‘Yaa Nɔ Onyiɛ Yɛ Anɔkwale Lɛ Mli’

 1. Kɛ́ wɔmiigba mɛi bɔ ni fee ni wɔba “anɔkwale lɛ” mli lɛ, mɛɛ gbɛ nɔ wɔnáa he sɛɛ?

BEI pii lɛ, kɛ́ wɔnyɛmimɛi Kristofoi lɛ kɛ wɔ kpe klɛŋklɛŋ kwraa lɛ, sane ni amɛfɔɔ wɔ bimɔ ji, “Te efee tɛŋŋ oba anɔkwale lɛ mli?” Ŋwanejee ko bɛ he akɛ, bo hu abi bo sane nɛɛ shii abɔ. Wɔmiisumɔ ni wɔle bɔ ni fee ni wɔnyɛmimɛi lɛ bale Yehowa ni amɛsumɔ lɛ, ni kɛ́ wɔmiigba saji ni tamɔ nɛkɛ lɛ, wɔnáa miishɛɛ waa. (Rom. 1:11) Sanegbai ni tamɔ nɛkɛ hãa wɔnaa bɔ ni anɔkwale lɛ jara wa waa hã. Agbɛnɛ hu, ehãa wɔtswaa wɔfai shi waa akɛ, ‘wɔbaaya nɔ wɔnyiɛ yɛ anɔkwale lɛ mli,’ ni tsɔɔ akɛ, wɔbaafee nibii ni baahã Yehowa ajɔɔ wɔ ni ená wɔhe miishɛɛ.​—3 Yoh. 4.

 2. Mɛni he wɔbaasusu yɛ nikasemɔ nɛɛ mli?

² Yɛ nikasemɔ nɛɛ mli lɛ, wɔbaasusu yiŋtoi komɛi ahewɔ ni wɔsumɔɔ anɔkwale lɛ he. Agbɛnɛ hu, wɔbaakwɛ nibii komɛi ni wɔbaanyɛ wɔfee koni wɔya nɔ wɔsumɔ anɔkwale lɛ waa. Enɛ baahã wɔná he miishɛɛ waa akɛ Yehowa egbala wɔ kɛba anɔkwale lɛ mli. (Yoh. 6:44) Agbɛnɛ hu, ebaahã wɔfai shi ni wɔtswa akɛ wɔbaahã mɛi ale anɔkwale lɛ mli awa.

 3. Mɛni ji yiŋtoo ni fe fɛɛ hewɔ ni wɔsumɔɔ anɔkwale lɛ?

³ Yiŋtoi pii ahewɔ wɔsumɔɔ anɔkwale lɛ. Ni amɛteŋ nɔ ni fe fɛɛ ji, wɔsumɔɔ Yehowa mɔ ni kɛ́ anɔkwale lɛ hã wɔ lɛ. Biblia lɛ ehã wɔle mɔ ni eji, akɛ eyɛ hewalɛ waa ni lɛ ebɔ ŋwɛi kɛ shikpɔŋ. Shi jeee no pɛ. Ehã wɔle akɛ eji wɔ-Tsɛ ni yɔɔ ŋwɛi ni sumɔɔ wɔ waa ni susuɔ wɔhe hu. (1 Pet. 5:7) Ehãa wɔleɔ hu akɛ, Nyɔŋmɔ ji “mɔbɔnalɔ kɛ musuŋtsɔlɔ, ní mli fuuu mra ni esuɔmɔ ni tsakeee kɛ enɔkwale fa babaoo.” (2 Mo. 34:6) Yehowa sumɔɔ jalɛsaneyeli. (Yes. 61:8) Ni no hewɔ lɛ, kɛ́ ena ni wɔmiipiŋ lɛ, edɔɔ lɛ waa ni efee klalo akɛ ebaafo piŋmɔi fɛɛ sɛɛ yɛ be ni eto lɛ mli. (Yer. 29:11) Wɔmiikpa be nɛɛ gbɛ waa! Enɛ ji yiŋtoo kome hewɔ ni wɔsumɔɔ Yehowa waa lɛ!

4-5. Mɛni hewɔ bɔfo Paulo kɛ wɔhiɛnɔkamɔ lɛ to sɛ́kɛ he lɛ?

⁴ Mɛɛ yiŋtoo kroko hewɔ wɔsumɔɔ anɔkwale lɛ? Wɔsumɔɔ anɔkwale lɛ ejaakɛ wɔnáa he sɛɛ waa. Akɛ nɔkwɛmɔnɔ lɛ, Biblia mli anɔkwalei lɛ hãa wɔnáa hiɛnɔkamɔ akɛ wɔsɛɛ lɛ nibii baahi. Bɔfo Paulo kɛ nɔkwɛmɔnɔ ko tsɔɔ bɔ ni hiɛnɔkamɔ nɛɛ he yɔɔ sɛɛnamɔ hã. Ewie akɛ: “Nɛkɛ hiɛnɔkamɔ ni wɔyɔɔ nɛɛ tamɔ sɛ́kɛ ni tseee ni tsɛkɛɔ shi shiŋŋ kɛhã susuma lɛ.” (Heb. 6:19) Bɔ ni sɛ́kɛ hãa lɛlɛ maa shi yɛ he kome lɛ, nakai nɔŋŋ hiɛnɔkamɔ ni Biblia lɛ hãa wɔnáa lɛ hãaa wɔye wɔtsui tsɔ kɛ́ wɔkɛ naagbai kpe yɛ shihilɛ mli.

⁵ Be ni Paulo wie sane nɛɛ, no mli lɛ eewie Kristofoi ni afɔ amɛ mu ni yɔɔ hiɛnɔkamɔ akɛ amɛbaaya ŋwɛi lɛ ahe. Shi nɔ ni ewie lɛ kɔɔ Kristofoi ni yɔɔ hiɛnɔkamɔ akɛ amɛbaahi shi kɛya naanɔ yɛ paradeiso mli yɛ shikpɔŋ lɛ nɔ lɛ hu ahe. (Yoh. 3:16) Ekã shi faŋŋ akɛ, hiɛnɔkamɔ ni wɔbaná akɛ wɔbaahi shi kɛya naanɔ lɛ ehã wɔtsui enyɔ wɔmli waa yɛ shihilɛ mli.

6-7. Mɛɛ gbɛ nɔ Yvonne ená nɔ ni Biblia lɛ kɛɔ yɛ wɔsɛɛ he lɛ he sɛɛ?

⁶ Naa nyɛmi yoo ko ni atsɛɔ lɛ Yvonne lɛ niiashikpamɔ. Atsɔseee lɛ yɛ anɔkwale lɛ mli. Ni be ni eji gbekɛ lɛ, esheɔ gbele gbeyei waa. Be ko lɛ, ekane sane ko yɛ wolo ko mli ni ka eyitsoŋ waa. Nɔ ni ekane lɛ ji, “Be ko baashɛ ni wɔ́ baaa dɔŋŋ,” ni tsɔɔ akɛ, wɔ fɛɛ wɔbaagboi be ko kɛ̃. Ewie akɛ: “Nakai wiemɔi lɛ hãa mijwɛŋɔ wɔsɛɛ he waa kɛ́ mihiɛ tsɛ̃ maŋkɛ. Mikɛɔ mihe akɛ, yiŋtoo ko kɛ̃ hewɔ wɔyɔɔ wala mli lɛ. Mɛni hewɔ miyɔɔ wala mli? Misumɔɔɔ ni magbo!”

⁷ Sɛɛ mli be ni Yvonne batsɔ oblayoo lɛ, ekɛ Yehowa Odasefoi kpe. Ewie akɛ: “Mibahe miye akɛ manyɛ mahi shi kɛya naanɔ yɛ shikpɔŋ ni afee lɛ Paradeiso lɛ nɔ.” Mɛɛ gbɛ nɔ wɔnyɛmi yoo lɛ ená anɔkwale lɛ ni ekase lɛ he sɛɛ? Ewie akɛ: “Amrɔ nɛɛ, miyeee mitsui dɔŋŋ yɛ wɔsɛɛ loo gbele he kɛ́ mihiɛ tsɛ̃ maŋkɛ.” Yvonne ebasumɔ anɔkwale lɛ waa, ni kɛ́ egba mɛi hiɛnɔkamɔ ni eyɔɔ lɛ, emii shɛɔ ehe waa.​—1 Tim. 4:16.

8-9. (a) Yɛ nɔkwɛmɔnɔ ko ni Yesu gba lɛ mli lɛ, te nuu ko na jwetri ko ni eyana lɛ ehã tɛŋŋ? (b) Te bo hu onaa anɔkwale lɛ ohãa tɛŋŋ?

⁸ Nyɔŋmɔ Maŋtsɛyeli lɛ he sane kpakpa lɛ hu fata Biblia mli anɔkwale lɛ he. Yesu kɛ anɔkwale ni kɔɔ nakai Maŋtsɛyeli lɛ he lɛ to jwetri ko ni akɛtee he. Tamɔ bɔ ni awie yɛ Mateo 13:44 lɛ, Yesu wie akɛ: “Ŋwɛi Maŋtsɛyeli lɛ tamɔ jwetri ko ni akɛtee yɛ shikpɔŋ ko mli, ni nuu ko yana ni ekɛto; ni miishɛɛ ni ená lɛ sɔŋŋ hewɔ lɛ etee eyahɔ̃ɔ nibii fɛɛ ni eyɔɔ, ni eyahé nakai shikpɔŋ lɛ.” Kadimɔ akɛ, jeee ni nuu lɛ nyiɛ eetao jwetri lɛ, shi moŋ na kɛkɛ ena. Ni ena lɛ, ekɛ nɔ ko kpele shã afɔle koni enine ashɛ nakai jwetri lɛ nɔ. Anɔkwa, eyahɔ̃ɔ nibii fɛɛ ni eyɔɔ. Mɛni hewɔ efee nakai? Ejaakɛ ele bɔ ni jwetri nɛɛ he yɔɔ sɛɛnamɔ waa hã. Ehe yɛ sɛɛnamɔ kwraa fe nibii fɛɛ ni ekɛshã afɔle lɛ.

⁹ Ani nakai bo hu onaa anɔkwale lɛ? Ekã shi faŋŋ akɛ nakai onaa lɛ. Wɔle akɛ, nɔ ko nɔ ko bɛ je nɛɛ mli ni wɔbaanyɛ wɔkɛto miishɛɛ ni wɔnáa akɛ wɔmiisɔmɔ Yehowa bianɛ kɛ hiɛnɔkamɔ ni wɔyɔɔ akɛ wɔbaahi shi kɛya naanɔ yɛ Maŋtsɛyeli lɛ shishi lɛ he. Ni nɔ ko nɔ ko bɛ ni wɔkɛshã afɔle ni he yɛ sɛɛnamɔ fe wekukpaa ni yɔɔ wɔ kɛ Yehowa teŋ lɛ. Nɔ ni hãa wɔnáa miishɛɛ fe fɛɛ ji, ni wɔbaafee nibii ni baahã ‘wɔsa ehiɛ kwraa.’​—Kol. 1:10.

10-11. Mɛni tsirɛ Michael ni ekɛ nɔ ko ni eshwɛɛɛ he kwraa lɛ shã afɔle?

¹⁰ Akɛni wɔmiisumɔ ni wɔsa Yehowa hiɛ hewɔ lɛ, wɔteŋ mɛi babaoo kɛ nibii ni wɔsumɔɔ waa lɛ eshã afɔle. Wɔteŋ mɛi komɛi eshi nitsumɔi wuji ni abuɔ waa yɛ je lɛ mli, mɛi komɛi hu ekpa shika babaoo sɛɛtiumɔ, ni mɛi komɛi hu etsake amɛjeŋba kwraa be ni akɛ amɛbɔi Yehowa he nii kasemɔ lɛ. Nakai pɛpɛɛpɛ Michael fee. Atsɔseee lɛ yɛ anɔkwale lɛ mli. Be ni eji oblanyo lɛ, ekase bɔ ni anɔɔ karat. Ewie akɛ: “Daa nɛɛ, miigbɔle mikpɔiaŋ koni kɛ́ ana mi lɛ, ana akɛ mihe wa. Bei komɛi lɛ, minuɔ he akɛ mɔ ko mɔ ko nyɛɛɛ mi.” Shi be ni akɛ Michael bɔi Biblia lɛ kasemɔ lɛ, ebana akɛ Yehowa sumɔɔɔ yiwalɛ nifeemɔi. (Lala 11:5) Michael wie yɛ nyɛmi nuu lɛ ni kɛ lɛ kase nii lɛ he akɛ: “Ekɛ eŋa lɛ ekɛɛɛ mi shi kome po akɛ mikpa karat lɛ nɔɔ. Nɔ ni amɛfee kɛkɛ ji, amɛkɛ mi kase Biblia lɛ.”

¹¹ Michael tee nɔ ekase Yehowa he nii ni no hã ebasumɔ lɛ waa. Nɔ kome ni ená he miishɛɛ waa ji, bɔ ni Yehowa musuŋ tsɔɔ lɛ yɛ ewebii ahe lɛ. Sɛɛ mli lɛ, Michael na akɛ esa akɛ ekpa karat lɛ nɔɔ. Shi ani ená lɛ mlɛo? Ewie akɛ: “No mli lɛ, ewa waa kɛhã mi akɛ makpa karat lɛ nɔɔ. Shi mile hu akɛ kɛ́ mifee nakai lɛ, Yehowa baaná mihe miishɛɛ, ni mina akɛ Yehowa ni masɔmɔ lɛ he miihia fe nɔ fɛɛ nɔ ni mikɛbaashã afɔle.” Michael na akɛ anɔkwale lɛ jara wa, ni no tsirɛ lɛ ni ekɛ nɔ ko ni esumɔɔ waa lɛ shã afɔle.​—Yak. 1:25.

12-13. Mɛɛ gbɛ nɔ Biblia lɛ ye ebua Mayli?

¹² Biblia lɛ kɛ anɔkwale lɛ toɔ kane ni miikpɛ yɛ duŋ mli lɛ he koni no aye abua wɔ ni wɔna bɔ ni anɔkwale lɛ jara wa hã. (Lala 119:105; Efe. 5:8) Nyɛmi yoo ko ni jɛ Azerbaijan ni atsɛɔ lɛ Mayli lɛ wie akɛ, Biblia lɛ ye ebua lɛ ni ená sanebimɔi komɛi ni haoɔ lɛ waa lɛ ahetoo ni no hã ebasumɔ anɔkwale lɛ waa. No mli lɛ, Mayli papa lɛ, Muslimnyo ni, ni emami lɛ, Yudafoi lɛ ajamɔ lɛ mli eyɔɔ. Mayli wie akɛ: “Mijeee he ŋwane akɛ Nyɔŋmɔ yɛ, shi no mli lɛ, nibii komɛi yɛ ni minuuu shishi yɛ Nyɔŋmɔ he. Mibi mihe akɛ: ‘Mɛni hewɔ Nyɔŋmɔ bɔ adesai? Ni mɛni hewɔ mɔ ko baapiŋ ewala gbii abɔ fɛɛ ni kɛ́ egbo lɛ asaa ayapiŋ lɛ yɛ hɛl kɛya naanɔ?’ Agbɛnɛ hu, akɛni mɛi kɛɛ nɔ fɛɛ nɔ ni baa lɛ Nyɔŋmɔ ni feɔ hewɔ lɛ, mibi mihe akɛ: ‘Ani Nyɔŋmɔ hãa adesai yajeɔ shihilɛi ni mli wawai amli koni kɛ́ amɛmiipiŋ lɛ ená miishɛɛ?’”

¹³ Mayli tee nɔ etao saji ni haoɔ lɛ lɛ ahetoo. Sɛɛ mli lɛ, ehã Yehowa Odasefoi kɛ lɛ bɔi Biblia lɛ kasemɔ ni eba anɔkwale lɛ mli. Ewie akɛ: “Bɔ ni Biblia lɛ ye ebua mi ni mibanu saji ni haoɔ mi nɛɛ fɛɛ ashishi lɛ hã bɔ ni minaa nibii mihãa yɛ shihilɛ mli lɛ tsake kwraa. Mina faŋŋ akɛ, nibii ni Biblia lɛ ewie yɛ saji nɛɛ ahe lɛ ji anɔkwale ni no hewɔ lɛ mihaooo dɔŋŋ.” Wɔ kɛ Mayli fɛɛ jieɔ Yehowa yi ejaakɛ ‘etsɛ wɔ kɛjɛ duŋ mli kɛba lɛ diɛŋtsɛ enaakpɛɛ la lɛ he.’​—1 Pet. 2:9.

14. Mɛni kɛ́ wɔfee lɛ, no baahã wɔsumɔ anɔkwale lɛ waa? (Kwɛmɔ akrabatsa ni ji, “Nibii Krokomɛi Ni Akɛ Anɔkwale Lɛ Toɔ He” lɛ hu.)

¹⁴ Saji fioo ni wɔsusu he nɛɛ ehã wɔna akɛ, anɔkwale lɛ nɔ bɛ. Nibii krokomɛi hu yɛ ni hãa wɔnaa akɛ anɔkwale lɛ nɔ bɛ. Mɛni hewɔ otooo gbɛjianɔ ni otao nibii nɛɛ ekomɛi be ni ofeɔ aŋkro nikasemɔ lɛ? Kɛ́ ofee nakai lɛ, obaasumɔ anɔkwale lɛ waa, ni obaana nibii komɛi ni obaanyɛ ofee kɛtsɔɔ akɛ osumɔɔ anɔkwale lɛ lɛɛlɛŋ.

15. Mɛni ji nɔ kome ni wɔbaanyɛ wɔfee kɛtsɔɔ akɛ anɔkwale lɛ jara wa hã wɔ?

¹⁵ Nɔ kome ni wɔbaanyɛ wɔfee kɛtsɔɔ akɛ anɔkwale lɛ jara wa hã wɔ ji, ni wɔbaakase Biblia lɛ kɛ asafo lɛ woji lɛ daa. Ekɔɔɔ he eko be ni wɔba anɔkwale lɛ mli lɛ, nibii pii yɛ ni esa akɛ wɔkase. Yɛ klɛŋklɛŋ Blɔfo Buu-Mɔɔ ni afee lɛ mli lɛ, awie akɛ: “Anɔkwale lɛ tamɔ fɔfɔi bibioo ko ni miikwɛ̃ yɛ ŋa nɔ ni jwɛi, ni ji amalei ebɔle he fɛɛ ni eemia lɛ. Kɛ́ okɛ ohiɛ efɔ̃ɔɔ shi lɛ, onaŋ, ni kɛ́ ona hu lɛ, ja omia ohiɛ dani onine baanyɛ ashɛ nɔ. . . . Kɛ́ onine shɛ ekome nɔ lɛ, kaakpa taomɔ, yaa nɔ otao koni oná pii.” Nikasemɔ wa, shi sɛɛnamɔ yɛ he waa.

16. Kɛ́ ookase Biblia lɛ, te ofeɔ lɛ ohãa tɛŋŋ? (Abɛi 2:4-6)

¹⁶ Wɔteŋ mɛi komɛi sumɔɔɔ nikanemɔ kɛ nikasemɔ. Shi Yehowa kɛɛ wɔya nɔ wɔtao nii amli koni wɔnu anɔkwale lɛ shishi jogbaŋŋ. (Kanemɔ Abɛi 2:4-6.) Kɛ́ wɔmia wɔhiɛ wɔkase nii jogbaŋŋ nakai lɛ, bɔ fɛɛ bɔ ni fee lɛ, wɔbaaná he sɛɛ. Naa nɔ ni nyɛmi nuu ko ni atsɛɔ lɛ Corey lɛ feɔ kɛ́ eekase Biblia lɛ. Ewie akɛ: “Kɛ́ mikane kuku ko lɛ, mikaneɔ shishigbɛ niŋmai fɛɛ ni yɔɔ he kɛ ŋmalɛi krokomɛi fɛɛ ni atsɛ yisɛɛ ni kɔɔ he lɛ, ni mitaoɔ nii amli yɛ he dani miyaa kuku kroko nɔ. . . . Enɛ hãa mináa mi-Biblia kanemɔ lɛ he sɛɛ waa!” Kɛ́ nɛkɛ nɔŋŋ wɔ hu wɔkaseɔ Biblia lɛ jio, wɔtsɔɔ gbɛ kroko nɔ wɔkaseɔ jio lɛ, kɛ́ wɔhe be wɔkase lɛ, no tsɔɔ akɛ wɔnaa anɔkwale lɛ akɛ ejara wa waa.​—Lala 1:1-3.

17. Mɛni esa akɛ wɔfee koni wɔná anɔkwale lɛ ni wɔkaseɔ lɛ he sɛɛ? (Yakobo 1:25)

¹⁷ Shi jeee anɔkwale lɛ ni wɔbaakase lɛ pɛ kɛkɛ he hiaa. Kɛ́ wɔmiitao wɔná anɔkwale lɛ he sɛɛ jogbaŋŋ lɛ, belɛ esa akɛ wɔkɛtsu nii yɛ wɔshihilɛ mli. Ja wɔfee nakai dani wɔbaaná miishɛɛ. (Kanemɔ Yakobo 1:25.) Mɛni baaye abua wɔ ni wɔkɛ nibii ni wɔkaseɔ lɛ aya nɔ atsu nii yɛ wɔshihilɛ mli? Ŋaa ni nyɛmi nuu ko wo ji akɛ, yɛ be kɛ beiaŋ lɛ, wɔpɛi wɔmli wɔkwɛ hei ni wɔbɔɔ mɔdɛŋ yɛ kɛ hei ni wɔbɔɔɔ mɔdɛŋ tsɔ yɛ. Bɔfo Paulo wie akɛ: “He ni wɔtee hiɛ kɛshɛ lɛ, nyɛhãa wɔyaa nɔ wɔnyiɛa jogbaŋŋ yɛ nɛkɛ gbɛ nɛɛ nɔŋŋ nɔ.”​—Fip. 3:16.

18. Mɛni hewɔ wɔfeɔ bɔ fɛɛ bɔ ni wɔbaanyɛ koni ‘wɔya nɔ wɔnyiɛ yɛ anɔkwale lɛ mli’ lɛ?

¹⁸ Kɛ́ ‘wɔtee nɔ wɔnyiɛ yɛ anɔkwale lɛ mli’ lɛ, wɔnáa he sɛɛ waa diɛŋtsɛ. Wɔnáa miishɛɛ yɛ shihilɛ mli ni wɔhãa Yehowa kɛ wɔnyɛmimɛi Kristofoi lɛ hu náa miishɛɛ. (Abɛi 27:11; 3 Yoh. 4) Anɔkwa, wɔyɛ yiŋtoi pii ahewɔ ni esa akɛ wɔsumɔ anɔkwale lɛ ni wɔhi shi yɛ naa.