Nyɔŋmɔ Eto Eyiŋ Akɛ Gbɔmɔ Ana Wala Mli Ŋɔɔmɔ yɛ Paradeiso
“Ni Yehowa Nyɔŋmɔ ŋɔ gbɔmɔ lɛ ni ekɛ lɛ bato Eden trom lɛ mli, koni ehu mli ni ebu he”—1 MOSE 2:15
1. Mɛni ji Bɔlɔ lɛ shishijee yiŋtoo kɛha adesai toibolɔi?
EJI Bɔlɔ lɛ shishijee yiŋtoo, ni eka he eji eyiŋtoo, akɛ adesai toibolɔi ana wala ni gbɔlɛ bɛ mli, hi hiɔ shi daa yɛ obalaŋtaiaŋ hewalɛ mli, ni nitsumɔi ni jeɔ mɔ tsine ko kwraa bɛ mli, ni be fɛɛ be lɛ yiŋtoo ni sa he nitsumɔ yɛ, shihilɛ ni tsɔɔ suɔmɔ ni aaana aha mɔ ni asumɔ mɔ yɛ anɔkwayeli mli, ni pɛsɛmkunya bɛ mli, ni yeɔ emuu mli ŋɔɔmɔ—yɛ paradeiso!—1 Mose 2:8; okɛto Luka 22:42, 43 he.
2. (a) Mɛni baanyɛ aba beni klɛŋklɛŋ mɔ lɛ hiɛ tsɛ loo ehiɛ ba ehe nɔ lɛ? (b) Mɛɛ be mli abɔ klɛŋklɛŋ gbɔmɔ lɛ, nɛgbɛ, ni mɛɛ be yɛ afi lɛ mli?
2 Bɔni afee ni oyoo enɛ lɛ, kwɛmɔ Adam ni abɔ lɛ ehee lɛ kɛya sɛɛ yɛ be mli ni klɛŋklɛŋ lɛ ehiɛ ba ehe nɔ, beni ekwɛ lɛ diɛŋtsɛ egbɔmɔtso kɛ nɔ fɛɛ nɔ ni ena ni enu ni enu nɔ ni ebɔle ehe lɛ he, beni eyɔse kɛjɛ shishijee akɛ eyɛ wala mli lɛ! Enɛ ba mli afii 6,000 ni eho nɛ, yɛ afi 4,026 dani wɔ Ŋmɛnɛŋmɛnɛ Be, taakɛ beebuu ni akɛha yɛ Ŋmalɛ Krɔŋkrɔŋ loo Biblia lɛ mli lɛ tsɔɔ lɛ. Eba yɛ shikpɔŋ ni ŋmɛnɛ ale akɛ Turkey lɛ nɔ, aloo yɛ he ni ale ŋmɛnɛ akɛ Asia lɛ wuoyi-anaigbɛ, yɛ he ko ni bɛŋkɛ Eufrate Faa lɛ kɛ Tigris Faa lɛ, no hewɔ lɛ eyɛ wɔshikpɔŋ kutruku nɛɛ fa ni yɔɔ kooyigbɛ lɛ mli. Be lɛ baafee October 1, akɛni adesai akalenda ni etsɛ fe fɛɛ lɛ je be kanemɔ shishi kɛmiibɛŋkɛ nakai be lɛ hewɔ.
3. (a) Mɛɛ shihilɛ mli klɛŋklɛŋ gbɔmɔ lɛ ba wala mli yɛ? (b) Mɛni bafee klɛŋklɛŋ gbɔmɔ lɛ gbɛi ni mɛni etsɔɔ?
3 klɛŋklɛŋ nuu lɛ ba wala mli ni eda kwraa, abɔ lɛ akɛ mɔ ni eye emuu, eyeɔ emuu yɛ gbɔmɔtsoŋ hewalɛnamɔ mli, eyeɔ emuu yɛ jeŋba mli. Gbɛi ni afɔɔ lɛ kɛ tsɛmɔ yɛ Biblia lɛ mli lɛ gbalaa wɔjwɛŋmɔ kɛyaa nii ni ajɛ mli abɔ lɛ lɛ nɔ. Egbɛi ji ‘A·dhamʹ.a Shikpɔŋ loo su ni ajɛ mli abɔ lɛ lɛ, atsɛɔ lɛ ‘a·dha·mahʹ. No hewɔ lɛ abaanyɛ akɛɛ akɛ egbɛi lɛ shishi ji “Shikpɔŋ nɔ Gbɔmɔ.” Enɛ bafee klɛŋklɛŋ gbɔmɔ lɛ gbɛi—Adam. Mɛɛ miishɛɛ kɛ naakpɛɛ enɛ aaaji aha Adam nɛkɛ yɛ be mli ni eba wala mli lɛ, beni ehiɛ ba ehe nɔ akɛ gbɔmɔ ni yɔɔ nilee lɛ!
4. Mɛɛ wala mli ni abaa loo hiɛ ni tsɛɔ yɛ naakpɛɛ gbɛ nɔ gbɔmɔ lɛ naaa, no hewɔ lɛ ejeee mɛni bi?
4 Beni klɛŋklɛŋ nuu, Adam lɛ ba wala mli, ni ete shi akɛ mɔ ni hiɛ ka ni yɔɔ nilee, ni egbele ehiŋmɛi lɛ, enaaa ni eka bɔɔ nɔ ko ni ji aduŋ loo akaa ko kɛ etsitsi naa tswɛi sulaŋŋ kɛ niji ni he wa ko mlishi, ni egbi ekpɛtɛ lɛ ni eekwɛ ehiŋmɛiaŋ kɛ hedɔɔ ni eetsɛ lɛ Awo. Klɛŋklɛŋ gbɔmɔ, ni ji Adam lɛ eteee shi kɛbaaa wala mli yɛ gbɛ ni yɔɔ gbeyei nɛkɛ nɔ. Enuuu he akɛ ekɛ aduŋ loo akaa ko yɛ wekukpaa, jeee yɛ sɛɛ mli beni ena eko yɛ klɛŋklɛŋ kwraa lɛ po. Nɔ ko nɔ ko bɛ gbi ni abɔ lɛ lɛ nɔ ni baatsɔɔ akɛ eji akaa loo bɔɔ nɔ ko ni tamɔ nakai lɛ seshinyo kɛjɛ shɔŋŋ. Ni kɛlɛ, ani klɛŋklɛŋ gbɔmɔ, Adam baahi shi akɛ mɔ ni leee gbɛ ni etsɔ nɔ eba shihilɛ mli? Dabi.
5. Mɛni eka shi faŋŋ akɛ Adam le yɛ abɔɔ ni tamɔ trom lɛ kɛ lɛ diɛŋtsɛ ehe?
5 Anuɔ shishi akɛ, enaa baakpɛ ehe yɛ bɔ ni fee ni nibii ni yɔɔ fɛo lɛ fɛɛ ni enaa lɛ ba shihilɛ mli lɛ he. Enaa ehe akɛ eyɛ abɔɔ loo trom ko mli, paradeiso ni jeee lɛ ebɔ, loo efee, aloo eto he gbɛjianɔ mli. Te fee tɛŋŋ ni enɛ ba lɛ? Akɛ gbɔmɔ ni yɔɔ jwɛŋmɔ ni yɔɔ nilee ni yeɔ emuu lɛ, ebaasumɔ ni ele. Ebɛ shishijee niiashikpamɔ ko. Ele akɛ jeee lɛ diɛŋtsɛ ebɔ ehe, ni lɛ diɛŋtsɛ eba shihilɛ mli. Ebaaa shihilɛ ni tamɔ nɛkɛ mli kɛtsɔ lɛ diɛŋtsɛ emɔdɛŋbɔɔ nɔ.—Okɛto Lala 100:3; 139:14 he.
6. Mɛni eka shi faŋŋ akɛ Adam baafee akɛni eyɔɔ wala mli yɛ shikpɔŋ nɔ shia ni yeɔ emuu mli lɛ?
6 Ekolɛ klɛŋklɛŋ gbɔmɔ, Adam lɛ na miishɛɛ babaoo yɛ eniiashikpamɔ hee ni ji wala kɛ miishɛɛ mli ni eyɔɔ yɛ emuuyeli mli yɛ eshikpɔŋ nɔ shia lɛ mli akɛ esusuŋ he ni ejɛ eba kɛ nɔ hewɔ lɛ he. Enyɛŋ nɔ ko efee akɛ ja ebolɔ kɛ miishɛɛ. Ena ni wiemɔi miije kpo kɛmiijɛ edaaŋ. Enu ni lɛ diɛŋtsɛ lɛ eewie gbɔmɔ wiemɔ, eewie nibii ni yɔɔ naakpɛɛ kɛ fɛo fɛɛ ni enaa ni enuɔ lɛ ahe. Kwɛ nɔ kpakpa ni eji akɛ eyɛ wala mli yɛ Paradeiso abɔɔ mli! Shi yɛ be mli ni ekɛ miishɛɛ buaa saji anaa kɛjɛɔ nibii ni enaa, gbamɔi ni enuɔ, nii ahe fu loo ŋma kɛ bɔ ni enuɔ nii ahe ehaa lɛ mli lɛ, enɛ baakanya lɛ ni ejwɛŋ. Kɛha wɔ lɛ, eji akɛ wɔ wo shihilɛ ni tamɔ nɛkɛ mli kulɛ, teemɔŋ sane ko baahi nii muu lɛ fɛɛ he, teemɔŋ sane ni wɔ diɛŋtsɛ lɛ wɔnyɛŋ wɔna naa.
Teemɔŋ Sane ko Bɛ Adesa Shihilɛ He
7. Mɛni hewɔ Adam naa ekpɛɛɛ ehe yɛ be kakadaŋŋ mli akɛni ena lɛ diɛŋtsɛ ehe akɛ eyɔɔ wala mli yɛ paradeiso trom ko mli lɛ?
7 Klɛŋklɛŋ gbɔmɔ Adam lɛ naa ekpɛɛɛ ehe yɛ shihilɛi ni enaa ehe yɛ mli akɛ ekome too eyɔɔ wala mli, ni mɔ ko mɔ ko bɛ ni enaa lɛ ni tamɔ lɛ yɛ Paradeiso abɔɔ lɛ mli lɛ he yɛ be kakadaŋŋ mli. Enu gbee ko, mɔ ko miiwie. Gbɔmɔ lɛ nu shishi. Shi nɛgbɛ wielɔ lɛ yɔɔ? Gbɔmɔ lɛ enaaa mɔ ni wieɔ lɛ. Gbee lɛ ba kɛjɛ jɛɛhe ni anaaa jɛmɛ, maŋtsɛyeli he ni anaaa lɛ, ni eewie eetsɔɔ lɛ. Gbee lɛ ji gbɔmɔ Feelɔ, e-Bɔlɔ lɛ gbee! Ni gbɔmɔ lɛ nyɛ eha lɛ hetoo yɛ nakai wiemɔi lɛ nɔŋŋ mli. Ena ni ekɛ Nyɔŋmɔ miiwie, Bɔlɔ lɛ. Ŋmɛnɛŋmɛnɛ beaŋ jeŋ nilee he redio ko he ehiaaa gbɔmɔ lɛ dani enu ŋwɛi gbee lɛ. Nyɔŋmɔ kɛ lɛ gba sane tɛ̃ɛ akɛ ebɔɔ nɔ.
8, 9. (a) Mɛɛ sanebimɔi abaana amɛhetoo aha Adam, ni mɛɛ kwɛmɔ ni tamɔ tsɛ ko nɔ ajie lɛ kpo tsɔɔ lɛ? (b) Mɛɛ hetoo Adam nine shɛ nɔ kɛjɛ Ŋwɛi Tsɛ lɛ ŋɔɔ?
8 Agbɛnɛ gbɔmɔ lɛ bale akɛ jeee ekome eyɔɔ, ni enɛ baaha ena miishɛɛ. Sanebimɔi eyi ejwɛŋmɔŋ obɔ. Ebaanyɛ ebi sane yɛ Mɔ ni enaaa lɛ ni kɛ lɛ wieɔ lɛ he. Namɔ fee lɛ kɛ abɔɔ ni miishɛɛ yɔɔ mli nɛɛ? Mɛni hewɔ akɛ lɛ to biɛ, ni mɛni ekɛ ewala baafee? Ani yiŋtoo ko yɛ shihilɛ mli? Ajie kwɛmɔ ni tamɔ tsɛ nɔ kpo atsɔɔ klɛŋklɛŋ gbɔmɔ ni ji Adam nɛɛ, ejaakɛ aha esanebimɔi lɛ ahetoo ni ejwɛŋmɔ ni taoɔ nii amli ale lɛ na miishɛɛ. Mɛɛ miishɛɛ enɛ aaaji kɛaaba e-Feelɔ lɛ, e-Wala Halɔ, e-Ŋwɛi Tsɛ lɛ, akɛ eeenu ni gbɔmɔ lɛ eje shishi eewie ni eekɛɛ eklɛŋklɛŋ wiemɔi lɛ! Mɛɛ miishɛɛ enɛ kɛbaaha Ŋwɛi Tsɛ lɛ akɛ eeenu ni ebinuu lɛ kɛ lɛ miiwie! Eka shi faŋŋ akɛ eklɛŋklɛŋ sanebimɔ lɛ baafee. “Te fee tɛŋŋ ni miba shihilɛ mli?” Ŋwɛi Tsɛ lɛ yɛ he suɔmɔ akɛ eeeha klɛŋklɛŋ sane nɛɛ hetoo koni yɛ nɛkɛ gbɛ nɔ lɛ ekpɛlɛ nɔ akɛ nɛkɛ klɛŋklɛŋ gbɔmɔ nɛɛ ji E-bi. Eji “Nyɔŋmɔ bi.” (Luka 3:38) Yehowa ha ayoo lɛ diɛŋtsɛ akɛ klɛŋklɛŋ gbɔmɔ lɛ, Adam, Tsɛ. Akɛ nɔ ko ni jɛ eŋwɛi Tsɛ lɛ ŋɔɔ diɛŋtsɛ lɛ, naa hetoo ni Adam nine shɛ nɔ kɛha esanebimɔ ni ekɛha eshwiei lɛ ahetoo lɛ mli sane titri diɛŋtsɛ lɛ:
9 “Ni Yehowa Nyɔŋmɔ kɛ shikpɔŋ su shɔ gbɔmɔ, ni emu wala mumɔ ewo egugɔ mli, ni gbɔmɔ tsɔ wala susuma. Ni Yehowa Nyɔŋmɔ fee trom yɛ Eden yɛ bokagbɛ, ni eŋɔ gbɔmɔ ni eshɔ lɛ eto jɛi. Ni Yehowa Nyɔŋmɔ ha tsei fɛɛ ni kɛ akwɛ ni aaaba mɔ tsine ni amɛhi ha yeli hu kwɛ̃ kɛjɛ shikpɔŋ su lɛŋ, kɛ wala tso lɛ yɛ trom lɛ teŋ kɛ ekpakpa kɛ efɔŋ lee tso lɛ. Ni faa ko jɛ Eden ni eshwie trom lɛ nɔ nu, ni jɛi egbala emli kɛjɛ ni etsɔ niji ejwɛ.”—1 Mose 2:7-10.b
10, 11. (a) Mɛɛ anɔkwa saji Adam bale yɛ faŋŋ mli, shi mɛɛ sanebimɔi krokomɛi ehe hiaa ni ena hetoo? (b) Mɛɛ hetooi ŋwɛi Tsɛ lɛ kɛha Adam?
10 Adam jwɛŋmɔ ni yɔɔ ehee ni mli ka shi faŋŋ lɛ ŋɔ nɛkɛ sane ni haa mɔ tsui nyɔɔ emli nɛɛ eto. Agbɛnɛ ebale akɛ jeee shihilɛ he ni anaaa jɛmɛ lɛ ni e-Feelɔ kɛ Shɔlɔ lɛ wieɔ kɛjɛɔ jɛmɛ lɛ ejɛ. Shi moŋ, ashɔ lɛ kɛjɛ shikpɔŋ ni ehiɔ nɔ lɛ mli, no hewɔ lɛ eji shikpɔŋ nɔ nyo. E-Wala Halɔ kɛ Tsɛ ji Yehowa Nyɔŋmɔ. Eji “wala susuma.” Akɛni enine shɛ ewala nɔ kɛjɛ Yehowa Nyɔŋmɔ ŋɔɔ hewɔ lɛ, eji “Nyɔŋmɔ bi.” Tsei ni ebɔle ehe kɛkpe yɛ Eden trom lɛ mli lɛ woɔ yibii ni hi kɛha yeli, koni eye ni eya nɔ ehi wala mli akɛ wala susuma. Ni kɛlɛ, mɛni hewɔ esa akɛ eya nɔ ehi wala mli, ni mɛni hewɔ akɛ lɛ to shikpɔŋ nɔ yɛ biɛ yɛ Eden abɔɔ lɛ mli lɛ? Eji nuu ni yeɔ emuu ni yɔɔ nilee kɛ gbɔmɔtsoŋ nyɛmɔi ni esa akɛ ele enɛ. Kɛ jeee nakai lɛ, belɛ mɛɛ gbɛ nɔ eeetsɔ etsu eyiŋtoo yɛ shihilɛ mli lɛ he nii ni ekɛsa e-Feelɔ kɛ Tsɛ lɛ hiɛ kɛtsɔ ŋwɛi suɔmɔnaa nifeemɔ nɔ? Akɛ sanebimɔi ni sa nɛɛ ahetoo eha yɛ wiemɔi ni nyiɛ sɛɛ nɛɛ amli:
11 “Ni Yehowa Nyɔŋmɔ ŋɔ gbɔmɔ lɛ ni ekɛ lɛ bato Eden trom lɛ mli, koni ehu mli ni ebu he. Ni Yehowa Nyɔŋmɔ wo gbɔmɔ lɛ kita ekɛɛ: Trom lɛ mli tsei lɛ fɛɛ nɔ yibii lɛ, ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!”—1 Mose 2:15-17.
12. Adam baanyɛ ada e-Bɔlɔ lɛ shi yɛ mɛni he, ni gbɔmɔ lɛ baanyɛ awo Nyɔŋmɔ hiɛ nyam yɛ mɛɛ gbɛ nɔ?
12 Adam baanyɛ ada e-Bɔlɔ lɛ shi akɛni eha lɛ nɔ ko ni ebaanyɛ etsu yɛ Eden abɔɔ fɛfɛo nɛɛ mli lɛ hewɔ. Agbɛnɛ ebale e-Bɔlɔ lɛ suɔmɔnaa nii, ni ebaanyɛ efee nɔ ko yɛ shikpɔŋ nɔ eha Lɛ. Agbɛnɛ gbɛnaa nii ebaka enɔ, ni ji Eden trom lɛ mli humɔ kɛ enɔ saamɔ, shi ebaafee miishɛɛ nitsumɔ hu. Kɛtsɔ enɛ feemɔ nɔ lɛ, belɛ ebaaha Eden trom lɛ afee nɔ ni kɛ anunyam kɛ yijiemɔ baaba abaha e-Feelɔ, Yehowa Nyɔŋmɔ. Kɛ Adam tsu nii ni hɔmɔ miiye lɛ lɛ, ebaanyɛ eye tsei ni yɔɔ trom lɛ mli lɛ anɔ yibii lɛ eko bɔ ni esumɔɔ. Nɛkɛ gbɛ nɔ eeetsɔ ni ena gbɔmɔtsoŋ hewalɛ ekoŋŋ ni eya nɔ ehi wala mli yɛ miishɛɛ mli kɛya naanɔ—ni bɛ naagbee.—Okɛto Jajelɔ 3:10-13 he.
Naanɔ Wala Gbɛkpamɔ
13. Mɛɛ gbɛkpamɔ ka klɛŋklɛŋ gbɔmɔ lɛ hiɛ? ni mɛni hewɔ nakai eji?
13 Ni bɛ naagbee? Mɛɛ susumɔ ni tamɔ nɔ ni anyɛŋ ahe aye kwraa enɛ baaji aha gbɔmɔ ni yeɔ emuu lɛ! Shi mɛni hewɔ esaaa ni eheɔ eyeɔ? E-Bɔlɔ lɛ bɛ jwɛŋmɔ loo yiŋtoo ko akɛ eeekpata Eden trom fɛfɛo nɛɛ hiɛ. Mɛni hewɔ esa akɛ ekpata lɛ diɛŋtsɛ enitsumɔ lɛ hiɛ, yɛ be mli ni ehi ni ejieɔ enibɔɔ nitsumɔ ni yɔɔ fɛo lɛ kpo lɛ? Yɛ sanenaatsɔɔmɔ ni ja naa lɛ, etoŋ eyiŋ akɛ ebaafee nakai. (Yesaia 45:18) Ni akɛni abaasaa abɔɔ ni eko bɛ ni tamɔ nakai lɛ nɔ hewɔ lɛ, enɔsaalɔ kɛ kwɛlɔ tamɔ gbɔmɔ ni yeɔ emuu, Adam, he baahia. Ni kɛji akɛ enɔkwɛlɔ ni ji gbɔmɔ lɛ yeee “ekpakpa kɛ efɔŋ lee tso” ni agu enɔ yibii lɛ yeli lɛ, egboŋ kɔkɔɔkɔ. Gbɔmɔ ni yeɔ emuu lɛ baanyɛ ahi shi kɛya naanɔ!
14. Te aaafee tɛŋŋ ni Adam aaana naanɔ wala yɛ Paradeiso lɛ?
14 Akɛ naanɔ wala yɛ Paradeiso Eden trom lɛ mli ma Adam hiɛ! Ebaanyɛ ena mli ŋɔɔmɔ kɛya naanɔ, kɛ́ etee nɔ efee toiboo eha e-Bɔlɔ lɛ yɛ emuuyeli mli, ni eyeee yibii ni gbɔmɔ Bɔlɔ lɛ egu eyeli lɛ. Nɔ ni E-sumɔɔ ji ni gbɔmɔ ni yeɔ emuu lɛ ahi shi akɛ toibolɔ ni eya nɔ ehi shi kɛya naanɔ. “Ekpakpa kɛ efɔŋ lee tso” lɛ yibii ni agu eyeli lɛ jeee nɔ ko ni kɛ gbele baa. Eji kaa kɛha toiboo ni yeɔ emuu ni gbɔmɔ aaafee eha e-Tsɛ lɛ. Ekɛ hegbɛ ha gbɔmɔ lɛ koni etsɔɔ akɛ esumɔɔ Nyɔŋmɔ, e-Bɔlɔ lɛ.
15. Mɛni hewɔ Adam baanyɛ akpa wɔsɛɛ be yɔɔ miishɛɛ gbɛ kɛ nɔ kpakpa hu kɛmiijɛ e-Bɔlɔ dɛŋ lɛ?
15 Akɛni etsui baanyɔ emli akɛ jeee trukaa kɛkɛ ni aleee eba shi moŋ eyɛ ŋwɛi Tsɛ hewɔ lɛ, jwɛŋmɔ ni tamɔ nɛkɛ kɛ eyiŋtoo yɛ shihilɛ mli lɛ he shishinumɔ, kɛ naanɔ wala yɛ Paradeiso mli gbɛkpamɔ lɛ baaha gbɔmɔ ni yeɔ emuu lɛ akwɛ ehiɛ kɛya wɔsɛɛ be kpakpa mli. Eye tsei ayibii ni hi ha yeli lɛ, ni ekpoo “ekpakpa kɛ efɔŋ lee tso” lɛ. Eesumɔ ni enine ashɛ nɔ kpakpa nɔ kɛjɛ e-Bɔlɔ lɛ dɛŋ. Nitsumɔ, jeee nɔ ni fiteɔ nii, shi moŋ Eden trom lɛ mli saamɔ ji nɔ ni hi, ni gbɔmɔ ni yeɔ emuu lɛ tsu mli nii.
Enuuu Gbɛnaa Nii Ahe akɛ Etsɔɔ Saji Amli
16-18. Mɛɛ nibii ni aaatsɛ amɛ teemɔŋ saji Adam nuuu he akɛ esa akɛ ena naa lɛ, ni mɛni hewɔ?
16 Jetsɛremɔ ba naagbee beni kane wulu lɛ ni tsoɔ shwane, ni ebaanyɛ ena eyaa kɛ baa yɛ atatuiaŋ lɛ yanyɔ shi lɛ. Duŋ wo, je na, ni ebayoo nyɔŋtsere. Enɛ haaa eshe gbeyei; ejaakɛ eji kane bibioo ni tsoɔ yɛ gbɛkɛ. (1 Mose 1:14-18) Eka shi faŋŋ akɛ, aplɛmplɛm filikiɔ yɛ abɔɔ lɛ mli, amɛsuɔ amɛkanei ni eshaaa mɔ lɛ ni amɛgbɛɔ tamɔ kanei bibii yɛ gbɛkɛ.
17 Beni je bana ni duŋ lɛ baye enɔ lɛ, enu he akɛ esa akɛ ewɔ taakɛ kooloi ni ebɔle ehe lɛ feɔ lɛ. Beni ehiɛ tsɛ lɛ, enu he akɛ hɔmɔ miiye lɛ, ni eye nii ni aaanyɛ atsɛ lɛ akɛ eleebi niyenii lɛ jogbaŋŋ kɛjɛ tsei ayibii ni aŋmɛ lɛ gbɛ akɛ eyɛ lɛ mli.
18 Akɛni ena gbɔmɔtsoŋ hewalɛ ekoŋŋ ni gbɛkɛ hejɔɔmɔ lɛ ewaje lɛ hewɔ lɛ, egbala ejwɛŋmɔ kɛtee gbi lɛ mli nitsumɔ lɛ nɔ. Yɛ be mli ni ekwɛɔ kwɛɛnii lɛ fɛɛ ni ebɔle ehe kɛkpe lɛ, enuuu he akɛ esa akɛ atsa shi ni eyatao nɔ ni yɛ afii akpei abɔ sɛɛ lɛ gbɔmɛi baatsɛ lɛ photosynthesis ni ji nifeemɔ ni haa baa ŋmɔŋ gbalaa hulu mli hewalɛ kɛfeɔ niyenii ehaa tso, gbɔmɔ kɛ kooloi ni amɛyɛ lɛ, ni yɛ nakai beaŋ nɔŋŋ lɛ egbalaa kɔɔyɔɔ fɔŋ ni gbɔmɔ kɛ kooloi muɔ shwieɔ ni ekɛ kɔɔyɔɔ kpakpa haa amɛ ni amɛmu lɛ ni enu shishi. Adesa baanyɛ atsɛ enɛ akɛ teemɔŋ sane, shi ehe ehiaaa ni Adam ana enɛ naa. Eji gbɔmɔ Bɔlɔ lɛ naakpɛɛ nii. Enuɔ shishi ni eha etsu nii koni ehe aba sɛɛnamɔ aha bɔɔ nii ni ji wala ni yɔɔ shikpɔŋ nɔ lɛ. No hewɔ lɛ, efa kɛha klɛŋklɛŋ adesa ni yeɔ emuu lɛ nilee akɛ Nyɔŋmɔ ni ji Bɔlɔ lɛ ha nibii kwɛ̃, ni nitsumɔ ni Nyɔŋmɔ kɛha gbɔmɔ ji ni ekwɛ kwɛɛnii ni kwɛ̃ɔ yɛ Eden abɔɔ lɛ mli lɛ nɔ.—Kwɛmɔ 1 Mose 1:12.
Ekome Too—Shi Ejeee Mɔ ni Bɛ Miishɛɛ
19. Eyɛ mli akɛ eyoo akɛ ekome eyɔɔ ni mɔ ko bɛ ni tamɔ lɛ yɛ shikpɔŋ nɔ moŋ, shi mɛni Adam efeee?
19 Tsɔsemɔ ni ŋwɛi Tsɛ lɛ kɛhaa gbɔmɔ lɛ bako naagbee. Gbɔmɔ lɛ kwɛ Eden trom lɛ nɔ ni mɔ ko ni tamɔ lɛ bɛ shikpɔŋ lɛ nɔ ni baafata ehɛ ni eye ebua lɛ. Yɛ ehenɔ, ni ji adesa henɔ lɛ gbɛfaŋ lɛ, ekomɛ toɔ pɛ eyɔɔ. Eyaaa akɛ eeya ni eyatao mɔ ko ni tamɔ lɛ ni baafata ehe yɛ shikpɔŋ lɛ nɔ. Ebiii Nyɔŋmɔ ni ji eŋwɛi Tsɛ lɛ ni eha lɛ nyɛmi nuu loo nyɛmi yoo. Ekome ni eyɔɔ akɛ gbɔmɔ lɛ haaa eye sɛkɛ koni yɛ naagbee lɛ eshɔ miishɛɛ ni yɔɔ shihilɛ kɛ nitsumɔ mli lɛ yɛ edɛŋ. Enaanyo ji Nyɔŋmɔ.—Okɛto Lala 27:4 he.
20. (a) Mɛni haa Adam naa miishɛɛ ni emli filiɔ lɛ fe fɛɛ? (b) Mɛni hewɔ ya ni eeeya nɔ yɛ shihilɛ gbɛ ni tamɔ nɛkɛ mli lɛ efeŋ tɔlɛ yɛ Adam nɔ lɛ? (d) Nikasemɔ ni nyiɛ sɛɛ lɛ baasusu mɛni he?
20 Adam le akɛ eŋwɛi Tsɛ lɛ miikwɛ lɛ kɛ enitsumɔ lɛ. Nɔ ni haa enaa miishɛɛ fe fɛɛ ji ni esa e-Nyɔŋmɔ kɛ Bɔlɔ lɛ ni bɔ ni eyɔɔ naakpɛɛ ha lɛ jeɔ kpo kɛjɛɔ nibɔɔ fɛfɛji ni ebɔle gbɔmɔ he fɛɛ kɛkpe lɛ mli lɛ hiɛ. (Okɛto Kpojiemɔ 15:3 he.) Ni eeeya nɔ yɛ shihilɛ gbɛ ni tamɔ nɛkɛ nɔ lɛ efeŋ tɔlɛ ni gbeɔ mɔ loo nitsumɔ ni atsuɔ no daa ni jeɔ mɔ tsine ejaakɛ nɛkɛ gbɔmɔ ni yeɔ emuu ni ŋmɛɔ pɛpɛɛpɛ nɛɛ baanyɛ ekɛ Nyɔŋmɔ agba sane. Ni Nyɔŋmɔ kɛ nitsumɔ ni yɔɔ miishɛɛ eha Adam, nitsumɔ ni yɔɔ naakpɛɛ, ni baaha etsui anyɔ emli babaoo ni ena miishɛɛ hu. Nikasemɔ ni nyiɛ sɛɛ lɛ baagba wɔ Paradeiso mli jɔɔmɔi kɛ gbɛkpamɔi ni Adam na mli ŋɔɔmɔ yɛ e-Bɔlɔ ni yɔɔ suɔmɔ lɛ dɛŋ lɛ he saji babaoo.
[Shishigbɛ niŋmai]
a Enɛ ji wiemɔ ni yɔɔ Biblia lɛ mli yɛ shishijee wiemɔ ni kɔɔ nibɔɔ he lɛ he.—1 Mose 1:26. New World Translation Reference Bible, shishigbɛ niŋmaa.
Gbalɔ Mose ni ŋma nɛkɛ saji nɛɛ yɛ 1 Mose Wolo lɛ mli yɛ afii ohai 16 dani wɔ Ŋmɛnɛŋmɛnɛ Be lɛ kɛ saji ni nyiɛ sɛɛ nɛɛ ni kɔɔ Eden faa lɛ he lɛ fata he, taakɛ egbii lɛ amli nilee ji lɛ:
b “Klɛŋklɛŋ nɔ lɛ gbɛi ji Pishon, nɔ ni bɔleɔ Havila shikpɔŋ muu lɛ fɛɛ, heni shika yɔɔ lɛ. Ni nakai shikpɔŋ lɛ nɔ shika lɛ hi; ni bedola kɛ shohamtɛ yɛ jɛi. Ni faa ni ji enyɔ lɛ gbɛi ji Gihon. nɔ ni bɔleɔ Kush shikpɔŋ lɛ fɛɛ lɛ. Ni faa ni ji etɛ lɛ gbɛi ji Hidekel, nɔ ni hoɔ yɛ Ashur bokagbɛ lɛ; ni faa ni ji ejwɛ lɛ ji Eufrate.”—1 Mose 2:11-14.
Mɛni ji Ohetooi?
◻ Mɛni hewɔ Adam naa ekpɛɛɛ ehe yɛ eshihilɛ he yɛ be kakadaŋŋ mli lɛ?
◻ Mɛɛ nitsumɔ Nyɔŋmɔ kɛha Adam, ni te ebaakpɛlɛ enɛ nɔ eha tɛŋŋ?
◻ Mɛɛ gbɛkpamɔ gbɔmɔ ni yeɔ emuu Iɛ na mli ŋɔɔmɔ, ni mɛni hewɔ?
◻ Mɛni hewɔ Adam kɛfeee eshihilɛ mli nitsumɔ akɛ eeetao ni enu teemɔŋ saji ashishi Iɛ?
◻ Mɛni hewɔ ni Adam kome too pɛ ni yɔɔ akɛ gbɔmɔ Iɛ fiteee miishɛɛ ni eyɔɔ yɛ shihilɛ mli Iɛ?
[Mfoniri ni yɔɔ baafa 1]
NASA photo