‘Nyɛkɛ Kristo Anyiɛa Daa yɛ Ekomefeemɔ Mli’
“No hewɔ lɛ, akɛni nyɛkpɛlɛ Kristo Yesu ni ji Nuntsɔ lɛ nɔ hewɔ lɛ, nyɛkɛ lɛ anyiɛa daa yɛ ekomefeemɔ mli.”—KOLOSEBII 2:6, NW.
1, 2. (a) Biblia lɛ tsɔɔ bɔ ni Henok kɛ anɔkwayeli sɔmɔ Yehowa yɛ eshihilɛ mli yɛ mɛɛ gbɛ nɔ? (b) Taakɛ Kolosebii 2:6, 7 (NW) tsɔɔ lɛ, Yehowa eye ebua koni wɔkɛ lɛ anyiɛ yɛ mɛɛ gbɛ nɔ?
ANI óna gbekɛ nuu bibioo ni kɛ etsɛ miinyiɛ pɛŋ? Naanyo fioo nɛɛ kaseɔ bɔ ni etsɛ famɔɔ enaji ehaa, ni efeɔ ehiɛ ŋmɔlɔŋmɔlɔ; tsɛ lɛ yeɔ ebuaa lɛ kɛnyiɛɔ, lɛ diɛŋtsɛ ehiɛ tsɔɔ suɔmɔ kɛ miishɛɛ. Yɛ gbɛ ni sa nɔ lɛ, Yehowa kɛ sane mlitsɔɔmɔ ni tamɔ nakai pɛpɛɛpɛ tsɔɔ bɔ ni shihilɛ ni akɛsɔmɔɔ lɛ yɛ anɔkwayeli mli lɛ yɔɔ ha. Ákɛ nɔkwɛmɔnɔ lɛ, Nyɔŋmɔ Wiemɔ lɛ kɛɔ akɛ nuu anɔkwafo Henok “tee nɔ ekɛ [anɔkwa] Nyɔŋmɔ lɛ nyiɛ.”—1 Mose 5:24, NW; 6:9.
2 Taakɛ tsɛ ni susuɔ mɔ he waa lɛ baaye ebua ebinuu fioo lɛ koni ekɛ lɛ anyiɛ lɛ, nakai nɔŋŋ Yehowa kɛ yelikɛbuamɔ ni yɔɔ ni hi fe fɛɛ lɛ eha wɔ. Etsu e-Bi koome lɛ kɛba shikpɔŋ nɔ. Yesu Kristo jie eŋwɛi Tsɛ lɛ su kpo etsɔɔ yɛ gbɛ ni yeɔ emuu nɔ, yɛ nɔ fɛɛ nɔ ni efee yɛ be kakadaŋŋ ni ekɛnyiɛ shikpɔŋ nɛɛ nɔ lɛ mli. (Yohane 14:9, 10; Hebribii 1:3) No hewɔ lɛ, bɔni afee ni wɔkɛ Nyɔŋmɔ anyiɛ lɛ, ehe miihia ni wɔkɛ Yesu anyiɛ. Bɔfo Paulo ŋma akɛ: “No hewɔ lɛ, akɛni nyɛkpɛlɛ Kristo Yesu ni ji Nuntsɔ lɛ nɔ hewɔ lɛ, nyɛkɛ lɛ anyiɛa daa yɛ ekomefeemɔ mli, ni nyɛshishifãi amɔmɔ shi ni atswa nyɛ ama shi yɛ emli ni nyɛfi shi yɛ hemɔkɛyeli lɛ mli, taakɛ bɔ ni atsɔɔ nyɛ lɛ, ni nyɛkɛ hemɔkɛyeli atekea nɔ yɛ shidaa mli.”—Kolosebii 2:6, 7, NW.
3. Taakɛ Kolosebii 2:6, 7 (NW) tsɔɔ lɛ, mɛni hewɔ wɔbaanyɛ wɔkɛɛ akɛ nibii babaoo fata Kristo ni akɛ lɛ aaanyiɛ yɛ ekomefeemɔ mli lɛ he fe ni aaabaptisi mɔ kɛkɛ lɛ?
3 Akɛni Biblia mli nikaselɔi ni yɔɔ tsui kpakpa lɛ sumɔɔ ni amɛkɛ Kristo anyiɛ yɛ ekomefeemɔ mli, ni amɛbɔɔ mɔdɛŋ ni amɛnyiɛ enajifamɔi ni yeɔ emuu lɛ sɛɛ hewɔ lɛ, abaptisiɔ amɛ. (Luka 3:21; Hebribii 10:7-9) Yɛ afi 1997 pɛ mli lɛ, gbɔmɛi ni fa fe 375,000 tsu nɔ ko ni he hiaa nɛɛ he nii yɛ jeŋ fɛɛ—kɛ aja mli lɛ mɛi ni fa fe 1,000 gbi fɛɛ gbi. Nɛkɛ mɛi ayifalɛ nɛɛ haa mɔ mli filiɔ lɛ waa! Shi kɛlɛ, Paulo wiemɔi ni aŋma yɛ Kolosebii 2:6, 7 (NW) lɛ tsɔɔ akɛ nibii babaoo fata Kristo ni akɛ lɛ aaanyiɛ yɛ ekomefeemɔ mli lɛ he fe ni aaabaptisi mɔ kɛkɛ. Hela feemɔ wiemɔ ni atsɔɔ shishi akɛ ‘nyɛnyiɛa daa’ lɛ tsɔɔ nifeemɔ ni esa akɛ eya nɔ aahu, eya nɔ be fɛɛ be. Agbɛnɛ, Paulo kɛfata he akɛ, Kristo ni akɛ lɛ aaanyiɛ lɛ kɔɔ nibii ejwɛ he: ní shishifãi aaamɔmɔ shi yɛ Kristo mli, ní aaatswa mɔ ama shi yɛ emli, ní aaafi shi yɛ hemɔkɛyeli lɛ mli, kɛ shidaa ni akɛaateke nɔ. Nyɛhaa wɔsusua wiemɔ kuku fɛɛ wiemɔ kuku he wɔkwɛa, ni wɔna bɔ ni eyeɔ ebuaa wɔ koni wɔya nɔ wɔkɛ Kristo anyiɛ aahu yɛ ekomefeemɔ mli lɛ.
Ani ‘Oshishifãi Emɔmɔ Shi yɛ Kristo Mli’?
4. ‘Shishifãi ni aaamɔmɔ shi yɛ Kristo mli’ lɛ tsɔɔ mɛni?
4 Klɛŋklɛŋ lɛ, Paulo ŋma akɛ, ehe miihia ni ‘wɔshishifãi amɔmɔ shi yɛ Kristo mli.’ (Okɛto Mateo 13:20, 21 he.) Te mɔ ko aaafee tɛŋŋ koni eshishifãi amɔmɔ shi yɛ Kristo mli? Ojogbaŋŋ, anyɛɛɛ ana tso lɛ shishifãi, shi amɛhe hiaa tso lɛ—amɛhaa emaa shi shiŋŋ ni amɛhaa lɛ niyenii. Nakai nɔŋŋ klɛŋklɛŋ lɛ Kristo nɔkwɛmɔnɔ kɛ enitsɔɔmɔ lɛ náa wɔnɔ hewalɛ ni wɔnaaa, ni eheɔ shi yɛ wɔjwɛŋmɔi kɛ tsuii amli. Jɛmɛ ji he ni amɛfeɔ tamɔ niyenii ni amɛwoɔ wɔ hewalɛ yɛ. Kɛ wɔŋmɛ gbɛ ni amɛye wɔjwɛŋmɔ, wɔnifeemɔi, kɛ wɔyiŋkpɛi anɔ lɛ, etsirɛɔ wɔ koni wɔjɔɔ wɔwala nɔ wɔha Yehowa.—1 Petro 2:21.
5. Wɔbaanyɛ ‘wɔshwe’ mumɔŋ niyenii yɛ mɛɛ gbɛ nɔ?
5 Yesu sumɔɔ nilee ni jɛɔ Nyɔŋmɔ ŋɔɔ lɛ. Ekɛto niyenii po he. (Mateo 4:4) Shi, yɛ e-Gɔŋ nɔ Shiɛmɔ lɛ mli lɛ, etsɛ saji 21 sɛɛ kɛjɛ Hebri Ŋmalɛi lɛ amli woji sɔrɔtoi kpaanyɔ mli. Bɔni afee ni wɔnyiɛ enɔkwɛmɔnɔ lɛ sɛɛ lɛ, esa akɛ wɔfee taakɛ bɔfo Petro woɔ hewalɛ yɛ he lɛ—“nyɛshwea” mumɔŋ niyenii “tamɔ fufɔbii ni afɔ bianɛ.” (1 Petro 2:2) Kɛ fufɔoo ni kpaako afɔ lɛ lɛ miishwe akɛ eye nii lɛ, ehaa aleɔ nii ni eshweɔ waa koni ená nɛɛ yɛ faŋŋ mli. Kɛ wɔnuuu he nakai amrɔ nɛɛ yɛ mumɔŋ niyenii he lɛ, Petro wiemɔi lɛ woɔ wɔ hewalɛ koni ‘wɔná’ nakai shwe ni ashweɔ lɛ. Yɛ mɛɛ gbɛ nɔ? Ekolɛ shishitoo mla ni anaa yɛ Lala 34:9 lɛ baaye abua: “Nyɛsaa nyɛnaa nyɛkwɛa, ni nyɛaana akɛ Yehowa hi.” Kɛ ‘wɔsa’ Yehowa Wiemɔ ni ji Biblia lɛ ‘naa wɔkwɛ’ lɛ, ekolɛ efã ko ni wɔɔkane gbi fɛɛ gbi lɛ, wɔbaana akɛ eji mumɔŋ niyenii ni hi. Etsɛŋ ni shwe ni wɔshweɔ enɛ lɛ baaya hiɛ.
6. Mɛni hewɔ ehe hiaa ni wɔjwɛŋ nɔ ni wɔkaneɔ lɛ nɔ lɛ?
6 Shi kɛlɛ, ehe miihia ni niyenii lɛ agbɛlɛ jogbaŋŋ kɛ́ wɔye nɔŋŋ pɛ lɛ. No hewɔ lɛ, ehe miihia ni wɔjwɛŋ nɔ ni wɔkaneɔ lɛ nɔ. (Lala 77:12, 13) Ákɛ nɔkwɛmɔnɔ lɛ, kɛ́ wɔmiikane wolo ni ji Gbɔmɔ ni Fe Mɔ Fɛɛ Mɔ ni Ehi Shi Pɛŋ lɛ, saneyitso fɛɛ yitso he baaba sɛɛnamɔ babaoo kɛha wɔ, kɛ́ wɔmɛ ni wɔbi wɔhe akɛ: ‘Mɛɛ Kristo subaŋ lɛ fã ko minaa yɛ sane nɛɛ mli, ni te mafee tɛŋŋ makase yɛ mi diɛŋtsɛ mishihilɛ mli?’ Kɛ wɔjwɛŋ nii anɔ nɛkɛ lɛ, ebaaha wɔkɛ nɔ ni wɔkaseɔ lɛ atsu nii. Kɛkɛ lɛ, kɛ́ esa akɛ wɔkpɛ wɔyiŋ lɛ, wɔbaanyɛ wɔbi wɔhe sane koni wɔle nɔ ni kulɛ Yesu baafee. Kɛ wɔkpɛ wɔyiŋ yɛ enɛ naa lɛ, wɔkɛ odaseyeli haa akɛ wɔshishifãi miimɔmɔ shi lɛɛlɛŋ yɛ Kristo mli.
7. Mɛɛ jwɛŋmɔ esa akɛ wɔná yɛ mumɔŋ niyenii ni wa he?
7 Paulo wo wɔ hewalɛ hu koni wɔye “niyenii kpakpa” ni ji Nyɔŋmɔ Wiemɔ lɛ mli anɔkwalei ni mli kwɔlɔ lɛ. (Hebribii 5:14) Biblia muu lɛ fɛɛ kanemɔ baanyɛ afee oti ni wɔkɛmaa wɔhiɛ klɛŋklɛŋ yɛ enɛ gbɛfaŋ. No sɛɛ lɛ, saji pɔtɛɛ babaoo yɛ ni wɔbaakase, tamɔ Kristo kpɔmɔ afɔleshaa lɛ, kpaŋmɔi sɔrɔtoi ni Yehowa kɛ ewebii fee lɛ, loo gbalɛ mli shɛɛ saji lɛ ekomɛi ni yɔɔ Biblia lɛ mli. Woji babaoo yɛ ni baaye abua wɔ koni wɔye mumɔŋ niyenii kpakpa tamɔ nɛkɛ koni wɔgbɛlɛ. Mɛni ji nakai nilee ni wɔɔná lɛ he oti ni wɔkɛaama wɔhiɛ? Jeee koni eha wɔkɛshwã, shi moŋ koni eha suɔmɔ ni wɔyɔɔ kɛha Yehowa lɛ mli awa koni eha wɔbɛŋkɛ lɛ kpaakpa. (1 Korintobii 8:1; Yakobo 4:8) Kɛ wɔkɛ ekãa ná nilee nɛɛ, ni wɔkɛto wɔhe, ni wɔkɛye wɔbua mɛi krokomɛi lɛ, belɛ wɔmiikase Kristo lɛɛlɛŋ. Enɛ baaye ebua wɔ koni wɔshishifãi amɔmɔ shi jogbaŋŋ yɛ emli.
Ani ‘Aatswa Bo Aama Shi yɛ Kristo Mli’?
8. ‘Kristo ni aaatswa mɔ ama shi yɛ emli’ lɛ tsɔɔ mɛni?
8 Yɛ Kristo ni akɛ lɛ aaanyiɛ yɛ ekomefeemɔ mli lɛ fã kroko ni nyiɛ sɛɛ lɛ gbɛfaŋ lɛ, Paulo tsakeɔ mramra kɛjɛɔ nɔ ko he mfoniri ni afeɔ yɛ jwɛŋmɔŋ lɛ nɔ kɛyaa ekroko nɔ—kɛjɛ tso nɔ̃ nɔ kɛtee tsumaa nɔ̃ nɔ. Kɛ wɔsusu tsũ ko ni amaa he lɛ, jeee faneshi lɛ kɛkɛ he wɔsusuɔ shi tsũ ni agboɔ he deŋme akɛmaa ni yaa ŋwɛi fiofio koni ana lɛ ojogbaŋŋ lɛ hu he. Nakai nɔŋŋ esa akɛ wɔbɔ mɔdɛŋ waa diɛŋtsɛ koni wɔná sui kɛ subaŋi ni tamɔ Kristo nɔ̃. Bɔ fɛɛ bɔ ni fee lɛ, abaayɔse mɔdɛŋbɔɔ ni tamɔ nɛkɛ, taakɛ Paulo ŋma kɛyaha Timoteo lɛ po akɛ: “Mɛi fɛɛ ana oshweremɔ faŋŋ.” (1 Timoteo 4:15; Mateo 5:16) Mɛni ji Kristofoi anitsumɔi komɛi ni tswaa wɔ emaa shi?
9. (a) Bɔni afee ni wɔkase Kristo yɛ wɔshiɛmɔ nitsumɔ lɛ mli lɛ, mɛɛ otii komɛi ni abaanyɛ ashɛ he wɔɔnyɛ wɔkɛma wɔhiɛ? (b) Te wɔfeɔ tɛŋŋ wɔleɔ akɛ Yehowa sumɔɔ ni wɔná wɔshiɛmɔ nitsumɔ lɛ mli miishɛɛ?
9 Yesu tuu sanekpakpa lɛ shiɛmɔ kɛ ehe nitsɔɔmɔ ewo wɔdɛŋ. (Mateo 24:14; 28:19, 20) Efee nɔkwɛmɔnɔ ni yeɔ emuu efɔ̃ shi, ni ekɛ ekãa ye odase kɛmɔ shi. Yɛ anɔkwale mli lɛ, wɔnyɛŋ wɔfee lɛ ojogbaŋŋ taakɛ efee lɛ. Shi kɛlɛ, bɔfo Petro kɛ oti nɛɛ ma shi eha wɔ akɛ: “Nuntsɔ, Kristo lɛ, nyɛbua lɛ krɔŋkrɔŋ yɛ nyɛtsuii amli; ni daa nɛɛ nyɛsaa nyɛhe nyɛtoa, koni nyɛná hetoo nyɛha mɔ fɛɛ mɔ ni biɔ nyɛ hiɛnɔkamɔ ni yɔɔ nyɛmli lɛ shishi lɛ, kɛ mlijɔlɛ kɛ gbeyeishemɔ.” (1 Petro 3:15) Kɛ onuuu he akɛ ‘daa nɛɛ osaako ohe otoko akɛ oooha hetoo’ lɛ, onijiaŋ akaje wui. Okɛ otii ni obaanyɛ oshɛ he ni baaye abua koni oya hiɛ fiofio lɛ ama ohiɛ kɛshɛ nakai oti lɛ he. Ohe ni obaasaa kɛtsɔ hiɛ lɛ baanyɛ aha otsake oshiɛmɔ wiemɔ lɛ mli loo okɛ ŋmalɛ kome loo enyɔ afata he. Obaanyɛ okɛ otii amamɔ ohiɛ akɛ okɛ Biblia he woji babaoo baaha, obaafee sɛɛsaramɔi babaoo, loo obaaje Biblia mli nikasemɔ shishi. Esaaa akɛ amaa efalɛ nɔ mi ŋmiiŋmi—taakɛ eji yɛ ŋmɛlɛtswai abɔ, woji abɔ, loo nikasemɔi abɔ ni afee lɛ gbɛfaŋ—shi moŋ bɔ ni emɔɔ shi ehaa. Otii ni wɔbaanyɛ wɔshɛ he ni wɔkɛaamamɔ wɔhiɛ ní wɔɔbɔ mɔdɛŋ koni wɔshɛ he lɛ baanyɛ aye abua wɔ koni wɔná wɔhe ni wɔkɛaaha yɛ shiɛmɔ nitsumɔ lɛ mli lɛ mli ŋɔɔmɔ. No ji nɔ ni Yehowa sumɔɔ—koni wɔkɛ “miishɛɛ” asɔmɔ lɛ.—Lala 100:2; okɛto 2 Korintobii 9:7 he.
10. Mɛɛ Kristofoi anitsumɔi krokomɛi esa akɛ wɔtsu he nii, ni mɛɛ gbɛ nɔ enɛɛmɛi yeɔ ebuaa wɔ?
10 Nitsumɔi komɛi hu yɛ ni wɔtsuɔ he nii yɛ asafo lɛ mli ni tswaa wɔ emaa shi yɛ Kristo mli. Nɔ ni he hiaa fe fɛɛ ji ni wɔɔsumɔsumɔɔ wɔhe, ejaakɛ enɛ ji anɔkwa Kristofoi akadimɔ nii. (Yohane 13:34, 35) Yɛ be mli ni wɔkaseɔ nii lolo nɛɛ, wɔteŋ mɛi babaoo basumɔɔ wɔ tsɔɔlɔ lɛ sane, ejaakɛ eji adebɔɔ naa nɔ ko kɛkɛ. Shi kɛlɛ, ani wɔbaanyɛ wɔkɛ Paulo ŋaawoo akɛ ‘wɔmli alɛɛ’ lɛ atsu nii kɛtsɔ mɛi krokomɛi ni yɔɔ asafo lɛ mli lɛ ni wɔɔle amɛ lɛ nɔ? (2 Korintobii 6:13) Ehe miihia hu ni wɔsumɔ onukpai lɛ ni wɔhiɛ asɔ amɛ. Kɛ wɔkɛ amɛ fee ekome, ni wɔtao amɛ Ŋmalɛ naa ŋaawoo ni wɔkɛtsu nii lɛ, wɔbaaha amɛnitsumɔ ni wa lɛ afee mlɛo babaoo. (Hebribii 13:17) Yɛ nakai beaŋ nɔŋŋ lɛ, enɛ baaha atswa wɔ ama shi yɛ Kristo mli.
11. Mɛɛ jwɛŋmɔ ni ja jogbaŋŋ esa akɛ wɔná yɛ baptisimɔ he?
11 Baptisimɔ ji mlifilimɔ be ko! Shi kɛlɛ, esaaa akɛ wɔkpaa gbɛ akɛ shihilɛ fɛɛ shihilɛ ni baa yɛ no sɛɛ lɛ baafee mlifilimɔ nakai nɔŋŋ. Nɔ titri ni fata tswa ni atswaa wɔ amaa shi yɛ Kristo mli lɛ he ji ‘ni wɔɔnyiɛ nakai susumɔkpãa lɛ nɔŋŋ naa.’ (Filipibii 3:16) No etsɔɔɔ akɛ wɔbaafee shɔ̃ɔ ni shihilɛ aje wɔtsine. Nɔ ni etsɔɔ kɛkɛ ji ni wɔnyiɛ kɛya hiɛ yɛ liamɔ ni yɔɔ trɔmɔɔ ko nɔ—yɛ gbɛ kroko nɔ lɛ, ní wɔɔbɔ mɔdɛŋ koni wɔná mumɔŋ subaŋ kpakpai ni wɔkɛaatsu nii gbi fɛɛ gbi kɛ afi fɛɛ afi. Kaimɔ akɛ, “mɔ ni hiɛɔ mli kɛyawulaa shi lɛ, lɛ aaahere eyiwala.”—Mateo 24:13.
Ani ‘Oofi Shi yɛ Hemɔkɛyeli lɛ Mli’?
12. ‘Hemɔkɛyeli ni aaafi shi yɛ mli’ lɛ tsɔɔ mɛni?
12 Beni Paulo kɛ ewiemɔ kuku ni ji etɛ lɛ tsɔɔ bɔ ni wɔkɛ Kristo nyiɛɔ yɛ ekomefeemɔ mli lɛ, ewoɔ wɔ hewalɛ koni ‘wɔfi shi yɛ hemɔkɛyeli lɛ mli.’ Shishitsɔɔmɔ ko kaneɔ akɛ, “ama nɔ mi yɛ hemɔkɛyeli lɛ hewɔ,” ejaakɛ Hela wiemɔ ni Paulo kɛtsu nii lɛ baanyɛ atsɔɔ “koni ama nɔ mi, koni akɛ shiwoo ama nɔ mi, koni yɛ mla naa lɛ akanyɛ atsake.” Beni wɔnilee yaa hiɛ lɛ, ahaa wɔnáa yiŋtoo krokomɛi ni wɔɔdamɔ nɔ wɔna akɛ, hemɔkɛyeli ni wɔyɔɔ yɛ Yehowa Nyɔŋmɔ mli lɛ ma shi shiŋŋ, ni yɛ anɔkwale mli lɛ ato shishi yɛ mla naa. Nɔ ni jɛɔ mli baa ji, ehaa wɔshifimɔ lɛ mli bawaa. Ebafeɔ nɔ ni wa be fɛɛ be akɛ Satan je lɛ aaahoso wɔ kɛya kɛba. Enɛ kaiɔ wɔ Paulo ŋaawoo lɛ akɛ “wɔfoŋ kɛya dalɛ mli” lɛ. (Hebribii 6:1) Dalɛ kɛ shifimɔ fɛɛ nyiɛɔ pɛpɛɛpɛ.
13, 14. (a) Mɛɛ nibii wo klɛŋklɛŋ afii oha lɛ mli Kristofoi ni yɔɔ Kolose lɛ ashifimɔ he gbeyei? (b) Mɛni ji nɔ ni ekolɛ bɔfo Paulo susuɔ he waa lɛ?
13 Awo klɛŋklɛŋ afii oha lɛ mli Kolose Kristofoi lɛ ashifimɔ he gbeyei. Paulo bɔ kɔkɔ akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yakashishiumɔ akaŋɔ nyɛ nom, yɛ gbɔmɛi ablemasaji kɛ je nɛŋ shishijee nibii ni jeee Kristo lɛ anaa.” (Kolosebii 2:8) Paulo sumɔɔɔ ni alaka Kolosebii ni ebatsɔ “[Nyɔŋmɔ] suɔmɔ bi lɛ maŋtsɛyeli lɛ” shishibii lɛ, ni akajie amɛ kɛjɛ amɛ mumɔŋ shihilɛ ni jɔɔmɔ yɔɔ nɔ lɛ mli. (Kolosebii 1:13) Mɛɛ gbɛ nɔ abaatsɔ alaka amɛ? Paulo wie “jeŋ nilee” he, ni nakai be lɛ pɛ ji be mli ni nɛkɛ wiemɔ nɛɛ jeɔ kpo yɛ Biblia lɛ mli. Ani eewie Hela jeŋ nilelɔi tamɔ Plato kɛ Socrates ahe? Eyɛ mli akɛ enɛɛmɛi wo anɔkwa Kristofoi ahe gbeyei moŋ, shi yɛ nakai gbii lɛ amli lɛ, akɛ wiemɔ ni ji “jeŋ nilee” lɛ tsuɔ nii yɛ gbɛi sɔrɔtoi anɔ. Bei pii lɛ akɛtsuɔ nii kɛkɔɔ kui babaoo kɛ gbɔmɛi ni hiɛ susumɔ kome he—Nyɔŋmɔ jalɔi po. Ákɛ nɔkwɛmɔnɔ lɛ, klɛŋklɛŋ afii oha lɛ mli Yudafoi ni tamɔ Josephus kɛ Philo tsɛɔ amɛ diɛŋtsɛ amɛ jamɔ lɛ akɛ jeŋ nilee—ekolɛ koni amɛha mɛi aná he miishɛɛ waa.
14 Jeŋ nileei komɛi ni ekolɛ Paulo susuɔ he waa lɛ kɔɔ jamɔ he. Sɛɛ mli yɛ nakai yitso lɛ nɔŋŋ mli yɛ wolo ni eŋma kɛyaha Kolosebii lɛ mli lɛ, ekɛ mɛi ni tsɔɔ mɛi akɛ, “Kaamɔ mli, ni kaasa onaa, ni kaata he tete” lɛ wie, ni kɛtsɔ no nɔ lɛ, ewie Mose Mla ni Kristo gbele lɛ jie kɛjɛ jɛmɛ lɛ fãi sɔrɔtoi ahe. (Romabii 10:4) Kɛfata wɔŋjalɔi ajeŋ nileei ahe lɛ, no mli lɛ nibii ni náa mɔ nɔ hewalɛ ni woɔ asafo lɛ mumɔŋ shihilɛ he gbeyei lɛ miiya nɔ. (Kolosebii 2:20-22) Paulo bɔ kɔkɔ eshi jeŋ nilee ni ji “je nɛŋ shishijeenii lɛ” fã lɛ. Adesai ji mɛi ni kɛ amale tsɔɔmɔ ni tamɔ nɛkɛ ba.
15. Te wɔbaafee tɛŋŋ wɔkwa susumɔ ni wɔkɛkpeɔ ni damɔɔɔ ŋmalɛ nɔ ni aaahoso wɔ kɛya kɛba lɛ?
15 Adesai asusumɔi kɛ jwɛŋmɔ ni akɛaatsu nii ni edamɔɔɔ Nyɔŋmɔ Wiemɔ lɛ nɔ jogbaŋŋ lɛ baanyɛ awo Kristofoi ashifimɔ he gbeyei. Esa akɛ wɔkwɛ jogbaŋŋ ŋmɛnɛ yɛ hegbeyeiwoo nibii ni tamɔ enɛɛmɛi ahe. Bɔfo Yohane wo hewalɛ akɛ: “Suɔmɔ mɛi, nyɛkahea mumɔ fɛɛ mumɔ nyɛyea; shi moŋ nyɛkaa mumɔi lɛ nyɛkwɛa akɛ Nyɔŋmɔ mli amɛjɛ lo.” (1 Yohane 4:1) No hewɔ lɛ, kɛ skulnyo ko bɔ mɔdɛŋ koni ekɔne oyiŋ akɛ Biblia mli shishitoo mlai ni ooohi shi yɛ naa lɛ be eho, aloo kɛ naanyo ko fee tamɔ nɔ ni eewo bo hewalɛ koni okɛfee osubaŋ akɛ ooodi heloonaa nibii asɛɛ, loo kɛ naanyo nitsulɔ tsɔ ŋaa gbɛ nɔ enyɛ onɔ koni ofee nɔ ko ni kɛ ohenilee ni Biblia etsɔse lɛ lɛ kpãaa gbee, loo kɛ naanyo heyelilɔ ko wie wiemɔi komɛi ni mli wa ni esaaa, yɛ mɛi krokomɛi ni yɔɔ asafo lɛ mli lɛ ahe, ni damɔ lɛ diɛŋtsɛ ejwɛŋmɔ nɔ lɛ, bo lɛ kaakpɛlɛ nɔ ni amɛkɛɔ lɛ nɔ kɛkɛ. Halamɔ mli koni ole nɔ ni kɛ Nyɔŋmɔ Wiemɔ lɛ kpãaa gbee. Yɛ be mli ni wɔfeɔ nakai lɛ, wɔbaaya nɔ wɔfi shi yɛ be mli ni wɔkɛ Kristo nyiɛɔ yɛ ekomefeemɔ mli lɛ.
“Nyɛkɛ Hemɔkɛyeli Atekea Nɔ yɛ Shidaa Mli”
16. Mɛni ji fã ni ji ejwɛ ni tsɔɔ Kristo ni akɛ lɛ aaanyiɛ yɛ ekomefeemɔ mli lɛ, ni mɛɛ sane wɔbaanyɛ wɔbi?
16 Kristo ni akɛ lɛ aaanyiɛ yɛ ekomefeemɔ mli lɛ fã ni ji ejwɛ ni Paulo tsĩ tã lɛ ji ni ‘wɔkɛ hemɔkɛyeli ateke nɔ yɛ shidaa mli.’ (Kolosebii 2:7) Wiemɔ ni ji ‘ateke nɔ’ lɛ haa wɔkaiɔ faa ni eyi kɛteke efãi lɛ. Enɛ tsɔɔ akɛ, yɛ wɔ ni ji Kristofoi lɛ agbɛfaŋ lɛ, esa akɛ wɔ shidaa afee nɔ ko ni yaa nɔ aahu loo nɔ ko ni yaa nɔ be fɛɛ be. Wɔteŋ mɔ fɛɛ mɔ baanyɛ abi yɛ gbɛ ni ja nɔ akɛ, ‘Ani midaa shi?’
17. (a) Mɛni hewɔ abaanyɛ akɛɛ akɛ wɔ fɛɛ wɔyɛ nii babaoo ni wɔbaada shi yɛ he, yɛ bei ni mli wawai po amli lɛ? (b) Mɛni ji nikeenii komɛi ni jɛ Yehowa ŋɔɔ ni onuɔ he akɛ esa akɛ oda shi yɛ he titri?
17 Lɛɛlɛŋ, wɔ fɛɛ wɔyɛ yiŋtoo saŋŋ ni wɔɔdamɔ nɔ wɔteke nɔ kɛ shidaa ni wɔkɛhaa Yehowa gbi fɛɛ gbi lɛ mli. Yɛ bei ni ehiii kwraa po mli lɛ, ekolɛ nibii bibii komɛi yɛ ni haa wɔhe jɔɔ wɔ fiofio. Naanyo naa mɔ mɔbɔ. Suɔlɔ kɛ enine taa mɔ he kɛwoɔ mɔ hewalɛ. Gbɛkɛnaashi wɔ kpakpa ni ŋɔɔ haa anáa hewalɛ ekoŋŋ. Niyenii ni ŋɔɔ jieɔ hɔmɔ naa piŋmɔ kɛjɛɔ jɛmɛ. Loofɔlɔ lala, gbekɛ ko ŋmɔlɔ, atatu bluu ni kpɛlɛɔ, kɔɔyɔɔ ni ŋɔɔ ni tswaa bɛlɛoo—enɛɛmɛi fɛɛ kɛ nibii babaoo baanyɛ aba wɔnɔ yɛ gbi kome mli. Ewaaa kwraa akɛ aaaku hiɛ ashwie nikeenii ni tamɔ nɛkɛ nɔ. Ani enɛɛmɛi fɛɛ etsɔɔɔ akɛ esa akɛ wɔkɛɛ miidao shi? Fɛɛ jɛ Yehowa ŋɔɔ, mɔ ni ji “duromɔnii kpakpai fɛɛ kɛ nikeenii ni hi kɛwula shi fɛɛ lɛ” Jɛɛhe lɛ. (Yakobo 1:17) Ni eha wɔ nikeenii ni yaa hiɛ kwraa fe enɛɛmɛi—ákɛ nɔkwɛmɔnɔ lɛ, wala diɛŋtsɛ. (Lala 36:10) Kɛfata he lɛ, eha wɔ hegbɛ koni wɔhi shi kɛya naanɔ. Bɔni afee ni Yehowa kɛ nikeenii nɛɛ aha lɛ, eto afɔleshãa ni nɔ kwɔ he gbɛjianɔ kɛtsɔ e-Bi koome, “mɔ ni enáa ehe miishɛɛ waa diɛŋtsɛ” ni etsu lɛ kɛba lɛ nɔ.—Abɛi 8:30, NW; Yohane 3:16.
18. Mɛɛ gbɛ nɔ wɔɔtsɔ wɔda Yehowa shi?
18 Belɛ, kwɛ bɔ ni lalatsɛ lɛ wiemɔi ni ji: “Ehi akɛ ada Yehowa shi” lɛ ji anɔkwale ha. (Lala 92:1) Nakai nɔŋŋ Paulo kai Tesalonika Kristofoi lɛ akɛ: “Nyɛdaa shi yɛ nɔ fɛɛ nɔ mli.” (1 Tesalonikabii 5:18; Efesobii 5:20; Kolosebii 3:15) Wɔteŋ mɔ fɛɛ mɔ baanyɛ atswa efai shi akɛ eeefee mɔ ni daa shi babaoo. Esaaa akɛ wɔsɔlemɔi feɔ wɔhiamɔ nii ahe nibimɔi titri ni wɔkɛfɔɔ Nyɔŋmɔ hiɛ. Enɛɛmɛi hi kɛ akɛtsu nii yɛ be ni sa mli. Shi ŋɔɔ lɛ akɛ oyɛ naanyo ko ni kɛ bo wieɔ be mli ni etaoɔ nɔ ko kɛjɛɔ odɛŋ pɛ! No hewɔ lɛ mɛni hewɔ osɔleee ohaaa Yehowa koni oda lɛ shi ni ojie eyi kɛkɛ? Kwɛ bɔ ni sɔlemɔi ni tamɔ nɛkɛ baasa ehiɛ beni emaa ehiɛ shi ekwɛɔ nɛkɛ jeŋ ni ajieee hiɛsɔɔ kpo yɛ mli nɛɛ! Sɛɛnamɔ ni ji enyɔ lɛ ji akɛ, sɔlemɔi ni tamɔ nɛkɛ baanyɛ aye abua koni wɔkɛ wɔjwɛŋmɔ ama shihilɛ mli nibii kpakpai sɔrɔtoi lɛ anɔ, ni ehaa wɔkaiɔ bɔ ni ajɔɔ wɔ lɛɛlɛŋ aha.
19. Mɛɛ gbɛ nɔ Paulo wiemɔ ni yɔɔ Kolosebii 2:6, 7 (NW) lɛ tsɔɔ akɛ wɔ fɛɛ wɔbaanyɛ wɔya hiɛ daa yɛ Kristo ni wɔkɛ lɛ aaanyiɛ lɛ mli?
19 Ani ejeee nɔ ni sa kadimɔ akɛ abaanyɛ aná gbɛtsɔɔmɔ ni nilee fa yɛ mli lɛ kɛjɛ wiemɔ kome mli yɛ Nyɔŋmɔ Wiemɔ lɛ mli? Ŋaawoo ni Paulo kɛha akɛ wɔya nɔ wɔkɛ Kristo anyiɛ lɛ ji nɔ ko ni esa akɛ wɔteŋ mɔ fɛɛ mɔ abo toi. Belɛ nyɛhaa wɔtswaa wɔfai shi akɛ ‘wɔshishifãi aaamɔmɔ shi yɛ Kristo mli,’ ‘ni atswa wɔ ama shi yɛ emli,’ ‘ni wɔfi shi yɛ hemɔkɛyeli lɛ mli,’ ni ‘wɔteke nɔ yɛ shidaa mli.’ Ŋaawoo ni tamɔ nɛkɛ lɛ he hiaa mɛi heei ni abaptisi amɛ lɛ titri. Shi ekɔɔ wɔ fɛɛ wɔhe. Susumɔ bɔ ni tsoshishifã ni yaa shikpɔŋ tɔ̃ɔ lɛ daa waa kɛboteɔ shikpɔŋ be fɛɛ be kɛ bɔ ni tsũ ni amaa lɛ yaa ŋwɛi waa fiofio lɛ he okwɛ. No hewɔ lɛ nyiɛmɔ ni wɔkɛ Kristo nyiɛɔ lɛ baaa naagbee kɔkɔɔkɔ. Hegbɛ babaoo yɛ lolo akɛ wɔɔdara yɛ mumɔŋ. Yehowa baaye ebua wɔ ni ebaajɔɔ wɔ, ejaakɛ eesumɔ ni wɔya nɔ wɔkɛ lɛ kɛ esuɔmɔ Bi lɛ anyiɛ kɛya naanɔ.
Te Obaaha Hetoo Tɛŋŋ?
◻ Mɛni fata Kristo ni akɛ lɛ aaanyiɛ yɛ ekomefeemɔ mli lɛ he?
◻ ‘Shishifãi ni aaamɔmɔ shi yɛ Kristo mli’ lɛ tsɔɔ mɛni?
◻ Abaanyɛ ‘atswa wɔ ama shi yɛ Kristo mli’ yɛ mɛɛ gbɛ nɔ?
◻ Mɛni hewɔ ehe hiaa waa akɛ ‘aaafi shi yɛ hemɔkɛyeli lɛ mli’?
◻ Mɛɛ yiŋtoi wɔyɔɔ ni wɔɔdamɔ nɔ ‘wɔteke nɔ kɛ shidaa’?
[Mfoniri ni yɔɔ baafa 10]
Ekolɛ anyɛŋ ana tso shishifãi, shi amɛhaa lɛ niyenii ni amɛhaa emaa shi shiŋŋ