Te Gbɔmɔ Aaafee Tɛŋŋ Ahi Shi yɛ Nyɔŋmɔ Subaŋ Nɔ?
“NYƆŊMƆ bɔ gbɔmɔ yɛ esubaŋ lɛ nɔ, Nyɔŋmɔ subaŋ lɛ nɔ ebɔ lɛ yɛ; nuu kɛ yoo ebɔ amɛ.” Nakai ji bɔ ni sane ni ajɛ mumɔŋ aŋma lɛ kɛɔ, shi mɛni nakai wiemɔ lɛ tsɔɔ? Mɛɛ gbɛ nɔ abɔ klɛŋklɛŋ nuu kɛ yoo lɛ yɛ Nyɔŋmɔ subaŋ nɔ yɛ?—1 Mose 1:27.
Ani amɛtamɔ Nyɔŋmɔ yɛ gbɔmɔtsoŋ? Dabi, enyɛŋ ebalɛ nakai kɔkɔɔkɔ. Gbɔmɔ lɛ, adesa ni, heloo ni, ni afee lɛ ni ehi shikpɔŋ nɔ. Nyɔŋmɔ lɛ mumɔ ni, ni eyɛ ŋwɛi anunyam ni anyɛŋ asusu he, ní adesa ko nyɛŋ abɛŋkɛ po mli. (2 Mose 33:18-20; 1 Korintobii 15:50) Belɛ, mɛɛ gbɛ nɔ abɔ gbɔmɔ yɛ Nyɔŋmɔ subaŋ nɔ yɛ mɔ? Kɛ shishinumɔ akɛ aha gbɔmɔ nyɛmɔ ni ekɛ Nyɔŋmɔ sui titrii lɛ atsu nii—suɔmɔ, jalɛsaneyeli, nilee, kɛ hewalɛ—kɛ sui krokomɛi hu.
Yehowa Sui
Yehowa Nyɔŋmɔ sui lɛ jeɔ kpo yɛ ebɔɔnii lɛ fɛɛ mli, shi ajie amɛ kpo yɛ gbɛ ni sa kadimɔ nɔ yɛ bɔ ni ekɛ klɛŋklɛŋ adesai enyɔ, Adam kɛ Hawa ye ha lɛ mli. (Romabii 1:20) Anaa esuɔmɔ lɛ ejaakɛ ebɔ shikpɔŋ lɛ ni ehi pɛpɛɛpɛ bɔ ni sa kɛha adesa ni ehi nɔ. Yehowa bɔ ŋa ni eye emuu eha nuu lɛ koni efee ehefatalɔi kɛ bii ni ebaafɔ lɛ anyɛ. Ekɛ mɛi enyɔ lɛ fɛɛ wo abɔɔ fɛfɛo ko mli ni eha amɛ nibii ni he baahia amɛ lɛ fɛɛ babaoo koni amɛya nɔ amɛhi shi daa ni amɛna miishɛɛ. Ni nɔ ni yɔɔ nyam fe fɛɛ ji akɛ, Nyɔŋmɔ ha amɛ hegbɛ akɛ amɛhi shi kɛya naanɔ.—1 Mose 2:7-9, 15-24.
Anaa Nyɔŋmɔ nilee lɛ yɛ kaa ni ekɛba klɛŋklɛŋ adesai enyɔ lɛ anɔ lɛ mli. Kɛji amɛbaaya nɔ amɛfee Yehowa jeŋ muu fɛɛ weku lɛ mli bii, ni amɛhi shi kɛya naanɔ akɛ adesai aweku muu lɛ fɛɛ afɔlɔi lɛ, no lɛ esa akɛ amɛfee anɔkwayeli kɛ anɔkwa jamɔ he nɔkwɛmɔ nɔ. No hewɔ lɛ, Yehowa ha amɛ hegbɛ ni amɛkɛtsɔɔ nɔ ni yɔɔ amɛtsui mli yɛ kaa ko ni sa shishi—esaaa ni amɛyeɔ ekpakpa kɛ efɔŋ lee tso lɛ yibii lɛ eko kwraa. Kwɛ bɔ ni eji nilee gbɛ yɛ Yehowa gbɛfaŋ akɛ eŋmɛ adesai agbɛ ni amɛkɛtsɔɔ toiboo ni amɛfeɔ kɛ suɔmɔ ni amɛyɔɔ amɛha lɛ dani ekɛ hegbɛi ni yɔɔ nyam ni ekpɛ eyiŋ akɛ ekɛbaaha amɛ lɛ aha amɛ!
Ana Nyɔŋmɔ jalɛsaneyeli yɛ bɔ ni ebi taomɔ nii ni nɔ kwɔlɔ yɛ ebɔɔnii adɛŋ kɛ agbɛnɛ hu, yɛ bɔ ni eŋmɛɛɛ nakai shishitoo taomɔ nii lɛ ahe ni akɛsaa lɛ mli. Ana enɛ yɛ hegbɛ ni eha Adam kɛ Hawa ni amɛfee nɔ ni ja lɛ mli. Ni beni amɛfeee nakai lɛ, ana ejalɛsaneyeli yɛ fɔ ni ebu amɛ koni amɛna atuatsemɔ he toigbalamɔ lɛ mli amanehulu lɛ hu mli.
Ana Yehowa hewalɛ hu yɛ bɔ ni etsu etoigbalamɔ lɛ he nii lɛ mli. Satan, atuatselɔ kpeteŋkpele lɛ wiemɔ tsɔɔ akɛ amalelɔ ji Yehowa, ni Satan kɛ nibii wuji shwie Hawa hiɛ kɛji eeegbo Nyɔŋmɔ nɔ toi. (1 Mose 3:1-7) Shi Satan nyɛɛɛ aha eshiwoo lɛ aba mli. Enyɛɛɛ etsĩ Yehowa naa ni ekashwie Adam kɛ Hawa kɛmiijɛ Eden trom lɛ mli, ni enyɛɛɛ etsĩ wiemɔi ni Nyɔŋmɔ kɛ Adam wie lɛ amlibaa naa, akɛ: “Sũ jio, ni sũ mli oooku osɛɛ kɛaatee.” (1 Mose 3:19) Shi, Yehowa tsuuu gbele toigbalamɔ lɛ he nii amrɔ nɔŋŋ, ni ejie esuɔmɔ lɛ kpo babaoo yɛ enɛ feemɔ mli. Eŋmɛ Adam kɛ Hawa gbɛ koni amɛna be ni amɛkɛfɔ bii, mɛi anɔ ni ebaatsɔ koni eha eshishijee yiŋtoo ni eyɔɔ kɛha adesai lɛ aba mli lɛ.—1 Mose 1:28.
Yɛ naagbee lɛ, Yehowa Nyɔŋmɔ jalɛsaneyeli, suɔmɔ, hewalɛ, kɛ nilee lɛ fɛɛ jeɔ kpo yɛ eshiwoo ni ekɛha akɛ ebaaha seshi ko ni baakpata Satan nitsumɔi lɛ ahiɛ ni ebaasaa nibii gbohii ni ejɛ nakai klɛŋklɛŋ atua ni atse ashi ŋwɛi nɔyeli lɛ mli eba lɛ mli. (1 Mose 3:15) Mɛɛ Bɔlɔ ni he yɔɔ naakpɛɛ wɔyɔɔ nɛkɛ!
Mɔdɛŋ ni Abɔɔ ni Akase Nyɔŋmɔ
Eyɛ mli akɛ adesai yeee emuu dɔŋŋ moŋ, shi amɛbaanyɛ amɛjie Nyɔŋmɔ sui lɛ akpo lolo. No hewɔ lɛ, Paulo wo ebeaŋ Kristofoi lɛ hewalɛ akɛ: “Nyɛfea Nyɔŋmɔ kaselɔi, tamɔ bii ni asumɔɔ.” (Efesobii 5:1) Shi, mɛi babaoo ji mɛi ni tsɔɔ bulɛ ni amɛbɛ kwraa amɛha Nyɔŋmɔ sui lɛ, yɛ yinɔsane be fɛɛ mli. Beni shɛɔ Noa beaŋ lɛ, no mli lɛ adesai efite aahu akɛ Yehowa kpɛ eyiŋ akɛ ebaakpata adesai fɛɛ ahiɛ ja Noa kɛ eweku lɛ pɛ. Noa ji “jalɔ, ni eye emuu yɛ eyinɔbii lɛ ateŋ,” ni ejie suɔmɔ ni eyɔɔ kɛha Nyɔŋmɔ lɛ kpo kɛtsɔ Nyɔŋmɔ kitai lɛ anɔyeli nɔ. “Noa fee nakai; bɔ ni Nyɔŋmɔ fã lɛ lɛ, nakai pɛpɛɛpɛ efee.” (1 Mose 6:9, 22) Noa hi shi akɛ “jalɛ shiɛlɔ” ni ekɛjie suɔmɔ ni eyɔɔ kɛha enaanyo gbɔmɔ kɛ bɔ ni ekɛ ehe kpɛtɛɔ jalɛsaneyeli he lɛ kpo. (2 Petro 2:5) Ejie nilee kpo, ni ekɛ egbɔmɔtsoŋ hewalɛ hu tsu nii yɛ gbɛ ni ja nɔ kɛtsɔ famɔ ni Nyɔŋmɔ kɛha lɛ akɛ ekpɛ adeka, ni ekɛ niyenii ato mli, ebua kooloi anaa, ni ebote adeka lɛ mli yɛ Yehowa famɔ naa lɛ he nitsumɔ nɔ. Ejie bɔ ni esumɔɔ jalɛ nifeemɔ lɛ hu kpo yɛ gbɛ ni eŋmɛɛɛ ebeaŋ bii fɔji lɛ ni amɛfite lɛ lɛ nɔ.
Biblia lɛ wieɔ mɛi krokomɛi babaoo ni jie Nyɔŋmɔ sui akpo nakai nɔŋŋ lɛ ahe. Amɛteŋ klɛŋklɛŋ mɔ ji Yesu Kristo, mɔ ni eye emuu yɛ Nyɔŋmɔ subaŋ nɔ lɛ, ni no hewɔ lɛ enyɛ ewie akɛ: “Mɔ ni ena mi lɛ, ena Tsɛ lɛ.” (Yohane 14:9) Yɛ sui ni Yesu jie lɛ kpo lɛ ateŋ lɛ, nɔ ni sa kadimɔ fe fɛɛ ji suɔmɔ. Suɔmɔ ni eyɔɔ eha e-Tsɛ kɛ adesai lɛ tsirɛ lɛ ni eshi eŋwɛi shihilɛ he lɛ ni ebahi shi akɛ gbɔmɔ yɛ shikpɔŋ nɔ. Etsirɛ lɛ ni ewo e-Tsɛ lɛ hiɛ nyam kɛtsɔ ejalɛ su lɛ nɔ, koni eshiɛ yiwalaheremɔ sanekpakpa lɛ hu etsɔɔ adesai. (Mateo 4:23; Yohane 13:31) No sɛɛ lɛ, suɔmɔ tsirɛ Yesu ni ekɛ ewala ni eye emuu lɛ ha kɛha adesai ayiwalaheremɔ, kɛ nɔ ni he hiaa fe fɛɛ lɛ, kɛha Nyɔŋmɔ gbɛi lɛ hetsemɔ. (Yohane 13:1) Beni wɔbɔɔ mɔdɛŋ ni wɔkase Nyɔŋmɔ lɛ, ani nɔkwɛmɔ nɔ ko yɛ ni hi ni wɔɔnyiɛ sɛɛ fe Yesu Kristo?—1 Petro 2:21.
Mɛɛ Gbɛ nɔ Wɔɔtsɔ Wɔtamɔ Nyɔŋmɔ Jogbaŋŋ Ŋmɛnɛ?
Te wɔɔfee tɛŋŋ wɔjie Nyɔŋmɔ sui akpo ŋmɛnɛ, ni wɔtsɔ nɔ wɔfee wɔnii yɛ Nyɔŋmɔ subaŋ nɔ? Ojogbaŋŋ, susumɔ su ni ji suɔmɔ lɛ he klɛŋklɛŋ okwɛ. Yesu kɛɛ: “Suɔmɔ Nuŋtsɔ [Yehowa] o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” Mɛɛ gbɛ nɔ wɔɔtsɔ wɔsumɔ Nyɔŋmɔ? Bofɔ Yohane haa hetoo akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.”—Mateo 22:37; 1 Yohane 5:3.
Shi, eji anɔkwale akɛ esa akɛ wɔle Yehowa kitai lɛ koni wɔnyɛ wɔye nɔ. No feemɔ biɔ nikanemɔ, nikasemɔ, kɛ Nyɔŋmɔ Wiemɔ, ni ji Biblia lɛ kɛ Biblia kasemɔ he woji anɔjwɛŋmɔ. Esa akɛ wɔnyɛ wɔkɛɛ taakɛ lalatsɛ lɛ kɛɛ lɛ, akɛ: “Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ.” (Lala 119:97) Beni wɔyaa nɔ wɔnuɔ Nyɔŋmɔ Wiemɔ lɛ shishi jogbaŋŋ lɛ, wɔbaleɔ bɔ ni Nyɔŋmɔ susuɔ nii ahe ehaa jogbaŋŋ. Wɔbasumɔɔ jalɛ nifeemɔ ni wɔnyɛɔ mlakwamɔ. (Lala 45:8) Enɛ mli Adam tɔ̃ yɛ. Ele Yehowa mla, shi esumɔɔɔ lɛ jogbaŋŋ bɔ ni aaaha ekpɛtɛ he. Kɛ wɔmiikane Nyɔŋmɔ Wiemɔ lɛ, esa akɛ wɔbi wɔhe be fɛɛ be akɛ, ‘Te enɛ kɔɔ mihe ehaa tɛŋŋ? Mɛni manyɛ mafee ni maha mijeŋba kɛ Nyɔŋmɔ sui lɛ akpa gbee kɛmɔ shi?’
Yesu hu wie akɛ: “Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mateo 22:39) Mɔ fɛɛ mɔ ni yɔɔ gbɔmɔtsoŋ hewalɛ kpakpa mli lɛ sumɔɔ ehe ni etaoɔ nɔ ni hi fe fɛɛ kɛhaa ehe. Tɔmɔ ko bɛ he. Shi ani wɔjieɔ suɔmɔ ni tamɔ nakai kpo wɔtsɔɔ wɔnaanyo hu? Ani wɔnyiɛɔ Biblia mli famɔ nɛɛ sɛɛ, akɛ: “Mɛi ni sa ejurɔfeemɔ lɛ, kaakãmã amɛ, kɛji efeemɔ yɛ odɛŋ hewalɛ mli lɛ”?—Abɛi 3:27; Galatabii 6:10.
Ni su ni ji nilee lɛ hu? Mɔdɛŋ ni wɔɔbɔ akɛ wɔɔjie nɛkɛ su nɛɛ kpo lɛ haa wɔkaseɔ Biblia lɛ ejaakɛ jɛmɛ ji he ni ŋwɛi nilee yɔɔ. Lala 119:98-100 kaneɔ akɛ: “Okitai lɛ haa mileɔ nii fe mihenyɛlɔi lɛ, ejaakɛ amɛkɛ mi yɛ daa. Miyɛ yitsoŋ hu fe mitsɔɔlɔi lɛ fɛɛ, ejaakɛ odasei lɛ ahe mijwɛŋɔ. Miyooɔ sane sɛɛ fe onukpai po, ejaakɛ miyeɔ okpɔi lɛ anɔ.” Awieɔ nilee he yɛ Abɛi 3:18 akɛ “wala tso.” Kɛ wɔna nilee ni wɔkɛtsu nii lɛ, no lɛ wɔbaana Nyɔŋmɔ nɔkpɛlɛmɔ kɛ edɛŋ nyɔmɔwoo ni ji naanɔ wala.—Jajelɔ 7:12.
Jalɛsaneyeli hu? Jalɛsane ji su ko ni he hiaa waa kɛha mɛi ni baasa Nyɔŋmɔ hiɛ lɛ, yɛ nɛkɛ jeŋ fɔŋ nɛɛ mli. Yesu sumɔ jalɛ nifeemɔ (jalɛsaneyeli) ni enyɛ mlakwamɔ. (Hebribii 1:9) Kristofoi hu feɔ nakai ŋmɛnɛ. Jalɛsaneyeli tsirɛɔ amɛ ni amɛhiɛ sɔɔ sui kpakpai. Amɛtsiɔ amɛhe kɛjɛɔ je nɛɛ gbɛi fɔji lɛ ahe ni amɛhaa Nyɔŋmɔ suɔmɔnaa nifeemɔ feɔ nɔ ni he hiaa fe fɛɛ yɛ amɛshihilɛ mli.—1 Yohane 2:15-17.
Yɛ hewalɛ gbɛfaŋ lɛ, wɔteŋ mɔ fɛɛ mɔ yɛ efalɛ ko kɛ̃. Wɔyɛ gbɔmɔtsoŋ kɛ jwɛŋmɔŋ hewalɛ fɛɛ yɛ wɔ adebɔɔ naa, ni beni wɔdaraa akɛ Kristofoi lɛ, wɔnaa hewalɛ hu yɛ mumɔŋ shishinumɔ naa. Yehowa haa wɔhewalɛ lɛ faa kɛyaa hiɛ kɛtsɔɔ emumɔ krɔŋkrɔŋ lɛ nɔ, aahu akɛ eyɛ mli akɛ wɔtamɔ mɛi ni he waaa moŋ, shi wɔnyɛɔ wɔfeɔ Nyɔŋmɔ suɔmɔnaa nii. Paulo kɛɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.” (Filipibii 4:13) Kɛ wɔsɔle wɔbi Yehowa mumɔ lɛ, wɔ hu wɔnine baashɛ nakai hewalɛ lɛ nɔ.
Sanekpakpa lɛ Shiɛmɔ
Anaa bɔ ni wɔjieɔ Nyɔŋmɔ sui titrii ejwɛ lɛ akpo lɛ jogbaŋŋ yɛ nɛkɛ famɔ nɛɛ toiboo mli, akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛ nyɛ yɛ daa kɛyashi jeŋ naagbee lɛ.” (Mateo 28:19, 20) Tsɔsemɔ nitsumɔ ni tamɔ nɛkɛ haa mɛi ni boɔ toi lɛ naa wala. Mɛɛ suɔmɔ kpojiemɔ fɛfɛo nɛ kɛha mɛi ni, amɛteŋ mɛi babaoo lɛ, gbɔi ji amɛ kwraa kɛha wɔ lɛ!
Kɛfata he lɛ, nɛkɛ nitsɔɔmɔ nɛɛ, nilee gbɛ ni. Ewoɔ yibii ni hiɔ shi daa. Mɛɛ nitsumɔ abaanyɛ awie yɛ he akɛ: “Kɛji ofee enɛ lɛ, ooohere bo diɛŋtsɛ kɛ mɛi ni boɔ bo toi lɛ fɛɛ ayiwala”? (1 Timoteo 4:16) Mɔ ko kwraa bɛ ni laajeɔ nɔ ko yɛ kaselɔ-feemɔ nitsumɔ lɛ mli. Mɛi ni boɔ toi kɛ mɛi ni tsɔɔ lɛ fɛɛ naa naanɔ jɔɔmɔi.
Yɛ jalɛsaneyeli gbɛfaŋ lɛ, Kristofoi miitsɔɔ amɛ Biblia kaselɔi lɛ jalɛ shishitoo mlai. Wɔmiiye wɔmiibua amɛ ni amɛsɔmɔ Yehowa, ‘jalɛsaneyeli Nyɔŋmɔ lɛ.’ (Maleaki 2:17) Abuɔ mɛi ni jɔɔ amɛwala nɔ akɛ amɛkɛbaasɔmɔ Yehowa ŋmɛnɛ, ni amɛyaa nɔ yɛ anɔkwayeli mli lɛ akɛ jalɔi, mɛi ni yeɔ bem, ni enɛ baaha amɛna yibaamɔ kɛfo Harmagedon.—Romabii 3:24; Yakobo 2:24-26.
Mɛɛ hewalɛ kpojiemɔ po ji sanekpakpa lɛ shiɛmɔ kɛ tsɔɔmɔ yɛ jeŋ fɛɛ nɛkɛ! (Mateo 24:14) Ebiɔ tsuishiŋmɛɛ dani anyɛ aya nɔ ashiɛ aahu kɛtsa nɔ yɛ shikpɔŋkukuji ni mɛi pii sumɔɔɔ ni amɛboɔ toi yɛ mli lɛ amli. Shi Yehowa tsɔɔ emumɔ lɛ nɔ ehaa hewalɛ ni he hiaa lɛ koni wɔnyɛ wɔŋmɛ wɔtsui shi kɛyashi naagbee tɔ̃ɔ.—Yesaia 40:30, 31; Mateo 24:13; Luka 11:13.
Lɛlɛŋ, akɛ Adam shwiei ni yeee emuu lɛ, wɔnyɛŋ wɔjie nɛkɛ sui kpakpai nɛɛ akpo kɛmɔ shi. Shi kɛlɛ, kaimɔ akɛ, abɔ gbɔmɔ yɛ Nyɔŋmɔ subaŋ nɔ, ni kɛ wɔbɔ mɔdɛŋ waa akɛ wɔɔtamɔ Nyɔŋmɔ lɛ, no lɛ wɔmiiha yiŋtoo hewɔ ni wɔyɔɔ shihilɛ mli lɛ aba mli yɛ gbɛ ko nɔ. (Jajelɔ 12:13) Kɛ wɔmia wɔhiɛ waa akɛ wɔɔfee bɔ fɛɛ ni wɔɔnyɛ, ni wɔbi eshaifaa kɛji wɔtɔ̃ lɛ, no lɛ wɔbaanyɛ wɔna hiɛnɔkamɔ akɛ wɔbaana yibaamɔ kɛya Nyɔŋmɔ jalɛ jeŋ hee lɛ mli, he ni naagbee lɛ, wɔbaaye emuu kwraa yɛ lɛ. Kɛkɛ lɛ, wɔbaahi paradeiso shikpɔŋ ni adesai ni eye emuu yɔɔ nɔ, ni amɛ fɛɛ amɛmiijie Yehowa Nyɔŋmɔ sui lɛ akpo kɛmiimɔ shi lɛ nɔ. Mɛɛ miishɛɛ nɛ! Yɛ naagbee lɛ, adesai baahi shi yɛ Nyɔŋmɔ subaŋ nɔ, yɛ wiemɔ lɛ shishinumɔ diɛŋtsɛ naa.
[Mfoniri ni yɔɔ baafa 25]
Yesu tsɔɔ wɔ bɔ ni wɔɔfee wɔna Yehowa sui ni jɛ ŋwɛi lɛ
[Mfoniri ni yɔɔ baafa 26]
Yɛ naagbee lɛ, adesai baahi shi yɛ Nyɔŋmɔ subaŋ nɔ, yɛ wiemɔ lɛ shishinumɔ diɛŋtsɛ naa