Paradeiso Gbɛkpamɔi Baaba Kɛ̃ Yɛ Adesa Toigbele Lɛ Fɛɛ Sɛɛ

 1. Beni be shwieɔ mli lɛ, nɛgbɛ ana klɛŋklɛŋ nuu kɛ yoo lɛ yɛ ni yɛ mɛɛ shihilɛi amli?

BE SAŊŊ eho. Klɛŋklɛŋ nuu kɛ yoo lɛ jeee mɛi ni nyiɛ yayai ni amɛleee nɔ ko dɔŋŋ. Akɛ nɔ ko eha amɛhe ​—akɛ kooloi ahewolɔ efee atade kakadaji. Amɛyɛ Eden abɔɔ ni yeɔ emuu lɛ agboi lɛ asɛɛ. Amɛsɛɛ miikwɛ abɔɔ lɛ. Amɛmiikwɛ nɔ ni yɔɔ amɛhiɛ gbɛ lɛ. Nɔ ni amɛnaa pɛ ji shikpɔŋ ni ahuko nɔ loo asako nɔ. Eka shi faŋŋ akɛ Nyɔŋmɔ jɔɔmɔ bɛ nɔ. Nɔ ni amɛnaa yɛ amɛhiɛ ji ŋmeei kɛ aŋlɛŋlɛi. Ani jeee enɛ ji shikpɔŋ ni esa akɛ amɛye nɔ lɛ? Hɛɛ, shi klɛŋklɛŋ nuu kɛ yoo lɛ bɛ jɛmɛ bianɛ kɛ yiŋtoo akɛ amɛmiilɛɛ Eden abɔɔ lɛ mli ni eyashɛ shikpɔŋ ni ahuko loo asako nɔ nɛɛ nɔ.

 2. Mɛni hewɔ nuu kɛ yoo lɛ ebɔɔɔ mɔdɛŋ akɛ amɛaaku amɛsɛɛ amɛbote Paradeiso trom lɛ mli ekoŋŋ lɛ?

² Yɛ sɔrɔtofeemɔ nɛɛ hewɔ lɛ, mɛni hewɔ amɛkuuu amɛsɛɛ ni amɛbote Paradeiso abɔɔ lɛ mli ekoŋŋ? Ewaaa akɛ aaawo ŋaa ni tamɔ nɛkɛ, shi kwɛmɔ nɔ ni yɔɔ amɛsɛɛ yɛ abɔɔ lɛ shinaa lɛ naa. Bɔɔ nii ni amɛnako amɛ da yɛ abɔɔ lɛ mli po, kerubim, ni hiɛ lalilɛi klantei ni tsɔmɔɔ ehe daa. Nuu lɛ kɛ yoo lɛ nyɛŋ aho mɛnɛɛmɛi ahe hiɛkalɔi kɛyabote abɔɔ lɛ mli!​—1 Mose 3:⁠24.

 3. Mɛni eba ni no eha klɛŋklɛŋ nuu kɛ yoo lɛ shihilɛi lɛ etsake trukaa nakai lɛ?

³ Mɛni eba? Ejeee teemɔŋ sane ko ni yɔɔ hwanyaŋŋ bɔ ni no aaaha jeŋ nilee naa akpɛ ehe afii akpei abɔ. Atsɔɔ mli yɛ gbɛ ni mli ka shi faŋŋ ni yɔɔ kuku nɔ. Klɛŋklɛŋ nuu kɛ yoo lɛ baayɔse naakpɛɛ gbɛkpamɔi ni Nyɔŋmɔ nitsumɔ lɛ kɛma amɛhiɛ yɛ amɛkpeemɔ gbi lɛ nɔ lɛ, shi ja amɛbo amɛ ŋwɛi Tsɛ lɛ toi yɛ saji bibii lɛ po mli. Abaaka toiboo ni yeɔ emuu ni amɛfeɔ lɛ akwɛ kɛtsɔ niyenii kome ko ni atsi eyeli hegbɛ lɛ nɔ: Amɛkaye “ekpakpa kɛ efɔŋ lee tso” lɛ nɔ yibii lɛ eko. (1 Mose 2:​16, 17) Kɛ amɛfee nakai ni amɛkɛte shi amɛwo Nyɔŋmɔ famɔi lɛ, amɛbaagboi. No ji nɔ ni Adam, akɛ Nyɔŋmɔ gbalɔ lɛ, ekɛɛ eŋa, adesa bɔɔ nɔ ni edako lɛ. Shi nɔ ni yɔɔ naakpɛɛ ji akɛ nakai na·chashʹ lɛ, nakai onufu lɛ, kɛɛ akɛ nɔ ni Nyɔŋmɔ ekɛɛ Adam yɛ E-kɔkɔbɔɔ ni ekɛshi “ekpakpa kɛ efɔŋ lee tso” lɛ yeli lɛ jeee anɔkwale. Onufu lɛ laka yoo lɛ ni ehe eye akɛ kɛ eku Nyɔŋmɔ mla mli ni eye tso yibii ni agu eyeli lɛ, nɔ ni baajɛ mli aba ji ni eeetamɔ Nyɔŋmɔ ni eye ehe akɛ mɔ ni kɛ ehiɛ efɔɔɔ Nyɔŋmɔ nɔ koni ekpɛ eyiŋ eha ehe yɛ nɔ ni hi kɛ nɔ ni ehiii he.​—1 Mose 3:​1-5.

Ejeee Blema Saji Amli Adesa Ko

 4, 5. Yɛ mɛɛ gbɛ nɔ bɔfo Paulo tsɔɔ yɛ akɛ onufu lɛ ni laka klɛŋklɛŋ yoo lɛ he sane lɛ jeee blema sane loo adesa?

⁴ Eyɛ naakpɛɛ fe bɔ ni aaanyɛ ahe aye? Ani etamɔ adesa. blema sane ko ni damɔɔɔ anɔkwalei anɔ ni yɛ enɛ hewɔ lɛ ŋmɛnɛŋmɛnɛ beaŋ onukpai ajwɛŋmɔi ni mli egbele nyɛŋ akpɛlɛ nɔ? Dabi, jeee yɛ niŋmalɔ ko ni kaneɔ nii babaoo, niŋmalɔ ni anyɛɔ akɛ he fɔɔ enɔ, bɔfo ni aje gbɛ ahala lɛ, ni le akɛ nɔ ni eŋma lɛ ji anɔkwale lɛ gbɛfaŋ. Bɔfo Paulo ŋma eyaha Kristofoi ni amɛdara lɛ asafo ni yɔɔ Korinto ni ji maŋ ni kɛɛ ehiŋmɛi egbele yɛ jeŋ nilee mli lɛ akɛ: “Shi miishe gbeyei akɛ aleee nɔ, taakɛ bɔ ni onufu lɛ kɛ ekutumpɔo lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔi kɛjɛ krɔŋŋfeemɔ ni nyɛjie nyɛtsɔɔ Kristo lɛ mli.”​—2 Korintobii 11:⁠3.

⁵ Eka shi faŋŋ akɛ Paulo kɛ adesa loo blema sane ko tsuŋ nii ni ekɛ nɛkɛ nii ni akaa yiŋ awieɔ nɛɛ atsɔɔ saji amli aha nakai Korintobii lɛ, ni le blema Hela wɔŋjamɔ mli adesai lɛ jogbaŋŋ lɛ. Yɛ be mli ni etsɛɔ wiemɔ kɛjɛɔ Hebri Ŋmalɛi ni jɛ mumɔŋ, ni ejaje akɛ eji “Nyɔŋmɔ wiemɔ” lɛ mli lɛ, bɔfo Paulo ma nɔ mi akɛ “onufu lɛ kɛ ekutumpɔo lɛ laka Hawa.” (1 Tesalonikabii 2:13) Kɛfata he lɛ, yɛ be mli ni eŋmaa wolo eyaha nɔkwɛlɔ Kristofonyo ko ni akɛ “tsamɔ wiemɔi” lɛ tsɔɔmɔ ewo edɛŋ lɛ, bɔfo Paulo kɛɛ: “Ejaakɛ Adam tsutsu abɔ, no sɛɛ lɛ Hawa. Ni jeee Adam alaka lɛ, shi yoo lɛ alaka, ni ebote nɔtɔmɔ mli.”​—2 Timoteo 1:​13; 1 Timoteo 2: 13, 14.

 6. (a) Adam esha ni efee eshi Nyɔŋmɔ lɛ yɛ sɔrɔto yɛ yoo lɛ nɔ lɛ he yɛ mɛɛ gbɛ nɔ? (b) Mɛni hewɔ wɔbaanyɛ wɔna nɔmimaa akɛ jeee adesa ko yoo lɛ taa yɛ onufu lɛ he lɛ?

⁶ Yoo lɛ ni onufu lɛ laka lɛ lɛ ji anɔkwa sane, ejeee adesa, taakɛ eji anɔkwale akɛ nɔ ni ejɛ etoigbele mli ni ejɛ eye tso yibii ni agu eyeli lɛ mli ni ba lɛ ji anɔkwalei ni kamɔ shi kpetekplee yɛ yinɔsane mli lɛ. Yɛ sɛɛ mli be mli ni ebatsɔ Nyɔŋmɔ mla nɔtɔlɔ lɛ, elaka ewu lɛ koni ebafata ehe yɛ eyeli mli, shi nuu lɛ ni ye enɛ lɛ etsɔɔɔ akɛ lɛ hu alaka lɛ kwraa. (1 Mose 3:⁠6) Sane ni tsɔɔ bɔ ni amɛbu amɛhe akɔntaa amɛtsɔɔ Nyɔŋmɔ lɛ tee nɔ akɛ: “Ni Adam kɛɛ: Yoo lɛ ni oŋɔfata mihe lɛ, lɛ eha mi tso lɛ yibii lɛ eko ni miye. Ni Yehowa Nyɔŋmɔ kɛɛ yoo lɛ akɛ: Mɛɛba ofee enɛ? Ni yoo lɛ kɛɛ: Onufu lɛ laka mi ni miye.” (1 Mose 3:​12,13) Jeee adesa ko yoo lɛ taa yɛ nakai na·chashʹ, onufu lɛ he, ni Yehowa Nyɔŋmɔ hu ebuuu esane mlitsɔɔmɔ lɛ akɛ amale, adesa ko. Etsu nakai onufu lɛ he nii akɛ dɛŋdade ko ni atsɔ enɔ akɛlaka yoo lɛ kɛbote efɔŋ ni efee eshi Lɛ ni ji e-Nyɔŋmɔ kɛ Bɔlɔ lɛ mli. Ebaafee nɔ ni bulɛ kɛ woo po bɛ mli akɛ Nyɔŋmɔ kɛ adesa mli onufu ko kɛkɛ aaaye.

 7. (a) Biblia lɛ tsɔɔ bɔ ni Nyɔŋmɔ kojo onufu lɛ eha lɛ yɛ mɛɛ bɛ nɔ? (b) Yɛ mɛɛ gbɛ nɔ onufu lɛ ni shishiu klɛŋklɛŋ yoo lɛ baanyɛ ashishiu wɔ hu? (Okɛ wiemɔ ni kɔɔ shishigbɛ niŋmaa lɛ he afata he.)

⁷ Yɛ be mli ni etsɔɔ bɔ ni Nyɔŋmɔ baakojo nakai onufu lɛ ni yɔɔ Eden abɔɔ lɛ mli lɛ, sane lɛ tee nɔ akɛ: “Ni Yehowa Nyɔŋmɔ kɛɛ onufu lɛ akɛ: Akɛni ofee enɛ hewɔ lɛ, alomɔo yɛ shia kooloi fɛɛ kɛ ŋa nɔ kooloi fɛɛ ateŋ; omusu nɔ ooonyiɛ, ni su oooye owala gbii abɔ fɛɛ. Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.” (1 Mose 3:​14, 15) Saneyeli he fɛɛ saneyeli he ni kɛ jwɛŋmɔŋ shikamɔ kɛ anɔkwale tsuɔ nii lɛ pɛiɔ odaseyelii amli, jeee adesai. Yehowa Nyɔŋmɔ efeee ehe buulu, kwashia, kɛtsɔ efɔbuu kojomɔ ni eeejaje etsɔɔ blema adesai amli onufu ko lɛ nɔ, shi moŋ eekojo bɔɔ nɔ ko ni yɔɔ diɛŋtsɛ ni esa akɛ ebu ehe akɔntaa etsɔɔ lɛ. Ebafeŋ naaŋmɔlɔwoo sane, shi moŋ nɔ ni yɔɔ mɔbɔ diɛŋtsɛ kɛji akɛ nakai onufu lɛ nɔŋŋ laka wɔ ni eha wɔsusu akɛ ebako shihilɛ mli da, ni akɛ eji blema saji amli adesa ko kɛkɛ, akɛ jeee lɛ nɔ fɔŋ feemɔ ko ni ba shikpɔŋ nɛɛ nɔ lɛ jɛ.a

 8. Te Nyɔŋmɔ kojo yoo lɛ eha tɛŋŋ, ni mɛni baajɛ mli aba ebiyei kɛ enabiyei anɔ?

⁸ Yɛ be mli ni ebuɔ yoo lɛ wiemɔ lɛ ni kɔɔ onufu lɛ he lɛ akɛ eji anɔkwale lɛ, nɔ ni aŋma afɔ shi yɛ nuu lɛ ŋa lɛ he lɛ kɛɔ akɛ: “Yoo lɛ, ekɛɛ lɛ akɛ: Fa maha ohejaramɔ kɛ ohɔŋɔɔ afa; jaramɔ mli ooofɔ bii yɛ, ni owu lɛ sɛɛ gbɛ oootao, ni lɛ eeeye onɔ.” (1 Mose 3:16) Nɔ ko ni tamɔ nɛkɛ fataaa Nyɔŋmɔ jɔɔmɔi ni ekɛha lɛ yɛ be mli ni ekɛ Adam bote gbalashihilɛ mli lɛ he, yɛ be mli ni Nyɔŋmɔ kɛɛ amɛ akɛ: “Nyɛfɔa ni nyɛyi afaa ni nyɛyia shikpɔŋ lɛ nɔ obɔ” lɛ. (1 Mose 1:28) Nakai jɔɔmɔ ni ji nitsumɔ ni akɛha adesa nuu kɛ yoo ni yeɔ emuu lɛ tsɔɔ akɛ yoo lɛ baaŋɔ hɔ babaoo shi jeee yɛ jaramɔ kɛ fɔmɔ mli piŋmɔ mli ni ewu hu waŋ lɛ yi. Nɛkɛ kojomɔ ni ajaje ashwie yoo nɔtɔlɔ nɛɛ nɔ lɛ baasa ebiyei kɛ enabiyei ahe kɛya yinɔi fɛɛ mli.

Awo Nyɔŋmɔ Mla nɔ Kɛtsɔ Fɔbuu ni Ajaje Ashi Adam lɛ Nɔ

9, 10. (a) Mɛɛ kɔkɔ Nyɔŋmɔ etsɔ hiɛ ebɔ Adam tɛ̃ɛ, ni mɛni baajɛ mli aba kɛ Nyɔŋmɔ tsuuu nɛkɛ toigbalamɔ nɛɛ he nii? (b) Te Nyɔŋmɔŋ kojo Adam eha tɛŋŋ?

⁹ Mɛɛ tsakemɔ yoo nɛɛ kɛ nuu ni elaka lɛ ni ebafata ehe yɛ nɔtɔmɔ mli lɛ baana nɛkɛ? Nyɔŋmɔ kɛɛ nɛkɛ nuu nɛɛ tɛɛ akɛ: “Shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo.” (1 Mose 2:17) Ani Nyɔŋmɔ ni ji Kojolɔ lɛ kɛ ehe baakpɛtɛ fɔbuu kojomɔ ni mɔɔ shi nɛkɛ he yɛ Adam ni yaye tso yibii bibioo ko kɛkɛ lɛ he? Susumɔ nɔ ni toigbalamɔ ni tamɔ nɛkɛ he nitsumɔ lɛ baaji lɛ he okwɛ! Ebaafite nakai gbɛkpamɔ ni kanyaa mɔ ni Adam kɛ Hawa hiɛ ka nɔ yɛ amɛgbalashihilɛ mlibotemɔ gbi lɛ nɔ lɛ, gbɛkpamɔ akɛ amɛkɛ amɛshwiei baawo shikpɔŋ muu lɛ fɛɛ nɔ obɔ akɛ adesai aweku ni yeɔ emuu ni hiɔ shi yɛ paradeiso shikpɔŋ nɔ kɛyaa naanɔ yɛ amɛbalaŋtaiaŋ, yɛ toiŋjɔlɛ shihilɛi amli kɛ Nyɔŋmɔ ni ji amɛ ŋwɛi Tsɛ lɛ! Yɛ anɔkwale mli lɛ, Nyɔŋmɔ fiteŋ lɛ diɛŋtsɛ enaakpɛɛ yiŋtoo kɛha adesai kɛ gbɔmɔ shia ni ji shikpɔŋ nɛɛ kɛtsɔ gbele he toigbalamɔ ni ekɛaaba klɛŋklɛŋ adesai fɛɛ afɔlɔi lɛ nɔ ni ekɛ ehe aaakpɛtɛ gbagbalii lɛ hewɔ! Shi bo ŋwɛi famɔ ni ajaje yɛ faŋŋ mli ni aŋma afɔ shi yɛ Biblia lɛ mli lɛ toi:

¹⁰ “Ni Adam lɛ, ekɛɛ lɛ akɛ: Akɛni obo oŋa lɛ toi ni oye tso lɛ ni miwoo he kita akɛ okaye eyibii lɛ eko hewɔ lɛ, alomɔ shikpɔŋ su yɛ ohewɔ, jaramɔ mli oooye enɔ nii yɛ, owala gbii abɔ fɛɛ. Ni ŋmeei kɛ aŋlɛŋlɛi eeewo ehao, ni ŋa nɔ baai oooye. Ohiɛ latsaa mli oooye nii yɛ, kɛyashi beyinɔ ni oooku osɛɛ kɛaatee shikpɔŋ su mli, ejaakɛ emli ajieo kɛjɛ. Ejaakɛ su jio, ni su mli oooku osɛɛ kɛaatee!”​—1 Mose 3:​17-19.

11. Mɛɛ anɔkwalei ni kɔɔ toiboo he feɔ sa ni Nyɔŋmɔ kojomɔ ni ekɛba Adam nɔ lɛ sa lɛ he mfoniri?

¹¹ Nakai kojomɔ lɛ tsɔɔ gbele fɔbuu he nitsumɔ ni baaba gbɔmɔ lɛ nɔ ni nɔ ni baaba Nyɔŋmɔ yiŋtoo akɛ eeeha shikpɔŋ lɛ atsɔ paradeiso ni adesai hii kɛ yei ni yeɔ emuu ni yɔɔ suɔmɔ yɔɔ nɔ ni amɛhiɔ shi yɛ toiŋjɔlɛ mli yɛ ekomefeemɔ mli ni kwɛɔ jeŋ muu fɛɛ Paradeiso abɔɔ lɛ nɔ ni amɛsaa nɔ kɛyaa naanɔ lɛ kɔɔɔ he eko. Nuu lɛ ebo eŋa lɛ gbee toi fe ni eeebo Nyɔŋmɔ gbee ni kɛɛ lɛ akɛ ekaye “ekpakpa kɛ efɔŋ lee tso” ni agu eyeli lɛ moŋ toi. Ni kɛji akɛ lɛ diɛŋtsɛ lɛ ebooo e-Nyɔŋmɔ kɛ Bɔlɔ lɛ gbee toi lɛ, ani ebaanyɛ etsɔɔ ebii anii ni amɛfee nakai? Ani lɛ diɛŋtsɛ enɔkwɛmɔ nɔ lɛ baafee nɔ ni ebaawie he yɛ ebii lɛ anitsɔɔmɔ mli koni amɛbo Yehowa Nyɔŋmɔ toi!​—Okɛto 1 Samuel 15:22 he.

12, 13. (a) Adam esha lɛ baasa ebii ahe yɛ mɛɛ gbɛ nɔ? (b) Mɛni hewɔ Adam jeee mɔ ni sa akɛ ehiɔ shi kɛyaa naanɔ yɛ Paradeiso aloo yɛ shikpɔŋ lɛ nɔ kwraa po lɛ?

¹² Ani Adam bii baanyɛ aye Nyɔŋmɔ mla lɛ nɔ yɛ emuuyeli mli, taakɛ lɛ diɛŋtsɛ beni eyeɔ emuu akɛ adesa lɛ enyɛ efee lɛ? Yɛ fɔmɔ mli mlai ni tsuɔ nii hewɔ lɛ, ani ekɛ egbɔjɔmɔ kɛ su ni eyɔɔ akɛ efeŋ toiboo ehaŋ Nyɔŋmɔ gbee koni eyabo gbeei krokomɛi atoi fɔŋ ebii? Yinɔsane mli anɔkwalei kɛ hetoo haa nɛkɛ sanebimɔi nɛɛ.​—Romabii 5:⁠12.

¹³ Ani nuu ni tamɔ nɛkɛ, ni yɛ adesa bɔɔ nɔ ko hewɔ lɛ, etsi ehe kɛjɛ toiboo ni yeɔ emuu ni eeefee eha Nyɔŋmɔ ni ekɛtsɔɔ suɔmɔ ni yeɔ emuu ni eyɔɔ kɛha Nyɔŋmɔ lɛ he lɛ ji mɔ ni sa akɛ ehiɔ shi kɛyaa naanɔ yɛ Paradeiso aloo po yɛ shikpɔŋ nɔ kwraa? Ani ebaafee nɔ ni hi loo eyɔɔ shweshweeshwe po akɛ aaaha ehi shi yɛ shikpɔŋ nɔ kɛya naanɔ? Ani gbɛ ni aaaŋmɛ lɛ ni eya nɔ ehi shi kɛya naanɔ yɛ shikpɔŋ nɔ yɛ enɔtɔmɔ lɛ sɛɛ lɛ baawo Nyɔŋmɔ mla lɛ hiɛ nyam ni etsɔɔ jalɛsane ni E-yeɔ kwraa lɛ, aloo ebaatsɔɔ bulɛ ni abɛ kɛha Nyɔŋmɔ mla ni etsɔɔ hu akɛ Nyɔŋmɔ wiemɔ lɛ jeee nɔ ni anyɛɔ akɛ he fɔɔ nɔ?

Ashwie lɛ Kɛjɛ Eden Trom lɛ Mli

14. Yɛ mɛɛ gbɛ nɔ nɔ ni aŋma afɔ shi yɛ Biblia lɛ mli tsɔɔ bɔ ni Nyɔŋmɔ fee nii eshi Adam kɛ eŋa lɛ mli?

¹⁴ Nɔ ni aŋma afɔ shi yɛ Biblia lɛ mli lɛ kɛɔ wɔ gbɛ ni Nyɔŋmɔ tsɔ nɔ ekpɛ eyiŋ yɛ nɛkɛ saji nɛɛ ahe: “Ni Yehowa Nyɔŋmɔ fee wolo atadei eha Adam kɛ eŋa lɛ, ni eŋɔwo amɛ. Ni Yehowa Nyɔŋmɔ kɛɛ: Naa Adam etsɔ tamɔ wɔteŋ mɔ kome, ni ele ekpakpa kɛ efɔŋ; ni agbɛnɛ bɔni afee ni ekakpa enine mli, ni etse wala tso lɛ yibii lɛ hu eko, ni eye, ni ehiɛ miika kɛmiiya naanɔ hewɔ lɛ Yehowa Nyɔŋmɔ jie lɛ yɛ Eden trom lɛ mli, koni eyahu shikpɔŋ, nɔ mli ni ajie lɛ kɛjɛ lɛ; ni ashwie Adam, ni aŋɔ kerubim kɛ lalilɛi klantei ni tsɔmɔɔ ehe eto Eden trom lɛ hiɛ yɛ bokagbɛ, koni ebu wala tso lɛ naa gbɛ lɛ he.”​—1 Mose 3:21-24.

15. (a) Yɛ mɛɛ gbɛ nɔ Nyɔŋmɔ tsɔɔ yɛ akɛ esusuɔ hiɛgbele henumɔ ni Adam kɛ eŋa lɛ na akɛni amɛnyiɛ yayai hewɔ lɛ he? (b) Mɛɛ bɛ nɔ atsɔ ashwie klɛŋklɛŋ gbɔmɛi enyɔ lɛ kɛjɛ Eden abɔɔ lɛ mli? (d) Mɛɛ shihilɛi ni etsake Adam kɛ eŋa lɛ kɛkpe yɛ Eden abɔɔ lɛ sɛɛ?

¹⁵ Ŋwɛi Kojolɔ lɛ susu hiɛgbele ni eshafeelɔi Adam kɛ eŋa lɛ nuɔ he agbɛnɛ lɛ he akɛni amɛnyiɛ yayai lɛ hewɔ. Etsɔ gbɛ ko ni atsɔɔɔ mli yɛ biɛ lɛ nɔ ekɛ wolo atadei kakadaji to baai ni amɛkpɛ amɛkɛfee mamai amɛha amɛhe lɛ najiaŋ. (1 Mose 3:⁠7) Wolo ni akɛfee atadei lɛ baatsɛ ni ebaabu amɛhe kɛjɛ ŋmeei kɛ aŋlɛŋlɛi kɛ nibii krokomɛi ni baaye amɛ awui yɛ Eden abɔɔ lɛ sɛɛ lɛ he. Akɛni amɛna henilee fɔŋ yɛ esha ni amɛfee lɛ sɛɛ hewɔ lɛ, amɛbɔ mɔdɛŋ ni amɛtee amɛhe yɛ Eden trom lɛ mli tsei lɛ ateŋ koni Nyɔŋmɔ akana amɛ. (1 Mose 3:⁠8) Agbɛnɛ, beni akojo amɛ lɛ sɛɛ lɛ, amɛnu ŋwɛi nɔnyɛɛ ko he yɛ be mli ni Nyɔŋmɔ shwie amɛ kɛjɛ trom lɛ mli lɛ. Ashwie amɛ kɛtee bokagbɛ, ni etsɛɛɛ ni amɛna amɛhe yɛ abɔɔ lɛ sɛɛ, ni atsi amɛ gbɛ koni amɛkaba mli dɔŋŋ. Amɛtsuŋ nii koni amɛkɛlɛɛ trom lɛ mli ni amɛlɛɛ e-Paradeiso shihilɛi lɛ amli kɛya shikpɔŋ lɛ naagbee hei lɛ dɔŋŋ. Kɛjɛ nɛkɛ be nɛɛ nɔ kɛyaa lɛ, amɛbaaye aboloo ni akɛ ŋa nɔ kwɛɛnii fee, shi ehaŋ amɛhi adesa wala mli kɛya naanɔ. Afo amɛ ashɛ afɔ kɛjɛ “wala tso” lɛ he. Yɛ be ko sɛɛ lɛ​—be sɛɛ jɛkɛmɔ enyiɛ?​—esa akɛ amɛgboi!

Anyɛŋ Aye Yehowa Shishijee Yiŋtoo lɛ Nɔ Kunim

16. Mɛni Nyɔŋmɔ etoko eyiŋ akɛ ebaafee, ni mɛni hewɔ?

¹⁶ Ani Nyɔŋmɔ kpɛ eyiŋ agbɛnɛ akɛ ebaakpata shikpɔŋ lɛ, kɛ nyɔŋtsere kɛ hulu kɛ ŋulamii lɛ ahiɛ, yɛ jeŋ muu fɛɛ hiɛkpatamɔ ko mli akɛni nɛkɛ bɔɔ nii enyɔ ni jɛ su mli nɛɛ efee esha amɛ shi lɛ lɛ hewɔ? Kɛji akɛ efee nii ni tamɔ nɛkɛ lɛ, ani no ebatsɔŋ akɛ aye enɔ kunim yɛ enunyam yiŋtoo lɛ mli, ni enɛɛmɛi fɛɛ ba lɛ nakai yɛ nɔ ni na·chashʹ ko je shishi lɛ hewɔ? Ani onufu ko kɛkɛ baanyɛ afite Nyɔŋmɔ yiŋtoo muu lɛ fɛɛ? Ejaje eyiŋtoo lɛ etsɔɔ Adam kɛ Hawa yɛ amɛgbalashihilɛ gbi lɛ nɔ beni ejɔɔ amɛ ni ekɛɛ amɛ nɔ ni ji esuɔmɔnaa nii kɛha amɛ lɛ: adesa weku ni yeɔ emuu ni amɛkɛbaawo shikpɔŋ lɛ fɛɛ nɔ obɔ, ni amɛye shikpɔŋ lɛ fɛɛ nɔ ni amɛha Eden abɔɔ lɛ aye emuu ni adesai fɛɛ miiye bɔɔ nii ni baa shi ni yɔɔ shikpɔŋ lɛ nɔ kɛ nui lɛ amli lɛ anɔ yɛ toiŋjɔlɛ mli. Nyɔŋmɔ yiŋtoo lɛ he ninaa ni kpɛlɛɔ kaŋkaŋ ba mli, nɔ ni etsɔ hiɛ ekɛ nibɔɔ nitsumɔ gbii ekpaa ni fe afii akpei abɔ yɛ be naa etsu he nii ekɛsaa lɛ! Ani nɛkɛ yiŋtoo ni sa yijiemɔ nɛɛ baafee efolo agbɛnɛ ni ashi lɛ nakai ni ebaaa mli yɛ onufu ko kɛ klɛŋklɛŋ adesai enyɔ lɛ ni gba afa lɛ hewɔ? Dabida!​—Okɛto Yesaia 46:​9-11 he.

17. Mɛni Nyɔŋmɔ etswa efai shi akɛ ebaafee yɛ gbi ni ji kpawo lɛ he, no hewɔ lɛ te nɛkɛ gbi nɛɛ babaa naagbee eha tɛŋŋ?

¹⁷ Eka he eji hejɔɔmɔ gbi lolo, gbi ni ji kpawo kɛha Yehowa Nyɔŋmɔ. Etswa efai shi akɛ ebaajɔɔ nakai gbi lɛ ni efee lɛ krɔŋkrɔŋ. Eŋmɛŋ gbɛ ni nɔ ko afee lɛ gbi ni alomɔ, ni loomɔ fɛɛ loomɔ ni mɔ ko aaatsɔ he ŋaa koni eba mli yɛ nakai ehejɔɔmɔ gbi lɛ nɔ lɛ ebaatsake ni eha etsɔ jɔɔmɔ, ni eha nakai gbi lɛ aba naagbee akɛ nɔ ni ajɔɔ. Ebaashi shikpɔŋ muu lɛ fɛɛ akɛ he krɔŋkrɔŋ, ni aafee Nyɔŋmɔ suɔmɔnaa nii yɛ shikpɔŋ nɛɛ nɔ taakɛ afeɔ yɛ ŋwɛi lɛ ni adesai ni eye muu baafee enɛ.​—Okɛto Mateo 6:10 he.

18, 19. (a) Mɛni hewɔ klɛŋklɛŋ adesai eshafeelɔi enyɔ Iɛ aseshibii ni naa nɔ lɛ baanyɛ ana miishɛɛ lɛ? (b) Mɛni nibii krokomɛi ebaawie he yɛ Buu Mɔɔ lɛ baafai amli?

¹⁸ Nyɔŋmɔ nuuu he akɛ aha eyiŋtoo efee yaka. Eŋmɛɛɛ eyiŋtoo lɛ he. Etswa efai shi akɛ ebaabu ehe bem akɛ Mɔ pɛ ni anyɛɔ akɛ he fɔɔ enɔ ni lɛ pɛ etoɔ eyiŋ ni enyɛɔ etsuɔ nɔ ni eto yiŋ yɛ he lɛ he nii kwraa kɛmɔɔ shi, ni yijiemɔ lɛ fɛɛ batsɔɔ ekome enɔ. (Yesaia 45:18) Klɛŋklɛŋ adesai enyɔ ni ji eshafeelɔi lɛ ashwiei ni yeee emuu ni naa nɔ lɛ baanyɛ ana miishɛɛ ni amɛkwɛ Nyɔŋmɔ gbɛ koni ekɛ anɔkwayeli atsu eshishijee yiŋtoo lɛ he nii kɛha amɛnaanɔ sɛɛnamɔ. Amrɔ nɛɛ po, ehejɔɔmɔ gbi lɛ mli afii akpei abɔ eho, ni gbi lɛ naagbee fa ni ekɛ jɔɔmɔ krɛdɛɛ baaha lɛ ebɛŋkɛ. Ehejɔɔmɔ gbi lɛ ‘jenamɔ’ lɛ miiho, ni taakɛ bɔ ni eji yɛ nibɔɔ gbii ekpaa lɛ fɛɛ mli lɛ, esa akɛ ‘jetsɛremɔ’ lɛ aba. Kɛ nɛkɛ ‘jetsɛremɔ’ nɛɛ ye emuu ni eha mɛi fɛɛ ni kwɛɔ lɛ na Nyɔŋmɔ yiŋtoo ni tsakeee lɛ anunyam nitsumɔ lɛ, no lɛ abaanyɛ aŋma afɔ shi akɛ: ‘Ni je na ni je tsɛre, gbi ni ji gbi kpawo lɛ.’ Naakpɛɛ gbɛkpamɔ diɛŋtsɛ nɛ!

¹⁹ Kɛ asusu enɛɛmɛi fɛɛ he lɛ, eji miishɛɛ sane diɛŋtsɛ! Ni abaaya nɔ awie Paradeiso gbɛkpamɔi ni ka adesai toibolɔi, mɛi ni sumɔɔ Nyɔŋmɔ mla lɛ ahiɛ lɛ ahe lolo yɛ Buu-Mɔɔ lɛ baafai amli.

[Shishigbɛ niŋmaa]

Mɛni Obaakɛɛ?

◻ Mɛni hewɔ klɛŋklɛŋ adesai enyɔ lɛ laaje amɛ Paradeiso shia Iɛ?

◻ Te wɔfeɔ tɛŋŋ wɔleɔ akɛ Hawa lakamɔ kɛtsɔ onufu Iɛ nɔ lɛ jeee blema sane loo adesa ko?

◻ Mɛɛ fɔbuu kojomɔ Nyɔŋmɔ jaje eshwie yoo Iɛ nɔ?

◻ Mɛɛ fɔbuu kojomɔ Nyɔŋmɔ jaje eshwie Adam nɔ, ni mɛni hewɔ enɛ wo Nyɔŋmɔ mla lɛ hiɛ nyam loo ewo nɔ gojoo Iɛ?

◻ Mɛni hewɔ Nyɔŋmɔ nuuu he akɛ eyiŋtoo ni tsɔɔ akɛ ebaaha adesai ni yeɔ emuu ayi shikpɔŋ Iɛ nɔ obɔ yɛ paradeiso Iɛ efee yaka lɛ?