NIKASEMƆ 06
Ani Mɔ Ko Ni Bɔ Nibii?
“[Nyɔŋmɔ ŋɔɔ] wala jɛɔ.” (Lala 36:9) Ani oheɔ enɛ oyeɔ? Mɛi komɛi kɛɔ akɛ tsei, kooloi, kɛ gbɔmɛi ba kɛkɛ, ni jeee mɔ ko bɔ. Kɛ́ nakai ni lɛ, belɛ, jeee yiŋtoo ko hewɔ wɔyɔɔ shihilɛ mli lɛ. Shi, kɛ́ Yehowa Nyɔŋmɔ ji mɔ ni bɔ nibii nɛɛ, belɛ, yiŋtoo ko hewɔ ebɔ amɛ lɛ, aloo jeee nakai?a Obaana nɔ ni Biblia lɛ ewie yɛ tsei, kooloi, kɛ gbɔmɛi ni abɔ lɛ ahe, kɛ nɔ hewɔ ni jwɛŋmɔ yɔɔ nɔ ni Biblia lɛ ewie lɛ mli lɛ.
1. Ani abɔ je lɛ?
Biblia lɛ kɛɛ: “Shishijee lɛ, Nyɔŋmɔ bɔ ŋwɛi kɛ shikpɔŋ lɛ.” (1 Mose 1:1) Jeŋ shikpalɔi pii kpɛlɛɔ nɔ akɛ je lɛ yɛ shishijee. Mɛɛ gbɛ nɔ Nyɔŋmɔ tsɔ ebɔ je lɛ? Ekɛ emumɔ krɔŋkrɔŋ lɛ, ni ji ehewalɛ lɛ, tsu nii kɛbɔ nɔ fɛɛ nɔ ni yɔɔ je lɛ mli lɛ—ŋulamikui, ŋulamii, shikpɔŋ lɛ, kɛ nibii krokomɛi ni yɔɔ ŋwɛiniiaŋ lɛ.—1 Mose 1:2.
2. Mɛni hewɔ Nyɔŋmɔ bɔ shikpɔŋ lɛ?
Yehowa “ebɔɔɔ [shikpɔŋ] lɛ efolo, shi moŋ eshɔ̃ ni ahi nɔ.” (Yesaia 45:18) Esaa shikpɔŋ lɛ nɔ fɛfɛo koni adesai ahi nɔ kɛya naanɔ. (Kanemɔ Yesaia 40:28 kɛ 42:5.) Jeŋ shikpalɔi ena akɛ, nibii komɛi ni tamɔ wɔshikpɔŋ lɛ yɛ ŋwɛiniiaŋ, shi wɔshikpɔŋ lɛ yɛ srɔto kwraa, ejaakɛ no pɛ nɔ adesai baanyɛ ahi.
3. Mɛni hewɔ esoro gbɔmɛi yɛ kooloi ahe lɛ?
Be ni Yehowa bɔ shikpɔŋ lɛ sɛɛ lɛ, ebɔ nibii krokomɛi ewo nɔ. Klɛŋklɛŋ lɛ, ebɔ tsei kɛ kooloi. No sɛɛ lɛ, “Nyɔŋmɔ bɔ gbɔmɔ lɛ tamɔ bɔ ni eyɔɔ lɛ.” (Kanemɔ 1 Mose 1:27.) Mɛni hewɔ esoro gbɔmɛi kwraa lɛ? Akɛni Nyɔŋmɔ bɔ wɔ tamɔ bɔ ni eyɔɔ lɛ hewɔ lɛ, wɔbaanyɛ wɔjie esui tamɔ suɔmɔ kɛ jalɛsaneyeli lɛ kpo. Ebɔ wɔ yɛ gbɛ ni baahã wɔnyɛ wɔkase wiemɔi, nii afee wɔ fɛo, ni wɔsumɔ lala hu nɔ. Agbɛnɛ hu, esoro wɔ yɛ kooloi ahe, ejaakɛ wɔbaanyɛ wɔjá wɔ-Bɔlɔ lɛ.
KASEMƆ PII OFATA HE
Obaana nɔ ni tsɔɔ akɛ abɔ tsei, kooloi, kɛ gbɔmɛi, kɛ nɔ hewɔ ni jwɛŋmɔ yɔɔ nɔ ni Biblia lɛ ewie yɛ nibii ni abɔ lɛ he lɛ mli lɛ. Obaana nɔ ni sui ni adesai yɔɔ lɛ tsɔɔ wɔ yɛ Nyɔŋmɔ he.
4. Abɔ tsei, kooloi, kɛ gbɔmɛi
Kɛ́ adesai kase tsei, kooloi, kɛ gbɔmɛi ahe nii ni amɛkɛfee nɔ ko lɛ, ajieɔ amɛyi. Hewɔ lɛ, namɔ esa akɛ wɔjie eyi yɛ tsei, kooloi, kɛ gbɔmɛi ahewɔ? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
Mɛni adesai ekwɛ nibii ni abɔ lɛ nɔ amɛfee?
Shĩa fɛɛ shĩa lɛ, mɔ ko ji mɔ ni to he ŋaa loo mɔ ko ni tsɔɔ bɔ ni esa akɛ ama lɛ ahã, ni ama. Shi namɔ to nibii ni yɔɔ je lɛ mli lɛ ahe ŋaa ni efee? Nyɛkanea Hebribii 3:4 lɛ, ni nyɛsusua sanebimɔi nɛɛ ahe:
Mɛni onyaa he yɛ bɔ ni abɔ nibii komɛi ahã lɛ ahe?
Ani jwɛŋmɔ yɛ mli akɛ wɔbaahe wɔye akɛ mɔ ko ni bɔ je lɛ kɛ nibii fɛɛ ni yɔɔ mli lɛ? Mɛni hewɔ?
Ani ole akɛ . . .
obaanyɛ ona saji kɛ vidioi ni wieɔ sane nɛɛ he yɛ jw.org lɛ nɔ, yɛ saneyitsei ni ji, “Ani Mɔ Ko Ni Fee?” kɛ “Bɔ Ni Fee Ni Wala Ba—Susumɔi Ni Mɛi Hiɛ Yɛ He” lɛ ashishi?
“Yɛ anɔkwale mli lɛ, shĩa fɛɛ shĩa lɛ mɔ ko kɛ̃ ma, shi mɔ ni fee nibii fɛɛ ji Nyɔŋmɔ”
5. Jwɛŋmɔ yɛ nɔ ni Biblia lɛ wieɔ yɛ adebɔɔ he lɛ mli
Biblia lɛ wieɔ bɔ ni fee ni abɔ shikpɔŋ lɛ, kɛ tsei, kooloi, kɛ gbɔmɛi ni yɔɔ nɔ lɛ he, yɛ 1 Mose 1 lɛ mli. Ani sane nɛɛ ji anɔkwale aloo eji adesã ko kɛkɛ? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
Ani Biblia lɛ tsɔɔ akɛ, akɛ gbii ekpaa ni eko fɛɛ eko hiɛ ŋmɛlɛtswai 24 ni bɔ shikpɔŋ lɛ kɛ nibii ni yɔɔ nɔ lɛ?
Ani osusuɔ akɛ jwɛŋmɔ yɛ nɔ ni Biblia lɛ wieɔ yɛ adebɔɔ he lɛ mli? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
Nyɛkanea 1 Mose 1:1 lɛ, ni nyɛsusua sanebimɔ nɛɛ he:
Jeŋ shikpalɔi kɛɛ je lɛ yɛ shishijee. Mɛɛ gbɛ nɔ nɔ ni amɛkɛɛ lɛ, kɛ nɔ ni wɔkane yɛ 1 Mose 1:1 lɛ yaa?
Mɛi komɛi susuɔ akɛ Nyɔŋmɔ bɔ nɔ ko ni wala yɔɔ mli, ni nakai nii lɛ tsake aahu kɛyashi abaná nibii srɔtoisrɔtoi yɛ shikpɔŋ lɛ nɔ. Nyɛkanea 1 Mose 1:21, 25, 27 lɛ, ni nyɛsusua sanebimɔi nɛɛ ahe:
Ani Biblia lɛ tsɔɔ akɛ, Nyɔŋmɔ bɔ nɔ ko ni wala yɔɔ mli, ni nakai nii lɛ tsake ni etsɔ ŋshɔŋ loi, kooloi, kɛ gbɔmɛi? Aloo ebɔ tsei kɛ kooloi srɔtoisrɔtoi lɛ eko fɛɛ eko kɛ gbɔmɔ?
6. Esoro adesai kwraa
Esoro wɔ kwraa yɛ kooloi ni Yehowa bɔ lɛ ahe. Nyɛkanea 1 Mose 1:26 lɛ, ni nyɛsusua sanebimɔ nɛɛ he:
Abɔ wɔ tamɔ bɔ ni Nyɔŋmɔ yɔɔ lɛ. Akɛni wɔjieɔ suɔmɔ kɛ musuŋtsɔlɛ kpo hewɔ lɛ, mɛni no tsɔɔ wɔ yɛ Nyɔŋmɔ he?
MƐI KOMƐI KƐƆ AKƐ: “Nɔ ni Biblia lɛ wieɔ yɛ adebɔɔ he lɛ ji adesã ko kɛkɛ.”
Te bo hu osusuɔ tɛŋŋ? Mɛni hewɔ?
EMLI OTI
Yehowa ji mɔ ni bɔ je lɛ kɛ nibii fɛɛ ni yɔɔ mli lɛ.
Mɛni Okase?
Ani Biblia lɛ kɛɛ abɔ je lɛ, aloo abɔɔɔ?
Ani Nyɔŋmɔ bɔ nɔ ko ni wala yɔɔ mli, ni nakai nii lɛ tsake aahu kɛyashi abaná nibii srɔtoisrɔtoi, aloo ebɔ nibii nɛɛ fɛɛ ekomekomei?
Mɛni hewɔ esoro adesai kwraa lɛ?
EHE SAJI KROKOMƐI
Obaana nibii ni tsɔɔ akɛ Bɔlɔ ko yɛ.
Obaana gbɛ ni tsɛ ko tsɔ nɔ egbála nɔ ni Biblia lɛ ewie yɛ adebɔɔ he lɛ mli etsɔɔ ebinuu fioo.
Obaana kɛji Nyɔŋmɔ tsɔ sutsakemɔ nɔ ebɔ nibii.
“Ani Nyɔŋmɔ Tsɔ Sutsakemɔ Nɔ Ebɔ Nibii Srɔtoi Ni Wala Yɔɔ Amɛmli Lɛ?” (jw.org lɛ nɔ sane)
Obaana kɛji blema kooloi komɛi awui ni ana kɛ niiamlitaomɔi komɛi ni jeŋ shikpalɔi efee lɛ tsɔɔ akɛ abɔ nibii loo abɔɔɔ nibii.
Bɔ Ni Fee Ni Nibii Ni Yɔɔ Wala Mli Lɛ Ba Shihilɛ Mli—Sanebimɔi Enumɔ Ni Esa Akɛ Osusu He (broshuɔ)
a Abaawie nɔ hewɔ ni Nyɔŋmɔ bɔ adesai lɛ he yɛ nikasemɔ 25 lɛ mli.