Yehowa—Nyɔŋmɔ ni Jieɔ Teemɔŋ Saji Akpo
“Nyɔŋmɔ ko yɛ ŋwɛi ni jieɔ teemɔŋ saji ashi.”—DANIEL 2:28.
1, 2. (a) Esoro Yehowa yɛ e-Henyɛlɔ kpele lɛ he yɛ mɛɛ gbɛ nɔ? (b) Mɛɛ gbɛ nɔ adesai jieɔ nɛkɛ sɔrɔtofeemɔ nɛɛ kpo yɛ?
YEHOWA, jeŋ muu fɛɛ Nyɔŋmɔ ni nɔ kwɔ fe fɛɛ ni eyɔɔ suɔmɔ, Bɔlɔ koome pɛ lɛ, ji Nyɔŋmɔ ni yɔɔ nilee kɛ jalɛsaneyeli. Ehe ehiaaa ni ekɛ mɔ ni eji, enitsumɔi, kɛ eyiŋtoi atee. Ejieɔ ehe kpo yɛ lɛ diɛŋtsɛ ebe ni eto mli, yɛ lɛ diɛŋtsɛ esusumɔ naa. Esoroɔ lɛ yɛ e-Henyɛlɔ, Satan Abonsam, mɔ ni bɔɔ mɔdɛŋ ni ekɛ bɔ ni eji diɛŋtsɛ kɛ eyiŋtoi atee lɛ he yɛ nɛkɛ gbɛ nɔ.
2 Taakɛ bɔ ni esoro Yehowa yɛ Satan he kwraa lɛ, nakai nɔŋŋ hu ji amɛjálɔi. Nɔ ni kadiɔ mɛi ni nyiɛɔ Satan sɛɛ lɛ ji osatofeemɔ kɛ shishiumɔ. Amɛbɔɔ mɔdɛŋ akɛ amɛaaha gbɔmɛi ana amɛ akɛ ejurɔfeelɔi, yɛ be mli ni amɛmiitsu duŋ mli nitsumɔi. Akɛɛ Korinto Kristofoi lɛ akɛ amɛnaa akakpɛ amɛhe yɛ anɔkwa sane nɛɛ hewɔ. “Ejaakɛ nɛkɛ mɛi nɛɛ ji amale bɔfoi, nitsulɔi shishiulɔi ni tsakeɔ amɛhe feɔ Kristo bɔfoi. Ni enɛ bɛ naakpɛɛ tete; ejaakɛ Satan diɛŋtsɛ tsakeɔ ehe etsɔɔ la bɔfo.” (2 Korintobii 11:13, 14) Shi nɔ ni tamɔɔɔ nakai lɛ, Kristofoi kwɛɔ Kristo gbɛ akɛ amɛ Hiɛnyiɛlɔ. Beni eyɔɔ shikpɔŋ nɔ lɛ, ejie e-Tsɛ, Yehowa Nyɔŋmɔ su kɛ baŋ kpo yɛ gbɛ ni yeɔ emuu nɔ. (Hebribii 1:1-3) Enɛ hewɔ lɛ, Kristofoi kaseɔ Yehowa, Nyɔŋmɔ ni wieɔ anɔkwale, ni kɛ nɔ ko eteee, la Nyɔŋmɔ lɛ, kɛtsɔ Kristo sɛɛnyiɛmɔ nɔ. Amɛ hu ehe ehiaaa ni amɛkɛ amɛsu kɛ baŋ, amɛnitsumɔi, loo amɛyiŋtoi atee.—Efesobii 4:17-19; 5:1, 2.
3. Mɛɛ gbɛ nɔ wɔɔtsɔ wɔha ana akɛ wɔnaa ni afolɔɔ akɛ anyɛɔ gbɔmɛi ni batsɔmɔɔ Yehowa Odasefoi lɛ anɔ koni amɛfata “teemɔŋ jamɔ kuu” he lɛ jeee anɔkwale?
3 Yehowa jieɔ saji otii ni kɔɔ eyiŋtoi kɛ wɔsɛɛ be ni adesai leee kɛtsɔ hiɛ lɛ ahe lɛ kpo, yɛ bei ni ele akɛ ehi fe fɛɛ mli. Eji Nyɔŋmɔ ni jieɔ teemɔŋ saji akpo, yɛ shishinumɔ ni tamɔ nɛkɛ naa. Enɛ hewɔ lɛ, afɔ̃ɔ gbɔmɛi ni taoɔ ni amɛjá lɛ lɛ anine—hɛɛ, awoɔ amɛ hewalɛ—ni amɛkase nɛkɛ saji ni ajie lɛ kpo nɛɛ. Nii amlipɛimɔ ko ni afee yɛ 1994 mli, ni abibii Odasefoi fe 145,000 saji yɛ Europa maŋ ko mli lɛ, jie lɛ kpo akɛ, kɛ aja mli lɛ, amɛteŋ mɔ fɛɛ mɔ diɛŋtsɛ kɛ afii etɛ pɛi Yehowa Odasefoi atsɔɔmɔi amli ekwɛ jogbaŋŋ, dani ehala akɛ eeetsɔ Odasefonyo. Amɛ diɛŋtsɛ amɛjɛ amɛsuɔmɔ mli amɛhala akɛ amɛaafee nakai, ni mɔ ko enyɛɛɛ amɛnɔ. Ni amɛkã he amɛyɛ suɔmɔnaa nii kɛ nifeemɔ mli heyeli lolo. Akɛ nɔkwɛmɔ nɔ lɛ, akɛni amɛteŋ mɛi fioo komɛi kɛ jeŋba he tɛi ni nɔ kwɔlɔ, ni afolɔ ashwie shi ahã Kristofoi lɛ kpaaa gbee hewɔ lɛ, amɛkpɛ amɛyiŋ akɛ amɛsumɔɔɔ ni amɛtsa nɔ akɛ Odasefoi dɔŋŋ. Shi, eyɛ miishɛɛ waa akɛ, yɛ afii enumɔ ni eho lɛ amli lɛ, nɛkɛ tsutsu Odasefoi nɛɛ ateŋ mɛi babaoo to amɛ gbɛjianɔ koni amɛbaje naanyobɔɔ kɛ nitsumɔ akɛ Odasefoi lɛ shishi ekoŋŋ.
4. Mɛni ehe ehiaaa ni egba Kristofoi anɔkwafoi anaa, ni mɛni hewɔ?
4 Shi kɛlɛ, jeee tsutsu Odasefoi nɛɛ fɛɛ kuɔ amɛ sɛɛ, ni amɛteŋ mɛi komɛi yɛ ni tsutsu lɛ amɛhiɛ sɔɔmɔ hegbɛi yɛ Kristofoi asafo lɛ mli. Esaaa akɛ enɛ feɔ wɔ naakpɛɛ, ejaakɛ Yesu sɛɛnyiɛlɔi ni bɛŋkɛ lɛ kpaakpa fe fɛɛ lɛ ateŋ mɔ kome, bɔfo Yuda tsi ehe ni etee. (Mateo 26:14-16, 20-25) Shi ani enɛ ji yiŋtoo ni aaadamɔ nɔ ahao yɛ Kristojamɔ he diɛŋtsɛ? Ani enɛ fiteɔ omanyeyeli ni Yehowa Odasefoi kɛtsuɔ amɛ nitsɔɔmɔ nitsumɔ lɛ? Dabi kwraa, tamɔ bɔ ni Yuda Iskariot sɛɛgbɛtsɔɔmɔ nifeemɔ lɛ hãaa Nyɔŋmɔ yiŋtoi afee efolo lɛ pɛpɛɛpɛ.
Eji Ofe, ni Kɛlɛ Eyɛ Suɔmɔ
5. Te wɔfeɔ tɛŋŋ wɔleɔ akɛ Yehowa kɛ Yesu sumɔɔ adesai, ni mɛɛ gbɛ nɔ amɛjie suɔmɔ nɛɛ kpo yɛ?
5 Yehowa ji Nyɔŋmɔ ni yɔɔ suɔmɔ. Esusuɔ gbɔmɛi ahe. (1 Yohane 4:7-11) Egbɛhe ni nɔ kwɔ gojoo lɛ fɛɛ sɛɛ lɛ, enáa miishɛɛ akɛ ekɛ adesai aaafee eshieŋtsɛmɛi. Wɔkaneɔ yɛ etsuji ni hi shi yɛ blema lɛ ateŋ mɔ kome he akɛ: “ ‘Shi Abraham he Yehowa eye, ni abu enɛ jalɛ ahã lɛ,’ ni abatsɛ lɛ akɛ ‘Yehowa shieŋtsɛ.’ ” (Yakobo 2:23, NW; 2 Kronika 20:7; Yesaia 41:8) Taakɛ bɔ ni adesai nanemɛi gbaa amɛhe amɛyitsoŋ saji, loo teemɔŋ saji lɛ, nakai nɔŋŋ Yehowa hu kɛ eshieŋtsɛmɛi lɛ feɔ. Yesu kase e-Tsɛ lɛ yɛ enɛ gbɛfaŋ, ejaakɛ ekɛ ekaselɔi lɛ fee eshieŋtsɛmɛi ni egba amɛ eteemɔŋ saji. Ekɛɛ amɛ akɛ: “Mitsɛɛɛ nyɛ nyɔji dɔŋŋ, ejaakɛ nyɔŋ leee nɔ ni enuntsɔ feɔ; shi moŋ shieŋtsɛmɛi mitsɛ nyɛ, ejaakɛ nii fɛɛ ni minu yɛ mitsɛ naa lɛ, mitsĩ tã mikɛɛ nyɛ.” (Yohane 15:15) Yitsoŋ saji, loo “teemɔŋ saji,” ní Yehowa, kɛ e-Bi lɛ, kɛ amɛshieŋtsɛmɛi lɛ fɛɛ leɔ lɛ, hãa amɛfeɔ ekome yɛ suɔmɔ kpaa kɛ hetuu-kɛhamɔ ni nɔ ko nyɛɛɛ atse mli lɛ mli.—Kolosebii 3:14.
6. Mɛni hewɔ ehe ehiaaa ni Yehowa kɛ eyiŋtoi atee lɛ?
6 Gbɛi Yehowa lɛ shishinumɔ ni ji, “Ehaa Ebaa Mli” lɛ, tsɔɔ nyɛmɔ ni eyɔɔ ni ekɛtsɔɔ nɔ fɛɛ nɔ ni ehe hiaa ni etsɔ, bɔni afee ni ekɛha eyiŋtoo aba mli. Ákɛ mɔ ni tamɔɔɔ adesai lɛ, ehe ehiaaa ni Yehowa kɛ eyiŋtoi atee yɛ gbeyei ni esheɔ akɛ ekolɛ mɛi krokomɛi baanyɛ atsĩ enaa yɛ eyiŋtoi ahe nitsumɔ gbɛfaŋ lɛ hewɔ. Enine nyɛŋ anyɛ shi kɔkɔɔkɔ, no hewɔ lɛ ejieɔ nɔ ni etoɔ eyiŋ akɛ ebaafee lɛ babaoo kpo etsɔɔ yɛ faŋŋ mli, yɛ e-Wiemɔ, ni ji Biblia lɛ mli. Ewo shi akɛ: “Miwiemɔi ni jɛɔ midaaŋ lɛ . . . ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”—Yesaia 55:11.
7. (a) Mɛni Yehowa gba efɔ̃ shi yɛ Eden, ni Satan hã Nyɔŋmɔ fee anɔkwafo yɛ mɛɛ gbɛ nɔ? (b) Shishitoo mla ni yɔɔ 2 Korintobii 13:8 lɛ efee anɔkwale be fɛɛ be yɛ mɛɛ gbɛ nɔ?
7 Yɛ Eden atuatsemɔ lɛ sɛɛ be fioo mli lɛ, Yehowa jie nɔ ni baajɛ béi ni kã lɛ kɛ e-Henyɛlɔ, Satan teŋ lɛ mli aba yɛ naagbee kwraa lɛ he saji akpo faŋŋ. Abaatswa Seshi ni Nyɔŋmɔ ewo shi yɛ he lɛ nɔ̃ yɛ hejaramɔ mli diɛŋtsɛ, shi no kpataŋ ehiɛ kɛyaŋ naanɔ, shi yɛ naagbee lɛ, abaatswa Satan nɔ̃, ni no kɛ ehiɛkpatamɔ baaba. (1 Mose 3:15) Yɛ afi 33 Ŋ.B. lɛ, Abonsam tswa Seshi lɛ, ni ji Kristo Yesu nɔ̃ diɛŋtsɛ, kɛtsɔ gbele ni ehã agbe lɛ lɛ nɔ. Satan tsɔ nɛkɛ gbɛ nɔ ewo Ŋmalɛ obɔ, ni etsɔ no nɔ ehã Yehowa bafee anɔkwale Nyɔŋmɔ, eyɛ mli akɛ eka shi faŋŋ akɛ enɛ jeee Satan yiŋtoo. Hetsɛ ni eyɔɔ kɛha anɔkwale kɛ jalɛ nifeemɔ, kɛ agbɛnɛ hu ehenɔwomɔ, kɛ tsuitsakemɔ su ni ebɛ lɛ, tsirɛ lɛ ni efee nɔ̃ pɛpɛɛpɛ ni Nyɔŋmɔ egba efɔ̃ shi akɛ ebaafee lɛ. Hɛɛ, shishitoo mla nɛɛ ji anɔkwale kɛha anɔkwale lɛ he shitee-kɛ-wolɔi fɛɛ, kɛ Satan diɛŋtsɛ po akɛ: “Wɔnyɛŋ nɔ ko wɔfee wɔshi anɔkwale lɛ, shi moŋ kɛ́ nɔ ko wɔɔfee lɛ, wɔɔfee wɔha anɔkwale lɛ.”—2 Korintobii 13:8.
8, 9. (a) Mɛni Satan le, shi ani nɛkɛ nilee nɛɛ kɛ Yehowa yiŋtoi ahe nitsumɔ woɔ oshara mli? (b) Mɛɛ kɔkɔbɔɔ ni mli kã shi faŋŋ mɛi ni teɔ shi woɔ Yehowa lɛ kpooɔ, ni mɛni hewɔ?
8 Kɛjɛ be mli ni ato Nyɔŋmɔ Maŋtsɛyeli ama shi ni anaaa yɛ 1914 kɛbaa nɛɛ, Kpojiemɔ 12:12 eba mli akɛ: “No hewɔ lɛ nyɛ ŋwɛii kɛ nyɛ mɛi ni nyɛyɔɔ jɛi nyɛnaa tsuijurɔ! Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.” Shi kɛlɛ, ani le ni Satan le akɛ be fioo kɛkɛ eyɔɔ lɛ eha etsake egbɛ ni ekɔ lɛ? Nakai feemɔ baafee kpɛlɛmɔ ni lɛ Satan lɛ ekpɛlɛɔ nɔ akɛ Yehowa ji anɔkwale Nyɔŋmɔ lɛ, ni no hewɔ lɛ, ákɛ Nɔyelɔ ni Nɔ Kwɔ Fe Fɛɛ lɛ, lɛ pɛ ji mɔ ni esa akɛ akɛ jamɔ aha. Shi kɛlɛ, Abonsam sumɔɔɔ ni ekpɛlɛɔ nɔ akɛ aye enɔ kunim, eyɛ mli akɛ ele nɛkɛ anɔkwalei nɛɛ faŋŋ.
9 Yehowa jieɔ nɔ ni baaba kɛji Kristo ba koni ebakojo Satan jeŋ gbɛjianɔtoo lɛ kpo etsɔɔ yɛ faŋŋ mli. (Mateo 24:29-31; 25:31-46) E-Wiemɔ lɛ tswaa adafi yɛ je lɛŋ nɔyelɔi lɛ ahe, yɛ enɛ gbɛfaŋ akɛ: “Be mli ni amɛaakɛɛ akɛ: ‘Hejɔlɛ yɛ ni wɔyɛ shweshweeshwe!’ lɛ, no mli nɔŋŋ hiɛkpatamɔ aaabatua amɛ trukaa, tamɔ kɔɔmɔ tuaa yoo ni musu eda lɛ.” (1 Tesalonikabii 5:3) Mɛi ni nyiɛɔ Satan sɛɛ lɛ kuɔ amɛhiɛ amɛfɔ̃ɔ kɔkɔbɔɔ ni mli kã shi faŋŋ nɛɛ nɔ. Amɛtsuii fɔji lɛ eha amɛshwila, ni enɛ haaa amɛtsake amɛtsui kɛjɛ amɛgbɛi fɔji lɛ anɔ, koni amɛtsake amɛ gbɛjianɔtoi kɛ ŋaa gbɛ ni amɛtsɔɔ nɔ amɛkaa akɛ amɛaaha Yehowa yiŋtoi afee efolo lɛ.
10. (a) Nɛgbɛ ekolɛ 1 Tesalonikabii 5:3 ena emlibaa kɛyashɛ, shi te esa akɛ Yehowa webii afee amɛnii amɛha tɛŋŋ? (b) Mɛni hewɔ ekolɛ gbɔmɛi ni bɛ hemɔkɛyeli lɛ baaná ekãa waa ni amɛkɛte shi amɛwo Nyɔŋmɔ webii, yɛ wɔsɛɛ be mli lɛ?
10 Titri lɛ kɛjɛ 1986, beni Jeŋmaji Ekomefeemɔ lɛ jaje Majimaji Ateŋ Toiŋjɔlɛ afi lɛ kɛbaa nɛɛ, je lɛ eyi obɔ kɛ toiŋjɔlɛ kɛ shweshweeshwe shihilɛ he wiemɔi. Atsɔ gbɛi krɛdɛɛi komɛi anɔ abɔ mɔdɛŋ akɛ aaaná jeŋ fɛɛ toiŋjɔlɛ, ni anaa akɛ nɛkɛ mɔdɛŋbɔɔ nɛɛ eye omanye fioo ko. Ani gbalɛ nɛɛ mlibaa kwraa nɛ, aloo ani wɔbaanyɛ wɔkpa wɔsɛɛ be mli adafitswaa ko ni tamɔ nakai, ni hãa mɔ he jɔ̃ɔ ehe lɛ gbɛ? Yehowa baaha nakai sane lɛ mli afee faŋŋ yɛ lɛ diɛŋtsɛ ebe mli. Dani no aaaba lɛ, nyɛhaa wɔshia kpe yɛ mumɔŋ, “mɛi ni kwɛɔ gbɛ ni amɛshweɔ [Yehowa, NW] Nyɔŋmɔ gbi lɛ baa lɛ.” (2 Petro 3:12) Beni be kãa he ehoɔ ni ayaa nɔ awieɔ toiŋjɔlɛ kɛ shweshweeshwe shihilɛ he babaoo lɛ, ekolɛ aŋkroaŋkroi komɛi ni le nɛkɛ kɔkɔbɔɔ nɛɛ, shi amɛhala akɛ amɛaaku amɛhiɛ amɛshwie nɔ lɛ, baaná ekãa babaoo ni amɛbaasusu akɛ Yehowa haŋ, loo enyɛŋ eha ewiemɔ lɛ aba mli. (Okɛto Jajelɔ 8:11-13; 2 Petro 3:3, 4 he.) Shi anɔkwa Kristofoi le akɛ Yehowa baatsu eyiŋtoo lɛ he nii!
Bulɛ Kpakpa ni Aaaná Kɛha Gbɛjianɔtoi ni Yehowa Kɛtsuɔ Nii Lɛ
11. Mɛni Daniel kɛ Yosef kase yɛ Yehowa he?
11 Beni Maŋtsɛ Nebukadnezar, Babilon Maŋtsɛyeli Hee lɛ nɔyelɔ lɛ la lamɔ ko ni hao lɛ waa ni enyɛɛɛ ekai lɛ, ebi yelikɛbuamɔ. Esɔfoi, okɔmfoi, kɛ ŋkunyaayelɔi lɛ nyɛɛɛ amɛtsɔɔ lɛ nɔ ni ji elamɔ lɛ, ni amɛnyɛɛɛ amɛtsɔɔ lɛ eshishi hu. Shi, Nyɔŋmɔ tsulɔ Daniel, nyɛ etsɔɔ lɛ shishi, eyɛ mli akɛ ekpɛlɛ nɔ amrɔ nɔŋŋ akɛ lamɔ lɛ kɛ eshishitsɔɔmɔ ni ejie lɛ kpo etsɔɔ lɛ jɛɛɛ lɛ diɛŋtsɛ enilee mli. Daniel kɛɛ akɛ: “Nyɔŋmɔ ko yɛ ŋwɛi ni jieɔ teemɔŋ saji ashi, ni eetsɔɔ maŋtsɛ Nebukadnezar nɔ ni baaba wɔsɛɛ.” (Daniel 2:1-30) Afii ohai abɔ ni etsɔ hiɛ lɛ, Yosef, ni ji Nyɔŋmɔ gbalɔ kroko hu ná niiashikpamɔ ni tamɔ enɛ, ákɛ Yehowa ji teemɔŋ saji a-Kpojielɔ.—1 Mose 40:8-22; Amos 3:7, 8.
12, 13. (a) Namɔ ji Nyɔŋmɔ gbalɔ kpeteŋkpele fe fɛɛ, ni mɛni hewɔ ohaa hetoo nakai? (b) Namɛi sɔmɔɔ akɛ “Nyɔŋmɔ teemɔŋ saji lɛ anɔ tsuji nukpai” ŋmɛnɛ, ni te esa akɛ wɔna amɛ wɔha tɛŋŋ?
12 Yehowa gbalɔ kpeteŋkpele fe fɛɛ ni tsu nii yɛ shikpɔŋ nɔ ji Yesu. (Bɔfoi lɛ Asaji 3:19-24) Paulo tsɔɔ mli akɛ: “Sá lɛ bei sɔrɔtoi amli kɛ gbɛi sɔrɔtoi anɔ Nyɔŋmɔ tsɔ ekɛ tsɛmɛi lɛ wie yɛ gbalɔi lɛ anaa, shi nɛkɛ gbii nɛɛ anaagbee mli lɛ, ebi lɛ naa ekɛ wɔ wie yɛ, mɔ ni eŋɔ lɛ eto nibii fɛɛ yelɔ lɛ, mɔ nɔ hu ni etsɔ efee jeŋ bei lɛ.”—Hebribii 1:1, 2.
13 Yehowa kɛ mra be mli Kristofoi lɛ wie kɛtsɔ e-Bi, Yesu, mɔ ni jie ŋwɛi teemɔŋ saji akpo etsɔɔ amɛ lɛ nɔ. Yesu kɛɛ amɛ akɛ: “Nyɛ lɛ aha nyɛ hegbɛ akɛ nyɛle Nyɔŋmɔ maŋtsɛyeli lɛ mli teemɔŋ saji lɛ.” (Luka 8:10) Sɛɛ mli lɛ, Paulo wie Kristofoi ni afɔ amɛ mu lɛ ahe akɛ amɛji “Kristo sɔɔlɔi kɛ Nyɔŋmɔ teemɔŋ saji lɛ anɔ tsuji nukpai.” (1 Korintobii 4:1) Ŋmɛnɛ, Kristofoi ni afɔ amɛ mu lɛ yaa nɔ amɛsɔmɔɔ yɛ nakai gbɛ nɔ, ni amɛji tsulɔ anɔkwafo kɛ nilelɔ ni tsɔɔ e-Nɔyeli Kuu lɛ nɔ ekɛ mumɔŋ niyenii hãa yɛ be ni sa mli lɛ. (Mateo 24:45-47) Kɛji wɔbuɔ Nyɔŋmɔ blema gbalɔi ni ekɛ mumɔ tsirɛ amɛ lɛ waa, titri lɛ Nyɔŋmɔ Bi lɛ, ani esaaa akɛ wɔjieɔ bulɛ kpo wɔtsɔɔ najiaŋdamɔlɔi ni ji adesai ni Yehowa kɛ amɛ tsuɔ nii ŋmɛnɛ, ni ekɛjieɔ Biblia mli saji ni he hiaa ewebii waa yɛ jaramɔ bei nɛɛ amli lɛ akpo etsɔɔ lɛ nakai nɔŋŋ?—2 Timoteo 3:1-5, 13.
Yɛ Faŋŋ Mli Aloo yɛ Teemɔŋ?
14. Mɛɛ be Kristofoi tsuɔ nitsumɔi yɛ teemɔŋ, ni amɛkɛ nakai feemɔ nyiɛɔ namɔ nɔkwɛmɔ nɔ sɛɛ?
14 Ani bɔ ni Yehowa jieɔ nibii akpo faŋŋ lɛ tsɔɔ akɛ esa akɛ Kristofoi ajie nɔ fɛɛ nɔ ni amɛle lɛ kpo be fɛɛ be, yɛ shihilɛ fɛɛ shihilɛ mli hu? Ojogbaŋŋ, Kristofoi nyiɛɔ Yesu ŋaawoo ni ekɛha ebɔfoi lɛ akɛ ‘amɛhiɛ atɛ̃ tamɔ onufui, ni amɛfee kpoo tamɔ okpoi’ lɛ sɛɛ. (Mateo 10:16) Kɛ́ akɛɛ amɛ akɛ amɛnyɛŋ amɛja Nyɔŋmɔ yɛ bɔ ni amɛhenilee biɔ ni amɛfee lɛ naa lɛ, Kristofoi yaa nɔ ‘amɛboɔ Nyɔŋmɔ toi,’ ejaakɛ amɛyooɔ akɛ adesa gbɛjianɔtoo ko bɛ hegbɛ akɛ etsĩɔ Yehowa jamɔ naa. (Bɔfoi lɛ Asaji 5:29) Yesu diɛŋtsɛ fee bɔ ni enɛ ja hã lɛ he nɔkwɛmɔ nɔ. Wɔkaneɔ akɛ: “Ni nii nɛɛ asɛɛ lɛ, Galilea Yesu kpaa shi yɛ, shi esumɔɔɔ akɛ eyakpaa shi yɛ Yudea, ejaakɛ Yudafoi lɛ miitao lɛ agbe. Agbɛnɛ Yudafoi lɛ asesei agbijurɔ lɛ eshɛ etã. Kɛkɛ lɛ Yesu kɛɛ amɛ [eheloonaa nyɛmimɛi ni heee yeee lɛ] akɛ: . . . ‘Nyɛ lɛ nyɛyaa gbijurɔ nɛɛ yeli; shi mi lɛ minako maya, ejaakɛ mibe lɛ nako ashɛ.’ Beni ekɛɛ amɛ nakai lɛ, ehi shi yɛ Galilea dã. Shi beni enyɛmimɛi lɛ etee lɛ, no sɛɛ dani lɛ hu etee gbijurɔ lɛ, shi ejieee ehe shi, shi moŋ tamɔ teemɔ mli.”—Yohane 7:1, 2, 6, 8-10.
Ani Esa akɛ Agba Atsɔɔ loo Ahã Ehi Teemɔŋ?
15. Yosef tsɔɔ akɛ bei komɛi lɛ teemɔŋ sane ni akɛtoɔ lɛ ji nifeemɔ ni suɔmɔ yɔɔ mli, yɛ mɛɛ gbɛ nɔ?
15 Yɛ shihilɛi komɛi amli lɛ, jeee akɛ nilee yɛ mli akɛ akɛ sane ato kɛkɛ, shi moŋ etsɔɔ suɔmɔ hu. Akɛ nɔkwɛmɔ nɔ lɛ, te Yosef, mɔ ni kwɛ Yesu akɛ etsɛ lɛ, fee enii eha tɛŋŋ, beni ená ele akɛ eŋa Maria, ni etsɛ ehe baa lɛ “[ena] musu kɛjɛ Mumɔ krɔŋkrɔŋ lɛŋ” lɛ? Wɔkaneɔ akɛ: “Shi Yosef, ewu lɛ, akɛni jalɔ ji lɛ ni etaooo akɛ ebɔ lɛ ahora lɛ, esusu akɛ eeeŋmɛɛ ehe kpoo.” (Mateo 1:18, 19; wɔma efã ko nɔ mi.) Kwɛ bɔ ni kulɛ efeŋ mlihilɛ kpojiemɔ akɛ eeewó eyi etsɔɔ jeŋ!
16. Mɛɛ gbɛnaa nii kã onukpai lɛ, kɛ asafo lɛ mli bii krokomɛi lɛ hu fɛɛ anɔ, yɛ teemɔŋ saji agbɛfaŋ?
16 Esaaa akɛ ajieɔ teemɔŋ saji ni baanyɛ ekɛ hiɛgbele loo dɔlɛ aba lɛ kpo atsɔɔ gbɔmɛi ni esaaa akɛ amɛleɔ. Kristofoi onukpai hãa enɛ hiɔ amɛjwɛŋmɔ mli, kɛji esa akɛ amɛkɛ teemɔŋ ŋaawoo loo miishɛjemɔ ahã nanemɛi Kristofoi, aloo ekolɛ esa akɛ amɛtsɔse amɛ po yɛ esha ni yɔɔ hiɛdɔɔ ni amɛfee amɛshi Yehowa lɛ hewɔ. Saji nɛɛ ahe nii ni aaatsu yɛ Ŋmalɛ naa lɛ he miihia; teemɔŋ saji ni ajieɔ lɛ kpo atsɔɔ mɛi ni sane lɛ kɔɔɔ amɛhe lɛ he ehiaaa, ni etsɔɔɔ suɔmɔ hu. Eka shi faŋŋ akɛ, Kristofoi asafo lɛ mli bii ebɔŋ mɔdɛŋ akɛ amɛaale nibii ni ji teemɔŋ saji kɛjɛ onukpai lɛ aŋɔɔ, shi moŋ amɛbaajie bulɛ kpo amɛtsɔɔ gbɛnaa nii ni kã onukpai lɛ anɔ akɛ amɛkɛ teemɔŋ saji ato lɛ. Abɛi 25:9 kɛɔ akɛ: “Kɛ́ okɛ onaanyo yɛ béi ko lɛ, okɛ lɛ atao naa; shi kaajie mɔ kroko teemɔŋ sane kpo.”
17. Mɛni hewɔ Kristofoi kɛ teemɔŋ saji toɔ yɛ bei babaoo mli lɛ, shi mɛni hewɔ amɛnyɛŋ amɛfee nakai be fɛɛ be lɛ?
17 Akɛ nɛkɛ shishitoo mla nɛɛ tsuɔ nii yɛ weku kɔkrɔɔ lɛ mli, loo yɛ nanemɛi ni bɛŋkɛ amɛhe kpaakpa lɛ ateŋ hu. Saji komɛi ni ahãa ehiɔ teemɔŋ lɛ he miihia, bɔni afee ni wɔkɛtsĩ béi kɛ wɔkɛ mɛi krokomɛi ateŋ wekukpaa fitemɔ naa. “Bɔ ni kooyigbɛ kɔɔyɔɔ kɛ nugbɔnɛmɔ baa lɛ, nakai nɔŋŋ mɔ he wiemɔ lilɛi kɛ hiɛtumɔ baa.” (Abɛi 25:23) Shi kɛlɛ, anɔkwayeli kɛha Yehowa kɛ ejalɛ shishitoo mlai lɛ, kɛ agbɛnɛ hu suɔmɔ ni wɔyɔɔ kɛha aŋkroaŋkroi ni tɔ̃ɔ lɛ hewɔ lɛ, ehãa ni yɛ bei komɛi amli lɛ, ehe bahiaa ni ahã fɔlɔi, Kristofoi onukpai, loo mɛi krokomɛi ni sa lɛ ale teemɔŋ saji po.a Shi yɛ shihilɛi babaoo mli lɛ, Kristofoi hãa mɛi krokomɛi ateemɔŋ saji hiɔ shi yɛ teemɔŋ, ni amɛbuɔ he tamɔ bɔ ni amɛbuɔ amɛ diɛŋtsɛ amɛnɔ he lɛ.
18. Mɛɛ Kristofoi asui etɛ baanyɛ aye abua wɔ ni wɔle nibii ni esa akɛ wɔwie kɛ nɔ ni esaaa akɛ wɔwieɔ?
18 Yɛ enaamuu mli lɛ, Kristofonyo kaseɔ Yehowa kɛtsɔɔ saji komɛi ni ehãa efeɔ teemɔŋ saji kɛji ehe miihia, ní ejieɔ amɛ kpo yɛ be ni sa mli pɛ lɛ nɔ. Beni ekpɛɔ eyiŋ yɛ nibii ni esa akɛ ekɛɛ kɛ nɔ ni esaaa akɛ ekɛɔ he lɛ, ehãa heshibaa, hemɔkɛyeli, kɛ suɔmɔ kudɔɔ lɛ. Heshibaa tsĩɔ lɛ gbɛ koni ekawo bɔ ni lɛ diɛŋtsɛ ehe hiaa lɛ he, koni ekabɔ mɔdɛŋ akɛ eeesa mɛi krokomɛi ahiɛ kɛtsɔ kɛɛmɔ ni eeekɛɛ amɛ nɔ fɛɛ nɔ ni ele, loo kɛtsɔ limɔ ni ekɛ teemɔŋ saji ni enyɛŋ egba amɛ lɛ aaali amɛ lɛ nɔ. Hemɔkɛyeli ni eyɔɔ yɛ Yehowa Wiemɔ lɛ kɛ Kristofoi asafo lɛ mli lɛ kanyaa lɛ ni eshiɛɔ Biblia mli saji ni ajɛ ŋwɛi akɛha lɛ etsɔɔ, yɛ be mli ni ekwɛɔ jogbaŋŋ koni ekawie nibii ni ekolɛ eeeha mɛi krokomɛi amli afu kɛjɛ shishijee lɛ. Hɛɛ, suɔmɔ kanyaa lɛ yɛ faŋŋ mli ni ewieɔ nibii ni woɔ Nyɔŋmɔ hiɛ nyam, ni ehe hiaa ni gbɔmɛi ale koni amɛná naanɔ wala lɛ. Yɛ gbɛ kroko nɔ lɛ, ejieee mɛi ateemɔŋ saji akpo, ejaakɛ eyɔseɔ akɛ, yɛ shihilɛi pii amli lɛ, nɛkɛ saji nɛɛ akpojiemɔ tsɔɔ akɛ ebɛ suɔmɔ.
19. Mɛɛ nifeemɔ gbɛ yeɔ ebuaa ni ayɔseɔ anɔkwa Kristofoi, ni mɛni jɛɔ mli baa?
19 Nɛkɛ susumɔ ni ŋmɛɔ pɛpɛɛpɛ nɛɛ yeɔ ebuaa ni ayɔseɔ anɔkwale Kristofoi. Amɛkɛ mɔ ni Nyɔŋmɔ ji diɛŋtsɛ lɛ etooo teemɔŋ nii ni ji gbɛi ni akɛɔ akɛ ebɛ, loo Triniti tsɔɔmɔ ni ji teemɔŋ sane, ni anyɛɛɛ atsɔɔ shishi lɛ sɛɛ. Nyɔŋmɔi ni aleee amɛ lɛ ji kadimɔ nii ni anaa yɛ apasa jamɔ mli, shi jeee yɛ anɔkwale jamɔ mli. (Kwɛmɔ Bɔfoi lɛ Asaji 17:22, 23.) Yehowa Odasefoi ni afɔ amɛ mu lɛ ahiɛ sɔɔ hegbɛ ni amɛná akɛ amɛji “Nyɔŋmɔ teemɔŋ saji lɛ anɔ tsuji nukpai” lɛ lɛlɛŋ. Amɛtsɔɔ teemɔŋ saji nɛɛ ni amɛjieɔ lɛ kpo faŋŋ amɛtsɔɔ mɛi krokomɛi lɛ nɔ amɛyeɔ amɛbuaa koni akɛgbala gbɔmɛi ni yɔɔ jalɛ tsuii lɛ kɛba, ní amɛtao amɛkɛ Yehowa teŋ naanyobɔɔ.—1 Korintobii 4:1; 14:22-25; Zakaria 8:23; Maleaki 3:18.
[Shishigbɛ niŋmai]
a Kwɛmɔ “Okɛ Ohe Akawo Mɛi Krokomɛi Ahe Eshai Amli,” yɛ June 1, 1986 Buu-Mɔɔ lɛ mli.
Te Obaaha Hetoo Tɛŋŋ?
◻ Mɛni hewɔ ehe ehiaaa ni Yehowa kɛ eyiŋtoi atee lɛ?
◻ Namɛi Yehowa jieɔ eteemɔŋ saji akpo etsɔɔ?
◻ Mɛɛ gbɛnaa nii kã Kristofoi anɔ yɛ teemɔŋ saji agbɛfaŋ?
◻ Mɛɛ sui etɛ baaye abua Kristofoi ni amɛle nɔ ni esa akɛ amɛwie kɛ nɔ ni esaaa akɛ amɛwieɔ?
[Mfoniri ni yɔɔ baafa 8]
Yehowa jieɔ teemɔŋ saji akpo kɛtsɔɔ e-Wiemɔ lɛ nɔ