Ani Yiŋ Ni Okpɛɔ Yɛ Dãanumɔ He Lɛ Kɛ Yehowa Susumɔ Kpãa Gbee?

YEHOWA edro wɔ nibii kpakpai pii, ni ŋwanejee ko bɛ he akɛ, onyaa nibii nɛɛ ahe, ni eŋɔɔ onaa hu akɛ ehã bo heyeli ni okɛkpɛ oyiŋ yɛ bɔ ni okɛ amɛ baatsu nii ohã lɛ he. Biblia lɛ hãa wɔnaa akɛ, wain ji nikeenii ni jɛ Nyɔŋmɔ ŋɔɔ. Ewieɔ po akɛ: “Blodo tsɛɔ ŋmɔlɔ kɛbaa, ni wain tsɛɔ miishɛɛ kɛbaa.” (Jaj. 10:19; Lala 104:15) Shi ekolɛ, oyɔse akɛ mɛi komɛi yɛ dãanumɔ he naagba. Agbɛnɛ hu, he fɛɛ he ni obaaya yɛ je lɛ mli kɛ susumɔ ni mɛi hiɛ yɛ dãanumɔ he. No hewɔ lɛ, mɛni baaye abua Kristofoi ni amɛkpɛ yiŋ kpakpai yɛ dãanumɔ he?     

Ekɔɔɔ he eko he ni wɔyɔɔ loo bɔ ni atsɔse wɔ ahã lɛ, esa akɛ wɔhã Nyɔŋmɔ susumɔ yɛ dãanumɔ he lɛ akudɔ wɔ. Kɛ́ wɔfee nakai lɛ, wɔbaaná he sɛɛ bianɛ kɛ wɔsɛɛ hu.

Ekolɛ oyɔse akɛ ŋmɛnɛ lɛ, mɛi pii nuɔ dãa waa. Shi mɛni hewɔ amɛfeɔ nakai? Mɛi komɛi kɛɛ kɛ́ amɛnu lɛ, ehãa amɛhe jɔɔ amɛ. Mɛi komɛi hu nuɔ koni amɛkɛjie amɛjwɛŋmɔ yɛ amɛnaagbai lɛ anɔ. Ni yɛ hei komɛi lɛ, mɛi nuɔ he akɛ kɛ́ oda loo nuu ji bo lɛ, esa akɛ onu dãa babaoo.

Shi Yehowa, mɔ ni bɔ wɔ lɛ, ewo wɔ ŋaa kpakpa yɛ dãanumɔ he, ejaakɛ esumɔɔ wɔ. Akɛ nɔkwɛmɔnɔ lɛ, ehã wɔle akɛ kɛ́ wɔnu dãa babaoo lɛ, ebaaye wɔ awui. Yɛ Abɛi 23:​29-35 lɛ, Biblia lɛ tsɔɔ wɔ bɔ ni mɔ ko ni etɔ dãa lɛ feɔ enii ehãa kɛ naagbai komɛi ni enáa.a Asafoŋ onukpa ko ni yɔɔ Yuropa ni atsɛɔ lɛ Daniel lɛ kaiɔ bɔ ni eshihilɛ yɔɔ be ni ebaleko Yehowa ni ekɛ eŋaawoo baatsu nii lɛ. Ewie akɛ: “No mli lɛ, minuɔ dãa waa, ni enɛ hã mikpɛ yiŋ gbohii. Miná naagbai pii, ni kɛbashi ŋmɛnɛ lɛ, kɛ́ mikai ekomɛi lɛ, edɔɔ mi waa.”    

Mɛni baaye abua wɔ ni wɔkpɛ yiŋ kpakpai yɛ dãanumɔ he koni wɔkaná naagbai ni mɛi ni nuɔ dãa babaoo lɛ náa lɛ eko? Nɔ ni baaye abua wɔ ji, ni wɔbaahã Nyɔŋmɔ susumɔ yɛ dãanumɔ he lɛ akudɔ wɔ.

Nyɛhãa wɔkwɛa nɔ ni Biblia lɛ ewie yɛ dãanumɔ he, ni agbɛnɛ hu, wɔkwɛ nɔ hewɔ ni mɛi komɛi nuɔ dãa.

Biblia lɛ ekɛko akɛ akanu dãa kwraa. Anɔkwa, ehãa wɔleɔ po akɛ, dãa baanyɛ ahã mɔ aná miishɛɛ. Jajelɔ 9:7 lɛ kɛɔ akɛ: “Yaa ni oyaye oniyenii kɛ miishɛɛ, ni okɛ tsuijurɔ ayanu owain.” Yesu nu dãa bei komɛi, ni nakai nɔŋŋ Yehowa tsuji anɔkwafoi krokomɛi hu fee.—Mat. 26:​27-29; Luka 7:34; 1 Tim. 5:23.

Eyɛ mli akɛ Biblia lɛ ewieee eshiii dãanumɔ moŋ, shi ewieɔ eshiɔ dãatɔɔ. Biblia lɛ kɛɔ faŋŋ akɛ: “Nyɛkayaa nɔ nyɛtɔrɔa dãa.” (Efe. 5:18) Ekɛɔ hu akɛ, ‘dãatɔlɔi anine shɛŋ Nyɔŋmɔ Maŋtsɛyeli lɛ nɔ.’ (1 Kor. 6:10) Enɛ hãa wɔnaa akɛ, Yehowa miihi dãanumɔ babaoo kɛ dãatɔɔ. No hewɔ lɛ, nɔ najiaŋ ni wɔbaahã susumɔ ni mɛi ni yɔɔ he ni wɔyɔɔ lɛ hiɛ yɛ dãanumɔ he lɛ akudɔ wɔ lɛ, esa akɛ wɔhã Nyɔŋmɔ susumɔ moŋ akudɔ wɔ.

Mɛi komɛi kɛɛ amɛbaanyɛ amɛnu dãa babaoo shi amɛtɔɔɔ. Shi eyɛ oshãra waa akɛ mɔ ko baafee nakai. Biblia lɛ hãa wɔleɔ faŋŋ akɛ, kɛ́ mɔ ko hã “dãanumɔ babaoo ye lɛ nyɔŋ” lɛ, ebaatɔ̃ tɔmɔi ni yɔɔ hiɛdɔɔ, ni ebaafite ekɛ Yehowa teŋ. (Tito 2:3; Abɛi 20:1) Yesu wie akɛ, kɛ́ mɔ ko ‘nuɔ dãa babaoo’ lɛ, no baanyɛ ahã ewa kɛhã lɛ akɛ ebaabote Nyɔŋmɔ Maŋtsɛyeli lɛ mli. (Luka 21:​34-36) No hewɔ lɛ, mɛni baanyɛ aye abua Kristofonyo koni ekaná naagbai ni mɛi pii ni nuɔ dãa lɛ náa lɛ eko?

Kɛ́ wɔmiikpɛ wɔyiŋ yɛ dãanumɔ he lɛ, esaaa akɛ wɔhãa susumɔ ni mɛi hiɛ yɛ he ni wɔda yɛ lɛ náa wɔnɔ hewalɛ, ejaakɛ enɛ yɛ oshãra. Kɛ́ eba lɛ niyeli kɛ ninumɔ gbɛfaŋ lɛ, Kristofoi feɔ nɔ ni sa Yehowa hiɛ. Biblia lɛ kɛɔ wɔ akɛ: “Kɛ́ nii nyɛyeɔ jio, nii nyɛnuɔ jio, aloo nɔ kroko nyɛfeɔ jio, nyɛfea nibii fɛɛ kɛwoa Nyɔŋmɔ hiɛ nyam.” (1 Kor. 10:31) Naa sanebimɔi komɛi kɛ Biblia mli shishitoo mlai komɛi ni baanyɛ aye abua wɔ:

Ani minuɔ dãa koni ekafee tamɔ nɔ ni mibɛ mli ni ayaa? Yɛ 2 Mose 23:2 lɛ, Biblia lɛ kɛɔ akɛ: “Kaanyiɛ mɛi pii asɛɛ.” No mli lɛ, Yehowa miibɔ Israelbii lɛ kɔkɔ ni amɛkanyiɛ mɛi ni feɔ nibii ni esaaa ehiɛ lɛ asɛɛ. Kɔkɔbɔɔ nɛɛ he miihia wɔ hu ŋmɛnɛ. Kɛ́ wɔmiikpɛ wɔyiŋ yɛ dãanumɔ he lɛ, esaaa akɛ wɔhãa mɛi krokomɛi asusumɔi náa wɔnɔ hewalɛ, kɛjeee nakai lɛ, fiofio lɛ, wɔnyɛŋ wɔhi shi yɛ Yehowa shishitoo mlai lɛ anaa dɔŋŋ, ni wɔbaafite wɔkɛ lɛ teŋ.—Rom. 12:2.

Ani minuɔ dãa koni ana akɛ mida loo mishɛ nuu? Yɛ hei komɛi lɛ, mɛi fɔɔ dãanumɔ waa, ni amɛnuɔ lɛ babaoo hu, shi mɛi enaaa tɔmɔ yɛ he. (1 Pet. 4:3) Shi kadimɔ nɔ ni 1 Korintobii 16:13 lɛ woɔ wɔ hewalɛ ni wɔfee. Jɛmɛ kɛɔ akɛ: “Nyɛyaa nɔ ni nyɛshia kpe, nyɛdamɔa shi shiŋŋ yɛ hemɔkɛyeli lɛ mli, nyɛyaa nɔ nyɛfea nyɛnii tamɔ hii, nyɛhe awaa.” Ani dãa baanyɛ ahã mɔ ko he awa? Dabi. Kɛ́ mɔ ko nu dãa lɛ, no baanyɛ ahã ewa kɛhã lɛ akɛ ebaajwɛŋ nii ahe jogbaŋŋ ni ekpɛ yiŋ kpakpai. No hewɔ lɛ, kɛ́ mɔ ko nuɔ dãa babaoo lɛ, no etsɔɔɔ akɛ eda loo eshɛ nuu. Nɔ moŋ ni etsɔɔ ji, ehiɛ kãaa shi. Yesaia 28:7 lɛ wieɔ mɛi ni dãanumɔ hãa amɛduɔ gbɛ lɛ ahe. Ekɛɛ amɛdidãa ni amɛtɔ̃ɔ yɛ amɛyiŋkpɛi amli.

Kɛ́ wɔmiitao ana akɛ wɔda loo wɔshɛ hii lɛɛlɛŋ lɛ, esa akɛ wɔkɛ wɔhiɛ afɔ̃ Yehowa nɔ, ni agbɛnɛ hu, wɔshi kpe ni wɔdamɔ shi shiŋŋ yɛ hemɔkɛyeli lɛ mli. (Lala 18:32) Nɔ kome ni baaye abua wɔ ni wɔfee nakai ji, ni wɔbaahã wɔhiɛ ahi wɔhe nɔ, ni agbɛnɛ hu, wɔkpɛ yiŋ kpakpai ni fiteŋ wɔ kɛ Yehowa teŋ wekukpaa lɛ. Be ni Yesu ba shikpɔŋ lɛ nɔ lɛ, ehãaa nɔ ko nɔ ko afite ekɛ Yehowa teŋ wekukpaa. Efee ekãa, ni etswa efai shi akɛ ebaafee nɔ ni ja, ni enɛ hã mɛi pii ná ehe miishɛɛ.

Ani minuɔ dãa koni mikɛjie mijwɛŋmɔ kɛje minaagbai lɛ anɔ? Biblia ŋmalɔ ko kɛɛ akɛ ‘kɛ́ tsuiyelii hã efee gbedee lɛ, Yehowa shɛjeɔ emii ni ehãa emii shɛɔ ehe.’ (Lala 94:19) Kɛ́ sane ko hã ohao waa lɛ, okɛ ohiɛ afɔ̃ Yehowa nɔ kɛhã yelikɛbuamɔ, jeee dãa. Nɔ kome ni hi waa ni obaanyɛ ofee kɛtsɔɔ akɛ okɛ ohiɛ fɔ̃ɔ Yehowa nɔ ji, ni obaasɔle waa. Nɔ kroko ni mɛi pii efee ni eye ebua amɛ ji, ni amɛbaabi amɛnaanyo ko ni bɔɔ mɔdɛŋ yɛ asafo lɛ mli lɛ ŋaawoo. Yɛ anɔkwale mli lɛ, kɛ́ mɔ ko nuɔ dãa koni ekɛjie ejwɛŋmɔ kɛje enaagbai anɔ lɛ, ewaaa akɛ mɔ lɛ baayafee nɔ ko ni ejaaa. (Hos. 4:11) Daniel ni wɔtsĩ etã kɛtsɔ hiɛ lɛ wie akɛ: “No mli lɛ, mihao waa ni minu he akɛ mibɔɔɔ mɔdɛŋ. No hewɔ lɛ, mibɔi dãanumɔ koni mikɛjie mijwɛŋmɔ kɛje minaagbai lɛ anɔ. Shi no moŋ hã miná naagbai pii. Minanemɛi komɛi kɛ mi kpa bɔɔ, ni mibulɛ fɛɛ tã.” Naagbee lɛ, mɛni ye ebua Daniel? Ewie akɛ: “Miyɔse akɛ, Yehowa ji mɔ ni baanyɛ eye ebua mi, shi jeee dãa. Enɛ ni mibana lɛ ji nɔ ni wa mi ni minyɛ midamɔ minaagbai lɛ anaa ni mitsu amɛhe nii.” Yehowa efee klalo akɛ ebaaye ebua wɔ ni wɔdamɔ wɔnaagbai lɛ anaa kɛ́ etamɔ nɔ ni nɔ ko kwraa bɛ ni wɔbaanyɛ wɔfee yɛ amɛhe po.—Fip. 4:​6, 7; 1 Pet. 5:7.

Kɛ́ bei komɛi lɛ onuɔ dãa lɛ, obaanyɛ okɛ sanebimɔi ni nyiɛ sɛɛ nɛɛ apɛi omli okwɛ akɛ tsakemɔi komɛi yɛ ni esa akɛ ofee lo. Klɛŋklɛŋ nɔ lɛ ji: ‘Ani miwekunyo ko loo minaanyo ko ewie akɛ miinu dãa tsɔ?’ Kɛ́ nakai lɛ, eeenyɛ efee akɛ dãanumɔ miihe etsɔ osu, shi oyɔseee. Nɔ ni ji enyɔ lɛ, ‘Ani miinu dãa waa fe tsutsu?’ Eyɛ mli akɛ ekolɛ dãanumɔ ekako ohe moŋ, shi nɛkɛ efeɔ ni ekaa mɔ he. Sanebimɔ kroko hu ji, ‘Ani ewa kɛhã mi akɛ mahi shi gbii enyɔoo ko loo nɔ ni fe nakai ni minuuu dãa?’ Kɛ́ nakai lɛ, belɛ eeenyɛ efee akɛ dãanumɔ eka ohe. Ekolɛ, ehe baahia ni oyana datrɛfoi ni amɛye amɛbua bo.

Akɛni dãanumɔ baanyɛ ekɛ naagbai pii aba hewɔ lɛ, Kristofoi komɛi ekpɛ mli akɛ amɛnuŋ dãa kwraa. Mɛi komɛi hu enuuu ejaakɛ eŋɔɔɔ amɛnaa. Kɛ́ mɛi ni okɛbɔɔ lɛ ateŋ mɔ ko kpɛ eyiŋ nakai lɛ, kaawie oshi lɛ. Kɛ́ owieee oshiii lɛ lɛ, no baatsɔɔ akɛ osumɔɔ lɛ, ni ole akɛ eyɛ hegbɛ ni ekpɛɔ eyiŋ nakai.

Mɛi komɛi kɛ husu efɔ̃ dãa abɔ ni amɛbaanu lɛ he, ni ekolɛ bo hu oyɔse akɛ kɛ́ ofee nakai lɛ, ebaawa bo. Mɛi komɛi hu etsɔ hiɛ amɛkpɛ amɛyiŋ yɛ shii abɔ ni amɛbaanu dãa lɛ he. Ekolɛ amɛkpɛ amɛyiŋ akɛ amɛbaanu shi kome yɛ otsi lɛ mli loo bei komɛi kɛ́ amɛyaaye nii lɛ, amɛbaanu fioo. Mɛi komɛi hu ekpɛ amɛyiŋ akɛ jeee dãa fɛɛ dãa amɛbaanu. Ekolɛ amɛkpɛ amɛyiŋ akɛ, amɛbaanu wain loo biɛr fioo, shi amɛnuŋ dãa ni naa wa waa kɔkɔɔkɔ kɛ́ akɛfutu dãa ni yɔɔ dɔkɔdɔkɔ po. Kɛ́ mɔ ko tsɔ hiɛ ekpɛ eyiŋ yɛ dãanumɔ he lɛ, ewaaa akɛ ebaaye nɔ. Kɛ́ Kristofonyo ko ni le bɔ ni akɛ Biblia mli shishitoo mlai tsuɔ nii jogbaŋŋ lɛ kpɛ eyiŋ yɛ dãanumɔ he ni etswa efai shi akɛ ebaahi shi yɛ naa lɛ, esaaa akɛ eyeɔ etsui yɛ nɔ ni mɛi krokomɛi baawie lɛ he.

Dani wɔbaakpɛ wɔyiŋ yɛ dãanumɔ he lɛ, nɔ kroko ni esa akɛ wɔsusu he ji, bɔ ni mɛi baana lɛ amɛhã. Romabii 14:21 lɛ kɛɔ akɛ: “Ehi akɛ okaye loo ko, loo okanu wain, loo okafee nɔ kroko ni baatɔ̃tɔ onyɛmi nane.” Mɛni baaye ebua bo ni okɛ ŋaawoo nɛɛ atsu nii? Suɔmɔ. Kɛ́ ona akɛ kɛ́ onu dãa lɛ ebaagba mɔ ko naa lɛ, hã suɔmɔ atsirɛ bo ni okanu. Kɛ́ ofee nakai lɛ, no baatsɔɔ akɛ mɔ lɛ sane kã otsui nɔ, ni osusuɔ ehe fe bo diɛŋtsɛ ohe.—1 Kor. 10:24.

Kɛfata he lɛ, kɛ́ amralofoi lɛ ewo mlai yɛ dãanumɔ he lɛ, esa akɛ Kristofoi aye mlai nɛɛ anɔ. Ekolɛ amɛtsɔɔ akɛ ja mɔ ko eye afii pɔtɛɛ ko dani ebaanyɛ ebɔi dãanumɔ. Aloo ekolɛ amɛwo mla akɛ kɛ́ mɔ ko nu dãa lɛ, esaaa akɛ ehiɛɔ tsɔne loo ekɛ tsɔji komɛi tsuɔ nii.—Rom. 13:​1-5.

Yehowa edro wɔ nibii kpakpai pii. Nibii kpakpai nɛɛ ateŋ ekome ji, hegbɛ ni ehã wɔ akɛ wɔ diɛŋtsɛ wɔkpɛ wɔyiŋ yɛ bɔ ni wɔkɛ nibii ni edro wɔ lɛ baatsu nii wɔhã lɛ he. Enɛ hewɔ lɛ, wɔyɛ hegbɛ ni wɔkpɛɔ wɔyiŋ yɛ nɔ ni wɔbaaye kɛ nɔ ni wɔbaanu he. Nyɛhãa wɔkpɛa yiŋ kpakpai ni baahã wɔ-Tsɛ ni yɔɔ ŋwɛi lɛ aná miishɛɛ, ni no baatsɔɔ akɛ wɔhiɛ sɔɔ hegbɛ ni ehã wɔ akɛ wɔ diɛŋtsɛ wɔkpɛ wɔyiŋ yɛ nibii ahe lɛ.