Hiɛshikamɔ yɛ Atadewoo kɛ Hesaamɔ Mli
1 “Hii lɛ fɛɛ, kɛ gbekɛbii hii lɛ po fi tai. Yei lɛ kɛ gbekɛbii yei, oblayei bibii kɛ gbekɛbii yei bibii lɛ fɛɛ wo atade muu loo atade shishi kɛ ŋwɛi. Anaaa mɔ ko ni wo jeans trɔza loo ewo atade ni efiii tai. Mɛi ni yɔɔ biɛ lɛ fɛɛ ahiɛ yɛ ŋmɔlɔŋmɔlɔ.” Nɛkɛ ji bɔ ni adafitswaa mli amaniɛbɔɔ ko kɛɛ. Eetsɔɔ bɔ ni nyɛmimɛi hii kɛ yei ni ebua amɛhe naa yɛ kpokpaa wulu nɔ kpee ko ni da ni afee yɛ nyɛsɛɛ afi lɛ mli lɛ shishi lɛ anifeemɔ su yɔɔ lɛ mli.
2 Yɛ kpee wulu kroko hu ni afee yɛ United States maŋtiase ko mli lɛ, adafitswaa woloŋmalɔ ko kɛ niiamlitsɔɔmɔ nɛɛ ni kɔɔ Odasefoi babaoo ni ebua amɛhe naa lɛ he lɛ ha, akɛ: “Hii lɛ fɛɛ ahe tse, ni amɛwo kootu ni amɛfi tai. Yei lɛ kɛ hiɛshikamɔ esaa amɛhe, ni amɛhe efee fɛo waa diɛŋtsɛ.” Mɛi ahebulɔ ko, ni ji mɔ kroko ni ye enɛ he odase lɛ kɛɛ akɛ: “Nyɛbaa nyɛjeŋ jogbaŋŋ, nyɛbuɔ mɔ, nyɛhe tse, ni nyɛji mɛi ni he yɔɔ falefale. Nɔ ni mina lɛ yɛ fɛo. Yɛ jeŋ ni muji babaoo yɔɔ mli nɛɛ mli lɛ, nyɛnyɛ nyɛjie muji lɛ yɛ nyɛhe!” Mɛɛ wɔhe odaseyelii kpakpai po enɛ ji nɛkɛ! Ani wɔhiɛ esɔɔɔ yijiemɔ babaoo ni akɛhaa wɔnyɛmifeemɔ lɛ? Yɛ anɔkwale mli lɛ, mɛi fɛɛ ni yɔɔ kpee lɛ shishi lɛ ye bua yɛ amaniɛbɔi kpakpai ni akɛha nɛɛ mli, kɛtsɔ amɛhesaamɔ ni feɔ nɔkwɛmɔnɔ kpakpa lɛ nɔ.
3 Ale wɔ yɛ jeŋ fɛɛ akɛ mɛi ni yɔɔ srɔto kwraa yɛ amɛhesaamɔ mli. (Mal. 3:18) Mɛni hewɔ? Ejaakɛ wɔkɛ Ŋmalɛ naa ŋaawoo akɛ “[wɔkɛ] atade ni sa kɛ hiɛ ni gboɔ nɔ̃ kɛ jwɛŋmɔ ni sa awula [wɔhe], . . . ni sa [mɛi] ni tsɔɔ amɛhe akɛ Nyɔŋmɔ jálɔi lɛ” tsuɔ nii.—1 Tim. 2:9, 10.
4 Mɛni Okɛ Otadewoo kɛ Ohesaamɔ lɛ Tsɔɔ? Atadei ni wɔwoɔ, kɛ bɔ ni wɔwoɔ lɛ wɔhaa lɛ tsɔɔ mɛi diɛŋtsɛ ni wɔji—wɔhemɔkɛyelii, wɔjeŋba, kɛ wɔsusumɔi. Bei komɛi lɛ, wɔnyɛmimɛi oblayei bibii lɛ ekomɛi woɔ atadei ni yɔɔ kuku loo efiɔ amɛ kpɛŋŋ ní ebafeɔ nɔ ni bɛ hiŋmɛi nɔ kɛji akɛ amɛta shi loo amɛkoto shi. Amɛteŋ mɛi komɛi hu woɔ trɔza loo ŋwɛi atade kɛ eshishi trɔza kɛyaa henaabuamɔi ni tamɔ nɛkɛ shishi. Atade henɔi ni wɔhalaa lɛ tsɔɔ mɛi ni wɔji kɛ bɔ ni wɔbaa wɔjeŋ wɔhaa. Ekaba kɔkɔɔkɔ akɛ wɔɔfĩ susumɔ fɔŋ kɛ jeŋba gbonyo ni ebu yɛ je lɛ mli lɛ sɛɛ. Jeee atade henɔ ko ni eba ehee kwraa ni mɛi babaoo sumɔɔ woo lɛ ji nɔ ni wɔsusuɔ he lɛ, shi moŋ nɔ ni wɔsusuɔ he ji kɛji akɛ esa kɛha mɔ ko ni tsɛɔ ehe akɛ Nyɔŋmɔ sɔɔlɔ lɛ. (Rom. 12:2) Yɛ nɔ najiaŋ ni wɔɔhala hesaamɔ ko ni jieɔ heyeli mumɔ, loo nɔ ni tsɔɔ jeŋba shara shihilɛ ko kpo lɛ, wɔmiisumɔ ni wɔtsɔɔ akɛ ‘wɔwoɔ Nyɔŋmɔ hiɛ nyam’ lɛɛlɛŋ.—1 Pet. 2:12.
5 Bei komɛi lɛ, ekolɛ mɔ hee, mɔ ni bɛ niiashikpamɔ, aloo ebɛ mumɔŋ shidaamɔ kpakpa lɛ baakpɛlɛ nɔ fɛɛ nɔ ni je lɛ jieɔ yi ni kɔɔ atade kɛ hesaamɔ he lɛ nɔ, ni esusuuu jwɛŋmɔ ni ebaaha mɛi aná yɛ Yehowa kɛ egbɛjianɔtoo lɛ he lɛ he klɛŋklɛŋ. Ekolɛ, ehe baahia ni wɔteŋ mɔ fɛɛ mɔ apɛi lɛ diɛŋtsɛ emli ekwɛ kɛji akɛ je lɛ susumɔ lɛ ená enɔ hewalɛ lo. Wɔbaanyɛ wɔbɛŋkɛ nyɛmi nuu loo nyɛmi yoo ko ni abuɔ lɛ ni eda yɛ mumɔŋ, koni wɔbi lɛ ni ejɛ anɔkwayeli mli etsɔɔ wɔ esusumɔi yɛ atade henɔi ni wɔwoɔ kɛ wɔ hesaamɔ lɛ he, koni agbɛnɛ wɔkɛ hiɛdɔɔ asusu ŋaawoi ni ekɛbaaha lɛ ahe wɔkwɛ.
6 Mɛi komɛi kpɛlɛɔ nɔ amrɔ nɔŋŋ akɛ esa akɛ amɛkwɛ bɔ ni amɛsaa amɛhe kɛyaa kpee shishi lɛ jogbaŋŋ. Shi kɛlɛ amɛwoɔ atadei ni baa shi yɛ hiɛtserɛjiemɔ nifeemɔi amli beni akpa kpee lɛ. Hiɛmɔ tɛi ni nɔ kwɔlɔ ni afolɔ ashwie shi, ni sa kɛha Kristofoi sɔɔlɔi lɛ mli. (2 Kor. 6:3, 4) He fɛɛ he ni wɔyaa yɛ maŋ mli lɛ, wɔkpee shishi tsitsinaa-tsɛɛ nii lɛ kɛ wɔtade kɛ hesaamɔ ni sa lɛ haa ayɔseɔ wɔ akɛ Yehowa Odasefoi. No hewɔ lɛ, esa akɛ wɔtade afee nɔ ni sa kɛ nɔ ni bulɛ yɔɔ he, koni no atsɔɔ akɛ ‘wɔjɛɛɛ je lɛŋ.’—Yoh. 15:19.
7 Nyɛhaa wɔfea bɔ fɛɛ bɔ ni wɔɔnyɛ yɛ afi nɛɛ “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpee lɛ shishi, koni wɔkɛtsɔɔ akɛ wɔji ‘Yehowa, wɔ-Nyɔŋmɔ lɛ, maŋ krɔŋkrɔŋ.’ Nɔ ni baajɛ hewalɛ kpakpa ni ebaaná yɛ mɛi anɔ lɛ mli aba lɛ baaha Yehowa ‘yijiemɔ kɛ egbɛi kɛ enunyam’ lɛ mli awa kɛya hiɛ.—5 Mose 26: 19.
[Caption on page 6]
Bɔ ni Aaafee Awo Yehowa Hiɛ Nyam:
■ Saamɔ ohe yɛ gbɛ ni sa Nyɔŋmɔ sɔɔlɔ nɔ.
■ Kpoomɔ je lɛ atade henɔi ni esaaa lɛ.
■ Okɛ jwɛi awo nɔ ni akɛ jwɛi woɔ mli lɛ mli be fɛɛ be, ni okɛkashwie shikpɔŋ kɔkɔɔkɔ.