Bɔ Ni Osusuɔ Susuma Lɛ He Ohaa Lɛ Saa Owala He
“Gbɔmɔ tsɔ wala susuma.”—1 Mose 2:7.
1, 2. Mɛni jamɔi babaoo heɔ yeɔ yɛ gbɔmɔ kɛ susuma lɛ he?
ETAMƆ nɔ ni jamɔi fɛɛ tsɔɔ akɛ gbɔmɔ yɛ susuma ni gbooo. New Catholic Encyclopedia lɛ kɛɔ akɛ susuma lɛ, “Nyɔŋmɔ bɔ ni ekɛwo gbɔmɔtso lɛ mli yɛ hɔŋɔɔ be mli.” Ekɛɔ hu akɛ, susuma ni gbooo lɛ he tsɔɔmɔ lɛ ji Kristendom sɔlemɔi lɛ “akoŋtɛi lɛ ateŋ ekome.” Nakai nɔŋŋ hu The New Encyclopedia Britannica lɛ kɛɔ akɛ, “nɔ ni Moslembii heɔ yeɔ ji akɛ susuma lɛ baa shihilɛ mli yɛ be mli ni gbɔmɔtso lɛ baa shihilɛ mli lɛ nɔŋŋ mli; yɛ no sɛɛ lɛ, lɛ diɛŋtsɛ enaa eshihilɛ, ni ekome ni ekɛ gbɔmɔtso lɛ feɔ lɛ sɛɛ etsɛɛɛ.”
2 Jamɔi ni tamɔ nɛkɛ heɔ yeɔ akɛ susuma lɛ shiɔ gbɔmɔtso lɛ kɛ gbele ba pɛ, ni akɛ eyaa nɔ ehiɔ shi kɛyaa naanɔ, enaagbee shihilɛ he ji ŋwɛi toiŋjɔlɛ mli ŋɔɔmɔ, ehiɔ hetsuumɔ he lɛ fioo, aloo naanɔ piŋmɔ yɛ hɛl la mli. Abuɔ gbele akɛ eji gbɛ ni kɛ mɔ yaa naanɔ wala mli yɛ mumɔŋ shihilɛ he lɛ. Taakɛ niŋmalɔ ko kɛɛ yɛ wolo ni ji We Believe in Immortality lɛ mli lɛ: “Mibuɔ Gbele akɛ anunyam gbɛfaa kpeteŋkpele ko. Mibuɔ Gbele akɛ ŋwɛi nɔwomɔ shihilɛ.”
3. Mɛni ji Bokagbɛ jamɔi sɔrɔtoi ahemɔkɛyeli?
3 Hindubii, Buddhabii kɛ mɛi krokomɛi heɔ susuma ni faa kɛyaa he kroko lɛ amɛyeɔ. Nɔ ni fata enɛ he ji hemɔkɛyeli ko akɛ yɛ gbele mli lɛ susuma lɛ yaa gbɔmɔtso kroko mli, afɔɔ lɛ ekoŋŋ akɛ gbɔmɔ kroko aloo hiɛkalɔ kroko. Kɛ gbɔmɔ lɛ fee ekpakpa yɛ tsutsu lɛ, akɛɔ akɛ abaaku sɛɛ afɔ esusuma lɛ ekoŋŋ akɛ gbɔmɔ wulu ko. Shi kɛ efee efɔŋ yɛ tsutsu lɛ, abaaku sɛɛ afɔ lɛ akɛ mɔ ni baa shi aloo akɛ kooloo loo kooloo bibioo ko.
4, 5. Mɛni hewɔ ehe hiaa akɛ aaale anɔkwale ni kɔɔ susuma lɛ he lɛ?
4 Shi kɛji akɛ adesai bɛ susuma ni gbooo hu? Mɛni, kɛji akɛ gbele jeee “ŋwɛi nɔwomɔ shihilɛ,” ejeee gbɛ ni kɛ mɔ yaa mumɔŋ naanɔ wala shihilɛ mli aloo ejeee nɔ ni haa aboteɔ bɔɔ nɔ kroko mli, kɛha mɛi fɛɛ ni gboiɔ lɛ? Belɛ susuma ni gbooo he hemɔkɛyeli lɛ kɛ mɔ baaya gbɛ ni ejaaa nɔ. Wolo ni ji Official Catholic Teachings lɛ kɛɔ akɛ sɔlemɔ lɛ maa susuma ni gbooo he hemɔkɛyeli lɛ nɔ mi ejaakɛ kɛ aheee enɛ ayeee lɛ “ebaaha esɔlemɔi lɛ, eyarafeemɔi ashishi nifeemɔi lɛ kɛ jamɔ mli nifeemɔi ni akɛhaa gbohii lɛ afee nɔ ni shishinumɔ loo jwɛŋmɔ bɛ mli.” No hewɔ lɛ ekɔɔ mɔ ko shihilɛ gbɛ, ejamɔ kɛ enaanɔ wɔsɛɛ be he.—Abɛi 14:12; Mateo 15:9.
5 Ehe miihia ni wɔle anɔkwale ni kɔɔ nɛkɛ hemɔkɛyeli nɛɛ he lɛ. Yesu kɛɛ: “Mɛi ni jaa [Nyɔŋmɔ lɛ] ja amɛja lɛ yɛ mumɔ kɛ anɔkwale mli.” (Yohane 4:24) Anaa anɔkwale ni kɔɔ adesa susuma lɛ he lɛ yɛ Nyɔŋmɔ Wiemɔ ni ji Biblia lɛ mli. Nɔ ni yɔɔ Ŋmalɛi ni jɛ mumɔŋ lɛ mli ji Nyɔŋmɔ yiŋtoi ni ajie lɛ kpo, no hewɔ lɛ wɔbaanyɛ wɔna hekɛnɔfɔɔ akɛ ekɛɔ wɔ nɔ ni ji anɔkwale lɛ. (1 Tesalonikabii 2:13; 2 Timoteo 3:16, 17) Yesu kɛɛ Nyɔŋmɔ yɛ sɔlemɔ mli akɛ: “O-Wiemɔ lɛ, anɔkwaleŋ.”—Yohane 17:17.
Ani Abɔ lɛ kɛ Susuma ni Gbooo?
6. Mɛni 1 Mose mli sane lɛ kɛɔ wɔ yɛ gbɔmɔ bɔɔ he yɛ faŋŋ mli?
6 Klɛŋklɛŋ Mose 2:7 kɛɔ wɔ akɛ: “Ni Yehowa Nyɔŋmɔ kɛ shikpɔŋ su shɔ gbɔmɔ, ni emu wala mumɔ ewo egugɔ mli, ni gbɔmɔ tsɔ wala susuma.” Sane lɛ ekɛɛɛ akɛ Nyɔŋmɔ kɛ susuma ni gbooo wo gbɔmɔ lɛ mli. Ekɛɔ akɛ beni Nyɔŋmɔ hewalɛ lɛ kanya Adam gbɔmɔtso lɛ, “gbɔmɔ lɛ tsɔ wala susuma.” No hewɔ lɛ gbɔmɔ ji susuma. Ebɛ susuma ko.
7. Mɛni hewɔ abɔ adesai ashwie shikpɔŋ nɛɛ nɔ?
7 Nyɔŋmɔ bɔ Adam koni ehi shikpɔŋ nɔ, jeee ŋwɛi. Shikpɔŋ lɛ jeee he ko ni abaaka Adam yɛ koni akwɛ akɛ ehe baasa aha ŋwɛi lo. Nyɔŋmɔ bɔ shikpɔŋ lɛ “koni ahi nɔ,” ni Adam ji klɛŋklɛŋ gbɔmɔ ni bahi nɔ. (Yesaia 45:18; 1 Korintobii 15:45) Yɛ sɛɛ mli beni Nyɔŋmɔ bɔ Hawa eha Adam akɛ eŋa lɛ, Nyɔŋmɔ yiŋtoo kɛha amɛ lɛ ji ni amɛfɔ ni amɛyi shikpɔŋ lɛ nɔ obɔ ni amɛfee lɛ paradeiso akɛ adesai anaanɔ shia.—1 Mose 1:26-31; Lala 37:29.
8. (a) Adam shihilɛ damɔ mɛni nɔ? (b) Eji Adam efeee esha kulɛ, nɛgbɛ ebaaya nɔ ehi shi yɛ?
8 He ko he ko bɛ Biblia lɛ mli ni kɛɔ akɛ Adam fa ko gbooo. Nɔ ni tamɔɔɔ nakai lɛ, eshihilɛ damɔ nɔ ko nɔ, edamɔ toiboo ni eeefee eha Nyɔŋmɔ mla nɔ. Kɛ eku nakai mla lɛ mli lɛ, kɛkɛ lɛ mɛni? Naanɔ wala yɛ mumɔŋ shihilɛ he lɛ? Dabi kwraa. Shi moŋ, ‘gbo eeegbo.’ (1 Mose 2:17) Ebaaku esɛɛ eya he ni ejɛ kɛba lɛ: “Su jio, ni su mli oooku osɛɛ kɛaatee.” (1 Mose 2:7; 3:19) Adam bɛ he ko he ko aloo ebɛ shihilɛ ko mli dani abɔ lɛ, ni eyaŋ shihilɛ ko hu mli yɛ egbele sɛɛ. No hewɔ lɛ nibii enyɔ pɛ eyɔɔ ni ebaahala emli ekome: (1) toiboo kɛ wala aloo (2) toigbele kɛ gbele. Eji Adam eyafeee esha kulɛ, ebaahi shikpɔŋ lɛ nɔ kɛya naanɔ. Eyaŋ ŋwɛi kɔkɔɔkɔ.
9. Te Biblia lɛ tsɛɔ gbele yɛ gbɛ ni ja nɔ ehaa tɛŋŋ, ni mɛni hewɔ?
9 Adam gbo toi, ni egbo. (1 Mose 5:5) Etoigbalamɔ ji gbele. Ejeee gbɛ ni kɛ mɔ yaa “anunyam gbɛfaa kpeteŋkpele” mli, shi moŋ gbɛ ni kɛ mɔ yaa shihilɛ mli ni abɛ dɔŋŋ mli. No hewɔ lɛ gbele jeee naanyo, shi moŋ eji nɔ ni Biblia lɛ tsɛɔ lɛ lɛ, “henyɛlɔ.” (1 Korintobii 15:26) Eji Adam yɛ susuma ni gbooo ni baaya ŋwɛi kɛji akɛ efee toiboo kulɛ, gbele baafee jɔɔmɔ. Shi jeee nakai eji. Eji loomɔ. Ni yɛ Adam esha lɛ hewɔ lɛ, gbele loomɔ lɛ gbɛ eshwa adesai fɛɛ nɔ ejaakɛ eshwiei ji adesai fɛɛ—Romabii 5:12.
10. Mɛɛ naagba ni hiɛdɔɔ yɔɔ mli teɔ shi beni aheɔ ayeɔ akɛ Adam yɛ susuma ni gbooo lɛ?
10 Kɛfata he lɛ, eji abɔ Adam akɛ mɔ ni yɔɔ susuma ni gbooo ni abaanyɛ apiŋ lɛ yɛ hɛl la mli kɛya naanɔ kɛ efee esha lɛ, belɛ mɛni hewɔ abɔɔɔ lɛ kɔkɔ yɛ enɛ he? Mɛni hewɔ akɛɛ lɛ kɛkɛ akɛ ebaagbo ni eku esɛɛ kɛya shikpɔŋ su mli lɛ? Kwɛ bɔ ni ejaaa kwraa akɛ aaabu Adam fɔ akɛ abaapiŋ lɛ kɛya naanɔ yɛ etoigbele hewɔ, yɛ be mli ni abɔɔɔ lɛ kɔkɔ yɛ enɛ he! Shi Nyɔŋmɔ lɛ, “egbɛi fɛɛ jalɛ ni.” (5 Mose 32:4) Ehe ehiaaa ni abɔ Adam kɔkɔ yɛ hɛl la ko ni efɔŋfeelɔi asusumai ni gbooo lɛ baaya mli lɛ he. Hɛl ko ni tamɔ nɛkɛ bɛ, ni asaŋ susumai ni gbooo hu bɛ. (Yeremia 19:6; 32:35) Naanɔ piŋmɔ ko bɛ shikpɔŋ su mli.
Bɔ ni Biblia lɛ kɛ “Susuma” Tsuɔ Nii Ehaa
11. (a) Ana Ŋleshi wiemɔ “susuma” ni yɔɔ Biblia mli lɛ kɛjɛ mɛɛ Hebri kɛ Hela wiemɔi amli? (b) Te King James Version lɛ tsɔɔ Hebri kɛ Hela wiemɔi kɛha “susuma” lɛ shishi ehaa tɛŋŋ?
11 Ŋleshi wiemɔ kɛha “susuma” ni yɔɔ Hebri Ŋmalɛi lɛ amli lɛ jɛ Hebri wiemɔ ni ji neʹphesh mli, ni enɛ jeɔ kpo fe shii 750 sɔŋŋ. Nɔ ni tamɔ nakai nɔŋŋ yɛ Hela Ŋmalɛi lɛ amli ji psy·kheʹ, ni jeɔ kpo fe shii 100 lɛ. New World Translation of the Holy Scriptures lɛ tsɔɔ nɛkɛ wiemɔi nɛɛ ashishi be fɛɛ be akɛ “susuma.” Bibliai krokomɛi kɛ wiemɔi sɔrɔtoi baanyɛ atsu nii. Gbɛi komɛi ni King James Version lɛ tsɔɔ nɔ etsɔɔ neʹphesh lɛ shishi ji: tsinebaa, kooloo, gbɔmɔtso, mumɔ, bɔɔ nɔ, gbo (gbɔmɔtso), akɔnɔ, tsui, wala, gbɔmɔ, jwɛŋmɔ, mɔ diɛŋtsɛ, susuma, nɔ ko. Ni etsɔɔ psy·kheʹ shishi akɛ: tsui, wala, jwɛŋmɔ, susuma.
12. Te Biblia lɛ kɛ Hebri kɛ Hela wiemɔi kɛha “susuma” lɛ tsuɔ nii ehaa tɛŋŋ?
12 Biblia lɛ tsɛɔ bɔɔ nii ni yɔɔ ŋshɔ mli lɛ akɛ ne‘phesh: “Susuma fɛɛ susuma ni yɔɔ nui amli lɛ.” (3 Mose 11:10, New World Translation) Wiemɔ lɛ baanyɛ akɔ shikpɔŋ nɔ kooloi ahe: “Shikpɔŋ lɛ awo bɔɔ nii [susumai] ni hiɛ kamɔ yɛ amɛhenɔ: shia kooloi kɛ nii ni wamɔɔ kɛ shikpɔŋ kooloi yɛ amɛhenɔ.” (1 Mose 1:24) Akɛ ne‘phesh damɔɔ shi ahaa gbɔmɛi shii ohai abɔ. “Ni susumai fɛɛ ni jɛ Yakob hɛ mli ji susumai nyɔŋmai-kpawo.” (2 Mose 1:5) Psy·kheʹ ni akɛtsu nii yɛ nɛkɛ gbɛ nɔ lɛ he nɔkwɛmɔ nɔ ji 1 Petro 3:20. Egbaa Noa adeka lɛ ni “ahere mɛi fioo, ni ji mɛi kpaanyɔ lɛ asusumai ayiwala, yɛ kɛtsɔ nu mli lɛ” he sane.
13. Mɛɛ gbɛi sɔrɔtoi anɔ Biblia lɛ kɛ wiemɔ “susuma” lɛ tsuɔ nii yɛ?
13 Biblia lɛ kɛ wiemɔ “susuma” tsuɔ nii yɛ gbɛi krokomɛi pii anɔ. 1 Mose 9:5 (New World Translation) kɛɔ akɛ: “Mabi nyɛ susumai ala shi kɛaajɛ nyɛ dɛŋ.” Aatsɔɔ yɛ biɛ akɛ susuma lɛ yɛ la. 2 Mose 12:16 kɛɔ akɛ: “Akatsu nitsumɔ ko nitsumɔ ko yɛ mli, ja nɔ ni mɔ fɛɛ mɔ [susuma fɛɛ susuma] aaaye kɛkɛ he nii nyɛtsu.” Enɛ hu tsɔɔ akɛ susuma yeɔ nii. 5 Mose 24:7 wieɔ gbɔmɔ ni “juɔ enyɛmimɛi asusumai” lɛ he. Eka shi faŋŋ akɛ jeee susuma ni gbooo ajuɔ lɛ lɛ. Lala 119:28 kɛɔ akɛ: “Misusuma miifo kɛ awerɛho sɔŋŋ.” No hewɔ lɛ susuma lɛ baanyɛ aye awerɛho ni ewɔɔɔ. Biblia lɛ tsɔɔ hu akɛ susuma lɛ baanyɛ agbo. Egboɔ, “Aaafo nakai susuma lɛ kɛaajɛ emaŋ lɛŋ ashɛ afɔ.” (3 Mose 7:20) “Ekaya gbonyo [susuma ni egbo] ko he.” (4 Mose 6:6) “Wɔkɛ wɔwala [wɔsusuma] aaatsake nyɛnɔ.” (Yoshua 2:14) “Mɔ fɛɛ mɔ [susuma fɛɛ susuma] ni boŋ nakai gbalɔ lɛ toi lɛ, aaakpata ehiɛ kwraa.” (Bɔfoi lɛ Asaji 3:23) “Nɔ fɛɛ nɔ [susuma fɛɛ susuma] ni hiɛ ka gbo.”—Kpojiemɔ 16:3.
14. Mɛni Biblia lɛ tsɔɔ yɛ faŋŋ mli akɛ susuma lɛ ji.
14 Eyɛ faŋŋ akɛ bɔ ni Biblia lɛ kɛ neʹphesh kɛ psy·kheʹ tsuɔ nii lɛ tsɔɔ akɛ susuma lɛ ji gbɔmɔ lɛ, aloo yɛ kooloi agbɛfaŋ lɛ, bɔɔ nɔ lɛ. Ejeee mɔ aŋkro lɛ fa ko ni gbooo. Yɛ anɔkwale mli lɛ, akɛ ne’phesh tsuɔ nii ahaa Nyɔŋmɔ diɛŋtsɛ: “Yehowa lɛ, . . . mɔ fɔŋ kɛ mɔ ni sumɔɔ yiwalɛ lɛ, esusuma nyɛɔ amɛ.”—Lala 11:5.
Woloŋlelɔi Pii Kpɛlɛɔ Nɔ
15. Mɛni woji pii ni ehe gbɛi yɛ je lɛŋ lɛ kɛɔ yɛ susuma ni gbooo he tsɔɔmɔ lɛ he?
15 Woloŋlelɔi pii kpɛlɛɔ nɔ akɛ Biblia lɛ ewieee susuma ni gbooo he. The Concise Jewish Encyclopedia lɛ kɛɔ akɛ: “Biblia lɛ etsɔɔɔ susuma ni gbooo he tsɔɔmɔ ko, ni asaŋ enɛ hu ejeee kpo yɛ mra be mli rabifoi lɛ awoji amli.” The Jewish Encyclopedia lɛ kɛɔ akɛ: “Nɔ ni aheɔ ayeɔ akɛ susuma lɛ yaa nɔ ehiɔ shi yɛ be mli ni gbɔmɔtso lɛ egbo sɛɛ lɛ ji jeŋ nilee loo Nyɔŋmɔ jamɔ he nikasemɔ he yiŋsusumɔ ko kɛkɛ shi jeee hemɔkɛyeli ko kɛkɛ nɔ edamɔ, ni atsɔɔɔ enɛ yɛ Ŋmalɛ Krɔŋkrɔŋ lɛ amli he ko he ko kwraa.” The Interpreter’s Dictionary of the Bible lɛ wie akɛ: “Nephesh lɛ kome eyaaa nɔ ehiii wala mli ni gbɔmɔtso fataaa he, shi ekɛ lɛ fɛɛ gboɔ. . . . Biblia mli ŋmalɛ ko bɛ ni fiɔ wiemɔ akɛ ‘susuma’ lɛ jeɔ kpo kɛjɛɔ gbɔmɔtso lɛ mli kɛ gbele ba pɛ lɛ sɛɛ.”
16. Mɛni woji krokomɛi hu wieɔ yɛ susuma lɛ he?
16 Agbɛnɛ, Expository Dictionary of Bible Words lɛ kɛɔ akɛ: “Belɛ ‘susuma’ ni yɔɔ Kpaŋmɔ Momo lɛ mli lɛ etsɔɔɔ gbɔmɛi adesai afa ko ni jeee heloo ni yaa nɔ ehiɔ shi yɛ gbele sɛɛ. Nɔ ni [Ne’phesh] tsɔɔ titri ji wala ni gbɔmɛi adesai yɔɔ eko lɛ. . . . Nɔ ni [psy·kheʹ] shishinumɔ diɛŋtsɛ ji lɛ ji nɔ ko ni bɔ ni ejeɔ kpo yɛ Kpaŋmɔ Momo lɛ mli lɛ ema nɔ mi, shi jeee bɔ ni etsɔɔ yɛ Hela kusum nifeemɔi amli lɛ.” Ni The Eerdmans Bible Dictionary lɛ tsɔɔ akɛ, yɛ Biblia lɛ mli lɛ wiemɔ ni ji susuma lɛ “etsɔɔɔ gbɔmɔ adesa lɛ fa ko, shi moŋ gbɔmɔ muu lɛ fɛɛ. . . . Yɛ shishinumɔ nɛɛ naa lɛ, belɛ gbɔmɛi adesai bɛ susuma—amɛji susumai.”—Nɔ ni atsɔmɔ lɛ ji wɔnɔ.
17. Mɛni Katolik woji enyɔ kpɛlɛɔ nɔ yɛ “susuma” lɛ he?
17 New Catholic Encyclopedia lɛ po kpɛlɛɔ nɔ akɛ: “Biblia mli wiemɔ kɛha susuma lɛ tsɔɔ gbɔmɔ muu lɛ fɛɛ yɛ be babaoo mli.” Ekɛfata he akɛ: “Mligbalamɔ ko bɛ gbɔmɔtso kɛ susuma teŋ yɛ Kpaŋmɔ Momo lɛ mli. . . . Eyɛ mli akɛ wɔkɛ [ne‘phesh] tsɔɔ wɔ wiemɔ ni ji susuma shishi moŋ, shi etsɔɔɔ susuma ni esoro lɛ yɛ gbɔmɔtso lɛ loo mɔ aŋkro lɛ he. . . . Wiemɔ ni ji [psy·kheʹ] ji Kpaŋmɔ Hee lɛ mli nɔ ni kɛ [ne‘phesh] kpaa gbee. . . . Anaaa jwɛŋmɔ ni ahiɛ akɛ susuma lɛ hiɔ wala mli yɛ gbele sɛɛ lɛ yɛ Biblia lɛ mli oya.” Ni Georges Auzou, French Katoliknyo Ŋmalɛ Krɔŋkrɔŋ lɛ he Nilelɔ lɛ ŋma yɛ ewolo ni ji La Parole de Dieu (Nyɔŋmɔ Wiemɔ Lɛ) mli akɛ: “‘Susuma’ lɛ he jwɛŋmɔ, ni eshishi ji mumɔŋ nɔ kwraa, ni bɛ heloo, ni esoro no yɛ ‘gbɔmɔtso’ lɛ he lɛ . . . bɛ Biblia lɛ mli.”
18. (a) Mɛni encyclopedia ko wie yɛ bɔ ni Biblia lɛ kɛ wiemɔ ni ji “susuma” tsuɔ nii ehaa lɛ he? (b) Nɛgbɛ Nyɔŋmɔ jamɔ he nilelɔi na jwɛŋmɔ lɛ akɛ nɔ ko hiɔ wala mli yɛ be mli gbɔmɔ lɛ egbo sɛɛ lɛ kɛjɛ?
18 No hewɔ lɛ, The Encyclopedia Americana lɛ kɛɛ: “Jwɛŋmɔ ni Kpaŋmɔ Momo lɛ hiɛ yɛ gbɔmɔ he ji nɔ kome loo ekomefeemɔ, jeee susuma kɛ gbɔmɔtso ni efee ekome. Eyɛ mli akɛ afɔɔ Hebri wiemɔ [ne’phesh] shishitsɔɔmɔ akɛ ‘susuma’ moŋ, shi ebaafee nɔ ni ejaaa akɛ aaatsɔɔ shishi yɛ Hela shishinumɔ naa. . . . Asusuko da akɛ [Ne’phesh] hiɔ shi ni esoro lɛ yɛ gbɔmɔtso lɛ he. Afɔɔ Hela wiemɔ [psy·kheʹ] shishitsɔɔmɔ akɛ ‘susuma’ yɛ Kpaŋmɔ Hee lɛ mli, shi esaaa akɛ anuɔ shishi amrɔ nɔŋŋ akɛ etamɔ bɔ ni Hela jeŋ nilelɔi lɛ nuɔ nɛkɛ wiemɔ nɛɛ shishi lɛ. . . . Biblia lɛ etsɔɔ bɔ ni gbɔmɔ hiɔ shi yɛ gbele sɛɛ lɛ mli yɛ faŋŋ mli.” Ekɛfata he akɛ: “Nyɔŋmɔ jamɔ he nilelɔi kɛ amɛhe yafɔ jeŋ nilelɔi awiemɔi anɔ koni amɛna mɔ aŋkro lɛ shihilɛ yɛ gbele sɛɛ lɛ mlitsɔɔmɔ ni sa.”
Jeee Biblia lɛ Shi Moŋ Jeŋ Nilee
19. Hela jeŋ nilee kɛ susuma ni gboo hemɔkɛyeli lɛ yɛ tsakpaa yɛ mɛɛ gbɛ nɔ?
19 Eji anɔkwale akɛ Nyɔŋmɔ jamɔ he nilelɔi kpɛlɛ jeŋ nilelɔi ni ji wɔŋjalɔi asusumɔi lɛ anɔ koni amɛkɛ susuma ni gbooo he tsɔɔmɔ lɛ aba. French wolo ni ji Dictionnaire Encyclopédigue de la Bible (Biblia Encyclopedia) lɛ kɛɔ akɛ: “Shihilɛ ni gbele bɛ mli he jwɛŋmɔ lɛ jɛ Hela susumɔ mli.” The Jewish Encyclopedia lɛ maa nɔ mi akɛ: “Susuma ni gbooo he hemɔkɛyeli lɛ ba Yudafoi lɛ aŋɔɔ kɛtsɔ Hela susumɔ ni amɛkɛkpe lɛ hewɔ, ni titri lɛ kɛtsɔ Plato ni ji etsɔɔlɔ titri lɛ” ni hi shi yɛ afi ohai ejwɛ dani Kristo ba lɛ mli lɛ nɔ. Plato he eye akɛ: “Susuma lɛ gbooo ni anyɛɛɛ akpata ehiɛ, ni wɔsusumai lɛ baahi jeŋ kroko mli diɛŋtsɛ!”—The Dialogues of Plato.
20. Mɛɛ be mli ni te fee tɛŋŋ ni wɔŋjalɔi ajeŋ nilee babote Kristo jamɔ mli?
20 Mɛɛ be mli nɛkɛ wɔŋjalɔi ajeŋ nilee nɛɛ bote Kristo jamɔ mli? The Encyclopaedia Britannica lɛ kɛɔ akɛ: “Kɛjɛ afii ohai 2 AD lɛ teŋgbɛ kɛbaa lɛ mli ni Kristofoi ni akɛ Hela jeŋ nilee etsɔse amɛ lɛ je shishi amɛnu he akɛ ehe miihia ni amɛjie amɛhemɔkɛyeli kpo yɛ enɛ mli, kɛha amɛ diɛŋtsɛ amɛhiɛsaa yɛ woloŋlee mli kɛ agbɛnɛ koni amɛkɛtsake wɔŋjalɔi ni le woloŋ lɛ. Jeŋ nilee ni sa amɛ jogbaŋŋ ji Plato tsɔɔmɔ lɛ.” No hewɔ lɛ taakɛ Britannica lɛ kɛɔ lɛ, “mra be mli Kristofoi ni ji jeŋ nilelɔi lɛ kpɛlɛ jwɛŋmɔ ni Helabii hiɛ yɛ susuma ni gbooo lɛ he lɛ nɔ.” Paapa John Paul II lɛ po kpɛlɛ nɔ akɛ “Hela jeŋ nilee he tsɔɔmɔi ni akaa yiŋ awieɔ” lɛ fata susuma ni gbooo he tsɔɔmɔ lɛ he. Shi Kristendom ni kpɛlɛ Hela jeŋ nilee he tsɔɔmɔi ni akaa yiŋ awieɔ lɛ nɔ lɛ tsɔɔ akɛ eŋmɛɛ anɔkwale ni mli ka shi faŋŋ ni atsɔɔ yɛ 1 Mose 2:7 akɛ: “Gbɔmɔ tsɔ wala susuma” lɛ he.
21. Susuma ni gbooo hemɔkɛyeli lɛ yaa sɛɛ shɔŋŋ kɛyashɛɔ nɛgbɛ?
21 Shi susuma ni gbooo tsɔɔmɔ lɛ yaa sɛɛ shɔŋŋ fe Plato. Wɔkaneɔ yɛ wolo ni ji The Religion of Babylonia and Assyria, ni Morris Jastrow ŋma lɛ mli akɛ: “Babilonia jeŋ nilelɔi gbala amɛjwɛŋmɔ kɛtee . . . shihilɛ ni gbele bɛ mli he hiamɔ sane lɛ nɔ waa. . . . Gbele ji gbɛ ni kɛ mɔ yaa shihilɛ loo wala kroko mli.” Agbɛnɛ hu wolo ni ji Egyptian Religion, ni Siegfried Morenz ŋma lɛ kɛɔ akɛ: “Mra be mli Mizraimbii lɛ buɔ wala yɛ gbele sɛɛ akɛ shihilɛ yɛ shikpɔŋ nɔ lɛ nɔtsamɔ.” The Jewish Encyclopedia lɛ yɔɔ tsakpaa ni ka nɛkɛ blema jamɔi nɛɛ kɛ Plato teŋ lɛ yɛ be mli ni ekɛɛ akɛ aha Plato na susuma ni gbooo he jwɛŋmɔ lɛ “kɛtsɔ Orphic kɛ Eleusinian teemɔŋ saji ni akɛ Babilonia kɛ Mizraim susumɔi ewo mli yɛ naakpɛɛ gbɛ nɔ lɛ nɔ.”
22. Mɛni hewɔ abaanyɛ akɛɛ akɛ atɛo susuma ni gbooo tsɔɔmɔ lɛ dumɔwui lɛ yɛ adesa yinɔsane shishijee be mli diɛŋtsɛ lɛ?
22 No hewɔ lɛ, susuma ni gbooo he jwɛŋmɔ lɛ ji blema nɔ. Yɛ anɔkwale mli lɛ, eshishifaa yaa shɔŋŋ kɛboteɔ adesa yinɔsane shishijee mli! Beni akɛɛ Adam akɛ kɛ ebooo Nyɔŋmɔ toi lɛ ebaagbo lɛ, akɛ jwɛŋmɔ kroko ni teɔ shi woɔ enɛ fɔ Adam ŋa Hawa hiɛ. Akɛɛ yoo nɛɛ akɛ: “Jeee gboimɔ nyɛaagboi.” Biɛ ji he ni atɛo susuma ni gbooo he tsɔɔmɔ dumɔwu lɛ yɛ. Ni kɛjɛ no beaŋ kɛbaa nɛɛ, hiŋmɛigbelemɔi loo yinɔi fɛɛ ni enyiɛ sɛɛ eba lɛ ekpɛlɛ wɔŋjalɔi ajwɛŋmɔ akɛ ‘ogboŋ diɛŋtsɛ shi obaaya nɔ ohi shi lɛ nɔ.’ Kristendom ni gbala esɛɛnyiɛlɔi lɛ ewo hemɔkɛyeli kwamɔ mli ni ekɛte shi ewo Nyɔŋmɔ yiŋtoi kɛ esuɔmɔnaa nifeemɔ lɛ fata he.—1 Mose 3:1-5; Mateo 7:15-23; 13:36-43; Bɔfoi lɛ Asaji 20:29, 30; 2 Tesalonikabii 2:3, 7.
23. Namɔ kɛ susuma ni gbooo tsɔɔmɔ lɛ ba, ni mɛni hewɔ?
23 Namɔ nyiɛ gbɔmɛi ahiɛ ni eha amɛhe amale ni tamɔ nɛkɛ amɛye lɛ? Yesu ha ale mɔ ni eji beni ekɛɛ jamɔ mli hiɛnyiɛlɔi ni yɔɔ egbii lɛ amli lɛ akɛ: “Nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee. . . . Kɛ eemale lɛ, lɛ diɛŋtsɛ enii ahe ewieɔ, ejaakɛ amalelɔ lɛ malemɔtsɛ ji lɛ.” (Yohane 8:44) Hɛɛ, Satan ji mɔ ni kɛ susuma ni gbooo he tsɔɔmɔ lɛ ba koni ekɛgbala gbɔmɛi kɛjɛ anɔkwa jamɔ he. No hewɔ lɛ ahaa mɔ ko shihilɛ gbɛ kɛ ehiɛnɔkamɔ kɛha wɔsɛɛ be bajeɔ gbɛ ni ejaaa lɛ nɔ kɛtsɔɔ he ni eheɔ tsɔɔmɔi ni ba kɛjɛ klɛŋklɛŋ amale ni aŋma yɛ Biblia lɛ mli lɛ eyeɔ lɛ nɔ, eyɛ mli akɛ yɛ nakai be lɛ mli lɛ, ŋwanejee ko bɛ he akɛ Hawa nu onufu lɛ shishi akɛ egboŋ yɛ heloo mli kwraa po lɛ.
24. Mɛɛ saji abaanyɛ abi yɛ gbɛ ni ja nɔ yɛ naanɔ wala kɛ shihilɛ ni gbele bɛ mli lɛ he?
24 Biblia lɛ etsɔɔɔ akɛ adesai yɛ susuma ni gbooo. Belɛ mɛni hewɔ ewieɔ naanɔ wala hiɛnɔkamɔ he lɛ? Agbɛnɛ hu, ani Biblia lɛ ewieee yɛ 1 Korintobii 15:53 akɛ: “Ja nɛkɛ fitemɔ nɔ nɛɛ wo nɔ ni fiteee lɛ, ni nɛkɛ gbele nɔ nɛɛ wo nɔ ni gbooo lɛ”? Ani Yesu eyaaa ŋwɛi yɛ eshitee lɛ sɛɛ, ni ani etsɔɔɔ akɛ mɛi krokomɛi hu baanyɛ aya ŋwɛi? Abaasusu enɛ kɛ sanebimɔi krokomɛi ahe yɛ nikasemɔ ni nyiɛ sɛɛ lɛ mli.
Sanebimɔi Kɛha Emlitii
◻ Mɛni jamɔi pii heɔ yeɔ yɛ susuma Iɛ he?
◻ Mɛɛ gbɛ nɔ Biblia lɛ tsɔɔ yɛ akɛ akɛ susuma ni gbooo ebɔɔɔ gbɔmɔ?
◻ Mɛni jeɔ kpo faŋŋ yɛ bɔ ni Biblia Iɛ kɛ Hebri kɛ Hela wiemɔi kɛha susuma” lɛ tsuɔ nii lɛ mli?
◻ Mɛni woloŋlelɔi pii kɛɔ yɛ bɔ ni Biblia Iɛ wieɔ susuma lɛ he ehaa lɛ he?
◻ Susuma ni gbooo he tsɔɔmɔ lɛ yaa sɛɛ shɔŋŋ kɛyashɛɔ nɛgbɛ yɛ yinɔsane mli?
[Mfoniri ni yɔɔ baafa 5]
Susumai ji amɛ fɛɛ