Esaaa Akɛ Ashwaa Yehowa
“Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ni sheɔ lɛ lɛ ahe. Ejaakɛ ele wɔsu kɛ wɔbaŋ, ekaiɔ akɛ su kɛkɛ ji wɔ.”—LALA 103:13, 14.
1, 2. Namɔ ji Abraham, ni te fee tɛŋŋ ni ewɔfase Lot bahi Sodom yiwalɛ maŋ lɛ mli?
JEEE Yehowa ji mɔ ni shihilɛ ni mli wa ni wɔkɛkpeɔ yɛ wɔtɔmɔi ahewɔ lɛ jɛ. Susumɔ nɔ ni ba afii 3,900 ni eho nɛ yɛ enɛ he lɛ he okwɛ. Nyɔŋmɔ shieŋtsɛ Abraham (Abram) kɛ ewɔfase Lot ena nii babaoo. (Yakobo 2:23) Yɛ anɔkwale mli lɛ, amɛ nibii kɛ kooloi fa babaoo aahu akɛ ‘shikpɔŋ lɛ edaaa haaa amɛ bɔ ni amɛaahi he kome.’ Agbɛnɛ bei te shi yɛ hii enyɔ lɛ akooloi akwɛlɔi ateŋ. (1 Mose 13:5-7) Mɛni aaanyɛ afee yɛ enɛ he?
2 Bɔni afee ni bei lɛ aba naagbee lɛ, Abraham wo ŋaa akɛ amɛgbala amɛmli, ni eŋmɛ Lot gbɛ koni lɛ klɛŋklɛŋ ehala he ni esumɔɔ. Eyɛ mli akɛ Abraham ji onukpa ni ebaafee nɔ ni sa akɛ ewɔfase lɛ aaaha ehala he ni hi lɛ moŋ, shi Lot hala shikpɔŋ ni hi fe fɛɛ lɛ—Yordan Jɔɔ mli gbɛ shikpɔŋ ni nui pii yɔɔ jɛmɛ lɛ. Shi kponɔgbɛ nibii ni anaa lɛ nyɛɔ elakaa mɔ, ejaakɛ mɛi ni bɛŋkɛ amɛ kpaakpa ji Sodom kɛ Gomora maji ni amɛjeŋba ekpɔtɔ kwraa lɛ. Yɛ naagbee lɛ Lot kɛ eweku lɛ yahi Sodom, ni enɛ kɛ amɛ wo mumɔŋ oshara mli. Agbɛnɛ hu, aŋɔ amɛ nom yɛ be mli ni Maŋtsɛ Kedorlaomer kɛ ehefatalɔi lɛ ye Sodom nɔyelɔ lɛ nɔ kunim lɛ. Abraham kɛ ewebii lɛ yakpɔ amɛ, shi Lot kɛ eweku lɛ ku amɛsɛɛ kɛtee Sodom.—1 Mose 13:8-13; 14:4-16.
3, 4. Mɛni ba Lot kɛ eweku lɛ mlibii lɛ anɔ beni Nyɔŋmɔ kpata Sodom kɛ Gomora hiɛ lɛ?
3 Yɛ bɔlɛnamɔ mli jeŋba shara kɛ ahoshwibɔɔ ni yaa nɔ yɛ Sodom kɛ Gomora hewɔ lɛ, Yehowa kpɛ eyi akɛ ebaakpata nakai maji lɛ ahiɛ. Emɔbɔnalɛ hewɔ lɛ etsu bɔfoi enyɔ koni amɛyajie Lot, kɛ eŋa, kɛ ebiyei enyɔ lɛ kɛjɛ Sodom. Esaaa akɛ amɛkwɛɔ amɛsɛɛ, shi Lot ŋa fee nakai, ekolɛ eeshwe heloo gbɛfaŋ nibii ni eshi yɛ esɛɛ lɛ. Kɛkɛ ni etsɔ ŋoo kpɔ ni ma shi.—1 Mose 19:1-26.
4 Mɛni Lot kɛ ebiyei lɛ laaje nɛkɛ! Ehe bahia ni gbekɛbii yei lɛ ashi hii ni amɛkɛ amɛ baabote gbalashihilɛ mli lɛ yɛ sɛɛ. Lot bɛ ŋa kɛ eheloo gbɛfaŋ nibii babaoo lɛ dɔŋŋ. Yɛ anɔkwale mli lɛ, ehe bahia ni lɛ kɛ ebiyei lɛ ayahi tɛkplo ko mli. (1 Mose 19:30-38) Nɔ ni fee tamɔ nɔ ko ni hi yɛ ehiɛ lɛ eyafeee nakai. Eyɛ mli akɛ etɔ tɔmɔi ni hiɛdɔɔ yɔɔ mli moŋ, shi atsɛ lɛ yɛ sɛɛ mli akɛ “Lot, jalɔ lɛ.” (2 Petro 2:7, 8) Ni eyɛ faŋŋ akɛ ashwaŋ Yehowa Nyɔŋmɔ yɛ Lot tɔmɔi lɛ ahewɔ.
“Namɔ Aaanyɛ Etɔmɔi Ana?”
5. Te David nu tɔmɔi kɛ hewoo he eha tɛŋŋ?
5 Akɛni wɔyeee emuu ni wɔji eshafeelɔi hewɔ lɛ, wɔ fɛɛ wɔtɔɔ. (Romabii 5:12; Yakobo 3:2) Taakɛ Lot ji lɛ, kponɔgbɛ nibii baanyɛ alaka wɔ ni ekolɛ wɔɔtɔ yɛ kojomɔ mli. No hewɔ lɛ, lalatsɛ David kpa fai akɛ: “Namɔ aaanyɛ etɔmɔi ana? Ŋɔɔ miteemɔŋ tɔmɔi ofa mi. Asaŋ buu mihe kɛjɛ hiɛ-kɛhekamɔ eshai amli, koni amɛkaye minɔ! No lɛ maye emuu, ni mihe aaaje nɔtɔmɔi wuji amli.” (Lala 19:13, 14) David le akɛ ebaanyɛ efee eshai komɛi ni ehiɛ kaaa he. No hewɔ lɛ ebi ni akɛ eteemɔŋ tɔmɔi ake lɛ. Beni etɔ tɔmɔ ko ni hiɛdɔɔ yɔɔ mli akɛni eheloo ni yeee emuu lɛ tsirɛ lɛ koni etsɔ gbɛ ni ejaaa lɛ nɔ lɛ, etao Yehowa yelikɛbuamɔ sɛɛ gbɛ babaoo. Eesumɔ ni Nyɔŋmɔ atsi enaa koni ekafee mɔ ni wooɔ ehe. David sumɔɔɔ ni hewoo afee esubaŋ titri. Shi moŋ eesumɔ ni eye emuu yɛ ehe ni etuu eha Yehowa Nyɔŋmɔ lɛ mli.
6. Mɛɛ miishɛjemɔ abaanyɛ ana kɛjɛ Lala 103:10-14?
6 Akɛ Yehowa tsuji ni ejɔɔ amɛhe nɔ yɛ ŋmɛnɛŋmɛnɛ gbii nɛɛ amli lɛ, wɔ hu wɔyeee emuu ni no hewɔ lɛ wɔtɔ̃ɔ. Akɛ nɔkwɛmɔ nɔ lɛ, taakɛ Lot ji lɛ, ekolɛ wɔbaanyɛ wɔhala he ko ni ehiii akɛ wɔshihilɛ he. Ekolɛ wɔbaanyɛ wɔŋmɛɛ hegbɛ ko ni wɔkɛaalɛɛ sɔɔmɔ krɔŋŋ ni wɔkɛhaa Nyɔŋmɔ lɛ mli lɛ he. Eyɛ mli akɛ Yehowa naa tɔmɔi ni tamɔ nɛkɛ moŋ, shi ele mɛi ni yɔɔ tsui ni sumɔɔ jalɛnifeemɔ lɛ. Ni kɛji akɛ wɔtɔ tɔmɔ ko ni hiɛdɔɔ yɔɔ mli shi wɔshwa wɔhe loo wɔtsake wɔtsui lɛlɛŋ lɛ, Yehowa kɛ eshaifaa kɛ yelikɛbuamɔ haa, ni eyaa nɔ ebuɔ wɔ akɛ aŋkroaŋkroi ni sheɔ Nyɔŋmɔ gbeyei. David jaje akɛ: “Jeee wɔhe eshai lɛ anaa ekɛ wɔ yeɔ yɛ, ni jeee wɔnishaianii lɛ anaa ewoɔ wɔ nyɔmɔ yɛ. Shi moŋ bɔ ni ŋwɛi kwɔ fe shikpɔŋ lɛ, nakai emɔbɔnalɛ lɛ fa yɛ mɛi ni sheɔ lɛ lɛ anɔ. Bɔ ni boka kɛ anai teŋ jɛkɛ lɛ, nakai ehaa wɔkɛ wɔnɔtɔmɔi lɛ ateŋ jɛkɛɔ. Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ni sheɔ lɛ lɛ ahe. Ejaakɛ ele wɔsu kɛ wɔbaŋ, ekaiɔ akɛ sũ kɛkɛ ji wɔ.” (Lala 103:10-14) Wɔ ŋwɛi Tsɛ ni naa mɔbɔ lɛ hu baanyɛ aha wɔjaje wɔtɔmɔi aloo ebaanyɛ eha wɔ hegbɛ kroko ni wɔkɛlɛɛ wɔsɔɔmɔ krɔŋkrɔŋ ni wɔkɛhaa lɛ lɛ mli, kɛha eyijiemɔ.
Nyɔŋmɔ ni Ashwaa Lɛ lɛ He Tɔmɔ Lɛ
7. Mɛni hewɔ amanehului baa wɔnɔ lɛ?
7 Kɛ nibii fite lɛ, kɛkɛ lɛ adesa su ji ni eshwa mɔ ko loo nɔ ko yɛ nɔ ni ba lɛ hewɔ. Mɛi komɛi po shwaa Nyɔŋmɔ. Shi Yehowa kɛ piŋmɔ ni tamɔ nɛkɛ baaa gbɔmɛi anɔ. Efeɔ ekpakpa, jeee nii ni yeɔ awui. Ejaakɛ “ehaa ehulu teɔ shi yɛ mɛi fɔji kɛ mɛi kpakpai anɔ, ni ehaa nugbɔ nɛɔ yɛ jalɔi kɛ mɛi ni bɛ jalɛ lɛ anɔ”! (Mateo 5:45) Yiŋtoo titri ni haa wɔnaa amanehulu ji akɛ, jeŋ ni hiɔ shi yɛ pɛsɛmkunya taomɔ nii anaa, ni ka mɔ fɔŋ, Satan Abonsam hewalɛ mli lɛ mli wɔyɔɔ lɛ.—1 Yohane 5:19.
8. Mɛni Adam fee beni nibii ejaaa kɛhaaa lɛ lɛ?
8 Nilee bɛ Yehowa Nyɔŋmɔ ni wɔshwaa lɛ yɛ piŋmɔi ni wɔ diɛŋtsɛ wɔtɔmɔi kɛbaa wɔnɔ hewɔ lɛ mli, ni eji oshara hu. Nakai feemɔ po baanyɛ aha wɔlaaje wɔwala. Kulɛ esa akɛ klɛŋklɛŋ gbɔmɔ ni ji Adam kɛ yijiemɔ aha Nyɔŋmɔ yɛ nibii kpakpai fɛɛ ni enine shɛ nɔ lɛ hewɔ. Hɛɛ, kulɛ esa akɛ Adam ada Yehowa shi babaoo yɛ wala diɛŋtsɛ hewɔ kɛ jɔɔmɔi ni enaa mli ŋɔɔmɔ yɛ abɔɔ ko ni tamɔ shia, ni ji Eden trom lɛ mli lɛ hewɔ. (1 Mose 2:7-9) Shi mɛni Adam fee beni nibii eyaaa nɔ jogbaŋŋ, akɛni ebooo Yehowa toi ni eye tso yibii ni agu eyeli lɛ? Adam shwa Nyɔŋmɔ akɛ: “Yoo lɛ ni oŋɔ-fata mihe lɛ, lɛ eha mi tso lɛ yibii lɛ eko, ni miye.” (1 Mose 2:15-17; 3:1-12) Yɛ anɔkwale mli lɛ, esaaa akɛ wɔshwaa Yehowa, taakɛ Adam fee lɛ.
9. (a) Kɛ wɔkɛ haomɔi loo piŋmɔi miikpe yɛ wɔnifeemɔi ni nilee bɛ mli lɛ hewɔ lɛ, mɛni mli wɔbaanyɛ wɔna miishɛjemɔ kɛjɛ? (b) Taakɛ Abɛi 19:3 tsɔɔ lɛ, mɛni mɛi komɛi feɔ beni amɛkɛ naagbai loo haomɔi eba amɛ diɛŋtsɛ amɛnɔ lɛ?
9 Kɛ wɔkɛ naagbai kpe akɛni wɔfeee nii yɛ nilee mli hewɔ lɛ, wɔbaanyɛ wɔna miishɛjemɔ kɛjɛ le ni wɔle akɛ Yehowa nuɔ wɔgbɔjɔmɔi lɛ ashishi jogbaŋŋ fe bɔ ni wɔle ni ebaajie wɔ kɛjɛ wɔhaomɔi lɛ amli kɛ wɔtuu wɔhe wɔha ekome too lɛ mli. Esa akɛ wɔhiɛ asɔ ŋwɛi yelikɛbuamɔ ni wɔnine shɛɔ nɔ lɛ, ni wɔkashwa Nyɔŋmɔ kɔkɔɔkɔ yɛ haomɔi kɛ naagbai ni wɔkɛbaa wɔ diɛŋtsɛ wɔnɔ lɛ mli. Abɛbua ko ni nilee yɔɔ mli kɛɔ yɛ enɛ he akɛ: “Gbɔmɔ buulufeemɔ kɔdɔɔ egbɛ, ni etsui mli woɔ Yehowa la.” (Abɛi 19:3) Shishitsɔɔmɔ kroko kɛɔ akɛ: “Mɛi komɛi tsɔɔ amɛbuului anifeemɔ nɔ amɛyeɔ amɛ diɛŋtsɛ amɛhe awui, kɛkɛ lɛ amɛshwa NUNTSƆ lɛ.” (Today’s English Version) Shishitsɔɔmɔ kroko hu kɛba akɛ: “Nii ni gbɔmɔ leee lɛ haa esaji feɔ basaa, kɛkɛ lɛ emli efu ewo Yehowa.”—Byington.
10. Te fee tɛŋŋ ni Adam buului-anifeemɔ lɛ ‘kɔdɔ egbɛ’ lɛ?
10 Yɛ shishitoo mla ni yɔɔ abɛbua nɛɛ mli lɛ sɛɛnyiɛmɔ mli lɛ, Adam fee nii yɛ pɛsɛmkunya gbɛ nɔ, ni esusumɔ yɛ buulufeemɔ mli lɛ ‘kɔdɔ egbɛ.’ Etsui tsi ehe kɛjɛ Yehowa Nyɔŋmɔ he, ni ekɔ lɛ diɛŋtsɛ epɛsɛmkunya gbɛ akɛ mɔ ni eye ehe. Adam batsɔ trumufeelɔ loo mɔ ni hiɛ esɔɔɔ nii aahu akɛ eshwa e-Bɔlɔ lɛ ni ekɛfee ehe Ŋwɛi Flooflonyo lɛ henyɛlɔ! Adam esha lɛ fite lɛ diɛŋtsɛ kɛ eweku lɛ gbɛ lɛ. Mɛɛ kɔkɔbɔɔ po yɔɔ enɛ mli nɛkɛ! Mɛi ni sumɔɔ ni amɛshwa Yehowa yɛ shihilɛi ni ehiii ni amɛbajeɔ shishi lɛ baafee jogbaŋŋ akɛ amɛaabi amɛ diɛŋtsɛ amɛhe akɛ: Ani mijieɔ Nyɔŋmɔ yi yɛ nibii kpakpai ni minaa mli ŋɔɔmɔ lɛ hewɔ? Ani midaa shi akɛni miyɔɔ wala akɛ ebɔɔ nii lɛ ateŋ ekome hewɔ? Ani eeenyɛ eba akɛ benɛ mi diɛŋtsɛ mitɔmɔi kɛ naagbai ba minɔ? Ani Yehowa duromɔ loo eyelikɛbuamɔ sa mi yɛ egbɛtsɔɔmɔ sɛɛ ni minyiɛɔ, taakɛ akɛmamɔ shi yɛ e-Wiemɔ ni jɛ mumɔŋ, ni ji Biblia lɛ mli lɛ hewɔ?
Oshara Kɛha Nyɔŋmɔ Tsuji Po
11. Mɛni fɔ klɛŋklɛŋ afii oha lɛ mli Yudafoi ajamɔ mli hiɛnyiɛlɔi lɛ ye, yɛ Nyɔŋmɔ he?
11 Yudafoi ajamɔ mli hiɛnyiɛlɔi ni hi shi yɛ Ŋ.B. klɛŋklɛŋ afi oha lɛ mli lɛ kɛɔ akɛ amɛsɔmɔɔ Nyɔŋmɔ, shi amɛkpoo enɔkwa wiemɔ lɛ ni amɛkɛ amɛhe fɔ amɛ diɛŋtsɛ amɛshishinumɔ nɔ. (Mateo 15:8, 9) Akɛni Yesu Kristo kpa amɛsusumɔ ni ejaaa lɛ he mama hewɔ lɛ, amɛgbe lɛ. Yɛ sɛɛ mli lɛ, amɛkɛ mlifu babaoo te shi wo ekaselɔi lɛ. (Bɔfoi lɛ Asaji 7:54-60) Bɔ ni nɛkɛ gbɔmɛi nɛɛ agbɛ lɛ ekɔdɔ babaoo eha hewɔ lɛ, amɛmli fu Yehowa diɛŋtsɛ po.—Okɛto Bɔfoi lɛ Asaji 5:34, 38, 39 he.
12. Mɛɛ nɔkwɛmɔ nɔ tsɔɔ akɛ aŋkroaŋkroi komɛi ni kɛ amɛhe ebɔ Kristofoi asafo lɛ he lɛ bɔɔ mɔdɛŋ ni amɛshwa Yehowa yɛ amɛ naagbai ahewɔ?
12 Aŋkroaŋkroi komɛi po ni yɔɔ Kristofoi asafo lɛ mli lɛ ena susumɔ ko ni oshara yɔɔ he waa, amɛmiibɔ mɔdɛŋ ni amɛshwa Nyɔŋmɔ yɛ haomɔi ni amɛkɛkpeɔ lɛ hewɔ. Akɛ nɔkwɛmɔ nɔ lɛ, asafo ko mli onukpai ni ahala amɛ lɛ na akɛ ehe miihia ni amɛkɛ Ŋmalɛ mli ŋaawoo ni yɔɔ shiŋŋ aha obalayoo ko ni ebote gbalashihilɛ mli lɛ yɛ mlihilɛ mli, yɛ jeŋnyo ko ni ekɛ lɛ bɔɔ lɛ hewɔ. Yɛ amɛkɛ lɛ sanegbaa lɛ ekome mli lɛ, eshwa Nyɔŋmɔ akɛ eyeee ebuaaa lɛ koni enyɛ edamɔ kaa ni nuu ni etee nɔ ekɛ ehe bɔ ehe lɛ kɛba enɔ lɛ naa. Ekɛɛ diɛŋtsɛ akɛ emli ewo la ewo Nyɔŋmɔ waa! Ŋmalɛ naa susumɔ kɛ mɔdɛŋ ni abɔ shii abɔ koni aye abua lɛ lɛ fɛɛ fee efolo, ni etsɛɛɛ ni ejeŋba shara lɛ ha ashwie lɛ kɛjɛ Kristofoi asafo lɛ mli.
13. Mɛni hewɔ esa akɛ wɔkpa su ni ji huhuuhu wiemɔ lɛ?
13 Mumɔ ni haa awieɔ huhuuhu baaha mɔ ko ashwa Yehowa. “Nɔshafeelɔi” komɛi ni ju shi amɛbote klɛŋklɛŋ afii oha lɛ mli asafo lɛ mli lɛ yɛ su loo mumɔ gbonyo ni tamɔ nakai, ni nɔ ni fata he kɛba ji mumɔŋ susumɔi sɔrɔtoi komɛi ni ekpɔtɔ. Taakɛ kaselɔ Yuda kɛɛ lɛ, nɛkɛ gbɔmɛi nɛɛ “ŋɔɔ wɔ-Nyɔŋmɔ duromɔ lɛ amɛbɔɔ nyenyeŋtswi, ni amɛkwa Nyɔŋmɔ ni ji nɔyelɔ kome pɛ lɛ kɛ wɔ-Nuŋtsɔ Yesu Kristo lɛ.” Yuda jaje hu akɛ: “Mɛnɛɛmɛi ji huhuuhu wielɔi ni nɔ esaaa amɛhiɛ.” (Yuda 3, 4, 16) Yehowa tsuji anɔkwafoi lɛ baasɔle yɛ nilee mli ni amɛna su loo mumɔ ni hiɛ sɔɔ nii, jeee huhuuhu wiemɔ ni yɛ naagbee lɛ eeeha saji adɔ amɛ kɛyashɛ he ni amɛaalaaje Nyɔŋmɔ mli hemɔkɛyeli ni efite wekukpaa ni ka amɛkɛ lɛ teŋ lɛ.
14. Te mɔ ko aaafee enii eha tɛŋŋ kɛ naanyo Kristofonyo ko tɔ enɔ, shi mɛni hewɔ enɛ efeŋ gbɛ ni sa lɛ?
14 Ekolɛ obaanu he akɛ enɛ baŋ onɔ. Ni kɛlɛ, nibii ni fiteɔ yɛ wɔ diɛŋtsɛ wɔtɔmɔi ahewɔ loo yɛ mɛi krokomɛi anɔ hewɔ lɛ baanyɛ aha yɛ naagbee lɛ wɔshwa Nyɔŋmɔ. Akɛ nɔkwɛmɔ nɔ lɛ, ekolɛ nɔ ni naanyo heyelilɔ ko kɛɔ loo efeɔ baanyɛ adɔ mɔ kroko. Mɔ ni mli efu lɛ—ekolɛ mɔ ni kɛ afii pii esɔmɔ Yehowa yɛ anɔkwayeli mli lɛ—baakɛɛ akɛ: ‘Kɛji akɛ nakai gbɔmɔ lɛ yɛ asafo lɛ mli lɛ, belɛ miyaŋ kpeei.’ Mɔ ko baanyɛ ahao aahu akɛ ekɛɔ yɛ etsui mli akɛ: ‘Kɛji akɛ nibii ni tamɔ nɛkɛ miiya nɔ lɛ, belɛ misumɔŋ ni mafee asafo lɛ mli nyo.’ Shi ani esa akɛ Kristofonyo ana su ni tamɔ nɛkɛ? Kɛji akɛ adesa kroko ni yeee emuu etɔ enɔ lɛ, mɛni hewɔ esa akɛ emli afu awo gbɔmɛi ni yɔɔ asafo lɛ mli lɛ fɛɛ ni Nyɔŋmɔ kpɛlɛɔ amɛnɔ ni amɛsɔmɔɔ lɛ yɛ anɔkwayeli mli lɛ? Mɛni hewɔ esa akɛ mɔ ni ejɔɔ ehe nɔ eha Yehowa lɛ akpa ŋwɛi suɔmɔnaa nifeemɔ, ni emli afu awo Nyɔŋmɔ? Mɛɛ nilee yɔɔ mli akɛ mɔ ko aaaha gbɔmɔ aŋkro ko loo shihilɛi komɛi afite wekukpaa kpakpa ni ka mɔ lɛ kɛ Yehowa teŋ lɛ? Yɛ anɔkwale mli lɛ ebaafee buului anifeemɔ kɛ esha hu akɛ mɔ ko aaakpa Yehowa Nyɔŋmɔ jamɔ yɛ yiŋtoo ko hewɔ.—Yakobo 4:17.
15, 16. Diotrefe ye mɛni he fɔ, shi te Gaio ba ejeŋ eha tɛŋŋ?
15 Susumɔ akɛ okɛ Kristofonyo Gaio ni yɔɔ suɔmɔ lɛ yɛ asafo kome mli. Eetsu ‘nii yɛ anɔkwayeli mli’ yɛ gbɔi ni ji nanemɛi jalɔi ni ehereɔ amɛ hiɛmɛɛ lɛ hewɔ—yɛ gbɔi ni amɛji lɛ fɛɛ sɛɛ! Shi eka shi faŋŋ akɛ henɔwolɔ Diotrefe yɛ nakai asafo lɛ nɔŋŋ mli. Ekɛ bulɛ ekpɛlɛɛɛ nɔ ko ni jɛ Yohane, Yesu Kristo bɔfoi lɛ ateŋ mɔ kome ŋɔɔ lɛ nɔ. Yɛ anɔkwale mli lɛ, Diotrefe wieɔ Yohane he efɔŋ. Bɔfo lɛ kɛɛ: “Ni enɛɛmɛi tete hu faaa haaa lɛ, shi moŋ lɛ diɛŋtsɛ [Diotrefe] ehereee nyɛmimɛi lɛ, ni asaŋ mɛi ni sumɔɔ akɛ amɛaafee nakai lɛ, etsiɔ amɛ gbɛ, ni eshwieɔ amɛ kɛjeɔ asafo lɛ mli.”—3 Johane 1, 5-10.
16 Yohane eto eyiŋ akɛ kɛ etee asafo lɛ mli lɛ, ebaakai nɔ ni Diotrefe feɔ lɛ. Dani enɛ aaaba lɛ, te Gaio kɛ Kristofoi krokomɛi ni sumɔɔ gbɔi ni yɔɔ asafo lɛ mli lɛ fee amɛnii amɛha tɛŋŋ? Ŋmalɛ mli nɔ ko bɛ ni tsɔɔ akɛ amɛteŋ mɔ ko kɛɛ akɛ: ‘Bei abɔ ni Diotrefe yɔɔ nakai asafo lɛ mli lɛ, misumɔŋ akɛ mahi nakai asafo lɛ mli. Nyɛnaŋ mi yɛ kpeei ashishi.’ Ŋwanejee ko bɛ he ake Gaio kɛ mɛi krokomɛi ni tamɔ lɛ lɛ damɔ shi shiŋŋ. Amɛhaaa nɔ ko atsi amɛ naa ni amɛkpa ŋwɛi suɔmɔnaa nii lɛ feemɔ, ni eka shi faŋŋ akɛ amɛmli wooo la amɛwooo Yehowa. Dabi kwraa, ni amɛbaaa amɛhe shi amɛhaaa Satan Abonsam ŋaatsɔɔi lɛ, mɔ ni mli baafili lɛ, eji amɛyeee Yehowa anɔkwa ni amɛshwa Nyɔŋmɔ kulɛ lɛ.—Efesobii 6:10-18.
Omli Akafu Yehowa Kɔkɔɔkɔ!
17. Te esa akɛ wɔfee wɔnii wɔha tɛŋŋ kɛ mɔ aŋkro ko loo shihilɛ ko wo wɔ mlifu loo esaaa wɔhiɛ lɛ?
17 Kɛji akɛ gbɔmɔ aŋkro ko loo shihilɛ ko ni yɔɔ asafo lɛ mli esaaa Nyɔŋmɔ tsulɔ ko hiɛ loo emli aaafu yɛ he lɛ, mɔ ni mli fuɔ lɛ baafee mɔ ni miikɔdɔ egbɛ diɛŋtsɛ kɛji akɛ ekpa Yehowa webii kɛ bɔɔ. Gbɔmɔ ni tamɔ nɛkɛ kɛ ejwɛŋmɔŋ nyɛmɔi tsuuu nii jogbaŋŋ. (Hebribii 5:14) No hewɔ lɛ, tswaa ofai shi akɛ, obaadamɔ haomɔi fɛɛ naa akɛ emuuyeli mlihiɛlɔ. Hiɛmɔ anɔkwa ni oyeɔ Yehowa Nyɔŋmɔ, Yesu Kristo, kɛ Kristofoi asafo lɛ mli. (Hebribii 10:24, 25) He ko he ko bɛ ni abaanyɛ ana anɔkwale ni kɛ mɔ yaa naanɔ wala mli Iɛ yɛ jɛmɛ.
18. Eyɛ mli akɛ jeee be fɛɛ be wɔnuɔ ŋwɛi nifeemɔi ashishi moŋ, shi mɛɛ nɔmimaa wɔbaanyɛ wɔna yɛ Yehowa Nyɔŋmɔ he?
18 Kaimɔ hu akɛ, Yehowa kɛ nibii fɔji ekaaa mɔ ko. (Yakobo 1:13) Nyɔŋmɔ, ni ji suɔmɔ fɛɛ naamuu lɛ, feɔ ekpakpa kɛhaa mɛi ni sumɔɔ lɛ lɛ titri. (1 Yohane 4:8) Eyɛ mli akɛ wɔnuuu ŋwɛi nifeemɔi ashishi yɛ be fɛɛ mli moŋ, shi wɔbaanyɛ wɔna hekɛnɔfɔɔ akɛ Yehowa Nyɔŋmɔ baafee nɔ ni hi fe fɛɛ kɛha etsuji lɛ eha amɛ kɛ̃. Taakɛ Petro kɛɛ lɛ: “Hewɔ lɛ nyɛbaa nyɛhe shi yɛ Nyɔŋmɔ nine ni wa lɛ shishi, koni ewo nyɛnɔ yɛ be ni sa mli. Nyɛŋɔa nyɛhaomɔ fɛɛ nyɛfɔa enɔ, ejaakɛ lɛ ejwɛŋɔ nyɛnɔ.” (1 Petro 5:6, 7) Hɛɛ, Yehowa jwɛŋɔ ewebii anɔ lɛlɛŋ.—Lala 94:14.
19, 20. Te esa akɛ wɔfee wɔnii wɔha tɛŋŋ, kɛ wɔkaai lɛ nyɛɔ wɔnɔ loo ehaoɔ wɔ yɛ bei komɛi amli po?
19 No hewɔ lɛ, kaaha nɔ ko loo mɔ ko miitɔtɔ onane. Taakɛ lalatsɛ lɛ wie jogbaŋŋ lɛ, “mɛi ni sumɔɔ [Yehowa Nyɔŋmɔ] mla lɛ yɛ hejɔlɛ babaoo, ni nɔ ko nɔ ko bɛ ni woɔ amɛnajiaŋ.” (Lala 119:165) Wɔ fɛɛ wɔkɛ kaai kpeɔ, ni ekolɛ enɛɛmɛi baaha wɔhao ni wɔbaaye awerɛho yɛ bei komɛi amli. Shi kaaha nyɛ̃ɛ loo hetsɛ̃ miije shishi yɛ otsui mli, titri lɛ kɛmiishi Yehowa. (Abɛi 4:23) Okɛ eyelikɛbuamɔ ni damɔ Ŋmalɛ lɛ nɔ atsu naagbai ni obaanyɛ ona amɛnaa tsabaa lɛ ahe nii, ni oŋmɛ otsui yɛ nɔ ni baa daa lɛ mli.—Mateo 18:15-17; Efesobii 4:26, 27.
20 Kaaha ohenumɔi miiha ooye kwashiaiasane ni okɔdɔ ogbɛ. Wiemɔ ni ofee nii yɛ gbɛ ni aaaha Nyɔŋmɔ tsui anya nɔ. (Abɛi 27:11) Okɛ sɔlemɔ ni mli wa abo atsɛ Yehowa, akɛni ole akɛ ejwɛŋɔ ohe akɛ etsuji lɛ ateŋ mɔ kome lɛ, ni ekɛ shishinumɔ ni he hiaa ni aaaha okɛ ewebii lɛ ahi wala gbɛ lɛ nɔ lɛ baaha bo. (Abɛi 3:5, 6) Nɔ ni fe fɛɛ lɛ, kaaha omli fu Nyɔŋmɔ. Kɛ nibii eyajaaa lɛ, kaimɔ yɛ be fɛɛ mli akɛ jeee Yehowa ji mɔ ni esa akɛ ashwa.
Te Obaaha Hetoo Oha Tɛŋŋ?
◻ Mɛni mli Lot tɔ̃ yɛ, ni te Nyɔŋmɔ bu lɛ eha tɛŋŋ?
◻ Te David nu tɔmɔi kɛ hewoo he eha tɛŋŋ?
◻ Kɛ nibii eyajaaa lɛ, mɛni hewɔ esaaa akɛ wɔshwaa Nyɔŋmɔ?
◻ Mɛni baaye abua wɔ ni wɔmli akafu Yehowa?
[Mfoniri ni yɔɔ baafa 15]
Beni etsiɔ ehe kɛjɛɔ Abraham he lɛ, Lot hala nɔ ni ehiii yɛ eshihilɛ he gbɛfaŋ