Ni Oootse Ohe Kwraa Kɛjɛ Apasa Jamɔ He
“Yehowa kɛɛ, ‘Nyɛjea amɛteŋ, . . . ni nyɛkataa muji nɔ ko he, ni mahere nyɛ atuu.—2 KORINTOBII 6:17.
1. Mɛɛ sane ko Satan bɔ mɔdɛŋ ekɛfɔ Yesu hiɛ ni etsu he nii, ni mɛɛ nibii enyɔ hegbɛ ni eha lɛ nɛɛ tsɔɔ wɔ?
“MAŊƆ enɛɛmɛi fɛɛ mahao, kɛji okula shi oja mi.” Eyɛ mli akɛ akɛ nɛkɛ hegbɛ nɛɛ ha yɛ apasa jamɔ shishijee sɛɛ afii akpei abɔ moŋ, shi ekɛ shishinumɔ krɛdɛɛ ko haa ni haa anyɛɔ anaa mɔ ni yɔɔ apasa jamɔ sɛɛ kɛ nɔ ni eyiŋtoo ji yɛ faŋŋ mli. Yɛ afi 29 Ŋ.B. naagbee gbɛ lɛ, Abonsam kɛ je lɛŋ maŋtsɛyelii lɛ fɛɛ tsɔɔ Yesu akɛ kɛji efee tamɔ nɔ ni eeja lɛ kɛkɛ lɛ, ekɛ fɛɛ baaha lɛ. Nɛkɛ nii ni ba nɛɛ tsɔɔ wɔ nibii enyɔ: akɛ Satan nii ji je nɛŋ maŋtsɛyelii lɛ ni enyɛɔ ekɛhaa mɔ ni esumɔɔ ni agbɛnɛ nɔ tuuŋtu ni apasa jamɔ tsɔɔ ji Abonsam jamɔ.—Mateo 4:8, 9.
2. Mɛni wɔkaseɔ kɛjɛɔ Yesu wiemɔi ni yɔɔ Mateo 4:10 lɛ mli?
2 Jeee kpoomɔ pɛ Yesu kpoo apasa jamɔ kɛtsɔ hetoo ni eha lɛ lɛ nɔ, shi moŋ etsɔɔ nɔ ni ataoɔ kɛha anɔkwale jamɔ hu. Ejaje akɛ: “Ho misɛɛ, Satan! Ejaakɛ aŋma akɛ, ‘Nuŋtsɔ [Yehowa] o-Nyɔŋmɔ lɛ oja, ni lɛ kɛkɛ osɔmɔ.’” (Mateo 4:10) No hewɔ lɛ, yiŋtoo titri ni yɔɔ anɔkwa jamɔ sɛɛ ji, Yehowa, anɔkwa Nyɔŋmɔ kome lɛ jamɔ kɛ esɔɔmɔ. Nɔ ni fata he hu ji hemɔkɛyeli kɛ toiboo, kɛ Yehowa suɔmɔnaa nifeemɔ.
Apasa Jamɔ Shishijee
3. (a) Mɛɛ be ni mɛɛ gbɛ nɔ apasa jamɔ je shishi yɛ shikpɔŋ nɔ? (b) Mɛni ji klɛŋklɛŋ nifeemɔ ni aŋma afɔ shi yɛ jamɔ mli yiwaa he, ni mɛɛ gbɛ nɔ jamɔ mli yiwaa etee nɔ yɛ, kɛjɛ nakai beaŋ kɛbaa?
3 Apasa jamɔ je shishi yɛ shikpɔŋ nɔ beni klɛŋklɛŋ adesai lɛ tse Nyɔŋmɔ hiɛ atua ni amɛkpɛlɛ jwɛŋmɔ ni Onufu lɛ kɛba akɛ amɛ diɛŋtsɛ amɛkpɛ amɛyiŋ yɛ “ekpakpa kɛ efɔŋ” he amɛha amɛhe lɛ nɔ lɛ. (1 Mose 3:5) Yɛ enɛ ni amɛfee hewɔ lɛ, amɛkpoo Yehowa jeŋ muu fɛɛ jalɛ nɔyeli lɛ ni amɛtsi amɛhe kɛjɛ jamɔ kpakpa, ni ji anɔkwa jamɔ lɛ he. Amɛfee klɛŋklɛŋbii yɛ adesai “ni ŋɔɔ Nyɔŋmɔ anɔkwale lɛ amɛtsakeɔ amale, ni amɛjaa ni amɛsɔmɔɔ bɔɔ nɔ lɛ fe Bɔlɔ lɛ” ateŋ. (Romabii 1:25) Bɔɔ nɔ ni amɛhala akɛ amɛbaaja lɛ ni amɛhiɛ bɛ nɔ nɛɛ jeee mɔ ko mɔ ko fe Satan Abonsam, “blema onufu lɛ.” (Kpojiemɔ 12:9) Amɛ kromɔ bi, Kain, kpoo ŋaawoo ni Yehowa jɛ mlihilɛ mli ekɛha lɛ lɛ ni etsɔ nakai feemɔ nɔ etse E-nɔyeli hiɛ atua. Ehiɛ ka he jio, ehiɛ kaaa he jio, Kain batsɔ “mɔ fɔŋ lɛ bi,” Satan bi, mɔ ni jaa Abonsam. Egbe enyɛminuu fioo Habel, mɔ ni kɛ ehe woɔ anɔkwa jamɔ mli lɛ. (1 Yohane 3:12, Revised English Bible; 1 Mose 4:3-8; Hebribii 11:4) Habel la ji klɛŋklɛŋ la ni afɔse ashwie shi yɛ Nyɔŋmɔ jamɔ mli yiwaa hewɔ. Ni mɔbɔ sane ji akɛ, apasa jamɔ etee nɔ eshwie la ni efeko efɔŋ shi aahu kɛbashi ŋmɛnɛ gbi nɛɛ.—Kwɛmɔ Mateo 23:29-35; 24:3, 9.
4. Mɛɛ ŋmalɛi tsɔɔ bɔ ni anɔkwa jamɔ ji eha lɛ mli, yɛ Noa sane lɛ mli?
4 Dani Nu Afua lɛ ba lɛ, Satan ye omanye ni egbala adesai ateŋ mɛi babaoo kɛjɛ anɔkwa jamɔ he. Shi, Noa “hiɛ ba nyam yɛ Yehowa hiɛ.” Mɛni hewɔ? Ejaakɛ ‘ekɛ anɔkwa Nyɔŋmɔ lɛ nyiɛ.’ Yɛ wiemɔ kroko mli lɛ, ekɛ ehe woɔ anɔkwa jamɔ mli. Anɔkwa jamɔ jeee nifeemɔ loo kusum ko ni afeɔ shi moŋ eji shihilɛ gbɛ. Nɔ ni fata he ji Yehowa mli hemɔkɛyeli kɛ toiboo ni akɛaasɔmɔ lɛ, ‘koni akɛ lɛ anyiɛ.’ Nɛkɛ Noa fee.—1 Mose 6:8, 9, 22; 7:1; Hebribii 11:6, 7.
5. (a) Mɛni Abonsam bɔ mɔdɛŋ akɛ eeeto shishi yɛ Nu Afua lɛ sɛɛ, ni yɛ mɛɛ gbɛ nɔ? (b) Mɛɛ gbɛ nɔ Yehowa fite Abonsam yiŋtoo nɛɛ yɛ, ni mɛni jɛ mli ba?
5 Nu Afua lɛ sɛɛ be fioo ko lɛ, ebafee faŋŋ akɛ Abonsam kɛ Nimrod, ni ji nuu ko ni ehe gbɛi fɔŋ ‘akɛ mɔ ni teɔ shi ewoɔ Yehowa’ lɛ tsu nii, koni ekɛbɔ mɔdɛŋ ni efee adesai fɛɛ ekome yɛ jamɔ gbɛjianɔtoo ko ni baate shi awo Yehowa nakai nɔŋŋ mli. (1 Mose 10:8, 9; 11:2-4) Kulɛ ebaatsɔ apasa jamɔ ni efee ekome, Abonsam jamɔ koome, ni damɔ maŋ ni amɛto shishi lɛ kɛ mɔɔ ni ejalɔi lɛ ema lɛ nɔ. Yehowa fite nɛkɛ yiŋtoo nɛɛ kɛtsɔ futumɔ ni efutu “naabu kome” ni adesai fɛɛ wieɔ yɛ nakai beaŋ lɛ nɔ. (1 Mose 11:5-9) No hewɔ lɛ, abatsɛ maŋ lɛ akɛ Babel, kɛ sɛɛ mli lɛ Babilon, ni gbɛii enyɔ lɛ fɛɛ shishi ji “Futufutu.” Nɛkɛ wiemɔ futumɔ nɛɛ ha adesai gbɛ amɛshwa shikpɔŋ lɛ nɔ fɛɛ.
6. (a) Mɛɛ jamɔ mli jwɛŋmɔi komɛi Satan kɛwo mɛi ni jaa lɛ lɛ ajwɛŋmɔi amli yɛ Babilon dani agbɛ amɛ ashwa lɛ? (b) Mɛni hewɔ jamɔi ni yɔɔ je lɛŋ fɛɛ lɛ yɔɔ hemɔkɛyelii ni je amɛhe lɛ? (b) Mɛɛ Satan yiŋtoo ko he nii Babilon tsu, ni mɛni he okadi nɛkɛ blema maŋtiase nɛɛ bafee?
6 Shi, etamɔ nɔ ni, kɛ wɔɔdamɔ nɔ ni blema saji kɛ Nyɔŋmɔ jamɔ he yinɔsane tsɔɔ lɛ nɔ lɛ, no lɛ etsɔɔ akɛ dani Yehowa aaagbɛ adesa ashwa po lɛ, no mli lɛ Satan edu apasa jamɔ he shishijee nibii komɛi ewo mɛi ni jaa lɛ lɛ ajwɛŋmɔi amli momo. Nɔ ni fata enɛɛmɛi ahe ji jamɔ mli jwɛŋmɔi ni tsɔɔ susuma ni hiɔ shi yɛ gbele sɛɛ, gbeyei ni asheɔ gbohii, gbohiiajeŋ he ko ni akɛɛ la tsoɔ yɛ, kɛ nyɔŋmɔi kɛ nyɔŋmɔ-yei babaoo ni aleee amɛyifalɛ, ni abua amɛteŋ mɛi komɛi anaa etɛ-etɛ lɛ ajamɔ. Nɛkɛ wiemɔ kui sɔrɔtoi nɛɛ kɛ nɛkɛ hemɔkɛyelii nɛɛ tee shikpɔŋ lɛ nɔ hei sɔrɔtoi fɛɛ. Beni be hoɔ lɛ, atsake nɛkɛ shishijee susumɔi nɛɛ ahiɛ. Shi yɛ fɛɛ mli lɛ, nomɛi ji shishitoo nibii ni apasa jamɔ damɔ nɔ yɛ je lɛŋ hei sɔrɔtoi fɛɛ. Eyɛ mli akɛ afite emɔdɛŋbɔɔ akɛ eeeto apasa jamɔ ni efee ekome shishi, kɛ ejeŋ muu fɛɛ jamɔ yitso yɛ Babilon lɛ moŋ, shi Satan kpɛlɛ apasa jamɔ gbɛi sɔrɔtoi, ni naa hewalɛwoo kɛ kanyamɔ kɛjɛɔ Babilon, ni ato he gbɛjianɔ koni egbala jamɔ ni akɛhaa Yehowa lɛ kɛha ehe lɛ nɔ. Babilon tee nɔ ehi shi afii ohai babaoo akɛ wɔŋjamɔ, ashwaiafeemɔ, ayɛ kpɛmɔ, kɛ ŋulamiaŋkwɛmɔ—ni fɛɛ ji apasa jamɔ mli fai komɛi ni he hiaa titri lɛ ashikwɛ̃ɛ he ni naa mɛi anɔ hewalɛ waa. No hewɔ lɛ ebɛ naakpɛɛ akɛ Kpojiemɔ wolo lɛ feɔ jeŋ muu fɛɛ apasa jamɔ maŋtsɛyeli lɛ he mfoniri akɛ yoo ajwamaŋ ni he yɔɔ nyaŋemɔ ni atsɛɔ lɛ Babilon Kpeteŋkpele lɛ.—Kpojiemɔ 17:1-5.
Anɔkwa Jamɔ
7. (a) Mɛni hewɔ wiemɔ ni afutu nɛɛ esaaa anɔkwa jamɔ he lɛ? (b) Namɔ abale lɛ akɛ “mɛi fɛɛ ni heɔ yeɔ . . . lɛ atsɛ” lɛ, ni mɛni hewɔ?
7 Eyɛ faŋŋ akɛ, anɔkwa jamɔ tee nɔ ehi shi ni futumɔ ni Yehowa futu adesai awiemɔ yɛ Babel nɛɛ esaaa ehe. Hii kɛ yei anɔkwafoi tamɔ Habel, Henok, Noa, kɛ Noa ŋa kɛ ebihii lɛ kɛ eshaayei lɛ tsu anɔkwa jamɔ he nii yɛ be ni tsɔ Nu Afua lɛ hiɛ lɛ mli. Yɛ Nu Afua lɛ sɛɛ hu lɛ, abaa anɔkwa jamɔ yi lolo yɛ Noa binuu Shem seshi lɛ mli. Abraham, ni ji Shem seshinyo lɛ kɛ ehe wo anɔkwa jamɔ mli ni no ha abale lɛ akɛ “mɛi fɛɛ ni heɔ yeɔ . . . lɛ atsɛ.” (Romabii 4:11) Ekɛ nitsumɔ fi ehemɔkɛyeli lɛ sɛɛ. (Yakobo 2:21-23) Ejamɔ lɛ bafee eshihilɛ gbɛ.
8. (a) Mɛɛ gbɛ nɔ anɔkwa jamɔ kɛ apasa jamɔ kpe hiɛ kɛ hiɛ yɛ afii ohai 16 D.Ŋ.B. yɛ, ni mɛni jɛ mli ba? (b) Mɛɛ gbɛjianɔtoo hee ko Yehowa je shishi ni kɔɔ ejamɔ krɔŋŋ lɛ he?
8 Atee nɔ atsu anɔkwa jamɔ he nii yɛ Abraham seshibii lɛ ateŋ—Isak, Yakob (loo, Israel), kɛ Yakob bihii 12, ni Israel akutsei 12 lɛ jɛ amɛmli lɛ. Beni shɛɔ afii ohai 16 lɛ naagbee gbɛ lɛ, no mli lɛ Abraham seshibii ni ba kɛtsɔ Isak nɔ lɛ na amɛhe akɛ amɛmiipele ni amɛbaa anɔkwa jamɔ yi yɛ wɔŋjalɔi amaŋ ni mli hilɛ wa mli—Mizraim, he ni aba amɛ shi awo nyɔŋyeli mli yɛ lɛ. Yehowa kɛ etsulɔ anɔkwafo Mose, ni jɛ Levi akutso lɛ mli lɛ tsu nii ni ekɛjie E-jalɔi lɛ kɛjɛ Mizraim, ni ji maŋ ni ebote apasa jamɔ mli vii lɛ apã lɛ shishi. Yehowa tsɔ Mose nɔ ekɛ Israel fee kpaŋmɔ, ni efee amɛ E-webii ni ehala. Yɛ nakai beaŋ lɛ, Yehowa ha aŋmala ejamɔ he saji ashwie shi akɛ mlai, ni eto he gbɛjianɔ yɛ be kukuoo ko mli yɛ afɔleshai ahe gbɛjianɔtoo ni osɔfoi akuu ko baatsu he nii kɛ he krɔŋkrɔŋ ni yɔɔ diɛŋtsɛ, klɛŋklɛŋ lɛ yɛ kpeebuu ni anyɛɔ akɛfaa gbɛ mli, ni sɛɛ mli lɛ yɛ sɔlemɔtsu lɛ mli yɛ Yerusalem.
9. (a) Mɛɛ gbɛ nɔ atsu anɔkwa jamɔ he nii yɛ dani afee Mla kpaŋmɔ lɛ? (b) Mɛɛ gbɛ nɔ Yesu tsɔɔ akɛ jamɔ he nibii diɛŋtsɛ ni anaa taakɛ aŋmala yɛ Mla lɛ mli lɛ ehiŋ shi kɛyaŋ naanɔ?
9 Shi, esa akɛ akadi akɛ atooo nɛkɛ nibii ni yɔɔ diɛŋtsɛ nɛɛ ahe gbɛjianɔ ni amɛtsɔmɔ anɔkwa jamɔ he nibii ni baahi shi daa. Mla lɛ ji “nii ni baaba lɛ ahe susuma kɛkɛ.” (Kolosebii 2:17; Hebribii 9:8-10; 10:1) Dani akɛ Mose Mla lɛ baaha lɛ, eka shi faŋŋ akɛ wekuyitsei ni hi shi yɛ blematsɛmɛi lɛ abeaŋ lɛ damɔɔ amɛshiabii lɛ anajiaŋ ni amɛkɛshaa afɔlei yɛ afɔleshaa latɛi ni amɛmamɔ lɛ anɔ. (1 Mose 12:8; 26:25; 35:2, 3; Hiob 1:5) Shi osɔfoyeli ni ato ama shi loo afɔleshaa he gbɛjianɔtoo, kɛ ehe nifeemɔ kɛ kusumii ko kwraa bɛ. Kɛfata he lɛ, Yesu diɛŋtsɛ tsɔɔ bɔ ni jamɔ ni aŋmala he saji yɛ mla naa, ni yitso yɔɔ Yerusalem lɛ baahi shi be kukuoo kɛkɛ lɛ mli, beni ekɛɛ Samaria yoo lɛ nɛkɛ lɛ: “Ŋmɛlɛtswaa lɛ miiba ni jeee gɔŋ nɛɛ nɔ [Gerizim, tsutsu he ni Samariabii asɔlemɔ tsu lɛ ma lɛ] ni asaŋ jeee Yerusalem ni nyɛaaja Tsɛ lɛ yɛ. . . . Shi kɛlɛ ŋmɛlɛtswaa lɛ miiba ni eshɛ agbɛnɛ, beni anɔkwa jalɔi lɛ aaaja Tsɛ lɛ yɛ mumɔ kɛ anɔkwale mli.” (Yohane 4:21-23) Yesu tsɔɔ mli akɛ esa akɛ atsu anɔkwa jamɔ he nii, jeee kɛ nibii diɛŋtsɛ ni anaa, shi moŋ yɛ mumɔ kɛ anɔkwale mli.
Babilonbii Anomŋɔɔ Mli
10. (a) Mɛni hewɔ ni Yehowa ŋmɛ gbɛ ni aloo ewebii lɛ kɛtee nomŋɔɔ mli yɛ Babilon lɛ? (b) Mɛɛ gbɛi enyɔ nɔ Yehowa kpɔ shwɛɛnii anɔkwafoi komɛi yɛ, yɛ afi 537 D.Ŋ.B., ni mɛɛ yiŋtoo titri hewɔ ni aha amɛku amɛsɛɛ kɛba Yuda ekoŋŋ lɛ?
10 Kɛje Eden atuatsemɔ lɛ mli kɛbaa nɛɛ fɛɛ lɛ, nyɛɛ etee nɔ ehi shi yɛ anɔkwa jamɔ kɛ apasa jamɔ teŋ aahu. Bei komɛi lɛ, kɛ aawie he yɛ mfoniri-feemɔ mli lɛ, apasa jamɔ ŋɔɔ anɔkwa jalɔi anom, taakɛ Babilon fee he mfoniri kɛjɛ Nimrod beaŋ tɔŋŋ lɛ. Dani Yehowa aaaŋmɛ gbɛ ni aloo ewebii lɛ kɛya nomŋɔɔ mli yɛ Babilon yɛ afi 617 D.Ŋ.B. kɛ 607 D.Ŋ.B. lɛ, no mli lɛ amɛyabote Babilonbii apasa jamɔ mli momo. (Yeremia 2:13-23; 15:2; 20:6; Ezekiel 12:10, 11) Yɛ afi 537 D.Ŋ.B. lɛ, shwɛɛnii anɔkwafoi komɛi ku amɛsɛɛ kɛba Yuda. (Yesaia 10:21) Amɛbo gbalɛ mli tsɛmɔ nɛɛ toi akɛ: “Nyɛjea Babel!” (Yesaia 48:20) Enɛ ebafeee heloonaa kpɔmɔ folo ko kɛkɛ. Eji mumɔŋ kpɔmɔ kɛmiijɛ shihilɛ ni amɛyɔɔ mli ni ji wɔŋjalɔi apasa jamɔ ni he tseee lɛ mli. No hewɔ lɛ afa nɛkɛ shwɛɛnii anɔkwafoi nɛɛ akɛ: “Nyɛtsia nyɛhe, nyɛtsia nyɛhe, nyɛjea kpo kɛjɛa jɛi! Nyɛkataa nɔ ko ni he tseee he! Nyɛjea kpo kɛjɛa emli! Nyɛ mɛi ni nyɛtereɔ Yehowa nibii lɛ, nyɛtsuua nyɛhe!” (Yesaia 52:11) Yiŋtoo titri hewɔ ni amɛku amɛsɛɛ kɛba Yuda lɛ ji ni amɛbasaa amɛto jamɔ krɔŋŋ, anɔkwa jamɔ shishi ekoŋŋ.
11. Kɛfata jamɔ krɔŋŋ ni asaa ato ama shi ekoŋŋ yɛ Yuda lɛ he lɛ, mɛɛ jamɔ mli nibii heei ba yɛ afii ohai ekpaa D.Ŋ.B. lɛ mli?
11 Nɔ ni yɔɔ miishɛɛ ji akɛ, nakai afii ohai ekpaa D.Ŋ.B. lɛ mli nɔŋŋ kɛkɛ ni ana ni apasa jamɔ miigbala niji heei yɛ Babilon Kpeteŋkpele lɛ mli. Nakai be mli Buddha jamɔ, Konfushio jamɔ, Zoroasta jamɔ kɛ Jain jamɔ, kɛfata Hela jeŋ nilee ni damɔ niiahesusumɔ nɔ ni sɛɛ mli lɛ ebana Kristendom sɔlemɔi lɛ anɔ hewalɛ waa lɛ fɛɛ je shishi. No hewɔ lɛ beni aasaa aato jamɔ krɔŋŋ aama shi ekoŋŋ yɛ Yuda lɛ, belɛ Nyɔŋmɔ henyɛlɔ fe fɛɛ lɛ hu kɛ apasa jamɔi mli henɔi sɔrɔtoi babaoo miiha.
12. Mɛɛ kpɔmɔ kɛmiijɛ Babilonbii anyɔŋyeli mli ba mli yɛ Ŋ.B. klɛŋklɛŋ afi oha lɛ mli, ni mɛɛ kɔkɔbɔɔ Paulo kɛha?
12 Beni Yesu pue yɛ Israel lɛ, no mli lɛ Yudafoi lɛ ateŋ mɛi pii kɛ amɛhe woɔ Yuda jamɔ gbɛi sɔrɔtoi, ni ji jamɔ ko ni ekpɛlɛ Babilonbii ajamɔ mli shishinumɔi anɔ lɛ amli. Ekɛ ehe eyakpɛtɛ Babilon Kpeteŋkpele lɛ he. Kristo bu enɛ fɔ ni ekpɔ ekaselɔi lɛ kɛjɛ Babilonbii anomŋɔɔ mli. (Mateo, yitso 23; Luka 4:18) Akɛni apasa jamɔ kɛ Hela jeŋ nilee egbɛ eshwa hei ni eshiɛ yɛ lɛ hewɔ lɛ, bɔfo Paulo tsɛ Yesaia gbalɛ lɛ yisɛɛ ni ekɛto Kristofoi, ni ehe miihia ni amɛtsi amɛhe kwraa kɛjɛ hewalɛ ni he tseee ni Babilon Kpeteŋkpele lɛ aaana yɛ amɛnɔ lɛ he lɛ ahe. Eŋma akɛ: “Ni asaŋ mɛɛ ekomefeemɔ Nyɔŋmɔ sɔlemɔ we lɛ kɛ [Babilonbii] amagai yɔɔ? Ejaakɛ Nyɔŋmɔ hiɛkalɔ lɛ sɔlemɔ tsu ji nyɛ, taakɛ bɔ ni Nyɔŋmɔ kɛɛ akɛ: ‘Mahi amɛmli, ni manyiɛ yɛ amɛteŋ, ni matsɔ amɛ-Nyɔŋmɔ, ni amɛ hu amɛaatsɔ mimaŋ.’ ‘“No hewɔ lɛ,” Yehowa kɛɛ, “nyɛjea amɛteŋ, ni nyɛtsea nyɛhe, ni nyɛkataa muji nɔ ko he, ni mahere nyɛ atuu.’””—2 Korintobii 6:16, 17.
Ni Aaatsi he Kwraa Kɛjɛ Apasa Jamɔ He yɛ Naagbee Be Nɛɛ Mli
13. Mɛni atsɔɔ yɛ shɛɛ saji ni Kristo kɛmaje kɛyaha asafoi kpawo ni yɔɔ Asia Bibioo lɛ mli, ni mɛni jɛ mli ba?
13 Shɛɛ saji ni Kristo kɛmaje kɛyaha asafoi kpawo ni yɔɔ Asia Bibioo lɛ kɛtsɔ Kpojiemɔ ni ekɛha kɛtsɔ bɔfo Yohane nɔ lɛ tsɔɔ faŋŋ akɛ beni shɛɔ Ŋ.B. klɛŋklɛŋ afii oha lɛ naagbee gbɛ lɛ, no mli lɛ Babilon jamɔ mli nifeemɔi kɛ jeŋbai miigbu shi blɛoo kɛmiiba Kristofoi asafo lɛ mli. (Kpojiemɔ, yitsei 2 kɛ 3) Hemɔkɛyeli kwamɔ lɛ shwere waa titri lɛ kɛjɛ afii ohai enyɔ kɛbashi afii ohai enumɔ Ŋ.B. lɛ mli, ni nɔ ni jɛ enɛ mli ba ji Kristofoi ajamɔ krɔŋŋ lɛ henɔ ko ni ekpɔtɔ ni baje kpo kɛjɛ mli lɛ. Abakpɛlɛ nɛkɛ Babilonbii atsɔɔmɔi tamɔ susuma ni gbooo, hɛl la ni miitso, kɛ Triniti lɛ nɔ ni akɛfata hemɔkɛyeli kwalɔi a-Kristo jamɔ tsɔɔmɔi lɛ ahe. Katolekbii, Orthodoks, kɛ sɛɛ mli lɛ, Protestant sɔlemɔi lɛ fɛɛ kpɛlɛ nɛkɛ apasa tsɔɔmɔi ni abiii he saji nɛɛ anɔ, ni no hewɔ lɛ, amɛbatsɔ Babilon Kpeteŋkpele lɛ, ni ji Abonsam jeŋ apasa jamɔ maŋtsɛyeli lɛ fa.
14, 15. (a) Mɛni Yesu abɛbua ni kɔɔ ŋmaa kɛ jwɛi lɛ he lɛ tsɔɔ? (b) Mɛni ba yɛ afii ohai 19 lɛ naagbee gbɛ, ni beni shɛɔ 1914 lɛ, no mli lɛ mɛɛ hiɛyaa eba yɛ anɔkwa Kristofoi ateŋ yɛ tsɔɔmɔi agbɛfaŋ?
14 Anyɛko akpata anɔkwa jamɔ hiɛ kwraa ni abule eshishi da. Be fɛɛ be lɛ, mɛi yɛ ni sumɔɔ anɔkwale lɛ ni amɛhi shi yɛ afii ohai abɔ lɛ amli, ni amɛteŋ mɛi komɛi po gboi yɛ amɛ anɔkwayeli ni amɛhiɛ mli amɛha Yehowa kɛ e-Wiemɔ ni ji Biblia lɛ hewɔ. Shi taakɛ Yesu abɛbua ni kɔɔ ŋmaa lɛ kɛ jwɛi lɛ ahe lɛ tsɔɔ lɛ, abaagbala mfoniri-feemɔŋ ŋmaa, aloo Maŋtsɛyeli lɛ mlibii ni afɔ amɛ mu lɛ amli kɛjɛ jwɛi lɛ, loo mɔ fɔŋ lɛ bii lɛ ahe, yɛ “je nɛŋ naagbee lɛ.” (Mateo 13:24-30, 36-43) Beni naagbee be lɛ—ni ji be ni ato ni abaatsu nɛkɛ mligbalamɔ nɛɛ he nii lɛ—bɛŋkɛ lɛ, Biblia kaselɔi anɔkwafoi ni hi shi yɛ afii ohai 19 lɛ naagbee gbɛ lɛ bɔi amɛhe tsimɔ kwraa kɛmiijɛ apasa jamɔ nyɔŋyeli he.
15 Beni shɛɔ 1914 lɛ, no mli lɛ nɛkɛ Kristofoi nɛɛ, ni ale amɛ ŋmɛnɛ akɛ Yehowa Odasefoi lɛ ena hemɔkɛyeli ni mli wa yɛ kpɔmɔ nɔ lɛ mli. Amɛle akɛ esa akɛ ba ni Kristo eba lɛ afee nɔ ni anaaa lɛ kɛ hiŋmɛi. Amɛnu shishi akɛ 1914 baakadi “jeŋmaji abe lɛ” naagbee. (Luka 21:24, King James Version) Ni amɛnu nɔ ni susuma lɛ kɛ gbohiiashitee tsɔɔ diɛŋtsɛ lɛ shishi. Ni aha amɛna tɔmɔ kpele ni sɔlemɔi lɛ tɔɔ yɛ amɛtsɔɔmɔi ni kɔɔ hɛl kɛ Triniti lɛ he lɛ mli. Amɛbale Nyɔŋmɔ gbɛi ni amɛkɛbɔi nitsumɔ ni amɛna bɔ ni sutsakemɔ tsɔɔmɔ lɛ kɛ mumɔi atsɛmɔ nifeemɔ ejaaa kwraa ha lɛ hu jogbaŋŋ.
16. Mɛɛ tsɛmɔ Kristofoi ni afɔ amɛ mu lɛ here nɔ yɛ 1919?
16 Aje shishi yɛ gbɛ kpakpa nɔ aajie apasa jamɔ gboklɛi lɛ fɛɛ aashɛrɛ aashwie. Ni yɛ 1919 lɛ, hewalɛ ni Babilon Kpeteŋkpele lɛ yɔɔ yɛ Nyɔŋmɔ webii anɔ lɛ je edɛŋ kwraa. Taakɛ bɔ ni akpɔ Yudafoi lɛ ateŋ shwɛɛnii fioo ko kɛjɛ Babilon yɛ 537 D.Ŋ.B. lɛ, nakai nɔŋŋ Kristofoi ni afɔ amɛ mu lɛ amli shwɛɛnii lɛ bo tsɛmɔ akɛ “nyɛjea kpo kɛjɛa [Babilon Kpeteŋkpele lɛ] mli” lɛ toi.—Yesaia 52:11.
17. (a) Mɛni ba kɛjɛ afi 1922 kɛyaa, ni mɛɛ sane ko ni he hiaa abanu he waa yɛ Nyɔŋmɔ webii ateŋ? (b) Mɛɛ shidaamɔ ko ni mli wa amɛkɔ, ni mɛni hewɔ shishinumɔ yɔɔ he lɛ?
17 Kɛjɛ 1922 kɛbaa lɛ, akala Biblia mli anɔkwalei ni mli wawai ni aja yɛ faŋŋ mli aha maŋbii ni akɛkpa Babilonbii apasa jamɔ, titri lɛ Kristendom sɔlemɔi lɛ ahe mama. Abayoo akɛ ehe miihia ni aha Nyɔŋmɔ webii ni etsuu amɛhe lɛ anu shishi jogbaŋŋ akɛ esa akɛ amɛtsi amɛhe kwraa kɛjɛ apasa jamɔi sɔrɔtoi lɛ fɛɛ he. No hewɔ lɛ, afii babaoo ho, ni akɛ wiemɔ “jamɔ” lɛ po tsuuu nii kɛji aawie jamɔ krɔŋŋ he. Aŋmala wiemɔi tamɔ “Jamɔ Tsɔɔ Tsɔne ni Etswaa Ojo” awo woji anɔ ni akɛnyiɛ maŋtiasei amli gbɛjegbɛi anɔ ni akɛtsɔɔ maŋbii. Woji tamɔ Government (1928) kɛ “The Truth Shall Make You Free” (1943) ha ana sɔrɔto-feemɔ ni yɔɔ “Kristojamɔ” kɛ “jamɔ” teŋ lɛ faŋŋ. Shishinumɔ yɛ nɛkɛ shidaamɔ ni mli wa ni amɛkɔ nɛɛ he, ejaakɛ esa akɛ akɛ Babilon Kpeteŋkpele lɛ jamɔ gbɛjianɔtoi ni egbɛ eshwa he fɛɛ he lɛ afo tako mli kwraa.
Anɔkwa Jamɔ kɛ Apasa Jamɔ
18. Mɛɛ shishinumɔ hee ni kɔɔ “nyɔŋmɔjamɔ” he akɛha yɛ 1951 mli, ni mɛɛ gbɛ nɔ agbala enɛ mli yɛ 1975 Yearbook lɛ mli yɛ?
18 Kɛkɛ ni, yɛ 1951 lɛ, ebafee be ni sa jogbaŋŋ akɛ Yehowa aaaha ewebii shishinumɔ ni mli ka shi faŋŋ yɛ sɔrɔto-feemɔ ni yɔɔ anɔkwa jamɔ kɛ apasa jamɔ teŋ lɛ he. 1975 Yearbook of Jehovah’s Witnesses lɛ bɔ amaniɛ akɛ: “Afi 1951 mli lɛ, mɛi ni fiɔ anɔkwa jamɔ sɛɛ lɛ bale nɔ ko ni sa kadimɔ waa yɛ wiemɔ ‘jamɔ’ lɛ he. Amɛteŋ mɛi komɛi nyɛɔ amɛkaiɔ 1938 jogbaŋŋ, beni, bei komɛi lɛ amɛhiɛɔ okadi ni gbalaa mɔ jwɛŋmɔ ni ji ‘Jamɔ Tsɔɔ Tsɔne ni Etswaa Ojo’ lɛ. Amɛshishinumɔ yɛ nakai beaŋ lɛ tsɔɔ akɛ ‘jamɔ’ ni yɔɔ lɛ fɛɛ jeee Kristojamɔ, shi moŋ ejɛ Abonsam ŋɔɔ. Shi The Watchtower ni je kpo yɛ March 15, 1951, lɛ kpɛlɛ nɔ akɛ akɛ sutsɔɔmɔ wiemɔ ‘anɔkwale’ kɛ ‘amale’ atsu nii yɛ jamɔ mligbalamɔ mli. Kɛfata he lɛ, wolo ni mɔɔ mɔ jwɛŋmɔ ni ji What Has Religion Done for Manhind? (ni afee yɛ 1951 ni ajie lɛ kpo yɛ ‘Jamɔ Krɔŋŋ’ kpee ni afee yɛ Wembley Stadium, London, yɛ England lɛ shishi) lɛ kɛɛ akɛ: ‘Kɛji aaŋɔ lɛ bɔ ni eshishinumɔ ji lɛ, “nyɔŋmɔjamɔ” shishinumɔ ni yɔɔ mlɛo fe fɛɛ lɛ tsɔɔ jamɔ gbɛjianɔtoo, loo jamɔ ko, ni asusuuu he kɛji eji anɔkwale loo apasa jamɔ. Enɛ kɛ Hebri wiemɔ ni akɛtsuɔ nii kɛhaa lɛ, ni ji a·boh·dáh, ni eshishinumɔ yɛ faŋŋ mli tsɔɔ “sɔɔmɔ”, ni mɔ ni asɔmɔɔ lɛ lɛ kɔɔɔ he eko lɛ kpaa gbee.’ Kɛjɛ no sɛɛ lɛ, wiemɔ ‘apasa jamɔ’ kɛ ‘anɔkwale jamɔ’ bafee wiemɔi ni akɛfɔɔ nitsumɔ waa yɛ Yehowa odasefoi ateŋ.”—Baafa 225.
19, 20. (a) Mɛni hewɔ esaaa akɛ wiemɔ “jamɔ” ni akɛtsu nii yɛ jamɔ krɔŋŋ gbɛfaŋ lɛ haa anɔkwa jalɔi anijiaŋ jeɔ wui lɛ? (b) Mɛni nɛkɛ shishinumɔ hee nɛɛ ye ebua Yehowa webii ni amɛfee?
19 Yɛ be mli ni ehaa kanelɔ ko sanebimɔ hetoo lɛ, The Watchtower ni je kpo yɛ August 15, 1951, lɛ jaje akɛ: “Esaaa akɛ wiemɔ ‘jamɔ’ ni akɛtsu nii lɛ haa mɔ ko nijiaŋ jeɔ wui. Nii ni wɔkɛtsuɔ lɛ etsɔɔɔ akɛ wɔfata apasa jamɔ ni blema saji efimɔ amɛ lɛ ahe, tamɔ bɔ ni tsɛmɔ ni wɔtsɛɔ wɔhe Kristofoi lɛ etsɔɔɔ akɛ wɔfata amale Kristofoi ni yɔɔ Kristendom lɛ ahe lɛ.”
20 Akɛ nɔ ni jeee sane he ni aŋmɛɔ ni akɛsaa lɛ, wiemɔ “nyɔŋmɔjamɔ” he shishinumɔ hee nɛɛ ha Yehowa webii lɛɛ jɔɔ kpele ni ka anɔkwale kɛ apasa jamɔ teŋ lɛ mli, taakɛ nikasemɔ ni nyiɛ sɛɛ lɛ baatsɔɔ lɛ.
Wɔka wɔshishinumɔ Wɔkwɛ
◻ Mɛɛ be ni mɛɛ gbɛ nɔ apasa jamɔ je shishi yɛ shikpɔŋ nɔ?
◻ Mɛni Satan bɔ mɔdɛŋ akɛ eeeto shishi yɛ Nu Afua lɛ sɛɛ, ni mɛɛ gbɛ nɔ afite eyiŋtoo nɛɛ yɛ?
◻ Mɛni he okadi Babilon bafee?
◻ Mɛɛ kpɔmɔi komɛi ba mli yɛ 537 D.Ŋ.B., yɛ Ŋ.B. klɛŋklɛŋ afi oha lɛ mli, kɛ agbɛnɛ yɛ 1919?
◻ Mɛɛ shishinumɔ heei akɛha yɛ wiemɔ “jamɔ” he yɛ 1951, ni mɛni hewɔ akɛha yɛ nakai beaŋ lɛ?
[Akrabatsa/Mfoniri ni yɔɔ baafa 11]
Amale tsɔɔmɔi ni aheɔ ayeɔ yɛ je lɛŋ fɛɛ lɛ na amɛ shishijee kɛjɛ Babilon:
◻ Trinitii, loo nyɔŋmɔi etɛ ni efee ekome
◻ Adesa susuma lɛ hiɔ shi yɛ gbele sɛɛ
◻ Mumɔi atsɛmɔ—“gbohii” ni akɛ amɛ wieɔ
◻ Amagai ni akɛtsuɔ nii yɛ jamɔ mli
◻ Ŋkunaayeli ni akɛkpaa daimonioi afai
◻ Osɔfoi ni yɔɔ hewalɛ anɔyeli