Hɔgbaa, May 26
Nyɔŋmɔ lɛ, suɔmɔ ji lɛ.—1 Yoh. 4:8.
Biblia lɛ hãa wɔnaa akɛ, Yehowa sui lɛ ateŋ nɔ ni fe fɛɛ ji, suɔmɔ. Saji pii yɛ ni kulɛ ebaanyɛ ekɛfata he ehã wɔ, shi ele akɛ saji nɛɛ yeŋ amɛbuaŋ wɔ yɛ esɔɔmɔ lɛ mli, ni amɛbaasu wɔtsui kɛkɛ. Enɛ hewɔ lɛ ekɛfataaa he. Enɛ hãa wɔnaa akɛ, esumɔɔ wɔ. (Yoh. 21:25) Nɔ kroko ni yɔɔ Biblia lɛ he ni hãa wɔnaa akɛ Yehowa sumɔɔ wɔ ji, gbɛ ni etsɔɔ nɔ ehãa wɔleɔ nɔ ni esumɔɔ ni wɔfee kɛ nɔ ni esumɔɔɔ ni wɔfeɔ lɛ. Nɔ najiaŋ ni ebaahã wɔ mlai lalaala yɛ nɔ fɛɛ nɔ he lɛ, eyeɔ ebuaa wɔ koni wɔ diɛŋtsɛ wɔsusu saji ahe ni wɔkpɛ yiŋ ni ja, ni enɛ hãa wɔnaa akɛ ebuɔ wɔ. Kɛ́ wɔkwɛ Biblia lɛ mli lɛ, wɔnaa mɛi ashihilɛ he saji, gbalɛi, kɛ ŋaawoi kpakpai. Yehowa tsɔɔ enɛɛmɛi anɔ eyeɔ ebuaa wɔ koni wɔjɛ wɔtsuiŋ wɔsumɔ lɛ ni wɔbo lɛ toi. Biblia lɛ hãa wɔnaa akɛ, Yehowa susuɔ wɔhe waa. Mɛni tsɔɔ nakai? Saji pii yɛ Biblia lɛ mli ni hãa wɔnaa bɔ ni mɛi ni awie amɛhe yɛ mli lɛ nu he amɛhã. Enɛ hewɔ lɛ, kɛ́ wɔkane amɛhe saji lɛ etaa wɔtsuiŋ, ejaakɛ wɔnaa akɛ amɛji ‘gbɔmɛi ni yɔɔ henumɔi tamɔ wɔ nɔŋŋ.’ (Yak. 5:17) Nɔ ni fe fɛɛ lɛ, kɛ́ wɔna bɔ ni Yehowa kɛ mɛi ni yɔɔ henumɔi tamɔ wɔ nɔŋŋ lɛ ye ehã lɛ, ehãa wɔnaa faŋŋ akɛ, “Yehowa musuŋ tsɔɔ lɛ waa, ni enaa mɔbɔ hu.”—Yak. 5:11. w23.02 5-6 kk. 13-15
Ju, May 27
Nyɛhiɛ ahia nyɛhe nɔ be fɛɛ be, nyɛkwɛa nyɛhe nɔ jogbaŋŋ!—1 Pet. 5:8.
Kpojiemɔ 1:1 lɛ kɛɔ akɛ: “Saji ni Yesu Kristo jie lɛ kpo koni ekɛtsɔɔ enyɔji lɛ nibii ni sa akɛ aba mli oya nɔŋŋ.” Enɛ hewɔ wɔsumɔɔ waa ni wɔkwɛ nibii ni yaa nɔ yɛ je lɛ mli ŋmɛnɛ lɛ kɛ bɔ ni ekolɛ amɛhãa Biblia mli gbalɛi baa mli amɛhãa lɛ. Shi ekolɛ, wɔbaasumɔ ni wɔkɛ mɛi krokomɛi agba nibii nɛɛ ahe sane. Kɛ́ wɔkɛ wɔnyɛmimɛi Kristofoi lɛ loo mɛi krokomɛi miigba Biblia mli gbalɛi ahe sane lɛ, esa akɛ wɔkwɛ jogbaŋŋ ni wɔkaka wɔyiŋ wɔwie nɔ ko ni asafo lɛ ewieko. Mɛni hewɔ? Ejaakɛ wɔsumɔŋ ni wɔwie nɔ ko ni kɛ mligbalamɔ baaba asafo lɛ mli. Akɛ nɔkwɛmɔnɔ lɛ, ŋɔɔ lɛ akɛ wɔnu ni je lɛŋ nɔyelɔi miitsɔɔ bɔ ni amɛbaafee amɛhã ta ko ni awuɔ lɛ sɛɛ afo koni toiŋjɔlɛ aba ni mɛi ahi shi shweshweeshwe. Yɛ nɔ najiaŋ ni wɔbaamu sane naa oya nɔŋŋ akɛ eji gbalɛ ni yɔɔ 1 Tesalonikabii 5:3 lɛ mlibaa lɛ, esa akɛ wɔkwɛ nɔ ni Yehowa asafo lɛ ewie yɛ sane nɛɛ ni eba lɛ he. Kɛ́ wɔhã saji ni wɔkɛ mɛi gbaa lɛ damɔ nibii ni asafo lɛ ehã wɔle lɛ anɔ lɛ, ebaahã asafo lɛ afee ekome ni ‘wɔsusumɔ baafee ekome.’—1 Kor. 1:10; 4:6. w23.02 16 kk. 4-5
Jufɔ, May 28
Ta okpɔŋɔ lɛ ni ofã anɔkwale kɛ jalɛ he, ni owu ohã heshibalɔi, ni oninejurɔ baatsu nibii ni yɔɔ naakpɛɛ.—Lala 45:4.
Mɛni hewɔ osumɔɔ Yesu Kristo lɛ? Yesu sumɔɔ anɔkwale lɛ, ebaa ehe shi, ni esumɔɔ ni efee nɔ ni ja, ni ewoɔ mɛi hewalɛ ni amɛjie sui nɛɛ akpo. No hewɔ lɛ, kɛ́ osumɔɔ anɔkwale lɛ, ni osumɔɔ ni ofee nɔ ni ja lɛ, belɛ ebɛ naakpɛɛ mɔ akɛ osumɔɔ Yesu Kristo. Kɛ́ osusu Yesu shihilɛ he lɛ, ani onaaa akɛ ekɛ ekãa fã anɔkwale lɛ he ni efee nɔ ni ja? (Yoh. 18:37) Shi mɛɛ gbɛ nɔ Yesu woɔ wɔ hewalɛ ni wɔba wɔhe shi? Bɔ ni Yesu baa ehe shi lɛ woɔ wɔ hewalɛ ni wɔ hu wɔba wɔhe shi. Akɛ nɔkwɛmɔnɔ lɛ, kɛ́ efee nɔ ko lɛ, eŋɔɔɔ anunyam lɛ ehãaa ehe, moŋ lɛ ekɛ fɛɛ hãa e-Tsɛ lɛ. (Mar. 10:17, 18; Yoh. 5:19) Kɛ́ okwɛ bɔ ni Yesu baa ehe shi lɛ, te ehãa onuɔ he ohãa tɛŋŋ? Ani etsirɛɛɛ bo ni osumɔ Nyɔŋmɔ Bi lɛ ni onyiɛ esɛɛ? Ŋwanejee ko bɛ he akɛ, nakai pɛpɛɛpɛ etsirɛɔ bo ni ofee. Shi mɛni hewɔ Yesu baa ehe shi lɛ? Nɔ hewɔ lɛ ji akɛ, e-Tsɛ lɛ baa ehe shi. Yesu sumɔɔ e-Tsɛ lɛ, ni eesumɔ ni ekase lɛ. (Lala 18:35; Heb. 1:3) Kɛ́ okwɛ bɔ ni Yesu kaseɔ Yehowa ni ejieɔ esui lɛ akpo pɛpɛɛpɛ lɛ, ani no hãaa osumɔ Yesu? w23.03 3-4 kk. 6-7