2 Mose
29 “Nɔ ni ofee kɛfee amɛ krɔŋkrɔŋ koni amɛsɔmɔ akɛ osɔfoi amɛhã mi nɛ: Ŋɔɔ tsinanuu* kome, gwantɛŋhii enyɔ ni kpa ko bɛ amɛhe,+ 2 blodo ni ashikishaŋ-sha* bɛ mli, blodoi ni ashikishaŋ-sha bɛ mli ni abɔlɔ lɛ tamɔ gai ni akɛ mu efutu, kɛ akpɔɔnɔi* ni ashikishaŋ-sha bɛ mli ni akɛ mu ekpa he.+ Okɛ wiiti ashikishaŋ kpakpa afee 3 ni okɛwo kɛntɛŋ mli, ní ehi kɛntɛŋ lɛ mli ni okɛbahã,+ ní okɛ tsinanuu lɛ kɛ gwantɛŋhii enyɔ lɛ afata he.
4 “Okɛ Aaron kɛ ebihii lɛ aba kpee buu lɛ shinaa lɛ naa,+ ní okɛ nu afɔflɔ amɛhe.+ 5 No sɛɛ lɛ, kɔlɔmɔ atadei lɛ,+ ni ji atade kakadaŋŋ lɛ, efɔd lɛ shishi atade ni nine bɛ he lɛ, efɔd lɛ, kɛ tsitsinɔnii lɛ, ní okɛwo Aaron, ni okɛ efɔd lɛ mlifiinɔ ni alo lɛ afi ehɛ ni emɔ lɛ jogbaŋŋ.+ 6 Okɛ yitsofiinɔ lɛ afi eyitso, ní okɛ henɔjɔɔmɔ okadi krɔŋkrɔŋ* lɛ ata yitsofiinɔ lɛ hiɛ;+ 7 ní owó mufɔɔ mu+ lɛ, ní ofɔse oshwie eyiteŋ ni okɛfɔ lɛ mu.+
8 “No sɛɛ lɛ, hã ebihii lɛ aba ni okɛ atadei kakadaji lɛ awo amɛ,+ 9 ní okɛ mliteŋfiinii lɛ afimɔ Aaron kɛ ebihii lɛ amli, ní okɛ yitsofiinii* lɛ afimɔ amɛyitsei; ni osɔfoyeli lɛ baatsɔ amɛnɔ, ni enɛ atsɔ mla ni kã shi daa.+ Nɛkɛ ji bɔ ni ohole Aaron kɛ ebihii lɛ osɔfoi* koni amɛsɔmɔ akɛ osɔfoi.+
10 “Agbɛnɛ, okɛ tsinanuu lɛ aba kpee buu lɛ hiɛ, ní Aaron kɛ ebihii lɛ kɛ amɛniji ashwie tsinanuu lɛ yiteŋ.+ 11 Gbee tsinanuu lɛ yɛ Yehowa hiɛ, yɛ kpee buu lɛ shinaa lɛ naa.+ 12 Okɛ owao atsɔ tsinanuu lɛ lá lɛ eko ni okɛkpa afɔleshaa latɛ lɛ he akolontoi lɛ ahe,+ ni ofɔse lá ni eshwɛ lɛ fɛɛ oshwie afɔleshaa latɛ lɛ shishi.+ 13 No sɛɛ lɛ, ŋɔɔ fɔ+ ni yɔɔ mlinii lɛ ahe lɛ, fɔ ni yɔɔ mlɛbo lɛ he lɛ, kɛ sabai enyɔ lɛ kɛ fɔ ni yɔɔ amɛhe lɛ, ni oshã fɛɛ koni amɛlasu lɛ ate shi yɛ afɔleshaa latɛ lɛ nɔ.+ 14 Shi tsinanuu lɛ loo lɛ, ehewolo lɛ, kɛ efei lɛ, okɛ la ashã fɛɛ yɛ nsara lɛ sɛɛ. Esha afɔle ni.
15 “No sɛɛ lɛ, ŋɔɔ gwantɛŋhii lɛ ekome, ní Aaron kɛ ebihii lɛ kɛ amɛniji ashwie eyiteŋ.+ 16 Gbee gwantɛŋnuu lɛ, ni oŋɔ elá lɛ ni okɛshwã afɔleshaa latɛ lɛ koji lɛ fɛɛ.+ 17 Folɔmɔ gwantɛŋnuu lɛ mli kukuji, ni ofɔ emlinii+ kɛ enaji lɛ ahe, ni oto kukuji lɛ kɛ eyitso lɛ fɛɛ. 18 Shãa gwantɛŋnuu muu lɛ fɛɛ, ní elasu lɛ ate shi yɛ afɔleshaa latɛ lɛ nɔ. Eji shãa afɔle kɛhã Yehowa, nɔ ni jeɔ ŋma jogbaŋŋ.*+ Eji afɔle ni akɛ la shãa ahãa Yehowa.
19 “No sɛɛ lɛ, ŋɔɔ gwantɛŋnuu kroko lɛ, ní Aaron kɛ ebihii lɛ kɛ amɛniji ashwie eyiteŋ.+ 20 Gbee gwantɛŋnuu lɛ, ni oŋɔ elá lɛ eko ni okɛsa Aaron ninejurɔ toi naa, kɛ ebihii lɛ aninejurɔ toii anaa, kɛ amɛninejurɔ gɔntii anaa, kɛ amɛnanejurɔ gɔntii anaa, ni okɛ lá lɛ ashwã afɔleshaa latɛ lɛ koji lɛ fɛɛ. 21 No sɛɛ lɛ, ŋɔɔ lá ni yɔɔ afɔleshaa latɛ lɛ nɔ lɛ eko kɛ mu ni akɛfɔɔ mɔ mu lɛ eko,+ ni okɛshwã Aaron kɛ etadei lɛ kɛ ebihii lɛ kɛ amɛtadei lɛ anɔ, koni lɛ kɛ etadei lɛ kɛ ebihii lɛ kɛ amɛtadei lɛ afee krɔŋkrɔŋ.+
22 “No sɛɛ lɛ, ŋɔɔ gwantɛŋnuu lɛ fɔ lɛ, elei agbo ni ewo fɔ lɛ, kɛ fɔ ni yɔɔ emlinii lɛ ahe lɛ, fɔ ni yɔɔ emlɛbo lɛ he lɛ, kɛ esabai enyɔ lɛ kɛ fɔ ni yɔɔ amɛhe lɛ,+ kɛ eninejurɔ nane lɛ, ejaakɛ osɔfowomɔ gwantɛŋnuu ni.+ 23 Agbɛnɛ hu, ŋɔɔ blodo kokloo kome, kɛ blodo kome ni awo mli mu ni abɔ lɛ tamɔ ga, kɛ akpɔɔnɔɔ* kome kɛjɛ kɛntɛŋ ni blodoi ni ashikishaŋ-sha* bɛ mli yɔɔ mli ni ma Yehowa hiɛ lɛ mli. 24 Okɛ fɛɛ awo Aaron dɛŋ kɛ ebihii lɛ hu adɛŋ, ni ofɔ̃ kɛya kɛba akɛ fɔ̃ɔ afɔle yɛ Yehowa hiɛ. 25 No sɛɛ lɛ, hemɔ yɛ amɛdɛŋ ni oshã yɛ afɔleshaa latɛ lɛ nɔ, yɛ shãa afɔle lɛ nɔ, ni eje ŋma jogbaŋŋ* yɛ Yehowa hiɛ. Eji afɔle ni akɛ la shãa ahãa Yehowa.
26 “No sɛɛ lɛ, ŋɔɔ Aaron osɔfowomɔ gwantɛŋnuu lɛ tsitsi,+ ní ofɔ̃ kɛya kɛba akɛ fɔ̃ɔ afɔle yɛ Yehowa hiɛ, ni ebaatsɔ ogbɛfaŋnɔ. 27 Tsitsi lɛ ni akɛhã akɛ fɔ̃ɔ afɔle lɛ, kɛ nane lɛ ni akɛhã akɛ gbɛfaŋnɔ krɛdɛɛ* lɛ, ní afolɔ kɛjɛ Aaron kɛ ebihii lɛ asɔfowomɔ gwantɛŋnuu lɛ he,+ ní afɔ̃ kɛtee kɛba lɛ, feemɔ fɛɛ krɔŋkrɔŋ. 28 Enɛ atsɔ Aaron kɛ ebihii lɛ anɔ akɛ mla* ni kã shi daa ní Israelbii lɛ baatsu he nii, ejaakɛ eji gbɛfaŋnɔ krɛdɛɛ,* ni ebaatsɔ gbɛfaŋnɔ krɛdɛɛ ni Israelbii lɛ kɛbaahã.+ Eji gbɛfaŋnɔ krɛdɛɛ ní amɛbaajɛ amɛnaanyobɔɔ afɔlei lɛ amli amɛkɛhã Yehowa.+
29 “Aaron atadei krɔŋkrɔŋi lɛ,+ ebihii ni baabaye esɛɛ lɛ baawo+ kɛ́ afɔ amɛ mu ni ahole amɛ osɔfoi. 30 Ebihii lɛ ateŋ mɔ ni baaye esɛɛ akɛ osɔfo, ni ebaaba kpee buu lɛ mli koni ebasɔmɔ yɛ he krɔŋkrɔŋ lɛ baawo atadei lɛ gbii kpawo.+
31 “Ŋɔɔ osɔfowomɔ gwantɛŋnuu lɛ, ni ohoo eloo lɛ yɛ he ko ni yɔɔ krɔŋkrɔŋ.+ 32 Aaron kɛ ebihii lɛ baaye+ gwantɛŋnuu lɛ loo lɛ kɛ blodo ni yɔɔ kɛntɛŋ lɛ mli lɛ yɛ kpee buu lɛ shinaa lɛ naa. 33 Amɛye kpatamɔ nibii ni akɛhole amɛ osɔfoi* ní akɛfee amɛ krɔŋkrɔŋ lɛ. Shi mɔkpɔŋ ko* akaye eko, ejaakɛ krɔŋkrɔŋ nii ni.+ 34 Kɛ́ osɔfowomɔ afɔle loo lɛ kɛ blodo lɛ eko shwɛ kɛyashi enɔ leebi lɛ, no lɛ, okɛ la ashã nɔ ni shwɛ lɛ.+ Akaye, ejaakɛ krɔŋkrɔŋ nii ni.
35 “Nɛkɛ ofee Aaron kɛ ebihii lɛ, yɛ nibii ni mifã bo lɛ fɛɛ anaa. Okɛ gbii kpawo baahole amɛ osɔfoi.*+ 36 Gbi fɛɛ gbi lɛ, okɛ tsinanuu kome ahã akɛ esha afɔle koni akɛkpãtã, ni otsɔ kpatamɔ ni obaakpãtã lɛ nɔ otsuu afɔleshaa latɛ lɛ he, ní ofɔ lɛ mu kɛfee lɛ krɔŋkrɔŋ.+ 37 Okɛ gbii kpawo akpãtã ohã afɔleshaa latɛ lɛ, ní ofee lɛ krɔŋkrɔŋ koni etsɔ afɔleshaa latɛ ni yɔɔ krɔŋkrɔŋ fe fɛɛ.+ Mɔ fɛɛ mɔ ni baata afɔleshaa latɛ lɛ he lɛ, esa akɛ efee krɔŋkrɔŋ.*
38 “Nibii ni okɛbaahã yɛ afɔleshaa latɛ lɛ nɔ nɛ: gbi fɛɛ gbi lɛ, gwantɛŋhii enyɔ ni eko fɛɛ eko eye afi, ni ofee nakai daa.+ 39 Okɛ gwantɛŋhii lɛ ekome ahã leebi, ni okɛ ekroko lɛ hu ahã yɛ hulushinyɔɔ mli.*+ 40 Okɛ ashikishaŋ kpakpa efa susumɔnɔ* mlijai nyɔŋma mli ekome ni akɛ oliv mu hin* mlijai ejwɛ mli ekome efutu, kɛ wain hin mlijai ejwɛ mli ekome ní akɛbaahã akɛ dãa afɔle lɛ afata klɛŋklɛŋ gwantɛŋnuu* lɛ he. 41 Okɛ gwantɛŋnuu* ni ji enyɔ lɛ baahã yɛ hulushinyɔɔ mli,* ni okɛ ŋmaa* afɔle kɛ dãa afɔlei ni tamɔ leebi nɔ lɛ nɔŋŋ afata he. Okɛbaahã akɛ nɔ ni jeɔ ŋma jogbaŋŋ,* afɔle ni akɛ la shãa ahãa Yehowa. 42 Etsɔ shãa afɔle ni abaashã daa yɛ nyɛyinɔi fɛɛ amli yɛ kpee buu lɛ shinaa lɛ naa yɛ Yehowa hiɛ, jɛmɛ majie mihe kpo matsɔɔ nyɛ ní mikɛ bo awie yɛ.+
43 “Majie mihe kpo yɛ jɛmɛ matsɔɔ Israelbii lɛ, ni minunyam lɛ baahã jɛmɛ afee krɔŋkrɔŋ.+ 44 Mafee kpee buu lɛ kɛ afɔleshaa latɛ lɛ krɔŋkrɔŋ, ni mafee Aaron kɛ ebihii lɛ hu krɔŋkrɔŋ,+ koni amɛsɔmɔ akɛ osɔfoi amɛhã mi. 45 Mahi* Israelbii lɛ ateŋ, ni matsɔ amɛ-Nyɔŋmɔ.+ 46 Ni bɔ fɛɛ bɔ ni fee lɛ, amɛbaaná amɛle akɛ miji Yehowa, amɛ-Nyɔŋmɔ lɛ, mɔ ni jie amɛ kɛje Ejipt shikpɔŋ lɛ nɔ koni mahi amɛteŋ lɛ.+ Miji Yehowa, amɛ-Nyɔŋmɔ lɛ.