Sɔlemɔ

1 Mɛni Hewɔ Ehe Hiaa?

SƆLEMƆ. Saji fioo komɛi yɛ Biblia lɛ mli ni teɔ mɛi amiishɛɛ shi waa ni amɛsumɔɔ ni amɛle. Susumɔ saji kpawo komɛi ni mɛi fɔɔ bimɔ yɛ sɔlemɔ he lɛ he okwɛ; no sɛɛ lɛ, ha wɔpɛi hetoi ni Biblia lɛ kɛhaa yɛ saji nɛɛ ahe lɛ mli wɔkwɛ. Ato saji nɛɛ ahe gbɛjianɔ koni eye ebua bo ni osɔle—obɔi sɔlemɔ loo ni eha Nyɔŋmɔ abo osɔlemɔi atoi.

YƐ MAJI kɛ jamɔi fɛɛ ni yɔɔ je lɛŋ lɛ amli lɛ, mɛi sɔleɔ. Amɛsɔleɔ beni amɛ pɛ amɛyɔɔ he ko; amɛsɔleɔ beni amɛbua amɛhe naa kutuu. Amɛsɔleɔ yɛ sɔlemɔtsui, kpeehei, muslimbii ajamɔhei, kɛ gbatsui amli. Ekolɛ amɛkɛ saa, ashinaoi, okadii, woji ni aŋmala sɔlemɔi yɛ mli, taoi ni aŋmala sɔlemɔi yɛ nɔ ni akɛtsotsoroɔ shi, loo nibii krokomɛi ni sɔleɔ.

Sɔlemɔ ji nɔ kome ni haa esoroɔ adesai yɛ nibii krokomɛi ni wala yɔɔ amɛmli yɛ shikpɔŋ lɛ nɔ lɛ ahe. Yɛ anɔkwale mli lɛ, wɔtamɔ kooloi yɛ gbɛi srɔtoi anɔ. Niyenii, kɔɔyɔɔ, kɛ nu he hiaa wɔ tamɔ amɛ nɔŋŋ. Wɔfɔɔ, wɔhiɔ shi, ni wɔgboiɔ tamɔ amɛ nɔŋŋ. (Jajelɔ 3:19) Shi adesai pɛ sɔleɔ. Mɛni hewɔ?

Ekolɛ hetoo lɛ kɛkɛ ji akɛ sɔlemɔ he miihia wɔ. Mɛi babaoo naa sɔlemɔ akɛ gbɛ ni mɛi tsɔɔ nɔ amɛkɛ nɔ ko ni amɛbuɔ lɛ akɛ eyɛ krɔŋkrɔŋ ni hiɔ shi kɛyaa naanɔ lɛ sharaa. Biblia lɛ haa wɔleɔ akɛ akɛ shwelɛ kɛha nibii ni tamɔ nɛkɛ lɛ bɔ wɔ. (Jajelɔ 3:11) Be ko lɛ, Yesu Kristo kɛɛ akɛ: “Ajɔɔ mumɔ lɛŋ ohiafoi [loo “mɛi ni hiɛ yɔɔ amɛmumɔŋ hiamɔ nii anɔ,” NW] lɛ.”—Mateo 5:3.

Ani jeee bɔ ni ‘mumɔŋ nibii’ ahe hiaa mɛi lɛ hewɔ ni mɛi emamɔ sɔlemɔtsui wuji ni amɛfee amagai srɔtoi, ni agbɛnɛ hu amɛkɛ ŋmɛlɛtswai babaoo sɔleɔ lɛ? Yɛ anɔkwale mli lɛ, mɛi komɛi kɛ amɛhe fɔ̃ɔ amɛ diɛŋtsɛ amɛhe nɔ loo adesai krokomɛi anɔ kɛha amɛmumɔŋ hiamɔ nii. Shi ani onaaa akɛ adesai bɛ nyɛmɔ ko kwraa ni amɛkɛaaye abua yɛ enɛ gbɛfaŋ? Wɔbɛ hewalɛ, wɔhiɔ shi be kukuoo ko, ni agbɛnɛ hu, wɔnyɛɛɛ wɔna nii kɛya shɔŋŋ. Ja mɔ ko ni le nii kwraa fe wɔ, eyɛ hewalɛ waa, ni ehiɔ shi be kakadaŋŋ fe wɔ lɛ pɛ baanyɛ aha wɔ nɔ ni he hiaa wɔ lɛ. Ni mɛni ji mumɔŋ hiamɔ nii nɛɛ ni tsirɛɔ wɔ koni wɔsɔle lɛ?

Susumɔ enɛ he okwɛ: Ani otao gbɛtsɔɔmɔ, nilee, loo sanebimɔi komɛi ni adesai ajwɛŋmɔ shɛɛɛ he lɛ ahetoo pɛŋ? Ani onu he pɛŋ akɛ ehe miihia ni mɔ ko ashɛje omii beni nɔ ko ni osumɔɔ waa eŋmɛɛ bo, loo ani onu he pɛŋ akɛ gbɛtsɔɔmɔ he miihia bo beni ebi ni okpɛ oyiŋ yɛ shihilɛ ko ni mli wa he, loo ani onu he pɛŋ akɛ eshaifaa he miihia bo beni ohenilee miiyi bo yɛ efɔŋ ko ni ofee lɛ he?

Biblia lɛ tsɔɔ akɛ enɛɛmɛi fɛɛ ji nibii komɛi ahewɔ ni esa akɛ asɔle. Biblia lɛ ji wolo ko ni abaanyɛ amu afɔ̃ nɔ fe fɛɛ ni wieɔ saji nɛɛ ahe, ni aŋmala hii kɛ yei anɔkwafoi babaoo asɔlemɔi yɛ mli. Amɛsɔle kɛbi miishɛjemɔ, gbɛtsɔɔmɔ, eshaifaa, kɛ saji ni adesai ajwɛŋmɔ shɛɛɛ he lɛ ahetoo.—Lala 23:3; 71:21; Daniel 9:4, 5, 19; Habakuk 1:3.

Eyɛ mli akɛ esoro sɔlemɔi nɛɛ ateŋ eko fɛɛ eko moŋ, shi nɔ ko yɛ mli ni tsakeee. Mɛi ni sɔleɔ lɛ fɛɛ le nɔ ko ni esa akɛ amɛfee koni abo amɛsɔlemɔi lɛ atoi, nɔ ko ni mɛi pii ni yɔɔ je lɛŋ ŋmɛnɛ lɛ efɔɔɔ feemɔ loo amɛkuɔ amɛhiɛ amɛshwieɔ nɔ. Amɛle mɔ ni esa akɛ amɛsɔle amɛha.

Sɔlemɔ

2 Namɔ Esa akɛ Wɔsɔle Wɔha?

ANI sɔlemɔi fɛɛ yaa he kome, ekɔɔɔ he eko mɔ ni asɔleɔ ahaa? Nakai ji bɔ ni mɛi pii susuɔ yɛ je lɛŋ ŋmɛnɛ. Mɛi ni kpɛlɛɔ futufutu jamɔ nɔ ni amɛsusuɔ akɛ jamɔi fɛɛ ja, ekɔɔɔ he eko amɛhemɔkɛyelii lɛ, enaaa naagba ko yɛ susumɔ nɛɛ he. Shi ani ebaanyɛ efee akɛ susumɔ nɛɛ ejaaa?

Yɛ anɔkwale mli lɛ, Biblia lɛ tsɔɔ akɛ mɛi pii asɔlemɔi eyaaa Nyɔŋmɔ ŋɔɔ. Yɛ blema beaŋ beni aŋmaa Biblia lɛ, no mli lɛ mɛi pii sɔleɔ amɛhaa amagai. Kɛlɛ, Nyɔŋmɔ bɔ kɔkɔ eshi nifeemɔ nɛɛ shii abɔ. Akɛ nɔkwɛmɔnɔ lɛ, Lala 115:4-6 lɛ wieɔ amagai ahe akɛ: “Amɛyɛ toii, shi amɛnuuu nii.” Sane lɛ yɛ faŋŋ. Mɛni hewɔ esa akɛ osɔle oha nyɔŋmɔ ko ni nyɛŋ anu nɔ ni owieɔ lɛ?

Sane ko ni yɔɔ Biblia lɛ mli lɛ tsɔɔ enɛ mli jogbaŋŋ. Gbalɔ anɔkwafo Elia kɛɛ Baal gbalɔi lɛ ni amɛsɔle amɛha amɛnyɔŋmɔ lɛ, koni no sɛɛ lɛ, lɛ Elia lɛ hu asɔle eha e-Nyɔŋmɔ lɛ. Elia kɛɛ akɛ, mɔ ni ji anɔkwa Nyɔŋmɔ lɛ baaha hetoo, shi apasa nyɔŋmɔ lɛ nyɛŋ aha hetoo. Baal gbalɔi lɛ kpɛlɛ nɔ, ni amɛkɛ be kakadaŋŋ sɔle waa kɛ bolɔmɔi po—shi nɔ ko jɛɛɛ mli kɛbaaa! Amaniɛbɔɔ lɛ kɛɔ akɛ: “Nɔ herelɔ ko bɛ, ni toiboo hu bɛ.” (1 Maŋtsɛmɛi 18:29) Shi te Elia nɔ lɛ naa yakpa ha tɛŋŋ?

Beni Elia sɔle lɛ, e-Nyɔŋmɔ lɛ ha hetoo amrɔ nɔŋŋ, ni eha la jɛ ŋwɛi bashã afɔle ko ni Elia eto he gbɛjianɔ lɛ. Mɛni kɛ srɔtofeemɔ nɛɛ ba? Wɔnaa oti ko ni he hiaa waa yɛ Elia sɔlemɔ ni aŋma yɛ 1 Maŋtsɛmɛi 18:36, 37 lɛ mli. Sɔlemɔ nɛɛ yɛ kuku—akɛ wiemɔi aaafee 30 pɛ ni ŋma yɛ Hebri wiemɔ ni akɛŋma Biblia lɛ mli. Kɛlɛ lɛ, yɛ sɔlemɔ kuku nɛɛ mli lɛ, Elia tsi Nyɔŋmɔ gbɛi ni ji Yehowa lɛ tã shii etɛ sɔŋŋ.

Baal shishi ji “nɔtsɛ” loo “nuŋtsɔ,” ni eji Kanaanbii lɛ anyɔŋmɔ, ni ayɛ nyɔŋmɔ nɛɛ henɔi srɔtoisrɔtoi yɛ Kanaanbii lɛ ashikpɔŋ lɛ nɔ he fɛɛ he. Shi esoro gbɛi Yehowa lɛ kwraa, lɛ pɛ ji mɔ ni atsɛɔ lɛ nakai yɛ jeŋ muu lɛ fɛɛ. Nyɔŋmɔ nɛɛ kɛɛ ewebii lɛ akɛ: “Mi ji Yehowa, migbɛi ji no, ni mikɛ minunyam lɛ haŋ mɔ kroko, ni mikɛ miyijiemɔ lɛ hu haŋ amagai!”—Yesaia 42:8.

Ani Elia sɔlemɔ lɛ kɛ Baal gbalɔi lɛ asɔlemɔi lɛ fɛɛ tee mɔ kome ŋɔɔ? Baal jamɔ lɛ haa mɛi kɛ amɛhe woɔ ajwamaŋbɔɔ kusumii amli ni amɛkɛ gbɔmɛi po shãa afɔle. Nɔ ni tamɔɔɔ nakai lɛ, Yehowa fã ewebii ni ji Israelbii lɛ ni amɛja lɛ yɛ gbɛ ni bulɛ yɔɔ mli nɔ, ni no ha amɛye amɛhe kɛjɛ nifeemɔi gbohii nɛɛ ahe. Bo lɛ susumɔ he okwɛ: Kɛ́ oŋma wolo ko omaje onaanyo pɔtɛɛ ko ni obuɔ lɛ waa lɛ, ani ebaaŋɔɔ onaa akɛ akɛ wolo nɛɛ baaha mɔ ko ni bɛ jeŋba ni jeee lɛ egbɛi yɔɔ wolo lɛ sɛɛ? Dabi kwraa!

Kɛ́ osɔle oha Yehowa lɛ, belɛ oosɔle ooha Bɔlɔ lɛ, ni ji adesai fɛɛ a-Tsɛ lɛ.a Gbalɔ Yesaia kɛɛ yɛ sɔlemɔ mli akɛ: “Bo, Yehowa, bo nɔŋŋ ji wɔtsɛ.” (Yesaia 63:16) Belɛ, mɔ nɛɛ nɔŋŋ ni Yesu Kristo wie ehe beni ekɛɛ ekaselɔi lɛ akɛ: “Miiya ŋwɛi yɛ mitsɛ kɛ nyɛ hu nyɛtsɛ kɛ mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.” (Yohane 20:17) Yehowa ji Yesu Tsɛ. Lɛ ji mɔ ni Yesu sɔle eha, ni lɛ nɔŋŋ ji mɔ ni Yesu tsɔɔ esɛɛnyiɛlɔi lɛ akɛ amɛsɔle amɛha.—Mateo 6:9.

Ani Biblia lɛ fãa wɔ akɛ wɔsɔle wɔha Yesu, Maria, hetselɔi, loo ŋwɛi bɔfoi? Dabi—Yehowa pɛ esa akɛ asɔle aha. Susumɔ yiŋtoi enyɔ ahewɔ ni esa akɛ wɔfee nakai lɛ he okwɛ. Klɛŋklɛŋ lɛ, sɔlemɔ ji jamɔ, ni Biblia lɛ kɛɔ akɛ esa akɛ aja Yehowa kome too pɛ. (2 Mose 20:5) Nɔ ni ji enyɔ lɛ, Biblia lɛ tsɔɔ akɛ Yehowa pɛ ji ‘sɔlemɔ Toibolɔ.’ (Lala 65:3) Eyɛ mli akɛ Yehowa kɛ nitsumɔi woɔ mɛi adɛŋ faa moŋ, shi ekɛwoko mɔ ko dɛŋ akɛ ebo sɔlemɔi atoi eha lɛ. Lɛ ji Nyɔŋmɔ ni ewo shi akɛ ebaabo wɔsɔlemɔi lɛ atoi lɛ.

No hewɔ lɛ, kɛ́ ootao ni Nyɔŋmɔ abo osɔlemɔi atoi lɛ, no lɛ ha Ŋmalɛ mli wiemɔi nɛɛ ahi ojwɛŋmɔŋ: “Aaaba mli akɛ mɔ fɛɛ mɔ ni aaabo atsɛ́ Nuŋtsɔ [Yehowa] gbɛi lɛ, aaahere eyiwala.” (Bɔfoi lɛ Asaji 2:21) Shi ani Yehowa boɔ sɔlemɔi fɛɛ atoi kɛkɛ? Aloo nɔ kroko yɛ ni esa akɛ wɔle kɛji wɔmiisumɔ ni Yehowa abo wɔsɔlemɔi atoi?

[Shishigbɛ niŋmaa]

[Mfoniri ni yɔɔ baafa 5]

Elia sɔlemɔ lɛ kɛ Baal gbalɔi lɛ asɔlemɔi lɛ ha ana faŋŋ akɛ sɔlemɔi fɛɛ eyaaa mɔ kome ŋɔɔ

Sɔlemɔ

3 Mɛɛ Gbɛ nɔ Esa akɛ Wɔtsɔ Wɔsɔle?

KƐ́ AAWIE sɔlemɔ he lɛ, jamɔi babaoo gbalaa jwɛŋmɔ kɛyaa bɔ ni esa akɛ mɔ afee enii eha, tamɔ edamɔ shi loo ekula shi, wiemɔi ni esa akɛ ekɛtsu nii, kɛ kusum nifeemɔi anɔ. Shi, yɛ nɔ ni kɔɔ sanebimɔ ni ji, Mɛɛ gbɛ nɔ esa akɛ wɔtsɔ wɔsɔle? lɛ he lɛ, Biblia lɛ yeɔ ebuaa wɔ koni wɔkɛ wɔjwɛŋmɔ ama nibii ni he hiaa titrii lɛ anɔ moŋ fe enɛɛmɛi.

Biblia lɛ wie Nyɔŋmɔ anɔkwa tsuji lɛ ahe akɛ amɛsɔle yɛ hei srɔtoi, ni amɛsɔle yɛ gbɛi srɔtoi anɔ. Amɛsɔle yɛ amɛyitsoŋ loo amɛsɔle waa yɛ bɔ ni shihilɛ lɛ ji lɛ naa. Mɛi komɛi sɔle beni amɛhole amɛyitsei anɔ kɛmiikwɛ ŋwɛi loo beni amɛmamɔ amɛyitsei ashi. Amɛjɛ amɛtsuiŋ amɛsɔle moŋ fe nɔ ni amɛkɛ amagai, ashinaoi, woji ni aŋmala sɔlemɔi yɛ mli lɛ aaatsu nii yɛ amɛsɔlemɔi lɛ amli. Mɛni ha Nyɔŋmɔ bo amɛsɔlemɔi lɛ atoi?

Taakɛ wɔwie he yɛ sane ni tsɔ hiɛ lɛ mli lɛ, amɛsɔle amɛha Nyɔŋmɔ kome pɛ—Yehowa. Nɔ kroko yɛ ni ha abo amɛsɔlemɔi lɛ atoi. Aŋma yɛ 1 Yohane 5:14 lɛ akɛ: ‘Enɛ ji ekãa ni wɔyɔɔ yɛ ehiɛ lɛ, akɛ, kɛji wɔba nɔ ko yɛ esuɔmɔ naa lɛ, eboɔ wɔ toi.’ Esa akɛ wɔsɔlemɔi kɛ Nyɔŋmɔ suɔmɔnaa nii akpã gbee. Te wiemɔ nɛɛ shishi lɛ?

Kɛ́ wɔsɔlemɔ kɛ Nyɔŋmɔ suɔmɔnaa nii baakpã gbee lɛ, esa akɛ wɔle nɔ ni esuɔmɔnaa nii ji. Belɛ, kɛ́ aaabo wɔsɔlemɔi atoi lɛ, ehe miihia ni wɔkase Biblia lɛ. Ani enɛ tsɔɔ akɛ Nyɔŋmɔ boŋ wɔsɔlemɔi atoi kɛ́ wɔleee Biblia lɛ mli? Dabi, shi Nyɔŋmɔ miitao ni wɔkase nɔ ni ji esuɔmɔnaa nii, wɔnu shishi ni wɔtsu he nii. (Mateo 7:21-23) Esa akɛ wɔsɔlemɔ kɛ nɔ ni wɔkaseɔ lɛ akpã gbee.

Beni wɔkaseɔ Yehowa kɛ esuɔmɔnaa nii lɛ ahe nii lɛ, wɔhemɔkɛyeli lɛ mli baawa—ni enɛ ji nɔ kroko ni he hiaa kɛ́ aaabo wɔsɔlemɔi atoi. Yesu kɛɛ akɛ: ‘Nɔ fɛɛ nɔ ni nyɛaasɔle nyɛbi kɛ hemɔkɛyeli lɛ, nyɛnine aaashɛ nɔ.’ (Mateo 21:22) Hemɔkɛyeli etsɔɔɔ akɛ ahe nɔ fɛɛ nɔ aye kɛkɛ. Shi moŋ, etsɔɔ nɔmimaa ni ayɔɔ yɛ nii ni anaaa lɛ he, akɛni ayɛ odaseyeli ni mli wa waa yɛ he lɛ hewɔ. (Hebribii 11:1) Biblia lɛ mli eyi obɔ kɛ odaseyelii ni tsɔɔ akɛ Yehowa, mɔ ni wɔnaaa lɛ lɛ, yɛ, ni abaanyɛ amu afɔ̃ enɔ, ni efee klalo akɛ ebaaha mɛi ni kɛ hemɔkɛyeli sɔleɔ lɛ asɔlemɔi ahetoo. Kɛfata he lɛ, wɔbaanyɛ wɔbi ni Yehowa afata wɔhemɔkɛyeli lɛ he aha wɔ, ni eesumɔ ni eha wɔ nɔ ni he hiaa wɔ.—Luka 17:5; Yakobo 1:17.

Naa nɔ kroko hu ni he hiaa kɛ́ aaabo wɔsɔlemɔi atoi. Yesu kɛɛ akɛ: “Mɔ ko baaa tsɛ lɛ ŋɔɔ, akɛ ja etsɔ minɔ.” (Yohane 14:6) No hewɔ lɛ, Yesu ji mɔ nɔ ni esa akɛ wɔtsɔ kɛya Yehowa ni ji Tsɛ lɛ ŋɔɔ. Enɛ hewɔ lɛ, Yesu kɛɛ esɛɛnyiɛlɔi lɛ ni amɛsɔle yɛ egbɛi amli. (Yohane 14:13; 15:16) Enɛ etsɔɔɔ akɛ esa akɛ wɔsɔle wɔha Yesu. Shi moŋ lɛ, wɔsɔleɔ yɛ Yesu gbɛi amli, ejaakɛ wɔle akɛ Yesu hewɔ ni wɔbaanyɛ wɔbɛŋkɛ wɔ-Tsɛ ni eye emuu ni yɔɔ krɔŋkrɔŋ lɛ.

Be ko lɛ, Yesu sɛɛnyiɛlɔi ni bɛŋkɛ lɛ kpaakpa lɛ bi lɛ akɛ: “Nuŋtsɔ, tsɔɔmɔ wɔ sɔlemɔ.” (Luka 11:1) Ekã shi faŋŋ akɛ, jeee nibii ni wɔsusu he amrɔ nɛɛ ahe sane amɛbiɔ lɛ. Amɛmiitao amɛle nibii ni esa akɛ amɛwie he yɛ amɛsɔlemɔ mli—yɛ gbɛ ko nɔ lɛ, amɛmiibi lɛ akɛ, ‘Mɛɛ nibii esa akɛ wɔsɔle yɛ he?’

[Wiemɔ ni akɔ ni akɛmiitsu nii ni yɔɔ baafa 6]

Kɛ́ Nyɔŋmɔ baabo wɔsɔlemɔi atoi lɛ, esa akɛ wɔsɔlemɔi kɛ esuɔmɔnaa nii akpã gbee, wɔkɛ hemɔkɛyeli asɔle, ni agbɛnɛ hu wɔsɔle yɛ Yesu gbɛi amli

Sɔlemɔ

4 Mɛɛ Nibii Esa akɛ Wɔsɔle yɛ He?

SƆLEMƆ he nɔkwɛmɔnɔ ni Yesu kɛha, ni bei komɛi lɛ atsɛɔ lɛ Nuŋtsɔ lɛ Sɔlemɔ loo Wɔtsɛ ni Yɔɔ Ŋwɛi Sɔlemɔ lɛ, ji Kristofoi asɔlemɔ ni afɔɔ kɛɛmɔ fe fɛɛ yɛ je lɛŋ fɛɛ. Kɛji enɛ ji anɔkwale jio, ejeee anɔkwale jio lɛ, ekã shi faŋŋ akɛ, enɛ ji sɔlemɔ ko ni mɛi pii nuuu shishi jogbaŋŋ. Mɛi akpekpei abɔ tĩɔ sɔlemɔ nɛɛ mli wiemɔi ni amɛkpe amɛwo amɛyitsoŋ lɛ amli daa nɛɛ, ekolɛ amɛfeɔ enɛ shii abɔ po yɛ gbi lɛ mli. Shi jeee Yesu jwɛŋmɔ ji ni akɛ sɔlemɔ nɛɛ atsu nii yɛ nɛkɛ gbɛ nɔ. Mɛni hewɔ wɔkɛɔ nakai?

Dani Yesu baawie sɔlemɔ nɛɛ he lɛ, ekɛɛ akɛ: “Kɛ́ nyɛmiisɔle lɛ, nyɛkawiea trilii [loo “nyɛkatia nɔ kome too lɛ nɔŋŋ mli shii abɔ,” NW] tamɔ wɔŋjalɔi lɛ.” (Mateo 6:7) Ani Yesu kɛ sɔlemɔ he nɔkwɛmɔnɔ lɛ ha akɛ akpe awo yitsoŋ ni ati mli shii abɔ koni ekɛte shi ewo nɔ ni lɛ diɛŋtsɛ ewie lɛ? Dabi kwraa! Shi moŋ lɛ, Yesu miitsɔɔ wɔ nɔ ni esa akɛ wɔsɔle yɛ he, ni eetsɔɔ wɔ nibii ni he hiaa fe fɛɛ ni esa akɛ wɔha ehi wɔjwɛŋmɔŋ kɛ́ wɔmiisɔle. Nyɛhaa wɔsusua nɔ ni ekɛɛ lɛ he jogbaŋŋ wɔkwɛa. Aŋma sɔlemɔ nɛɛ yɛ Mateo 6:9-13 lɛ.

“Wɔtsɛ ni yɔɔ ŋwɛi, ogbɛi lɛ he atse.”

No hewɔ lɛ, Yesu kai esɛɛnyiɛlɔi lɛ akɛ esa akɛ amɛsɔle amɛha Yehowa, ni ji e-Tsɛ lɛ pɛ. Shi ani ole nɔ hewɔ ni Nyɔŋmɔ gbɛi lɛ he hiaa waa, kɛ nɔ hewɔ ni esa akɛ atse gbɛi lɛ he, loo aha efee krɔŋkrɔŋ lɛ?

Agbe Nyɔŋmɔ gbɛi lɛ he guɔ kɛjɛ adesai ashishijee mli tɔ̃ɔ. Satan ni ji Nyɔŋmɔ henyɛlɔ lɛ kɛɛ akɛ, Yehowa ji Nɔyelɔ ni maleɔ ni susuuu mɔ he, ni agbɛnɛ hu, ebɛ hegbɛ akɛ eyeɔ E-bɔɔ nii lɛ anɔ. (1 Mose 3:1-6) Mɛi babaoo efi Satan sɛɛ kɛtsɔ tsɔɔmɔ ni amɛtsɔɔ mɛi akɛ Nyɔŋmɔ bɛ suɔmɔ, eyitsoŋ wa, ni ekɛ sane ekeee, loo kɛɛmɔ ni amɛkɛɔ akɛ Bɔlɔ ko bɛ lɛ nɔ. Mɛi komɛi po ejie Nyɔŋmɔ gbɛi, Yehowa lɛ kɛjɛ amɛ-Biblia shishitsɔɔmɔi amli ni amɛgu ekɛ nitsumɔ.

Biblia lɛ tsɔɔ akɛ Nyɔŋmɔ baajaje nibii ni ejaaa nɛɛ fɛɛ. (Ezekiel 39:7) Ebaatsu onaagbai kɛ ohiamɔ nii lɛ fɛɛ ahe nii kɛtsɔ enɛ feemɔ nɔ. Yɛ mɛɛ gbɛ nɔ? Nɔ ni Yesu wie yɛ esɔlemɔ lɛ mli kɛnyiɛ sɛɛ lɛ baaha wɔna.

“Omaŋtsɛyeli lɛ aba.”

Ŋmɛnɛ lɛ, jamɔŋ tsɔɔlɔi babaoo leee nɔ ni Nyɔŋmɔ Maŋtsɛyeli lɛ ji. Shi mɛi ni bo Yesu toi lɛ le akɛ Nyɔŋmɔ gbalɔi lɛ egba kɛjɛ teteete akɛ Mesia lɛ, ni ji Yiwalaherelɔ ni Nyɔŋmɔ ehala lɛ, baaye Maŋtsɛyeli ko ni baatsake je lɛ nɔ. (Yesaia 9:5, 6; Daniel 2:44) Ebaatse Nyɔŋmɔ gbɛi lɛ he kɛtsɔ Satan amalei lɛ ahe mama ni eeekpa, kɛ agbɛnɛ hu, Satan kɛ enitsumɔi lɛ fɛɛ ahiɛ ni eeekpata lɛ nɔ. Nyɔŋmɔ Maŋtsɛyeli lɛ baajie ta, hela, hɔmɔ, kɛ gbele tete kɛya. (Lala 46:10; 72:12-16; Yesaia 25:8; 33:24) Kɛ́ osɔle akɛ Nyɔŋmɔ Maŋtsɛyeli lɛ aba lɛ, belɛ oosɔle ni shiwoi nɛɛ fɛɛ aba mli.

“Afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”

Yesu wiemɔi lɛ tsɔɔ akɛ abaafee Nyɔŋmɔ suɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi, he ni Nyɔŋmɔ yɔɔ lɛ. Nɔ ko nyɛɛɛ atsi Nyɔŋmɔ suɔmɔnaa nii naa yɛ ŋwɛi; Nyɔŋmɔ Bi lɛ wu eshi Satan kɛ esamaŋfoi lɛ yɛ jɛmɛ, ni eshɛrɛ amɛ eshwie shikpɔŋ lɛ nɔ. (Kpojiemɔ 12:9-12) Taakɛ klɛŋklɛŋ nibimɔi enyɔ lɛ ji lɛ, nibimɔ ni ji etɛ nɛɛ ni yɔɔ sɔlemɔ he nɔkwɛmɔnɔ lɛ mli lɛ yeɔ ebuaa wɔ koni wɔkɛ wɔjwɛŋmɔ ama nɔ ni he hiaa fe fɛɛ, ni ji Nyɔŋmɔ suɔmɔnaa nii lɛ nɔ moŋ fe nɔ ni wɔ diɛŋtsɛ wɔsumɔɔ lɛ nɔ. Esuɔmɔnaa nii ji nɔ ni haa bɔɔ nii fɛɛ náa nibii kpakpai be fɛɛ be. No hewɔ lɛ, Yesu ni ji gbɔmɔ ni eye emuu lɛ po kɛɛ e-Tsɛ lɛ akɛ: “Jeee bɔ ni mi misumɔɔ lɛ, shi moŋ bɔ ni bo osumɔɔ.”—Luka 22:42.

“Ha wɔ ŋmɛnɛ wɔdaa ŋmãa.”

Enɛ sɛɛ lɛ, Yesu tsɔɔ akɛ wɔbaanyɛ wɔsɔle wɔbi wɔhiamɔ nii hu. Tɔmɔ ko bɛ he akɛ wɔɔsɔle wɔbi ni Nyɔŋmɔ aha wɔ wɔdaa gbi hiamɔ nii. Yɛ anɔkwale mli lɛ, nakai ni wɔɔfee lɛ kaiɔ wɔ akɛ, Yehowa dɛŋ “wala kɛ mumɔ kɛ nii fɛɛ jɛɔ haa gbɔmɛi fɛɛ.” (Bɔfoi lɛ Asaji 17:25) Biblia lɛ haa wɔnaa akɛ eji fɔlɔ ni yɔɔ suɔmɔ ni yɔɔ he miishɛɛ akɛ ekɛ nibii ni he hiaa ebii aaaha amɛ. Shi taakɛ fɔlɔ kpakpa ji lɛ, kɛ́ ebii lɛ bi nɔ ko ni he baŋ sɛɛnamɔ kɛhaŋ amɛ lɛ, ehaŋ amɛ.

“Okɛ wɔnyɔji lɛ ake wɔ.”

Ani ohiɛ Nyɔŋmɔ nyɔmɔ lɛɛlɛŋ? Ani ehe miihia ni ekɛ ohe eshai afa bo? Mɛi babaoo ni yɔɔ ŋmɛnɛ lɛ ebuuu nibii komɛi akɛ esha dɔŋŋ, ni amɛnaaa akɛ esha ji hiɛdɔɔ sane. Shi Biblia lɛ tsɔɔ akɛ, esha ji nɔ ni kɛ naagbai babaoo ni wɔkɛkpeɔ lɛ baa, ejaakɛ no ji nɔ ni haa adesai gboiɔ. Akɛni afɔ wɔ yɛ nɔsha mli hewɔ lɛ, bei pii lɛ wɔ fɛɛ wɔfeɔ esha, ni ja Nyɔŋmɔ kɛ wɔhe eshai lɛ efa wɔ dani wɔbaanyɛ wɔná hiɛnɔkamɔ akɛ wɔbaahi shi kɛya naanɔ wɔsɛɛ. (Romabii 3:23; 5:12; 6:23) Nɔ ni Biblia lɛ kɛɔ nɛɛ haa wɔtsui nyɔɔ wɔmli naakpa, ekɛɔ akɛ: “Bo, Nuŋtsɔ [Yehowa], ohi ni oŋɔfaa mra.”—Lala 86:5.

‘Jiemɔ wɔ kɛjɛ mɔ fɔŋ lɛ dɛŋ.’

Ani ona bɔ ni Nyɔŋmɔ hebuu he hiaa bo waa amrɔ nɛɛ? Mɛi babaoo heee yeee akɛ Satan, ni ji ‘mɔ fɔŋ lɛ’ yɛ. Shi Yesu tsɔɔ akɛ Satan yɛ diɛŋtsɛ, ni etsɛ lɛ po akɛ “je nɛŋ lumɔ lɛ.” (Yohane 12:31; 16:11) Satan efite jeŋ ni eyeɔ nɔ lɛ jeŋba, ni eesumɔ ni efite bo hu ojeŋba koni okaná okɛ Yehowa, ni ji o-Tsɛ lɛ teŋ wekukpaa kpakpa. (1 Petro 5:8) Shi Yehowa yɛ hewalɛ kwraa fe Satan, ni eyɛ he miishɛɛ akɛ ebaabu mɛi ni sumɔɔ Lɛ lɛ ahe.

Jeee saji otii ni je kpo yɛ Yesu sɔlemɔ he nɔkwɛmɔnɔ ni wɔsusu he nɛɛ mli lɛ pɛ ji nibii ni wɔbaanyɛ wɔsɔle yɛ he. Kaimɔ akɛ, 1 Yohane 5:14 lɛ haa wɔleɔ yɛ Nyɔŋmɔ he akɛ: “Kɛji wɔba nɔ ko yɛ esuɔmɔ naa lɛ, eboɔ wɔ toi.” No hewɔ lɛ, kaasusu akɛ onaagba lɛ ji nɔ ko bibioo ni onyɛŋ okɛfɔ̃ Nyɔŋmɔ hiɛ.—1 Petro 5:7.

Shi mɛɛ be kɛ nɛgbɛ esa akɛ wɔsɔle yɛ? Ani be kɛ he ni wɔbaasɔle yɛ lɛ he hiaa?

Sɔlemɔ

5 Nɛgbɛ kɛ Mɛɛ Be Esa akɛ Wɔsɔle?

ŊWANEJEE ko bɛ he akɛ, oyɔse akɛ jamɔi babaoo sumɔɔ ni amɛsɔle yɛ sɔlemɔtsũi wuji amli, ni amɛtsɔɔ be pɔtɛɛ yɛ gbi lɛ mli ni esa akɛ asɔle. Ani Biblia lɛ tsɔɔ he ko pɔtɛɛ kɛ be pɔtɛɛ ni esa akɛ wɔsɔle?

Biblia lɛ haa wɔleɔ akɛ shihilɛi komɛi yɛ ni sa kɛha sɔlemɔ. Ákɛ nɔkwɛmɔnɔ lɛ, dani Yesu kɛ esɛɛnyiɛlɔi lɛ aaaye nii lɛ, esɔle kɛda Nyɔŋmɔ shi. (Luka 22:17) Ni beni ekaselɔi lɛ kpe kutuu kɛha jamɔ lɛ, amɛsɔle. Ni enɛ ji nifeemɔ ko ni kɛjɛ blema tɔ̃ɔ lɛ afeɔ yɛ Yudafoi lɛ ajamɔhei kɛ Yerusalem sɔlemɔtsu lɛ mli. Nyɔŋmɔ to ni akɛ sɔlemɔtsu lɛ afee “jeŋmaji fɛɛ asɔlemɔwe.”—Marko 11:17.

Kɛji Nyɔŋmɔ tsuji kpe kutuu ni amɛsɔle lɛ, Nyɔŋmɔ boɔ amɛnibimɔi lɛ atoi. Kɛ́ kuu lɛ hiɛ jwɛŋmɔ kome ni amɛsɔlemɔ lɛ kɛ Ŋmalɛ mli shishitoo mlai kpãa gbee lɛ, amɛsɔlemɔ lɛ saa Nyɔŋmɔ hiɛ. Amɛsɔlemɔ lɛ baanyɛ atsirɛ lɛ ni efee nɔ ni etoko akɛ ebaafee lɛ po. (Hebribii 13:18, 19) Yehowa Odasefoi sɔleɔ be fɛɛ be yɛ amɛkpeei ashishi. Wɔkɛ miishɛɛ miifɔ̃ bo nine koni oba Maŋtsɛyeli Asa ni bɛŋkɛ bo lɛ nɔ ni bo diɛŋtsɛ obabo sɔlemɔi nɛɛ atoi.

Shi Biblia lɛ etsɔɔɔ be loo he ko pɔtɛɛ ni esa akɛ asɔle yɛ. Wɔnaa yɛ Biblia lɛ mli akɛ, Nyɔŋmɔ tsuji lɛ sɔle yɛ bei srɔtoi amli kɛ hei srɔtoi. Yesu kɛɛ akɛ: “Kɛ́ oosɔle lɛ, botemɔ opia mli, ni oŋa oshinaa lɛ, ni osɔle oha otsɛ yɛ teemɔ mli, ni otsɛ ni naa teemɔ mli nii lɛ aaawoo nyɔmɔ yɛ faŋŋ.”—Mateo 6:6.

Ani enɛ jeee ninefɔ̃ɔ ni yɔɔ miishɛɛ? Obaanyɛ obɛŋkɛ jeŋ muu fɛɛ Maŋtsɛ lɛ yɛ sɔlemɔ mli be fɛɛ be yɛ teemɔŋ, ni obaanyɛ oná nɔmimaa akɛ ebaabo bo toi. Belɛ, ebɛ naakpɛɛ mɔ akɛ, bei pii lɛ Yesu sɔleɔ beni ekome pɛ eyɔɔ he ko. Be ko lɛ, eye jenamɔ muu fɛɛ kɛsɔle eha Nyɔŋmɔ, ni ekã shi faŋŋ akɛ, no mli lɛ eebi gbɛtsɔɔmɔ yɛ sane ko ni he hiaa ni esa akɛ ekpɛ eyiŋ yɛ he lɛ he.—Luka 6:12, 13.

Hii kɛ yei krokomɛi yɛ Biblia lɛ mli ni sɔle beni ehe bahia ni amɛkpɛ amɛyiŋ yɛ saji komɛi ahe loo beni amɛkɛ shihilɛi ni mli wawai kpe lɛ. Bei komɛi lɛ, amɛsɔleɔ ni anuɔ, ni bei komɛi hu lɛ amɛsɔleɔ yɛ amɛyitsoŋ; bei komɛi lɛ amɛsɔleɔ kutuu ni bei komɛi hu lɛ amɛsɔleɔ beni amɛ pɛ amɛyɔɔ he ko. Nɔ ni he hiaa ji akɛ amɛsɔle. Nyɔŋmɔ fɔ̃ɔ etsuji lɛ anine po akɛ: “Nyɛsɔlea ni nyɛkafɔa.” (1 Tesalonikabii 5:17) Eesumɔ akɛ ebo mɛi ni feɔ esuɔmɔnaa nii lɛ atoi be fɛɛ be. Ani enɛ jeee ninefɔ̃ɔ ni suɔmɔ yɔɔ mli?

Eji anɔkwale akɛ, ŋmɛnɛ lɛ, yɛ jeŋ ni anyɛɛɛ amu afɔ̃ mɔ ko nɔ nɛɛ mli lɛ, mɛi babaoo enaaa sɛɛnamɔ ni yɔɔ sɔlemɔ he. Ekolɛ obaabi akɛ, ‘Ani ebaanyɛ eye ebua mi lɛɛlɛŋ?’

[Wiemɔ ni akɔ ni akɛmiitsu nii ni yɔɔ baafa 9]

Wɔbaanyɛ wɔsɔle yɛ bei srɔtoi amli kɛ hei srɔtoi

Sɔlemɔ

6 Ani Ebaanyɛ Eye Ebua Wɔ?

ANI sɔlemɔ yeɔ ebuaa wɔ? Biblia lɛ tsɔɔ akɛ eyeɔ ebuaa wɔ lɛɛlɛŋ, Nyɔŋmɔ tsuji anɔkwafoi lɛ náa amɛsɔlemɔi lɛ ahe sɛɛ. (Luka 22:40; Yakobo 5:13) Yɛ anɔkwale mli lɛ, sɔlemɔ baanyɛ aye abua wɔ ni wɔtsu wɔmumɔŋ hiamɔ nii ahe nii, ni wɔye wɔhenumɔi anɔ, ni wɔná wɔheloonaa hiamɔ nii. Yɛ mɛɛ gbɛ nɔ?

Ŋɔɔ lɛ akɛ, mɔ ko ebake obi ko nii. Ani obaakɛɛ lɛ akɛ miishɛɛ ni ená yɛ nikeenii lɛ he lɛ kɛkɛ fa? Aloo obaakɛɛ lɛ akɛ ewie nɔ ko kɛtsɔɔ akɛ ená nii lɛ he miishɛɛ? Kɛ́ wɔwie bɔ ni wɔnuɔ he wɔhaa lɛ he lɛ, ehaa wɔgbalaa wɔjwɛŋmɔ kɛbaa nakai henumɔ lɛ nɔ, ni ehaa nakai henumɔ lɛ mli waa po. Ani nakai nɔŋŋ ji bɔ ni wɔnuɔ he wɔhaa kɛ́ wɔkɛ Nyɔŋmɔ wie? Hɛɛ! Naa nɔkwɛmɔnii komɛi ni tsɔɔ nakai.

Shidaa sɔlemɔi. Kɛ́ wɔda wɔ-Tsɛ lɛ shi yɛ nibii kpakpai ni wɔnine shɛɔ nɔ lɛ ahe lɛ, ehaa wɔkɛ wɔjwɛŋmɔ maa wɔjɔɔmɔi lɛ anɔ. Ni no haa wɔhiɛ sɔɔ lɛ babaoo, ni wɔnáa miishɛɛ babaoo.—Filipibii 4:6.

Nɔkwɛmɔnɔ: Yesu da e-Tsɛ lɛ shi yɛ bɔ ni ebo esɔlemɔ lɛ toi ni etsu he nii eha lɛ lɛ hewɔ.—Yohane 11:41.

Eshaifaa he sɔlemɔ. Kɛ́ wɔbi ni Nyɔŋmɔ kɛ wɔhe eshai afa wɔ lɛ, wɔwajeɔ wɔhenilee, wɔtsuɔ wɔtsuitsakemɔ lɛ he nii, ni ehaa wɔnaa hiɛdɔɔ ni yɔɔ esha he. Ehaaa wɔnu fɔyeli he dɔŋŋ.

Nɔkwɛmɔnɔ: David sɔle kɛtsɔɔ etsui ni etsake lɛ kɛ ewerɛ ni eho ehe lɛ.—Lala 51.

Sɔlemɔ kɛha gbɛtsɔɔmɔ kɛ nilee. Kɛ́ wɔbi Yehowa ni etsɔɔ wɔ gbɛ loo eha wɔ nilee ni wɔkɛkpɛ wɔyiŋ jogbaŋŋ lɛ, no baanyɛ aye abua wɔ ni wɔba wɔhe shi kɛjɛ wɔtsuiŋ. Ebaaha wɔna he ni wɔnyɛmɔi yawaa ni ebaaye ebua wɔ ni wɔkɛ wɔhiɛ afɔ̃ wɔŋwɛi Tsɛ lɛ nɔ.—Abɛi 3:5, 6.

Nɔkwɛmɔnɔ: Salomo jɛ heshibaa mli ebi ni atsɔɔ lɛ gbɛ ni aha lɛ nilee koni ekɛye Israel nɔ.—1 Maŋtsɛmɛi 3:5-12.

Sɔlemɔ yɛ haomɔ beaŋ. Kɛ́ wɔfɔse wɔtsuiŋ wɔshwie Nyɔŋmɔ hiɛ beni wɔhao waa lɛ, wɔtsui baanyɔ wɔmli, ni wɔkɛ wɔhe baafɔ̃ Yehowa nɔ shi jeee wɔ diɛŋtsɛ wɔhe nɔ.—Lala 62:9.

Nɔkwɛmɔnɔ: Beni henyɛlɔ kpele ko baa abatutua Maŋtsɛ Asa lɛ, Maŋtsɛ lɛ sɔle.—2 Kronika 14:11.

Sɔlemɔ ni asɔleɔ ahaa mɛi koni ehi eha amɛ. Sɔlemɔi ni tamɔ nɛkɛ lɛ yeɔ ebuaa wɔ koni wɔkafo wɔ pɛ wɔnɔ mli, ni ehaa wɔmusuŋ tsɔɔ wɔ ni wɔnuɔ he waa wɔhaa mɛi.

Nɔkwɛmɔnɔ: Yesu sɔle eha esɛɛnyiɛlɔi lɛ.—Yohane 17:9-17.

Yijiemɔ sɔlemɔi. Kɛ́ wɔjie Yehowa yi yɛ enaakpɛɛ nitsumɔi kɛ esui ni nɔ bɛ lɛ ahe lɛ, bulɛ kɛ hiɛsɔɔ ni wɔyɔɔ kɛha lɛ lɛ mli waa. Sɔlemɔi ni tamɔ nɛkɛ lɛ hu baanyɛ aye abua wɔ ni wɔtsi wɔbɛŋkɛ wɔ-Nyɔŋmɔ kɛ wɔ-Tsɛ lɛ kpaakpa.

Nɔkwɛmɔnɔ: David jɛ etsuiŋ ejie Nyɔŋmɔ yi yɛ ebɔɔ nii lɛ ahewɔ.—Lala 8.

Jɔɔmɔ kroko ni wɔnáa kɛjɛɔ sɔlemɔ mli ji “Nyɔŋmɔ hejɔlɛ ni fe jwɛŋmɔi fɛɛ lɛ.” (Filipibii 4:7) Eji jɔɔmɔ ni nɔ bɛ akɛ mɔ tsui aaanyɔ emli yɛ jeŋ ni haomɔ eyi mli obɔ nɛɛ mli. Eyeɔ ebuaa wɔ yɛ gbɔmɔtsoŋ po. (Abɛi 14:30) Shi ani wɔ diɛŋtsɛ wɔmɔdɛŋbɔɔ pɛ ni haa ebaa lɛ nakai? Aloo ani nɔ ko ni he hiaa kwraa fe wɔmɔdɛŋbɔɔ fata he?

[Wiemɔ ni akɔ ni akɛmiitsu nii ni yɔɔ baafa 10]

Wɔnaa sɔlemɔ he sɛɛ yɛ gbɛi babaoo anɔ—heloonaa, henumɔŋ kɛ nɔ ni fe fɛɛ lɛ mumɔŋ

Sɔlemɔ

7 Ani Nyɔŋmɔ Baabo Toi?

SANEBIMƆ nɛɛ teɔ mɛi amiishɛɛ shi waa. Biblia lɛ tsɔɔ akɛ ŋmɛnɛ lɛ, Yehowa boɔ sɔlemɔi atoi. Kɛji Yehowa baabo wɔsɔlemɔi atoi loo eboŋ toi lɛ, edamɔ wɔ diɛŋtsɛ wɔnifeemɔi anɔ.

Yesu wie eshi jamɔŋ hiɛnyiɛlɔi ni hi shi yɛ egbii lɛ amli ni kɛ osatofeemɔ sɔleɔ lɛ; nɔ ni he hiaa amɛ titri ji ni amɛsɔle bɔ ni baaha mɛi ana akɛ amɛja. Ekɛɛ akɛ mɛi ni tamɔ nɛkɛ lɛ baaná “amɛnyɔmɔwoo,” ni tsɔɔ akɛ amɛnine baashɛ nɔ ni amɛtaoɔ fe fɛɛ, ni ji koni mɛi ana amɛ, shi jeee nɔ ni he hiaa amɛ, ni ji koni Nyɔŋmɔ abo amɛ toi lɛ nɔ. (Mateo 6:5) Nakai nɔŋŋ ŋmɛnɛ lɛ, mɛi babaoo damɔɔ nibii ni amɛ diɛŋtsɛ amɛsumɔɔ lɛ nɔ amɛsɔleɔ shi jeee nɔ ni kɛ Nyɔŋmɔ suɔmɔnaa nii kpãa gbee lɛ nɔ. Akɛni amɛkuɔ amɛhiɛ amɛshwieɔ Biblia mli shishitoo mlai ni wɔsusu he lɛ anɔ hewɔ lɛ, Nyɔŋmɔ booo amɛ toi.

Shi bo hu? Ani Nyɔŋmɔ baabo osɔlemɔi atoi? Jeee ohewolo nɔ su, maŋ nɔ ni ojɛ, loo mɔ ni oji yɛ shihilɛ mli lɛ ni baatsɔɔ akɛ ebaabo bo toi loo eboŋ bo toi. Biblia lɛ kɛɔ wɔ akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35) Ani onifeemɔ kɛ ŋmalɛ nɛɛ mli wiemɔi lɛ kpãa gbee? Kɛ́ osheɔ Nyɔŋmɔ gbeyei lɛ, no tsɔɔ akɛ okɛ bulɛ ni mli kwɔ haa lɛ, ni osumɔɔɔ ni ofeɔ nɔ ko ni esaaa ehiɛ. Kɛ́ otsuɔ jalɛ nii lɛ, no tsɔɔ akɛ obɔɔ mɔdɛŋ akɛ obaafee nɔ ni ja yɛ Nyɔŋmɔ hiɛ moŋ fe nɔ ni ooofee nɔ ni bo diɛŋtsɛ loo adesai sumɔɔ. Ani oosumɔ ni Nyɔŋmɔ abo osɔlemɔi atoi lɛɛlɛŋ? Biblia lɛ baatsɔɔ bo nɔ ni obaanyɛ ofee koni Nyɔŋmɔ abo osɔlemɔi atoi.a

Yɛ anɔkwale mli lɛ, mɛi babaoo sumɔɔ ni Nyɔŋmɔ aha amɛsɔlemɔi lɛ ahetoo yɛ naakpɛɛ gbɛ nɔ. Shi yɛ Biblia beaŋ po lɛ, Nyɔŋmɔ efɔɔɔ naakpɛɛ nii feemɔ. Nɔ ni aŋma afɔ shi lɛ tsɔɔ akɛ, bei komɛi lɛ, kɛ́ Nyɔŋmɔ fee naakpɛɛ nii ko lɛ, afii ohai abɔ hoɔ dani efeɔ ekroko. Kɛfata he lɛ, Biblia lɛ tsɔɔ akɛ be ni akɛfeɔ naakpɛɛ nii lɛ ba naagbee yɛ bɔfoi lɛ agbele sɛɛ. (1 Korintobii 13:8-10) Belɛ, ani enɛ tsɔɔ akɛ Nyɔŋmɔ haaa sɔlemɔi ahetoo ŋmɛnɛ? Dabi kwraa! Ha wɔsusu sɔlemɔi komɛi ni ehaa hetoo lɛ ahe wɔkwɛ.

Nyɔŋmɔ haa nilee. Yehowa ŋɔɔ anɔkwa nilee fɛɛ jɛɔ. Ekɛhaa mɛi ni taoɔ egbɛtsɔɔmɔ ni sumɔɔ akɛ amɛhi shi yɛ naa lɛ faa.—Yakobo 1:5.

Nyɔŋmɔ kɛ emumɔ krɔŋkrɔŋ lɛ haa. Mumɔ krɔŋkrɔŋ lɛ ji Nyɔŋmɔ hewalɛ ni miitsu nii. Hewalɛ ko bɛ ni fe no. Ebaanyɛ eye ebuaa wɔ ni wɔmia wɔhiɛ yɛ kai amli. Ebaanyɛ eha wɔná hejɔlɛ yɛ haomɔ beaŋ. Ebaanyɛ eha wɔná sui krokomɛi ni hi jogbaŋŋ. (Galatabii 5:22, 23) Yesu ha esɛɛnyiɛlɔi lɛ ná nɔmimaa akɛ Nyɔŋmɔ kɛ nikeenii nɛɛ baaha amɛ faa.—Luka 11:13.

Nyɔŋmɔ haa mɛi ni kɛ hiɛdɔɔ taoɔ esɛɛ gbɛ lɛ nuɔ nibii ashishi. (Bɔfoi lɛ Asaji 17:26, 27) Yɛ jeŋ fɛɛ lɛ, mɛi yɛ ni kɛ tsui krɔŋŋ miitao anɔkwale lɛ. Amɛmiitao amɛkase Nyɔŋmɔ he nii—amɛle egbɛi, eyiŋtoo kɛha shikpɔŋ lɛ kɛ adesai, kɛ bɔ ni amɛaafee amɛbɛŋkɛ lɛ. (Yakobo 4:8) Bei pii lɛ, Yehowa Odasefoi kɛ mɛi ni tamɔ nɛkɛ kpeɔ ni amɛyɛ he miishɛɛ akɛ amɛaatsɔɔ mɛi nɛɛ nɔ ni Biblia lɛ kɛɔ yɛ saji nɛɛ ahe.

Ani no hewɔ ni oŋɔ wolo nɛɛ? Ani ootao ole Nyɔŋmɔ? Ekolɛ Nyɔŋmɔ miitsɔ gbɛ nɛɛ nɔ eeha osɔlemɔ lɛ hetoo.—w10-E 10/1.

[Shishigbɛ niŋmaa]