Wumɛi Nyɛjiea Suɔmɔ Ni Haa Akɛ He Shaa Afɔle Kpo
“Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ.”—EFESOBII 5:25.
1. Mɛni hewɔ Kristofoi ayitsoyeli biɔ babaoo ni agbɛnɛ eji nɔ ni nyɔmɔwoo hu yɔɔ mli lɛ?
1 “GBALASHIHILƐ! Nɔ ko nɔ ko bɛ ni biɔ babaoo kɛjɛɔ nuu dɛŋ tamɔ enɛ!” Enɛ ji nɔ ni Norway lalafolɔ Ibsen ŋma. Yɛ Biblia mli shishitoo mla ni kɔɔ yitsoyeli he lɛ hewɔ lɛ, obaajɛ otsuiŋ okpɛlɛ nɔ. Shi kɛlɛ, kɛ atsu he nii jogbaŋŋ lɛ, Kristofoi ayitsoyeli baanyɛ aha shia shihilɛ atsɔ suɔmɔ kɛ bulɛ ni hiɔ mɛi ateŋ lɛ shihilɛ he, he ni otsui nyɔɔ omli yɛ. Shi kɛlɛ, gbɛhe ni ajɛ ŋwɛi ahala bo awo mli lɛ hu kɛ gbɛnaa nii ni tsii ni ka onɔ yɛ Nyɔŋmɔ hiɛ baa.—Luka 12:48.
2. Ani miishɛɛnamɔ ni aaaba shia lɛ mli lɛ damɔ wu lɛ pɛ mɔdɛŋbɔɔi anɔ?
2 Ani no tsɔɔ akɛ bo ákɛ wu lɛ ji mɔ ni shia lɛ mli miishɛɛnamɔ he sɔ̃ ka onɔ? Dabi, esa akɛ bo kɛ oŋa lɛ fɛɛ abɔ mɔdɛŋ ni nyɛha shihilɛ ni yɔɔ shia lɛ mli lɛ aya hiɛ. (Abɛi 14:1) Anɔkwale ni eji akɛ nɔ ni nyiɛ sɛɛ lɛ kɔɔ wu lɛ he babaoo lɛ etsɔɔɔ akɛ emuu ni ŋamɛi yeee lɛ baa shi tsɔ̃. Shi moŋ ato he gbɛjianɔ nakai koni akɛye abua wumɛi ni amɛhi shi yɛ nɔ ni Kristofoi ayitsoyeli biɔ yɛ amɛdɛŋ lɛ naa. Shi te esa akɛ atsuɔ yitsoyeli lɛ he nii ahaa tɛŋŋ? Enɛ ji sane ko ni esa akɛ Kristofoi fɛɛ—kɛ mɛi ni amɛboteko gbalashihilɛ mli lɛ po—anu shishi.
SUƆMƆ TAAKƐ BƆ NI KRISTO SUMƆ ASAFO LƐ
3. Te Efesobii 5:25 tsɔɔ yitsoyeli kpakpa mli ehaa tɛŋŋ, ni mɛni enɛ tsɔɔ?
3 Bɔfo Paulo ŋma akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ Kristo hu sumɔ asafo lɛ mɔ̃ eŋɔ lɛ diɛŋtsɛ ehe eha yɛ ehewɔ.” (Efesobii 5:25) Akɛni wumɛi yɔɔ Ŋmalɛ naa hegbɛ akɛ amɛtoɔ amɛyiŋ yɛ weku lɛ mli yɛ naagbee kwraa hewɔ lɛ, ewaaa akɛ oooŋmɛ gbɛ ni pɛsɛmkunya abote sane lɛ mli. Abaanyɛ akpɛlɛ nɔ akɛ, yiŋ ni atoɔ yɛ wekui pii amli lɛ kɔɔ nɔ ni mɔ kome sumɔɔ titri he. Kɛ ekɔɔɔ Biblia mli Shishitoo mla ko he lɛ, ani nɔ ni osumɔɔ lɛ pɛ akɛtsuɔ nii? Kadimɔ akɛ esa akɛ wu lɛ akase Kristo suɔmɔ ni haa akɛ he shaa afɔle lɛ. Ekɛ ehe ha kɛha ekaselɔi lɛ. “Kristo esaaa lɛ diɛŋtsɛ ehiɛ.” (Romabii 15:3, NW) He ni akɛshãa afɔle tsɔɔ miishɛɛ ko ni aaaŋmɛɛ he aloo haomɔ loo naagba ko ni aaatsɔ mli kɛha mɔ kroko sɛɛnamɔ hewɔ.
4. Yesu jie bɔ ni ejwɛŋɔ ekaselɔi lɛ ahe lɛ kpo yɛ mɛɛ gbɛ nɔ?
4 Nibii ni Yesu yɔɔ he miishɛɛ ni ekɛ ehe wo mli kwraa ji ni eye ebua ekaselɔi lɛ yɛ mumɔŋ. Yɛ be mli ni efeɔ shiŋŋ kɛhaa jalɛnifeemɔ lɛ, efeee keketee yɛ saji ahe kɛ ekaselɔi lɛ tsɔɔ jwɛŋmɔ ko ni ejaaa, aloo amɛjie henɔwomɔ su kpo, amɛjɛ amɛhenumɔi amli amɛwie nɔ ko aloo amɛshe gbeyei. (Mateo 18:13; Luka 22:24-26, 47-51, 59-62) Eye ebua ekaselɔi lɛ ni amɛye gbɔjɔmɔi ni hiɛdɔɔ yɔɔ mli lɛ anɔ ‘kɛtsɔ Nyɔŋmɔ Wiemɔ Iɛ nɔ,’ kɛ enɔkwɛmɔ nɔ lɛ nɔ, koni ákɛ kuu lɛ, amɛfee “krɔŋkrɔŋ ni shwamɔ ko akahi ehe.”—Efesobii 5:26, 27.
5, 6. Te wu lɛ aaafee tɛŋŋ akase Yesu yɛ suɔmɔ ni haa akɛ he shaa afɔle mli, ni mɛɛ be mli enɛ wa waa lɛ?
5 Ani ojieɔ suɔmɔ ni haa akɛ he shãa afɔle ni tamɔ nɛkɛ kpo? Hii komɛi nuɔ he akɛ heloo gbɛfaŋ nibii ni amɛkɛhaa amɛŋamɛi lɛ ji afɔleshaa ni fa. Eji anɔkwale akɛ nitsumɔ ni tamɔ nɛkɛ wa ni esa akɛ hiɛ asɔ jogbaŋŋ. Shi nɔ ni hɔ Yesu nɔkwɛmɔ nɔ lɛ mli titri ji bɔ ni emia ehiɛ ni etɔɔɔ lɛ yɛ ekaselɔi lɛ amumɔŋ kɛ henumɔŋ hiamɔ nii ahe nii ni etsu kɛfata amɛgbɔmɔtsoŋ nɔ̃ he lɛ. Hii pii yɛ ni yɛ be mli ni amɛtsɔ je lɛŋ naagbai amli amɛkwɛ amɛwekui aheloo gbɛfaŋ hiamɔ nii anɔ lɛ, basumɔŋ ni aaahao amɛ ekoŋŋ yɛ jwɛŋmɔŋ yɛ shia. Yɛ be mli ni subaŋ ni tamɔ nɛkɛ ji nɔ ni anaa yɛ wekui ni ebɔɔɔ mɔdɛŋ akɛ amɛaanyiɛ Biblia lɛ sɛɛ lɛ amli lɛ, nɔ ni yɔɔ awerɛho ji akɛ Kristofonyo ŋa ko jie teemɔŋ sane nɛɛ kpo, akɛ: “Miwu lɛ kɛ gbɛtsɔɔmɔ ko haaa mi kwraa. Bei komɛi shɛɔ ni mijɛɔ mitsuiŋ mifɔseɔ gbɛtsɔɔmɔ ni mitaoɔ yɛ saji komɛi ahe lɛ mishwieɔ shi, shi ejwɛŋmɔ yɛ he kroko moŋ.”
6 Suɔmɔ ni haa akɛ he shaa afɔle ji hetoo lɛ. Kɛ oŋa yɛ naagba ko ni enaaa naa lɛ, ni oooshwie lɛ kɛtsɔ wiemɔ ko loo ohiɛ ko ni ooofee nɔ lɛ, suɔmɔ nɛɛ baakanya bo ni okɛ lɛ asusu saji ahe yɛ tsuishitoo mli. Obaasusu emumɔŋ nibii ahe waa, okɛ lɛ baakase Biblia lɛ ni okɛ Iɛ ana sɔɔmɔ krɔŋkrɔŋ lɛ mli gbɛfaŋnɔ. Obaakwa yiŋtooi ni tsiitsii ni nomɛi ji egbɛnaa nii diɛŋtsɛ ni okɛaafɔ enɔ lɛ. Obaakwɛ hu ni ena hegbɛ kɛ be ni ekɛjɔɔ ehe ni ejie ehiɛtserɛ fioo. (Marko 6:31) Mɔdɛŋ ni abɔɔ yɛ nifeemɔ mli nɛɛ haa ŋa lɛ naa bulɛ kɛ shihilɛ ni yɔɔ shweshweeshwe kɛhaa lɛ diɛŋtsɛ ehe.
TSUI MLI HESHIBAA
7. Mɛɛ su he hiaa bɔni afee ni anyɛ atsu yitsoyeli ni ŋmɛɔ pɛpɛɛpɛ he nii?
7 Etɔɔ hii yɛ be babaoo mli akɛ amɛaaha yitsoyeli lɛ aŋmɛ pɛpɛɛpɛ. Eshɛɔ be ni kɛ́ ŋa lɛ tsɔɔ ejwɛŋmɔ yɛ sane ko he aloo ewie nɔ ko he waa fioo lɛ, amɛteŋ mɛi komɛi nuɔ he akɛ aashɔ̃ amɛgbɛhe lɛ yɛ amɛdɛŋ. Yesu ni ji nɔkwɛmɔ nɔ kpakpa kɛha wumɛi ni ji Kristofoi lɛ kɛɛ akɛ: “Mihe jɔ, ni mibaa mihe shi kɛjɛ mitsui mli.” (Mateo 11:29) Eheshibaa lɛ jeee hiɛaŋhiɛaŋ nɔ, ni baalaaje kɛ mɔ ko kɛ Iɛ kpaaa gbee.
8, 9. (a) Sara shwa Abraham yɛ mɛni mli, ni mɛni hewɔ? (b) Mɛni hewɔ Abraham eshwieee ehiɛ shi aloo ni eeebolɔ ewo lɛ lɛ?
8 Abraham hu ji heshibaa he nɔkwɛmɔ nɔ. Etsulɔyoo Hagar gbe Sara ni ji eŋa lɛ he guɔ ni ebuuu lɛ. Ekolɛ Abraham enaaa henɔwomɔ su nɛɛ aloo ena shi etsuuu he nii oya. Sara kɛɛ: “Mihiɛgbele nɛɛ aaakã onɔ! Miŋɔ miweyoo lɛ miwo omlishi; ni beni ena akɛ ehiɛ musu lɛ, mihe guɔ egbo yɛ ehiɛ. Yehowa aaakojo mikɛo teŋ.”—1 Mose 16:5.
9 Kwɛ bɔ ni nakai wiemɔi lɛ baanyɛ atsurɔ lɛ aha! Ejaakɛ Abraham sumɔɔ Sara waa diɛŋtsɛ ni esumɔŋ ni efɔŋ ko aba enɔ. Eyɛ mli akɛ Sara yɛ nɔ ni ebaanyɛ edamɔ nɔ eshwa Abraham yɛ shihilɛ ni ebaje mli lɛ moŋ, shi efee nii kɛteke nɔ, aahu po akɛ etsɛ ni Nyɔŋmɔ adamɔ mli tamɔ nɔ ni Abraham efeŋ nɔ ni ja. Agbɛnɛ, ani Abraham bɔ lɛ ahora yɛ eyitsoyeli lɛ hefamɔ mli? Ani ebu lɛ akɛ eji yoo ni baaa ehe shi? Ele akɛ Sara eshi shia ni miishɛɛ yɔɔ mli yɛ Ur ni éhi buui amli fe afii 10, yɛ Nyɔŋmɔ hiɛnyiɛmɔ ni lɛ Abraham ekpɛlɛ nɔ lɛ hewɔ. Heshibaa nɛ! Eheshibaa kɛ yelikɛbuamɔ ni pɛsɛmkunya bɛ mli lɛ eha Abraham esumɔ esane waa. (1 Petro 3:5, 6) Emlijɔlɛ hetoo lɛ ji akɛ: “Naa, oweyoo lɛ yɛ odɛŋ; feemɔ lɛ bɔ ni sa ohiɛ.” (1 Mose 16:6) Abraham baa ehe shi yɛ etsui mli. Mɛɛ nuu po nɛ!
10. (a) Mɛɛ gbɛ wu lɛ aaatsɔ nɔ akase Abraham yɛ? (b) Ani obaaye omanye yɛ be fɛɛ mli?
10 Ekolɛ kɛ oŋa shwa bo yɛ naagba ko he lɛ, bɔɔ mɔdɛŋ ni oha hetoo tamɔ bɔ ni Abraham fee lɛ. Ebɛ mlɛo yɛ be fɛɛ mli. Bei komɛi baaba ni obaatɔ̃. Shi bo toi, bɔɔ mɔdɛŋ ni onu shishi ni oŋmɛ nɔ ni ekɛɔ lɛ okwɛ. Yɛ bei komɛi amli lɛ yɛ henumɔ ni ŋa lɛ kɛbaawie hewɔ lɛ ewieŋ wiemɔi ni sa. Ebaafee nii kɛteke nɔ tamɔ bɔ ni Sara fee lɛ. Bɔɔ mɔdɛŋ ni okwɛ bɔ ni nyɛyi enyɔ lɛ nyɛaafee ni nyɛtsu he nii.
11. Mɛni hewɔ esaaa akɛ wu lɛ buɔ eŋa lɛ akɛ “mɔ ni baa shi” lɛ?
11 Lɛlɛŋ, wu lɛ baanyɛ ekɛ mlai sɔrɔtoi amamɔ shi yɛ shia lɛ mli. (Romabii 7:2) Shi kɛlɛ, oŋa lɛ jeee gbekɛ, ni asaŋ ejeee “mɔ ni baa shi.” Yehowa kɛɛ, “Mafee yelikɛbualɔ ko maha [nuu] lɛ, akɛ hefatalɔ ko ni sa lɛ [ni ji, “mɔ ni tamɔ lɛ”].” (1 Mose 2:18, NW) Hawa baatamɔ Adam yɛ nilee mli, hefatalɔ ni tamɔ lɛ, mɔ ni baanyɛ aye abua lɛ diɛŋtsɛ ni etsu nii ni ajɛ ŋwɛi akɛwo edɛŋ lɛ he nii.
12. (a) Mɛni anyɛ atsu beni wu ko ná heshibaa loo hiɛshikamɔ tsui lɛ? (b) Hiɛshikamɔ loo heshibaa tsui haa miishɛɛnamɔ baa gbalashihilɛ mli yɛ mɛɛ gbɛ nɔ!
12 Ŋa kpakpa ni atsɔɔ bɔ ni eji yɛ Abɛi 31 lɛ ji mɔ ni ewu kɛ ehe fɔɔ enɔ. Eheɔ gboshinii; ‘ejɛ eninenaa nitsumɔ mli’ efee abɔɔ—enɛ jeee nitsumɔ bibioo! Ani ewu lɛ sumɔɔɔ enɛ, ni eenu he akɛ aashɔ eyitsoyeli lɛ yɛ edɛŋ? Dabi, ekafo lɛ! (Kukuji 10, 11, 16, 28) Su ko ni tamɔ nakai baanyɛ aye abuao ni ekwa ŋwanejeei ni he, ehiaaa. Akɛ nɔkwɛmɔ nɔ lɛ, wu kɛ ŋa ko jeɔ ŋwane daa nɛɛ. Ekpɛlɛ nɔ akɛ ekɛ eyitsoyeli lɛ tsu nii tamɔ “nɔyelɔ” loo “nuŋtsɔ” ko. Yɛ be mli ni etsɔ sɔlemɔ nɔ eka ehe ekwɛ lɛ, eŋmɛɛ henɔwomɔ ni esaaa nɛɛ he. Nuu nɛɛ je shishi eŋmɛ yoo lɛ susumɔi lɛ ekwɛ. Yɛ naagbee lɛ eŋmɛ yoo lɛ gbɛ koni ekwɛ shika he saji lɛ ekomɛi anɔ. Agbɛnɛ nuu nɛɛ kɛɔ akɛ: “Yoo lɛ tsuɔ nii babaoo!” Ŋa lɛ kɛfata he akɛ: “Miisumɔ ni mafee mɔ ni anyɛɔ akɛ he fɔɔ enɔ kɛkɛ. Kɛ ole akɛ owu kɛ ehe fɔɔ onɔ lɛ, onaa miishɛɛ yɛ omli gbɛ.” No hewɔ ni Abɛi 13:10 bɔɔ kɔkɔ akɛ: “Hewoo lɛ, béi kɛkɛ ekɛbaa; shi mɛi ni susuɔ sane he yɛ ekomefeemɔ mli lɛ, amɛle nii.” Wu ni ji hiɛshikalɔ, ni ele he ni enyɛɔ efeɔ nii kɛyashɛɔ lɛ nyãa eŋa lɛ mɔdɛŋbɔɔi ahe, ni ekɛ enɛ tsɔɔ akɛ eji heshibalɔ yɛ tsui mli.—Abɛi 11:2.
Okɛ Woo Awoa Nɔ Ni “He Waaa Tuutu Ko” Lɛ
13. (a) Klɛŋklɛŋ Petro 3:7 tsɔɔ akɛ esa akɛ wu lɛ afee mɛni? (b) Mɛɛ henumɔŋ hiamɔ nii haa yoo feɔ mɔ ni “he waaa tuutu ko” lɛ?
13 Bɔfo Petro ŋma akɛ, “Nyɛ wumɛi lɛ, nyɛkɛ amɛ [nyɛ ŋamɛi] ahia shi yɛ nilee naa, ni nyɛkɛ woo awoa yoo akɛ nɔ ni he waaa tuutu ko.” (1 Petro 3:7) Esa akɛ oná oŋa lɛ henumɔi ahe nilee, ejaakɛ enɛ ji nɔ titri hewɔ ni abuɔ lɛ akɛ nɔ ni he waaa tuutu ko lɛ. Esa akɛ ŋa lɛ anu he akɛ ewu lɛ sumɔɔ lɛ ni ehiɛɔ lɛ dɔdɔɔdɔ. Kɛ nɔ ni fataa he nɛɛ bɛ mli lɛ—yɛ heloo gbɛfaŋ nibii ni yoo lɛ yɔɔ lɛ fɛɛ sɛɛ lɛ—ebaanu he akɛ etɔ fa ni eyeko emuu. Esa akɛ atsɔ eyiŋ ni ehe akɛ ewu lɛ nuɔ he taakɛ bɔ ni wu ko ni hi shi yɛ blema lɛ kɛɛ eŋa lɛ: “Biyei pii bɔɔ mɔdɛŋ moŋ, shi bo lɛ, ota amɛfiaa amɛnɔ.”—Abɛi 31:28, 29.
14. Mɛni haa yoo nuɔ he akɛ eyɛ shweshweeshwe yɛ henumɔŋ?
14 Shi hii komɛi asusumɔ baanyɛ afee akɛ, ‘Esa akɛ miŋa ale akɛ misumɔɔ lɛ, Mikɛ lɛ ebote gbalashihilɛ mli, aloo jeee nakai?’ Shi yei komɛi sumɔɔ ni ajie kpo atsɔɔ akɛ adɔɔ amɛhe. Nuu anɔkwafo Isak nu bɔ ni enɛ he hiaa ha lɛ he. Yɛ be mli ni ehi gbalashihilɛ mli afii 35 lɛ, ana ni ekɛ eŋa miishwɛ. (1 Mose 26:8) Feemɔ nakai nɔŋŋ. Tsɔ toi ni oboɔ lɛ aloo ehe ni osusuɔ lɛ nɔ oha ele akɛ otsui yɛ ehe, akɛ ‘efe yei fɛɛ.’
15. Mɛni esa akɛ wumɛi akwɛ amɛhe nɔ jogbaŋŋ yɛ he koni amɛnyɛ amɛbo amɛŋamɛi atoi aloo amɛsusu amɛhe, ni mɛni hewɔ enɛ he hiaa waa lɛ?
15 Bɔni afee ni ofee mɔ ni boɔ mɔ toi aloo esusuɔ mɔ he nɛkɛ lɛ heɔ be kɛ nii ahe susumɔ. Ewaaa haaa wumɛi komɛi akɛ amɛaabo mɔ ni tamɔ mɔ hee ko aloo ehe yɔɔ miishɛɛ lɛ toi. Enɛ ba Israel yɛ Maleaki be lɛ mli. Yehowa kɛɛ nakai hii ni susuɔ amɛ pɛ amɛhe ni yeɔ amɛŋamɛi kutumpɔo lɛ akɛ: “Nyɛkwɛa nyɛhe ni ahia yɛ nyɛmumɔ lɛ hewɔ.” (Maleaki 2:13-16) Hɛɛ, ehe miihia ni mɛnɛɛmɛi akwɛ amɛhe ni ahi jogbaŋŋ yɛ amɛhenumɔi ahe. Akɛni wɔkɛ yei krokomɛi baatsu nii aloo wɔbaabɛŋkɛ amɛ kpaakpa hewɔ lɛ, esa akɛ wɔfee nakai nɔŋŋ. Ebiɔ mɔdɛŋbɔɔ kɛ tsɔsemɔ ni mɔ kɛaaha ehe ni ekɛtsĩ mɔ he pɛ ni esusuɔ, tsinejee kɛ miishɛɛ ni bɛ aloo mɛi krokomɛi ahe miishɛɛ ni anaa lɛ naa koni ekatsake omumɔ, omli gbɛ henumɔi ni oyɔɔ yɛ oŋa he lɛ.—Mateo 5:27-30.
ŊA LƐ “GBƐNAA NII”
16. Nɛgbɛ naagbai pii yɔɔ yɛ gbalashihilɛ lɛ mli, ni 1 Korintobii 7:3, 4 tsɔɔ pɛsɛmkunya ni bɛ enɛ mli yɛ mɛɛ gbɛ nɔ?
16 Ohe ni okɛshaa afɔle lɛ he miihia diɛŋtsɛ yɛ gbalashihilɛ “gbɛnaa nii” lɛ mli. “Ha wu lɛ afee eŋa gbɛnaa nii eha lɛ, ni ŋa lɛ hu afee nakai nɔŋŋ aha ewu. Ŋa lɛ bɛ hewalɛ yɛ lɛ diɛŋtsɛ egbɔmɔtso nɔ, shi moŋ ewu lɛ yɔɔ; nakai nɔŋŋ kɛ wu lɛ bɛ hewalɛ yɛ Iɛ diɛŋtsɛ egbɔmɔtso nɔ, shi eŋa lɛ yɔɔ.” (1 Korintobii 7:3, 4) Naagbai babaoo yɛ wekukpaa ni henumɔ yɔɔ mli nɛɛ mli. Nikasemɔi komɛi ni afee koni akɛtao nibii amli lɛ ejie lɛ kpo akɛ gbalashihilɛ mli hefatalɔi fɛɛ ateŋ mɛi fã kpotoo ji mɛi ni baana bɔlɛnamɔ mli naagbai ni hiɛdɔɔ yɔɔ mli yɛ amɛgbalashihilɛ mli be ko mli.
17. (a) Mɛni esa akɛ efata ŋa lɛ gbalashihilɛ mli gbɛnaa nii ni akɛhaa lɛ lɛ he? (b) Te nibii amlitaolɔ ko tsɔɔ ŋa Iɛ hiamɔ nii amli eha tɛŋŋ?
17 Efɔɔ kaa akɛ wumɛi pii kɛ amɛŋamɛi ahiamɔ nii aloo bɔlɛnamɔ mli “gbɛnaa nii” lɛ toɔ amɛ diɛŋtsɛ amɛ nɔ̃ he. Paulo tsɔɔ yɛ gbɛ kroko kwraa nɔ akɛ jeee “gbɛnaa nii” lɛ fɛɛ je amɛhe. Atsɔɔ yɛ Romabii 13:7 akɛ nɔ ni sa aloo eji gbɛnaa nii kɛha nɔyeli lɛ mli onukpai komɛi ji onia, mɛi krokomɛi hu, gbeyeishemɔ, ni mɛi krokomɛi hu yɛ ni sa woo. Gbɛnaa nii ni ataoɔ lɛ damɔ hiamɔ nii krɛdɛɛ loo nɔ ni mɔ aŋkro lɛ biɔ lɛ nɔ. Shi nɔ ni fe gbɔmɔtsoŋ ekomefeemɔ he miihia yɛ gbalashihilɛ mli gbɛnaa nii ni kɔɔ oŋa Iɛ he lɛ mli. Nibii amli taolɔ, William M. Kephart kɛɛ yɛ wolo ni ji The Family, Society, and the Individual lɛ mli akɛ: “Belɛ abaanyɛ akɛ suɔmɔ kɛ hedɔɔ atsɔɔ nɔ ni he hiaa titri yɛ bɔlɛnamɔ ni yoo naa lɛ mli lɛ mli. . . . Ekolɛ beni bɔlɛnamɔ he nifeemɔi miiya nɔ lɛ, nɔ ni ekolɛ yoo susuɔ he waa ji nifeemɔi ni tsɔɔ suɔmɔ ni ajieɔ lɛ kpo yɛ bɔlɛnamɔ mli—emli ni amɔ̃ɔ, ehe ni ashwɛɔ, enaa ni ashɔɔ . . . etamɔ nɔ ni yei abɔɔ su ji ni amɛsusu bɔlɛnamɔ he akɛ nɔ ko ni yɔɔ bɔdɔɔ ni akɛshɛjeɔ mii kɛ suɔmɔ moŋ, fe gbɔmɔtsoŋ nifeemɔ ko ni henumɔ bɛ mli.”
18. Mɛni baanyɛ ekɛ mɔ pɛ he ni asusuɔ aba?
18 Ákɛ mɔ ni “he waaa tuutu ko” lɛ, bɔ ni oŋa lɛ henumɔi yɔɔ lɛ biɔ ni okɛ ohe asha afɔle shi okasusu nɔ ni okome ooofee ni no aaaha otsui anyɔ omli lɛ pɛ he. Agbɛnɛ hu ni oookane loo okɛ nibii ni wieɔ bɔlɛnamɔ he aaajie ohiɛtserɛ lɛ baanyɛ atee ‘bɔlɛnamɔ he akɔnɔ’ ni esaaa shi yɛ omli ni ebaaha osusu okome pɛ he, ni oha nɔ ni yɔɔ fɛo lɛ afee nɔ ni he ehiaaa ni yɔɔ keketee. Tsi ohe-kɛjɛ nii tamɔ nɛkɛ ni tamɔ haomɔ lɛ he! (Kolosebii 3: 5) Shi moŋ tsɔ tsuishitoo ni mlijɔlɛ kɛ suɔmɔ wiemɔi yɔɔ mli nɔ okɛ oŋa lɛ gbɛnaa nii ni sa lɛ lɛ fɛɛ aha lɛ.—1 Korintobii 10:24.
HE NI AKƐSHAA AFƆLE SAA TSUI LƐ HE
19. Kɛ wu ko ji mɔ ni kɛ ehe shaa afɔle lɛ, ani esa akɛ ŋa ni ji Kristofonyo lɛ aŋɔ nakai hegbɛ lɛ ni ekɛtsu nii yɛ gbɛ ni esaaa nɔ?
19 Akɛni amaa afɔle ni esa akɛ wu lɛ kɛ ehe asha lɛ nɔ mi nɛkɛ hewɔ lɛ, ekolɛ obaasusu akɛ, ‘Ani ŋamɛi kɛ enɛ tsuŋ nii akɛ hegbɛ ni amɛna—ni amɛma amɛ diɛŋtsɛ amɛnifeemɔ gbɛ nɔ mi yɛ be fɛɛ mli?’ Esaaa akɛ sane lɛ baa lɛ nakai! Esa akɛ ŋamɛi ni ji Kristofoi lɛ ahere nɔ taakɛ asafo lɛ fee yɛ suɔmɔ ni ha Yesu kɛ ehe sha afɔle lɛ he lɛ. Paulo ŋma akɛ: “Ejaakɛ Kristo suɔmɔ lɛ nyɛɔ wɔ nɔ ni egbo mɛi fɛɛ yigbele, koni mɛi ni hiɛ kamɔ lɛ ahiɛ akakamɔ miiha amɛ diɛŋtsɛ amɛhe dɔŋŋ.” (2 Korintobii 5:14, 15) Nakai nɔŋŋ hu esa akɛ oŋa kɛ su ni pɛsɛmkunya bɛ mli ahere nɔ. Taakɛ ŋa ko ni ji Kristofonyo ko ni yɔɔ miishɛɛ kɛɛ lɛ: “Migbeɔ mihe mihaa miwu lɛ bɔni afee ni wɔnyɛ wɔya nɔ wɔsɔmɔ yɛ teokrase sɔomɔ nitsumɔ ko ni mliwa mli, ejaakɛ mile akɛ ejwɛŋɔ mihe.”
20. (a) Yɛ mɛɛ gbɛ nɔ 1 Mose 3:16 he susumɔ tsɔɔ akɛ wumɛi kɛ ŋamɛi fɛɛ baanyɛ afee mɛi ni eŋmɛɛɛ pɛpɛɛpɛ? (b) Mɛni hewɔ esaaa akɛ ŋamɛi feɔ oya yɛ amɛwumɛi atɔmɔi ahe wiemɔ mli?
20 Hɛɛ, ŋamɛi, ehe miihia ni nyɛ hu nyɛfee mɛi ni jeee pɛsɛmkunyatsɛmɛi. Taakɛ bɔ ni nuu baanyɛ afite eyitsoyeli lɛ kɛtsɔ pɛsɛmkunya gbɛ ni eeetsɔ nɔ eye eŋa lɛ nɔ kɛ yiwalɛ lɛ, nakai nɔŋŋ hu ŋa lɛ baasumɔ ni ewu lɛ agbala ejwɛŋmɔ kɛba enɔ fe bɔ ni sa. (1 Mose 3:16) Ni aaaŋmɛ pɛpɛɛpɛ yɛ enɛ mli lɛ bɛ mlɛo. Beni abiɔ babaoo yɛ owu lɛ dɛŋ, kɛ asafoŋ nitsumɔi babaoo hu lɛ, be baashɛ kɛ̃ ni enyɛŋ etsu ohenumɔŋ hiamɔ nii lɛ fɛɛ he nii eha bo. Lalatsɛ lɛ jaje akɛ: “Kɛji bo, Yehowa, okɛɛ ooodi nishaianii asɛɛ lɛ, kulɛ Nuŋtsɔ, namɔ po aaanyɛ shi adamɔ?” Wɔteŋ mɔ ko bɛ ni baanyɛ! (Lala 130:3) Bɔ ni owu lɛ baabu ehe akɔntaa eha Yehowa lɛ, nakai nɔŋŋ eji yɛ ogbɛfaŋ. Shi amrɔ nɛɛ lɛ ohiɛ sɔɔ wiemɔi kɛha nibii kpakpai ni efeɔ kɛ mɔbɔnalɛ jeee nibii pɛ ni baagbala owu lɛ jwɛŋmɔ shi etsui diɛŋtsɛ hu.
YELIKƐBUMAƆ NI JƐ ŊWƐI
21. Nyɔŋmɔ yeɔ ebuaa yɛ mɛɛ gbɛ nɔ? Okɛ nɔkwɛmɔ nɔ aha.
21 Shi nɛkɛ gbɛnaa nii nɛɛ fɛɛ baafee nɔ ni da naakpa. Shi Nyɔŋmɔ baaye abua bo koni “eha nyɛtsɔ emumɔ lɛ nɔ ni nyɛhe awa kpintiŋŋ yɛ nyɛmli gbɔmɔ lɛ gbɛfaŋ.” Nɛkɛ mligbɛ hewalɛ nɛɛ ji nɔ ni baaye abua nyɛ ni nyɛtere jatsu fɛɛ jatsu, ejaakɛ Yehowa baanyɛ atsɔ ehewalɛ lɛ nɔ ‘efee nii babaoo kɛteke nɔ fe nibii fɛɛ ni wɔɔnyɛ wɔbi aloo wɔjwɛŋɔ.’ (Efesobii 3:16, 20) Kristofoi ni ji gbalashihilɛ mli hefatalɔi gbála mli yɛ naagbai ahewɔ. Yɛ be ko sɛɛ lɛ amɛhe amɛtara shi koni amɛsusu saamɔ loo kpatamɔ he. Bolɔmɔ lɛ je shishi ekoŋŋ. Kɛkɛ ni wu lɛ wo ŋaa akɛ amɛyi enyɔ lɛ fɛɛ asɔle yɛ ekomefeemɔ mli. Kɛkɛ ni amɛfee diŋŋ. Wu lɛ kɛɛ yɛ teemɔŋ akɛ: “Etamɔ nɔ ni no ji wɔgbalashihilɛ mli naagba lɛ diɛŋtsɛ. Wɔbɔɔ mɔdɛŋ ni wɔsaa wɔnaagbai lɛ yɛ wɔ diɛŋtsɛ wɔgbɛ nɔ fe ni wɔkɛ Yehowa aaaba mli. Ni nɔ ko nɔ ko tsuuu nii kwraa.” Yɛ be mli ni amɛsaa lɛ sɛɛ afii enumɔ lɛ, ŋa lɛ kɛɛ akɛ: “Efeɔ nɔ ni hi yɛ be fɛɛ mli. Babaoo ni wɔbɔɔ mɔdɛŋ akɛ wɔkɛ Biblia mli anɔkwale lɛ aaatsu nii lɛ, babaoo hu wɔnaa miishɛɛ ji no. Agbɛnɛ wɔbɔɔ mɔdɛŋ ni wɔkɛ Yehowa awo wɔgbalashihilɛ mli nibii fɛɛ mli. Wɔnyaa nii ni wɔtsuɔ yɛ ekomefeemɔ mli yɛ shiɛmɔ mli lɛ he waa.”
22, 23. (a) Esa akɛ atswa Kristofoi agbalashihilɛ abɔle mɛni he? (b) Mɛni hewɔ esa akɛ ajɛ tsuiŋ tɔɔ ajie ŋamɛi pii ayi lɛ?
22 Hɛɛ, esa akɛ Kristofonyo gbalashihilɛ afee nɔ ni etswa ebɔle wekukpaa ni ka ekɛ Nyɔŋmɔ teŋ lɛ he, jeee nɔ ni etswa ebɔle miishɛɛ ni ehefatalɔ lɛ aaana pɛ he. Taakɛ Paulo ŋma lɛ: “Mɛi ni yɔɔ ŋamɛi tete afee tamɔ mɛi ni bɛ eko.” (1 Korintobii 7:29) Jeee akɛ Paulo miikɛɛ wumɛi akɛ amɛku amɛhiɛ amɛshwie amɛŋamɛi anɔ. Eji nɔ ni sa akɛ nuu ni ebote gbalashihilɛ mli lɛ aaafee nii “ni esane asa eŋa hiɛ.” (1 Korintobii 7:33) Shi yɛ be mli ni nuu yaa ehiɛ yɛ mumɔŋ ni ejieɔ sui ni tsɔɔ akɛ eji wu kpakpa kpo lɛ, eka shi faŋŋ ákɛ akɛ sɔɔmɔ hegbɛi komɛi baawo edɛŋ yɛ asafo lɛ mli. Enɛ baahe be ni tsutsu lɛ ekɛ eŋa fɛɛ naa mli gbɛfaŋnɔ lɛ eko, eyɛ mli akɛ esaaa akɛ efeɔ mɔ ni eŋmɛɛɛ pɛpɛɛpɛ. Shi kɛlɛ, ebaabi ni ŋa Iɛ amɔ saji amli nakai yɛ be kɛ bei amli akɛni wu lɛ nyɛŋ agbala ejwɛŋmɔ fɛɛ kɛba enɔ lɛ hewɔ.
23 Nyɛ ŋamɛi lɛ ateŋ mɛi pii kɛ be babaoo emɛ nyɛ wumɛi ni pɛsɛmkunya bɛ mli, yɛ be mli ni nyɛ wumɛi lɛ tsuɔ asafo lɛ mli nitsumɔi komɛi ni he hiaa lɛ ahe nii lɛ. Esa akɛ ajie nyɛyi diɛŋtsɛ yɛ enɛ mli! Yehowa kɛ owu lɛ fɛɛ hiɛ sɔɔ tsuishitoo mli ni ojɛɔ ofiɔ esɛɛ Iɛ waa. Oji nɔ ni Biblia lɛ kɛɛ lɛ pɛpɛɛpɛ —“akekre” kɛha owu kɛ nɔ ni ‘haa mɔ hiɛ baa nyam yɛ Yehowa hiɛ!’—Abɛi 12:4; 18:22.
24. Mɛni esa akɛ wu kɛ ŋa lɛ abɔ mɔdɛŋ ni amɛfee ákɛ aŋkroaŋkroi?
24 No hewɔ lɛ, wumɛi, nyɛyaa nɔ nyɛjiea suɔmɔ ni haa akɛ he shaa afɔle lɛ kpo. Ŋamɛi, nyɛyaa nɔ nyɛkɛ sɛɛfimɔ ni pɛsɛmkunya bɛ mli aye abua. Nyɛtswaa nyɛgbalashihilɛ lɛ nyɛbɔlea wekukpaa ni ka nyɛkɛ Nyɔŋmɔ teŋ lɛ he. Ni nyɛ-Tsɛ ni naa mɔbɔ lɛ ajɔɔ nyɛmɔdɛŋbɔɔ lɛ nɔ babaoo!a
[Shishigbɛ niŋmai]
a Ajie kɛjɛ June 1, 1988 Blɔfo Buu-Mɔɔ lɛ mli.
Ani Okaiɔ?
□ Mɛɛ gbɛ nɔ wu lɛ ‘sumɔɔ eŋa lɛ yɛ, taakɛ Kristo hu sumɔ asafo lɛ’?
□ Mɛɛ gbɛ nɔ wu lɛ aaatsɔ akase Abraham heshibaa tsui lɛ?
□ Mɛɛ gbɛ nɔ wu kɛ woo haa eŋa akɛ mɔ ni he waaa tuutu ko yɛ?
□ Te esa akɛ ŋamɛi ahere he ni akɛshaa afɔle nɛɛ nɔ amɛha tɛŋŋ?
[Mfonirii ni yɔɔ baafa 20]
ESA AKƐ WU LƐ ANYIƐ HIƐ
Yɛ sɔɔmɔ nitsumɔ lɛ mli
Yɛ hiɛtsɛrɛjiemɔ mli
Yɛ weku lɛ mli saji ahe nitsumɔ mli
February Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)