Abraham—Nɔkwɛmɔ Nɔ Kɛha Mɛi Fɛɛ Ni Taoɔ Nyɔŋmɔ Naanyobɔɔ
“Ni egbɔjɔɔɔ yɛ hemɔkɛyeli lɛ mli, . . .ni eyɛ hewalɛ yɛ nɔ jogbaŋŋ akɛ,nɔ ni (Nyɔŋmɔ) ewo he shi lɛ, eeenyɛ efee hu.”—ROMABII 4:19-21.
1. Mɛni hewɔ Satan ebɔ mɔdɛŋ ni egbe saji ni kɔɔ Abraham he lɛ he guɔ lɛ?
NYƆŊMƆ wiemɔ ni akɛmamɔ shi yɛ Ŋmalɛi lɛ amli lɛ “hiɛ ka ni eyɛ hewalɛ.” (Hebribii 4:12) No hewɔ lɛ, eyɛ mli akɛ aŋmala saji ni kɔɔ bɔ ni Yehowa kɛ Abraham ye ha lɛ he lɛ afɔ shi nɔ ni fe afii 3,500 ni eho nɛ, shi kɛlɛ eji hewalɛwoo jɛɛhe kɛha mɛi fɛɛ ni taoɔ Nyɔŋmɔ naanyobɔɔ lɛ. (Romabii 15:4) Henyɛlɔ kpele, Satan, le enɛ ni ekɛ jamɔ mli hiɛnyiɛlɔi etsu nii koni ekɛbɔ mɔdɛŋ ni ekɛgbe nakai wiemɔ ni aŋma afɔ shi lɛ he guɔ akɛ eji blema adesa.—2 Korintobii 11:14, 15.
2. Mɛni ji jwɛŋmɔ ni Yesu kaselɔi lɛ hiɛ yɛ Abraham he?
2 Akɛ “Ŋmalɛ fɛɛ Ŋmalɛ ni jɛ Nyɔŋmɔ mumɔ lɛŋ” lɛ fa lɛ, Abraham he yinɔsane lɛ ji anɔkwale ni “ehi ha [Kristofoi] [a]nitsɔɔmɔ.” (2 Timoteo 3:16; Yohane 17:17) Eka shi faŋŋ akɛ Yesu mra be mli kaselɔi lɛ ahiɛ sɔ enɛ, ejaakɛ amɛtsi Abraham ta shii 74 sɔŋŋ yɛ Kristofoi a-Hela Ŋmalɛi lɛ amli. Aŋmala ehe saji babaoo yɛ Hebribii, yitso 11 lɛ ni woɔ hemɔkɛyeli hewalɛ lɛ mli fe Nyɔŋmɔ tsulɔ fɛɛ tsulɔ ni tsɔ Kristofoi abe lɛ hiɛ.
3. Mɛɛ gbɛ nɔ awo Abraham hiɛ nyam babaoo yɛ?
3 Abraham jeee “gbalɔ” folo ko kɛkɛ, ejaakɛ Yehowa kɛ lɛ tsu nii koni efee ‘drama loo abɛbuu ko ni ji okadi,’ ni emli ni awo blematsɛ nɛɛ hiɛ nyam babaoo akɛni efee Nyɔŋmɔ diɛŋtsɛ he gbalɛ mfoniri hewɔ. (1 Mose 20:7; Galatabii 4:21-26) No hewɔ lɛ, Yesu wie “Abraham mlishi” he yɛ be mli ni efeɔ gbɛhe ni duromɔ yɔɔ mli yɛ Nyɔŋmɔ hiɛ lɛ he mfoniri lɛ.—Luka 16:22.
Eklɛŋklɛŋ Hemɔkɛyeli Nifeemɔ
4. Taakɛ Biblia lɛ tsɔɔ lɛ, bɔ ni Nyɔŋmɔ kɛ Abram ye ha lɛ je shishi yɛ mɛɛ gbɛ nɔ?
4 “Abram, taakɛ atsɛ egbɛi kɛjɛ shishijee lɛ ji mɔ ni alɛ lɛ yɛ “Ur yɛ Kaldea.” Beni eyɔɔ jɛmɛ lɛ, Yehowa Nyɔŋmɔ jie ehe kpo etsɔɔ lɛ ni ekɛɛ: “Jee oshikpɔŋ lɛ nɔ kɛ ojaku lɛ kɛ otsɛ we lɛ kɛya shikpɔŋ ni matsɔɔo lɛ nɔ. Ni maha otsɔ jeŋmaŋ kpeteŋkpele, ni majɔɔo, ni maha ogbɛi ada, ni oootsɔ jɔɔmɔ! Ni majɔɔ mɛi ni jɔɔo, ni mɔ ni lomɔɔo lɛ, malomɔ lɛ; ni omli aaajɛ ajɔɔ shikpɔŋ lɛ nɔ wekui fɛɛ.”—1 Mose 12:1-3; 15:7; Bɔfoi lɛ Asaji 7:2, 3.
5. (a) Nyɔŋmɔ shiwoo lɛ baanyɛ asa Abram tsui he yɛ mɛɛ gbɛ nɔ? (b) Te Abram here shiwoo lɛ nɔ eha tɛŋŋ?
5 Mɛɛ tsɛmɔ ko ni kaa mɔ nɛ! Abram, ni aaabo enɛ toi lɛ tsɔɔ akɛ ebaashi shihilɛ hei ni hi fe fɛɛ kɛ ewekumɛi koni eyahi shɔŋŋ yɛ shikpɔŋ ni eleee lɛ nɔ. Shi Nyɔŋmɔ shiwoo ni suɔmɔ yɔɔ mli lɛ na hewalɛ diɛŋtsɛ yɛ Abram tsui nɔ. Akɛ nuumo ni bɛ bi ni eŋa hu fɔɔɔ lɛ, etsɛŋ ni hiɛ baakpa egbɛi nɔ. Shi Nyɔŋmɔ shiwoo lɛ kɛ nɔ ko ni tamɔɔɔ nakai ha: “Jeŋmaŋ kpeteŋkpele” baajɛ emli aba. Agbɛnɛ, sanejajemɔ ko ni yɔɔ naakpɛɛ ni ji sanekpakpa kɛha adesai fɛɛ, ni miitsɔɔ be mli ni jeŋmaji fɛɛ baana jɔɔmɔ fata nɛkɛ shiwoo ni yɔɔ naakpɛɛ he. (Galatabii 3:8) Abram he Nyɔŋmɔ shiwoo lɛ eye ni eshi he ni hiŋmɛigbelemɔ ni etee hiɛ yɔɔ lɛ. Biblia lɛ kɛɔ akɛ: “Ni eyiŋ etee, tsɛ eleee he ni eyaa.”—Hebribii 11:8.
6. (a) Mɛni hewɔ 1 Mose 11:31 tsɔɔ akɛ Tera ji mɔ ni ha afa gbɛ lɛ? (Bɔfoi lɛ Asaji 7:2-4) (b) Sara ji nɔkwɛmɔ nɔ kɛha Kristofoi yei ŋmɛnɛ yɛ mɛɛ gbɛi sɔrɔtoi anɔ?
6 Abraham hemɔkɛyeli lɛ sa mɛi krokomɛi ahe. Eshiabii lɛ, kɛ agbɛnɛ, Tera, ni ji etsɛ, kɛ Lot, ni ji ewɔfaase lɛ fata ehe kɛtee. Shi, akɛni Tera ji blematsɛmɛi aweku yitso lɛ hewɔ lɛ, lɛ ji mɔ ni akɛɛ efa akɛ eya. (1 Mose 11:31) Nɔ ni sa kadimɔ hu ji sɛɛfimɔ ni Abram ŋa Sarai ni sɛɛ mli abatsɛ lɛ Sara lɛ kɛha lɛ lɛ. Eba ehe shi ni ekpɛlɛ shihilɛ ni baa shi nɔ yɛ eshihilɛ be ni eshwɛ lɛ fɛɛ mli. (1 Mose 13:18; 24:67) Enɛ haa anuɔ nɔ hewɔ ni yɛ egbele mli lɛ, “Abraham baye Sara he ŋkɔmɔ ni ebafo lɛ” lɛ shishi. (1 Mose 23:1, 2) Yɛ ehemɔkɛyeli ni mli wa kɛ etsui muu fɛɛ mli ni ejɛɔ ebaa ehe shi akɛ ŋa hewɔ lɛ, akɛ lɛ ema shi akɛ nɔkwɛmɔ nɔ kɛha anɔkwa mumɔŋ hefɛo kɛha yei ni ji Kristofoi.—Hebribii 11:11, 13-15; 1 Petro 3:1-6.
7. Kristofoi ni yɔɔ ŋmɛnɛ lɛ hu ejie hemɔkɛyeli ni tamɔ Abraham kɛ Sara nɔ lɛ nɔŋŋ kpo yɛ mɛɛ gbɛi anɔ?
7 Ŋmɛnɛ, Kristofoi pii hu etsɔɔ hemɔkɛyeli ni tamɔ nakai kɛtsɔ amɛhe ni amɛtuu amɛha koni amɛkɛgbɛ Nyɔŋmɔ shɛɛ sane lɛ amɛshwa hei ni Maŋtsɛyeli shiɛlɔi he hiaa waa yɛ kɛ agbɛnɛ kɛha tsumaa he gbɛjianɔtoi koni akɛkala Biblia kasemɔ he woji ni akɛmaje nɔ. (Mateo 24:14) Nɛkɛ Kristofoi nɛɛ ena famɔ nɛɛ mli gbɛfaŋnɔ, “Nyɛyaa ni nyɛyafea jeŋmaji fɛɛ mikaselɔi.” Ehe bahiaa ni amɛtsake amɛshihilɛ mli yɛ be mli ni amɛfaa kɛyaa maji ni amɛleee jɛmɛ lɛ amli lɛ. Mɛi krokomɛi hu eŋmɛɛ heloo gbɛfaŋ nibii sɔrɔtoi ahe bɔni afee ni amɛnyɛ amɛfee mɛi kaselɔi yɛ hei ni amɛ diɛŋtsɛ amɛyɔɔ lɛ.—Mateo 28:19, 20.
Hemɔkɛyeli Nifeemɔi Krokomɛi
8. Mɛni ha Yehowa jie ehe kpo nɔ ni ji shii enyɔ etsɔɔ Abram?
8 Abram yahi Haran maŋ lɛ mli fioo kɛyashi be mli ni etsɛ, Tera gbo. (1 Mose 11: 31, 32) Kɛkɛ ni eshiabii lɛ fo Eufrate Faa lɛ ni amɛkɛ amɛhiɛ tsɔɔ wuoyigbɛ. Yɛ naagbee lɛ, amɛbashɛ “he ko ni atsɛɔ Shekem lɛ,” yɛ Kanaan shikpɔŋ lɛ teŋ. Mɛɛ he ni yɔɔ fɛo biɛ aaaji nɛkɛ! Shekem ka gɔji enyɔ ni amɛfã ni kwɔ fe fɛɛ ji Ebal Gɔŋ lɛ kɛ Gerizim Gɔŋ lɛ jɔɔ ni baa nii babaoo lɛ teŋ. Atsɔɔ bɔ ni eji akɛ etamɔ “Shikpɔŋ Krɔŋkrɔŋ lɛ paradeiso.” Yɛ gbɛ ni sa nɔ lɛ, Yehowa jie ehe kpo ekoŋŋ etsɔɔ Abram yɛ biɛ ni ekɛɛ lɛ akɛ: “Oseshi lɛ maŋɔ nɛkɛ shikpɔŋ nɛɛ maha.”—1 Mose 12:5-7.
9. (a) Mɛɛ gbɛ ni ekaaa nɔ Abram tsɔ etee nɔ ejie ehemɔkɛyeli kpo yɛ? (b) Mɛni wɔkaseɔ kɛjɛɔ enɛ mli?
9 Abram kɛ hemɔkɛyeli nifeemɔ kroko kpɛlɛ enɛ nɔ. Taakɛ nɔ ni aŋma afɔ shi lɛ tsɔɔ lɛ: “Ni ema afɔleshaa latɛ yɛ jɛi eha Yehowa.” (1 Mose 12:7) Eka shi faŋŋ akɛ nɔ ni fata enɛ he ji kooloo ni ekɛ lɛ sha afɔle, ejaakɛ Hebri wiemɔ kɛha “afɔleshaa latɛ” shishi ji “he ni ashaa afɔle yɛ.” Yɛ sɛɛ mli lɛ, Abram ti nɛkɛ hemɔkɛyeli nifeemɔi nɛɛ amli ekoŋŋ yɛ shikpɔŋ lɛ nɔ hei krokomɛi. Kɛfata he lɛ, ‘etsɛ Yehowa gbɛi lɛ.’ (1 Mose 12:8; 13:18; 21:33) Hebri wiemɔ kɛha “tsɛ gbɛi” lɛ hu tsɔɔ “ajaje (ashiɛ) gbɛi lɛ.” Abram shiabii lɛ kɛ agbɛnɛ Kanaanbii lɛ baanyɛ anu ni eejaje Nyɔŋmɔ gbɛi, Yehowa lɛ yɛ faŋŋ mli. (1 Mose 14:22-24) Nakai nɔŋŋ hu, esa akɛ mɛi fɛɛ ni taoɔ Nyɔŋmɔ naanyobɔɔ ŋmɛnɛ lɛ atsɛ egbɛi lɛ yɛ hemɔkɛyeli mli. Nɔ ni baafata enɛ he ji maŋshiɛmɔ, “ni wɔkɛ yijiemɔ afɔle abaha Nyɔŋmɔ daa; no ji naabui ni jajeɔ egbɛi lɛ ayibii lɛ.”—Hebribii 13:15; Romabii 10:10.
10. (a) Mɛɛ gbɛi krokomɛi anɔ hu Abram jie ehemɔkɛyeli lɛ kpo yɛ? (b) Mɛɛ nɔkwɛmɔ nɔ efee kɛha Kristofoi aweku yitsei? (1 Timoteo 3:12)
10 Abram jie ehemɔkɛyeli ni eyɔɔ yɛ Yehowa mli lɛ kpo yɛ gbɛi krokomɛi babaoo nɔ. Esha afɔlei kɛha toiŋjɔlɛ, ni kɛlɛ ekɛ ekaa tsu saji ni hiɛdɔɔ yɔɔ mli lɛ ahe nii. (1 Mose 13:7-11; 14:1-16) Eyɛ mli akɛ eji niiatsɛ moŋ, shi ejeee mɔ ni diɔ heloo gbɛfaŋ nibii asɛɛ. (1 Mose 14:21-24) Shi moŋ esumɔɔ gbɔfeemɔ ni ejɛ esuɔmɔ mli ekɛ nibii ha koni ekɛfi Yehowa jamɔ sɛɛ. (1 Mose 14:18-20; 18:1-8) Nɔ ni he hiaa fe fɛɛ lɛ, eji weku yitso ni ekaaa ni enyiɛ Yehowa famɔi asɛɛ kɛtsɔ famɔ ni efa ebii kɛ eshiabii ni nyiɛ esɛɛ lɛ akɛ “amɛnyiɛ Yehowa gbɛ lɛ nɔ, ni amɛfee jalɛ nii kɛ kojomɔ” lɛ nɔ. (1 Mose 18:19) Yɛ enɛ mli lɛ, Abraham shiabii lɛ kɔ gbɛ ni soro no kwraa yɛ Kanaanbii ni bɔɔ ahoshwi yɛ Sodom kɛ Gomora maŋ ni bɛŋkɛ jɛmɛ lɛ amli lɛ anɔ he. Eka shi faŋŋ akɛ Abram ekpɛlɛŋ eshafeemɔ ni tamɔ nɛkɛ nɔ yɛ eshiabii lɛ ateŋ. Akɛ ekwɛ eshiabii lɛ jogbaŋŋ lɛ je kpo yɛ gbɛ ni eshiabii lɛ kase lɛ kɛtsɔ Yehowa gbɛi lɛ ni amɛtsɛ yɛ hemɔkɛyeli mli lɛ nɔ lɛ nɔ.—1 Mose 16:5, 13; 24: 26, 27; 25:21.
“Egbɔjɔɔɔ yɛ Hemɔkɛyeli lɛ Mli”
11. Mɛni ha Abram nyɛ ehi shi akɛ “gbɔ . . . yɛ mɛi kpɔji ashikpɔŋ nɔ” afii oha lɛ?
11 Abram hemɔkɛyeli ni wa lɛ ye bua lɛ ni eŋmɛ etsui shi yɛ haomɔi amli beni ehi shi afii oha yɛ gbɔmɛi ni kɛɔ akɛ shikpɔŋ lɛ ji amɛnɔ lɛ ateŋ lɛ. (1 Mose 12:4; 23:4; 25:7) Biblia lɛ kɛɔ akɛ: “Ekɛyato gbɔ yɛ shiwoo shikpɔŋ lɛ nɔ tamɔ mɔkpɔŋ, ni ekɛ Isak kɛ Yakob, ni ekɛ amɛ ji nakai shiwoo lɛ nɔŋŋ yelɔi lɛ hi shi yɛ buui amli; ejaakɛ eekwɛ maŋ [Nyɔŋmɔ Maŋtsɛyeli lɛ] ni yɔɔ Shishitoo ni wa, ni etolɔ kɛ emalɔ ji Nyɔŋmɔ lɛ gbɛ. Ni eji [e]hiɛ yɛ nɔ ni [e]jɛ mli lɛ nɔ kulɛ, [e]yɛ hegbɛ ni [e]kɛ aaaku [e]sɛɛ kɛaatee jɛi ekoŋŋ.”—Hebribii 11:9, 10, 15; okɛto Hebribii 12:22, 28 he.
12. Mɛɛ hegbɛ Abram na yɛ mra mli ni kulɛ eeenyɛ eku esɛɛ eya Ur, ni te etsu shihilɛ ni mli wa lɛ he nii eha tɛŋŋ?
12 Abram etsɛɛɛ yɛ Kanaan shikpɔŋ lɛ nɔ kɛkɛ ni hɔmɔ ko ni mli wa ba ni kɛ “hegbɛ ni amɛkɛaaku amɛsɛɛ” ha amɛ. Ur, ni Eufrate Faa lɛ mli nui lɛ haa amɛnaa nui babaoo lɛ kɛ ehe efɔɔɔ nugbɔnɛmɔ nɔ diɛŋtsɛ. Shi ni Abram aaaku esɛɛ kɛaaya jɛmɛ lɛ, ena Yehowa mli hemɔkɛyeli ni ekɛ ehiɛ tsɔɔ he kroko—Mizraim. Oshara yɛ enɛ mli. Akɛni eyɔɔ ŋa ni he yɔɔ fɛo hewɔ lɛ, oshara ba Abram ni ji gbɔ lɛ nɔ yɛ nɛkɛ mɛi kpɔji ashikpɔŋ nɛɛ nɔ. Ni kɛlɛ, eto gbɛjianɔ jogbaŋŋ ni ebi Sarai koni ekɛ amɛgbalashihilɛ wekukpaa lɛ atee. Yehowa jɔɔ Abram yɛ ehemɔkɛyeli nɛɛ hewɔ, ni etsɛɛɛ ni enyɛ eku esɛɛ kɛtee Shiwoo Shikpɔŋ lɛ nɔ kɛ ninamɔ babaoo fe be fɛɛ.—1 Mose 12:10–13:2; 20:12.
13. Sara ni fɔɔɔ lɛ kɛ agbɛnɛ Abram ni kɛ egbalashihilɛ wekukpaa lɛ tee be ko lɛ feɔ mɛni he mfoniri?
13 Enɛ hu fee gbalɛ nɔkwɛmɔ nɔ ko ni Abram leee ni efee kɛha wɔtsɔsemɔ. Sarai, ni no mli lɛ efɔko lolo lɛ fee Yehowa ŋwɛibɔfoi agbɛjianɔtoo ni tamɔ ŋa kɛha lɛ lɛ he mfoniri. Ehe bahia ni okadi yoo ni he yɔɔ fɛo nɛɛ amɛ fe afii 4,000 dani enyɛ ena Abraham Kpeteŋkpele, Yehowa Nyɔŋmɔ, anɔkwa seshi. Yiwaa ni baa Nyɔŋmɔ tsuji anɔkwafoi lɛ anɔ yɛ nakai afii lɛ fɛɛ ni amɛkɛmɛɔ lɛ amli lɛ ha yɛ bei komɛi amli lɛ ebafee tamɔ nɔ ni Yehowa kɛ wu ni eji kɛha gbɛjianɔtoo nɛɛ etee lɛ.—1 Mose 3:15; Yesaia 54:1-8; Galatabii 3:16, 27, 29; 4:26.
14. (a) Yɛ naagbee lɛ mɛni Sara fee yɛ fɔmɔ ni efɔɔɔ lɛ he? (b) Mɛni ba beni Abram ye afii 100 lɛ, ni mɛni hewɔ?
14 Beni ehi shi aahu akɛ gbɔ afii nyɔŋma lɛ, Abram bɛ binuu ko lolo akɛ egboshiniyelɔ. Yɛ enɛ he haomɔ mli lɛ, Sarai kpa lɛ fai koni etsɔ etsulɔyoo Hagar nɔ efɔ bii. Abram kpele ni afɔ Ishmael. (1 Mose 12:4; 16:1-4, 16) Shi shiwoo “seshi” ni baatsɔ jɔɔmɔ lɛ baaba kɛtsɔ mɔ kroko nɔ. Beni Abram eye afii 100 lɛ, atsake egbɛi afee lɛ Abraham, ejaakɛ nyɔŋmɔ kɛɛ: “Mikɛo efee jeŋmaji asafoi yuu atsɛ.” Atsake Sarai gbɛi ni abatsɛ lɛ Sara kɛ shiwoo akɛ ebaafɔ binuu.—1 Mose 17:1, 5, 15-19.
15. (a) Mɛni hewɔ Abraham ŋmɔ yɛ susumɔ ni esusu akɛ Sara aaafɔ binuu aha lɛ lɛ he lɛ? (b) Mɛɛ odaseyeli lolo Abraham kɛha ni tsɔɔ bɔ ni ehemɔkɛyeli mli wa ha?
15 Abraham (kɛ sɛɛ mli lɛ Sara) ŋmɔ yɛ susumɔ nɛɛ hewɔ ejaakɛ ekɛ eŋa Sara fɛɛ efo fɔmɔ. (1 Mose 17:17; 18:9-15) Shi enɛ jeee ŋmɔlɔ ni tsɔɔ hemɔkɛyeli ni bɛ aloo he ni aheee ayeee. Taakɛ Biblia lɛ tsɔɔ mli lɛ: “Ni egbɔjɔɔɔ yɛ hemɔkɛyeli lɛ mli, . . . yɛ Nyɔŋmɔ shiwoo lɛ he . . . shi moŋ ena hewalɛ ye hemɔkɛyeli mli, ni ewo Nyɔŋmɔ hiɛ nyam, ni eyɛ hewalɛ yɛ nɔ jogbaŋŋ, akɛ, nɔ ni ewo he shi lɛ, eeenyɛ efee hu.” (Romabii 4:18-21) Abraham ye ehemɔkɛyeli ni fa lɛ he odase yɛ nakai gbi lɛ nɔ nɔŋŋ. Akɛ kpaŋmɔ ni Nyɔŋmɔ kɛ lɛ efee lɛ he okadi lɛ, Yehowa kɛɛ Abraham akɛ eha afo lɛ ketia kɛ nuu fɛɛ nuu ni yɔɔ eshiabii lɛ fɛɛ ateŋ lɛ. (1 Mose 15:18-21; 17:7-12, 26) Te efee enii eha yɛ nɛkɛ famɔ ni piŋɔ mɔ nɛɛ he eha tɛŋŋ? “Ni efolɔ amɛ fee ketia yɛ nakai gbi lɛ nɔ nɔŋŋ, taakɛ bɔ ni Nyɔŋmɔ kɛ lɛ wie lɛ.”—1 Mose 17:22-27.
16. (a) Mɛni ba beni atse Isak fufɔ lɛ? (b) Hagar kɛ Ishmael ni ashwie amɛ lɛ feɔ mɛni he mfoniri?
16 Isak, ni egbɛi lɛ shishi ji “ŋmɔlɔ-kpãa” lɛ ji mɔ ni Sara fɔ lɛ yɛ afi ni nyiɛ sɛɛ ba lɛ mli. (1 Mose 21:5, 6) Etsɛɛɛ ni be bashɛ ni esa akɛ atse lɛ fufɔ. Yɛ okpɔlɔŋmɛɛ lɛ shishi lɛ, Ishmael ni yeɔ awuŋa lɛ wa Isak yi. Kɛkɛ ni Sara wie veveeve ewo Abraham hewalɛ akɛ eshwie tsulɔyoo Hagar kɛ ebinuu lɛ kɛje shia lɛ mli. Yehowa Nyɔŋmɔ fi Sara nibimɔ lɛ sɛɛ. Eyɛ mli akɛ sane lɛ dɔ Abraham moŋ, shi ebo toi amrɔ nɔŋŋ. (1 Mose 21:8-14) Taakɛ Galatabii 4:21-30 tsɔɔ lɛ, enɛ feɔ bɔ ni Abraham kpeteŋkpele lɛ kɛ wekukpaa ni ka ekɛ heloonaa Israel teŋ lɛ baaba naagbee lɛ he mfoniri. Taakɛ adesai krokomɛi ji lɛ, afɔ amɛ akɛ esha nyɔji. (Romabii 5:12) Agbɛnɛ amɛkpoo Yesu Kristo, anɔkwa Abraham “seshi” lɛ ni ba koni ebaha amɛye amɛhe lɛ hu. (Yohane 8:34-36; Galatabii 3:16) Ni taakɛ bɔ ni Ishmael wa Isak yi lɛ, amɛwa mumɔŋ Israel Kristofoi asafo ni ato shishi ehee lɛ, ni ji Abraham seshi lɛ fa ni ji enyɔ lɛ ayi.—Mateo 21:43; Luka 3:7-9; Romabii 2:28, 29; 8:14-17; 9:6-9; Galatabii 3:29.
Ehemɔkɛyeli Kaa ni fe Fee
17. Mɛɛ gbɛ nɔ atsɔ aka Abraham hemɔkɛyeli lɛ akwɛ waa yɛ?
17 Enyɛŋ eba akɛ adesa tse ko baana suɔmɔ babaoo aha ebinuu fe bɔ ni Abraham ni egbɔ lɛ na kɛha Isak lɛ. Mɛɛ hejɔ̃mɔ kpele enɛ aaaji, beni enu famɔ nɛɛ he lɛ: “Agbɛnɛ ŋɔɔ obi Isak ni ji obi koome ni odɔɔ ehe lɛ, oyiŋ oya Moria shikpɔŋ lɛ nɔ, ni okɛ Iɛ ayasha shaa afɔle yɛ jɛi, yɛ gɔji lɛ ateŋ ekome ni matsɔɔo lɛ nɔ.”—1 Mose 22: 1, 2.
18. Te Abraham here Yehowa famɔ akɛ ekɛ Isak asha afɔle lɛ nɔ eha tɛŋŋ?
18 Ebaawa kɛha Abraham akɛ eeenu nɔ hewɔ ni akɛ famɔ ni baapiŋ lɛ nɛkɛ ha lɛ shishi. Ni kɛlɛ ejie amrɔ toiboo ni efeɔ lɛ kpo. (1 Mose 22:3) Ehe lɛ gbii etɛ kɛ piŋmɔ dani eyashɛ gɔŋ ni ahala lɛ nɔ. Ni ema afɔleshaa latɛ yɛ jɛmɛ ni ekɛ lai shwie yiteŋ. Eka shi faŋŋ akɛ yɛ nɛkɛ be nɛɛ mli lɛ etsɔɔ Nyɔŋmɔ famɔ lɛ mli etsɔɔ Isak, mɔ ni kulɛ ebaanyɛ ejo foi kɛya lɛ. Shi moŋ, Isak ŋmɛ gbɛ ni etsɛ ni egbɔ lɛ fimɔ eniji kɛ enaji ni ekɛ lɛ fɔ afɔleshaa latɛ lɛ nɔ. (1 Mose 22:4-9) Mɛni wɔbaanyɛ wɔkɛɛ akɛ no ha toiboo ni tamɔ nɛkɛ ba?
19. (a) Mɛni wɔɔnyɛ wɔkɛɛ akɛ no jɛ ekaa ni Isak kɛba ehe shi lɛ? (b) Wekukpaa ni ka Abraham kɛ Isak teŋ Iɛ ji nikasemɔ kɛ a Kristofoi awekui ŋmɛnɛ yɛ mɛɛ gbɛ nɔ?
19 Abraham kɛ anɔkwayeli etsu egbɛnaa nii ni kɔɔ Isak he lɛ he nii, taakɛ atsɔɔ mli yɛ 1 Mose 18:19 lɛ. Ŋwanejee ko bɛ he akɛ eha Isak ele Yehowa yiŋtoo akɛ ebaatee gbohii lɛ ashi. (1 Mose 12:3; Hebribii 11:17-19) Yɛ Isak gbɛfaŋ hu lɛ, lɛ ji mɔ ni etsɛ sumɔɔ lɛ waa ni ebaasumɔ ni esa etsɛ lɛ hiɛ yɛ nɔ fɛɛ nɔ mli, titri lɛ, kɛ eba Nyɔŋmɔ suɔmɔnaa nifeemɔ mli. Mɛɛ nikasemɔ kpakpa po enɛ ji kɛha Kristofoi awekui ni yɔɔ ŋmɛnɛ lɛ!—Efesobii 6:1, 4.
20. Mɛɛ gbɛ nɔ Abraham tsɔ ebo toi yɛ, ni mɛɛ nyɔmɔwoo jɛ mli ba?
20 Kɛkɛ ni abashɛ he ni wa fe fɛɛ yɛ kaa lɛ mli. Abraham kɔ kakla ni akɛgbeɔ mɔ. Shi beni ebaagbe ebi lɛ. Yehowa ha ekpa nakai feemɔ ni ekɛɛ: “Kpaako mina mile akɛ osheɔ Nyɔŋmɔ gbeyei, akɛni okamaaa mi obi,kome too nɛɛ lɛ.” (1 Mose 22:11, 12) Kwɛ bɔ ni awo Abraham nyɔmɔ babaoo aha beni enu ni Nyɔŋmɔ diɛŋtsɛ miijaje akɛ eji mɔ ni ja lɛ! Ebaanyɛ enu he ni ena nɔmimaa akɛ agbɛnɛ ana nɔ ni Nyɔŋmɔ taoɔ yɛ adesa ni yeee emuu lɛ he lɛ yɛ ehe. Nɔ ni he hiaa fe fɛɛ lɛ, abu bɔ ni Yehowa susuɔ Abraham hemɔkɛyeli lɛ he lɛ bem. (1 Mose 15:5, 6) Yɛ enɛ sɛɛ lɛ, Abraham kɛ too agbo ko ni akɛ lɛ ha yɛ naakpɛɛ gbɛ nɔ sha afɔle ekɛto Isak najiaŋ. Kɛkɛ ni enu ni Yehowa miitsɔ kitakamɔ nɔ eema kpaŋmɔ shiwoi lɛ anɔ mi. Yɛ sɛɛ mli lɛ, abale lɛ akɛ Yehowa naanyo loo eshieŋtsɛ.—1 Mose 22:13-18; Yakobo 2:21-23.
21. Mɛɛ gbalɛ mli nɔkwɛmɔ nɔ loo mfoniri akɛhaa wɔ yɛ biɛ, ni esa akɛ ewo wɔ hewalɛ ni wɔtao mɛni?
21 Abraham afɔleshaa lɛ ji “nɔkwɛmɔ nɔ.” (Hebribii 11:19, New World Translation) Efeɔ afɔle ni piŋmɔ yɔɔ mli, ni jara wa ni Yehowa Nyɔŋmɔ sha beni etsu esuɔmɔ Bi lɛ kɛba shikpɔŋ nɔ koni ebagbo akɛ “Nyɔŋmɔ Toobi lɛ ni woɔ je lɛ he esha kɛyaa lɛ” he mfoniri. (Yohane 1:29) Ni bɔ ni Isak jɛ esuɔmɔ mli ekpɛlɛ nɔ akɛ eeegbo lɛ hu feɔ bɔ ni Isak kpeteŋkpele, Yesu Kritso jɛ esuɔmɔ mli ekɛ ehe ha eŋwɛi Tsɛ lɛ suɔmɔnaa nifeemɔ lɛ he nɔkwɛmɔ nɔ. (Luka 22:41, 42; Yohane 8:28, 29) Yɛ naagbee lɛ, taakɛ bɔ ni Abraham nine shɛ ebinuu lɛ nɔ hiɛkalɔ kɛjɛ afɔleshaa latɛ Iɛ nɔ lɛ, Yehowa hu nine shɛ esuɔmɔ Bi lɛ nɔ kɛjɛ gbohii ateŋ akɛ anunyam mumɔŋ bɔɔ nɔ. (Yohane 3:16; 1 Petro 3:18) Kwɛ bɔ ni enɛɛmɛi fɛɛ woɔ mɛi ni taoɔ Nyɔŋmɔ naanyobɔɔ ŋmɛnɛ lɛ ahewalɛ ehaa!
22. Adesai akuu ko ni ahala amɛ ena Nyɔŋmɔ suɔmɔ ni nɔ bɛ lɛ he sɛɛ yɛ mɛɛ gbɛ nɔ?
22 Akɛni amɛtsɔɔ hemɔkɛyeli yɛ Abraham kpeteŋkpele lɛ, Yehowa Nyɔŋmɔ suɔmɔ nifeemɔ ni nɔ bɛ nɛɛ mli hewɔ lɛ, abu adesai ateŋ kuu ko jalɔi akɛ Nyɔŋmɔ bii. (Romabii 5:1; 8:15-17) Klɛŋklɛŋ lɛ aŋɔ amɛ kɛjɛ Yudafoi lɛ ateŋ ni yɛ no sɛɛ lɛ kɛjɛ jeŋmajiaŋbii lɛ ateŋ, ni ajɔɔ mɛnɛɛmɛi diɛŋtsɛ kɛtsɔ Abraham Seshi lɛ ni ji Yesu Kristo nɔ. (Bɔfoi lɛ Asaji 3:25, 26; Galatabii 3:8, 16) Amɛ hu amɛbafee Abraham seshi lɛ fa ni ji enyɔ. (Galatabii 3:29) Yɛ naagbee lɛ, amɛyibɔ bafeɔ 144,000, ni taakɛ Yesu ji lɛ, ateɔ amɛ shi kɛyaa ŋwɛi wala mli yɛ be mli ni amɛye anɔkwale kɛyashi gbele mli lɛ.—Romabii 6:5; Kpojiemɔ 2:10; 14:1-3.
23. (a) Ajɔɔ adesai akpekpei abɔ momo ŋmɛnɛ kɛmiitsɔ Abraham seshi lɛ ateŋ shwɛɛnii lɛ anɔ yɛ mɛɛ gbɛ nɔ? (2 Korintobii 5:20) (b) Mɛɛ jɔɔmɔi krokomɛi jwere “asafo babaoo” lɛ hiɛ?
23 Yɛ no sɛɛ lɛ akpekpei abɔ ni jɛ jeŋmaji fɛɛ mli ‘miina jɔɔmɔ kɛmiiha amɛhe’ yɛ kpɛlɛmɔ ni amɛkpɛlɛɔ Abraham seshi lɛ mli shwɛɛnii akuu fioo lɛ asɔɔmɔ nitsumɔ ni suɔmɔ yɔɔ mli lɛ nɔ lɛ hewɔ. (1 Mose 22:18) Eŋɔɔ amɛnaa akɛ amɛbana amɛle bɔ ni aaanyɛ abu adesai eshafeelɔi lɛ jalɔi akɛ Nyɔŋmɔ shieŋtsɛmɛi loo nanemɛi. Nɔ ni ejɛ mli eba ji, “asafo babaoo ko . . . ni jɛ jeŋmaji fɛɛ mli” miina Nyɔŋmɔ duromɔ mli ŋɔɔmɔ, ni “amɛfɔ amɛ atadei lɛ ahe ni amɛha eyɛ futaa yɛ Toobi lɛ la lɛ mli.” Akɛni shwɛɛnii lɛ nyiɛ hiɛ yɛ enɛ mli hewɔ lɛ, amɛ hu amɛkɛ ‘sɔɔmɔ krɔŋkrɔŋ haa Nyɔŋmɔ nyɔɔŋ kɛ shwane.’ Nɔ ni akɛma nɛkɛ asafo babaoo nɛɛ ahiɛ ji naanɔ wala yɛ Paradeiso he hiɛnɔkamɔ ni yɔɔ naakpɛɛ akɛ “Nyɔŋmɔ bii” ni yɔɔ shikpɔŋ nɔ. (Kpojiemɔ 7:9-17; 21:3-5; Romabii 8:21; Lala 37:29) Shi, dani nɛkɛ jɔɔmɔi nɛɛ aaaba mli diɛŋtsɛ lɛ, esa akɛ nibii ni he hiaa babaoo aba, taakɛ wɔbaale yɛ nikasemɔ ni nyiɛ enɛ sɛɛ lɛ mli lɛ.
Sanebimɔi ni Akɛtiɔ Mli
◻ Mɛɛ gbɛ nɔ atsɔ aka Abraham kɛ ewekumɛi Iɛ ahemɔkɛyeli akwɛ yɛ?
◻ Kristofoi ni yoo ŋmɛnɛ Iɛ etao hemɔkɛyeli ni tamɔ nakai yɛ mɛɛ gbɛ no?
◻ Mɛɛ gbɛi krokomɛi anɔ hu Abraham tso etsɔɔ ehemɔkɛyeli yɛ?
◻ Abraham, Sara kɛ Isak ji nɔkwɛmɔ nii kɛha Kristofoi awekui yɛ mɛɛ gbɛ nɔ?
◻ Abraham hemɔkɛyeli nifeemɔ ni da fe fɛɛ Iɛ feɔ mɛni he mfoniri?