Mɛni Hewɔ Wɔgboiɔ?
“Gɔji lɛ ayiteaŋ fɛɛ efee dioo agbɛnɛ, ni onuuu ni bɔɔnɔ ko kwraa miimu yɛ tsei lɛ ayiteŋ; loofɔji lɛ ewɔ yɛ tsei lɛ anɔ: mɛɛ; etsɛŋ ni bo hu obaaya oyawɔ tamɔ mɛnɛɛmɛi.”—JOHANN WOLFGANG VON GOETHE, GERMANYNYO LALAFOLƆ.
1, 2. (a) Mɛɛ shwelɛ akɛbɔ gbɔmɛi adesai? (b) Mɛɛ shihilɛ klɛŋklɛŋ adesai enyɔ lɛ ná mli ŋɔɔmɔ?
NYƆŊMƆ bɔ adesai kɛ shwelɛ akɛ amɛhi shi kɛya naanɔ. Lɛɛlɛŋ, Biblia lɛ kɛɔ akɛ ekɛ “naanɔ shihilɛ henumɔ ewo amɛtsuii amli.” (Jajelɔ 3:11, Beck) Shi Nyɔŋmɔ fee babaoo fe shwelɛ ni ekɛbɔ adesai akɛ amɛhi shi kɛya naanɔ lɛ kɛkɛ. Eha amɛ hegbɛ hu ni amɛkɛaafee nakai.
2 Abɔ wɔ klɛŋklɛŋ fɔlɔi ni ji Adam kɛ Hawa akɛ mɛi ni eye emuu, ní kpa ko bɛ amɛhe yɛ jwɛŋmɔŋ loo gbɔmɔtsoŋ. (5 Mose 32:4) Susumɔ he okwɛ—hewaa loo piŋmɔi ni ehiii tsamɔ bɛ, gbeyeishemɔi fɔji loo yeyeeyefeemɔi bɛ! Kɛfata he lɛ, Nyɔŋmɔ kɛ amɛ wo paradeiso shia fɛfɛo ko mli. Nyɔŋmɔ to eyiŋ akɛ gbɔmɔ baahi shi kɛya naanɔ, ni ákɛ, yɛ be ni sa mli lɛ, shikpɔŋ lɛ nɔ baayi kɛ eshwiei ni eye emuu. (1 Mose 1:31; 2:15) Belɛ, mɛni hewɔ mɔ ni wɔgboiɔ lɛ?
Toigbele kɛ Gbele Ba
3. Naanɔ wala kɛha Adam kɛ Hawa damɔ mɛni nɔ?
3 Nyɔŋmɔ wo Adam kita akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!” (1 Mose 2:16, 17) No hewɔ lɛ naanɔ wala kɛha Adam kɛ Hawa lɛ damɔ nɔ ko nɔ̃; edamɔ toiboo ni amɛaafee amɛha Nyɔŋmɔ lɛ nɔ.
4. Beni Adam kɛ Hawa fee esha lɛ, mɛni hewɔ amɛlaaje gbɛkpamɔ akɛ amɛaahi shi kɛya naanɔ yɛ Paradeiso lɛ?
4 Shi, awerɛho sane ji akɛ, Adam kɛ Hawa gbó Nyɔŋmɔ mla nɔ toi. (1 Mose 3:1-6) Amɛbatsɔmɔ eshafeelɔi, yɛ nakai ni amɛfee lɛ hewɔ, ejaakɛ “esha lɛ mlatɔmɔ ni.” (1 Yohane 3:4) Nɔ ni jɛ mli ba ji akɛ, Adam kɛ Hawa náaa naanɔ wala gbɛkpamɔ dɔŋŋ. Mɛni hewɔ? Ejaakɛ “esha dɛŋ nyɔmɔwoo lɛ gbele ni.” (Romabii 6:23) Enɛ hewɔ lɛ, beni ejajeɔ fɔbuu kojomɔ eshwieɔ Adam kɛ Hawa nɔ lɛ, Nyɔŋmɔ kɛɛ: “Sũ jio, ni sũ mli oooku osɛɛ kɛaatee.” Kɛkɛ ni agbɛnɛ ashwie wɔ klɛŋklɛŋ fɔlɔi lɛ kɛjɛ amɛ Paradeiso shia lɛ mli. Adam kɛ Hawa je gbele shihilɛ ni baa blɛoo, shi kɛlɛ eshashaooo shi lɛ shishi, yɛ gbi ni amɛfee esha lɛ nɔ nɔŋŋ.—1 Mose 3:19, 23, 24.
“Gbele lɛ Tsɛŋe Gbɔmɛi Fɛɛ”
5. Te fee tɛŋŋ ni gbele gbɛ eshwã adesai aweku muu lɛ fɛɛ mli?
5 Agbɛnɛ esha baka Adam kɛ Hawa wala yibii amli hewalɛ lɛ mli kwraa ní ehiii jiemɔ. No hewɔ lɛ, amɛnyɛɛɛ amɛná shwiei ni yeɔ emuu, tamɔ bɔ ni nɔ̃ ko ni yeee emuu, ní akwɛɔ nɔ ashɔ̃ɔ nii lɛ nyɛŋ afee nii ni eye emuu lɛ. (Hiob 14:4) Lɛɛlɛŋ, adesa fɔmɔ fɛɛ fɔmɔ maa nɔ mi akɛ wɔ klɛŋklɛŋ fɔlɔi lɛ laaje gbɔmɔtsoŋ hewalɛ ni eye emuu kɛ naanɔ wala kɛha amɛ diɛŋtsɛ amɛhe kɛ amɛseshibii fɛɛ. Kristofonyo bɔfo Paulo ŋma akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.”—Romabii 5:12; okɛto Lala 51:7 he.
6. Mɛni hewɔ wɔgboiɔ?
6 Ŋmɛnɛ, jeŋ nilelɔi leee nɔ hewɔ ni adesai gbɔlɔɔ ni amɛgboiɔ lɛ. Shi Biblia lɛ tsɔɔ mli akɛ wɔgboiɔ akɛni afɔ́ wɔ ákɛ mɛi ni esha yɔɔ wɔhe lɛ hewɔ, ni wɔná nɛkɛ shihilɛ nɛɛ kɛjɛ wɔ klɛŋklɛŋ fɔlɔi lɛ adɛŋ. Shi mɛni baa wɔnɔ kɛ́ wɔgboi?