Kpɔmɔ Ebɛŋkɛ Kɛha Mɛi Ni Jieɔ Nyɔŋmɔ Jamɔ Hetuu-Kɛhamɔ Kpo Lɛ
“Yehowa le bɔ ni efeɔ ejieɔ mɛi ni jieɔ Nyɔŋmɔ jamɔ hetuu-kɛhamɔ kpo lɛ yɛ kaa mli, kɛ bɔ ni efeɔ etoɔ mɛi fɔji ehaa kojomɔ gbi lɛ koni akpata amɛhiɛ.”—2 PETRO 2:9 New World Translation.
1. (a) Mɛɛ amanehulu shihilɛ adesai kɛkpeɔ yɛ wɔgbii nɛɛ amli? (b) Yɛ enɛ hewɔ lɛ, mɛɛ sanebimɔi wɔbaasusu he?
SHIHILƐ mli naagbai miiya hiɛ kɛha adesai fɛɛ. Enɛ ji anɔkwale kɛji akɛ heloo naa nii babaoo yɛ he ni mɔ ko yɔɔ lɛ aloo fioo yɔɔ jɛmɛ. Shweshweeshwe shihilɛ bɛ he ko he ko. Oookɛɛ shika helɛtemɔ mli naagbai ni haoɔ mɛi lɛ faaa hewɔ lɛ, kɔɔyɔɔ mli mujiwoo mli naagbai miitutua Shikpɔŋ lɛ, ni eewo wala ni yɔɔ nɔ lɛ fɛɛ he gbeyei. Helai egbɛ eshwa. Tsɛŋemɔ helai, tsui helai, kɛ heloo mli fala kpataa mɛi babaoo hiɛ. Jeŋba shara eye adesai ahenumɔ kɛ weku shihilɛ fɛɛ awui waa diɛŋtsɛ. Yɛ enɛɛmɛi fɛɛ sɛɛ lɛ, awuiyeli eyi je lɛ obɔ. Yɛ shihilɛ ni ka adesai aweku lɛ hiɛ nɛɛ hewɔ lɛ, wɔbaanyɛ wɔbi yɛ gbɛ ni ja nɔ akɛ: Ani yiŋtoo kpakpa ko yɛ ni wɔɔnyɛ wɔdamɔ nɔ wɔkpa kpɔmɔ gbɛ mra? Kɛji nakai ni lɛ, mɛɛ gbɛ nɔ eeetsɔ eba, ni kɛha namɛi?—Okɛto Habakuk 1:2; 2:1-3 he.
2, 3. (a) Mɛni hewɔ nɔ ni aŋma yɛ 2 Petro 2:9 lɛ woɔ wɔ hewalɛ waa ŋmɛnɛ? (b) Mɛɛ yiwalaheremɔ nifeemɔi Biblia lɛ tsɔɔ akɛ nɔdaamɔ nɔ ni woɔ wɔ ekaa?
2 Nɔ ni yaa nɔ yɛ wɔgbii nɛɛ amli lɛ kaiɔ wɔ adesai ayinɔsane mli bei krokomɛi ni he bahia lɛ. Bɔfo Petro gbalaa jwɛŋmɔ kɛyaa yiwalaheremɔ nifeemɔi ni Nyɔŋmɔ fee yɛ nakai bei lɛ amli lɛ anɔ ni emu sane naa kɛ nɔmimaa yɛ nɛkɛ gbɛ nɔ: “Yehowa le bɔ ni efeɔ ejieɔ mɛi ni jieɔ Nyɔŋmɔ jamɔ hetuu-kɛhamɔ kpo lɛ yɛ kaa mli.” (2 Petro 2:9, New World Translation) Kadimɔ nakai sane lɛ mli wiemɔi lɛ, ni yɔɔ 2 Petro 2:4-10 lɛ:
3 “Ejaakɛ kɛ Nyɔŋmɔ eŋɔɔɔ bɔfoi ni fee esha lɛ ahe ekeee amɛ, shi moŋ ekɛ duŋ kpii kpai fimɔ amɛ ewo gbohiiaje bu lɛ mli, ni eŋɔ amɛ eha akɛ akɛ amɛ ato aha kojomɔ,—ni asaŋ eŋɔɔɔ blema je lɛ he ekeee lɛ, shi moŋ Noa ni ji jalɛ shiɛlɔ lɛ, mɔ ni gbe yi fee mɛi kpaanyɔ lɛ kɛkɛ yi ebaa, ni ekɛ nu afua ba mɛi ni kwa Nyɔŋmɔ lɛ aje lɛ nɔ lɛ,—ni Sodoma kɛ Gomora maji lɛ hu esha ni eha amɛtsɔ lamulu, ni ekɛ butumɔ kojo amɛ ekɛto mɛi ni baakwa Nyɔŋmɔ lɛ okadi, ni ejie Lot, jalɔ lɛ, mɔ ni hao yɛ nɔtɔlɔi lɛ anyenyeŋtswibɔɔ jeŋba lɛ he lɛ, yɛ mli: (ejaakɛ amɛ mlatɔmɔ nitsumɔi lɛ ni jalɔ lɛ na ni enu, beni eyɔɔ amɛteŋ lɛ piŋ esusuma ni ja lɛ daa nɛɛ:) belɛ Nuŋtsɔ lɛ [Yehowa] le bɔ ni efeɔ ejieɔ jalɔi [mɛi ni jieɔ Nyɔŋmɔ jamɔ hetuu-kɛhamɔ kpo lɛ] yɛ kaa mli, kɛ bɔ ni efeɔ etoɔ mɛi fɔji yɛ piŋmɔ kɛyashi kojomɔ gbi lɛ nɔ; shi titri lɛ mɛi ni nyiɛɔ heloo sɛɛ yɛ hebulemɔ akɔnɔ mli, ni amɛgbeɔ nɔyeli he guɔ lɛ.” Taakɛ nakai ŋmalɛi lɛ tsɔɔ lɛ, nibii ni tee nɔ yɛ Noa gbii lɛ amli kɛ Lot be lɛ mli lɛ yɛ shishinumɔ babaoo kɛha wɔ.
Mumɔ Loo Su ni Yɔɔ Noa Gbii lɛ Amli
4. Mɛni hewɔ Nyɔŋmɔ kɛɛ akɛ shikpɔŋ lɛ efite yɛ Noa gbii lɛ amli lɛ. (Lala 11:5)
4 Yinɔsane mli amaniɛbɔɔ ni yɔɔ 1 Mose yitso 6 lɛ gbaa wɔ akɛ shikpɔŋ lɛ nɔ bafite kwraa yɛ Noa gbii lɛ amli yɛ Nyɔŋmɔ hiɛ. Mɛni hewɔ? Yɛ awuiyeli hewɔ. Jeee akɛ ebalɛ nakai yɛ yiwalɛ awuiyelii komekomei ni ba lɛ ahewɔ. 1 Mose 6:11 bɔɔ amaniɛ akɛ “ni awo shikpɔŋ lɛ obɔ kɛ yiwalɛ.”
5. (a) Mɛɛ subaŋ ni adesai jie lɛ kpo fata he ni yiwalɛ lɛ tee nɔ yɛ Noa gbii lɛ amli lɛ? (b) Mɛni Henok bɔ kɔkɔ yɛ he yɛ Nyɔŋmɔ gbeyeishemɔ ni bɛ lɛ he?
5 Mɛni ji nɔ ni hɔ sɛɛ? Ŋmalɛ ni wɔtsɛ yisɛɛ yɛ yiteŋgbɛ yɛ 2 Petro lɛ wieɔ mɛi ni ekwa Nyɔŋmɔ lɛ ahe. Hɛɛ, Nyɔŋmɔ jamɔ kwamɔ mumɔ ji nɔ ni kudɔɔ adesai anifeemɔi fɛɛ. Nɔ ni fata enɛ he lɛ jeee bulɛ ni abɛ kɛha ŋwɛi mla kɛkɛ shi moŋ su ni tsɔɔ Nyɔŋmɔ diɛŋtsɛ hiɛ atuatsemɔ hu.a Ni kɛji akɛ adesai tse Nyɔŋmɔ hiɛ atua lɛ, te aaafee tɛŋŋ ni aaakpa gbɛ akɛ amɛkɛ amɛnanemɛi adesai aaaye yɛ mlihilɛ gbɛ nɔ hu? Dani afɔ Noa lɛ, no mli lɛ nɛkɛ Nyɔŋmɔ gbeyeishemɔ ni bɛ nɛɛ egbɛ eshwa he fɛɛ he momo hewɔ lɛ, Yehowa ha Henok gba yɛ nɔ ni baajɛ mli aba lɛ he. (Yuda 14, 15) Eka shi faŋŋ akɛ Nyɔŋmɔ hiɛ atuatsemɔ lɛ baaha atsu ŋwɛi kojomɔ he nii ashi amɛ.
6, 7. Mɛɛ shihilɛ ko ni bɔfoi ahe yɔɔ mli ji nɔ titri ni kɛ shihilɛ fɔŋ ni nyiɛ Nu Afua lɛ hiɛ lɛ ba?
6 Hewalɛ kroko hu yɛ ni fata he ni ha yiwalɛ lɛ tee nɔ yɛ nakai gbii lɛ amli. 1 Mose 6:1, 2 gbalaa wɔjwɛmɔ kɛyaa nɔ yɛ be mli ni ekɛɛ akɛ: “Ni eba mli akɛ beni gbɔmɛi bɔi fɛomɔ yɛ shikpɔŋ lɛ nɔ lɛ, ni afɔfɔɔ biyei aha amɛ lɛ, Nyɔŋmɔ bihii lɛ yana akɛ gbɔmɛi abiyei lɛ ahe yɛ fɛo, ni amɛwɛwɛɛ amɛteaŋ yei fɛɛ ni amɛsumɔɔ.” Namɛi ji nakai anɔkwa Nyɔŋmɔ lɛ bihii lɛ? Jeee adesai foji kɛkɛ ji amɛ. Afii ohai abɔ ni eho lɛ amli fɛɛ lɛ hii lɛ kwɛɔ yei ni he yɔɔ fɛo lɛ ni amɛkɛ amɛ hiɔ shi. Nɛkɛ Nyɔŋmɔ bii nɛɛ ji bɔfoi ni tsake amɛhe amɛtsɔmɔ gbɔmɛi. Atsɔɔ bɔ ni amɛji lɛ mli yɛ Yuda 6 akɛ “ŋwɛibɔfoi . . . ni ehiɛɛɛ amɛ diɛŋtsɛ amɛ nukpayeli lɛ mli, shi moŋ amɛshi amɛ diɛŋtsɛ amɛshihilɛ lɛ.”—Okɛto 1 Petro 3:19, 20 he.
7 Beni nɛkɛ bɔɔnii ni nɔ kwɔlɔ fe adesai ni etsɔmɔ amɛhe hii nɛɛ kɛ gbɔmɛi abiyei lɛ na bɔlɛ lɛ, mɛni jɛ mli ba? “No gbii lɛ amli lɛ, oblaŋi agboi lɛ yɛ shikpɔŋ lɛ nɔ ni no sɛɛ hu, beni Nyɔŋmɔ bihii lɛ tee gbɔmɛi abiyei lɛ aŋɔɔ, ni amɛkɛ amɛ fɔfɔɔ bii lɛ, amɛ nɔŋŋ amɛji kakalɔi ni yɔɔ gbɛi kɛjɛ blema beebe.” Hɛɛ, bii ni afɔ kɛjɛ nɛkɛ wekukpaa ni yeee egbɔ nɛɛ mli lɛ ji oblaŋi, asaabui ni kɛ amɛhewalɛ lɛ tsu nii ni amɛkɛye mɛi krokomɛi awui.—1 Mose 6:4.
8. Mɛni Yehowa fee yɛ shihilɛ fɔŋ ni tee nɔ yɛ shikpɔŋ lɛ nɔ lɛ he?
8 Nɛgbɛ shihilɛ lɛ tee nɔ efite kɛyashɛ? Eyashɛ he ni agbɛnɛ “Yehowa na akɛ gbɔmɛi anɔfɔŋfeemɔ fa yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ eji daa nɛɛ.” Te Yehowa nu enɛ he eha tɛŋŋ? “Kɛkɛ ni Yehowa shwa ehe akɛ efee gbɔmɔ yɛ shikpɔŋ lɛ nɔ, ni edɔ lɛ yɛ etsui mli.” Enɛ etsɔɔɔ akɛ Nyɔŋmɔ nu he akɛ etɔ̃ yɛ gbɔmɔ ni ebɔ lɛ hewɔ. Shi moŋ, edɔ lɛ waa akɛ yɛ be mli ni ebɔ adesai sɛɛ lɛ, efɔŋfeemɔ ebayi amɛjeŋba mli obɔ ni no hewɔ lɛ esa akɛ ekpata amɛhiɛ.—1 Mose 6:5-7.
Nifeemɔ Gbɛ ni kɛ Yiwalaheremɔ Ba
9. (a) Mɛni hewɔ Yehowa kɛ Noa ye yɛ gbɛ kpakpa nɔ lɛ? (b) Mɛɛ adafitswaa Nyɔŋmɔ tsɔ hiɛ ekɛha Noa?
9 Shi “Noa hiɛ ba nyam yɛ Yehowa hiɛ. . . . Noa ji jalɔ, ni eye emuu yɛ eyinɔbii lɛ ateŋ; ni Noa kɛ Nyɔŋmɔ nyiɛ.” (1 Mose 6:8, 9) No hewɔ lɛ Yehowa tsɔ hiɛ etswa Noa adafi akɛ E-kɛ jeŋ muu fɛɛ nu afua ko baaba ni efa lɛ koni ekpɛ adeka. Abaakpata adesai fɛɛ ahiɛ kɛjɛ shikpɔŋ lɛ nɔ ja Noa kɛ eweku lɛ pɛ. Abaakpata kooloi ni abɔ lɛ po ahiɛ, ja amɛmli fioo ko ni ji sui sɔrɔtoi lɛ fɛɛ ni Noa baabua amɛnaa ewo adeka lɛ mli lɛ pɛ.—1 Mose 6:13, 14, 17.
10. (a) Mɛɛ hesaamɔ esa akɛ afee kɛha yibaamɔ, ni te nitsumɔ lɛ dalɛ yɔɔ tɛŋŋ? (b) Mɛni sa kadimɔ yɛ bɔ ni Noa tsu nitsumɔ ni akɛwo edɛŋ lɛ he?
10 Nɛkɛ nii ni Noa tsɔ hiɛ ele nɛɛ kɛ gbɛnaa nii kpele ko bafɔ enɔ. Esa akɛ akpɛ adeka lɛ. Esa akɛ akpɛ lɛ adeka agbo, ni ekɛlɛ, elɛɛmɔ, kɛ ekwɔlɛ fɛɛ ashɛ aaafee ninetalɔi 1,400,000. Esa akɛ Noa kɛ niyenii babaoo awo mli obɔ koni yɛ no sɛɛ lɛ ebua kooloi lɛ kɛ loofɔji lɛ anaa ewo mli, “heloo fɛɛ mli sɔrɔtoi fɛɛ” kɛha yibaamɔ. Eji nitsumɔ ko ni baahe afii babaoo. Mɛni Noa fee yɛ enɛ he? “Ni Noa fee nakai; bɔ ni Nyɔŋmɔ fa lɛ lɛ, nakai pɛpɛɛpɛ efee.”—1 Mose 6:14-16, 19-22; Hebribii 11:7.
11. Mɛɛ gbɛnaa nii ni he hiaa ka Noa nɔ yɛ eweku lɛ he?
11 Yɛ be mli ni etsuɔ nakai nitsumɔ lɛ, esa akɛ Noa ato be hu koni ekɛtswa eweku lɛ ema shi yɛ mumɔŋ. Ehe miihia ni ebu amɛhe koni amɛkakɔ yiwalɛ gbɛi lɛ kɛ atuatsemɔ su loo mumɔ ni gbɔmɛi ni ebɔle amɛ lɛ ekɔ lɛ. Ehe miihia hu ni amɛkaha daa gbi shihilɛ mli nibii lɛ miihe amɛbe babaoo. Nyɔŋmɔ yɛ nitsumɔ kɛha amɛ ni amɛbaatsu, ni ehe miihia ni amɛtswa amɛshihilɛ amɛbɔle enɛ he. Wɔle akɛ Noa weku lɛ kpɛlɛ efamɔi anɔ ni amɛna ehemɔkɛyeli lɛ eko, ejaakɛ awieɔ Noa, eŋa, amɛbihii etɛ lɛ, kɛ bihii lɛ aŋamɛi lɛ—mɛi kpaanyɔ lɛ—ahe kɛ nɔkpɛlɛmɔ yɛ Ŋmalɛi lɛ amli.—1 Mose 6:18; 1 Petro 3:20.
12. Taakɛ atsɔɔ mli yɛ 2 Petro 2:5, mɛɛ gbɛnaa nii Noa tsu he nii yɛ anɔkwayeli mli?
12 Gbɛnaa nii kroko hu ka Noa nɔ—ni ebɔ Nu Afua ni baa lɛ he kɔkɔ ni etsɔɔ nɔ hewɔ ni ebaa lɛ hu. Anaa faŋŋ akɛ etsu nɛkɛ gbɛnaa nii nɛɛ he nii yɛ anɔkwayeli mli, ejaakɛ atsiɔ eta yɛ Nyɔŋmɔ Wiemɔ lɛ mli akɛ “jalɛ shiɛlɔ.”—2 Petro 2:5.
13. Mɛɛ shihilɛi Noa kɛkpe yɛ be mli ni etsuɔ nitsumɔ ni Nyɔŋmɔ kɛwo edɛŋ lɛ he nii?
13 Agbɛnɛ belɛ susumɔ shihilɛ mli ni Noa tsu nakai nitsumɔ ni akɛwo edɛŋ lɛ he nii yɛ mli lɛ he okwɛ. Okɛ ohe awo eshihilɛ lɛ mli okwɛ. Kɛji akɛ bo ji Noa loo oji eweku lɛ mli nyo lɛ, nɔ ni baabɔle ohe fɛɛ ji yiwalɛ ni Nefilim loo oblaŋi lɛ kɛ mɛi ni bɛ Nyɔŋmɔ gbeyeishemɔ lɛ kɛba lɛ. Kulɛ okɛ hewalɛ ni bɔfoi atuatselɔi lɛ naa yɛ mɛi anɔ lɛ baakpe hiɛ kɛ hiɛ. Yɛ be mli ni otsuɔ adeka lɛ he nii lɛ, kulɛ abaaye ohe fɛo. Ni afi fɛɛ afi mli ni obɔɔ Nu Afu ni baa lɛ he kɔkɔ lɛ, obaana akɛ daa gbi shihilɛ mli nibii ehe gbɔmɛi lɛ ajwɛŋmɔi fɛɛ akɛ “amɛhiɛ bɛ amɛhe nɔ”—ni ji, “kɛyashi nu afua lɛ baloo amɛ fɛɛ kɛtee lɛ.”—Mateo 24:39; Luka 17:26, 27.
Mɛni Noa Niiashikpamɔ lɛ Tsɔɔ Kɛhaa Bo?
14. Mɛni hewɔ ewaaa kɛhaaa wɔ akɛ wɔɔnu shihilɛi ni Noa kɛ eweku lɛ kɛkpe lɛ shishi ŋmɛnɛ lɛ?
14 Ewaaa kwraa kɛha wɔkanelɔi lɛ ateŋ mɛi babaoo akɛ amɛaasusu shihilɛ ni tamɔ nɛkɛ he. Mɛni hewɔ? Ejaakɛ shihilɛ ni yaa nɔ yɛ wɔgbii nɛɛ amli lɛ tamɔ nɔ ni tee nɔ yɛ Noa gbii lɛ amli lɛ nɔŋŋ. Yesu Kristo kɛɛ akɛ esa akɛ akpa enɛ gbɛ. Yesu gba yɛ egbalɛ kpeteŋkpele ni kɔɔ ba ni eba lɛ he yɛ nibii agbɛjianɔtoo nɛɛ naagbee be nɛɛ mli lɛ mli akɛ: “Shi bɔ ni Noa gbii lɛ fee lɛ, nakai gbɔmɔ Bi lɛ baa lɛ hu baatamɔ.”—Mateo 24:37.
15, 16. (a) Mɛɛ gbɛ nɔ eji anɔkwale akɛ, shikpɔŋ lɛ nɔ eyi obɔ kɛ yiwalɛ taakɛ eji yɛ Noa gbii lɛ amli? (b) Mɛɛ yiwaa titri akɛba Yehowa Odasefoi anɔ?
15 Ani eba mli nakai? Ani ŋmɛnɛ je lɛ eyi obɔ kɛ yiwalɛ? Hɛɛ! Gbɔmɛi fe akpekpei oha egboi yɛ tai amli yɛ nɛkɛ afii oha nɛɛ mli. Wɔkanelɔi lɛ ateŋ mɛi komɛi yɛ ni nɔ ni jɛ mli ba lɛ sa amɛhe yɛ gbɛ pɔtɛɛ nɔ. Ni mɛi babaoo po ji mɛi ni awuiyelɔi ewo amɛhe gbeyei akɛni amɛbɔ mɔdɛŋ ni amɛhe amɛ shika loo jwetrii krokomɛi kɛjɛ amɛdɛŋ lɛ hewɔ. Ni gbekɛbii hu naa awuiyeli ni yaa nɔ yɛ skul lɛ hu.
16 Ni kɛlɛ, Yehowa sɔɔlɔi naa niiashikpamɔi ni mli wawai fe piŋmɔi ni tai kɛ yiwalɛ mli awuiyelii kɛbaa lɛ kɛkɛ. Amɛ hu amɛbajeɔ yiwaa shishi ejaakɛ amɛjeee je lɛ fa shi moŋ amɛbɔɔ mɔdɛŋ ni amɛhi shi akɛ mɛi ni jieɔ Nyɔŋmɔ jamɔ hetuu-kɛhamɔ kpo. (2 Timoteo 3:10-12) Bei komɛi lɛ yiwaa nɛɛ baa akɛ yisɛɛtsirɛmɔ loo magbalamɔi; yɛ bei krokomɛi amli lɛ nɔ ni fata he hu ji amɛ nibii ahiɛkpatamɔ, yii ni naa wa, kɛ gbele tete po.—Mateo 24:9.
17. Ani Nyɔŋmɔ gbeyeishemɔ ni bɛ efa ŋmɛnɛ? Tsɔɔmɔ mli.
17 Yɛ be mli ni mɛi ni bɛ Nyɔŋmɔ gbeyeishemɔ nɛɛ kɛ amɛhe woɔ nɛkɛ yiwalɛ nifeemɔi nɛɛ amli lɛ, yɛ bei komɛi amli lɛ amɛtsɔɔ bɔ ni amɛgbeɔ Nyɔŋmɔ he guɔ kwraa amɛhaa lɛ yɛ faŋŋ. Yɛ maŋ ko mli yɛ Afrika lɛ, polisifonyo ko kɛɛ akɛ: “Nɔyeli lɛ, wɔnɔŋ. Kɛ Nyɔŋmɔ ko yɛ lɛ, nyɛyaa eŋɔɔ ni nyɛyakɛa lɛ koni ebawa nyɛ.” Yɛ gboklɛfoi atsui amli kɛ ŋsraiaŋ lɛ, Yehowa Odasefoi kɛ mɛi kpeɔ, tamɔ Baranowsky, yɛ Sachsenhausen, yɛ Germany, ni ye amɛhe fɛo akɛ: “Mite shi akɛ mikɛ Yehowa baawuu. Wɔbaakwɛ mɔ ni he wa, kɛ mi jio, Yehowa jio.” Yɛ no sɛɛ etsɛɛɛ lɛ, hela bamɔ Baranowsky ni egbo; shi mɛi komɛi tee nɔ lolo amɛjie su ni tamɔ nɛkɛ kpo. Maŋ onukpai ni kɛ amɛhe woɔ yiwaa he tafaa mli lɛ jeee mɛi pɛ ni jieɔ Nyɔŋmɔ hiɛ atuatsemɔ kpo. Yɛ je lɛŋ he fɛɛ he lɛ, Nyɔŋmɔ sɔɔlɔi nuɔ wiemɔi ni amɛnaa nifeemɔi ni yeɔ odase akɛ mɛi ni kɛ amɛhe woɔ mli lɛ bɛ Nyɔŋmɔ gbeyeishemɔ ko kwraa yɛ amɛtsuii amli.
18. Yɛ mɛɛ gbɛ nɔ mumɔi fɔji eha adesai efee yeyeeye ŋmɛnɛ?
18 Yɛ nɛkɛ gbii ni tamɔ Noa gbii lɛ pɛpɛɛpɛ nɛɛ amli lɛ, wɔ hu wɔyeɔ nibii ni mumɔi fɔji feɔ ŋmɛnɛ lɛ he odase. (Kpojiemɔ 12:7-9) Nɛkɛ daimonioi nɛɛ ji nakai bɔfoi lɛ nɔŋŋ ni tsake amɛhe amɛtsɔmɔ adesai ni amɛkɛ yei bote gbalashihilɛ mli yɛ Noa gbii lɛ amli lɛ. Beni Nu Afua lɛ ba lɛ, akpata amɛŋamɛi kɛ amɛbii lɛ ahiɛ, shi anyɛ nakai bɔfoi atuatselɔi lɛ anɔ kɛtee mumɔi ashihilɛ he lɛ ekoŋŋ. Amɛnaaa gbɛhe yɛ Yehowa gbɛjianɔtoo krɔŋkrɔŋ lɛ mli dɔŋŋ shi moŋ atsi amɛnaa awo Tartarus, ni ji duŋ kpii shihilɛ ko mli, ni amɛnaaa ŋwɛi kpɛmɔ ko kwraa dɔŋŋ. (2 Petro 2:4, 5) Akɛni amɛtsuɔ nii yɛ Satan gbɛtsɔɔmɔ shishi hewɔ lɛ, amɛtee nɔ amɛkɛ adesai ena sharamɔ, ni eyɛ mli akɛ amɛnyɛɛɛ amɛtsake amɛhe dɔŋŋ moŋ, shi amɛbɔɔ mɔdɛŋ ni amɛkudɔɔ hii, yei kɛ gbekɛbii fɛɛ. Amɛfeɔ enɛɛmɛi ekomɛi kɛtsɔɔ mumɔi atsɛmɔ nifeemɔi anɔ. Amɛtsirɛɔ gbɔmɛi adesai hu koni amɛgbegbee amɛhe yɛ gbɛi ni kɛ adesai ajwɛŋmɔ kpaaa gbee nɔ. Shi jeee fɛɛ nɛ.
19. (a) Namɛi ji mɛi titri ni daimonioi lɛ etsɔ amɛhiɛ amɛwo amɛ ni amɛnyɛɔ amɛ? (b) Mɛni ji nɔ ni daimonioi lɛ bɔɔ mɔdɛŋ ni amɛnyɛ wɔnɔ ni wɔfee?
19 Biblia lɛ jieɔ lɛ kpo faŋŋ akɛ daimonioi lɛ kɛ mɛi ni “yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ” miiwuu ta. (Kpojiemɔ 12:12, 17) Nakai bɔfoi yiwalɔi lɛ ji mɛi titrii ni teɔ yiwaa ni akɛbaa Yehowa tsuji anɔ lɛ shi. (Efesobii 6:10-13) Amɛkɛ gbɛi fɛɛ ni amɛaanyɛ lɛ tsuɔ nii koni amɛkɛlaka adesai anɔkwafoi lɛ ni amɛŋmɛɛ amɛ emuuyeli mli ni amɛhiɛ amɛha Yahowa lɛ he ni amɛkpa Yehowa Maŋtsɛyeli ni Yesu yeɔ nɔ akɛ Mesia Maŋtsɛ lɛ jajemɔ.
20. Mɛɛ gbɛ nɔ daimonioi lɛ tsɔɔ amɛbɔɔ mɔdɛŋ ni amɛtsi mɛi ni taoɔ amɛje amɛhewalɛ shishi lɛ anaa yɛ? (Yakobo 4:7)
20 Daimonioi lɛ bɔɔ mɔdɛŋ ni amɛtsi mɛi ni taoɔ heyeli kɛmiijɛ amɛ yiwalɛ nɔyeli shishi lɛ anaa. Yoo ko ni jɛ Brazil ni tsutsu lɛ ekɛ mumɔi fɔji tsuɔ nii lɛ bɔ amaniɛ akɛ beni Yehowa Odasefoi ba eshia lɛ, daimonioi agbee fa lɛ ni ekagbale eshinaa lɛ; shi egbele, ni ekase anɔkwale lɛ. Yɛ hei babaoo lɛ, daimonioi lɛ kɛ ayɛi tsuɔ nii koni amɛbɔ mɔdɛŋ ni amɛtsi Yehowa Odasefoi lɛ anitsumɔ naa. Akɛ nɔkwɛmɔ nɔ lɛ, yɛ akrowa ko ni yɔɔ Suriname lɛ mli lɛ, mɛi ni teɔ shi woɔ Yehowa Odasefoi lɛ yana mumɔi atsɛlɔ ko ni ale lɛ jogbaŋŋ akɛ egbeɔ mɛi amrɔ nɔŋŋ ni ekɛ edɛhiɛmɔ tso ni efee ashwai ewo mli lɛ aaatsɔɔ mɔ hiɛ lɛ, koni ebagbe amɛ. Nɛkɛ mumɔi atsɛlɔ nɛɛ ba kɛ ejooshwɛlɔi, yɛ be mli ni lɛ diɛŋtsɛ lɛ mumɔ fɔŋ ko eyi nɔ, koni ekɛ Yehowa Odasefoi lɛ abakpe. Epai eshwaifeemɔ wiemɔi lɛ kɛkɛ ni ekɛ etso lɛ tsɔɔ amɛhiɛ. Akrowa lɛ mlibii lɛ miikpa gbɛ akɛ Odasefoi lɛ baashwie shi ni amɛgboi, shi mumɔi atsɛlɔ lɛ moŋ hiɛ di lɛ ni egbee shi ni esɛɛfilɔi ni hiɛ egboi kpɔtɔɔ lɛ wo lɛ kɛjo foi kɛtee.
21. Taakɛ eji yɛ Noa gbii lɛ amli lɛ, mɛi babaoo hereɔ wɔ shiɛmɔ nitsumɔ lɛ nɔ yɛ mɛɛ gbɛ nɔ, ni mɛni hewɔ?
21 Yɛ hei ni ayɛkpɛmɔ jeee nɔ ni afeɔ lɛ yɛ faŋŋ mli po lɛ, Yehowa Odasefoi lɛ ateŋ mɔ fɛɛ mɔ kɛ bɔ ni eji nɔ ni wa akɛ aaashiɛ aha gbɔmɛi ni shihilɛ mli nibii ahe naagbamɔ ehe amɛ kwraa akɛ amɛsumɔɔɔ ni amɛboɔ toi lɛ ekpe da. Taakɛ eji yɛ Noa gbii lɛ amli lɛ, mɛi babaoo ji ‘mɛi ni hiɛ bɛ amɛhe nɔ.’ (Mateo 24:37-39) Mɛi komɛi ahiɛ baanyɛ asɔ wɔ ekomefeemɔ kɛ wɔ nɔyaa lɛ. Shi wɔ mumɔŋ tsutswaa nitsumɔ—ni mɔ diɛŋtsɛ teemɔŋ nikasemɔ kɛ ŋmɛlɛtswai babaoo, kpeeiyaa daa gbi, kɛ shiɛmɔ nitsumɔ lɛ fata he lɛ—ji kwashiai asane kɛha amɛ. Amɛyeɔ hiɛnɔkamɔ ni wɔyɔɔ yɛ Nyɔŋmɔ Wiemɔ lɛ mli shiwoi amli lɛ he fɛo ejaakɛ amɛshihilɛ fɛɛ damɔ heloo naa nibii kɛ miishɛɛ ni amɛnaa kɛjɛɔ bɔlɛnamɔ mli akɔnɔi amli amrɔ nɛɛ lɛ anɔ.
22, 23. Yɛ mɛɛ gbɛ nɔ nibii ni ba yɛ Noa gbii lɛ amli lɛ kɛ nɔmimaa haa akɛ Yehowa baahere mɛi ni jieɔ Nyɔŋmɔ jamɔ hetuu-kɛhamɔ kpo lɛ ayiwala kɛjɛ kaa mli?
22 Ani nɛkɛ gbɔmɛi ni bɛ suɔmɔ ko kɛha Nyɔŋmɔ nɛɛ baaya nɔ amɛwa Yehowa sɔɔlɔi anɔkwafoi lɛ ayi daa nɛɛ? Dabida! Mɛni ba yɛ Noa gbii lɛ amli? Yɛ Nyɔŋmɔ gbɛtsɔɔmɔ naa lɛ, Noa kɛ eweku lɛ bote adeka ni agbe naa lɛ mli. Kɛkɛ ni yɛ be ni ajɛ ŋwɛi ato lɛ naa lɛ, “bu wulu kwɔŋkwɔŋ lɛ hiŋmɛii fɛɛ fɛlɛ, ni agbele ŋwɛi samfɛji lɛ.” Nu Afua lɛ tee nɔ aahu kɛyashi eha gɔji lɛ po tete nɔ. (1 Mose 7:11, 17-20) Anyɛ bɔfoi ni ekwa amɛshihilɛ he lɛ anɔ ni amɛŋmɛɛ amɛ adesai agbɔmɔtsei lɛ ahe ni amɛku amɛsɛɛ kɛtee mumɔi ashihilɛ he lɛ. Akpata oblaŋi lɛ kɛ mɛi fɛɛ ni eshwɛ ni bɛ Nyɔŋmɔ gbeyeishemɔ, kɛ mɛi ni jeee amɛhe sane ko ni no hewɔ lɛ amɛtsuuu Noa kɔkɔbɔɔ lɛ he nii lɛ fɛɛ ahiɛ. Shi yɛ gbɛ kroko nɔ lɛ, ahere Noa kɛ eŋa kɛ amɛbihii etɛ lɛ kɛ amɛbihii lɛ aŋamɛi lɛ ayiwala. No hewɔ lɛ, Yehowa jie Noa kɛ eshiabii lɛ kɛjɛ kaa ni amɛkɛ anɔkwayeli edamɔ naa yɛ afi babaoo mli lɛ mli.
23 Ani Yehowa baafee nakai nɔŋŋ eha mɛi ni jieɔ Nyɔŋmɔ jamɔ hetuu-kɛhamɔ kpo ŋmɛnɛ lɛ hu? Ŋwanejee loo sanebimɔ ko kwraa bɛ enɛ he. Ewo shi nakai, ni enyɛŋ emale.—Tito 1:2; 2 Petro 3:5-7.
[Shishigbɛ niŋmai]
a “Anomia tsɔɔ bulɛ ni abɛ, loo Nyɔŋmɔ mla hiɛ atuatsemɔ; asebeia [ni ji wiemɔ ni atsɔɔ shishi akɛ ‘mɛi ni ekwa Nyɔŋmɔ’ lɛ] tsɔɔ nakai jeŋba lɛ nɔŋŋ ni ajieɔ kpo atsɔɔ Nyɔŋmɔ Diɛŋtsɛ.”—Vine’s Erpository Dictionary of Old and New Testament Words, Kpo 4, baafa 170.
Ani Okaiɔ?
◻ Mɛɛ gbɛ nɔ Petro tsɔɔ yɛ akɛ Yehowa le bɔ ni efeo ejieɔ mɛi ni jieɔ Nyɔŋmɔ jamɔ hetuu-kɛhamɔ kpo lɛ kɛjɛɔ kaa mli?
◻ Mɛɛ nibii fata he ni eha yiwalɛ Iɛ tee hiɛ yɛ Noa gbii lɛ amli Iɛ?
◻ Yɛ jeŋ muu fɛɛ Nu Afua ni baa Iɛ hewɔ lɛ, mɛɛ gbɛnaa nii baka Noa nɔ?
◻ Mɛɛ nibii ni tamɔ nɔ ni ba yɛ Noa gbii lɛ amli Iɛ wɔnaa yɛ wɔgbii nɛɛ amli?
[Mfoniri ni yɔɔ baafa 5]
Adeka lɛ kpɛɛ he afii babaoo ni eji nitsumɔ ni wa
[Mfoniri ni yɔɔ baafa 6]
Noa he be ni ekɛtsu eweku Iɛ mumɔŋ nɔyaa he nii