Nyɛmimɛi ni Ná Sui Srɔtoi

YIŊKPƐI ni fɔlɔi feɔ lɛ saa amɛbii ahe kɛ̃ yɛ naagbee mli. Enɛ ji anɔkwale ŋmɛnɛ taakɛ eji yɛ Eden abɔɔ lɛ mli lɛ. Adam kɛ Hawa atuatsemɔ gbɛ lɛ ná adesai anɔ hewalɛ yɛ gbɛ ni mli wa waa nɔ. (1 Mose 2:15, 16; 3:1-6; Romabii 5:12) Ni kɛlɛ, wɔteŋ mɔ fɛɛ mɔ yɛ hegbɛ ni ekɛaaná ekɛ wɔ-Bɔlɔ lɛ teŋ wekukpaa kpakpa kɛji akɛ wɔhala akɛ wɔɔfee nakai. Áfee enɛ he nɔkwɛmɔnɔ yɛ Kain kɛ Habel, klɛŋklɛŋ nyɛmimɛi hii enyɔ yɛ adesa yinɔsane mli lɛ ahe sane lɛ mli.

Sane ko bɛ ni aŋma afɔ̃ shi yɛ Ŋmalɛ lɛ mli ni tsɔɔ akɛ Nyɔŋmɔ kɛ Adam kɛ Hawa wie beni ashwie amɛ kɛjɛ Eden lɛ sɛɛ. Kɛlɛ, Yehowa gbalaaa ehe shi kɛjɛɛɛ amɛbii lɛ ni ekɛ amɛ aaawie lɛ he. Ŋwanejee ko bɛ he akɛ, Kain kɛ Habel le nɔ ni ba lɛ kɛjɛ amɛfɔlɔi aŋɔɔ. Amɛnyɛ amɛna “kerubim kɛ lalilɛi klante ni tsɔmɔɔ ehe [ni eŋɔto] Eden trom lɛ hiɛ yɛ bokagbɛ, koni ebu wala tso lɛ naa gbɛ lɛ he” lɛ. (1 Mose 3:24) Nɛkɛ hii nɛɛ hu ye bɔ ni sane ni Nyɔŋmɔ jaje akɛ latsaa kɛ piŋmɔ baafee nibii ni amɛkɛbaakpe yɛ shihilɛ mli lɛ ji anɔkwale lɛ he odase.—1 Mose 3:16, 19.

Ekolɛ Kain kɛ Habel le Yehowa wiemɔi ni ejaje etsɔɔ onufu lɛ, ni kɛɔ akɛ: “Mikɛ nyɛ̃ɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.” (1 Mose 3:15) Nɔ ni Kain kɛ Habel le yɛ Yehowa he lɛ baaha amɛnyɛ amɛná amɛkɛ lɛ teŋ wekukpaa kpakpa ni nɔkpɛlɛmɔ yɔɔ mli.

Yehowa gbalɛ lɛ kɛ esui akɛ Ejurɔfeelɔ ni yɔɔ suɔmɔ lɛ he susumɔ baanyɛ atee shwelɛ ko kɛha ŋwɛi nɔkpɛlɛmɔ shi yɛ Kain kɛ Habel mli. Shi nɛgbɛ amɛbaaná nakai shwelɛ lɛ kɛyashɛ? Ani amɛbaatsu nakai shwelɛ ní amɛná kɛjɛ fɔmɔ mli akɛ amɛjá Nyɔŋmɔ koni amɛha amɛmumɔŋ shihilɛ aya hiɛ kɛyashɛ he ni amɛaaná emli hemɔkɛyeli lɛ he nii?—Mateo 5:3.

Nyɛmimɛi Hii lɛ Kɛ Afɔlei Ba

Yɛ be ni sa mli lɛ, Kain kɛ Habel kɛ afɔlei baha Nyɔŋmɔ. Kain kɛ shikpɔŋ nɔ nibaa nii baha, ni Habel kɛ etooi akromɔbii lɛ eko baha. (1 Mose 4:3, 4) Ekolɛ nɛkɛ hii nɛɛ eye aaafee afii 100 yɛ nakai be mli, ejaakɛ beni afɔ́ Set lɛ, no mli lɛ Adam eye afii 130.—1 Mose 4:25; 5:3.

Amɛ afɔleshaai lɛ tsɔɔ akɛ Kain kɛ Habel yɔseɔ esha shihilɛ ni amɛyɔɔ mli lɛ, ni amɛmiisumɔ ni amɛná Nyɔŋmɔ hiɛ duromɔ. Kɛ́ hoo lɛ, ekolɛ amɛsusu Yehowa shiwoo ni kɔɔ onufu lɛ kɛ yoo lɛ Seshi lɛ he lɛ he kɛyashɛ he ko. Atsɔɔɔ be falɛ kɛ mɔdɛŋbɔɔ ni Kain kɛ Habel kɛtsu nii koni amɛná amɛkɛ Yehowa teŋ wekukpaa kpakpa ni nɔkpɛlɛmɔ yɔɔ mli lɛ. Shi Nyɔŋmɔ nifeemɔ yɛ amɛ afɔleshaai lɛ ahe lɛ haa aleɔ nɔ ni amɛteŋ mɔ fɛɛ mɔ susumɔi ji diɛŋtsɛ lɛ mli.

Woloŋlelɔi komɛi susuɔ akɛ Hawa susu Kain he akɛ lɛ ji “seshi” ni baakpata onufu lɛ hiɛ lɛ, ejaakɛ beni efɔ́ Kain lɛ ekɛɛ akɛ: “Miná nuu yɛ Yehowa hefatamɔ naa.” (1 Mose 4:1) Kɛji akɛ Kain hé enɛ eye lɛ, no lɛ etɔ̃ kwraa. Yɛ gbɛ kroko nɔ lɛ, hemɔkɛyeli fata Habel afɔleshaa lɛ he. Ejaakɛ “hemɔkɛyeli Habel kɛshã afɔle ni fe Kain nɔ lɛ eha Nyɔŋmɔ.”—Hebribii 11:4.

Habel mumɔŋ sɛɛyoomɔ kɛ eko ni Kain bɛ lɛ pɛ jeee srɔtofeemɔ ni kã nɛkɛ nyɛmimɛi nɛɛ ateŋ. Srɔtofeemɔ yɛ amɛsubaŋ hu mli. No hewɔ lɛ, “Yehowa hiɛ sɔ Habel kɛ efɔle lɛ; shi Kain kɛ efɔle lɛ, ehiɛ esɔɔɔ.” Ebaanyɛ efee akɛ Kain kɛ hiɛaŋhiɛaŋ susumɔ ko kɛkɛ tsu efɔleshaa lɛ he nii, ni ekɛha jabejabe kɛkɛ. Shi Nyɔŋmɔ ekpɛlɛɛɛ jamɔ nifeemɔ ko kɛkɛ lɛ nɔ. Kain ená tsui fɔŋ, ni Yehowa yoo akɛ esusumɔi ejaaa. Bɔ ni Kain fee enii beni akpoo efɔleshaa lɛ jieɔ nɔ subaŋ ni ehiɛ diɛŋtsɛ lɛ kpo. Yɛ nɔ najiaŋ ni eeejaje saji moŋ lɛ, “Kain mli wo la naakpa, ni etu ehiɛ.” (1 Mose 4:5) Ehiɛ jie susumɔi fɔji ni yɔɔ emli lɛ kɛ ejwɛŋmɔ fɔŋ ni ehiɛ lɛ hu kpo.

Kɔkɔbɔɔ kɛ Enifeemɔ

Akɛni Nyɔŋmɔ le Kain subaŋ hewɔ lɛ, ebɔ lɛ kɔkɔ akɛ: “Mɛɛba omli ewo la? ni mɛɛba otu ohiɛ nɛɛ? Aso kɛji ofee ekpakpa lɛ, ohiɛ baŋ nyam lo? shi kɛji ofeee ekpakpa lɛ, esha bu shinaa lɛ shi, ni bo osɛɛgbɛ etaoɔ; shi bo lɛ ye enɔ.”—1 Mose 4:6, 7.

Nikasemɔ ko yɛ enɛ mli kɛha wɔ. Yɛ anɔkwale mli lɛ, esha bu shinaa lɛ shi ni efee klalo ako eeemi wɔ. Kɛlɛ, Nyɔŋmɔ eha wɔ nihalamɔ mli heyeli, ni wɔbaanyɛ wɔhala akɛ wɔɔfee nɔ ni ja. Yehowa kɛɛ Kain akɛ ‘efee ekpakpa,’ shi E-nyɛɛɛ enɔ koni etsake. Kain hala lɛ diɛŋtsɛ egbɛ.

Sane ni ba ni jɛ mumɔŋ lɛ yaa nɔ akɛ: “Ni Kain kɛ enyɛmi Habel wie. Ni eba mli akɛ, beni amɛyɔɔ ŋa lɛ nɔ lɛ, Kain te shi wo enyɛmi Habel ni egbe lɛ.” (1 Mose 4:8) No hewɔ lɛ Kain batsɔ gbɔmɔgbelɔ ni nuuu nii ahe ehaaa mɔ. Ejieee heshwamɔ bibioo po kpo beni Yehowa bi lɛ akɛ: “Nɛgbɛ onyɛmi Habel yɔɔ” lɛ? Shi moŋ akɛni Kain nuuu nii ahe ehaaa mɔ hewɔ lɛ, eha lɛ hetoo yɛ henɔwomɔ mli akɛ: “Mileee; minyɛmi lɛ kwɛlɔ ji mi lo?” (1 Mose 4:9) Nakai amale ni akwɛɛɛ sɛɛ lɛ, kɛ ehe gbɛnaa nii ni ekpoo lɛ ha ale Kain akɛ ebɛ tsuiŋdɔlɛ ko kwraa.

Yehowa lomɔ Kain ni eshwie lɛ kɛjɛ he ni Eden yɔɔ lɛ gbɛ kɛtee shɔŋŋ. Loomɔ ni alomɔ shikpɔŋ lɛ momo lɛ mli baawa waa yɛ Kain sane lɛ mli, ni shikpɔŋ lɛ ni eeehu nɔ lɛ baŋ niyenii kɛhaŋ lɛ. Ebaatsɔ kobɔfo kɛ shikpalɔ yɛ shikpɔŋ lɛ nɔ. Kain wiemɔ akɛ etoigbalamɔ lɛ mli wa waa lɛ tsɔɔ akɛ abaatɔ enyɛmi lɛ gbele he owele yɛ enɔ, shi ejieee anɔkwa heshwamɔ ko kwraa kpo. Yehowa “kadi” Kain—ekolɛ eeenyɛ efee akpɔ ko ni hiɛdɔɔ yɔɔ mli ni ewo ni mɛi krokomɛi le ni amɛyeɔ nɔ koni akaha mɔ ko miigbe lɛ yɛ oweletɔɔ hewɔ.—1 Mose 4:10-15.

Kain “je Yehowa hiɛ etee, ni eyahi shi yɛ Nod shikpɔŋ lɛ nɔ yɛ Eden bokagbɛ.” (1 Mose 4:16) Akɛni ekɛ enyɛmimɛi yei lɛ, loo enyɛmimɛi lɛ abiyei lɛ ateŋ mɔ kome fee eŋa hewɔ lɛ, eto maŋ, ni eŋɔ ekromɔbi Henok gbɛi ewo maŋ lɛ. Kain seshinyo Lamek bafee awuiyelɔ tamɔ bɔ ni eblematsɛ ni sheee Nyɔŋmɔ gbeyei lɛ ji lɛ pɛpɛɛpɛ. Shi abule Kain weku lɛ shishi yɛ Noa gbii lɛ mli Nu Afua lɛ mli.—1 Mose 4:17-24.

Nikasemɔi Kɛha Wɔ

Wɔbaanyɛ wɔkase nii kɛjɛ saji ni kɔɔ Kain kɛ Habel he lɛ mli. Bɔfo Yohane wo Kristofoi ŋaa ni amɛsumɔ amɛhe, “jeee tamɔ bɔ ni Kain jɛ mɔ fɔŋ lɛ mli ni egbe enyɛmi lɛ.” Kain lɛ, “lɛ diɛŋtsɛ enitsumɔi lɛ efɔji ni, shi enyɛmi lɛ nɔ lɛ ja.” Yohane hu kɛɛ akɛ: “Mɔ fɛɛ mɔ ni nyɛ̃ɔ enyɛmi lɛ, gbɔmɔgbelɔ ji lɛ; ni nyɛle akɛ gbɔmɔgbelɔ ko gbɔmɔgbelɔ ko bɛ naanɔ wala yɛ emli.” Hɛɛ, gbɛ ni wɔtsɔɔ nɔ wɔkɛ wɔnanemɛi Kristofoi yeɔ lɛ saa wekukpaa ni kã wɔkɛ Nyɔŋmɔ teŋ lɛ kɛ wɔ wɔsɛɛ gbɛkpamɔi ahe. Wɔnyɛŋ wɔná nyɛ̃ɛ kɛha wɔnanemɛi heyelilɔi lɛ eko ni wɔná Nyɔŋmɔ hiɛ duromɔ mli ŋɔɔmɔ yɛ nakai beaŋ nɔŋŋ.—1 Yohane 3:11-15; 4:20.

Kain kɛ Habel ná tsɔsemɔ kome, shi Kain bɛ hemɔkɛyeli yɛ Nyɔŋmɔ mli. Yɛ anɔkwale mli lɛ, ejie Abonsam, shishijee ‘gbɔmɔgbelɔ kɛ malemɔ tsɛ’ lɛ su kpo. (Yohane 8:44) Kain gbɛ lɛ tsɔɔ akɛ, wɔ fɛɛ wɔyɛ nɔ ni wɔbaahala, ni ákɛ, mɛi ni halaa akɛ amɛbaafee esha lɛ tsiɔ amɛhe kɛjɛɔ Nyɔŋmɔ he, ni ákɛ, Yehowa kɛ efɔbuu kojomɔi baa mɛi ni shwaaa amɛhe lɛ anɔ.

Yɛ gbɛ kroko nɔ lɛ, Habel ná hemɔkɛyeli yɛ Yehowa mli. Yɛ anɔkwale mli lɛ, “hemɔkɛyeli Habel kɛshã afɔle ni fe Kain nɔ lɛ eha Nyɔŋmɔ, no hewɔ hu ni aye ehe odase akɛ jalɔ ji lɛ lɛ; ejaakɛ Nyɔŋmɔ ye enikeenii lɛ ahe odase.” Eyɛ mli akɛ wiemɔ kome ko kwraa bɛ Ŋmalɛi lɛ amli ni Habel wie moŋ, shi yɛ ehemɔkɛyeli ni ekaaa lɛ hewɔ lɛ, ‘eewie lolo.’—Hebribii 11:4.

Habel ji klɛŋklɛŋ mɔ yɛ emuuyeli mlihiɛlɔi ni ato amɛ naa kakadaŋŋ lɛ ateŋ. Hiɛ kpako elá ni ‘bolɔ etsɛ Yehowa kɛjɛ shikpɔŋ sũ lɛ mli lɛ nɔ.’ (1 Mose 4:10; Luka 11:48-51) Kɛji akɛ wɔjie hemɔkɛyeli kpo tamɔ bɔ ni Habel fee lɛ, wɔ hu wɔbaanyɛ wɔná wɔkɛ Yehowa teŋ wekukpaa kpakpa ni jara wa waa ni sɛɛ tsɛɔ mli ŋɔɔmɔ.

[Akrabatsa ni yɔɔ baafa 22

OKWAAFONYO LƐ KƐ TOOKWƐLƆ LƐ

Shikpɔŋ lɛ nɔ hũmɔ kɛ enɔ saamɔ kɛ kooloi lɛ anɔkwɛmɔ ji shishijee gbɛnaa nii ni Nyɔŋmɔ kɛha Adam lɛ ekomɛi. (1 Mose 1:28; 2:15; 3:23) Ebinuu Kain batsɔ okwaafonyo, ni Habel batsɔ tookwɛlɔ. (1 Mose 4:2) Akɛni adesai aniyenii ji aduawai kɛ kwɛɛnii pɛ kɛyashi Nu Afua lɛ sɛɛ hewɔ lɛ, belɛ mɛni hewɔ esa akɛ alɛ tooi?—1 Mose 1:29; 9:3, 4.

Bɔni afee ni tooi ashwere lɛ, adesa kwɛmɔ he hiaa amɛ. Habel nitsumɔ lɛ yeɔ odase akɛ gbɔmɔ kwɛ nɛkɛ shia kooloi nɛɛ anɔ kɛjɛ adesa yinɔsane shishijee mli tɔ̃ɔ. Ŋmalɛi lɛ ewieee kɛji akɛ adesai ni hi shi kɛjɛ shishijee mli lɛ kɛ kooloi afufɔ tsu nii akɛ niyenii, ni mɛi ni yeɔ aduawai kɛ kwɛɛnii lɛ po baanyɛ ni amɛkɛ tooi ahetsɔi atsu nii. Ni kɛji akɛ tooi gboi lɛ, akɛ amɛ hewolo lɛ tsuɔ nibii ni sɛɛnamɔ yɔɔ he. Ákɛ nɔkwɛmɔnɔ lɛ, bɔni afee ni Yehowa kɛ nɔ ko ahà Adam kɛ Hawa he lɛ, ekɛ ‘hewolo fee atadei kakadaji’ ewo amɛ.—1 Mose 3:21.

Yɛ fɛɛ mli lɛ, shishinumɔ yɛ mli akɛ aaasusu akɛ, kɛjɛ shishijee lɛ ekomefeemɔ yɛ Kain kɛ Habel teŋ. Amɛfee nibii komɛi ni he hiaa mɛi krokomɛi ni yɔɔ weku lɛ mli lɛ koni amɛná hehaa nɔ̃ ni amɛye nii ni amɛtɔrɔ.

[Mfoniri ni yɔɔ baafa 23]

Kain ‘nitsumɔi lɛ efɔji ni, shi enyɛmi lɛ nɔ lɛ ja’