Wɔbaanyɛ Wɔkase Nii Kɛjɛ Klɛŋklɛŋ Adesai Enyɔ lɛ Ŋɔɔ

NYƆŊMƆ kwɛ shibɔlemɔ ŋulami ni ji Shikpɔŋ lɛ shikamɔ jogbaŋŋ. Eesaa nɔ koni adesai ahi nɔ. Ena akɛ nɔ fɛɛ nɔ ni efeɔ lɛ hi. Yɛ anɔkwale mli lɛ, beni egbe nitsumɔ nɛɛ naa lɛ, ejaje akɛ “ehi naakpa.” (1 Mose 1:12, 18, 21, 25, 31) Shi kɛlɛ, dani ebaashɛ nakai naagbee ni yeɔ emuu lɛ, Nyɔŋmɔ wie nɔ ko ni “ehiii” he. Yɛ anɔkwale mli lɛ, Nyɔŋmɔ efeee nɔ ko ni yeee emuu. Sane lɛ kɛkɛ ji akɛ egbeko enibɔɔ lɛ naa. Yehowa kɛɛ akɛ: “Ehiii akɛ gbɔmɔ lɛ kome hiɔ shi; mafee hefatalɔ ko ni sa lɛ maha lɛ.”—1 Mose 2:18.

Eji Yehowa yiŋtoo akɛ adesai aweku lɛ aná naanɔ shihilɛ mli ŋɔɔmɔ yɛ gbɔmɔtsoŋ hewalɛnamɔ, miishɛɛ, kɛ nii babaoo yɛ shikpɔŋ nɔ paradeiso ko mli. Adesai fɛɛ atsɛ lɛ ji Adam. Eŋa Hawa batsɔ “hiɛkãlɔi fɛɛ anyɛ.” (1 Mose 3:20) Eyɛ mli amrɔ nɛɛ akɛ shikpɔŋ lɛ nɔ eyi kɛ amɛshwiei akpekpei akpei abɔ moŋ, shi eka shi faŋŋ akɛ adesai yeee emuu.

Ale Adam kɛ Hawa sane lɛ jogbaŋŋ. Shi mɛɛ sɛɛnamɔ ni anyɛɔ atsuɔ he nii eji kɛha wɔ? Mɛni wɔbaanyɛ wɔkase kɛjɛ klɛŋklɛŋ adesai enyɔ lɛ aniiashikpamɔ lɛ mli?

“Nuu kɛ Yoo Ebɔ Amɛ”

Beni Adam woɔ kooloi lɛ agbɛi lɛ, ena akɛ amɛyɛ hefatalɔi ni ákɛ, lɛ lɛ ebɛ eko. No hewɔ lɛ, beni ena bɔɔ nɔ fɛfɛo ni Yehowa shɔ kɛjɛ eŋmawu mli lɛ, emii shɛ ehe. Be mli ni Adam yɔse akɛ eji efã ko ni ekaaa lɛ, ejaje akɛ: “Agbɛnɛ enɛ ji wu ni jɛ miwui lɛ amli kɛ loo ni jɛ miheloo lɛ mli; aaatsɛ́ mɔ nɛ yoo, ejaakɛ nuu mli ajie lɛ kɛjɛ.”—1 Mose 2:18-23.

‘Yelikɛbualɔ’ he miihia nuu. Amrɔ nɛɛ ená mɔ ni sa. Hawa ji mɔ ni sa jogbaŋŋ akɛ efee Adam hefatalɔ—yɛ amɛ abɔɔ shia lɛ kɛ kooloi lɛ akwɛmɔ mli, yɛ bii afɔmɔ mli, kɛ yɛ jwɛŋmɔ kanyamɔ ni ekɛaaha akɛ anɔkwa hefatalɔ sɛɛfilɔ lɛ nɔ.—1 Mose 1:26-30.

Yehowa kɛ nibii fɛɛ ni gbalashihilɛ mli hefatalɔi lɛ baasumɔ lɛ ha amɛ. Kɛtsɔ Hawa ni ekɛba ewu lɛ ŋɔɔ ni ekpɛlɛ amɛ ekomefeemɔ lɛ nɔ lɛ, Nyɔŋmɔ to gbalashihilɛ gbɛjianɔtoo lɛ kɛ weku ni kɛtsɔ no nɔ lɛ abaato maŋ he gbɛjianɔ lɛ shishi. Mose Klɛŋklɛŋ Wolo lɛ mli sane ni aŋma afɔ̃ shi lɛ kɛɔ akɛ: “Nuu aaashi etsɛ kɛ enyɛ, ni eeekpɛtɛ eŋa he, ni amɛaatsɔ heloo kome.” Ni beni Yehowa jɔɔ klɛŋklɛŋ gbalashihilɛ mli hefatalɔi enyɔ lɛ ní ekɛɛ amɛ akɛ amɛfɔ ni amɛyi afa lɛ, no mli lɛ ekpɛ mli faŋŋ akɛ afɔ gbekɛ fɛɛ gbekɛ awo weku ko ni susuɔ mɔ he mli, ní tsɛ kɛ nyɛ yɔɔ mli koni amɛkwɛ lɛ.—1 Mose 1:28; 2:24.

“Yɛ Nyɔŋmɔ Subaŋ Nɔ”

Adam ji Nyɔŋmɔ bi ni eye emuu, ni E-fee lɛ yɛ ‘esubaŋ nɔ tamɔ ehenɔ.’ Shi akɛni “Nyɔŋmɔ lɛ Mumɔ ni” hewɔ lɛ, bɔ ni amɛje amɛhe ha lɛ nyɛŋ afee heloonaa nɔ. (1 Mose 1:26; Yohane 4:24) Bɔ ni amɛje amɛhe ha lɛ yɛ sui ni ha gbɔmɔ nɔ kwɔ kwraa fe kooloi lɛ mli. Hɛɛ, sui ni akɛwo gbɔmɔ mli kɛjɛ shishijee mli ji suɔmɔ, nilee, hewalɛ, kɛ jalɛsaneyeli. Aha lɛ heyeli hegbɛ kɛ nyɛmɔ kɛha mumɔŋ nibii. Mligbɛ henilee ko, loo henilee yeɔ buaa lɛ koni ele srɔtofeemɔ ni yɔɔ ekpakpa kɛ efɔŋ teŋ. Gbɔmɔ yɛ nilee nyɛmɔ, ni yeɔ buaa lɛ koni esusu yiŋtoo hewɔ ni adesai yɔɔ shihilɛ mli lɛ he, ni ekɛná e-Bɔlɔ lɛ he nilee, agbɛnɛ koni ená ekɛ nakai Mɔ lɛ teŋ wekukpaa ni mli wa. Ákɛ mɔ ni awula lɛ lɛ, Adam yɛ nibii fɛɛ ni he hiaa lɛ koni enyɛ etsu egbɛnaa nii akɛ mɔ ni kwɛɔ Nyɔŋmɔ ninenaa nitsumɔ yɛ shikpɔŋ nɔ lɛ nɔ.

Hawa Fee Esha

Ŋwanejee ko bɛ he akɛ Adam ha Hawa le naatsii nɔ kome ni Yehowa kɛfɔ̃ amɛnɔ lɛ oya nɔŋŋ akɛ: Amɛbaanyɛ amɛye tsei ayibii ni yɔɔ amɛ abɔɔ ni ji amɛshia lɛ mli lɛ ateŋ eko fɛɛ eko akɛ ja ekome—ekpakpa kɛ efɔŋ lee tso lɛ. Esaaa akɛ amɛyeɔ eko. Kɛji amɛye eko lɛ, nakai gbi lɛ nɔŋŋ amɛbaagboi.—1 Mose 2:16, 17.

Etsɛɛɛ ni atee sane ko ni kɔɔ tso yibii ni agu eyeli lɛ shi. Onufu ko ni mumɔŋ bɔɔ nɔ ko kɛtsu nii akɛ enaawielɔ lɛ yanina Hawa ni ekɛ lɛ taa saji anaa kɛ hiɛdɔɔ. Onufu lɛ bi tamɔ mɔ ko ni leee nɔ ko akɛ: “Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ?” Hawa ha hetoo akɛ hegbɛ yɛ akɛ amɛyeɔ tsei lɛ ayibii lɛ fɛɛ eko akɛ ja ekome pɛ. Shi kɛlɛ onufu lɛ ku Nyɔŋmɔ naa, ni ekɛɛ yoo lɛ akɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” Yoo lɛ bɔi tso ni agu eyeli lɛ namɔ yɛ gbɛ ni yɔɔ srɔto kwraa nɔ. “Tso lɛ hi ha yeli . . . efeɔ hiŋmɛii akɔnɔ.” Akɛni alaka Hawa kwraa hewɔ lɛ, eku Nyɔŋmɔ mla mli.—1 Mose 3:1-6; 1 Timoteo 2:14.

Ani anyɛŋ nɔ ko afee yɛ Hawa esha lɛ he? Dabi kɔkɔɔkɔ! Kɛ ohe awo eshihilɛ lɛ mli. Onufu lɛ wiemɔ lɛ fite nɔ ni Nyɔŋmɔ kɛ Adam ewie lɛ kwraa. Te obaanu he oha tɛŋŋ kɛji gbɔ ko folɔ mɔ ko ni osumɔɔ lɛ ni oheɔ lɛ oyeɔ lɛ naa akɛ mɔ ni yeee anɔkwa? Kulɛ esa akɛ Hawa afee enii yɛ gbɛ srɔto nɔ, ni ekɛjie etsine ni eje kɛ mlifu kpo, koni ekabo toi po. Ejaakɛ namɔ ji onufu lɛ ni eeeje Nyɔŋmɔ jalɛ lɛ kɛ ewu lɛ wiemɔ lɛ he ŋwane? Kulɛ esa akɛ bulɛ ni eyɔɔ kɛha yitsoyeli he shishitoo mla lɛ hewɔ lɛ, Hawa abi ŋaawoo dani efee yiŋkpɛɛ ko. Nakai esa akɛ wɔfee kɛji akɛ akɛ sane ko ni kɛ Nyɔŋmɔ famɔi ni ekɛha lɛ kpãaa gbee bafɔ wɔhiɛ. Ni kɛlɛ, Hawa kɛ ehe fɔ̃ Mɔ ni kaa lɛ lɛ wiemɔi lɛ anɔ, ni eesumɔ ni ekojo lɛ diɛŋtsɛ ehe yɛ nɔ ni ja kɛ nɔ ni ejaaa he. Babaoo ni eyaa nɔ ejwɛŋɔ nakai susumɔ lɛ he lɛ, babaoo ni enáa he miishɛɛ. Mɛɛ tɔmɔ eji nɛkɛ akɛ ekpɛlɛ akɔnɔ fɔŋ nɔ, yɛ nɔ najiaŋ ni esa akɛ ejie kɛjɛ ejwɛŋmɔ mli loo ni ekɛ eweku yitso lɛ asusu saji ahe!—1 Korintobii 11:3; Yakobo 1:14, 15.

Adam Bo Eŋa lɛ Gbee Toi

Etsɛɛɛ ni Hawa tsɔ Adam yiŋ koni efata ehe yɛ esha lɛ mli. Te wɔbaatsɔɔ shiŋŋfeemɔ ni abɛ yɛ gbɛ ni eŋmɛ lɛ mli wɔha tɛŋŋ? (1 Mose 3:6, 17) Adam kɛ anɔkwayeli he shitee-kɛ-woo kpe. Ani ebaabo e-Bɔlɔ lɛ, mɔ ni ha lɛ nɔ fɛɛ nɔ, ni eŋa, Hawa ni esumɔɔ lɛ lɛ fata he lɛ toi? Ani Adam baatao Nyɔŋmɔ gbɛtsɔɔmɔ yɛ nɔ ni ebiɔ ni efee amrɔ nɛɛ he? Aloo nuu lɛ baasumɔ koni eyafata eŋa lɛ he yɛ ehe esha lɛ mli? Adam le jogbaŋŋ akɛ nɔ ni yoo lɛ kpaa gbɛ akɛ ebaaná kɛtsɔ tso ni agu eyeli lɛ ni eye lɛ mli ji lakamɔ. Akɛ mumɔ tsirɛ bɔfo Paulo ni eŋma akɛ: “Jeee Adam alaka lɛ, shi yoo lɛ alaka, ni ebote nɔtɔmɔ mli.” (1 Timoteo 2:14) No hewɔ lɛ Adam je gbɛ ehala akɛ ebaatse Yehowa hiɛ atua. Eka shi faŋŋ akɛ gbeyei ni esheɔ akɛ abaagbála ekɛ eŋa lɛ teŋ lɛ da kwraa fe hemɔkɛyeli ni eyɔɔ yɛ nyɛmɔ ni Nyɔŋmɔ yɔɔ ni ekɛaatsu shihilɛ lɛ he nii lɛ mli.

Adam nifeemɔ lɛ ji he ni agbeɔ. Nɔ ni jɛ mli ba hu ji bii fɛɛ ni Yehowa jɛ mɔbɔnalɛ mli eŋmɛ lɛ gbɛ koni etsɔ amɛtsɛ lɛ agbee, akɛni afɔ amɛ fɛɛ yɛ esha shishi gbele fɔbuu mli lɛ hewɔ. (Romabii 5:12) Kwɛ bɔ ni pɛsɛmkunya mli ni ajɛ afeee toiboo lɛ he nyɔmɔwoo lɛ da waa ha!

Nɔ ni Jɛ Esha Mli Kɛba

Nɔ ni jɛ esha mli ba amrɔ nɔŋŋ ji hiɛgbele. Yɛ nɔ najiaŋ ni amɛkɛ miishɛɛ baajo foi ni amɛkɛ Yehowa ayawie lɛ, gbalashihilɛ mli hefatalɔi lɛ yatee amɛhe. (1 Mose 3:8) Amɛkɛ Nyɔŋmɔ teŋ naanyobɔɔ lɛ fite. Eyɛ mli akɛ amɛyi enyɔ lɛ fɛɛ amɛle akɛ amɛku Nyɔŋmɔ mla mli moŋ, shi beni abibii amɛ saji yɛ nɔ ni amɛfee lɛ he lɛ, amɛjieee heshwamɔ ko kpo. Kɛtsɔ tso yibii ni agu eyeli ni amɛye lɛ nɔ lɛ, amɛkpoo ŋwɛi ejurɔfeemɔ.

Nɔ ni jɛ mli ba ji akɛ, Nyɔŋmɔ tsɔɔ akɛ piŋmɔi babaoo baafata bii afɔmɔ he. Hawa baashwe ewu, ni ewu lɛ baaye enɔ. Nɔ ni jɛ mɔdɛŋ ni ebɔ koni enine ashɛ heyeli nɔ lɛ mli ba lɛ bafee nɔ ni atsɔ lɛ sɛɛsɛɛ pɛpɛɛpɛ. Agbɛnɛ Adam baaye shikpɔŋ lɛ nɔ nibaanii yɛ piŋmɔ mli. Yɛ nɔ najiaŋ ni eeeye nii yɛ Eden ni tɔlɛ bɛ mli lɛ, ebaabi ni egbo deŋme dani enine baashɛ shihilɛ mli hiamɔ nii anɔ kɛyashi eeeku esɛɛ kɛaatee su, nɔ̃ mli ni ajie lɛ kɛjɛ lɛ mli ekoŋŋ.—1 Mose 3:16-19.

Yɛ naagbee lɛ, ashwie Adam kɛ Hawa kɛjɛ Eden abɔɔ lɛ mli. Yehowa kɛɛ akɛ: “Naa, Adam etsɔ̃ tamɔ wɔteŋ mɔ kome, ni ele ekpakpa kɛ efɔŋ; ni agbɛnɛ beni afee ni ekakpã enine mli, ni etse walatso lɛ yibii lɛ hu eko, ni eye, ni ehiɛ miikã kɛmiiya naanɔ . . . ” Woloŋlelɔ Gordon Wenham wie akɛ: “Kojomɔ lɛ yeko emuu,” ni ashi aha wɔ koni wɔkɛ Nyɔŋmɔ susumɔ ni eshwɛ—ekolɛ, “ha mashwie lɛ kɛjɛ abɔɔ lɛ mli” lɛ aha. Bei pii lɛ, Biblia ŋmalɔ bɔɔ Nyɔŋmɔ susumɔ ni eye emuu lɛ he amaniɛ. Shi biɛ lɛ, Wenham tsa nɔ akɛ: “Naagbee wiemɔ ni ashi lɛ kɛ Nyɔŋmɔ nifeemɔ ni hiɛ foi lɛ he shishinumɔ haa. Egbeee ewiemɔ lɛ naa nɔŋŋ ni ashwie amɛ kɛjɛ abɔɔ lɛ mli.” (1 Mose 3:22, 23) Kɛtsɔ no nɔ lɛ, eyɛ faŋŋ akɛ sanegbaai fɛɛ ni kã Yehowa kɛ klɛŋklɛŋ gbalashihilɛ mli hefatalɔi lɛ ateŋ lɛ sɛɛ fo.

Adam kɛ Hawa gbooo diɛŋtsɛ yɛ heloo mli yɛ nakai ŋmɛlɛtswai 24 gbi lɛ mli. Shi kɛlɛ, amɛgboi yɛ mumɔŋ shishinumɔ naa. Akɛni amɛtsi amɛhe kɛjɛ wala Jɛɛhe lɛ he, ni anyɛŋ atsa amɛ hewɔ lɛ, amɛje shishi amɛbɔi shibaa kɛtee gbele mli. Susumɔ bɔ ni piŋmɔ ni mli wa ni amɛná lɛ ji ha beni amɛna gbele klɛŋklɛŋ kwraa lɛ beni Kain ni ji amɛ kromɔ bi lɛ gbe amɛbi ni ji enyɔ, Habel lɛ he okwɛ!—1 Mose 4:1-16.

Yɛ no sɛɛ lɛ, kɛji akɛbaato he lɛ nibii fioo ko pɛ ale yɛ klɛŋklɛŋ adesai enyɔ lɛ ahe. Amɛfɔ amɛbi nuu ni ji etɛ, Set beni Adam eye afii 130. Adam gbo afii 800 sɛɛ, beni eye afii 930, “ni efɔ bihii kɛ biyei” lɛ sɛɛ.—1 Mose 4:25; 5:3-5.

Nikasemɔ Kɛha Wɔ

Yɛ be mli ni ejie nɔ hewɔ ni adesa weku ni yɔɔ ŋmɛnɛ lɛ fiteɔ lɛ kpo etsɔɔ sɛɛ lɛ, nɔ ni aŋma afɔ̃ shi ni kɔɔ klɛŋklɛŋ gbalashihilɛ mli hefatalɔi lɛ ahe lɛ tsɔɔ shishijee nikasemɔ ko. Kwa ni akwaa koni aná heyeli kɛjɛ Yehowa Nyɔŋmɔ ŋɔɔ lɛ ji buuluufeemɔ. Yɛ anɔkwale mli lɛ, mɛi ni le nii waa lɛ jieɔ hemɔkɛyeli yɛ Yehowa kɛ e-Wiemɔ lɛ mli, jeee yɛ amɛnilee ni amɛkɛɛ amɛná lɛ mli. Yehowa ji mɔ ni tsɔɔ nɔ ni hi kɛ nɔ ni ehiii, ni shishinumɔ ni yɔɔ nɔ ni ja ni aaafee he lɛ ji toiboo ni aaafee aha lɛ. Efɔŋfeemɔ tsɔɔ emlai ni abaaku mli kɛ eshishitoo mlai lɛ ni abaakpoo.

Nyɔŋmɔ ha adesa nɔ fɛɛ nɔ ni ebaanyɛ eshwe ni ekã he eeha lɛ lolo—naanɔ wala, heyeli, tsui ni nyɔɔ mɔ mli, miishɛɛnamɔ, gbɔmɔtsoŋ hewalɛnamɔ, toiŋjɔlɛ, shweremɔ, kɛ nibii heei ni abaana. Shi kɛlɛ, enɛɛmɛi fɛɛ amli ŋɔɔmɔ ni wɔɔná lɛ biɔ ni wɔ fɛɛ wɔkɛ wɔhe afɔ̃ wɔ ŋwɛi Tsɛ lɛ, ni ji Yehowa nɔ.—Jajelɔ 3:10-13; Yesaia 55:6-13.

[Akrabatsa/Mfoniri ni yɔɔ baafa 26]

Adam kɛ Hawa—Ani Amɛji Blema Adesã Kɛkɛ?

He ni aheɔ paradeiso ko ni ehi shi pɛŋ ni afite lɛ yɛ esha hewɔ lɛ ayeɔ lɛ egbɛ eshwã blema Babilonbii, Ashurbii, Mizraimbii kɛ mɛi krokomɛi lɛ ateŋ. Saji babaoo ni afɔɔ he wiemɔ hu ji walatso, nɔ ni haa mɛi ni yeɔ enɔ yibii lɛ eko lɛ náa naanɔ wala lɛ. No hewɔ lɛ adesa kaiɔ akɛ nɔ ko ni yɔɔ oshara ba Eden.

Ŋmɛnɛ, mɛi babaoo jieɔ Biblia mli sane ni kɔɔ Adam kɛ Hawa he lɛ kɛjɛɔ amɛjwɛŋmɔ mli akɛ eji adesã kɛkɛ. Ni kɛlɛ, jeŋ nilelɔi babaoo kpɛlɛɔ nɔ akɛ adesa weku lɛ ji weku kome ni amɛ fɛɛ amɛjɛ hekome. Ewaa kɛhaa Nyɔŋmɔ jamɔ he nilelɔi pii akɛ amɛaakpɛlɛ nɔ akɛ akpã nibii ni jɛ esha ni blematsɛ kome fee lɛ mli aha adesai fɛɛ. Hemɔkɛyeli akɛ gbɔmɔ ba kɛjɛ jɛɛhe ni fe he kome pɛ lɛ baaha amɛná hegbɛ koni amɛkɛɛ akɛ blema tsɛmɛi babaoo fee shishijee esha lɛ. Kɛkɛ lɛ, enɛ baaha amɛkpoo akɛ Kristo ni ji “naagbee Adam” lɛ kpɔ̃ adesai. Shi Yesu kɛ ekaselɔi lɛ kɛ yiŋkɔshikɔshifeemɔ shihilɛ ko ni tamɔ nɛkɛ ekpeee. Amɛyɔse akɛ Mose Klɛŋklɛŋ Wolo lɛ mli saji lɛ ji anɔkwale.—1 Korintobii 15:22, 45; 1 Mose 1:27; 2:24; Mateo 19:4, 5; Romabii 5:12-19.