiɛmɔ kpakpa ni ekɛtsu nii lɛ nɔ lɛ, ebii lɛ ateŋ mɛi ejwɛ batsɔmɔ gbɛgbalɔi beni amɛgbe skul naa nɔŋŋ pɛ. Amɛteŋ mɔ ni ji ejwɛ lɛ miishwe akɛ eeefata amɛhe. Ájɔɔ nyɛmi nuu nɛɛ kɛ eweku lɛ waa diɛŋtsɛ.
5 Ágbele Shinaa Kpeteŋkpele Naa: Gbɛgbamɔ nitsumɔ lɛ baanyɛ agbele ‘shinaa kpeteŋkpele naa kɛha nitsumɔ.’ (1 Kor. 16:9) Abaanyɛ akɛ nyɛmimɛi hii ni ji gbɛgbalɔi lɛ atsu nii babaoo yɛ asafo lɛ mli. Shiɛmɔ nitsumɔ ni akɛ ekãa tsuɔ lɛ haa hegbɛ ni amɛnaa yɛ mumɔŋ lɛ yaa hiɛ ni ehaa amɛ teokrase shweremɔ lɛ faa. Gbɛgbamɔ baanyɛ agbele gbɛ kɛha sɔɔmɔ hegbɛi babaoo. Beni otsɔ gbɛgbalɔ afi kome sɛɛ lɛ, jɔɔmɔ lɛ yɛ akɛ oooya Gbɛgbamɔ Sɔɔmɔ Skul lɛ eko. Oshijafoi ni ji asafoŋ sɔɔlɔi kɛ onukpai ahe baanyɛ asa akɛ amɛaaya Sɔɔmɔ Tsɔsemɔ Skul lɛ eko. Abaanyɛ akɛ gbalashihilɛ mli hefatalɔi ni sa lɛ atsu nii akɛ gbɛgbalɔi krɛdɛɛi loo kɛha kpokpaa nɔ nitsumɔ. Hɛɛ, gbɛgbamɔ sɔɔmɔ nitsumɔ lɛ gbeleɔ shinaa naa kɛhaa sɔɔmɔ hegbɛi babaoo nɛɛ yɛ Yehowa gbɛjianɔtoo lɛ mli.
6 Nyɛmimɛi hii ni baanyɛ ana hegbɛ ni amɛkɛ amɛhe awo gbɛgbamɔ nitsumɔ lɛ mli lɛ baanyɛ ana miishɛɛ babaoo ni jɛɔ nihamɔ babaoo mli kɛbaa lɛ.—Bɔf. 20:35.