Ani Ohiŋmɛi “Nɔ Tse”?

“No hewɔ lɛ, kɛji ohiŋmɛi nɔ tse lɛ, ogbɔmɔtso muu lɛ aaayi kɛ la.”​—MATEO 6:⁠22.

 1. Mɛni hewɔ abaanyɛ akɛɛ akɛ hiŋmɛi lɛ ji naakpɛɛ nibɔɔ ni jwɛŋmɔ yɔɔ mli lɛ?

ABUƆ ninamɔ akɛ eji henumɔi lɛ ateŋ nɔ ni jara wa ni he hiaa fe fɛɛ ni titri lɛ, mɛi ni bɛ enɛ eko dɔŋŋ lɛ ji mɛi ni nuɔ he nakai. Jeŋ nilelɔi kɛɔ wɔ akɛ la kpɛmɔ he nibii akpekpei toi akpei abɔ tsɔɔ hiŋmɛi lɛ mli ajaŋmalaatɛi lɛ amli kɛhoɔ hiŋmɛitswaa fɛɛ hiŋmɛitswaa. Kɛ amɛyashɛ nɔ ni shaa mfoniri lɛ mli lɛ, wala yibii kakadaji kɛ kokolobii akpekpei ohai abɔ heɔ enɛɛmɛi. Akɛni la nɛɛ ekanya amɛ hewɔ lɛ, faji amli wala yibii lɛ jeɔ shishi amɛkɛ okadii ni tamɔ srawa hewalɛ majeɔ ansɔ lɛ. Kɛkɛ lɛ, faji sɔrɔtoi akpekpei toi akpei abɔ lɛ mli fa titri eje shishi amɛmiitsu nii koni amɛkwɛ nɔ ni amɛnine eshɛ nɔ lɛ mli ni amɛto amɛyiŋ yɛ nɔ ni esa akɛ amɛtsu he. Enɛɛmɛi fɛɛ yaa nɔ yɛ hiŋmɛitswaa kome he fã bibioo ko mli. Yɛ anɔkwale mli lɛ, hiŋmɛi lɛ ji nibɔɔ ni yɔɔ naakpɛɛ ni jwɛŋmɔ yɔɔ mli lɛ he nɔkwɛmɔ nɔ ko ni yɔɔ gbeyei waa.​—Lala 139:⁠14.

 2. Mɛɛ ninamɔ he nibii nɛkɛ eka he eji naakpɛɛ nii ni jeŋ nilelɔi enaaa naa lɛ?

² Eyɛ mli akɛ jeŋ nilelɔi le bɔ ni hiŋmɛi lɛ kɛ ansɔ lɛ tsuɔ nii ehaa lɛ saŋŋ moŋ, shi bɔ ni kɛ nɔ̃ hewɔ ni wɔfeɔ nɔ ni wɔnaa lɛ he nɔ ko wɔhaa lɛ he nɔ ko bibioo ko pɛ amɛle. Akɛ nɔkwɛmɔ nɔ lɛ, anuuu nɔ hewɔ ni mɔ ko sumɔɔ etsuru fe blu yɛ be mli ni mɔ kroko hu sumɔɔ blu fe etsuru, aloo nɔ hewɔ ni sui sɔrɔtoi nɛɛ saa wɔhe yɛ gbɛi sɔrɔtoi anɔ lɛ shishi jogbaŋŋ. Wekukpaa loo tsakpaa ni ka ninámɔ kɛ nifeemɔ teŋ lɛ efee nɔ ko ni anaaa naa lolo. Shi Yehowa, hiŋmɛi lɛ Feelɔ lɛ kɛ e-Bi kɛ hefatalɔ nitsulɔ, Yesu Kristo le heloonaa hiŋmɛi nɛɛ nitsumɔ ni yɔɔ hwanyaŋŋ lɛ jogbaŋŋ ni amɛle bɔ ni hiŋmɛi lɛ naa wɔnifeemɔi kɛ wɔshihilɛ nɔ hewalɛ lɛ.

“Gbɔmɔtso Lɛ Kane”

 3. “Gbɔmɔtso lɛ kane ji hiŋmɛi” lɛ yɛ mɛɛ gbɛ nɔ?

³ Yesu wie akɛ “gbɔmɔtso lɛ kane ji hiŋmɛi.” (Mateo 6:22) Akɛ kane tsuɔ nii koni he ko ni ewo duŋ atse bɔni afee ni wɔle he ni wɔyɔɔ, nɔ ni esa akɛ wɔfee, he ni esa akɛ wɔya kɛ ekrokomɛi. Kɛ́ wɔŋmɛ gbɛ ni la ba wɔgbɔmɔtso mli lɛ, wɔhiŋmɛi lɛ tsuɔ nii tamɔ bɔ ni kane tsuɔ lɛ pɛpɛɛpɛ Amɛyeɔ amɛbuaa wɔ ni wɔleɔ nibii ni ebɔle wɔhe kɛkpe lɛ, koni wɔkɛ jwɛŋmɔ atsu nii ni wɔfee nibii pɔtɛɛ, fe moŋ ni wɔɔnyiɛ yɛ duŋ mli ni wɔtɛrɛ ni ekolɛ wɔye wɔ diɛŋtsɛ wɔhe awui.

 4. Shihilɛ mli ni hiŋmɛi Iɛ bajeɔ lɛ naa wɔnɔ hewaIɛ yɛ mɛɛ gbɛ nɔ?

⁴ Shi he ni hiŋmɛi lɛ baanyɛ asɔmɔ akɛ gbɔmɔtso lɛ kane yɛ lɛ damɔ bɔ ni hiŋmɛi lɛ yɔɔ diɛŋtsɛ lɛ nɔ. Yɛ enɛ hewɔ lɛ, Yesu tee nɔ ekɛɛ akɛ: “No hewɔ lɛ, kɛji ohiŋmɛi nɔ tse lɛ, ogbɔmɔtso muu lɛ aaayi kɛ la; shi kɛji ohiŋmɛi nɔ tseee lɛ, ogbɔmɔtso muu lɛ aaawo duŋ. No hewɔ lɛ, kɛji la ni yɔɔ omli lɛ ji duŋ lɛ, te no duŋ lɛ aaafa aha tɛŋŋ!” (Mateo 6:​22, 23) Wɔnyɛɔ wɔjɛɔ enɛ mli wɔnaa hewalɛ babaoo ni hiŋmɛi lɛ naa yɛ wɔshihilɛ gbɛ fɛɛ nɔ lɛ, kɛha ekpakpa loo kɛha efɔŋ.

Hewalɛ Ni Hiŋmɛi Lɛ Naa Yɛ Nibii Anɔ

 5. Mɛni hiŋmɛi lɛ tsu yɛ Satan kaa ni ekɛba Hawa nɔ lɛ mli?

⁵ Susumɔ klɛŋklɛŋ yoo, Hawa sane lɛ he okwɛ. Anaa bɔ ni hiŋmɛi lɛ na enifeemɔi anɔ hewalɛ eha kɛjɛɔ Biblia mli sane ni kɛɔ bɔ ni ekɛ Shishiulɔ, Abonsam kpe lɛ mli, (2 Korintobi 11:3; 1 Timoteo 2:14) Satan kɛɛ akɛ ‘ehiŋmɛi baagbele’ kɛ eku ehiɛ eshwie Nyɔŋmɔ kita Iɛ nɔ ni eye “ekpakpa kɛ efɔŋ lee tso” lɛ nɔ yibii Iɛ eko lɛ. Te ehere enɛ nɔ eha tɛŋŋ? Biblia lɛ kɛɔ wɔ: “Yoo lɛ na akɛ tso lɛ hi ha yeli, ni efeɔ hiŋmɛi akɔnɔ, ni tso lɛ baa mɔ tsine.” Eha ehiŋmɛi kwɛ nɔ ko ni agu akɛ ekata he. Enɛ ji gbɛ ni ajeɔ akɛ hiŋmɛi lɛ tsuɔ nii yɛ gbɛ ni ejaaa nɔ. Mɛni jɛ mli ba? “Etse enɔ yibii lɛ eko ni eye.”​—1 Mose 2:​17; 3:​4-6.

 6. Hiŋmɛi lɛ naa wɔnifeemɔi anɔ hewalɛ yɛ mɛɛ gbɛ nɔ?

⁶ Ŋwanejee ko bɛ he akɛ, enɛ jeee klɛŋklɛŋ be mli ni Hawa na “ekpakpa kɛ efɔŋ lee tso Iɛ” aloo eyibii lɛ. Shi nɔ ko ni yɔɔ sɔrɔto miiya nɔ. Yɛ nɛkɛ be nɛɛ mli lɛ, ebatsɔ tamɔ nɔ ni “efeɔ hiŋmɛi akɔnɔ, ni tso lɛ baa mɔ tsine.” Nibii ni feɔ akɔnɔ ni baa mɔ tsine lɛ jeee sui ni ji hiŋmɛi lɛ nɔ, shi tsui lɛ nɔ. Shi nɔ ni hiŋmɛi lɛ naa lɛ haa tsui lɛ akɔnɔ kɛ tsinebaa lɛ mli bawaa aahu akɛ agbɛnɛ afeɔ he nɔ ko. Yɛ Hawa sane lɛ mli lɛ, nɔ ni jɛ nifeemɔ nɛɛ mli ba ji oshara kɛha lɛ diɛŋtsɛ ehe kɛ ewu Adam, kɛ agbɛnɛ kɛha amɛwɔsɛɛ be mli seshibii fɛɛ ni wɔ hu wɔfata he.​—Romabii 5:​12; Yakobo 1:​14, 15.

 7. Hiŋmɛi lɛ baje mɔdɛŋ ni Satan bɔ shii etɛ koni elaka Yesu lɛ mli yɛ mɛɛ gbɛ nɔ, ni mɛni jɛ mli ba?

⁷ Bɔni afee ni atsɔɔ akɛ wɔbaanyɛ wɔte shi wɔshi hewalɛ fɔŋ ni baanyɛ aba kɛtsɔ hiŋmɛi lɛ mli lɛ, wɔbaanyɛ wɔsusu Yesu Kristo nɔkwɛmɔ nɔ lɛ he. Enɛ kɔɔ Kaalɔ lɛ, Satan nɛɛ nɔŋŋ he. Beni ebɔ mɔdɛŋ nɔ ni ji shii etɛ ni egbala Yesu kɛjɛ Nyɔŋmɔ suɔmɔnaa nifeemɔ he lɛ, “Abonsam lɛ ŋɔ lɛ kɛtee gɔŋ kpeteŋkpele ni kwɔ ko nɔ ni eŋɔ je nɛŋ maŋtsɛyeli hei fɛɛ kɛ amɛnunyam lɛ etsɔɔ lɛ.” Kadimɔ akɛ Satan kɛ enaabu ewieee kɛkɛ akɛ ekɛ je nɛŋ hewalɛ kɛ anunyam fɛɛ baaha Yesu kɛ ekula shi ejalɛ. “Etsɔɔ lɛ” nɛkɛ nibii nɛɛ, ekɛ hewalɛ kpele ni hiŋmɛi yɔɔ lɛ tsu nii. Ni kɛlɛ, akɛni nɔ ni akɛhaa lɛ koni akɛka lɛ nɛɛ gbalaaa Yesu hiŋmɛi,’ shi moŋ ekɛ ehiŋmɛi ma wekukpaa ni ka ekɛ eŋwɛi Tsɛ Yehowa nɔ diɛŋtsɛ hewɔ lɛ, enyɛ eye omanye yɛ Satan ŋaatsɔɔ lɛ fitemɔ mli.​—Mateo 4:​8-10.

 8. Mɛni nibii wɔbaanyɛ wɔkase kɛjɛ Hawa kɛ Yesu nɔkwɛmɔ nii lɛ amli?

⁸ Mɛni wɔbaanyɛ wɔkase kɛjɛ nɔkwɛmɔ nii ni etee nɔ nɛɛ amli? Klɛŋklɛŋ lɛ, ákɛ nɔ ni wɔkɛ wɔhiŋmɛi maa nɔ lɛ baanyɛ aha ekpakpa loo efɔŋ ni tsui Iɛ shweɔ lɛ mli awa. Nɔ ni baajɛ enɛ mli aba ji nifeemɔ, ni kɛ jɔɔmɔ loo oshara baaba wɔ diɛŋtsɛ kɛ mɛi krokomɛi anɔ. Nɔ ni ji enyɔ lɛ, eka shi faŋŋ akɛ hiŋmɛi lɛ ji nɔ ko ni Satan sumɔɔ ni etsɔɔ nɔ ekɛshishiuɔ mɛi ni enine shɛɔ amɛnɔ lɛ. Yɛ Satan “jwɛŋmɔi” loo eŋaatsɔɔi ni etsɔɔ nɔ ekɛshiɛ shiuɔ adesai lɛ fɛɛ mli lɛ, etamɔ nɔ ni hiŋmɛi lɛ ni akɛtsuɔ nii lɛ ji nɔ ni mli wa fe fɛɛ.​—2 Korintobii 2:⁠11.

 9. Satan haa “hiŋmɛi lɛ asɛɛdii nii” lɛ shwereɔ ŋmɛnɛ yɛ mɛɛ gbɛ nɔ?

⁹ Ŋmɛnɛ, Satan kɛ nakai ŋaa nifeemɔ lɛ nɔŋŋ miitsu nii kɛmiigbala mɛi fɛɛ kɛmiijɛ Nyɔŋmɔ suɔmɔnaa nifeemɔ he. Satan tsɔɔ bɔ ‘ni je lɛ kpɛ́lɛɔ ni eyɔɔ fɛo lɛ nɔ ehaa “heloo Iɛ sɛɛdii nii lɛ kɛ hiŋmɛi lɛ asɛɛdii nii lɛ kɛ shihilɛ mli hewoo” lɛ shwereɔ. (1 Yohane 2:16) Anaa enɛ faŋŋ yɛ jarayeli je lɛ adafitswaa nibii amli. Ani ejeee anɔkwale akɛ mɛi ni eye omanye yɛ adafitswaa mli lɛ tsɔɔ nɔ ni hiŋmɛi lɛ naa lɛ nɔ amɛtsuɔ nii? Adafitswaa taoi akpei abɔ ni yɔɔ fɛo kɛ ehe nɔ okadii ni miikpɛ́lɛ kɛ mfonirii ni yɔɔ woji tɛtrɛbii kɛ adafitswaa woji amli, TV nɔ nibii ni yɔɔ fɛo lɛ fɛɛ​—kɛ eedii akpekpei toi akpekpei abɔ ni akɛfeɔ enɛɛmɛi fɛɛ lɛ​—yeɔ anɔkwale ni eji akɛ jwɛŋmɔ ni yɔɔ adafitswaa lɛ sɛɛ ji ni akɛkanya mɔ ni heɔ lɛ “hiŋmɛi lɛ asɛɛdii nii” lɛ he odase.

10. Mɛni diɛŋtsɛ ji nɔ ni jarayeli je lɛ haa eyaa nɔ eshwereɔ lɛ?

¹⁰ Yɛ be mli ni nɔ ni nɛkɛ adafitswai babaoo nɛɛ baanyɛ ashi pɛ ji nɔ ko bibioo ni abaasusu he lɛ, nɔ ni tsɔɔ mɔ tsɔne yɛ gbɛ ni yɔɔ nigii nɔ babaoo ji anɔkwale ni eji akɛ nɛkɛ adafitswai nɛɛ miiha shihilɛ gbɛi komɛi ashwere shi jeee nɔ ko ni áfee ni mɔ ko baahe kɛkɛ. Yɛ be babaoo mli lɛ, nɔ ni akɛtsɔɔ mɔ lɛ ji akɛ gbɔmɛi ni yɔɔ hegbɛ babaoo, amɛhe gbɛi, ale amɛ ni amɛyɔɔ miishɛɛ ni amɛhe yɔɔ fɛo lɛ ji mɛi ni kɛ nakai nibii ni ajieɔ amɛ kpo atsɔ lɛ tsuɔ nii. Tsɛ sane lɛ ji akɛ, kɛji akɛ mɔ ko he nii ni áfee nɛɛ ni ekɛtsu nii lɛ, “eshihilɛ gbɛ” lɛ baatamɔ mɛi ni akɛɛ amɛhe gbɛi ni akɛ amɛ tsuɔ nii yɛ adafitswaa lɛ mli lɛ anɔ̃ lɛ amrɔ nɔŋŋ. Adafitswalɔi le akɛ kɛ́ mɔ ko kpɛlɛ shihilɛ gbɛ ko nɔ pɛ lɛ, ewaaa kwraa akɛ aaatsɔ eyiŋ ni ekpɛlɛ nibii krokomɛi ni kɛ enɛɛmɛi yaa lɛ anɔ. Ní yɛ enɛ hewɔ lɛ, kwɛ bɔ ni eji nilee gbɛ akɛ Kristofoi ni amɛjɔɔ amɛhe nɔ lɛ aaabo ŋaawoo ni anaa yɛ Hebribii 13:5 lɛ toi! Jɛmɛ wɔkaneɔ yɛ akɛ: Shikasuɔmɔ akaba nyɛjeŋba mli, ni nyɛmii ashɛɛ nii ni nyɛyɔɔ lɛ he.”

Hiŋmɛii Lɛ Ni Oooha ‘Enɔ Atse,’ Jeee Nɔ Ni ‘Nɔ Tseee’

11. Tsɔɔmɔ wiemɔi “nɔ tse” kɛ “nɔ tseee” ni yɔɔ Yesu wiemɔi ni kɔɔ hiŋmɛi lɛ he lɛ mli.

¹¹ Akɛni wɔkɛ nibii babaoo ni feɔ hiŋmɛi lɛ fɛo ni gbalaa wɔ lɛ kpeɔ daa gbi hewɔ lɛ, wɔbaanyɛ wɔyoo nɔ hewɔ ni Yesu Kristo wo ŋaa akɛ wɔha wɔhiŋmɛi ‘nɔ atse’ shi ekafee nɔ ni “nɔ tseee” lɛ. (Mateo 6:​22, 23) Mɛni no tsɔɔ? Atsɔɔ “nɔ ni nɔ tse” nɛɛ shishi kɛjɛ Hela wiemɔ ha·plousʹ ni eshishi diɛŋtsɛ ji jwɛŋmɔ kome aloo he ni atuu aha yiŋtoo kome pɛ mli. Yɛ gbɛ kroko nɔ lɛ, nɔ ni “nɔ tseee” lɛ ji po·ne·rosʹ yɛ shishijee Hela wiemɔ mli ni ehiɛ shishinumɔ ni ji nɔ ni ehiii, nɔ ni sɛɛnamɔ bɛ he, efɔŋ. No hewɔ lɛ, ni nɔ fɛɛ nɔ ni yaa nɔ lɛ aaagbala ‘hiŋmɛi ni nɔ tse’ lɛ moŋ lɛ, egbalaa ejwɛŋmɔ kɛmaa nɔ kome nɔ. Nɔ ni tamɔɔɔ nakai lɛ, ‘hiŋmɛi ni nɔ tseee’ lɛ damɔɔɔ he kome, etsɔɔ ŋaa fɔŋ, ehiɛ kɔɔ nii anɔ, ni agbalaa lɛ kɛyaa nibii ni bɛ faŋŋ ni hɔlɔ duji amli lɛ mli.

12. Tii Yesu sanegbaa lɛ mli ni otsɔɔ mli.

¹² Shi mɛni esa akɛ hiŋmɛi lɛ kɛ ehiɛ loo ejwɛŋmɔ ama nɔ koni ‘ogbɔmɔtso muu lɛ ayi kɛ la’? Nɔ ni ŋmalɛ lɛ wieɔ he lɛ he susumɔ baaye abua wɔ ni wɔna hetoo lɛ. Yesu miiwie “jwetri . . . yɛ shikpɔŋ nɔ” kɛ “jwetri . . . yɛ ŋwɛi” he. Ekɛɛ akɛ “he ni nyɛjwetri yɔɔ lɛ, jɛi nyɛtsui aaahi.” Kɛkɛ ni yɛ be mli ni ewie hiŋmɛi lɛ he lɛ, ema bɔ ni ehe hiaa akɛ akɛ yiŋtoo kome aaatsu nii lɛ nɔ mi ekoŋŋ akɛ: “Mɔ ko nyɛŋ nuŋtsɔmɛi enyɔ asɔmɔ,” Nyɔŋmɔ kɛ Mamona (Niifalɛ) . Ekɛ ŋaawoo ha yɛ kukuji ni nyiɛ sɛɛ lɛ amli yɛ bɔni mɔ ko susuɔ daa gbi hiamɔ nibii ahe lɛ he ni ekɛ ŋaawoo nɛɛ mu sane lɛ naa: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”​—Mateo 6:​19-34.

13. Mɛni nɔ esa akɛ wɔkɛ wɔhiŋmɛi ama koni ‘wɔgbɔmɔtso muu lɛ ayi kɛ la’? Mɛni hewɔ?

¹³ Mɛni wɔbaanyɛ wɔhala kɛjɛ enɛɛmɛi fɛɛ mli? Yesu miiwie otii ni mɔ ko kɛmamɔ shi yɛ eshihilɛ mli lɛ he yɛ biɛ, eetsɔɔ sɛɛnamɔ ni bɛ heloo gbɛfaŋ nibii asɛɛdii lɛ mli kɛ bɔ ni jɔɔmɔ yɔɔ mumɔŋ saji ni aaadi sɛɛ loo aaanya he lɛ hu mli. Eka shi faŋŋ akɛ eekɛɛ wɔ akɛ kɛji akɛ wɔkɛ wɔhiŋmɛi ma Maŋtsɛyeli lɛ he nibii anɔ lɛ, “wɔ gbɔmɔtso muu lɛ aaayi kɛ la.” Mɛni hewɔ? Ejaakɛ kɛ wɔkɛ Nyɔŋmɔ suɔmɔnaa nifeemɔ fee oti ni ma wɔhiɛ yɛ shihilɛ mli lɛ, wɔbaaha wɔ anunyam sanekpakpa lɛ akpɛ́ yɛ wɔshihilɛ mli nibii fɛɛ mli. Jeee akɛ wɔbaakwɛ wɔsɛɛ be ni hiɛnɔkamɔ yɔɔ mli gbɛ pɛ kɛkɛ, shi moŋ, wɔbaaye wɔhe kɛjɛ duji amli nibii ni ehiii ni shihilɛ ni atuu aha pɛsɛmkunya nibii asɛɛdii kɛbaa lɛ mli.​—2 Korintobii 4:​1-6.

14. Yɛɛ mɛɛ gbɛ nɔ hiŋmɛi ni mɔ ko kɛmaa heloo gbɛfaŋ ninamɔ nɔ lɛ haa ewoɔ “duŋ” lɛ?

¹⁴ Bɔfo Paulo ma Yesu wiemɔi lɛ anɔ mi beni etsɔɔ mli akɛ: “Shi mɛi ni taoɔ nii pii ana lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ni tsiɔ mɛi ewoɔ hiɛkpatamɔ kɛ laajemɔ mli lɛ amli.” (1 Timoteo 6:⁠9) Eka shi faŋŋ akɛ, wiemɔi nɛɛ ahe miihia waa! Nɔ ni eyi adafitswaa woji amli ji saji ni kɔɔ bɛgwafoi, maŋkraloi, kojolɔi, shikatolɔi, nitsumɔ mli onukpai kɛ mɛi krokomɛi ni amɔmɔ amɛ yɛ juu hewɔ, ni taakɛ amaniɛbɔɔ ko tsɔɔ lɛ, “amɛjuu lɛ shɛɔ dɔlai akpekpei toi akpei 200 daa afi” yɛ U.S. Amerika pɛ. Ninámɔ he ‘kaa kɛ tsɔne’ lɛ eha gbɔmɛi ni tsutsu lɛ abuɔ amɛ waa lɛ etsɔmɔ ojotswalɔi kɛ julɔi. Yɛ anɔkwale mli lɛ, wɔmiisumɔ ni wɔkwa ‘tsi ni aaatsi wɔ awo hiɛkpatamɔ kɛ laajemɔ mli’ lɛ, ni wɔkwa “duŋ” ni Yesu bɔ he kɔkɔ lɛ.​—Kwɛmɔ Abɛi 23:​4, 5.

15, 16. (a) Mɛɛ “hiŋmɛi lɛ asɛɛdii nii” kroko esa akɛ wɔkwa? (b) Te okɛ ŋaawoo ni yɔɔ Abɛi 27:20 lɛ baato nɔ ni wɔsusuɔ he lɛ he oha tɛŋŋ?

¹⁵ Shi, ani mɛi ni kɛ amɛhiŋmɛi maa nii ni amɛaana babaoo nɔ lɛ pɛ ji mɛi ni kɛ oshara ni aaaha amɛnyiɛ duŋ mli lɛ kpeɔ? Dabi, ejaakɛ nibii pii fata “hiŋmɛi lɛ asɛɛdii nii” lɛ he. Kaimɔ Yesu wiemɔi ni yɔɔ Mateo 5:28 lɛ: “Mɔ fɛɛ mɔ ni kwɛɔ yoo ni ehe feɔ lɛ akɔnɔ lɛ, ekɛ lɛ efite gbala momo yɛ etsui mli.” Yɛ anɔkwale mli lɛ, nakai kɔkɔbɔɔ lɛ hu baanyɛ akɔ gbɛ ni wɔɔŋmɛ ni wɔha wɔhiŋmɛi lɛ ahi nibii ni áfee koni ekanya aloo etee wɔhenumɔi kɛ akɔnɔi gbohii ashi lɛ he.

¹⁶ Agbɛnɛ yeyeeye ni afeɔ yɛ niyenii, ninumɔ, kɛ hehaa nii ni Yesu wie he lɛ hu yɛ. (Mateo 6:​25-32) Yɛ be mli ni nɛkɛ nibii nɛɛ ahe hiaa lɛ, shwe ni wɔɔshwe waa akɛ wɔɔna nɔ ni yɔɔ ehee fe fɛɛ, nɔ ni jara wa fe fɛɛ, nɔ ni asumɔɔ fe fɛɛ lɛ baanyɛ aŋɔ wɔjwɛŋmɔ kɛ wɔtsui nom. (Romabii 16:​18; Filipibii 3:19) No hewɔ lɛ, esa akɛ wɔŋmɛ pɛpɛɛpɛ yɛ nibii tamɔ hiɛtserɛjiemɔi, shwɛmɔi kɛ kpɔiaŋ gbɔlemɔi kɛ akaŋshii sɔrɔtoi lɛ amli ni wɔkwɛ jogbaŋŋ koni nibii ni eba ehee ni afɔɔ feemɔ ni yɔɔ fɛo ni je lɛ diɔ sɛɛ lɛ akadu wɔ. Yɛ enɛɛmɛi fɛɛ mli lɛ, ebaafee nɔ ni hi jogbaŋŋ kɛha wɔ akɛ wɔɔha wiemɔi ni nilee yɔɔ mli ni anaa yɛ Abɛi 27:20 lɛ ahi wɔjwɛŋmɔ mli, akɛ: “Gbohiiaje kɛ hiɛkpatamɔ bu lɛ tɔrɔko da, ni gbɔmɔ hiŋmɛi hu etɔkoda.” Yɛ anɔkwale mli lɛ ehe miihia ni wɔye wɔhe nɔ koni yɛ be mli ni wɔbɔɔ mɔdɛŋ ni wɔha wɔhiŋmɛi lɛ mii ashɛ ehe lɛ, wɔkɛ mumɔŋ oshara akaba wɔ diɛŋtsɛ wɔhe nɔ.

Jɔɔmɔi Ni Jɛɔ Hiŋmɛi Ni “Nɔ Tse” Mli Baa

17. Hiŋmɛi lɛ ni mɛi komɛi ha “enɔ tse” lɛ ye bua amɛ ni amɛtiu Maŋtsɛyeli lɛ he nibii asɛɛ yɛ mɛɛ gbɛ nɔ?

¹⁷ Mɛi ni amɛha amɛhiŋmɛi ehi shi akɛ nɔ ni “nɔ tse” ni amɛkɛma Nyɔŋmɔ Maŋtsɛyeli lɛ he shiwoi anɔ lɛ pɛ amɛnine eshɛ jɔɔmɔi babaoo nɔ kɛjɛ Yehowa dɛŋ. Anaa enɛɛmɛi ahe nɔkwɛmɔ nɔ fɛfɛo kɛjɛɔ gbɔmɛi ni jɛ je lɛŋ he fɛɛ kɛ shihilɛi sɔrɔtoi amli lɛ aniiashikpamɔi amli. Susumɔ nɛkɛ nɔkwɛmɔ nii nɛɛ ahe:

“Beni misɔmɔɔ yɛ he ni sɔɔmɔ nitsumɔ lɛ he hiaa yɛ yɛ Colombia, South Amerika lɛ, ehe bahia ni maye Amerika shika dɔla 100 nyɔŋ kome. No mli lɛ, mije gbɛgbamɔ shishi, shi yɛ nyɔŋ lɛ shishijee mli lɛ, migbee shi ni minanetokota tsamɔ he lɛ ku. Mibɔ nyɔmɔ yɛ tsofafeemɔ mli ni enɛ he nɔ fɛɛ nɔ ni miyɔɔ, minaŋ shika ko dɔŋŋ aahu ja nyɔŋ lɛ egbo dã. No mli lɛ, be eshɛ ni esa ni mawo onia ni mitsuɔ daa nyɔŋ nɔ mihaa Maŋtsɛyeli Asa lɛ, ni kɛji akɛ mikɛ shika lɛ ha hu lɛ, minaŋ shika ni mikɛhe niyenii komɛi ni he baahia mi otsi ni baa lɛ. Yɛ be mli ni misusu sane lɛ he gbii fioo lɛ, mito miyiŋ akɛ esa akɛ awo Asa lɛ he nyɔmɔ lɛ, no hewɔ lɛ, mikɛ shika lɛ wo onia adeka lɛ mli. Enɔ jetsɛremɔ lɛ, minine shɛ wolo ko nɔ kɛjɛ nyɛmiyoo ko ni yɔɔ U.S. Amerika ni ebasarami be ko yɛ Colombia lɛ ŋɔɔ. Nɔ ni yɔɔ ewolo lɛ mli ji Colombia shika ko ni shwɛ yɛ be mli ni ebasara .. mi lɛ. Enaa shɛɔ shika ni mikɛwo onia adeka mli lɛ naa pɛpɛɛpɛ.”

Jufɔ shwane ko ni jeŋ edɔ waa, ni Ki, ni kwɛɔ helatsamɔ he bibioo ko yɛ Taechun, Korea, lɛ nanemɛi nitsulɔi etɛ fɔ lɛ nine ni amɛya ŋshɔ naa shwane amɛyajɔɔ amɛhe. Sane lɛ ŋɔɔ enaa, shi Ki le akɛ kɛji akɛ etee lɛ, enyɛŋ eku esɛɛ eba dani asafo Woloŋ Nikasemɔ lɛ baaje shishi nakai gbɛkɛ lɛ, no hewɔ lɛ ekpoo nine ni afɔ̃ lɛ lɛ. Etsɛɛɛ kwraa ni akɛ nitsulɔi etɛ nɛɛ ba helatsamɔ he lɛ​—amɛgboi! Ní amɛshi helatsamɔ he lɛ pɛ kɛkɛ ni amɛkɛ oshara ko kpe yɛ gbɛjegbɛ nɔ, ni amɛ fɛɛ amɛgboi. Ki ye awerɛho yɛ oshara nɛɛ he, shi eyɛ miishɛɛ akɛ abaa ewala yi akɛni ekɛ ehe kpɛtɛ esubaŋ kpakpa ni ena yɛ afii ni eho lɛ amli lɛ he lɛ hewɔ.​—Hebribii 10:​24, 25.

18. Mɛɛ gbɛ nɔ aaatsɔ atsɔse gbekɛbii ni amɛha amɛhiŋmɛi “nɔ atse”?

¹⁸ Abaanyɛ atsɔɔ gbekɛbii po ni amɛha amɛhiŋmɛi ahi Maŋtsɛyeli lɛ he nibii anɔ, taakɛ atsɔ niiashikpamɔ ni nyiɛ sɛɛ nɛɛ mli áfee he mfoniri lɛ:

“Beni wɔnu amaniɛbɔɔ ni jɛ nyɛmimɛi enyɔ ko ni ebasara wɔ lɛ aŋɔɔ akɛ Philippines asafoi etɛ ko ebua yelikɛbuamɔ naa, ni asafoi etɛ nɛɛ fɛɛ hiɛ Amerika shika dɔla akpe​—ni eji shika ni fa saŋŋ kɛha amɛ​—koni amɛkɛsaa amɛtswa amɛ Maŋtsɛyeli Asa ni eshã lɛ ekoŋŋ lɛ, mikɛ miwu to wɔyiŋ akɛ wɔmiisumɔ ni wɔye wɔbua shi wɔbii etɛ ni amɛye kɛjɛ nyɔji ejwɛ kɛyashi afii ekpaa lɛ hu? Kɛ awo miwu lɛ nyɔmɔ daa otsi lɛ, eheɔ Amerika shika dɔla ni akɛ jwiɛtɛi efee kɛhaa gbekɛbii lɛ eko fɛɛ eko. Miwu lɛ jaa shika lɛ mli koni gbekɛbii lɛ eko fɛɛ eko ana bɔ ni eyɔɔ. Agbɛnɛ wɔtsi nibii komɛi ni amɛdɔ amɛtsuii kɛtee nɔ akɛ amɛbaahe lɛ ekome ata. Shi, hetoi lɛ feɔ nakai nɔŋŋ yɛ be fɛɛ mli​—amɛmiisumɔ ni amɛkɛ shika lɛ aha nyɛ. mimɛi lɛ.” Amɛna Amerika shika dɔla 99, ni gbekɛbii lɛ ŋma wolo kuku ko amɛfata he. Nɛkɛ suɔmɔ kɛ ejurɔfeemɔ nɛɛ sa Philippines nyɛmimɛi lɛ atsui he aahu akɛ beni amɛnine shɛ wolo lɛ nɔ ni akane atsɔɔ amɛ lɛ, eha amɛhiŋmɛi amli yimɔ obɔbɔ kɛ yaafonui.

19. Wɔbaanyɛ wɔna wɔsɛɛ be ni hiɛnɔkamɔ yɔɔ mli he nɔminaa kɛ wɔkɛ wɔhiŋmɛi ma mɛni nɔ?

¹⁹ “Too ohiɛ tɛɛ, ni oha ohiŋmɛi asɛɛ akwɛ ohiɛ tuuŋtu.” (Abɛi 4:25) Kwɛ bɔ ni eji nilee gbɛ kɛha wɔ akɛ wɔɔbo nakai ŋaawoo lɛ toi ni wɔkaha wɔhiŋmɛi miikpa shi, bɔni afee ni nɔ ko akagbala wɔjwɛŋmɔ! Paulo wo ŋaa akɛ: “Nyɛkwɛa bɔ ni nyaafee ni nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛdeka he nii, ejaakɛ gbii nɛɛ gbii fɔji ni.” Ewo wɔ hewalɛ hu akɛ: “Nyɛyaa nɔ nyɛyoa nii ni ji Yehowa suɔmɔnaa nii.” (Efesobii 5:​15-17) Kɛ́ wɔfee nakai lɛ, wɔbaanyɛ wɔna nɔmimaa akɛ wɔbaanyɛ wɔye omanye yɛ wɔhiŋmɛi ni wɔɔha ehi shi akɛ nɔ ni “nɔ tse” lɛ mli, ni wɔbaanyɛ wɔkwɛ wɔsɛɛ be yɛ hekɛnɔfɔɔ mli​—naanɔ wala yɛ nibii agbɛjianɔtoo hee ni Nyɔŋmɔ ewo shi yɛ he lɛ mli.​—Okɛto 2 Korintobii 4:​17, 18 he.a

[Shishigbɛ niŋmai]

Ani Obaanyɛ Otsɔɔ Mli?

◻ Hiŋmɛi lɛ ji “gbɔmɔtso lɛ kane” yɛ mɛɛ gbɛ nɔ?

◻ Taakɛ Hawa kɛ Yesu fee he nɔkwɛmɔ nɔ lɛ, hiŋmɛi Iɛ naa wɔnifeemɔi anɔ hewalɛ yɛ mɛɛ gbɛ nɔ?

◻ Mɛɛ gbɛi anɔ Satan tsɔɔ ekɛ “hiŋmɛi lɛ asɛɛdii nii” lɛ tsuɔ nii ŋmɛnɛ?

◻ Mɛni esa akɛ wɔfee koni wɔha wɔhiŋmɛi “nɔ atse”?

◻ Mɛni esa akɛ wɔkɛ wɔhiŋmɛi ama nɔ bianɛ?

[Mfoniri ni yɔɔ baafa 10]

Nɔ ni wɔkɛ wɔhiŋmɛi maa nɔ lɛ baanyɛ aha nɔ ni tsui shweɔ lɛ mli awa