Yitso Ejwɛ
Mɔ ni Gbalɔi lɛ Fɛɛ Ye Ehe Odase
1. Mɛni anɔkwa saji ni kɔɔ shihilɛ mli ni Yesu yɔɔ dani ebatsɔ adesa lɛ he lɛ tsɔɔ yɛ wekukpaa ni kã ekɛ Yehowa teŋ lɛ he?
“TSƐ lɛ sumɔɔ Bi lɛ, ni etsɔɔ lɛ nii fiaa ni lɛ diɛŋtsɛ efeɔ lɛ.” (Yohane 5:20, NW) Mɛɛ wekukpaa ni miishɛɛ yɔɔ mli waa Bi lɛ kɛ e-Tsɛ, ni ji Yehowa ná mli ŋɔɔmɔ nɛkɛ! Nakai wekukpaa ni bɛŋkɛ kpakpa lɛ je shishi yɛ enibɔɔ be lɛ mli, afii akpekpei abɔ ni anyɛŋ akane dani afɔ́ lɛ ákɛ adesa. Nyɔŋmɔ suɔmɔ Bi koome ji lɛ, mɔ kome pɛ ni Yehowa diɛŋtsɛ bɔ lɛ tɛ̃ɛ. Atsɔ kromɔ Bi ni asumɔɔ lɛ jogbaŋŋ nɛɛ nɔ abɔ nibii krokomɛi fɛɛ ni yɔɔ ŋwɛi kɛ shikpɔŋ nɔ. (Kolosebii 1:15, 16) Esɔmɔ hu ákɛ Nyɔŋmɔ Wiemɔ, aloo Otsaamɛ, Mɔ ni atsɔ enɔ ajaje Nyɔŋmɔ suɔmɔnaa nii atsɔɔ mɛi krokomɛi. Nɛkɛ mɔ nɛɛ, ni ji Bi ni Nyɔŋmɔ sumɔɔ lɛ jogbaŋŋ lɛ batsɔ gbɔmɔ Yesu Kristo.—Abɛi 8:22-30; Yohane 1:14, 18; 12:49, 50.
2. Nɛgbɛ Biblia gbalɛi wie Yesu he kɛyashɛ?
2 Dani aaaŋɔ Nyɔŋmɔ kromɔ Bi lɛ hɔ́ ákɛ adesa yɛ naakpɛɛ gbɛ nɔ lɛ, no mli lɛ áŋmala gbalɛi babaoo ni jɛ mumɔŋ ni kɔɔ ehe lɛ ashwie shi. Bɔfo Petro ye Kornelio odase akɛ: “Lɛ ehe odase gbalɔi lɛ fɛɛ yeɔ.” (Bɔfoi lɛ Asaji 10:43) Awie nɔ ni Yesu baatsu lɛ he yɛ Biblia lɛ mli babaoo aahu akɛ ŋwɛibɔfo ko kɛɛ bɔfo Yohane akɛ: “Yesu odase lɛ ji gbalɛ mumɔ lɛ.” (Kpojiemɔ 19:10) Nakai gbalɛi lɛ yɔse lɛ yɛ faŋŋ mli akɛ Mesia lɛ. Amɛgbala jwɛŋmɔ kɛtee nitsumɔi srɔtoi ni ebaatsu koni ekɛha Nyɔŋmɔ yiŋtoi aba mli lɛ nɔ. Esa akɛ wɔnya enɛɛmɛi fɛɛ he jogbaŋŋ ŋmɛnɛ.
Nɔ ni Gbalɛi lɛ Jie lɛ Kpo
3. (a) Yɛ gbalɛ ni yɔɔ 1 Mose 3:15 lɛ mli lɛ, namɔ damɔ shi kɛha onufu lɛ, “yoo lɛ,” kɛ ‘onufu lɛ seshi’ lɛ? (b) Mɛni hewɔ ‘onufu lɛ ni aaatswa eyitso nɔ̃’ lɛ baafee nɔ ko ni Yehowa tsuji nyãa he waa lɛ?
3 Agba gbalɛi nɛɛ ateŋ klɛŋklɛŋ nɔ̃ lɛ yɛ Eden atuatsemɔ lɛ sɛɛ. Yehowa kɛɛ onufu lɛ akɛ: “Mikɛ nyɛ̃ɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ̃, ni bo hu oootswa enanetsitsi nɔ̃.” (1 Mose 3:15) Awie nakai gbalɛ lɛ atsɔɔ Satan diɛŋtsɛ, mɔ ni onufu lɛ damɔ enajiaŋ lɛ. “Yoo lɛ” ji Yehowa diɛŋtsɛ ŋwɛi gbɛjianɔtoo ni yeɔ lɛ anɔkwa, ni tamɔ ŋa anɔkwafo kɛha lɛ lɛ. Mɛi ni fata ‘onufu lɛ seshi’ lɛ he ji ŋwɛibɔfoi kɛ adesai fɛɛ ni jieɔ Satan su kpo, mɛi ni teɔ shi woɔ Yehowa kɛ E-webii lɛ. ‘Onufu lɛ yitso nɔ̃ ni aaatswa’ lɛ tsɔɔ atuatselɔ Satan, ni gbe Yehowa he guɔ ni kɛ awerɛho kpele ba adesai anɔ lɛ hiɛkpatamɔ kwraa yɛ naagbee mli. Shi mɛni akɛyɔseɔ ‘seshi’ lɛ fã titri ni baatswa yitso lɛ nɔ̃ lɛ? Enɛ tee nɔ efee ‘teemɔŋ sane krɔŋkrɔŋ’ afii ohai babaoo.—Romabii 16:20, 25, 26.
4. Yɛ mɛɛ gbɛ nɔ Yesu wekukpaa lɛ ye ebua ni ayɔse lɛ akɛ shiwoo Seshi lɛ?
4 Adesa yinɔsane be aaafee afii 2,000 sɛɛ lɛ, Yehowa kɛ enɛ mlitsɔɔmɔi krokomɛi ha. Etsɔɔ akɛ Seshi lɛ baapue yɛ Abraham wekukpaa lɛ mli. (1 Mose 22:15-18) Shi, wekukpaa ni kɛ mɔ yaa Seshi lɛ ŋɔɔ lɛ damɔ mɔ ni Nyɔŋmɔ baahala lɛ nɔ, shi jeee heloonaa seshi nɔ. Yɛ suɔmɔ ni Abraham yɔɔ kɛha ebi Ishmael, ni Hagar fɔ́ lɛ lɛ fɛɛ sɛɛ lɛ, Yehowa kɛɛ akɛ: “Mikpaŋmɔ lɛ, Isak mɔ ni Sara kɛo aaafɔ́ . . . lɛ mikɛaakpaŋ.” (1 Mose 17:18-21) Yɛ sɛɛ mli lɛ, ama nakai kpaŋmɔ lɛ nɔ mi aha Yakob, mɔ ni Israel akutsei 12 lɛ jɛ emli lɛ, shi jeee Isak kromɔ bi Esau. (1 Mose 28:10-14) Yɛ be ni sa mli lɛ, atsɔɔ akɛ abaafɔ́ Seshi lɛ yɛ Yuda akutso lɛ mli, yɛ David wekukpaa lɛ mli.—1 Mose 49:10; 1 Kronika 17:3, 4, 11-14.
5. Mɛni fee lɛ faŋŋ kɛjɛ Yesu shikpɔŋ nɔ sɔɔmɔ lɛ shishijee mli akɛ lɛ ji Mesia lɛ?
5 Mɛɛ kadimɔnii krokomɛi akɛha yɛ Seshi lɛ yɔsemɔ he? Biblia lɛ tsɔ hiɛ fe afii 700 etsɔɔ he ni abaafɔ́ shiwoo Seshi ni ji adesa nɛɛ yɛ lɛ ákɛ Betlehem. Ejie lɛ kpo hu akɛ Seshi lɛ ehi shi kɛjɛ blema “kɛjɛ naanɔ gbii lɛ amli,” kɛjɛ be mli ni abɔ lɛ yɛ ŋwɛi lɛ. (Mika 5:1) Atsɔ gbalɔ Daniel nɔ agba be pɛpɛɛpɛ ni ebaapue yɛ shikpɔŋ nɔ akɛ Mesia lɛ hu afɔ̃ shi. (Daniel 9:24-26) Ni beni akɛ mumɔ krɔŋkrɔŋ fɔ Yesu mu, ni ebatsɔ Mɔ ni Yehowa Efɔ Lɛ Mu lɛ, Nyɔŋmɔ diɛŋtsɛ gbee jɛ ŋwɛi ha ayɔse lɛ akɛ E-Bi. (Mateo 3:16, 17) Ajie Seshi lɛ kpo! No hewɔ lɛ, Filipo baanyɛ awie kɛ nɔmimaa akɛ: “Wɔna mɔ ni Mose ŋma ehe sane yɛ Mla lɛ mli lɛ, ni Gbalɔi lɛ hu ŋma ehe sane lɛ, Yesu.”—Yohane 1:45, NW.
6. (a) Taakɛ Luka 24:27 tsɔɔ lɛ, mɛni Yesu kaselɔi lɛ bayɔse? (b) Namɔ ji ‘yoo lɛ seshi’ titri, ni onufu lɛ yitso nɔ̃ ni etswaa lɛ tsɔɔ mɛni?
6 Yɛ no sɛɛ lɛ, Yesu sɛɛnyiɛlɔi lɛ bale akɛ áŋmala gbalɛi nyɔŋmai abɔ ni tsĩɔ etã ashwie shi yɛ Ŋmalɛi ni jɛ mumɔŋ lɛ amli. (Luka 24:27) Ebafee faŋŋ akɛ Yesu ji ‘yoo lɛ seshi’ titri ní baatswa onufu lɛ yitso nɔ̃, ní ekpata Satan hiɛ kwraa kɛjɛ shihilɛ mli lɛ. Shiwoi fɛɛ ni Nyɔŋmɔ kɛha adesai, kɛ nibii fɛɛ ni wɔkpaa gbɛ lɛ baaba mli kɛtsɔ Yesu nɔ.—2 Korintobii 1:20.
7. Kɛfata Mɔ ni awie ehe yɛ gbalɛi lɛ amli lɛ yɔsemɔ he lɛ, mɛni hu sɛɛnamɔ yɔɔ he akɛ wɔɔyɔse?
7 Te esa akɛ enɛ ni wɔleɔ lɛ asa wɔhe aha tɛŋŋ? Biblia lɛ gbaa wɔ Etiopia piafonyo ko ni ekane nɛkɛ gbalɛi nɛɛ ni kɔɔ Kpɔlɔ kɛ Mesia ni baa lɛ he lɛ he saji lɛ ekomɛi. Enaa ekpɛ ehe, ni ebi Filipo sanekpakpa jajelɔ lɛ akɛ: “Namɔ he gbalɔ lɛ wieɔ nɛɛ?” Shi piafonyo lɛ kɛ sane nɛɛ waaa jɛmɛ beni aha lɛ hetoo lɛ. Beni nuu lɛ bo mligbalamɔ ni Filipo kɛha lɛ lɛ toi jogbaŋŋ sɛɛ lɛ, enu shishi akɛ hiɛsɔɔ kɛha gbalɛ ni eba mli nɛɛ biɔ ni lɛ diɛŋtsɛ lɛ efee nɔ ko yɛ he. Enu shishi akɛ ehe miihia ni abaptisi lɛ. (Bɔfoi lɛ Asaji 8:32-38; Yesaia 53:3-9) Ani wɔ hu wɔfeɔ nakai nɔŋŋ?
8. (a) Ka ni Abraham ka akɛ ekɛ Isak aaashã afɔle lɛ fee mɛni he mfoniri? (b) Mɛni hewɔ Yehowa kɛɛ Abraham akɛ jeŋmaji fɛɛ baaná jɔɔmɔ amɛha amɛhe kɛtsɔ Seshi lɛ nɔ lɛ, ni te enɛ kɔɔ wɔhe ŋmɛnɛ ehaa tɛŋŋ?
8 Agbɛnɛ hu susumɔ ka ni Abraham ka akɛ ekɛ Isak, ebinuu koome ni ekɛ Sara fɔ́ lɛ aaashã afɔle, ni taa mɔ tsuiŋ waa lɛ he okwɛ. (1 Mose 22:1-18) No fee nɔ ni Yehowa baafee—e-Bi koome lɛ ni ekɛ lɛ aaashã afɔle lɛ he mfoniri: “Nyɔŋmɔ sumɔ je lɛ aahu akɛ eŋɔ e-Bi koome lɛ eha, bɔni afee ni mɔ fɛɛ mɔ ni baaná emli hemɔkɛyeli lɛ akakpata ehiɛ, shi moŋ ená naanɔ wala.” (Yohane 3:16, NW) Enɛ haa wɔnáa hekɛnɔfɔɔ akɛ, bɔ ni Yehowa kɛ e-Bi koome lɛ ha koni ekɛha E-yiŋtoo aba mli lɛ, nakai nɔŋŋ hu ‘E-jɛɔ mlihilɛ mli ekɛ nibii fɛɛ haa wɔ.’ (Romabii 8:32) Mɛni enɛ biɔ yɛ wɔgbɛfaŋ? Taakɛ aŋma afɔ̃ shi yɛ 1 Mose 22:18 lɛ, Yehowa kɛɛ Abraham akɛ jeŋmaji fɛɛ baatsɔ Seshi lɛ nɔ aná jɔɔmɔ kɛha amɛhe, ‘ejaakɛ Abraham bo Nyɔŋmɔ gbee toi.’ Ehe miihia ni wɔ hu wɔbo Yehowa kɛ e-Bi lɛ gbee toi: “Mɔ ni heɔ bi lɛ nɔ yeɔ lɛ, eyɛ naanɔ wala; shi mɔ ni booo bi lɛ toi lɛ, enaŋ wala, shi moŋ Nyɔŋmɔ mlifu hiɔ enɔ.”—Yohane 3:36.
9. Kɛji akɛ wɔhiɛ sɔɔ naanɔ wala ni Yesu afɔleshaa lɛ haa wɔnine shɛɔ nɔ lɛ he hiɛnɔkamɔ lɛ, mɛni wɔbaafee?
9 Kɛji akɛ wɔhiɛ sɔɔ naanɔ wala he hiɛnɔkamɔ ni Yesu afɔleshaa lɛ ha wɔnine shɛ nɔ lɛ, belɛ wɔbaasumɔ ni wɔfee nibii ni Yehowa tsɔ Yesu nɔ ekɛɛ wɔ lɛ. Enɛɛmɛi kɔɔ suɔmɔ ni wɔyɔɔ kɛha Nyɔŋmɔ kɛ wɔnanemɛi lɛ ahe. (Mateo 22:37-39) Yesu tsɔɔ akɛ suɔmɔ ni wɔyɔɔ kɛha Yehowa lɛ baakanya wɔ ni wɔtsɔɔ mɛi krokomɛi “ni amɛye nii fiaa ni [Yesu efã wɔ] lɛ nɔ.” (Mateo 28:19, 20) Ni wɔmiisumɔ ni wɔkɛ nanemɛi Yehowa tsuji aná nakai suɔmɔ lɛ mli gbɛfaŋnɔ kɛtsɔ ‘wɔhe naa ni wɔkɛ amɛ aaabua daa’ lɛ nɔ. (Hebribii 10:25; Galatabii 6:10) Kɛfata he lɛ, esaaa akɛ wɔsusuɔ akɛ Nyɔŋmɔ kɛ e-Bi lɛ toi ni wɔboɔ lɛ miibi emuuyeli kɛmiijɛ wɔdɛŋ. Hebribii 4:15 kɛɔ akɛ Yesu, wɔ Osɔfonukpa lɛ, “ejeee mɔ ni nyɛɛɛ anu wɔgbedemɔi lɛ ahe aha wɔ.” Kwɛ bɔ ni no shɛjeɔ mɔ mii ehaa, titri lɛ kɛji akɛ wɔtsɔ Kristo nɔ kɛtee Nyɔŋmɔ ŋɔɔ yɛ sɔlemɔ mli koni eye ebua wɔ ni wɔye wɔgbɔjɔmɔi anɔ kunim lɛ!—Mateo 6:12.
Jiemɔ Hemɔkɛyeli Kpo yɛ Kristo Mli
10. Mɛni hewɔ yiwalaheremɔ ko kwraa bɛ yɛ Yesu Kristo sɛɛ lɛ?
10 Beni bɔfo Petro etsɔɔ Yudafoi akuashɔŋ ni yɔɔ Yerusalem lɛ akɛ nakai Biblia gbalɛ lɛ eba mli yɛ Yesu gbɛfaŋ sɛɛ lɛ, ekɛ hewalɛ mu ewiemɔ lɛ naa akɛ: “Yiwalaheremɔ bɛ mɔ ko mɔ ko mli; ni asaŋ gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔ nɔ ahere wɔyiwala.” (Bɔfoi lɛ Asaji 4:12) Akɛni Adam seshibii fɛɛ ji eshafeelɔi hewɔ lɛ, amɛgbele bɛ jara ko ni abaanyɛ akɛtsu nii ákɛ kpɔmɔnɔ kɛha mɔ ko. Shi Yesu yeɔ emuu, ni ewala hiɛ afɔleshaa jara. (Lala 49:7-10; Hebribii 2:9) Ekɛ kpɔmɔnɔ ni ejara kɛ wala ni yeɔ emuu ni ŋmɛɛ Adam lɛ yeɔ egbɔ pɛpɛɛpɛ lɛ ha Nyɔŋmɔ. (1 Timoteo 2:5, 6) Enɛ gbele gbɛ kɛha wɔ koni wɔná naanɔ wala yɛ Nyɔŋmɔ jeŋ hee lɛ mli.
11. Tsɔɔmɔ bɔ ni Yesu afɔleshaa lɛ he baanyɛ aba sɛɛnamɔ kɛha wɔ jogbaŋŋ lɛ mli.
11 Kpɔmɔnɔ lɛ gbele gbɛ hu kɛha wɔ koni wɔnine ashɛ sɛɛnamɔi krokomɛi anɔ amrɔ nɛɛ po. Ákɛ nɔkwɛmɔnɔ lɛ, eyɛ mli akɛ wɔji eshafeelɔi moŋ, shi Yesu afɔleshaa lɛ haa wɔnyɛɔ wɔnáa henilee ni mli tse yɛ eshaifaa hewɔ. Enɛ fa kwraa fe nɔ ni aná aha Israelbii lɛ kɛtsɔ kooloi afɔleshaai ni Mose Mla lɛ biɔ lɛ nɔ lɛ kwraa. (Bɔfoi lɛ Asaji 13:38, 39; Hebribii 9:13, 14; 10:22) Shi kɛlɛ, eshaifaa ni wɔyɔɔ nɛɛ biɔ ni wɔkɛ anɔkwayeli ayoo bɔ ni Kristo afɔleshaa lɛ he hiaa wɔ babaoo ha, akɛ: “Kɛji wɔkɛɛ akɛ esha ko bɛ wɔhe lɛ, wɔ diɛŋtsɛ wɔhe wɔshishiuɔ, ni anɔkwale lɛ bɛ wɔmli. Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli.”—1 Yohane 1:8, 9.
12. Mɛni hewɔ numiimɔ ji hiamɔ nii yɛ henilee kpakpa ni aaaná yɛ Nyɔŋmɔ hiɛ lɛ mli lɛ?
12 Te aaafee tɛŋŋ ni eshafeelɔi aaanyɛ aná Kristo kɛ efɔleshaa lɛ mli hemɔkɛyeli lɛ? Beni gbɔmɛi ni yɔɔ klɛŋklɛŋ afii oha lɛ mli lɛ batsɔmɔ heyelilɔi lɛ, amɛjie enɛ kpo amɛtsɔɔ yɛ faŋŋ mli. Yɛ mɛɛ gbɛ nɔ? Abaptisi amɛ. Mɛni hewɔ? Ejaakɛ Yesu fã akɛ abaptisi ekaselɔi lɛ fɛɛ. (Mateo 28:19, 20; Bɔfoi lɛ Asaji 8:12; 18:8) Mɔ ko shashaoŋ shi kɛ enɛ feemɔ beni etsui etsirɛ lɛ lɛɛlɛŋ kɛtsɔ gbɛjianɔ ni suɔmɔ yɔɔ mli ni Yehowa to kɛtsɔ Yesu nɔ lɛ nɔ lɛ. Ebaafee tsakemɔi ni he hiaa lɛ yɛ eshihilɛ mli, ebaajɔɔ ehe nɔ eha Nyɔŋmɔ yɛ sɔlemɔ mli, ni ekɛ numiimɔ baafee ehenɔjɔɔmɔ lɛ he okadi. Hemɔkɛyeli ni ajieɔ lɛ kpo atsɔɔ yɛ nɛkɛ gbɛ nɔ lɛ ji nɔ ni haa ebiɔ ‘Nyɔŋmɔ koni eha lɛ henilee kpakpa lɛ.’—1 Petro 3:21.
13. Kɛji akɛ wɔyɔse akɛ wɔfee esha ko lɛ, mɛni esa akɛ wɔfee yɛ he, ni mɛni hewɔ?
13 Shi, yɛ enɛ sɛɛ po lɛ, eshafeemɔ sui baajie amɛhe kpo. Kɛkɛ lɛ mɛni? Bɔfo Yohane kɛɛ akɛ: “Miiŋma nyɛ nii nɛɛ, koni nyɛkafee esha. Ni kɛ mɔ ko fee esha jiŋŋ, wɔyɛ mlidamɔlɔ yɛ [Tsɛ, NW] lɛ ŋɔɔ, Yesu Kristo, jalɔ lɛ; ni lɛ ji wɔhe eshai lɛ ahe kpatamɔ nɔ; shi jeee wɔ nɔ lɛ kɛkɛ he, shi moŋ jeŋ muu lɛ fɛɛ nɔ lɛ hu he.” (1 Yohane 2:1, 2) Ani enɛ tsɔɔ akɛ, yɛ nɔ fɛɛ nɔ ni wɔɔfee lɛ fɛɛ sɛɛ lɛ, kɛ́ wɔsɔle wɔha Nyɔŋmɔ kɛha eshaifaa lɛ, kɛkɛ lɛ nɔ fɛɛ nɔ eja lo? Jeee nakai. Nɔ titri ni kɛ eshaifaa baa ji heshwamɔ diɛŋtsɛ. Ekolɛ yelikɛbuamɔ kɛmiijɛ onukpai ni yɔɔ niiashikpamɔ babaoo ni yɔɔ Kristofoi asafo lɛ mli lɛ aŋɔɔ hu he baahia. Esa ni wɔkpɛlɛ bɔ ni nɔ ni wɔfee lɛ ji tɔmɔ lɛ nɔ, ni wɔshwa wɔhe yɛ he yɛ anɔkwayeli mli, ni wɔbɔ mɔdɛŋ ni wɔkafee nakai dɔŋŋ. (Bɔfoi lɛ Asaji 3:19; Yakobo 5:13-16) Kɛji wɔfee enɛ lɛ, wɔbaanyɛ wɔná nɔmimaa yɛ yelikɛbuamɔ ni aaajɛ Yesu ŋɔɔ lɛ kɛ Yehowa hiɛ duromɔ ni wɔɔsaa wɔná ekoŋŋ lɛ mli.
14. (a) Tsɔɔmɔ gbɛ ko ni he hiaa ni Yesu afɔleshaa lɛ he eba sɛɛnamɔ kɛha wɔ yɛ mli lɛ mli. (b) Kɛji akɛ wɔyɛ hemɔkɛyeli lɛɛlɛŋ lɛ, mɛni wɔbaafee?
14 Yesu afɔleshaa lɛ egbele naanɔ wala gbɛ kɛha “asafoku bibioo” lɛ yɛ ŋwɛi, ni ji seshi lɛ fã ni ji enyɔ ni atsĩ amɛtã yɛ 1 Mose 3:15 lɛ mli. (Luka 12:32; Galatabii 3:26-29) Egbele gbɛ hu kɛha naanɔ wala yɛ paradeiso shikpɔŋ nɔ kɛha adesai krokomɛi akpekpei toi akpei abɔ. (Lala 37:29; Kpojiemɔ 20:11, 12; 21:3, 4) Naanɔ wala ji “Nyɔŋmɔ duromɔ keenɔ . . . yɛ Kristo Yesu, wɔ-Nuŋtsɔ lɛ, mli.” (Romabii 6:23; Efesobii 2:8-10) Kɛji akɛ wɔyɛ hemɔkɛyeli yɛ nakai nikeenii lɛ mli kɛ hiɛsɔɔ kɛha gbɛ ni atsɔ nɔ afee enɛ lɛ, wɔbaajie enɛ kpo. Kɛji akɛ wɔyoo naakpɛɛ gbɛ ni Yehowa kɛ Yesu tsu nii yɛ E-suɔmɔnaa nifeemɔ he, kɛ bɔ ni ehe hiaa ni wɔ fɛɛ wɔnyiɛ Yesu nanemaahei asɛɛ kpaakpa lɛ he lɛ, wɔbaaha Kristofoi asɔɔmɔ nitsumɔ lɛ afee nɔ ni he hiaa wɔ fe fɛɛ yɛ wɔshihilɛ mli nitsumɔi amli lɛ ateŋ ekome. Hemɔkɛyeli ni wɔyɔɔ lɛ baaje kpo faŋŋ yɛ nɔmimaa ni wɔkɛwieɔ Nyɔŋmɔ duromɔ keenɔ ni yɔɔ nyam nɛɛ he wɔtsɔɔ mɛi krokomɛi lɛ mli.—Bɔfoi lɛ Asaji 20:24.
15. Yesu Kristo mli hemɔkɛyeli hiɛ ekomefeemɔ hewalɛ yɛ mɛɛ gbɛ nɔ?
15 Mɛɛ ekomefeemɔ hewalɛ kpakpa po nakai hemɔkɛyeli lɛ yɔɔ nɛkɛ! Wɔtsɔɔ enɛ nɔ wɔtsiɔ wɔbɛŋkɛɔ Yehowa, e-Bi lɛ, kɛ wɔhe kpaakpa yɛ Kristofoi asafo lɛ mli. (1 Yohane 3:23, 24) Ehaa wɔnáa miishɛɛ akɛ Yehowa ejɛ mlihilɛ mli eha e-Bi lɛ “gbɛi ni ta gbɛi fɛɛ gbɛi nɔ, [ja Nyɔŋmɔ gbɛi lɛ pɛ] koni mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi yɛ Yesu gbɛi lɛ amli, ni lilɛi fɛɛ lilɛi agba mli kpoo akɛ Yesu Kristo ji Nuŋtsɔ kɛwo [Tsɛ, NW] Nyɔŋmɔ lɛ hiɛ nyam.”—Filipibii 2:9-11.
Sanegbaa ni Akɛtiɔ Mli
• Beni Mesia lɛ pue lɛ, mɛni hewɔ mɛi ni heɔ Nyɔŋmɔ Wiemɔ lɛ amɛyeɔ lɛɛlɛŋ lɛ yóo mɔ ni eji yɛ faŋŋ mli lɛ?
• Mɛni ji nibii komɛi ni esa akɛ wɔfee koni wɔkɛtsɔɔ hiɛsɔɔ ni wɔyɔɔ kɛha Yesu afɔleshaa lɛ?
• Yesu afɔleshaa lɛ he eba sɛɛnamɔ kɛha wɔ momo yɛ mɛɛ gbɛ̀i anɔ? Te enɛ yeɔ ebuaa wɔ ehaa tɛŋŋ kɛ wɔsɔle wɔha Yehowa kɛha eshaifaa lɛ?
[Mfoniri ni yɔɔ baafa 36]
Yesu kɛɛ esɛɛnyiɛlɔi lɛ akɛ esa akɛ amɛtsɔɔ mɛi krokomɛi ni amɛye Nyɔŋmɔ kitai lɛ anɔ