Sanebimɔi ni Jɛ Kanelɔi Adɛŋ
Kooloi ni he tse enyiɛ Noa kɛwo adeka lɛ mli—kpawo kpawo aloo enyɔnyɔ nakai toi kpawo?
Beni Noa kpɛ adeka lɛ egbe naa lɛ, Yehowa kɛɛ lɛ akɛ: “Bo kɛ owe lɛ fɛɛ abote adeka lɛ mli; ejaakɛ bo mina akɛ jalɔ jio yɛ mihiɛ yɛ nɛkɛ yinɔ nɛŋ. Ŋɔɔ kooloi ni he tse lɛ fɛɛ ateŋ kpawo kpawo, nuu kɛ yoo, kɛ kooloi ni he tseee lɛ enyɔnyɔ, nuu kɛ yoo.” (1 Mose 7:1, 2) Biblia shishitsɔɔmɔi komɛi tamɔ The New English Bible, The New Jerusalem Bible, kɛ Tanakh—The Holy Scriptures lɛ tsɔɔ Hebri wiemɔ diɛŋtsɛ ni atsɔɔ shishi akɛ kpawo kpawo lɛ shishi akɛ “enyɔnyɔ toi kpawo.”
Hebri wiemɔ pɔtɛɛ ni akɛtsu nii yɛ nakai ŋmalɛ lɛ mli lɛ shishi diɛŋtsɛ ji “kpawo kpawo.” (1 Mose 7:2) Shi yɛ Hebri wiemɔ mli lɛ, kɛ atsi yibɔ ko tã shii enyɔ lɛ etsɔɔɔ doo akɛ esa ákɛ akɛ yibɔ kome afata ekroko lɛ he. Ákɛ nɔkwɛmɔnɔ lɛ, 2 Samuel 21:20 lɛ wieɔ “nuu nyenyereŋŋ ko” kɛ “eninewabii ekpa-ekpa kɛ enanewabii ekpa-ekpa” lɛ he. Eyɛ mli akɛ yɛ Hebri wiemɔ mli lɛ atĩ yibɔ ni ji “ekpaa” lɛ mli shii enyɔ moŋ, shi no etsɔɔɔ akɛ nakai oblaŋ lɛ yɛ waobii 12 yɛ enine abɛku kɛ 12 yɛ eninejurɔ, kɛ nakai yibɔ nɔŋŋ yɛ enane abɛku kɛ enanejurɔ. Hebri wiemɔ he mlai tsɔɔ akɛ yibɔ ni atĩ mli shii enyɔ lɛ tsɔɔ akɛ waobii ekpaa yɔɔ enine fɛɛ nine he ni nakai nɔŋŋ eji yɛ enaji ahe.
No hewɔ lɛ yibɔ ni ji “kpawo kpawo” ni yɔɔ 1 Mose 7:2 lɛ etsɔɔɔ enyɔnyɔ nakai toi kpawo ni ji 14, ni nakai nɔŋŋ “enyɔnyɔ” ni atsĩ tã yɛ 1 Mose 7:9, 15 lɛ hu etsɔɔɔ akɛ efeɔ ejwɛ. No hewɔ lɛ, kooloi ni he tse lɛ “kpawo kpawo” kɛ nɔ ni he tseee lɛ “enyɔnyɔ” aŋɔwo adeka lɛ mli.
Ni mɛni abaanyɛ akɛɛ yɛ wiemɔ ni ji “nuu kɛ yoo” ni atsi tã kɛnyiɛ yibɔ ni ji “kpawo kpawo” lɛ sɛɛ yɛ 1 Mose 7:2 lɛ he? Nakai wiemɔ lɛ haa mɛi komɛi susuɔ akɛ akɛɛ Noa koni eŋɔ kooloo ni he tse lɛ nuu kɛ yoo nuu kɛ yoo nakai toi kpawo bɔni afee ni amɛfɔ ni amɛyi afa. Kɛlɛ, jeee no ji yiŋtoo titri hewɔ ni abaa kooloi ni he tse lɛ ayi. Mose Klɛŋklɛŋ Wolo 8:20 haa wɔleɔ akɛ beni Noa je adeka lɛ mli lɛ, “[E]ma afɔleshaa latɛ eha Yehowa, ni eŋɔ shĩa kooloi ni he tse lɛ fɛɛ mli eko kɛ loofɔji ni he tse lɛ fɛɛ mli eko ni eŋɔshã shãa afɔle yɛ afɔleshaa latɛ lɛ nɔ.” Akɛni kooloi ni he tse kpawo kpawo Noa kɛwo adeka lɛ mli hewɔ lɛ, ená ekomekomei ni bɛ hefatalɔ lɛ ekɛshã afɔle, ni eshwɛ kooloi lɛ nuu kɛ yoo nuu kɛɛ yoo nakai etɛ, ni nomɛi fɔ ni amɛyi fa yɛ shikpɔŋ lɛ nɔ.