Wɔshibɔlemɔ Ŋulamii Ni Yɔɔ Srɔto Lɛ Bɔ Ni Fee Ni Eba Shihilɛ Mli

NIBII ni haa shibɔlemɔ ŋulamii ní wɔshikpɔŋ lɛ fata he kɛbɔleɔ hulu lɛ bafeɔ srɔto kwraa lɛ fa. Ŋulamii ni yɔɔ he ni wɔshibɔlemɔ ŋulamii lɛ yɔɔ yɛ Milky Way ŋulami kusha lɛ mli lɛ faaa tsɔ. Ŋulamii ni wɔnaa kɛ́ je na lɛ amli kpotoo kɛ wɔteŋ jɛkɛ aahu akɛ kɛ́ wɔkɛ shwɛdei ni akɛkwɛɔ ŋwɛiniiaŋ lɛ ateŋ nɔ ni da fe fɛɛ lɛ kwɛ amɛ lɛ, wɔnaa amɛ tamɔ kanei bibiibii komɛi ni miikpɛ. Ani he ni wɔshibɔlemɔ ŋulamii lɛ yɔɔ lɛ sa?

Eji wɔshibɔlemɔ ŋulamii lɛ yaje Milky Way ŋulami kusha lɛ teŋ gbɛ kulɛ, wɔbaayaje ŋulamii babaoo ateŋ, ni enɛ kɛ haomɔi babaoo baaba wɔnɔ. Ákɛ nɔkwɛmɔnɔ lɛ, kulɛ shikpɔŋ lɛ nyɛŋ ahi eŋɛlɛ nɔ, ni enɛ kɛ haomɔ agbo baaba adesai anɔ. Shi taakɛ eji lɛ, he ni shibɔlemɔ ŋulamii lɛ yɔɔ yɛ ŋulami kusha lɛ mli lɛ sa jogbaŋŋ, ni no haa eyeɔ ehe kɛjɛɔ haomɔi nɛɛ ahe. Kɛfata he lɛ, no haaa shibɔlemɔ ŋulamii lɛ ayatsɔ atatuiaŋ he ko ni dɔɔ fe nine loo ŋulamii ni fɛlɛɔ ateŋ, ni eyeɔ ehe kɛjɛɔ osharai krokomɛi hu ahe.

Hulu lɛ ji ŋulami henɔ ko ni he yɔɔ sɛɛnamɔ jogbaŋŋ kɛha wɔ. Bɔ ni etsoɔ lɛ, nakai eyɔɔ daa, ni etsoɔ ŋmɛlɛtswai babaoo, eda bɔ ni sa, ni esaŋ edɔɔɔ fe nine. Ŋulamii ni yɔɔ wɔshibɔlemɔ ŋulami kusha lɛ mli lɛ ateŋ kpotoo adaramɔ shɛɛɛ hulu lɛ, ni anyɛɛɛ ahi shibɔlemɔ ŋulamii ni tamɔ wɔshikpɔŋ lɛ ni amɛyɔɔ nɔ lɛ anɔ ejaakɛ amɛnyɛɛɛ amɛkpɛ waa ni asaŋ amɛdɔɔɔ bɔ ni sa. Kɛfata he lɛ, nigbalamɔ hewalɛ ni yɔɔ ŋulamii anɔ lɛ gbalaa ŋulamii lɛ ateŋ babaoo kɛbɛŋkɛɔ amɛhe ni amɛbɔleɔ amɛhe, shi hulu lɛ hiɛ ehe ni ekɛ ŋulami ko bɛ sane. Eji ayɛ hului krokomɛi ní nigbalamɔ hewalɛ ni amɛyɔɔ lɛ gbalaa hulu ni yɔɔ wɔshibɔlemɔ ŋulami lɛ nɔ lɛ kulɛ, wɔshibɔlemɔ ŋulamii lɛ nyɛŋ ahi eŋɛlɛ nɔ.

Nɔ kroko hu ni haa esoroɔ wɔshibɔlemɔ ŋulami lɛ ji akɛ, shibɔlemɔ ŋulamii wujiwuji komɛi ni kɛ hulu lɛ teŋ jɛkɛ lɛ yɛ gbɛ ni amɛnyiɛɔ nɔ kɛbɔleɔ hulu lɛ, ni nigbalamɔ hewalɛ ni amɛyɔɔ lɛ gbaaa shibɔlemɔ ŋulamii ni tamɔ wɔshikpɔŋ ni bɛŋkɛ hulu lɛ naa.a Yɛ no najiaŋ lɛ, amɛbuɔ shibɔlemɔ ŋulamii tamɔ shikpɔŋ lɛ ahe kɛjɛɔ nibii ni baanyɛ atswia amɛ ni eye amɛ awui lɛ ahe. Jeŋ nilelɔi Peter D. Ward kɛ Donald Brownlee tsɔɔ mli yɛ amɛwolo (Rare Earth—Why Complex Life Is Uncommon in the Universe) lɛ mli akɛ: “Akɛni shibɔlemɔ ŋulamii wuji tamɔ Jupiter buɔ shikpɔŋ lɛ he hewɔ lɛ, ŋulamii bibii ni bɔleɔ hulu lɛ amli enyɔoo ko pɛ kɛfee lɛ amɛtswiaa shikpɔŋ lɛ shi amɛyeee lɛ awui ko tsɔ.” Ana shibɔlemɔ ŋulamii krokomɛi ní ŋulamii wujiwuji yɔɔ nɔ, shi bɔ ni gbɛ̀i ni amɛteŋ babaoo nyiɛɔ nɔ kɛbɔleɔ shi lɛ yɔɔ ha hewɔ lɛ, kɛ́ shibɔlemɔ ŋulamii bibii tamɔ wɔshikpɔŋ lɛ yaje hei ni amɛyɔɔ lɛ, amɛbaagba enaa.

Nii ni Nyɔŋtsere lɛ Tsuɔ

Kɛjɛ blema tɔ̃ɔ lɛ, nyɔŋtsere lɛ feɔ adesai naakpɛɛ. Mɛi kɛfee lalafoo wiemɔi, ni mɛi komɛi hu kɛfee lalai. Ákɛ nɔkwɛmɔnɔ lɛ, Hebrinyo lalafoo wiemɔ ŋmalɔ ko ni hi shi yɛ blema lɛ wie nyɔŋtsere lɛ he akɛ “eeema shi daa . . . ni eye anɔkwa tamɔ odasefonyo ni yɔɔ atatuiaŋ lɛ!”—Lala 89:38.

Nibii ni he hiaa waa ni nyɔŋtsere lɛ feɔ ni esaa bɔɔ nii ni wala yɔɔ amɛmli yɛ shikpɔŋ lɛ nɔ lɛ ahe ji akɛ, nigbalamɔ hewalɛ ni eyɔɔ lɛ ni haa ŋshɔ fãa loo eyiɔ. Aheɔ ayeɔ akɛ ŋshɔ fãa kɛ eyimɔ ni haa etswaa kɛyaa kɛbaa, ni enɛ haa wɔnáa kɔɔyɔŋ tsakemɔi srɔtoi.

Nɔ kroko ni nyɔŋtsere lɛ tsuɔ ji akɛ, eyeɔ buaa ni shikpɔŋ lɛ hiɔ eŋɛlɛ nɔ kɛ́ eebɔle hulu lɛ. Adafitswaa wolo ni ji Nature lɛ tsɔɔ mli akɛ, kɛ́ jeee nyɔŋtsere lɛ kulɛ, shikpɔŋ lɛ nyɛŋ ahi eŋɛlɛ nɔ. Kwɛ nɔ ni baaba eji shikpɔŋ lɛ aaakpa afã fioo fe bɔ ni eyɔɔ! Kɛ́ ebalɛ nakai lɛ, kɔɔyɔŋ tsakeŋ ní wɔbaana srɔtofeemɔ ni yɔɔ latsaa kɛ fɛ̃i beaŋ teŋ, ni nugbɔ hu enɛŋ ekpakpa ko. Bɔ ni shikpɔŋ lɛ ekpa afã lɛ hu yeɔ buaa ni enɔ edɔɔɔ loo ni enɔ aaajɔ fe bɔ ni aaanyɛ nɔ ahi. Ŋulamii ahe nilelɔ Jacques Laskar wie akɛ: “Kɛ́ jeee nyɔŋtsere lɛ kulɛ, kɔɔyɔŋ tsakeŋ tamɔ wɔle ni efeɔ lɛ.” Bɔ ni nyɔŋtsere lɛ da ha lɛ haa enyɛɔ eyeɔ buaa shikpɔŋ lɛ ni ehiɔ eŋɛlɛ nɔ. Nyɔŋtsere lɛ da fe nyɔŋtsere krokomɛi ni yɔɔ shibɔlemɔ ŋulamii wujiwuji lɛ anɔ lɛ.

Beni mɔ ni ŋma Biblia mli wolo ni ji Mose Klɛŋklɛŋ Wolo lɛ yɛ blema beaŋ lɛ wieɔ nɔ kroko ni nyɔŋtsere lɛ tsuɔ lɛ he lɛ, etsɔɔ mli akɛ kɛ́ je na lɛ, nyɔŋtsere lɛ kpɛɔ akɛ kane.—1 Mose 1:16.

Ani Eba yɛ Heniianaa aloo Mɔ ko To He Gbɛjianɔ?

Mɛni abaanyɛ akɛɛ yɛ nibii ni haa anyɛɔ ahiɔ shikpɔŋ lɛ nɔ ní asaŋ ehaa enɔ hilɛ ŋɔɔ lɛ ahe? Etamɔ nɔ ni nibii enyɔ pɛ abaanyɛ awie yɛ he. Klɛŋklɛŋ nɔ̃ lɛ ji akɛ, nakai nibii lɛ fɛɛ ba yɛ heniianaa. Nɔ ni enyɔ lɛ ji akɛ, nilelɔ ko ni fee, ni ákɛ efee yɛ yiŋtoo ko hewɔ.

Afii akpekpei abɔ ni eho lɛ ni Ŋmalɛ Krɔŋkrɔŋ lɛ wie akɛ Nyɔŋmɔ Ofe ni ji Bɔlɔ lɛ ni bɔ jeŋ muu lɛ fɛɛ kɛ emli nibii lɛ. Kɛ́ nakai ji sane lɛ, belɛ bɔ ni nibii yaa nɔ yɛ wɔshibɔlemɔ ŋulamii lɛ nɔ lɛ baaa yɛ heniianaa anaa shi moŋ mɔ ko ni je gbɛ eto he gbɛjianɔ nakai. Kɛ́ wɔɔkɛɛ lɛ, Bɔlɔ lɛ ha aŋma gbɛ ni etsɔ nɔ efee shikpɔŋ lɛ bɔni afee ni anyɛ ahi lɛ he sane afɔ̃ shi. Ekolɛ, onaa baakpɛ ohe akɛ ooole akɛ nɔ ni fe afii 3,500 nɛ ni aŋma nakai sane lɛ, ni kɛlɛ ekɛ nibii titrii ni jeŋ nilelɔi heɔ yeɔ akɛ nomɛi haa anyɛɔ ahiɔ shikpɔŋ lɛ nɔ lɛ kpãa gbee. Nakai sane lɛ yɛ Biblia mli wolo ni ji Mose Klɛŋklɛŋ Wolo lɛ mli. Nyɛhaa wɔsusua nɔ ni wolo nɛɛ kɛɛ lɛ he wɔkwɛa.

Nɔ ni Mose Klɛŋklɛŋ Wolo lɛ Kɛɔ yɛ Adebɔɔ He

“Shishijee mli lɛ Nyɔŋmɔ bɔ ŋwɛi kɛ shikpɔŋ.” (1 Mose 1:1) Enɛ ji sane ni akakpa Biblia lɛ hiɛ, ni sane nɛɛ kɔɔ bɔ ni fee ni abɔ jeŋ muu lɛ fɛɛ he, ni tsɔɔ akɛ ekɔɔ bɔ ni fee ni abɔ wɔshibɔlemɔ ŋulamii lɛ ní wɔshikpɔŋ lɛ hu fata he lɛ kɛ ŋulamii krokomɛi ni yɔɔ ŋulamii kushai akpekpei abɔ lɛ amli lɛ ahe. Biblia lɛ tsɔɔ mli akɛ, shishijee mli lɛ, no mli lɛ shikpɔŋ lɛ yɛ “olɛŋlɛ.” No mli lɛ, abɛ shikpɔŋ gbiŋ lɛ, abɛ shikpɔŋ ni baa nii. Shi beni awie akɛ shikpɔŋ lɛ yɛ olɛŋlɛ sɛɛ lɛ, atsĩ nɔ ko ni jeŋ nilelɔi kɛɔ akɛ ehe hiaa fe nibii krokomɛi fɛɛ ni haa anyɛɔ ahiɔ shibɔlemɔ ŋulami ko nɔ lɛ tã, ni no ji nu. Ŋmalɛ lɛ tsɔɔ mli akɛ, no mli lɛ, Nyɔŋmɔ mumɔ lɛ “bu nui lɛ ahiɛ.”—1 Mose 1:2.

Kɛ́ nu baanyɛ ahi shibɔlemɔ ŋulami ko nɔ lɛ, ebaabi ni gbɛ ni sa akã nakai ŋulami lɛ kɛ hulu lɛ teŋ. Jeŋ nilelɔ Andrew Ingersoll tsɔɔ mli akɛ: “Mars nɔ ejɔ tsɔ, ni Venus hu nɔ edɔ tsɔ, shi Shikpɔŋ lɛ nɔ edɔko fe nine, ni enɔ ejɔko hu fe nine.” Nakai nɔŋŋ, kɛ́ kwɛ̃ɛ nii baanyɛ akwɛ̃ lɛ, ebaabi ni amɛná la ni sa. Nɔ ni sa kadimɔ ji akɛ, Biblia lɛ haa wɔleɔ akɛ beni Nyɔŋmɔ je nibɔɔ shishi lɛ, eha hulu la kpɛ́ kɛtsɔ atatui ni edi tũu ni hà nui lɛ ahiɛ tamɔ ‘mama ni akɛbala’ gbekɛ lɛ mli.—Hiob 38:4, 9; 1 Mose 1:3-5.

No sɛɛ lɛ, Mose Klɛŋklɛŋ Wolo lɛ haa wɔleɔ akɛ, Bɔlɔ lɛ bɔ nɔ ni Biblia lɛ tsɛ́ lɛ akɛ “ŋwɛi” lɛ. (1 Mose 1:6-8) Kɔɔyɔɔŋ ni wɔnaa lɛ he awieɔ yɛ biɛ akɛ ŋwɛi lɛ, ni kɔɔyɔɔ srɔtoi yɔɔ mli.

Biblia lɛ tsɔɔ mli akɛ, no sɛɛ lɛ, Nyɔŋmɔ ha shikpɔŋ olɛŋlɛ lɛ tsɔ shikpɔŋ gbiŋ. (1 Mose 1:9, 10) Ekã shi faŋŋ akɛ, eha shikpɔŋ lɛ tsi ehe ni enɛ wo jɔɔi voovoo, ni no ha shikpɔŋ lɛ je nu babaoo lɛ mli.—Lala 104:6-8.

Sɛɛ mli lɛ, Nyɔŋmɔ bɔ kwɛ̃ɛ nii bibiibii ni hiŋmɛi enaaa ewo ŋshɔŋ eyɛ mli akɛ atsɔɔɔ be pɔtɛɛ ni ekɛfee nakai. Kwɛ̃ɛ nii bibiibii nɛɛ gbalaa hulu la kɛfutuɔ kɔɔyɔɔ ni adesai kɛ kooloi muɔ kɛjɛɔ amɛmli lɛ kɛwoɔ yibii ni amɛŋmɛɔ kɔɔyɔɔ kpakpa ni adesai kɛ kooloi muɔ amɛwoɔ kɔɔyɔŋ. Nifeemɔ ni yɔɔ naakpɛɛ ni haa anáa kɔɔyɔɔ kpakpa amuɔ lɛ tee hiɛ babaoo beni abɔ jwɛi kɛ tsei yɛ shikpɔŋ nɔ fɛɛ yɛ gbi ni ji etɛ lɛ nɔ. Enɛ ha kɔɔyɔɔ kpakpa ni yɔɔ shikpɔŋ lɛ nɔ lɛ fa babaoo bɔ ni gbɔmɛi kɛ kooloi baaná eko amɛmu ni amɛhi wala.—1 Mose 1:11, 12.

Bɔni afee ni shikpɔŋ lɛ aba nii jogbaŋŋ lɛ, Bɔlɔ lɛ bɔ kooloi bibiibii komɛi ewo sũ lɛ mli. (Yeremia 51:15) Kooloi bibiibii nɛɛ ni haa nibii kpɔtɔɔ ewoɔ sũ mli, ni enɛ haa kwɛ̃ɛ nii daraa jogbaŋŋ. Ayɛ sũ mli muawai komɛi hu ni gbalaa kɔɔyɔɔ ni ji nitrogen ewoɔ sũ mli, ni enɛ yeɔ buaa kwɛ̃ɛ nii ni amɛdaraa. Naakpɛɛ sane ji akɛ, kɛ́ oloo sũ okɔkɔ obɔ̃ lɛ, kooloi bibiibii ni hiŋmɛi enaaa ni yɔɔ mli lɛ baashɛ akpekpei toi akpei ekpaa!

Mose Klɛŋklɛŋ Wolo 1:14-19 lɛ tsɔɔ akɛ, yɛ adebɔɔ gbi ni ji ejwɛ lɛ nɔ lɛ, abɔ hulu, nyɔŋtsere, kɛ ŋulamii lɛ. Kɛ́ osusu sane nɛɛ he klɛŋklɛŋ kwraa lɛ, efeɔ tamɔ nɔ ni eteɔ shi ewoɔ saji ni Ŋmalɛi lɛ tsi tã kɛtsɔ hiɛ lɛ. Shi ha ehi ojwɛŋmɔ mli akɛ, Mose ní ŋma Mose Klɛŋklɛŋ Wolo lɛ ŋmala adebɔɔ he saji lɛ tamɔ mɔ ko ni yɛ shikpɔŋ lɛ nɔ eekwɛ nibii ni yaa nɔ lɛ. Eeenyɛ efee akɛ, adebɔɔ gbi ni ji ejwɛ lɛ nɔ ni hulu, nyɔŋtsere, kɛ ŋulamii lɛ je kpo faŋŋ yɛ ŋwɛiniiaŋ.

Mose Klɛŋklɛŋ Wolo lɛ kɛɔ akɛ, adebɔɔ gbi ni ji enumɔ lɛ nɔ ni abɔ ŋshɔŋ kooloi lɛ, ni gbi ni ji ekpaa lɛ nɔ abɔ kooloi ni yɔɔ shikpɔŋ lɛ nɔ kɛ adesai.—1 Mose 1:20-31.

Abɔ Shikpɔŋ lɛ Koni Aná Miishɛɛ yɛ Nɔ

Ani onaaa akɛ bɔ ni Mose Klɛŋklɛŋ Wolo lɛ tsɔɔ ní abɔ shikpɔŋ lɛ aha lɛ tsɔɔ akɛ abɔ ni aná miishɛɛ yɛ nɔ? Ani ote shi leebi ni hulu eje ní omu kɔɔyɔɔ kpakpa ko ní omii eshɛ ohe pɛŋ? Ekolɛ, oyashara shi yɛ abɔɔ fɛfɛo ko ni fɔfɔii miije ŋma yɛ mli, aloo yɛ aduawa ŋmɔ ko mli, ni otse aduawai ni ŋɔɔ lɛ eko. Eji nibii tamɔ: (1) nu babaoo ni yɔɔ shikpɔŋ nɔ, (2) dɔlɛ kɛ la ni sa ní hulu lɛ haa wɔnáa, (3) kɔɔyɔɔ srɔtoi ni sa ni ebɔle shikpɔŋ lɛ, kɛ (4) shikpɔŋ ni baa nii bɛ kulɛ, miishɛɛ nɛɛ fɛɛ baabɔ bo.

Nibii ejwɛ ni wɔwie he nɛɛ bɛ shibɔlemɔ ŋulamii tamɔ Mars, Venus, kɛ shibɔlemɔ ŋulamii krokomɛi lɛ anɔ, ni nibii nɛɛ baaa yɛ heniianaa, shi moŋ aje gbɛ ato amɛhe gbɛjianɔ. Aje gbɛ ato he gbɛjianɔ nakai bɔni afee ni shikpɔŋ lɛ nɔ hilɛ aŋɔɔ. Taakɛ wɔbaana yɛ nikasemɔ ni nyiɛ sɛɛ lɛ mli lɛ, Biblia lɛ haa wɔleɔ hu akɛ Bɔlɔ lɛ fee wɔshikpɔŋ fɛfɛo lɛ koni ehi shi kɛya naanɔ.

[Shishigbɛ niŋmaa]

[Akrabatsa ni yɔɔ baafa 6]

“Ákɛ tɛsaa kɛ sũ mli nii ahe nilelɔ lɛ, kɛ́ akɛɛ mitsɔɔ nɔ ni jeŋ nilelɔi ni yɔɔ ŋmɛnɛ lɛ heɔ amɛyeɔ yɛ bɔ ni fee ni shikpɔŋ lɛ ba shihilɛ mli kɛ bɔ ni fee ni bɔɔ nii ni wala yɔɔ amɛmli ba nɔ lɛ mli miha tookwɛlɔi ni leee woloŋ tsɔ tamɔ mɛi ni aŋma Mose Klɛŋklɛŋ Wolo lɛ aha lɛ nɛkɛ lɛ, kulɛ nɔ̃ kɛkɛ ni mafee ji akɛ, mikɛ Mose Klɛŋklɛŋ Wolo lɛ mli sane lɛ titri baatsu nii kɛtsɔɔ saji amli.”—Tɛsaa kɛ sũ mli nii ahe nilelɔ Wallace Pratt.

[Akrabatsa/Mfoniri ni yɔɔ baafa 7]

EHI KƐHA ŊULAMII AHE NIKASEMƆ HU

Eji hulu lɛ yaje he kroko yɛ wɔshibɔlemɔ ŋulami kusha lɛ mli kulɛ, wɔnaŋ ŋulamii lɛ jogbaŋŋ. Wolo ko (The Privileged Planet) tsɔɔ mli akɛ: “He ni wɔshibɔlemɔ ŋulamii lɛ yɔɔ lɛ, . . . mulu bɛ jɛi ni jɛmɛ bɛ haŋŋ hu tsɔ, ni enɛ haa wɔnyɛɔ wɔnaa ŋulamii ni bɛŋkɛ kpaakpa kɛ nibii krokomɛi ni yɔɔ ŋwɛiniiaŋ shɔŋŋ lɛ jogbaŋŋ.”

Kɛfata he lɛ, nyɔŋtsere lɛ dalɛ kɛ gbɛ ni kã ekɛ shikpɔŋ lɛ teŋ lɛ haa kɛ́ be shɛ ni esa akɛ ehà hulu lɛ nɔ lɛ, enyɛɔ ehàa nɔ kwraa ni ehaa jeŋ woɔ duŋ. Nifeemɔ ni yɔɔ naakpɛɛ ni efɔɔɔ kaa nɛɛ yeɔ buaa ŋulamii ahe nilelɔi ni amɛkaseɔ hulu lɛ he nii. Nikasemɔi nɛɛ yeɔ buaa amɛ ni amɛleɔ nibii ni kulɛ aleee yɛ ŋulamii akpɛmɔ he.

[Mfoniri ni yɔɔ baafa 5]

Nyɔŋtsere lɛ dalɛ haa enyɛɔ eyeɔ buaa shikpɔŋ lɛ ni ehiɔ eŋɛlɛ nɔ

[Mfonirii ni yɔɔ baafa 7]

Mɛni haa anyɛɔ ahiɔ shikpɔŋ lɛ nɔ? Nu babaoo yɛ nɔ, dɔlɛ kɛ la ni sa ní yɛ nɔ, kɔɔyɔɔ srɔtoi ni sa yɛ nɔ, ni ebaa nii jogbaŋŋ hu

[He ni Sane lɛ Jɛ]

Shikpɔŋ kokroo: Based on NASA Photo; ŋmaa: Pictorial Archive (Near Eastern History) Est.