Bɔ ni Mɔ Aaafee Etsu Naagba ni Baa Ekɛ Eshaayoo loo Eshaanuu Teŋ lɛ He Nii

BÉI ni baa mɔ kɛ eshaanuu loo eshaayoo teŋ lɛ ji sane ni mɛi ni woɔ mɛi anaaŋmɔlɔ lɛ ekomɛi kɛyeɔ fɔ́, shi eji hiɛdɔɔ sane diɛŋtsɛ. Reena ni ji ŋa ko ni yɔɔ India lɛ kɛɛ akɛ: “Mishaayoo kɛ ehe wo wɔgbalashihilɛ mli saji amli afii babaoo. Bei pii lɛ, mikɛ mlifu tutuaa miwu ejaakɛ minyɛŋ mafee mishaayoo nakai. Bei babaoo lɛ, ebafeɔ tamɔ nɔ ni esa akɛ ehala shihilɛ lɛ mli ekome, ákɛ ebaafee ehe wu kpakpa loo bi kpakpa.”

Mɛni hewɔ shaahii kɛ shaayeimɛi komɛi sumɔɔ akɛ amɛkɛ amɛhe awo amɛbii agbalashihilɛ mli saji amli lɛ? Jenny ni atsĩ etã kɛtsɔ hiɛ lɛ tsɔɔ nɔ ni esusuɔ akɛ no haa ebaa lɛ nakai. Ekɛɛ akɛ: “Ekolɛ ewaa kɛhaa shaahii kɛ shaayeimɛi lɛ akɛ amɛaana akɛ amɛbinuu loo amɛbiyoo eyaje mɔ ko ni edako tsɔ ní bɛ niiashikpamɔ ko lɛ kwɛmɔ shishi.” Dilip ni ji Reena wu lɛ hu tsɔɔ yiŋtoo kroko hewɔ ni fɔlɔi komɛi feɔ nakai lɛ mli. Ekɛɛ akɛ: “Ekolɛ fɔlɔi ni etsɔse amɛbii lɛ aahu ni amɛkɛ amɛhe eshã afɔle amɛha amɛ lɛ nuɔ he akɛ aajie amɛ kɛmiijɛ amɛbii lɛ ashihilɛi amli. Eeenyɛ efee hu akɛ amɛnuɔ he akɛ amɛbinuu loo amɛbiyoo lɛ bɛ nilee ní ebaanyɛ ekɛha egbalashihilɛ lɛ aye omanye.”

Anɔkwa sane ji akɛ, bei komɛi lɛ gbalashihilɛ mli hefatalɔi lɛ ji mɛi ni haa amɛfɔlɔi kɛ amɛhe woɔ amɛshihilɛi amli lɛ. Ákɛ nɔkwɛmɔnɔ lɛ, susumɔ Michael kɛ Leanne ni ji gbalashihilɛ mli hefatalɔi ni yɔɔ Australia lɛ he okwɛ. Michael kɛɛ akɛ: “Leanne jɛ weku ko ni emlibii lɛ feɔ ekome kɛgbaa nɔ fɛɛ nɔ he sane lɛ mli, ni amɛkɛ nɔ ko eteee amɛhe. No hewɔ lɛ, beni wɔbote gbalashihilɛ mli lɛ ekɛ epapa yasusuɔ nibii ni kulɛ esa akɛ mikɛ lɛ akpɛ yiŋ yɛ he lɛ ahe. Mile akɛ epapa yɛ niiashikpamɔ babaoo ní ebaanyɛ ekɛye ebua wɔ, shi edɔɔ mi waa akɛ yɛ nɔ̃ najiaŋ ni ekɛmi baasusu nii ahe lɛ, eyaa epapa ŋɔɔ!”

Eyɛ faŋŋ akɛ kɛ́ naagba ba mɔ kɛ eshaanuu loo eshaayoo teŋ lɛ ebaanyɛ egba gbalashihilɛ lɛ naa. Ani nakai eji yɛ onɔ̃ lɛ mli? Mɛni ji wekukpãa ni kã bo kɛ ohefatalɔ lɛ fɔlɔi ateŋ, ni te eji yɛ ohefatalɔ lɛ hu kɛ ofɔlɔi ateŋ eha tɛŋŋ? Susumɔ naagbai enyɔ komɛi ni baanyɛ aba, kɛ nɔ ni obaanyɛ otsu yɛ naagbai nɛɛ ahe lɛ he okwɛ.

Etamɔ nɔ ni ohefatalɔ kpɛtɛɔ efɔlɔi fe nine. Luis ni ji wu ko ni yɔɔ Spain lɛ kɛɛ akɛ: “Miŋa nu he akɛ kɛ́ wɔhiii he ko ni bɛŋkɛ efɔlɔi lɛ, belɛ eyeee amɛ anɔkwa.” Luis kɛfata he akɛ: “Yɛ gbɛ kroko nɔ lɛ, beni wɔfɔ́ wɔkromɔbi lɛ mifɔlɔi basaraa wɔ daa gbi, ni enɛ gbá miŋa naa waa. Nifeemɔ nɛɛ kɛ naagbai ba wɔteŋ.”

Sane Lɛ:

Beni Biblia lɛ tsɔɔ gbalashihilɛ gbɛjianɔtoo lɛ mli lɛ, eha ale akɛ yɛ be ni sa mli lɛ “nuu aaashi etsɛ kɛ enyɛ, ni eeekpɛtɛ eŋa he, ni amɛaatsɔ heloo kome.” (1 Mose 2:24) “Heloo kome” ni amɛaatsɔ lɛ yaa shɔŋŋ fe shi ni amɛaahi yɛ hekome kɛkɛ. Nɔ ni enɛ tsɔɔ diɛŋtsɛ ji akɛ, wu lɛ kɛ ŋa lɛ etsɔ weku hee—weku ni baa klɛŋklɛŋ gbɛhe, shi jeee wekui amli ni amɛjɛ lɛ. (1 Korintobii 11:3) Ni kɛlɛ, enɛ biɔ ni wu kɛ ŋa fɛɛ awo amɛfɔlɔi, ni bei pii lɛ enɛ biɔ ni aná be aha amɛ. (Efesobii 6:2) Ni kɛji bɔ ni ohefatalɔ lɛ náa be ehaa efɔlɔi lɛ haa onuɔ he akɛ ohe sane ko gbaaa enaa loo ekwɛɛɛ otsiabo hu?

Nɔ ni obaanyɛ ofee:

Okɛ jwɛŋmɔ ni ja asusu sane lɛ he. Ani lɛɛlɛŋ akɛ ohefatalɔ lɛ kɛ ehe ekpɛtɛ efɔlɔi ahe fe nine, aloo eeenyɛ efee akɛ wekukpãa ni tamɔ nakai kãaa okɛ ofɔlɔi lɛ ateŋ? Kɛ́ nakai ji sane lɛ, ani eeenyɛ efee akɛ bɔ ni atsɔse bo aha lɛ ená bɔ ni onaa shihilɛ lɛ ohaa lɛ nɔ hewalɛ? Ani awuŋayeli fioo ko yɛ osane lɛ mli?—Abɛi 14:30; 1 Korintobii 13:4; Galatabii 5:26.

Ebaabi ni mɔ ajɛ anɔkwayeli mli epɛi lɛ diɛŋtsɛ emli dani eha sanebimɔi nɛɛ ahetoo. Shi ehe miihia akɛ ofee nakai. Kɛji saji ni kɔɔ shaahii kɛ shaayeimɛi ahe lɛ ji nɔ ni bei pii lɛ ekɛ naataamɔi baa okɛ ohefatalɔ lɛ teŋ lɛ, no lɛ naagba ni oyɔɔ lɛ ji gbalashihilɛ mli naagba—jeee shaahii kɛ shaayeimɛi anaagba.

Naagbai babaoo ni baa gbalashihilɛ mli lɛ jɛɔ hefatalɔi enyɔ lɛ ni kɛ amɛhe kpãaa gbee yɛ sane ko he lɛ hewɔ. Ani obaanyɛ obɔ mɔdɛŋ kɛkwɛ nii yɛ gbɛ ni ohefatalɔ lɛ susuɔ nii ahe ehaa lɛ nɔ? (Filipibii 2:4; 4:5) Nakai ji bɔ ni wu ko ni yɔɔ Mexico ni atsɛɔ lɛ Adrián lɛ fee. Ekɛɛ akɛ: “Weku mli ni atsɔse miŋa yɛ lɛ ná enɔ hewalɛ gbonyo, no hewɔ lɛ mikɛ mishaanuu kɛ mishaayoo ebɔɔɔ gbagbalii. Eshɛ he ko ni mikɛ amɛfo tako mli kwraa afii babaoo. Enɛ kɛ naagba ba wɔgbalashihilɛ lɛ mli ejaakɛ miŋa sumɔɔ lolo akɛ ebɛŋkɛ eweku lɛ, titri lɛ emami.”

Yɛ be ko sɛɛ lɛ, Adrián ŋmɛ pɛpɛɛpɛ kɛtsu sane lɛ he nii. Ekɛɛ akɛ: “Eyɛ mli akɛ mile akɛ kɛ́ miŋa kɛ efɔlɔi bɔ gbagbalii lɛ amɛbaaná ehenumɔi anɔ hewalɛ gbonyo moŋ, shi miyoo hu akɛ kɛ́ ekɛ amɛ fo tako mli hu lɛ, no hu kɛ naagba baaba. No hewɔ lɛ, mibɔ mɔdɛŋ bɔ ni manyɛ ni maha wekukpãa kpakpa abakã mikɛ mishaanuu kɛ mishaayoo teŋ, ní mabaa nakai wekukpãa lɛ yi.”b

Oshaanuu kɛ oshaayoo kɛ amɛhe woɔ nyɛgbalashihilɛ mli saji amli be fɛɛ be, ni amɛwoɔ nyɛŋaa be ni nyɛbiko amɛŋaawoo. Ŋa ko ni yɔɔ Kazakhstan ni atsɛɔ lɛ Nelya lɛ wie akɛ: “Ní wɔbote gbalashihilɛ mli lɛ, klɛŋklɛŋ afii kpawo lɛ wɔkɛ miwu weku lɛ hi shĩa kome mli. Béi te shi shii abɔ yɛ bɔ ni wɔtsɔseɔ wɔbii lɛ wɔhaa, minihoomɔ kɛ shĩa lɛ mli saamɔ he. Mikɛ miwu kɛ mishaayoo gba enɛ he sane, shi no moŋ tée naagbai krokomɛi ashi!”

Sane Lɛ:

Kɛ́ obote gbalashihilɛ mli lɛ, obɛ ofɔlɔi ashishi dɔŋŋ. Yɛ no najiaŋ lɛ Biblia lɛ kɛɔ akɛ “nuu fɛɛ nuu yitso ji Kristo, ni yoo fɛɛ yoo hu yitso ji nuu,” ni ji ewu lɛ. (1 Korintobii 11:3) Kɛlɛ, taakɛ awie kɛtsɔ hiɛ lɛ, esa akɛ wu kɛ ŋa lɛ fɛɛ kɛ woo aha amɛfɔlɔi. Yɛ anɔkwale mli lɛ, Abɛi 23:22 lɛ kɛɔ wɔ akɛ: “Bó otsɛ ni fɔo lɛ toi, ni kaagbe onyɛ he guɔ, kɛ́ egbɔ lɛ.” Shi kɛji ofɔlɔi—loo ohefatalɔi lɛ fɔlɔi—kũ amɛhiɛ amɛshwie anɔkwale ni eji akɛ wu lɛ ji eweku lɛ yitso lɛ nɔ, ni amɛbɔ mɔdɛŋ akɛ amɛaanyɛ nyɛnɔ ni nyɛkɛ amɛsusumɔi atsu nii hu?

Nɔ ni obaanyɛ ofee:

Bɔɔ mɔdɛŋ akɛ obaajɛ musuŋtsɔlɛ mli ona nɔ̃ hewɔ ni ofɔlɔi loo ohefatalɔ lɛ fɔlɔi sumɔɔ akɛ amɛkɛ amɛhe awo nyɛgbalashihilɛ mli saji amli lɛ. Ryan ni awie ehe kɛtsɔ hiɛ lɛ kɛɛ akɛ, “Yɛ shihilɛi komɛi amli lɛ, esa akɛ bii lɛ aha amɛfɔlɔi ale akɛ amɛji mɛi komɛi ni he hiaa lolo yɛ amɛshihilɛ mli.” Ekolɛ jeee gbɛ amɛjeɔ amɛkɛ amɛhe woɔ nyɛgbalashihilɛ mli saji amli lɛ, ni abaanyɛ atsɔ ŋaawoo ni Biblia lɛ kɛhaa lɛ nɔ atsu naagba nɛɛ he nii. Biblia lɛ kɛɔ akɛ: “Ni kɛji mɔ ko kɛ mɔ ko ná sane ko lɛ, nyɛnanaa nyɛhaa nyɛhe ni nyɛkɛfafaa nyɛhe.” (Kolosebii 3:13) Shi kɛji nyɛgbalashihilɛ mli saji amli ní oshaanuu loo oshaayoo kɛ ehe woɔ lɛ etee nɔ aahu kɛshɛ he ni ebaanyɛ ekɛ naagba aba okɛ ohefatalɔ lɛ teŋ hu?

Gbalashihilɛ mli hefatalɔi komɛi eha amɛfɔlɔi ele amɛhusu. Enɛ etsɔɔɔ akɛ nyɛbaawo amɛ mla yɛ enɛ he.c Bei pii lɛ, nɔ ni he hiaa ji ni otsɔ onifeemɔi anɔ oha amɛle akɛ ohefatalɔ lɛ baa klɛŋklɛŋ gbɛhe yɛ oshihilɛ mli. Ákɛ nɔkwɛmɔnɔ lɛ, wu ko ni yɔɔ Japan ni atsɛɔ lɛ Masayuki lɛ kɛɛ akɛ: “Kɛ́ ofɔlɔi tsɔɔ amɛsusumɔi yɛ sane ko he kɛkɛ lɛ, kaakpɛlɛ nɔ amrɔ nɔŋŋ. Kaimɔ akɛ ooto weku hee shishi. No hewɔ lɛ, tsɔ hiɛ ole ohefatalɔ lɛ jwɛŋmɔ yɛ amɛsusumɔ lɛ he.”

Kɛ́ ana nɔ̃ hewɔ ni shaahii kɛ shaayeimɛi kɛ amɛhe woɔ amɛbii agbalashihilɛ mli saji amli, ni hefatalɔi lɛ bɔ mɔdɛŋ akɛ amɛhaŋ naagbai lɛ awo amɛteŋ béi lɛ, abaanyɛ ajie naagbai ni enɛ kɛbaa mɔ kɛ ehefatalɔ teŋ lɛ kɛya. Jenny wie yɛ sane nɛɛ he akɛ: “Bei komɛi lɛ kɛ́ mikɛ miwu miigba sane ni kɔɔ wɔfɔlɔi ahe lɛ wɔwieɔ kɛ henumɔi, ni wɔnaa faŋŋ akɛ wɔbaanyɛ wɔye wɔhe awui kɛ́ wɔtee nɔ wɔwie wɔshi mɔ kroko lɛ fɔlɔi afãtɔɔi. Yɛ naagbee mli lɛ, wɔbɔ mɔdɛŋ wɔkpa amɛfãtɔɔi ahe wiemɔ, ni wɔŋɔ hegbɛ lɛ kɛtsu naagba ni eba lɛ he nii. Enɛ eha wɔbatsɔmɔ wu kɛ ŋa ni bɛŋkɛ amɛhe kpaakpa.”—w10-E 02/1.