“Nyɛmumɔ lɛ He Adɔa La”
1. Mɛɛ su esa akɛ wɔkɛtsu wɔshiɛmɔ nitsumɔ lɛ?
1 Esaaa akɛ wɔ-Kristofoi asɔɔmɔ lɛ fã ko kwraa feɔ nɔ ni shwereee. No hewɔ lɛ, awoɔ wɔ hewalɛ ní ‘wɔmumɔ lɛ he adɔ la, koni wɔsɔmɔ Nuŋtsɔ lɛ.’ (Rom. 12:11) Shi kɛlɛ, nibii babaoo yɛ ni baanyɛ aha ekãa ni wɔkɛtsuɔ sɔɔmɔ nitsumɔ lɛ aba shi. Te wɔɔfee tɛŋŋ wɔha ekãa kɛ miishɛɛ ni wɔyɔɔ kɛha Maŋtsɛyeli sɔɔmɔ nitsumɔ lɛ ‘atso tamɔ la’ lɛ?—2 Tim. 1:6, 7.
2. Mɛɛ gbɛ nɔ aŋkro Biblia nikasemɔ haa wɔkɛ ekãa shiɛɔ?
2 Aŋkro Biblia Nikasemɔ: Maŋtsɛyeli shiɛlɔ ni nitsumɔ mɔɔ shi jogbaŋŋ lɛ ji mɔ ni sumɔɔ Nyɔŋmɔ mla lɛ ni ehaa emli anɔkwalei lɛ náa enɔ hewalɛ waa. (Lala 119:97) Kɛ́ wɔbale Biblia mli anɔkwalei komɛi beni wɔfeɔ aŋkro nikasemɔ lɛ, enɛ kanyaa wɔtsui ni ehaa ekãa ni wɔyɔɔ lɛ mli waa. Suɔmɔ ni wɔyɔɔ kɛha Mɔ ni kɛ anɔkwalei nɛɛ haa wɔ lɛ, kɛ shwelɛ ni wɔyɔɔ akɛ wɔshiɛ sanekpakpa lɛ wɔtsɔɔ mɛi krokomɛi lɛ tsirɛɔ wɔ ni wɔjieɔ Nyɔŋmɔ yi ni wɔjajeɔ egbɛi lɛ wɔtsɔɔ faŋŋ. (Heb. 13:15) Eyɛ faŋŋ akɛ, ekãa ni wɔkɛshiɛɔ sanekpakpa lɛ tsɔɔ bɔ ni ejara wa ha wɔ.
3. Mɛɛ gbɛ nɔ Nyɔŋmɔ mumɔ lɛ baanyɛ aye abua wɔ yɛ wɔshiɛmɔ nitsumɔ lɛ mli?
3 Sɔlemɔ Obi Nyɔŋmɔ Mumɔ Lɛ: Wɔnyɛŋ wɔtsu shiɛmɔ nitsumɔ lɛ kɛmɔ shi yɛ wɔdiɛŋtsɛ wɔhewalɛ naa. Nyɔŋmɔ mumɔ lɛ ji nɔ ni haa wɔfeɔ ekãa. (1 Pet. 4:11) Kɛ́ wɔtsi wɔbɛŋkɛ mɔ ni ji “hewalɛ kple” Jɛɛhe lɛ, no baawo wɔ hewalɛ yɛ mumɔŋ bɔni afee ni wɔkɛ ekãa aye odase. (Yes. 40:26, 29-31) Beni bɔfo Paulo kɛ kaa kpe yɛ eshiɛmɔ nitsumɔ lɛ mli lɛ, enyɛ edamɔ naa yɛ “Nyɔŋmɔ yelikɛbuamɔ naa.” (Bɔf. 26:21, 22) Yehowa mumɔ krɔŋkrɔŋ ni yɔɔ hewalɛ lɛ baanyɛ aye abua wɔ ni wɔhe adɔ la yɛ wɔshiɛmɔ nitsumɔ lɛ mli, no hewɔ lɛ esa akɛ wɔsɔle kɛbi.—Luka 11:9-13.
4. Mɛɛ nibii kpakpai baanyɛ ajɛ ekãa ni wɔjieɔ lɛ kpo lɛ mli kɛba, ni kɛlɛ mɛni esa akɛ wɔkwɛ jogbaŋŋ yɛ he?
4 Bei pii lɛ, ekãa ni wɔkɛtsuɔ Maŋtsɛyeli shiɛmɔ nitsumɔ lɛ haa Kristofoi krokomɛi hu náa ekãa babaoo. (2 Kor. 9:2) Kɛ́ wɔyɛ nɔmimaa yɛ nɔ ni wɔwieɔ lɛ he, ni wɔkɛ miishɛɛ wie he lɛ, ewaaa akɛ mɛi ni yɔɔ shikpɔŋkuku lɛ mli lɛ baabo toi. Kɛlɛ, esa akɛ be fɛɛ be lɛ wɔkɛ hiɛshikamɔ kɛ mlijɔlɛ afata ekãa ni wɔkɛtsuɔ nii lɛ he. (Tito 3:2) Wɔbɔɔ mɔdɛŋ akɛ wɔjie bulɛ kpo wɔtsɔɔ shiatsɛ lɛ be fɛɛ be, ni wɔyɔse akɛ eyɛ hegbɛ akɛ eboɔ toi loo ekabo toi.
5. Mɛɛ ŋaawoo ni jɛ mumɔŋ esa akɛ wɔkɛtsu nii?
5 Ákɛ Maŋtsɛyeli jajelɔi lɛ, eba akɛ wɔbaaha ‘wɔmumɔ lɛ he adɔ la’ daa. Nyɛhaa wɔtsɔa aŋkro Biblia nikasemɔ kɛ sɔlemɔ ni wɔɔsɔle wɔha Yehowa, mɔ ni baanyɛ eha wɔná mumɔ krɔŋkrɔŋ ni yɔɔ hewalɛ lɛ eko lɛ nɔ wɔná ekãa. Kɛ́ wɔfee nakai lɛ, wɔbaanyɛ wɔkɛ ekãa atsu wɔshiɛmɔ nitsumɔ lɛ ‘yɛ mumɔ krɔŋkrɔŋ kɛ nɔmimaa babaoo mli.’—1 Tes. 1:5.