Suɔmɔ Yehowa Koni No Atsirɛ Bo Ni Ohã Abaptisi Bo

1-2. Tamɔ bɔ ni wɔnaa yɛ Bɔfoi 8:27-31, 35-38 lɛ, mɛni tsirɛ Etiopia piafonyo lɛ ni ehã abaptisi lɛ?

ANI oosumɔ ni abaptisi bo ni obatsɔ Kristo kaselɔ? Mɛi pii ehã abaptisi amɛ, ejaakɛ amɛsumɔɔ Yehowa ni amɛhiɛ sɔɔ nibii fɛɛ ni efeɔ ehãa amɛ lɛ. Akɛ nɔkwɛmɔnɔ lɛ, susumɔ Etiopia maŋnyɛ lɛ piafonyo ko ni hã abaptisi lɛ lɛ he okwɛ.

² Be ni nuu nɛɛ kase kɛjɛ Ŋmalɛ lɛ mli akɛ esa akɛ abaptisi lɛ lɛ, efee nakai amrɔ nɔŋŋ. (Kanemɔ Bɔfoi 8:27-31, 35-38.) Mɛni tsirɛ lɛ ni ehã abaptisi lɛ lɛ? Etamɔ nɔ ni nuu nɛɛ nyaa Nyɔŋmɔ Wiemɔ lɛ he waa, ejaakɛ be ni eta eshwiili lɛ mli lɛ, no mli lɛ, eekane Yesaia wolo lɛ. Agbɛnɛ hu, be ni Filipo shiɛ Yesu he sane kpakpa lɛ etsɔɔ lɛ lɛ, ehiɛ sɔ nibii ni Yesu efee ehã lɛ lɛ waa. Biblia lɛ kɛɔ akɛ, no mli lɛ, efã gbɛ kɛtee Yerusalem ni eeku esɛɛ. Mɛni etee feemɔ yɛ jɛmɛ? Eyajá Yehowa. Eeenyɛ efee akɛ, jeee Yehowa jamɔ lɛ akɛtsɔse lɛ kɛjɛ egbekɛbiiashi. Shi suɔmɔ ni eyɔɔ kɛhã Yehowa hewɔ lɛ, eshi ejamɔ lɛ ni ekɛ ehe badɔmɔ maŋ koome pɛ ni emli bii lɛ ejɔɔ amɛhe nɔ amɛhã anɔkwa Nyɔŋmɔ lɛ. Suɔmɔ ni eyɔɔ kɛhã Yehowa nɛɛ nɔŋŋ ni tsirɛ lɛ ni ekpɛ yiŋ ni he hiaa waa nɛɛ, akɛ, ebaahã abaptisi lɛ ni ebatsɔ Kristo kaselɔ.​—Mat. 28:19.

 3. Mɛni hewɔ mɛi komɛi sumɔɔɔ ni abaptisiɔ amɛ lɛ? (Kwɛmɔ akrabatsa ni yitso ji, “Mɛɛ Sũ He Abaanyɛ Akɛ Mi Ato?”)

³ Kɛ́ osumɔɔ Yehowa lɛ, obaasumɔ ni abaptisi bo. Shi nibii komɛi ni osumɔɔ lɛ hu baanyɛ ahã ewa kɛhã bo akɛ obaahã abaptisi bo. Akɛ nɔkwɛmɔnɔ lɛ, ekolɛ osumɔɔ owekumɛi kɛ onanemɛi ni jáaa Yehowa lɛ asane waa, ni ooshe gbeyei akɛ kɛ́ ohã abaptisi bo lɛ, amɛbaanyɛ bo. (Mat. 10:37) Aloo ekolɛ nibii gbohii komɛi ni Nyɔŋmɔ nyɛɔ lɛ afeemɔ ŋɔɔ onaa, ni no hewɔ lɛ ewa kɛhã bo akɛ obaakpa. (Lala 97:10) Aloo ekolɛ oye gbii juji komɛi ni kɛ amale jamɔ yɔɔ tsakpãa lɛ kɛjɛ ogbekɛbiiashi tɔ̃ɔ, ni okaiɔ nibii komɛi ni yɔɔ miishɛɛ ni afeɔ kɛ́ aaye gbii juji nɛɛ. No hewɔ lɛ, eyɛ mli akɛ obana akɛ amɛsaaa Yehowa hiɛ moŋ, shi ewa kɛhã bo akɛ obaakpa yeli. (1 Kor. 10:20, 21) Kɛ́ shihilɛ ko ni tamɔ nɔ ni wɔtsĩ tã nɛɛ hewɔ osumɔɔɔ ni abaptisiɔ bo lɛ, sane ni esa akɛ obi ohe ji, “Ani misumɔɔ Yehowa fe nibii nɛɛ?”

 4. Mɛni ji nɔ titri ni baahã oná he miishɛɛ akɛ abaptisi bo?

⁴ Oyɛ nibii kpakpai pii ni osumɔɔ ni ohiɛ sɔɔ. Akɛ nɔkwɛmɔnɔ lɛ, dani Yehowa Odasefoi kɛ bo baabɔi Biblia lɛ kasemɔ po lɛ, ekolɛ onyaa Biblia lɛ he waa, ni osumɔɔ Yesu hu. Amrɔ nɛɛ ni obale Yehowa Odasefoi lɛ, ekolɛ osumɔɔ ni okɛ amɛ abɔ. Kɛ́ onyaa Biblia lɛ he, osumɔɔ Yesu, ni osumɔɔ ni okɛ Yehowa Odasefoi abɔ lɛ, ehi. Shi jeee nomɛi pɛ kɛkɛ baahã oná he miishɛɛ akɛ ojɔɔ ohe nɔ ohã Yehowa ni ohã abaptisi bo. Nɔ titri ni baahã oná he miishɛɛ akɛ abaptisi bo ji, ni obaasumɔ Yehowa Nyɔŋmɔ. Kɛ́ osumɔɔ Yehowa fe mɔ fɛɛ mɔ kɛ nɔ fɛɛ nɔ lɛ, ohãŋ nɔ ko kwraa atsĩ onaa ni okasɔmɔ lɛ. Kɛ́ osumɔɔ Yehowa lɛ, no baatsirɛ bo ni ohã abaptisi bo, ni no nɔŋŋ baaye abua bo ni oye lɛ anɔkwa daa.

 5. Mɛni he wɔbaasusu yɛ nikasemɔ nɛɛ mli?

⁵ Nɔ ko bɛ ni he hiaa fe ni obaasumɔ Yehowa. Yesu kɛɛ esa akɛ wɔsumɔ Yehowa kɛ wɔtsui muu fɛɛ kɛ wɔsusuma muu fɛɛ kɛ wɔjwɛŋmɔ muu fɛɛ kɛ wɔnyɛmɔ fɛɛ. (Mar. 12:30) Mɛni baahã obu Yehowa ni osumɔ lɛ waa nakai? No ji, ni obaasusu nibii ni efee kɛtsɔɔ akɛ esumɔɔ bo lɛ ahe jogbaŋŋ. Nakai wɔbaafee yɛ nikasemɔ nɛɛ mli. (1 Yoh. 4:19) Agbɛnɛ hu, wɔbaana nibii krokomɛi hu ni kɛ́ wɔbasumɔ Yehowa lɛ, wɔbaasumɔ, kɛ nɔ ni no baatsirɛ wɔ ni wɔfee.b

 6. Yɛ nɔ aŋma yɛ Romabii 1:20 lɛ naa lɛ, mɛni ji gbɛ kome ni obaanyɛ otsɔ nɔ okase Yehowa he nii?

⁶ Kasemɔ Yehowa he nii kɛtsɔ nibii ni ebɔ lɛ anɔ. (Kanemɔ Romabii 1:20; Kpo. 4:11) Hemɔ be osusu tsei kɛ kooloi ni Yehowa ebɔ lɛ ahe, ni obaana akɛ ele nii waa.c Kasemɔ ogbɔmɔtso lɛ he nii fioo, ni obaana akɛ ehe yɛ naakpɛɛ. (Lala 139:14) Susumɔ ŋulamii akpekpe toi akpei abɔ ni Yehowa ebɔ lɛ hu ahe okwɛ. Ŋulamii nɛɛ ateŋ ekome ji hulu lɛ. Kɛ́ okwɛ bɔ ni hulu lɛ tsoɔ waa lɛ, ehãa onaa faŋŋ akɛ, Yehowa kɛ hewalɛ ko ni bɔ, aloo jeee nakai? (Yes. 40:26) Kɛ́ osusu nibii ni Yehowa ebɔ lɛ ahe lɛ, obaashe lɛ gbeyei waa, ejaakɛ obaana akɛ, ele nii ni ehe wa. Kɛ̃lɛ, jeee sui enyɔ nɛɛ pɛ baahã osumɔ Yehowa waa. Kɛ́ ootao osumɔ Yehowa waa lɛ, esa akɛ okase ehe nii babaoo ni ole lɛ jogbaŋŋ.

 7. Dani obaanyɛ osumɔ Yehowa waa lɛ, mɛni esa akɛ ohe oye?

⁷ Esa akɛ ohe oye akɛ, Yehowa susuɔ ohe. Mɛi komɛi nuɔ he akɛ, Yehowa, mɔ ni bɔ ŋwɛi kɛ shikpɔŋ lɛ, bɛ amɛhe dekã ni esusuuu amɛhe. Ani bo hu onuɔ he nakai? Kɛ́ nakai onuɔ he lɛ, kaimɔ nɔ ni Yehowa wie lɛ, akɛ, “ekɛ wɔteŋ mɔ fɛɛ mɔ teŋ jekɛɛɛ.” (Bɔf. 17:26-28) “Yehowa taoɔ tsuii fɛɛ amli,” ni ewo bo shi akɛ “kɛ́ otao esɛɛ gbɛ lɛ, ebaahã ona lɛ.” (1 Kro. 28:9) Anɔkwa, Yehowa ‘egbala bo kɛba eŋɔɔ,’ tamɔ bɔ ni ewie akɛ ebaafee lɛ, ni no hewɔ amrɔ nɛɛ akɛ bo kaseɔ Biblia lɛ. (Yer. 31:3) Kɛ́ osusu nibii kpakpai pii ni Yehowa efee ehã bo lɛ ahe lɛ, obaasumɔ lɛ waa.

 8. Mɛni ji nɔ kome ni obaanyɛ ofee kɛtsɔɔ Yehowa akɛ osumɔɔ lɛ?

⁸ Nɔ kome ni obaanyɛ ofee kɛtsɔɔ Yehowa akɛ osumɔɔ lɛ ji, ni obaasɔle. Kɛ́ osɔle ni okɛɛ Yehowa nibii ni haoɔ bo, ni oda lɛ shi yɛ nibii fɛɛ ni efeɔ ehãa bo lɛ ahe lɛ, obaasumɔ lɛ fe tsutsu lɛ po. Ni kɛ́ ona bɔ ni Yehowa hãa osɔlemɔi ahetoo lɛ, naanyobɔɔ ni yɔɔ okɛ lɛ teŋ lɛ mli baawa. (Lala 116:1) Obaana faŋŋ akɛ, enuɔ bo shishi. Shi dani obaanyɛ ofee nibii nɛɛ ni baahã naanyobɔɔ ni yɔɔ okɛ Yehowa teŋ lɛ mli awa lɛ, esa akɛ ole nɔ hewɔ ni esumɔɔ nibii komɛi shi enyɛɔ nibii komɛi lɛ, nɔ hewɔ ni efeɔ nibii komɛi ni efeɔ lɛ, kɛ agbɛnɛ hu, bɔ ni eesumɔ ni ohi shi ohã. Gbɛ koome pɛ ni obaanyɛ otsɔ nɔ ole enɛ ji, ni obaakase Biblia lɛ, ni ji e-Wiemɔ lɛ.

 9. Mɛni kɛ́ ofee lɛ no baatsɔɔ akɛ oheɔ oyeɔ akɛ Biblia lɛ ji Nyɔŋmɔ Wiemɔ?

⁹ Hemɔ oye akɛ Biblia lɛ ji Nyɔŋmɔ Wiemɔ. Biblia lɛ pɛ baanyɛ atsɔɔ bo Yehowa he anɔkwa saji, kɛ bɔ ni eesumɔ ni ohi shi ohã. Kɛ́ okane Biblia lɛ daa gbi, osaa ohe jogbaŋŋ kɛhã o-Biblia mli nikasemɔ lɛ, ni okɛ nibii ni okaseɔ lɛ tsu nii lɛ, no tsɔɔ akɛ oheɔ oyeɔ lɛɛlɛŋ akɛ, Biblia lɛ ji Nyɔŋmɔ Wiemɔ. (Lala 119:97, 99; Yoh. 17:17) Ani oto gbɛjianɔ koni onyɛ okane Biblia lɛ daa gbi? Ani okɛ gbɛjianɔ ni oto lɛ tsuɔ nii?

10. Mɛni ji nɔ kome ni hãa esoroɔ Biblia lɛ yɛ woji krokomɛi ahe?

¹⁰ Nɔ kome ni hãa esoroɔ Biblia lɛ kwraa yɛ woji krokomɛi ahe ji akɛ, mɛi ni na Yesu be ni eba shikpɔŋ lɛ nɔ lɛ ebɔ nibii ni efee kɛ bɔ ni ehi shi ehã lɛ he amaniɛ yɛ mli. Biblia lɛ mli pɛ wɔbaanyɛ wɔna nibii ni Yesu efee ehã wɔ lɛ he anɔkwa saji yɛ. Kɛ́ okase nibii ni Yesu wie kɛ nibii ni efee lɛ, ekã shi faŋŋ akɛ, no baatsirɛ bo ni okɛ lɛ abɔ naanyo.

11. Mɛni baaye abua bo ni osumɔ Yehowa?

¹¹ Kasemɔ Yesu he nii koni osumɔ lɛ, ni no baahã osumɔ Yehowa. Kɛ́ okase Yesu he nii waa lɛ, no baahã ole Yehowa jogbaŋŋ ni naanyobɔɔ ni yɔɔ okɛ lɛ teŋ lɛ mli baawa, ejaakɛ Yesu kase e-Tsɛ lɛ pɛpɛɛpɛ yɛ nɔ fɛɛ nɔ mli. (Yoh. 14:9) Susumɔ bɔ ni Yesu kɛ ohiafoi, helatsɛmɛi, kɛ mɛi ni bɛ yelikɛbualɔ ko lɛ ye ehã lɛ he okwɛ. Eyɛ mli akɛ abuuu mɛi nɛɛ moŋ, shi emusuŋ tsɔ lɛ yɛ amɛhe. Agbɛnɛ hu, susumɔ ŋaa kpakpa ni ewo yɛ shihilɛ mli nibii srɔtoi ahe lɛ he okwɛ. Kɛ́ okɛ eŋaawoo lɛ tsu nii lɛ, ekã shi faŋŋ akɛ obaaná he sɛɛ, aloo jeee nakai?​—Mat. 5:1-11; 7:24-27.

12. Kɛ́ okase Yesu he nii lɛ, mɛni no baatsirɛ bo ni ofee?

¹² Kɛ́ osusu nɔ ni Yesu kɛshã afɔle koni anyɛ akɛ wɔhe eshai ake wɔ lɛ he lɛ, ekã shi faŋŋ akɛ, no baahã osumɔ lɛ waa. (Mat. 20:28) Kɛ́ obanu shishi akɛ, Yesu jɛ esuɔmɔ mli ekɛ ewala shã afɔle ehã bo lɛ, ekolɛ no baatsirɛ bo ni otsake otsui ni okpa Yehowa fai ni ekɛ ohe eshai ake bo. (Bɔf. 3:19, 20; 1 Yoh. 1:9) Kɛ́ obasumɔ Yesu kɛ Yehowa lɛ, bɔ fɛɛ bɔ ni fee lɛ, obaasumɔ mɛi ni sumɔɔ amɛ lɛ hu.

13. Namɛi anɔ Yehowa baatsɔ eye ebua bo?

¹³ Suɔmɔ mɛi ni sumɔɔ Yehowa lɛ. Ekolɛ owekumɛi kɛ onanemɛi ni jáaa Yehowa lɛ nuŋ nɔ hewɔ ni oosumɔ ni ojɔɔ ohe nɔ ohã Yehowa lɛ shishi, ni ekolɛ, amɛbaate shi amɛwo bo po. Shi Yehowa baaye abua bo kɛtsɔ onyɛmimɛi Kristofoi lɛ anɔ. Amɛbaatsɔ tamɔ weku amɛhã bo. Kɛ́ okɛ onyɛmimɛi Kristofoi lɛ bɔ gbagbalii lɛ, amɛbaaye amɛbua bo, ni obaana faŋŋ akɛ, amɛsumɔɔ bo. (Mar. 10:29, 30; Heb. 10:24, 25) Ekolɛ wɔsɛɛ lɛ, owekumɛi lɛ baaba amɛbafata ohe kɛjá Yehowa, ni amɛbaahi shi yɛ egbɛtsɔɔmɔi lɛ anaa.​—1 Pet. 2:12.

14. Mɛni okpa shi ona yɛ Yehowa gbɛtsɔɔmɔi lɛ ahe ni kɛ nɔ ni awie yɛ 1 Yohane 5:3 lɛ kpãa gbee?

¹⁴ Hemɔ oye akɛ Yehowa gbɛtsɔɔmɔi lɛ hi, ni okɛtsu nii yɛ oshihilɛ mli. Be ni oleee Yehowa lɛ, ofeɔ nɔ fɛɛ nɔ ni osumɔɔ, shi amrɔ nɛɛ ni okɛ Yehowa gbɛtsɔɔmɔi ebɔi nitsumɔ lɛ, ona akɛ amɛhe yɛ sɛɛnamɔ. (Lala 1:1-3; kanemɔ 1 Yohane 5:3.) Akɛ nɔkwɛmɔnɔ lɛ, susumɔ gbɛtsɔɔmɔi ni Yehowa kɛhã wumɛi, ŋamɛi, fɔlɔi, kɛ bii yɛ Biblia lɛ mli lɛ ahe okwɛ. (Efe. 5:22–6:4) Be ni okɛ gbɛtsɔɔmɔi nɛɛ bɔi nitsumɔ yɛ oweku lɛ mli lɛ, ani oweku lɛ náaa miishɛɛ? Be ni okɛ ŋaa ni Yehowa ewo yɛ mɛi ni esa akɛ okɛbɔ naanyo lɛ he lɛ bɔi nitsumɔ lɛ, ani onaaa akɛ ojeŋba efee fɛo fe be ko ni eho lɛ? Ni ani no hãko omii ashɛ ohe? (Abɛi 13:20; 1 Kor. 15:33) Ŋwanejee ko bɛ he akɛ, kɛjɛ be ni okɛ Yehowa gbɛtsɔɔmɔi lɛ bɔi nitsumɔ nɛɛ, oná he sɛɛ waa.

15. Kɛ́ onaaa bɔ ni obaafee okɛ Biblia mli shishitoo mla ko atsu nii ahã lɛ, mɛni baanyɛ aye abua bo?

¹⁵ Bei komɛi lɛ, ole Biblia mli shishitoo mla lɛ, shi onaaa bɔ ni obaafee okɛtsu nii. Enɛ hewɔ Yehowa eto gbɛjianɔ koni esafo lɛ afee woji kɛ nibii krokomɛi ni baaye abua bo ni onu Biblia lɛ shishi jogbaŋŋ koni ole ekpakpa kɛ efɔŋ mlikpamɔ lɛ. (Heb. 5:13, 14) Kɛ́ okane woji nɛɛ ni okase lɛ, obaana akɛ amɛwieɔ saji kɛ shihilɛi ni wɔkɛkpeɔ diɛŋtsɛ lɛ ahe, ni amɛhe yɛ sɛɛnamɔ. Ekolɛ enɛ baahã oná he miishɛɛ akɛ okɛ Yehowa asafo lɛ baabɔ.

16. Te Yehowa eto ewebii lɛ ahe gbɛjianɔ ehã tɛŋŋ?

¹⁶ Ohiɛ asɔ Yehowa asafo lɛ kɛ bɔ ni eto he gbɛjianɔ ehã lɛ. Yehowa eto ewebii lɛ ahe gbɛjianɔ ewo asafoi srɔtoi amli, ni e-Bi Yesu ji asafoi nɛɛ fɛɛ ayitso. (Efe. 1:22; 5:23) Yesu ehala mɛi ni afɔ amɛ mu lɛ ateŋ hii fioo, koni akɛ kuu lɛ, amɛto nitsumɔ ni eesumɔ ni ewebii lɛ atsu yɛ wɔbei nɛɛ amli lɛ he gbɛjianɔ. Yesu tsɛ kuu nɛɛ akɛ, “nyɔŋ anɔkwafo kɛ hiɛshikalɔ lɛ,” ni nyɔŋ nɛɛ kɛ nitsumɔ ni Yesu kɛwo edɛŋ akɛ eye ebua bo ni ohe awa yɛ hemɔkɛyeli lɛ mli koni okafee nɔ ko ni baafite okɛ Yehowa teŋ lɛ shwɛɛɛ kwraa. (Mat. 24:45-47) Nɔ kome ni nyɔŋ lɛ feɔ kɛyeɔ ebuaa bo ji akɛ, ekwɛɔ ni ahalaa hii ni sa akɛ asafoŋ onukpai koni amɛtsɔɔ bo gbɛ ni amɛbu ohe. (Yes. 32:1, 2; Heb. 13:17; 1 Pet. 5:2, 3) Asafoŋ onukpai lɛ baajɛ amɛtsuiŋ amɛkɛ amɛhe ashã afɔle amɛhã bo, amɛshɛje omii, ni amɛye amɛbua bo koni okɛ Yehowa teŋ naanyobɔɔ lɛ mli awa daa. Shi nɔ kome ni he hiaa waa ni amɛbaanyɛ amɛfee amɛhã bo ji, ni amɛbaaye amɛbua bo ni otsɔɔ mɛi Yehowa he nii.​—Efe. 4:11-13.

17. Yɛ nɔ ni awie yɛ Romabii 10:10, 13, 14 lɛ naa lɛ, mɛni hewɔ esa akɛ wɔgba mɛi Yehowa he sane?

¹⁷ Tsɔɔmɔ mɛi Yehowa he nii koni amɛ hu amɛsumɔ lɛ. Yesu fã esɛɛnyiɛlɔi lɛ akɛ, amɛtsɔɔ mɛi Yehowa he nii. (Mat. 28:19, 20) Ekolɛ, obaabo famɔ nɛɛ toi akɛni ole akɛ esa akɛ obo toi lɛ hewɔ. Shi kɛ́ osumɔɔ Yehowa waa lɛ, obaanu he tamɔ bɔ ni bɔfo Petro kɛ bɔfo Yohane nu he lɛ. Amɛwie akɛ: “Wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.” (Bɔf. 4:20) Kɛ́ onyɛ oye obua mɔ ko ni ebasumɔ Yehowa lɛ, obaaná miishɛɛ waa. Kɛ́ okwɛ lɛ, be ni Filipo ye ebua Etiopianyo lɛ ni ebale anɔkwa saji ni yɔɔ Ŋmalɛ lɛ mli lɛ ni ehã abaptisi lɛ lɛ, te enu he ehã tɛŋŋ? Ŋwanejee ko bɛ he akɛ, emii shɛ ehe pam! Kɛ́ okase Filipo, ni oye famɔ ni Yesu kɛhã akɛ ashiɛ lɛ nɔ lɛ, no tsɔɔ akɛ oosumɔ ni obatsɔ Yehowa Odasefonyo lɛɛlɛŋ. (Kanemɔ Romabii 10:10, 13, 14.) Kɛkɛ lɛ, ekolɛ, bo hu obaabi sane ni Etiopianyo lɛ bi lɛ eko, akɛ: “Mɛni tsĩɔ mibaptisimɔ gbɛ?”​—Bɔf. 8:36.

18. Mɛɛ sanebimɔi abaahã hetoo yɛ nikasemɔ ni nyiɛ sɛɛ lɛ mli?

¹⁸ Yiŋ ni he hiaa fe fɛɛ ni obaakpɛ yɛ oshihilɛ mli ji, ni obaahã abaptisi bo. Yiŋkpɛɛ nɛɛ yɛ hiɛdɔɔ waa, ni no hewɔ lɛ, esa akɛ osusu sɔ̃ ni ekɛbafɔ̃ɔ onɔ lɛ he jogbaŋŋ. Mɛni ji nibii komɛi ni esa akɛ ole yɛ baptisimɔ he? Mɛni esa akɛ ofee dani abaptisi bo? Ni yɛ obaptisimɔ lɛ sɛɛ lɛ, mɛni ehe baahia ni ofee? Abaahã sanebimɔi nɛɛ hetoo yɛ nikasemɔ ni nyiɛ sɛɛ lɛ mli.