Nyamɔ yɛ “Nɔhiɛkamɔ Nyɔŋmɔ” lɛ mli
“Ejaakɛ bo, Nuntsɔ Yehowa, ji mihiɛnɔkamɔ, bo onɔ mikɛ mihiɛ fɔ̃ kɛjɛ miblahiaŋ.”—Lala 71:5
1, 2. (a) Mɛɛ odaseyelinii ko yɔɔ Ŋmalɛi Iɛ amli ni tsɔɔ akɛ Nyɔŋmɔ jwɛŋɔ wɔnɔ? (b) Te aaafee tɛɛŋ ni wɔmiishɛɛ lɛ aaayi hu?
1 ANI beikomɛi lɛ oŋɔɔ be fioo ko ni okɛsusuɔ okɛ Nyɔŋmɔ teŋ wekukpaa ni jara wa lɛ he? Kwɛ bɔni eyɔɔ miishɛɛ eha akɛ wɔɔɔle akɛ Nyɔŋmɔ jwɛŋɔ wɔhe! Lɛɛlɛŋ, yɛ Yehowa jwɛŋmɔ naa lɛ, jeŋmaji lɛ tamɔ nu kuli ni jɛɔ googa mli gbeɔ shi. Nohewɔ lɛ belɛ wɔ aŋkroaŋkroi lɛ, wɔ jeee nɔko kwraa yɛ ehiɛ. Shi Yesu Kristo ma nɔ mi eha wɔ akɛ: “Ani aflimatai enyɔ lɛ jeee hiɛbii nyɔŋma ahɔ̃ɔ aheɔ? Shi amɛteŋ ekomefolo enyɔŋ shikpɔŋ, ja ejɛ nyɛ-Tsɛ lɛ dɛŋ. Shi nyɛyiteŋtsɔi po lɛ akane fɛɛ. Nohewɔ lɛ nyɛkashea gbeyei; nyɛjara wa aahu fe aflimatai babaoo.”—Mat. 10:29-31; Yes. 40:15.
2 Kɛji Nyɔŋmɔ kadiɔ aflimata kome shigbeemɔ lɛ, enyiɛ nɔŋŋ ni emusuŋ etsɔŋ lɛ yɛ adesai ni ebɔ yɛ lɛ diɛŋtsɛ esubaŋ nɔ lɛ ahe waa po fe nakai? (1 Mose 1:26) Wɔ-Nyɔŋmɔ lɛ je agbo lɛɛlɛŋ yɛ ejwɛŋmɔ kɛ eŋaa mli, shi oje agbo po fe nakai yɛ jalɛsane ni eyeɔ ehaa mɛi ni ayeɔ amɛ amim lɛ gbɛfaŋ kɛ suɔmɔ babaoo ni ejieɔ kpo etsɔɔ adesai lɛ hu mli. (Lala 33:4, 5) Eji duromɔ lɛɛlɛŋ akɛ wɔɔɔnyɛ wɔbote esuɔmɔ lɛ mli ni wɔhi no mli, yɛ nɔni Yesu ma nɔ mi eha wɔ lɛ kɛ gbeekpamɔ naa, akɛ: “Kɛji nyɛye mikitãi lɛ anɔ lɛ, nyɛ aaahi misuɔmɔ lɛ mli; taakɛ bɔni mi hu miye mi-Tsɛ, kitãi lɛ anɔ ni mihiɔ esuɔmɔ lɛ mli lɛ.” Ni Yesu kɛfata he akɛ: “Mikɛ nyɛ wie enɛɛmɛi, koni mimiishɛɛ lɛ ahi nyɛmli, ni nyɛmiishɛɛ lɛ ayi.”—Yoh. 15:10, 11.
3. Mɛni hewɔ David kɛ ehe fɔ̃ Yehowa nɔ kwraa lɛ; ni mɛni hewɔ wɔ hu wɔɔɔnyɛ wɔfee nakai lɛ?
3 Yɛ nɛkɛ fimɔbei nɛɛ amli hu wɔbaanyɛ wɔna miishɛɛ akɛ wɔ-Nyɔŋmɔ ni sumɔɔ wɔ lɛ haa wɔ hiɛnɔkamɔ. Etamɔ nɔni David ŋma Lala ni ji 71 lɛ beni etsɔ kaai ni mli wawai amli sɛɛ, ni ejie Nuntsɔ Maŋtsɛ Yehowa yi yɛ nakai Lala lɛ mli akɛ lɛ ji ehiɛnɔkamɔ kɛ mɔni ekɛ ehiɛ fɔ̃ enɔ kɛjɛ eblahiaŋ. Akɛ nɔkwɛmɔnɔ lɛ, beni ekɛ oblaŋ gojoo Goliat yaakpe lɛ, David kɛɛ: “Yehowa, mɔni jie mi kɛjɛ jata kɛ oshishibrishii lɛ dɛŋ lɛ, lɛ eeejie mi kɛaajɛ Filistinyo nɛɛ dɛŋ.” Ni Yehowa fee nakai pɛpɛɛpɛ! (1 Sam. 17:37, 45-50) Ni kɛbashi ŋmɛnɛ gbi nɛɛ, Yehowa yaa nɔ efĩɔ edasefoi lɛ ateŋ shwɛɛnii ni afɔ amɛ mu ni esɔmɔlɛ yɛ anɔkwayeli mli kɛjɛ ‘amɛblahiaŋ’ kɛ hiɛnɔkamɔ kpɛŋŋ lɛ, asɛɛ.
Bɔni Ehe Ehia Akɛ Ana Wala Hiɛnɔkamɔ Lɛ
4. Mɛni hewɔ nibii “ni aŋma ato momo” lɛ haa wɔnaà hiɛnɔkamɔ lɛ?
4 Yehowa shiwoi ni ajɛ blema beebe awo ni aŋmala yɛ e-Wiemɔ lɛ mli lɛ haa anaa hiɛnɔkamɔ ni nɔmimaa yɔɔ mli lɛɛlɛŋ, kɛha wɔsɛɛ. Taakɛ bɔfo Paulo kɛɛ lɛ: “Nibii abɔ ni aŋma ato momo lɛ, wɔdiɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.” (Rom. 15:4) Esa akɛ wɔna hiɛnɔkamɔ kɛ̃. Shi te feɔ tɛɛŋ ni nibii “ni aŋma ato momo” lɛ haa wɔ naà hiɛnɔkamɔ hu? Klɛŋklɛŋ kwraa lɛ, mɛni hewɔ ebabi ni wɔna hiɛnɔkamɔ lɛ?
5. (a) Te fee tɛɛ ni ebabi ni ana hiɛnɔkamɔ lɛ? (b) Mɛni hewɔ wɔklɛŋklɛŋ fɔlɔi lɛ ye gbele he fɔ ni eja gbɛ nakai lɛ; ni mɛni hewɔ wɔhe ebaje mli?
5 Nibii “ni aŋma ato momo” lɛ gbaa faŋŋ bɔni Nyɔŋmɔ bɔ wɔklɛŋklɛŋ fɔlɔi lɛ ni ekɛ amɛ wo miishɛɛ paradeiso ko mli, kɛ hegbɛ akɛ amɛ aaahi shi kɛya naanɔ ni amɛfɔ adesai ni yɔɔ suɔmɔ kɛ miishɛɛ ni gboiŋ kɔkɔɔkɔ lɛ amɛwo shikpɔŋ lɛ nɔ obɔ̃. (1 Mose 1:26-28; 2:7-9, 18-25) Shi hegbɛ nɛɛ je Adam kɛ Hawa dɛŋ. Mɛni hewɔ? Amɛfee esha ni amɛshɛɛɛ toiboo ni yeɔ emuu ni amɛ aaafee amɛha amɛ-Tsɛ Yehowa Nyɔŋmɔ lɛ he. Kɛkɛ ni yɛ jalɛ naa lɛ, Nuntsɔ Maŋtsɛ Yehowa bu nuu kɛ eŋa lɛ gbelefɔ. Amɛbatsɔmɔ mɛikomɛi ni feɔ nɔni amɛsumɔɔ ni amɛkɛ amɛhe efɔ̃ɔɔ mɔkomɔko nɔ, ni nohewɔ lɛ gbɛhe ko bɛ Yehowa bɔɔnii anɔkwafoi lɛ ateŋ kɛha amɛ. Agbɛnɛ hu jeee amɛkome amɛnɔ amɛgbala gbele fɔbuu lɛ kɛba, shi moŋ amɛkɛ enɛ fɔ̃ bii akpeiakpei toi akpei abɔ ni amɛ ni amɛji fɔlɔi eshafeelɔi nɛɛ baafɔ lɛ fɛɛ anɔ hu. Taakɛ Paulo kɛɔ wɔ lɛ: “Taakɛ bɔni gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele Iɛ tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.”—Rom. 5:12.
6. Mɛɛ hiɛnɔkamɔ hewɔ bɔɔnii lɛ baje nyɔŋyeli mli?
6 Shi Paulo tee nɔ ekɛɛ akɛ “aŋɔ bɔɔnii lɛ awo yakayakanii ashishi,” shi afee nakai “yɛ nɔhiɛkamɔ mli.” Mɛɛ nɔhiɛkamɔ ni? No ji wala nɔhiɛkamɔ ko akɛ “bɔɔnii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli,” taakɛ wɔ-klɛŋklɛŋ fɔlɔi lɛ hu ná nakai heyeli nɔŋŋ yɛ Eden paradeiso mli lɛ. Naanɔ wala he hiɛnɔkamɔ hu baafata he. Nyɔŋmɔ pɛ baanyɛ eha ana nakai hiɛnɔkamɔ.—Rom. 8:20,21; Yoh. 17: 3.
“Seshi” Lɛ Mli Hiɛnɔkamɔ
7. Mɛɛ gbɛ nɔ atsɔ aha ana mɔni ji shiwoo “seshi” lɛ?
7 Wɔkaneɔ yɛ nibii “ni aŋma ato momo” lɛ ashishijee mli akɛ Nyɔŋmɔ wo shi akɛ esafo ni yɔɔ ŋwɛi ni tamɔ eŋa lɛ mli “seshi” lɛ ‘baatswa onufu lɛ yitso nɔ̃,’ no ji akɛ ebaakpata Satan kɛ ewebii lɛ fɛɛ ahiɛ. (1 Mose 3:14, 15) Shi namɔ ji nɛkɛ “seshi” nɛɛ? Sɛɛ mli lɛ awie ehe akɛ eji Nyɔŋmɔ shieŋtsɛ Abraham hu “seshi,” mɔ nɔ ni abaatsɔ “ajɔɔ shikpɔŋ lɛ nɔ jeŋmaji fɛɛ.” Bɔfo Paulo ha ana mɔni nɛkɛ “seshi” nɛɛ ji, ni ekɛɛ: “Abraham lɛ, awie shiwoo wiemɔi lɛ ahalɛ kɛ eseshi lɛ. . . . Akɛ ‘kɛ oseshi lɛ,’ mɔni ji Kristo lɛ.”—1 Mose 22:18; Gal. 3:16.
8. (a) Te agba Yesu shihilɛ yɛ shikpɔŋ nɛɛ nɔ lɛ he sane ato jeeŋmɔ aha tɛɛŋ? (b) Mɛɛ gbɛ nɔ suɔmɔ ni Nyɔŋmɔ yɔɔ eha adesai lɛ je kpo yɛ?
8 Nibii “ni aŋma ato momo” lɛ gba bɔni Kristo Yesu shihilɛ baafee eha yɛ shikpɔŋ nɛɛ nɔ lɛ, eto. Taakɛ Yesaia tsɔ hiɛ egba eto fe afii 700 lɛ, agbe Yesu he guɔ, abuuulɛ, apiŋlɛ ni akpalalɛ kɛtee “tamɔ toogwantɛŋbi ni akɛlɛ yaa ayaagbelɛ.” Yɛ e-Tsɛ suɔmɔnaanii kɛ gbeekpamɔ naa lɛ, “eŋɔ esusuma ewo gbele mli,” beni afee ni ekpɔ̃ “mɛi babaoo” kɛjɛ esha nyɔŋyeli mli. (Yes. 53:3-12) Yehowa teelɛ shi kɛjɛ gbohii ateŋ ni ewó enɔ akɛ “Walalumɔ” yɛ ŋwɛi “koni mɔfɛɛmɔ ni heɔ enɔ yeɔ lɛ hiɛ akakpata, shi moŋ ena naanɔ wala.” Nyɔŋmɔ eto nɛkɛ gbɛjianɔ nɛɛ “ejaakɛ nɛkɛ Nyɔŋmɔ sumɔ . . . [adesai aje] lɛ.” (Yoh. 3:15, 16; Bɔf. 3:15) Mɛɛ hiɛnɔkamɔ ni yɔɔ nyam enɛ eha ana nɛkɛ!—Yoh. 5:24-29.
Shishitoo Kpakpa Kɛha Naanɔ Wala He Hiɛnɔkamɔ
9. (a) Mɛni ji wɔhiɛnɔkamɔ lɛ sɛɛtso? (b) Mɛɛ hewalɛ sa akɛ wɔhiɛnɔkamɔ lɛ naà yɛ wɔnɔ?
9 Nyɔŋmɔ gbɛi ni ji Yehowa lɛ diɛŋtsɛ ji nɔni damɔ wɔhiɛnɔkamɔ ni yɔɔ shishitoo kpakpa lɛ sɛɛ. Nakai gbɛi lɛ shishi ji “Ehaa Nɔni Bɛ lɛ Baa,” ni tsɔɔ akɛ enyɛɔ ehaa nibii krɛdɛi komɛi baa yɛ eyiŋtoi amlibaa gbɛfaŋ. Lɛ ji Nyɔŋmɔ “ni maleee” ni haa anaa shishitoo ko kɛhaa “nɔhiɛkamɔ . . . [ko ni ewo] shi eha dani abɔ jeŋ bei lɛ.” (Tito 1:2) Mɛni nakai hiɛnɔkamɔ lɛ tsɔɔ ehaa bo? Ani obuɔ no tamɔ bɔni Kristendombii feɔ amɛjamɔ lɛ—akɛ kusum ko kɛkɛ ni amɛfeɔlɛ jabejabe? Aloo ojɛ otsuiŋ tɔ̃ɔ ojɔɔ ohe fɛɛ kɛ owala fɛɛ nɔ oha “nɔhiɛkamɔ Nyɔŋmɔ” lɛ? (Rom. 15:13) Ahi hiɛnɔkamɔ lɛ mli ewa eha bo aahu akɛ amrɔ nɛɛ beebe lɛ efeɔ bo akɛ eji nɔko ni yɔɔ lɛɛlɛŋ? Kɛ́ nakai lɛ, belɛ no ebatsɔ ohemɔkɛyeli—hemɔkɛyeli ko ni nitsumɔi kpakpai yɛ odase ni oooye mɛikrokomɛi yɛ ohiɛnɔkamɔ lɛ he lɛ gbɛfaŋ hu fata he.—Heb. 11:1; Yak. 2:17.
10. (a) Mɛni haa wɔhiɛnɔkamɔ lɛ naà tsiimɔ? (b) Mɛni hewɔ esa akɛ Kristofoi ni afɔ amɛ mu lɛ ana miishɛɛ yɛ amɛhiɛnɔkamɔ lɛ mli amrɔ nɛɛ?
10 Shii abɔ ni wɔ-Nuntsɔ Maŋtsɛ Yehowa hiɛ kã kɛyaa naanɔ nɛɛ, nakai nɔŋŋ shiwoi ni ekɛha lɛ haa anaà shishitoo kɛhaa “wala hiɛnɔkamɔ” ko. Ni akɛni e-Bi Yesu Kristo ni ateelɛ shi lɛ, “ehiɔ shi kɛyaa naanɔ hewɔ lɛ,” ehaa nakai hiɛnɔkamɔ lɛ naà tsiimɔ, ejaakɛ “enyɛɔ mɛi ni tsɔɔ enɔ kɛbaa Nyɔŋmɔ ŋɔɔ lɛ ayiwala ehereɔ kwraa, ejaakɛ eyɛ daa koni edamɔ mli eha amɛ.” (Heb. 7:24, 25) Nohewɔ lɛ bɔfo Petro ŋma eyaha Kristofoi ni afɔ amɛ mu lɛ akɛ: “Ajɔɔ Nyɔŋmɔ kɛ wɔ-Nuntsɔ Yesu Kristo Tsɛ lɛ, mɔni fɔ wɔ ehee yɛ lɛdiɛŋtsɛ emɔbɔnalɛ babaoo lɛ naa, eha wala hiɛnɔkamɔ yɛ Yesu Kristo shi ni etee kɛjɛ gbohii ateŋ lɛ hewɔ, eha gboshinii ni fiteee ni he bɛ kpa ko ni ekwaaa, ni aŋɔto yɛ ŋwɛi aha nyɛ, nyɛ mɛi ni anyiɛ hemɔkɛyeli nɔ abuɔ nyɛhe yɛ Nyɔŋmɔ hewalɛ naa atoɔ yiwalaheremɔ ni asaa ato ni abaajie kpo. Yɛ naagbee bei lɛ amli lɛ; no haa nyɛmli filiɔ nyɛ.” (1 Pet. 1:3-6) Agbɛnɛ ni wɔbashɛ nakai “naagbee bei lɛ” amli nɛɛ, esa jogbaŋŋ mɔ akɛ Kristofoi ni afɔ amɛ mu lɛ amli afili amɛ yɛ nakai hiɛnɔkamɔ lɛ mli.
11. (a) Mɛɛ “wala hiɛnɔkamɔ” “asafo babaoo” lɛ hu yɔɔ? (b) Mɛɛ shishitoo ko ni ma shi shiŋŋ yɔɔ kɛha nakai hiɛnɔkamɔ lɛ hu?
11 Shi “asafo babaoo . . . ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔwiemɔi amli” ni kpaa gbɛ akɛ amɛ aaana naanɔ wala yɛ paradeiso shikpɔŋ nɔ lɛ hu? Amɛ hu amɛnɔ̃ lɛ ji “wala hiɛnɔkamɔ” ejaakɛ shiwoo ni akɛha amɛ lɛ ji: “Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, ni asaŋ hulu loo latsaa ko esaŋ amɛhe dɔŋŋ; ejaakɛ Toobi lɛ ni yɔɔ [Nyɔŋmɔ] maŋtsɛsɛi lɛ teŋ lɛ aaalɛ amɛ, ni eeetsɔɔ amɛ gbɛ kɛaatee wala nubui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” (Kpoj. 7:9, 16, 17) Mɛi ni yɔɔ nɛkɛ “sanekpakpa” nɛɛ mli hiɛnɔkamɔ lɛ anine enyɛŋ shi, ejaakɛ no damɔ Nyɔŋmɔ Wiemɔ ni ajɛ emumɔ mli aŋma Iɛ nɔ kpɛŋŋ. Bɔfo Petro tsɛ́ wiemɔi kɛjɛ Yesaia Wolo 40:8 ni ekɛɛ yɛ “Nyɔŋmɔ hiɛkaalɔ kɛ daashihilɔ lɛ wiemɔ lɛ” he akɛ: “‘Heloo fɛɛ tamɔ jwɛi, ni enunyam lɛ fɛɛ tamɔ jwɛiaŋ fɔfɔi. Jwɛi gbĩɔ ni emli fɔfɔi lɛ kpalaa; shi Nuntsɔ [Yehowa] lɛ wiemɔ lɛ hiɔ shi kɛyaa naanɔ.’ Enɛ ji wiemɔ ni ajaje atsɔɔ nyɛ akɛ sanekpakpa lɛ.”—1 Pet 1:23-25
12. Te Nyɔŋmɔ mli hi eha tɛɛŋ yɛ naanɔ wala ni eŋɔ eha lɛ gbɛfaŋ?
12 Beni Yesu wieɔ yɛ lɛdiɛŋtsɛ ehe akɛ tookwɛlɔ kpakpa ni “ŋɔɔ esusuma eŋmɛɔ shi yɛ etooi lɛ anajiaŋ” lɛ, ekɛɛ efata he akɛ: “Mi lɛ miba beni afee ni amɛna wala ni amɛna ni ateke nɔ.” (Yoh. 10:10,11) Jeee “asafoku bibioo” ni tsɔmɔɔ Kristo nanemɛi gboshiniyelɔi yɛ ŋwɛi lɛ pɛ naà mlihilɛ nɛɛ mli gbɛfaŋnɔ. (Luka 12:32) Dabida, ejaakɛ Yesu kɛɛ: “Miyɛ tooi krokomɛi ni jɛɛɛ tooi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni tooi lɛ fee kuu kome kɛ kwɛlɔ kome. Ni mi nɔŋŋ mihaa amɛ naanɔ wala.” (Yoh. 10:16, 28) Yɛ “asafo babaoo” ni hiɛ kã nɔ akɛ amɛbaafo “amanehulu kpeteŋkpele” lɛ akɛ hiɛkaalɔi lɛ asɛɛ lɛ, abaana tsuji anɔkwafoi ni hi shi dani Kristofoi abe bashɛ lɛ kɛ adesai krokomɛi akpeiakpei abɔ ni egboi ni abaatee amɛ shi kɛba shikpɔŋ nɛɛ nɔ kɛ naanɔ wala hegbɛi lɛ hu. (Mat. 24:21; Heb. 11:35; Kpoj. 20:12) Mɛɛ mlihilɛ kpele wɔnyɔŋmɔ lɛ etsɔɔ yɛ gbɛjianɔ ni eto kɛha wala lɛ mli nɛɛ!
13. Mɛɛ gbɛ nɔ ajie suɔmɔ ni Nyɔŋmɔ yɔɔ kɛha adesai lɛ kpo yɛ; ni mɛɛ hewalɛ esa akɛ no ana yɛ wɔnɔ?
13 Anaa Yehowa mlihilɛ yɛ suɔmɔ ni ejie kpo etsɔɔ adesai lɛ mli lɛ yɛ nɔni Yesu kɛɛ kɛtsɔ enɛ hiɛ lɛ mli hu, akɛ: “Nɛkɛ Nyɔŋmɔ sumɔ [adesai aje] lɛ, akɛ eŋɔ e-Bi koome, lɛ eha, koni mɔfɛɛmɔ ni heɔ enɔ yeɔ lɛ hiɛ akakpata, shi moŋ ena naanɔ wala. Ejaakɛ Nyɔŋmɔ tsuuu e-Bi lɛ kɛbaaa je lɛ mli koni ebakojo je lɛ [kɛ kojomɔ ni naa wa], shi moŋ koni atsɔ enɔ ahere je lɛ yiwala. Mɔni heɔ enɔ eyeɔ Iɛ, akojooolɛ.” (Yoh 3:16-18) Akɛni Yehowa kɛ e-Bi lɛ amli hi waa nɛkɛ hewɔ lɛ, ani esaaa akɛ wɔ hu wɔmli hiɔ ni wɔhaa mɛikrokomɛi nuɔ nɛkɛ “sanekpakpa” ni hiɛ yɔɔ nyam nɛɛ mɔ?
14. (a) Mɛni hewɔ jeŋmaji lɛ ‘bɛ hiɛnɔkamɔ’ lɛ? (b) Wɔhemɔkɛyeli lɛ ‘wɔwala hiɛnɔkamɔ’ lɛ jeɔ kpo yɛ mɛɛ gbɛ nɔ?
14 Yɛ enɛ feemɔ mli lɛ, wɔnaà “nitsumɔi kpakpai ni Nyɔŋmɔ esaa eto koni wɔnyiɛ yɛ mli lɛ” amli gbɛfaŋnɔ. Belɛ wɔtamɔɔɔ mɛi ni Paulo wie yɛ amɛhe akɛ amɛji “gbɔi yɛ shiwoi-kpaŋmɔi lɛ agbɛfaŋ” ni amɛbɛ “hiɛnɔkamɔ ko” ni amɛbɛ “Nyɔŋmɔ tete yɛ je nɛŋ” lɛ. Agbɛnɛ lɛ wɔnyiɛɛɛ “tamɔ bɔni jeŋmajiaŋbii krokomɛi lɛ hu nyiɛɔ yɛ amɛyaka-jwɛŋmɔ lɛ mli lɛ dɔŋŋ, ejaakɛ amɛjwɛŋmɔ mli ewo duŋ, ni mɛikpɔji ji amɛ yɛ Nyɔŋmɔ wala gbɛfaŋ, akɛni nilee ekaaa amɛ ni amɛtsuii hu ekpiliŋ lɛ.” (Efe. 2:10, 12; 4:17, 18) Wɔfeee nakai ejaakɛ amrɔ nɛɛ wɔkɛ Nyɔŋmɔ nyiɛɔ ni ‘wɔnitsumɔi kpakpai’ ni “sanekpakpa” lɛ shiɛ mɔ kɛ etsɔɔmɔ fata he lɛ, tsɔɔ wɔhemɔkɛyeli kɛ “wala hiɛnɔkamɔ” ni eyi kɛteke nɔ yɛ wɔtsuii amli lɛ.—Mat. 4:17; 5:16; 9:35; 24:14.
Jalɛ Nɔyeli Ko He Hiɛnɔkamɔ
15. (a) Mɛni hewɔ ebiɔ nɔyeli kpakpa dani wɔna “wala hiɛnɔkamɔ” lɛ? (b) Mɛɛ gbalɛ ko ni woɔ ekaa waa ji nɔni Yesaia ŋma efɔ̃ shi yɛ enɛ gbɛfaŋ?
15 Wɔwala hiɛnɔkamɔ lɛ kɔɔ nibii babaoo ahe fe naanɔ wala hegbɛ lɛ kɛkɛ. Bo lɛ susumɔ he nɛkɛ okwɛ, akɛ: Ani eeefee nii ni yɔɔ miishɛɛ akɛ ooohi shi kɛya naanɔ yɛ gbɔmɛi anɔyelii ni yi wa ni amɛyeɔ mɔ amim, tamɔ ekomɛi ni eye nɔ shii abɔ yɛ yinɔsane mli fɛɛ lɛ ashishi? Mɛikomɛi baasumɔ ni amɛgboi moŋ fe nɔni aaaye amɛ nyɔ́ŋ nakai. Shi miishɛɛsane ji akɛ Nyɔŋmɔ webii lɛ ‘awala hiɛnɔkamɔ’ lɛ mli nɔko hu ji jalɛ nɔyeli ni ji Maŋtsɛyeli ni Kristofoi esɔle amɛbi kɛjɛ jeeŋmɔ ni baafã Yehowa gbɛi lɛ he ni eha afee esuɔmɔnaanii “yɛ shikpɔŋ lɛ nɔ, taakɛ afeɔ yɛ ŋwɛi” lɛ he hiɛnɔkamɔ (Mat. 6:9, 10) Yɛ Yehowa he ni ejɛ blema beebe esaa kɛha nakai maŋtsɛyeli lɛ mli Iɛ, ekɛ Israel Maŋtsɛ David to Kristo Yesu he okadi yɛ nii ni ebaatsu akɛ Maŋtsɛ lɛ gbɛfaŋ. Gbalɔ Yesaia tsɛ́ nakai mɔ lɛ akɛ “Hejɔlɛ Lumɔ,” ni ekɛfata he akɛ: “Elumɔyeli lɛ shweremɔ kɛ hejɔlɛ lɛ sɛɛ efoŋ yɛ David maŋtsɛsɛi lɛ nɔ kɛ emaŋtsɛyeli lɛ nɔ, ni ekɛ kojomɔ kɛ jalɛ aaaha ema shi shiŋŋ ni eeewolɛ hewalɛ kɛjɛ ŋmɛnɛ nɔ aahu kɛyashi naanɔ. Yehowa Zebaot hiɛdɔɔ lɛ aaafee enɛ.”—Yes. 9:5, 6.
16. Mɛni nɔ mi Gabriel kɛ lalatsɛ lɛ,ma yɛ Maŋtsɛyeli lɛ gbɛfaŋ?
16 Kɛjɛ enɛ nɔ afii ni fe 1,000 sɛɛ lɛ, bɔfo Gabriel jie ehe kpo etsɔɔ oblayoo folo Maria ni ekɛɛlɛ akɛ: “Ohiɛ eba nyam yɛ Nyɔŋmɔ hiɛ. Ni naa, obaana musu ni ooofɔ binuu, ni ooowolɛ gbɛi akɛ Yesu. Eeetsɔ agbo, ni aaatsɛlɛ Ŋwɛinyo lɛ Bi, ni Nuntsɔ [Yehowa] Nyɔŋmɔ aaaŋɔ etsɛ David maŋtsɛsɛi lɛ aha lɛ. . . Ni emaŋtsɛyeli lɛ sɛɛ efoŋ.” (Luka 1:30-33) Nohewɔ lɛ jeee yiwalaheremɔ kɛmiibote naanɔ wala mli gbɛ lɛ pɛ nɛkɛ “Ŋwɛinyo lɛ Bi” nɛɛ haa anaà, shi ehaa anaà jɔɔmɔi hu kɛtsɔɔ emaŋtsɛyeli lɛ nɔ. Nɛkɛ nɔyeli nɛɛ baaye adesai fɛɛ anɔ yɛ jalɛ mli ni ekɛ hejɔlɛ babaoo baaha eshishibii yɛ shikpɔŋ lɛ fɛɛ nɔ.—Lala 72:1-8
17. Belɛ mɛni hewɔ mɔ esani ‘wɔnaà hiɛnɔkamɔ ni ateke nɔ’ lɛ; ni mɛɛ gbɛ nɔ wɔɔɔnyɛ wɔtsɔɔ nakai hiɛnɔkamɔ lɛ yɛ?
17 Bɔfo Paulo ku sɛɛ ewie nibii “ni aŋma ato momo” lɛ ahe ekoŋŋ ni eŋma akɛ: “Ni asaŋ Yesaia kɛɛ akɛ: ‘lshai [ni ji David tsɛ lɛ] shishifa lɛ aaaba, mɔ hu ni aaate shi koni ebaye jeŋmaji lɛ anɔ lɛ; lɛ enɔ jeŋmaji lɛ aaaŋɔ amɛhiɛ amɛfɔ.’ Shi nɔhiɛkamɔ Nyɔŋmɔ lɛ kɛ miishɛɛ kɛ hejɔlɛ fɛɛ awo nyɛ obɔbɔɔbɔ yɛ hemɔkɛyeli mli, koni nyɛna hiɛnɔkamɔ ni ateke nɔ yɛ mumɔ krɔŋkrɔŋ hewalɛ mli.” (Rom. 15:12, 13) Lɛɛlɛŋ hiɛnɔkamɔ ni wɔɔɔna yɛ Nyɔŋmɔ maŋtsɛyeli ni Kristo baakwɛ nɔ lɛ mli lɛ haa wɔnaa miishɛɛ kɛ tsuiŋ hejɔlɛ, ni be, mli ni wɔtekeɔ nɔ yɛ nakai hiɛnɔkamɔ lɛ mli lɛ, wɔnaa hewalɛwoo ko akɛ wɔjaje nakai hiɛnɔkamɔ lɛ wɔtsɔɔ mɛikrokomɛi, yɛ hewalɛ ni Nyɔŋmɔ mumɔ lɛ haa wɔ lɛ mli.—Zak. 4:6; Yes. 40:28-31.
18. Mɛni Yesaia tsɔ hiɛ ewie yɛ Maŋtsɛyeli lɛ he yɛ gbɛ ni yɔɔ nyam nɔ?
18 Yɛ “Ishai shishifa” lɛ hewiemɔ mli lɛ, Paulo miitsɛ́ wiemɔi kɛmiijɛ Yesaia Wolo lɛ yitso 11, nɔni wieɔ Kristo Maŋtsɛyeli nɔyeli lɛ he yɛ gbɛ ko ni yɔɔ nyam nɔ lɛ, mli: “Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ. Ni eeena Yehowa gbeyeishemɔ lɛ he miishɛɛ; bɔni ni ehiŋmɛii naa lɛ, jeee nakai ebaakojo, ni bɔni etoii nuɔ lɛ, jeee nakai ebaabu atɛŋ; shiɛ eeekojo ohiafoi yɛ jalɛ naa, ni jajemɔ hu ekɛ aaaka mɛi lɛ, ni eeebu mɛi ni nii yɔɔ mɔbɔ yɛ shikpɔŋ lɛ nɔ lɛ atɛŋ bɔni ja.” Beni gbalɛ lɛ ewie bɔni mumɔŋ paradeiso ni Nyɔŋmɔ webii yɔɔ mli ŋmɛnɛ lɛ yɔɔ eha tamɔ nɔni ajɔɔ shikpɔŋ lɛ nɔ kooloi kakalɔi ahe lɛ he sɛɛ lɛ, etee nɔ ejaje akɛ: “Shikpɔŋ lɛ nɔ aaayi obɔ kɛ Yehowa he nilee tamɔ bɔni nu hà ŋshɔ shishi lɛ.” Mɛɛ hiɛnɔkamɔ ni yɔɔ nyam po nɛ! Ebɛ naakpɛɛ mɔ akɛ mɛi babaoo ejɛ jeŋmaji lɛ amli amɛkɛ amɛnibimɔi eba “Ishai shishifa ni ji aflaŋaa ni ashi aha majimaji lɛ” ŋɔɔ.—Kk. 1-10.
19. Mɛni hewɔ amrɔ nɛɛ titri esa akɛ wɔnaà miishɛɛ yɛ hiɛnɔkamɔ mli lɛ?
19 Kɛjɛ afi 1914 ni saji wuji ba yɛ mli lɛ no kɛbaa nɛɛ, adesai yɛ “nibii agbɛjianɔtoo nɛɛ naagbee” lɛ mli. “Gbɔmɔbi” lɛ ebashɛ shi kɛ ebɔfoi lɛ fɛɛ ni ebata eŋwɛi maŋtsɛsɛi ni yɔɔ nyam lɛ nɔ. Ebɔi jeŋmaji lɛ anaa buamɔ kɛha amɛkojomɔ beni afee ni ‘egbala amɛmli, taakɛ tookwɛlɔ gbalaa gwantɛŋi kɛ abotiai amli lɛ.’ Yɛ jeŋmaji lɛ kɛ “abotiai” Iɛ agbɛfaŋ lɛ, be nɛɛ ji jaramɔ be ko ni hiɛnɔkamɔ bɛ mli, shi kɛha adesai ni boɔ toi ni hiɛ toogwantɛŋsu Iɛ, eji be mli ni sa akɛ ‘amɛkwɛɔ ŋwɛi ni amɛholeɔ amɛyitsei anɔ ejaakɛ amɛkpɔmɔ lɛ miibɛŋkɛ.’—Mat. 24:3-8; 25:31-34; Luka 21:26-28.
20. Mɛni kɛji wɔfee ni wɔɔɔnyɛ wɔfi shi yɛ hiɛnɔkamɔ mli Iɛ?
20 Shi ebiɔ tsuishiŋmɛɛ beni afee ni wɔnine ashɛ hiɛnɔkamɔ lɛ mlibaa nɔ. Be mli ni nɛkɛ “naagbee gbii” nɛɛ bɛŋkɛɔ amɛnaagbee lɛ, esani wɔna Yesu jwɛŋmɔ yɛ saji ahe, taakɛ Paulo wo ŋaa akɛ wɔfee lɛ: “Tsuishiŋmɛɛ kɛ miishɛjemɔ Nyɔŋmɔ lɛ aha nyɛna jwɛŋmɔ kome yɛ nyɛteŋ tamɔ Kristo Yesu; koni nyɛkɛ jwɛŋmɔ kome kɛ naabu kome awo Nyɔŋmɔ kɛ wɔ-Nuntsɔ Yesu Kristo Tsɛ lɛ hiɛ nyam.” (Rom. 15:5,6) Belɛ nyɛbaa wɔkɛ “jwɛŋmɔ kome kɛ naabu kome” asɔmɔa kɛ tsuishiŋmɛɛ yɛ be mli ni wɔshiɛɔ Maŋtsɛyeli lɛ he sanekpakpa lɛ kɛha “jeŋmaji fɛɛ” odaseyeli lɛ, ni wɔna hekɛnɔfɔɔ akɛ “naagbee lɛ aaaba.” (Mat. 24:13, 14) Hɛɛ, nyɛhaa wɔkɛ wɔhe afɔ̃a Nuntsɔ Maŋtsɛ Yehowa, mɔni ji “nɔhiɛkamɔ Nyɔŋmɔ” lɛ nɔ kwraa, ni wɔkagbugbaa.a
[Shishigbɛ niŋmaa]
a Ajie kɛjɛ January 1, 1980 Blɔfo Buu-Mɔɔ mli.
[Mfonirii ni yɔɔ baafa 4]
“Gbɔmɔ kome nɔ esha tsɔ kɛba je lɛŋ ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ.”—Rom. 5:12.
“Nɛkɛ Nyɔŋmɔ sumɔɔ je lɛ, akɛ eŋɔ e-Bi koome lɛ eha, koni mɔfɛɛmɔ ni heɔ enɔ yeɔ lɛ hiɛ akakpata, shi moŋ ena naanɔ wala.”—Yoh 3:16.