“Nuu kɛ Yoo Ebɔ Amɛ”
“Nyɔŋmɔ bɔ gbɔmɔ yɛ esubaŋ lɛ nɔ, Nyɔŋmɔ subaŋ lɛ nɔ ebɔ lɛ yɛ; nuu kɛ yoo ebɔ amɛ.”—1 MOSE 1:27.
1. Anɔkwale lɛ ji jɔɔmɔ kɛha Kristofoi hii kɛ yei yɛ mɛɛ gbɛ nɔ?
KWƐ bɔ ni eŋɔɔ hã, akɛ aaahi Yehowa webii ateŋ, ni akɛ hii kɛ yei, kɛ agbɛnɛ gbekɛbii hii kɛ yei, ni nɔ ni he hiaa amɛ fe fɛɛ yɛ shihilɛ mli ji ni amɛsumɔ ni amɛbo Nyɔŋmɔ toi lɛ aaabɔ! Anɔkwale lɛ hu haa wɔyeɔ wɔhe kɛjɛɔ subaŋi kɛ jeŋbai ni esaaa Yehowa Nyɔŋmɔ hiɛ lɛ ahe, ni etsɔɔ wɔ bɔ ni wɔɔfee wɔhi shi akɛ Kristofoi. (Yohane 8:32; Kolosebii 3:8-10) Akɛ nɔkwɛmɔ nɔ lɛ, gbɔmɛi ni yɔɔ he fɛɛ he lɛ yɛ kusumii loo susumɔi ni kɔɔ gbɛ ni esa akɛ hii ajie amɛ nuufeemɔ kpo, kɛ yei hu, amɛ yoofeemɔ kpo lɛ he. Ani no ji akɛ afɔ hii kɛ nuufeemɔ, ni yei hu kɛ yoofeemɔ kɛkɛ? Aloo nibii krokomɛi yɛ ni esa akɛ asusu he?
2. (a) Mɛni esa akɛ no atsɔɔ bɔ ni wɔsusuɔ nuufeemɔ kɛ yoofeemɔ he wɔhãa? (b) Mɛni eba bɔ ni asusuɔ hii kɛ yei ahe ahaa lɛ he?
2 Kɛha Kristofoi lɛ, Nyɔŋmɔ Wiemɔ lɛ ji hegbɛ ni esa akɛ wɔba wɔhe shi wɔha, ni nɔ ni wɔ diɛŋtsɛ wɔsumɔɔ, hiŋmɛigbelemɔ, loo kusumii ni wɔná lɛ kɔɔɔ he eko. (Mateo 15:1-9) Biblia lɛ etsɔɔɔ nibii fɛɛ ni kɔɔ nuufeemɔ kɛ yoofeemɔ he lɛ mli babaoo. Shi moŋ, eshiɔ gbɛ kɛhaa sɔrɔtofeemɔ, taakɛ wɔnaa yɛ hiŋmɛigbelemɔi sɔrɔtoi amli lɛ. Bɔni afee ni amɛtamɔ bɔ ni Nyɔŋmɔ bɔ amɛ akɛ amɛji lɛ, esa akɛ hii ahi shi akɛ hii, ni yei ahi shi akɛ yei. Mɛni hewɔ? Ejaakɛ, kɛfata nuu kɛ yoo ni abɔ amɛ akɛ amɛye amɛbua amɛhe yɛ gbɔmɔtsoŋ lɛ he lɛ, esa akɛ amɛye amɛbua amɛhe ni amɛye emuu kɛtsɔ nuufeemɔ kɛ yoofeemɔ sui anɔ. (1 Mose 2:18, 23, 24; Mateo 19:4, 5) Kɛlɛ, jwɛŋmɔi ni ahiɛ yɛ nuu kɛ yoo he lɛ etsɔ̃mɔ ni átsake hiɛ. Mɛi pii kɛ nuufeemɔ toɔ mɔ nɔ yeli dɛŋdɛŋ, keketeefeemɔ, loo hewalɛ henumɔ he. Yɛ maji komɛi anɔ lɛ, afɔɔɔ namɔ, aloo eyɛ hiɛgbele akɛ nuu aaafó yɛ mɛi ahiɛ loo yɛ teemɔŋ. Ni kɛlɛ, “Yesu fo” yɛ Lazaro gbonyo bu lɛ he yɛ mɛi pii ahiɛ. (Yohane 11:35) Enɛ jeee nɔ ko ni esaaa kɛha Yesu, mɔ ni enuufeemɔ yeɔ emuu lɛ. Ŋmɛnɛ, mɛi pii efee mɛi ni eŋmɛɛɛ pɛpɛɛpɛ yɛ yoofeemɔ he, amɛbuɔ enɛ ekɛ eji gbɔmɔtsoŋ hefɛo kɛ akɔnɔ ni gbalaa mɔ kɛkɛ.
Anɔkwa Nuufeemɔ kɛ Anɔkwa Yoofeemɔ
3. Esoro hii kɛ yei yɛ mɛɛ gbɛ nɔ?
3 Mɛni ji anɔkwa nuufeemɔ, ni mɛni ji anɔkwa yoofeemɔ? The World Book Encyclopedia lɛ kɛɔ akɛ: “Jeee akɛ esoro hii kɛ yei pii yɛ amɛ gbɔmɔtsei kɛ emli nibii ahe pɛ kɛkɛ, shi yɛ amɛ subaŋ kɛ nibii ni amɛnyãa he lɛ hu mli. Ajɛɔ bɔ ni abɔ amɛ aha, aloo amɛ wala shishijee he nikasemɔ mli ayɔseɔ sɔrɔtofeemɔi nɛɛ ekomɛi. . . . Shi etamɔ nɔ ni sɔrɔtofeemɔi pii, ni jeee gbɔmɔtso lɛ he nibii ahe nilee nɔ edamɔ lɛ, tamɔ nɔ ni edamɔ nɔ ni aŋkroaŋkro lɛ kaseɔ yɛ nuu loo yoo bɔɔ su he lɛ nɔ. Afɔ́ɔ gbɔmɛi akɛ hii loo yei, shi amɛkaseɔ nuufeemɔ loo yoofeemɔ.” Wɔbɔɔ su mli nibii nɛɛ baanyɛ afee nɔ ni tsɔɔ nibii pii amli, shi nuufeemɔ loo yoofeemɔ ni sa námɔ damɔ nɔ ni Nyɔŋmɔ taoɔ yɛ wɔdɛŋ lɛ ni wɔɔkase he nii, kɛ nɔ ni wɔhalaa akɛ wɔɔdi sɛɛ ni wɔtsu he nii yɛ shihilɛ mli lɛ nɔ.
4. Mɛni Biblia lɛ jieɔ lɛ kpo yɛ nuu kɛ yoo nitsumɔ he?
4 Biblia mli yinɔsane jieɔ lɛ kpo akɛ, Adam nitsumɔ ji ni enyiɛ hiɛ akɛ eŋa kɛ ebii lɛ ayitso. Ebaatsu Nyɔŋmɔ suɔmɔnaa nii akɛ ayi shikpɔŋ lɛ nɔ obɔ ni aye nɔ, ni shikpɔŋ nɔ bɔɔ nii ni baa shi lɛ fɛɛ abaje eshishi lɛ he nii. (1 Mose 1:28) Yoofeemɔ he nitsumɔ kɛha Hawa ji ‘yelikɛbualɔ,’ Adam ‘hefatalɔ ni sa,’ mɔ ni baa ehe shi ehaa eyitsoyeli, ni ekɛ lɛ feɔ ekome yɛ Nyɔŋmɔ yiŋtoo ni ejaje kɛha amɛ lɛ he nitsumɔ mli.—1 Mose 2:18; 1 Korintobii 11:3.
5. Mɛɛ gbɛ nɔ atsɔ afite wekukpaa ni kã nuu kɛ yoo teŋ lɛ?
5 Shi Adam tsuuu gbɛnaa nii ni kã enɔ lɛ he nii, ni Hawa kɛ eyoofeemɔ lɛ tsu nii yɛ yiŋtsɔmɔ gbɛ nɔ, ni ekɛkɔne Adam yiŋ koni ebafata ehe ni amɛgbo Nyɔŋmɔ nɔ toi. (1 Mose 3:6) Akɛni eŋmɛ gbɛ ni lɛ diɛŋtsɛ efee nɔ ni ele akɛ ejaaa hewɔ lɛ, Adam ejieee anɔkwa nuufeemɔ kpo. Ekɛ gbɔjɔmɔ hala akɛ ebaanyiɛ ehefatalɔ ni alaka lɛ lɛ wiemɔ sɛɛ moŋ fe nɔ ni e-Tsɛ kɛ Bɔlɔ lɛ ekɛɛ lɛ lɛ. (1 Mose 2:16, 17) Etsɛɛɛ ni klɛŋklɛŋ gbalashihilɛ mli hefatalɔi enyɔ lɛ bɔ̃i nɔ ni Nyɔŋmɔ etsɔ hiɛ ena akɛ ebaaba amɛnɔ yɛ amɛ toigbele hewɔ lɛ namɔ. Agbɛnɛ Adam, ni kɛ miishɛɛ babaoo tsɔɔ bɔ ni eŋa lɛ ji yɛ lalafoo wiemɔ mli lɛ wie ehe yɛ gbɛ ni miishɛɛ bɛ mli nɔ akɛ, ‘yoo lɛ ni okɛ lɛ baha mi lɛ.’ Akɛni emuu ni eyeɔ lɛ efite ni etsɔ̃ afã agbɛnɛ hewɔ lɛ, nɔ ni jɛ enuufeemɔ lɛ mli ba ji ‘eŋa lɛ nɔ ni eye.’ Hawa hu ‘baatao’ ewu lɛ ‘sɛɛ gbɛ,’ ekolɛ yɛ gbɛ ni fa tsɔ̃ loo eŋmɛɛɛ pɛpɛɛpɛ nɔ.—1 Mose 3:12, 16.
6, 7. (a) Mɛɛ nuufeemɔ fitemɔ je shishi dani Nu Afua lɛ ba? (b) Mɛni wɔbaanyɛ wɔkase kɛjɛ shihilɛ ni tsɔ Nu Afua lɛ hiɛ lɛ mli?
6 Nuufeemɔ kɛ yoofeemɔ ni akɛtsu nii yɛ gbɛ ni ejaaa nɔ lɛ baje kpo faŋŋ dani Nu Afua lɛ ba. Ŋwɛibɔfoi ni shi amɛ klɛŋklɛŋ gbɛhe ni yɔɔ ŋwɛi lɛ tsɔmɔ amɛhe adesai ni yɔɔ gbɔmɔtsei, bɔni afee ni amɛkɛ yei abaná bɔlɛ. (1 Mose 6:1, 2) Nɔ ni áŋma afɔ̃ shi lɛ tsiɔ tã akɛ, hii pɛ afɔ kɛjɛ nakai bɔlɛnamɔ ni jeee adebɔɔ naa nɔ̃ lɛ mli. Ni etamɔ nɔ ni amɛbii lɛ jɛ bɔɔ nii ni yeee egbɔ mli, ni amɛnyɛɛɛ amɛfɔ bii. Abale amɛ akɛ kakalɔi, Nefilim, loo Asaabui, ejaakɛ amɛtswiaa mɛi ashi. (1 Mose 6:4; NW shishigbɛ niŋmaa) Eka shi faŋŋ akɛ amɛyɛ basabasa, amɛyi wa, amɛjieee mɔbɔnalɛ kpo.
7 Eyɛ faŋŋ akɛ, gbɔmɔtsoŋ hefɛo, bɔ ni gbɔmɔtso lɛ yɔɔ hã, edalɛ, loo hewalɛ diɛŋtsɛ jeee nɔ ni kɛ nuufeemɔ loo yoofeemɔ ni akpɛlɛɔ nɔ hãa. Ekolɛ ŋwɛibɔfoi ni tsɔmɔ amɛhe gbɔmɛi lɛ ahe yɛ fɛo. Ni Nefilim lɛ dara ni amɛsasai, shi su ni amɛhiɛ lɛ etsɔ̃mɔ. Ŋwɛibɔfoi toigbolɔi lɛ kɛ amɛshwiei lɛ hã shikpɔŋ lɛ nɔ yi obɔ kɛ bɔlɛnamɔ mli jeŋba shara kɛ awuiyeli. No hewɔ lɛ, Yehowa kɛ nakai je lɛ ba naagbee. (1 Mose 6:5-7) Shi, Nu Afua lɛ ejieee daimonio hewalɛ lɛ kɛyaaa, ni ejieee nɔ ni jɛ Adam esha lɛ mli ba lɛ hu kɛyaaa. Nuufeemɔ kɛ yoofeemɔ ni esaaa lɛ jie ehiɛ kpo ekoŋŋ yɛ Nu Afua lɛ sɛɛ, ni nɔkwɛmɔ nii yɛ Biblia lɛ mli, nɔ ni hi kɛ nɔ ni ehiii, ni wɔbaanyɛ wɔkase nii kɛjɛ mli.
8. Mɛɛ nuufeemɔ ni sa he nɔkwɛmɔ nɔ kpakpa Yosef fee efɔ̃ shi?
8 Yosef kɛ Potifar ŋa lɛ ahe sane lɛ kɛ sɔrɔtofeemɔ ni da waa yɛ nuufeemɔ ni sa, ni miite shi kɛmiishi je lɛŋ yoofeemɔ hãa. Akɛni Potifar ŋa lɛ ná Yosef ni he yɔɔ fɛo lɛ he akɔnɔ fɔŋ hewɔ lɛ, ebɔ mɔdɛŋ ni elaka lɛ. No mli lɛ Nyɔŋmɔ mla ko ni áŋma afɔ̃ shi ni guɔ ajwamaŋbɔɔ loo gbalafitemɔ bɛ. Ni kɛlɛ, Yosef jo foi kɛjɛ nakai yoo ni bɛ jeŋba lɛ he, ni ejie ehe kpo akɛ Nyɔŋmɔ gbɔmɔ diɛŋtsɛ ji lɛ, mɔ ni jieɔ nuufeemɔ ni Nyɔŋmɔ kpɛlɛɔ nɔ lɛ kpo.—1 Mose 39:7-9, 12.
9, 10. (a) Maŋnyɛ Washti fite eyoofeemɔ lɛ yɛ mɛɛ gbɛ nɔ? (b) Mɛɛ yoofeemɔ he nɔkwɛmɔ nɔ kpakpa Ester kɛha wɔ?
9 Ester kɛ Maŋnyɛ Washti kɛ sɔrɔtofeemɔ ni sa kadimɔ hã yei. Eyɛ faŋŋ akɛ Washti susu akɛ ehe yɛ fɛo aahu akɛ, Maŋtsɛ Ahashwerosh baakpɛlɛ esuɔmɔnaa nii anɔ be fɛɛ be. Shi, ehefɛo lɛ eyaaa shɔŋŋ tamɔ bɔ ni mũi ni akɛkpaa hewolo nɔ ni ahɔ̃ɔ ŋmɛnɛ lɛ pii ji lɛ. Ebɛ hiɛshikamɔ kɛ yoofeemɔ kwraa, ejaakɛ ejieee hiɛshikamɔ kɛ heshibaa kpo etsɔɔɔ ewu kɛ maŋtsɛ lɛ. Maŋtsɛ lɛ kpoo lɛ, ni ehala yoo diɛŋtsɛ ni feɔ enii tamɔ yoo, ní yɛ anɔkwale mli lɛ esheɔ Yehowa gbeyei, akɛ ebatsɔ̃ emaŋnyɛ.—Ester 1:10-12; 2:15-17.
10 Ester feɔ nɔkwɛmɔ nɔ ni nɔ bɛ kɛhaa Kristofoi yei. Ehe “yɛ fɛo, ni ehiɛ hu yɛ fɛo” moŋ, shi kɛ̃lɛ ejie hewulamɔ ni ji “tsuiiaŋ gbɔmɔ ni aŋɔtee lɛ, yɛ mumɔ ni he jɔ ni yɔɔ kpoo lɛ nibii ni fiteee lɛ” kpo. (Ester 2:7; 1 Petro 3:4) Ebuuu kponɔgbɛ hesaamɔ akɛ nɔ̃ ni he hiaa titri. Ester jie ŋaalee kɛ henɔyeli kpo, eba ehe shi eha ewu Ahashwerosh, beni emaŋbii lɛ awala ebaje oshara mli po. Ester fee dioo yɛ be mli ni nilee yɔɔ mli akɛ efee nakai, shi ekɛ ekãa wie ni esheee gbeyei beni ehe bahia, ni yɛ be ni sa mli. (Ester 2:10; 7:3-6) Ekpɛlɛ ŋaawoo ni jɛ etsɛkwɛ̃ binuu ni eda, Mordekai ŋɔɔ lɛ nɔ. (Ester 4:12-16) Ejie suɔmɔ ni eyɔɔ kɛ anɔkwa ni eyeɔ emaŋbii lɛ kpo.
Bɔ ni Anaa Mɔ yɛ Kponɔgbɛ
11. Mɛni esa akɛ wɔha ahi wɔjwɛŋmɔ mli yɛ bɔ ni mɔ ko pueɔ yɛ kponɔgbɛ lɛ he?
11 Mɛni ji nɔ titri ni hãa anáa yoofeemɔ ni sa? Nyɛ̃ ko kɛɛ akɛ: “Hiɛnyam lɛ lakamɔ ni, ni hefɛo hu lɛ, yakayaka nɔ̃ ni; shi yoo ni sheɔ Yehowa gbeyei lɛ aaakafo lɛ.” (Abɛi 31:30) No hewɔ lɛ, Nyɔŋmɔ gbeyeishemɔ ni woo yɔɔ mli he miihia, ni mlihilɛ, hiɛsaa, hiɛshikamɔ, kɛ mlijɔlɛ lilɛi yeɔ buaa yoofeemɔ babaoo fe gbɔmɔtsoŋ hefɛo.—Abɛi 31:26.
12, 13. (a) Nɔ ni yɔɔ mɔbɔ ji akɛ, mɛni anaa yɛ mɛi pii awiemɔ he? (b) Mɛni ji Abɛi 11:22 shishi?
12 Nɔ ni yɔɔ awerɛho ji akɛ, hii kɛ yei pii gbeleee amɛdaaŋ yɛ nilee mli, ni asaŋ mlihilɛ bɛ amɛlilɛi nɔ. Amɛ wiemɔ eyi obɔ kɛ jɛmɔ, wiemɔ kɛ shimɔ, yakayaka wiemɔ, kɛ mɛi ahe ni amɛsusuuu. Hii komɛi susuɔ akɛ yakayaka wiemɔ ji nuufeemɔ he okadi, ni yei komɛi kɛ buulufeemɔ kaseɔ amɛ. Ni kɛlɛ, kɛ yoo he yɛ fɛo, shi ebɛ jwɛŋmɔ, ni eji ŋwanejelɔ, béi atsɛ, loo henɔwolɔ lɛ, ani ehe baanyɛ afee fɛo yɛ nakai wiemɔ lɛ shishinumɔ diɛŋtsɛ naa, akɛ eji yoo diɛŋtsɛ? “Yoo ni he yɔɔ fɛo ni ebɛ jeŋba kpakpa lɛ, etamɔ shika ga ni akɛwo kpolotoo gugɔŋ.”—Abɛi 11:22.
13 Hefɛo ni wiemɔ sha, béi, loo wiemɔ ni jwɛŋmɔ kpakpa bɛ mli fata he lɛ, baafee nɔ ni kɛ yoo su ni mɔ ko baajie lɛ kpo lɛ kpaŋ gbee. Yɛ anɔkwale mli lɛ, jeŋba ni Nyɔŋmɔ gbeyeishemɔ bɛ mli ni tamɔ nɛkɛ baaha mɔ ni he yɔɔ fɛo yɛ gbɔmɔtsoŋ lɛ po afee tamɔ mɔ ni he yɔɔ taŋ. Wɔbaanyɛ wɔyoo yɛ gbɛ ni waaa nɔ akɛ, bɔ ni anaa nuu loo yoo ko yɛ gbɔmɔtsoŋ ahãa lɛ diɛŋtsɛ nyɛŋ abu mlifu, bolɔmɔ, loo jɛmɔ bem. Kristofoi fɛɛ baanyɛ, ni esa akɛ amɛha amɛhe afee fɛo yɛ Nyɔŋmɔ kɛ nanemɛi adesai ahiɛ, kɛtsɔ amɛ wiemɔ kɛ jeŋba ni damɔ Biblia lɛ nɔ lɛ nɔ.—Efesobii 4:31.
14. Mɛɛ hesaamɔ ajie yi yɛ 1 Petro 3:3-5, ni te onuɔ he ohaa tɛŋŋ?
14 Yɛ be mli ni anɔkwa yoofeemɔ kɛ nuufeemɔ damɔ mumɔŋ sui anɔ lɛ, bɔ ni gbɔmɔtso lɛ ji kɛ bɔ ni anaa lɛ ahaa, ni atade ni wɔwoɔ loo mama ni wɔbuɔ, kɛ gbɛ ni wɔtsɔɔ nɔ wɔwoɔ loo wɔbuɔ lɛ fata he lɛ, wieɔ wɔhe. Nɔ ni yɔɔ bɔfo Petro jwɛŋmɔ mli ni ŋwanejee ko bɛ he ji klɛŋklɛŋ afii oha lɛ mli atadei sɔrɔtoi ni awoɔ kɛ hesaamɔ, beni ewo Kristofoi yei aŋaa nɛkɛ lɛ: “Nyɛkɛ yigbɔɔ kɛ shikawoo kɛ atadewoo akafee nyɛ hewulamɔ nɔ, shi moŋ nyɛtsuiiaŋ gbɔmɔ ni aŋɔtee lɛ, yɛ mumɔ ni he jɔ ni yɔɔ kpoo lɛ nibii ni fiteee lɛ amli, no ji nɔ ni jara wa yɛ Nyɔŋmɔ hiɛ. Ejaakɛ sá lɛ, nakai yei krɔŋkrɔŋi lɛ hu ni hiɛ kã Nyɔŋmɔ nɔ lɛ wula amɛhe, ni amɛba amɛhe shi amɛha amɛ diɛŋtsɛ amɛwumɛi.”—1 Petro 3:3-5.
15. Mɛni esa akɛ Kristofoi yei abɔ mɔdɛŋ ni amɛjie lɛ kpo yɛ amɛ atadewoo mli?
15 Wɔnaa Paulo wiemɔi ni kɔɔ yei atadewoo hu he yɛ 1 Timoteo 2:9, 10 akɛ: “Yei hu, amɛkɛ atade ni sa kɛ hiɛ ni gboɔ nɔ̃, kɛ jwɛŋmɔ ni sa awula amɛhe, . . . kɛ nitsumɔi kpakpai ni sa yei ni tsɔɔ amɛhe akɛ Nyɔŋmɔ jalɔi lɛ.” Ema bɔ ni hiɛshikamɔ kɛ atade ni sa ni jieɔ jwɛŋmɔŋ hiɛshikamɔ kpakpa kpo he hiaa lɛ nɔ mi.
16, 17. (a) Hii kɛ yei efite atadewoo ŋmɛnɛ yɛ mɛɛ gbɛ nɔ? (b) Te esa akɛ wɔmu sane naa wɔha tɛŋŋ, yɛ ŋaawoo ni anaa yɛ 5 Mose 22:5 lɛ hewɔ?
16 Nuu loo yoo, gbekɛ nuu loo gbekɛ yoo ni feɔ enii loo esaa ehe yɛ gbɛ ni teeɔ bɔlɛnamɔ shi nɔ lɛ kɛ woo haŋ anɔkwa nuufeemɔ loo yoofeemɔ, ni eyɛ faŋŋ akɛ ewooo Nyɔŋmɔ hiɛ nyam. Gbɔmɛi ni yɔɔ je lɛŋ lɛ ateŋ mɛi pii feɔ nii kɛtekeɔ nɔ, ni amɛkɛjieɔ amɛ nuufeemɔ loo yoofeemɔ kpo yɛ atadewoo kɛ jeŋba mli, yɛ gbɛ ni bɛ hiŋmɛi nɔ kwraa nɔ. Mɛi krokomɛi haaa ana sɔrɔtofeemɔ ni kã nuu kɛ yoo teŋ lɛ hu, yɛ jeŋba shara he otii ahewɔ. Kwɛ bɔ ni wɔ Kristofoi lɛ baanyɛ ada shi aha, akɛni Biblia lɛ jieɔ Nyɔŋmɔ jwɛŋmɔ kpo lɛ hewɔ! Yehowa wie etsɔ̃ɔ blema Israel akɛ: “Yoo akawo nuu atade, ni nuu hu akawo yoo atade, ejaakɛ Yehowa, o-Nyɔŋmɔ lɛ, miihi mɔ ni feɔ nakai.”—5 Mose 22:5.
17 Yɛ enɛ gbɛfaŋ lɛ, ekolɛ obaaná nɔ ni October 1, 1988 Buu-Mɔɔ lɛ wie yɛ enɛ he yɛ baafa 15 lɛ mlitii he miishɛɛ: ‘Sane lɛ jeee akɛ hesaamɔ ko ji nɔ ni ebahe shi waa ni afeɔ, shi moŋ, kɛji akɛ esa kɛha mɔ ni kɛɔ akɛ eji Nyɔŋmɔ sɔɔlɔ lɛ. (Romabii 12:2; 2 Korintobii 6:3) Hesaamɔ loo atadei ni awoɔ lɛ kɛkɛ, loo nɔ ni ákpɛ lɛ kpɛŋŋ, ni ekpɛtɛ gbɔmɔtso lɛ baanyɛ agbala jwɛŋmɔ kɛjɛ wɔ sane lɛ nɔ. Hesaamɔi loo atadei ni jeɔ gbɛ ehãa hii tsɔmɔɔ tamɔ yei, loo ehãa yei tsɔmɔɔ tamɔ hii lɛ esaaa kwraa yɛ gbɛ fɛɛ gbɛ nɔ. (Okɛto 5 Mose 22:5 he.) Shi, kusumii yɛ sɔrɔto yɛ hei sɔrɔtoi, yɛ bɔ ni kɔɔyɔŋ tsakemɔ, nitsumɔ mli hiamɔ nii, kɛ nibii krokomɛi yɔɔ ha hewɔ, no hewɔ lɛ, Kristofoi asafo lɛ wooo mlai keketee komɛi amɛhaaa jeŋ muu fɛɛ nyɛmifeemɔ lɛ.’
18. Mɛɛ gbɛjianɔ wɔbaanyɛ wɔto yɛ Biblia mli ŋaawoo ni kɔɔ atadewoo kɛ hesaamɔ he lɛ he nitsumɔ mli?
18 Mɛɛ ŋaawoo ni ŋmɛɔ pɛpɛɛpɛ ni sa po nɛ! Nɔ ni yɔɔ awerɛho ji akɛ, Kristofoi hii kɛ yei komɛi diɔ nɔ fɛɛ nɔ ni je lɛ kɛaaba yɛ atadewoo kɛ hesaamɔ mli lɛ sɛɛ kɛkɛ, ni amɛsusuuu bɔ ni ebaanyɛ esa Yehowa kɛ Kristofoi asafo lɛ he eha lɛ he. Esa akɛ wɔteŋ mɔ fɛɛ mɔ apɛi lɛ diɛŋtsɛ emli ekwɛ akɛ ekolɛ, je lɛ susumɔ ena enɔ hewalɛ lo. Aloo, ekolɛ wɔbaanyɛ wɔya nyɛmi nuu loo nyɛmi yoo ko ni abuɔ lɛ ni yɔɔ niiashikpamɔ lɛ ŋɔɔ, koni wɔbi lɛ nɔ ni ena yɛ tsakemɔi ni esa akɛ wɔfee yɛ atadei ni wɔkpɛɔ wɔwoɔ lɛ mli, koni wɔkɛ hiɛdɔɔ asusu eŋaawoi lɛ ahe.
Kristofoi Hii kɛ Yei —Hii kɛ Yei Diɛŋtsɛ
19. Mɛɛ hewalɛ fɔŋ ko ehe hiaa ni wɔwuu wɔshi?
19 Je nɛɛ nyɔŋmɔ lɛ ji Satan, ni abaanyɛ ana hewalɛ ni enáa yɛ mɛi anɔ lɛ yɛ yiŋfutumɔ ni eba hii kɛ yei ateŋ lɛ mli ni fe atadewoo loo mamabumɔ lɛ. (2 Korintobii 4:4) Yei pii kɛ hii shiɔ akaŋ yɛ yitsoyeli he yɛ maji komɛi anɔ, ni amɛkuɔ amɛhiɛ amɛshwieɔ Biblia mli shishitoo mlai anɔ. Yɛ gbɛ kroko nɔ lɛ, hii babaoo ŋmɛɛɔ amɛ yitsoyeli he gbɛnaa nii ahe, taakɛ Adam fee lɛ. Mɛi komɛi po bɔɔ mɔdɛŋ amɛtsakeɔ amɛ bɔɔ su he nitsumɔ yɛ shihilɛ mli kɛjɛɔ ekome nɔ kɛyaa ekroko nɔ. (Romabii 1:26, 27) Biblia lɛ kɛ shihilɛ mli nifeemɔ kroko ni Nyɔŋmɔ kpɛlɛɔ nɔ emaaa shi. Ni mɛi fɛɛ, ni dani amɛaabatsɔmɔ Kristofoi lɛ, amɛyiŋ efutu yɛ mɛi ni amɛji, loo yɛ nuu kɛ yoo bɔɔ su mli halamɔ nii ahe lɛ baanyɛ ana nɔmimaa akɛ, ebaafee amɛ naanɔ hilɛ kɛhamɔ, akɛ amɛaahi shi yɛ tɛ ni Nyɔŋmɔ efo efɔ̃ shi lɛ naa, nɔ ni mɛi fɛɛ ni nine shɛɔ adesa emuuyeli nɔ lɛ ahiɛ baasɔ lɛ.
20. Te esa akɛ Galatabii 5:22, 23 akɔ bɔ ni wɔsusuɔ nuufeemɔ kɛ yoofeemɔ he wɔhaa lɛ he aha tɛŋŋ?
20 Ŋmalɛi lɛ tsɔɔ akɛ, ehe miihia ni Kristofoi hii kɛ yei aná ni amɛjie Nyɔŋmɔ mumɔ lɛ yibii lɛ kpo—suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, kɛ hiɛshikamɔ. (Galatabii 5:22, 23) Nyɔŋmɔ etsɔ enilee babaoo lɛ mli eha hii enyɛ amɛlɛɛ amɛ nuufeemɔ lɛ mli, ni yei hu amɛ yoofeemɔ lɛ mli, kɛtsɔ nakai sui lɛ anámɔ nɔ. Ewaaa ákɛ aaaná bulɛ aha nuu ni jieɔ mumɔ lɛ yibii lɛ kpo, ni ewaaa akɛ aaasumɔ yoo ni feɔ nakai.
21, 22. (a) Mɛɛ nɔkwɛmɔ nɔ Yesu fee efɔ̃ shi yɛ shihilɛ mli nibii ahe? (b) Yesu jie enuufeemɔ kpo yɛ mɛɛ gbɛ nɔ?
21 Gbɔmɔ ni fe mɔ fɛɛ mɔ ni ehi shi pɛŋ ji Yesu Kristo, ni eshihilɛ gbɛ ji nɔ ni esa akɛ Kristofoi akase. (1 Petro 2:21-23) Taakɛ Yesu fee lɛ, esa akɛ ana hii kɛ yei fɛɛ akɛ mɛi ni yeɔ Nyɔŋmɔ anɔkwa, ni amɛfeɔ toiboo amɛhaa E-Wiemɔ lɛ. Yesu jie suɔmɔ, mlijɔlɛ, kɛ mɔbɔnalɛ sui ni yɔɔ naakpɛɛ kpo. Akɛ anɔkwa Kristofoi lɛ, aakpa wɔ gbɛ akɛ wɔɔkase lɛ, koni wɔkɛtsɔɔ akɛ wɔji ekaselɔi.—Yohane 13:35.
22 Yesu Kristo ji nuu diɛŋtsɛ, ni wɔbaanyɛ wɔna enuufeemɔ sui lɛ yɛ be mli ni wɔkaseɔ eshihilɛ mli saji ni aŋma afɔ̃ shi yɛ Ŋmalɛi lɛ amli lɛ. Eboteee gbalashihilɛ mli, shi Biblia lɛ tsɔɔ akɛ, ekɛ yei bɔ naanyo yɛ gbɛ ni ŋmɛɔ pɛpɛɛpɛ nɔ. (Luka 10:38, 39) Ekɛ hii kɛ yei anaanyobɔɔ lɛ he tse, ni woo yɛ mli be fɛɛ be. Eji nuufeemɔ he nɔkwɛmɔ nɔ ni yeɔ emuu. Eŋmɛɛɛ mɔ ko mɔ ko—nuu, yoo, loo ŋwɛibɔfo toigbolɔ gbɛ—koni eshɔ̃ enuufeemɔ ni Nyɔŋmɔ gbeyeishemɔ yɔɔ mli kɛ enɔkwayeli kɛha Yehowa lɛ kɛjɛ edɛŋ. Eshashaooo shi akɛ eeekpɛlɛ gbɛnaa nii ni kã enɔ lɛ nɔ, ni efee nakai ni huhuuhu wiemɔ bɛ mli.—Mateo 26:39.
23. Yɛ nii ni nuu kɛ yoo tsuɔ lɛ agbɛfaŋ lɛ, mɛɛ gbɛ nɔ ajɔɔ anɔkwa Kristofoi diɛŋtsɛ yɛ enɛ mli?
23 Mɛɛ miishɛɛ eji nɛkɛ, akɛ aaafata Yehowa webii ahe, ni akɛ hii kɛ yei, kɛ agbɛnɛ gbekɛbii hii kɛ gbekɛbii yei, ni nɔ ni he hiaa amɛ fe fɛɛ yɛ shihilɛ mli ji ni amɛsumɔ Yehowa Nyɔŋmɔ ni amɛbo lɛ toi lɛ aaabɔ! Nyɔŋmɔ Wiemɔ lɛ toi ni wɔboɔ lɛ etsiii wɔnaa. Shi moŋ, eha wɔye wɔhe kɛjɛ nɛkɛ je nɛɛ kɛ egbɛ̀i ni baa nuu kɛ yoo bɔɔ su ni yɔɔ fɛo, kɛ eyiŋtoo, kɛ nitsumɔi sɔrɔtoi ni eko fɛɛ eko tsũɔ lɛ ashi lɛ ahe. Wɔbaanyɛ wɔna miishɛɛ diɛŋtsɛ ni baa kɛjɛɔ wɔ gbɛhe ni Nyɔŋmɔ kɛha wɔ yɛ shihilɛ mli lɛ he nitsumɔ mli lɛ mli, kɛ wɔji hii loo yei. Hɛɛ, kwɛ bɔ ni wɔdaa Yehowa Nyɔŋmɔ, Bɔlɔ lɛ shi, yɛ egbɛjianɔi ni suɔmɔ yɔɔ mli lɛ fɛɛ ni eto kɛha wɔ, ákɛ nuu kɛ yoo ni ebɔ wɔ lɛ hewɔ!
Te Obaaha Hetoo Oha Tɛŋŋ?
◻ Mɛɛ nitsumɔ ni sa kɛha hii kɛ yei Biblia lɛ tsɔɔ mli?
◻ Mɛɛ gbɛ nɔ afite nuufeemɔ dani Nu Afua lɛ ba, ni átsɔ̃mɔ enɛ kɛ yoofeemɔ yɛ wɔbe nɛɛ mli yɛ mɛɛ gbɛ nɔ?
◻ Mɛɛ Biblia mli ŋaawoo ni kɔɔ hesaamɔ he obaasumɔ ni okɛtsu nii?
◻ Te Kristofoi hii kɛ yei aaafee tɛŋŋ amɛtsɔɔ akɛ hii kɛ yei diɛŋtsɛ ji amɛ?
[Mfoniri ni yɔɔ baafa 17]
Eyɛ mli akɛ Ester he yɛ fɛo moŋ, shi akaiɔ lɛ titri yɛ ehiɛshikamɔ kɛ esubaŋ hewɔ
[Mfoniri ni yɔɔ baafa 18]
Gbalamɔ ojwɛŋmɔ kɛya hesaamɔ nɔ bɔ ni sa, yɛ be mli ni omaa mligbɛ hefɛo nɔ mi babaoo