Mɛni Hewɔ Mɛi Kɛɔ Akɛ Nyɔŋmɔ Yitsoŋ Wa Lɛ?

ANI sanebimɔ ni yɔɔ wolo nɛɛ sɛɛ lɛ haa onaa kpɛɔ ohe? Mɛi komɛi anaa kpɛɔ amɛhe, shi ŋmɛnɛ lɛ, mɛi babaoo hu ayiŋ etɛɛɛ amɛ akɛ Nyɔŋmɔ yitsoŋ wa—loo amɛsusuɔ akɛ eyitsoŋ wa. Mɛni hewɔ?

Mɛi komɛi ni adebɔɔ naa osharai enina amɛ pɛŋ lɛ biɔ akɛ: “Mɛni hewɔ Nyɔŋmɔ ŋmɛɔ gbɛ ni nibii nɛɛ baa? Ani esusuuu adesai ahe? Aloo eyitsoŋ wa?”

Mɛi komɛi biɔ amɛhe sane nɛɛ nɔŋŋ kɛ́ amɛmiikane Biblia lɛ. Kɛ́ amɛkane Noa kɛ Nu Afua lɛ sane lɛ, amɛshwieɔ amɛyiŋ akɛ, ‘Mɛni hewɔ Nyɔŋmɔ ni yɔɔ suɔmɔ lɛ gbe nakai mɛi babaoo lɛ? Ani eyitsoŋ wa?’

Ani bei komɛi lɛ, obiɔ ohe saji nɛɛ? Aloo bo diɛŋtsɛ hu onyɛɛɛ oná hetoo oha mɛi ni biɔ akɛ ani Nyɔŋmɔ yitsoŋ wa lo lɛ? Ekɔɔɔ he eko bɔ ni sane lɛ ji lɛ, susumɔ sanebimɔ kroko ni baanyɛ aye abua lɛ he.

Ekukufoo ji akɛ, wɔhiɔ yiwalɛ nifeemɔ ejaakɛ wɔle ekpakpa kɛ efɔŋ. Yɛ enɛ gbɛfaŋ lɛ, esoro wɔ kwraa yɛ kooloi ahe. Wɔ-Bɔlɔ lɛ ‘bɔ wɔ yɛ esubaŋ nɔ.’ (1 Mose 1:27) Mɛni no tsɔɔ? Eha wɔ nyɛmɔ ni wɔbaanyɛ wɔkɛjwɛŋ esui lɛ kɛ emlai ni kɔɔ jeŋba he, ni ji esusumɔ yɛ ekpakpa kɛ efɔŋ he lɛ anɔ. Susumɔ enɛ he okwɛ: Kɛ́ Nyɔŋmɔ ji mɔ ni ha wɔle ekpakpa kɛ efɔŋ, ni no haa wɔhiɔ yiwalɛ nifeemɔ lɛ, ani no emaaa nɔ mi kɛhaaa wɔ akɛ Nyɔŋmɔ hu hiɔ yiwalɛ nifeemɔ?

Biblia lɛ maa sane hesusumɔ nɛɛ nɔ mi, ejaakɛ yɛ Biblia lɛ mli lɛ, Nyɔŋmɔ maa nɔ mi ehaa wɔ akɛ: “Migbɛi lɛ kwɔ fe nyɛgbɛi lɛ, ni mijwɛŋmɔi lɛ hu kwɔ fe nyɛjwɛŋmɔi lɛ!” (Yesaia 55:9) No hewɔ lɛ, kɛ́ wɔkojo Nyɔŋmɔ akɛ eyitsoŋ wa lɛ, ani jeee nɔ ni Biblia lɛ kɛɔ lɛ wɔtsɔɔ lɛ sɛɛsɛɛ lɛ—yɛ gbɛ ko nɔ lɛ, ákɛ wɔgbɛi lɛ anɔ kwɔlɔ fe Nyɔŋmɔ nɔ lɛ? Ekã shi faŋŋ akɛ, ebaafee nɔ ni nilee yɔɔ mli akɛ wɔbaatao anɔkwalei babaoo yɛ sane nɛɛ he dani wɔmu sane naa nakai. Ekolɛ, esa akɛ wɔbi nɔ hewɔ ni enifeemɔi lɛ ekomɛi bafeɔ tamɔ eyitsoŋ wa lɛ, shi jeee nɔ hewɔ ni eyitsoŋ wa lɛ. Bɔni afee ni wɔna sane lɛ naa lɛ, ha wɔkwɛ nɔ ni wiemɔ ni ji “yitsoŋ wa, loo yiwalɛ” lɛ tsɔɔ diɛŋtsɛ.

Kɛ́ wɔkɛɛ mɔ ko yitsoŋ wa lɛ, no tsɔɔ akɛ wɔmu sane naa akɛ esusumɔi ehiii. Mɔ ni yitsoŋ wa ji mɔ ko ni kɛ́ ena mɛi krokomɛi miiná nɔ̃ lɛ, emii shɛɔ ehe loo kɛ́ ena akɛ mɛi eyaje haomɔ mli lɛ, esusuuu amɛhe. No hewɔ lɛ, tsɛ ni gbalaa ebi toi akɛni kɛ́ ebi lɛ miipiŋ lɛ enáa he miishɛɛ lɛ ji tsɛ ni yitsoŋ wa. Shi tsɛ ni gbalaa ebi toi koni ekɛtsɔse lɛ loo ekɛbu ebi lɛ he lɛ ji tsɛ kpakpa. Akɛni jeee be fɛɛ be wɔleɔ yiŋtoo hewɔ ni mɔ ko feɔ enii yɛ gbɛ pɔtɛɛ ko nɔ lɛ hewɔ lɛ, ewaaa kwraa akɛ wɔbaamu sane naa bɔ ni ejaaa.

Ha wɔsusu yiŋtoi ahewɔ ni mɛi komɛi susuɔ akɛ Nyɔŋmɔ yitsoŋ wa lɛ ateŋ enyɔ ahe wɔkwɛ; no mɛi ji adebɔɔ naa osharai ni wɔnaa ŋmɛnɛ lɛ, kɛ Biblia mli amaniɛbɔi ni kɔɔ bɔ ni Nyɔŋmɔ gbala mɛi komɛi atoi lɛ ahe lɛ. Ani anɔkwalei ni yɔɔ lɛ tsɔɔ lɛɛlɛŋ akɛ Nyɔŋmɔ yitsoŋ wa?