Mɛni Hewɔ Sane Lɛ Naa Ni Aaana Etsɛ Nakai Lɛ?

AAFEE afii 6,000 ni eho nɛ lɛ, no mli lɛ jeŋ muu fɛɛ maŋtsɛ ni Nyɔŋmɔ ji lɛ he bako sane. Beni egbe edebɔɔ mli naakpɛɛ nitsumɔi lɛ anaa lɛ, “Nyɔŋmɔ kwɛ nibii fɛɛ ni efee lɛ, ni naa, ehi naakpa.” (1 Mose 1:31) No sɛɛ lɛ ebote “hejɔɔmɔ” be kakadaŋŋ ko mli; shi enɛ etsɔɔɔ akɛ etɔ lɛ yɛ gbɔmɔtsoŋ. Shi moŋ ejɔɔ ehe, ni tsɔɔ akɛ ekpa edebɔɔ nitsumɔi lɛ yɛ shikpɔŋ nɔ, ni ehiɛ ka nɔ akɛ yiŋtoo kpakpa ni eyɔɔ yɛ enɛɛmɛi ahe lɛ baaye omanye.​—1 Mose 2:​1-3; Yesaia 55:​11.

Mɛni ji nakai yiŋtoo lɛ? Yehowa kɛ klɛŋklɛŋ mɛi enyɔ lɛ wo he ko ni atsɛɔ jɛmɛ akɛ Eden trom lɛ mli. Klɛŋklɛŋ gbɛnaa nii ni ka amɛnɔ ji ni amɛkwɛ amɛ paradeiso shia lɛ nɔ jogbaŋŋ, kɛ emli kooloi sɔrɔtoi lɛ hu. Agbɛnɛ, esa akɛ amɛfɔ ni amɛlɛ gbekɛbii lɛ. Yɛ be ni sa mli, beni amɛweku lɛ daa lɛ, amɛbaalɛɛ Paradeiso lɛ mli kɛyashɛ shikpɔŋ lɛ naagbee hei lɛ yɛ famɔ ni Nyɔŋmɔ kɛha amɛ akɛ ‘amɛye shikpɔŋ lɛ nɔ’ lɛ toiboo mli. Enɛ hewɔ lɛ, yɛ naagbee lɛ, shikpɔŋ lɛ baafee shia fɛfɛo ko, ni eyi obɔ kɛ weku ni yɔɔ miishɛɛ, ni efee ekome kɛmiisɔmɔ amɛŋwɛi Tsɛ lɛ. No ji Nyɔŋmɔ shishijee yiŋtoo.​—1 Mose 1:​27, 28; 2:​8, 15, 20-22.

Ani Adam kɛ Hawa baana enɛ mli gbɛfaŋnɔ kɛyashi naagbee ni akɛwo nɛkɛ yiŋtoo ni yɔɔ nyam nɛɛ obɔ? Enɛ damɔ ekome ni amɛkɛ enɛ aaafee kɛtsɔ toiboo ni amɛaafee amɛha amɛ-Bɔlɔ lɛ nɔ. Amɛtoiboo lɛ efeŋ toiboo folo, nɔ ni asusuuu he. Aha amɛ hegbɛ ni amɛhala nɔ ni amɛsumɔɔ, ejaakɛ Nyɔŋmɔ miisumɔ ni amɛsɔmɔ lɛ kɛjɛ hiɛsɔɔ tsuii amli. Akɛ maŋtsɛ ni eji lɛ he kaimɔ ni anaa lɛ, ekɛ kaa bibioo ko fɔ amɛhiɛ. Amɛbaanyɛ amɛye nibii ni ekɛha amɛ yɛ trom lɛ mli lɛ fɛɛ ja ekome ko pɛ. Tso ko ni woɔ yibii ni ayeɔ yɛ mli, ni Nyɔŋmɔ wie yɛ no he akɛ: “Gbi nɔ ni oooye eko lɛ, gbo ooogbo!”​—1 Mose 2:​16, 17.

Nɛkɛ wiemɔi nɛɛ kɛɔ wɔ akɛ abɔɔɔ Adam kɛ Hawa ni amɛgbɔlɔ ni amɛgboi. Ja amɛgbo nɛkɛ famɔ ni yɔɔ mlɛo nɛɛ nɔ toi dani gbele baaba. Eji Adam kɛ Hawa fee toiboo amɛha Nyɔŋmɔ kulɛ, amɛaaka he amɛhi wala mli yɛ shikpɔŋ nɔ lolo kɛbashi ŋmɛnɛ akɛ jeŋ muu fɛɛ weku ni mlibii eye emuu lɛ afɔlɔi.​—Kwɛmɔ shishitoo mla ni ajaje yɛ Lala 37:⁠29.

Shi, Nyɔŋmɔ bɔɔnii ni ji bɔfoi lɛ ateŋ mɔ kome, ni amrɔ nɛɛ atsɛɔ lɛ Satan lɛ wie eshi gbɛ ni Nyɔŋmɔ tsɔɔ nɔ eyeɔ nɔ lɛ. Ewo Hawa hewalɛ koni eye tso ni agu eyeli lɛ, ni ekɛ lakamɔ wo lɛ ŋaa akɛ kɛ eye ehe kɛjɛ Nyɔŋmɔ nɔyeli shishi lɛ, . . . ebaaha ele nii jogbaŋŋ. Shi, yiŋtoo diɛŋtsɛ ni Satan hiɛ lɛ ji suɔmɔ ni eyɔɔ akɛ etsɔ adesai aweku ni baaba yɛ wɔsɛɛ lɛ nyɔŋmɔ.​—1 Mose 3:​1-5; Mateo 4:​8, 9; Yohane 8:⁠44.

Akɛni Yehowa eha klɛŋklɛŋ hefatalɔi ni ji adesai lɛ nɔ fɛɛ nɔ ni he hiaa amɛ hewɔ lɛ, kulɛ esa akɛ Hawa afi jeŋ muu fɛɛ maŋtsɛ ni eji lɛ sɛɛ ni ekpoo Satan ŋaawoi ni ekɛlakaa lɛ lɛ. Shi mɔbɔ sane ji akɛ, etee nɔ ni eku Nyɔŋmɔ mla lɛ mli. Yɛ sɛɛ mli lɛ, Adam hu hala akɛ ebaafata eŋa lɛ he yɛ egbɛ ni ekɔ ni nilee bɛ mli nɛɛ mli. Enɛ hewɔ lɛ nɛkɛ hefatalɔi ni sumɔɔ ni amɛfee nɔ ni amɛsumɔɔ, kɛ Satan diɛŋtsɛ hu tse Nyɔŋmɔ hiɛ atua, ni etee sane ni kɔɔ ŋwɛi maŋtsɛyeli he lɛ shi.​—1 Mose 3:⁠6.

Be he Miihia ni Akɛna Saji ni He Hiaa Waa lɛ Anaa

Kulɛ Yehowa baanyɛ akpata atuatselɔi etɛ nɛɛ ahiɛ yɛ nakai beaŋ nɔŋŋ yɛ jɛmɛ. Shi no feemɔ haŋ ana sane ni amɛ atuatsemɔ lɛ tee lɛ shi lɛ naa kɛmɔ shi. Ani adesai baanyɛ atsi amɛhe kɛjɛ Nyɔŋmɔ he ni amɛye amɛhe nɔ yɛ omanyeyeli mli? Ani eji jalɛsaneyeli yɛ Nyɔŋmɔ gbɛfaŋ akɛ eeebi ni amɛba amɛhe shi amɛha enɔyeli? Ni kɛfata he lɛ, yɛ bɔ ni klɛŋklɛŋ hefatalɔi lɛ fee amɛnii amɛha lɛ hewɔ lɛ, ani adesai aaahala akɛ amɛaasɔmɔ Nyɔŋmɔ kɛjɛ amɛ diɛŋtsɛ amɛsuɔmɔ mli yɛ gbɛ ni pɛsɛmkunya bɛ mli nɔ​—kɛji Satan miika amɛ po lɛ? (Hiob 1:​7-11; 2:⁠4) Be he baahia ni akɛna saji nɛɛ anaa. Agbɛnɛ hu, ebaahe be ni akɛye nibii ni jɛ klɛŋklɛŋ atuatsemɔ lɛ mli ba lɛ anɔ ni akɛwo Nyɔŋmɔ yiŋtoo akɛ ebaafee shikpɔŋ lɛ paradeiso ni adesai ni esha bɛ amɛhe lɛ yɔɔ nɔ lɛ obɔ. Wɔka he wɔmiimɛ bɔ ni abaana nɛkɛ saji nɛɛ anaa kwraa kɛmɔ shi lɛ lolo.

Yɛ emla lɛ kɛ gbeekpamɔ naa lɛ, Nyɔŋmɔ he hegbɛ ni Adam kɛ Hawa yɔɔ akɛ amɛhiɔ shi kɛyaa naanɔ lɛ yɛ amɛdɛŋ. Amɛsaaa mɛi ni naa gbɛfaŋnɔ yɛ eyiŋtoo kpele lɛ mlibaa mli dɔŋŋ. Shi kɛlɛ, dani amɛaagboi lɛ, aŋmɛ amɛ gbɛ ni amɛfɔ bii ni amɛtsɔse amɛ. Lɛlɛŋ, Adam kɛ Hawa nyɛɛɛ amɛkɛ gbɔmɔtsoŋ hewalɛ kpakpa kɛ wala ni esha bɛ mli aha amɛbii lɛ. (Romabii 5:12) Ni eyɛ mli akɛ afɔ yinɔi ni nyiɛ sɛɛ lɛ akɛ mɛi ni yeee emuu ni gbele fɔbuu ka amɛnɔ moŋ, shi aŋkroaŋkroi pii na hegbɛ akɛ amɛaatsɔɔ he ni amɛdamɔ yɛ nɛkɛ sane kpele ni kɔɔ jeŋ muu fɛɛ maŋtsɛyeli he nɛɛ mli.

Sane lɛ Naa ni Aaana

Te Nyɔŋmɔ aaafee tɛŋŋ ena nɛkɛ saji ni kɔɔ emaŋtsɛyeli he nɛɛ naa? Yɛ shihinumɔ ko naa lɛ, aha saji ni te shi yɛ Eden lɛ ahetoo bianɛ. Adesai ayinɔsane afii akpei abɔ ni eho lɛ eha efee faŋŋ kɛ dɔlɛ babaoo akɛ wiemɔ ni Satan wie akɛ Hawa baale nii waa kɛji etsi ehe kɛjɛ Nyɔŋmɔ he lɛ efee amale. Adesai anɔyeli ni kuɔ ehiɛ efɔɔ Nyɔŋmɔ nɔ lɛ etee nɔ efee nɔ ni yeee omanye. Taakɛ Biblia lɛ kɛɔ lɛ: “Gbɔmɔ yeɔ enaanyo gbɔmɔ nɔ ni ekɛyeɔ ehe awui.”​—Jajelɔ 8:⁠9.

Shi yɛ gbɛ kroko nɔ lɛ, aŋmala nibii kpakpai pii ashwie shi yɛ afii pii ni eho lɛ amli kɛjɛ be mli ni Adam kɛ Hawa fee esha lɛ. Adesai babaoo efee bɔ ni amɛkɛ amɛhe kpɛtɛɔ Yehowa maŋtsɛyeli lɛ he gbagbalii lɛ faŋŋ, ni nɔkwɛmɔ nɔ ni ekaaa fe fɛɛ ji “gbɔmɔ Bi lɛ,” Yesu Kristo diɛŋtsɛ. (Mateo 20:​18; Hebribii 11:​1–12:⁠3) Mɛi ni enyiɛ Nyɔŋmɔ mlai asɛɛ ni amɛkpɛlɛ emaŋtsɛyeli lɛ nɔ lɛ ena akɛ no ji gbɛ ni hi fe fɛɛ lɛlɛŋ. Amɛna anɔkwale ni yɔɔ abɛbua nɛɛ mli lɛ mli niiashikpamɔ: “Yehowa duromɔ lɛ, no feɔ mɔ niiatsɛ; shi deŋmegbomɔ nyɛŋ ekɛ nɔ ko afata he.” (Abɛi 10:22) Kɛfata he lɛ, shidaa aha gbohiiashitee he hegbɛ lɛ, akɛ yɛ naagbee lɛ amɛbaana gbɛfaŋnɔ yɛ Nyɔŋmɔ yiŋtoo ni yɔɔ nyam lɛ mlibaa mli.​—Yohane 5:​28, 29.

Yehowa hiɛ kpako eshishijee yiŋtoo lɛ nɔ. Aŋmɛŋ mɛi ni kpooɔ emaŋtsɛyeli lɛ gbɛ ni amɛye shikpɔŋ lɛ nɔ yɛ bei fɛɛ mli, ni Biblia lɛ bɔɔ kɔkɔ akɛ etsɛŋ ni Nyɔŋmɔ baate shi awo amɛ. Wɔkaneɔ akɛ: “Ejaakɛ ajieɔ Nyɔŋmɔ mlifu kpo kɛjɛɔ ŋwɛi kɛbaa gbɔmɛi . . . amusubɔɔ kɛ nishaianii lɛ fɛɛ nɔ.” (Romabii 1:18) Nyɔŋmɔ mlifu ni abaajie kpo atsɔɔ ni baa, ni Biblia lɛ tsɛɔ lɛ Harmagedon nɛɛ baafee lɛ faŋŋ yɛ gbɛ ni sanebimɔ ko kwraa baŋ he nɔ akɛ eyɛ lɛlɛŋ. Mɛi ni kpɛlɛɔ emaŋtsɛyeli lɛ nɔ lɛ pɛ baaje nakai nifeemɔ lɛ mli. “Ejaakɛ mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.”​—Abɛi 2:​21, 22.

Sane Kpele lɛ kɛ Bo

Yɛ nɛkɛ anɔkwa saji nɛɛ ahewɔ lɛ, esa akɛ wɔteŋ mɔ fɛɛ mɔ​—tamɔ Adam kɛ Hawa​—ahala nɔ ni esumɔɔ. Ani wɔbaabɔ mɔdɛŋ ni wɔhi shi ni wɔtsi wɔhe kɛjɛ Nyɔŋmɔ he? Aloo ani wɔbaaba wɔhe shi wɔha emaŋtsɛyeli lɛ? Kaimɔ akɛ enɛ ji sane ni he hiaa fe fɛɛ ni ka ohiɛ ŋmɛnɛ lɛ. Bɔ fɛɛ bɔ ni saji ni eshwɛ lɛ he hiaa ha lɛ, nomɛi kɔɔ wala mli ni oyɔɔ amrɔ nɛɛ he. Shi enɛ kɔɔ naanɔ wala he. Yiŋkpɛɛ ni ooofee lɛ baasa onaanɔ wɔsɛɛ shihilɛ he.

Mɛɛ gbɛ nɔ oootsɔ otsɔɔ akɛ okpɛlɛɔ Nyɔŋmɔ maŋtsɛyeli lɛ nɔ? Kɛtsɔ ekaa ni okɛaakase e-Wiemɔ ni ji Biblia lɛ, koni otao akɛ okɛ anɔkwa Kristofoi krokomɛi aaabɔ kɛfee esuɔmɔnaa nii lɛ nɔ. (Zefania 2:​2, 3) Kɛji ofee nakai lɛ, obaana hiɛnɔkamɔ ni yɔɔ miishɛɛ lɛ akɛ ooona Nyɔŋmɔ yiŋtoo ni yɔɔ nyam lɛ mlibaa. Obaana nɛkɛ shiwoo ni yɔɔ naakpɛɛ nɛɛ mlibaa hu: “Eshwɛ fioo kɛkɛ ni mɔ fɔŋ lɛ bɛ dɔŋŋ, . . . Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” (Lala 37:​10, 11) Mɛɛ nii ni yɔɔ naakpɛɛ aaajɛ wɔhe shi ni wɔɔba wɔha Nyɔŋmɔ maŋtsɛyeli lɛ mli aba nɛkɛ! Mɛɛ yiŋtoo ni mli wa wɔyɔɔ ni wɔkɛaakpɛ wɔyiŋ yɛ nilee mli yɛ nɛkɛ sane ni he hiaa fe fɛɛ nɛɛ mli enɛ ji nɛkɛ!