1 MOSE Kanyaa Hemɔkɛyeli, Hiɛnɔkamɔ kɛ Ekaa

Yehowa Odasefoi baaje Biblia mli wolo ni ji 1 Mose lɛ kasemɔ shishi yɛ June nyɔŋ lɛ mli. Abaasusu sane ni taa mɔ tsuiŋ nɛɛ he yɛ amɛ daa otsi Teokrase Sɔɔmɔ Skul lɛ mli yɛ be kpalaŋŋ ko mli. Aŋma sane nɛɛ bɔni afee ni akɛye abua eshishinumɔ, ni wɔheɔ wɔyeɔ akɛ ebaaha sanebimɔi ni ekolɛ oyɔɔ ni kɔɔ 1 Mose, Ŋmalɛ Krɔŋkrɔŋ lɛ fa ni heɔ mɔ jwɛŋmɔ ni tswaa mɔ hemɔkɛyeli emaa shi lɛlɛŋ nɛɛ he lɛ ahetoo.

YEHOWA hiɛ sɔɔ mɛi ni naa emli hemɔkɛyeli ni gbugbaaa lɛ pɛ. Ni amɛyɛ nɔ ni amɛbaadamɔ nɔ amɛkɛ amɛhe afɔ̃ enɔ yɛ anɔkwale mli, ejaakɛ lɛ ji “nɔhiɛkamɔ Nyɔŋmɔ lɛ,” ni eshiwooi wuji lɛ efeee efolo kɔkɔɔkɔ. Eji anɔkwale akɛ, yɛ be mli ni amɛmɛɔ emlibaa lɛ, ekolɛ amɛkɛ naagbai kɛ kaai baakpe. Shi mɛi fɛɛ ni ‘mɛɔ Yehowa’ lɛ baanyɛ ana ekãa ni gbooo, ejaakɛ ebáa mɛi fɛɛ ni sɔmɔɔ lɛ yɛ anɔkwayeli mli lɛ ayi yɛ be fɛɛ mli.​—Romabii 15:​13; Lala 31:​24, 25; Hebribii 11:⁠6.

Afee enɛɛmɛi fɛɛ he nɔkwɛmɔ nɔ yɛ Biblia mli wolo ni ji 1 Mose lɛ mli. Mose ŋma enɛ yɛ Sinai ŋa lɛ nɔ yɛ afi 1513 D.Ŋ.B., ni Nyɔŋmɔ Wiemɔ lɛ fa ni jara wa nɛɛ kanyaa hemɔkɛyeli, hiɛnɔkamɔ kɛ ekãa.

Wolo Lɛ Naamuu Kuku

Nɔ ni yaa kɛyashɛɔ afii akpekpei toi akpei abɔ lɛ, 1 Mose kɛ wiemɔi nɛɛ jeɔ shishi: “Shishijee mli lɛ Nyɔŋmɔ bɔ ŋwɛi kɛ shikpɔŋ”​—ŋwɛi nibii kɛ shikpɔŋ nɔ nibii. Asaa shikpɔŋ lɛ koni adesa ahi nɔ, ni yɛ naagbee lɛ, adesai damɔɔ Bɔlɔ lɛ hiɛ yɛ emuuyeli mli. Eyɛ mli akɛ Paradeiso elaaje yɛ esha hewɔ moŋ, shi Yehowa kɛ hiɛnɔkamɔ haa kɛtsɔɔ “seshi” ko ni egba ehe sane efɔ shi ni baatswa onufu lɛ yitso nɔ̃ nɔ. Jalɔ Habel kɛ hemɔkɛyeli sha afɔle ni akpɛlɛɔ nɔ eha Nyɔŋmɔ, shi enyɛmi nuu lɛ gbe lɛ, ni ebatsɔ klɛŋklɛŋ lá odasefonyo eha Yehowa.​—1 Mose 1:​1–4:⁠26.

Henok ‘kɛ Nyɔŋmɔ nyiɛ,’ ni etsu nii ni kɛ ŋwɛi suɔmɔnaa nifeemɔ kpaa gbee. Shi shihilɛ lɛ fite, beni ŋwɛibɔfoi ni ji ‘Nyɔŋmɔ bihii’ ŋɔ yei akɛ amɛŋamɛi ni amɛfɔfɔɔ Nefilim ni ji oblaŋi lɛ. Shi kɛlɛ, Noa kɛ hemɔkɛyeli, hiɛnɔkamɔ kɛ ekãa kpɛ adeka lɛ, ebɔ Nu Afua ni baa lɛ he kɔkɔ ni yɛ naagbee lɛ ekɛ eweku lɛ je ehiɛkpatamɔ lɛ mli. Akɛni je ni tsɔ Nu Afua lɛ hiɛ lɛ etee hewɔ lɛ adesai bote be hee ko mli. Shi be bashɛ ni Babel mɔɔ lɛ malɔi lɛ tao ni amɛfee gbɛi amɛha amɛhe, shi enɛ fite beni Yehowa futu amɛwiemɔ lɛ ni egbɛ amɛ eshwa shikpɔŋ muu lɛ fɛɛ nɔ lɛ.​—Mose 5:​1–11:⁠9.

Akɛni efee enii yɛ hemɔkɛyeli mli taakɛ Nyɔŋmɔ tsɔɔ lɛ lɛ hewɔ lɛ, Abram shi Kaldeabii Ur lɛ ni ebatsɔ mɔ ni hiɔ buui amli yɛ shikpɔŋ ni Yehowa wo shi akɛ ekɛbaaha lɛ kɛ eseshibii lɛ nɔ. Atsɔ ŋwɛi nifeemɔ nɔ ate shi awo Sodom kɛ maji ni bɛŋkɛ jɛmɛ lɛ anɔ bii yiwalɔi lɛ. Yɛ be ni sa mli lɛ Nyɔŋmɔ shiwoo ko ba mli kɛ Isak fɔmɔ lɛ. Shi yɛ afii komɛi asɛɛ lɛ aka Abraham akwɛ waa, beni Yehowa fa lɛ ni ekɛ ebi Isak ayasha afɔle lɛ. Ŋwɛibɔfo ko ha ekpa nakai feemɔ, ehe ehiaaa ni blematsɛ ni egbɔ nɛɛ afee enɛ. Shi agbɛnɛ ŋwanejee ko bɛ he akɛ eji nuu ni yɔɔ hemɔkɛyeli, ni ama nɔ mi aha lɛ akɛ eseshi nɔ jeŋmaji fɛɛ baatsɔ ana jɔɔmɔ aha amɛhe. Abraham ŋa Sara ni esumɔɔ lɛ lɛ gbele kɛ awerɛho ba, shi ebaanyɛ ekpa gbohiiashitee he hiɛnɔkamɔ lɛ gbɛ kɛ nɔmimaa.​—1 Mose 11:​10–23:​20; Hebribii 11:​8-19.

Abraham tsɔ etsulɔ nɔ eto gbɛjianɔ koni Isak kɛ Rebeka, yoo ni yɔɔ hemɔkɛyeli yɛ Yehowa mli abote gbalashihilɛ mli. Yɛ be ni sa mli lɛ, efɔ haaji, Esau kɛ Yakob. Esau gbe binukpa hegbɛ lɛ he guɔ ni ehɔɔ eha Yakob ni yɛ sɛɛ mli lɛ enine shɛ etsɛ jɔɔmɔ nɔ. Yakob jo foi kɛtee Mesopotamia, he ni ekɛ Lea kɛ Rahel bote gbalashihilɛ mli yɛ, ni ekwɛ amɛtsɛ Laban tooi aaafee afii 20 dani ekɛ eweku lɛ shi jɛmɛ. Yɛ sɛɛ mli lɛ ŋwɛibɔfo ko kɛ Yakob banɔ, ejɔɔ lɛ ni etsake egbɛi etsɛ lɛ Israel. Ákɛ nuu ni yɔɔ hemɔkɛyeli yɛ hiɛnɔkamɔ ni ama nɔ mi lɛ mli lɛ, Israel tee nɔ ehi Kanaan, ni ji shiwoo shikpɔŋ lɛ nɔ ákɛ gbɔ​—1 Mose 24:​1–37:⁠1.

Nyɛ̃ɛ ha Yakob bihii lɛ hɔɔ amɛnyɛmi Yosef akɛ nyɔŋ. Yosef anɔkwayeli kɛ ekãa mli ni etsɔ ekɛ ehe kpɛtɛ Nyɔŋmɔ jeŋba he tɛi ni efolɔ eshwie lɛ ahe lɛ ha awo lɛ tsuŋ. Shi yɛ be ni sa mli lɛ, ajie lɛ kɛjɛ tsuŋwoo he lɛ, yɛ Yehowa yelikɛbuamɔ naa, koni ebatsɔɔ Farao lamɔi ni gbaa niyenii babaoo ni baaba afii kpawo kɛ hɔmɔ ni baanyiɛ sɛɛ aba afii kpawo lɛ shishi. Afee lɛ Mizraim niyenii anɔkwɛlɔ. Yosef nyɛmimɛi lɛ batao niyenii yɛ Mizraim, shi amɛyooo lɛ. Klɛŋklɛŋ lɛ eka amɛ ekwɛ, kɛkɛ ni yɛ naagbee lɛ ejie mɔ ni eji diɛŋtsɛ lɛ kpo etsɔɔ amɛ. Anɔkwafo Yakob kɛ ebinuu ni laaje afii babaoo lɛ bakpe ekoŋŋ, ni blematsɛ lɛ weku lɛ bahi Goshen shikpɔŋ kpakpa lɛ nɔ. Yakob jɔɔ ebii lɛ yɛ egbele saa nɔ ni atsirɛ lɛ ni egba efɔ shi akɛ maŋtsɛtso lɛ kɛ nɔyelitso ejeŋ Yuda dɛŋ kɛyashi Shilo aaaba​—gbalɛ ni kɛ anɔkwale hiɛnɔkamɔ ni kɔɔ jɔɔmɔi babaoo ni baaba yɛ afii ohai abɔ ko ni baaba lɛ mli haa. Akɛ Yakob gbonyo lɛ tee Kanaan ni ayafu lɛ yɛ jɛmɛ, ni beni Yosef gbo beni eye afii 110 lɛ, awo egbonyo lɛ tsofa, koni gbi ko lɛ akɛya Shiwoo Shikpɔŋ lɛ nɔ.​—1 Mose 37:​2–50:​26; 2 Mose 13:​19.

Kɛtsɔ 1 Mose lɛ kanemɔ jogbaŋŋ nɔ lɛ, obaaná hemɔkɛyeli, hiɛnɔkamɔ kɛ ekãa he saji ni kanyaa mɔ waa nɛɛ he sɛɛ babaoo. Shi yɛ enɛ feemɔ mli lɛ, obaabi saji komɛi. Abaaha nakai sanebimɔi lɛ ekomɛi ahetoo yɛ be mli ni wɔkwɛɔ Biblia lɛ mli klɛŋklɛŋ wolo lɛ mli jogbaŋŋ lɛ.

Je Ni Yɔɔ Dani Nu Afua Lɛ Ba

●1:26​—Mɛɛ gbɛ nɔ atsɔ abɔ gbɔmɔ yɛ Nyɔŋmɔ subaŋ nɔ kɛ ehenɔ?

Gbɔmɔ leee bɔ ni Nyɔŋmɔ su yɔɔ. (5 Mose 4:​15-20) Shi abɔ gbɔmɔ yɛ Nyɔŋmɔ subaŋ kɛ ehenɔ kɛ shishinumɔ akɛ abɔ lɛ kɛ sui ni Nyɔŋmɔ yɔɔ eko ni ji jalɛsaneyeli, nilee, hewalɛ kɛ suɔmɔ. (5 Mose 32:4; Hiob 12:​13; Yesaia 40:​26; 1 Yohane 4:⁠8) Akɛni Nyɔŋmɔ Bi lɛ, Wiemɔ lɛ, hiɛ nɛkɛ sui nɛɛ eko hewɔ lɛ, Yehowa kɛɛ lɛ yɛ gbɛ ni sa nɔ akɛ: “Ha wɔfee gbɔmɔ yɛ wɔsubaŋ lɛ nɔ tamɔ wɔhenɔ.”​—Yohane 1:​1-3, 14, NW.

●4:17​—Nɛgbɛ Kain na eŋa lɛ kɛjɛ?

Adam fɔ “bihii kɛ biyei.” (1 Mose 5:⁠4) No hewɔ lɛ Kain ŋɔ enyɛmimɛi yei lɛ ateŋ mɔ kome akɛ eŋa. Yɛ sɛɛ mli lɛ Nyɔŋmɔ Mla eŋmɛɛɛ heloo naa nyɛminuu kɛ nyɛmiyoo teŋ gbalashihilɛ lɛ gbɛ dɔŋŋ.​—3 Mose 18:⁠9.

●6:6​—Yehowa ‘shwa ehe’ akɛ ebɔ gbɔmɛi yɛ mɛɛ shishinumɔ mli?

Hebri wiemɔ ni atsɔɔ shishi “eshwa ehe” lɛ kɔɔ su loo yiŋtoo ni atsakeɔ he. Yehowa yeɔ emuu no hewɔ lɛ etɔɔɔ yɛ gbɔmɔ ni ebɔ lɛ lɛ mli. Shi etsake esubaŋ yɛ yinɔ fɔŋ ni tsɔ Nu Afu lɛ hiɛ lɛ he. Nyɔŋmɔ subaŋ tsake kɛjɛ adesa Bɔlɔ lɛ he kɛtee amɛhiɛkpatalɔ he akɛni esumɔɔɔ amɛnɔfɔŋfeemɔ lɛ hewɔ. Edɔ Yehowa akɛ adesa nɔfɔŋfeemɔ lɛ ebi ni akpata wala babaoo hiɛ, shi esa ni efee koni ekɛbu ejalɛ tɛi ni efolɔ eshwie shi lɛ bem. Anɔkwale ni eji akɛ ebaa adesai komɛi ayi lɛ tsɔɔ akɛ eheshwamɔ lɛ kɔɔ mɛi ni fee efɔŋ yɛ wiemɔ kɛ nifeemɔ mli lɛ pɛ he.​—2 Petro 2:​5, 9.

Adesai Bote Shishilɛ Loo Be Hee Ko Mli

●8:11​—Kɛ Nu Afua lɛ kpata tsei ahiɛ lɛ, belɛ nɛgbɛ okpo lɛ ná mutso baafɔ lɛ kɛjɛ?

Ŋwanejee ko bɛ he akɛ Nu Afua lɛ fite tsei pii. Shi kɛlɛ, Hela jeŋ nilelɔ, Theophrastus kɛ Roma adebɔɔ he nilelɔ Pliny the Elder bɔ amaniɛ akɛ mutsei kwɛ̃ɔ yɛ Ŋshɔ Tsuru lɛ shishi ni amɛhiɔ shi nakai yɛ jɛmɛ ni amɛfiteee. No hewɔ lɛ mutso hu baanyɛ ahi nui lɛ shishi nyɔji komɛi yɛ Nu Afua lɛ mli. Beni Nu Afua lɛ mli nui lɛ baa shi lɛ, mutso ni tamɔ nakai baaje kpo yɛ shikpɔŋ gbiŋ nɔ ekoŋŋ ni baai baanyɛ akwɛ̃ yɛ nɔ, ni okpo lɛ baanyɛ atse eko.

●9:​24, 25​—Mɛni hewɔ Noa lomɔ Kanaan yɛ be mli ni Ham ji mɔ ni fee efɔŋ lɛ?

Eka shi faŋŋ akɛ etamɔ nɔ ni Kanaan efee nɔ ko ni ejaaa aloo ehiii eshi enii Noa, ni Ham na enɛ ni ewieee nɔ ko yɛ he. Shi etamɔ nɔ ni Noa binuu Ham gbɛ sane lɛ eshwã, yɛ be mli ni Shem kɛ Yafet fee nɔ ko yɛ he koni amɛhã amɛtsɛ sane lɛ nɔ. No hewɔ lɛ ajɔɔ amɛ, ni alomɔ Kanaan mɔ ni eka shi faŋŋ akɛ lɛ ji nɔfɔŋfeelɔ lɛ, ni Ham ni kwɛ nɔ ni tee nɔ lɛ kɛkɛ ni egba he sane kɛfo shi lɛ hu na nɔ̃ kɛtsɔ hiɛgbele ni ba eshwiei lɛ anɔ lɛ nɔ. Eyɛ mli akɛ Ŋmalɛi lɛ etsɔɔɔ mli fitsofitso moŋ, shi oti ni he hiaa lɛ ji akɛ Yehowa ha Noa gba gbalɛ lɛ, ni Nyɔŋmɔ ha eba mli beni aha Kanaanbii lɛ ni Israelbii lɛ kpataaa amɛhiɛ lɛ batsɔmɔ nyɔji amɛha nakai Shem seshibii lɛ.​—Yoshua 9:​23; 1 Maŋtsɛmɛi 9:⁠21.

●10:​25-Yɛ mɛɛ gbɛ nɔ “agbala” shikpɔŋ lɛ “mli” yɛ Peleg gbii lɛ amli?

Peleg hi shi kɛjɛ afi 2269 kɛbashi 2030 D.Ŋ.B. Egbɛi lɛ shishi ji “mligbalamɔ,” ni kɛ akɛ nakai gbɛi lɛ ha lɛ yɛ efɔmɔ be mli lɛ, belɛ eji gbalɛ ko ni sa kadimɔ ni kɔɔ mligbalamɔ ko ni ba yɛ eshihilɛ be mli lɛ he. Nakai be lɛ mli “agbala shikpɔŋ lɛ [aloo enɔ bii] mli.” Biblia lɛ tsɔɔ akɛ “egbii lɛ amli” Yehowa ha mligbalamɔ kpele ko ba kɛtsɔ Babel tsumalɔi lɛ awiemɔ ni efutu lɛ ‘ni egbɛ amɛ eshwa shikpɔŋ lɛ fɛɛ hiɛ” lɛ nɔ.​—1 Mose 11:9; kwɛmɔ 10:​1, 6, 8-10; 11:​10-17 hu.

Blematsɛmɛi Ni Yɔɔ Hemɔkɛyelii Ni Hiɔ Shi Daa

●15:13​—Te fee tɛŋŋ ni Abraham seshibii ayiwaa afii 400 lɛ ba mli hu? Yiwaa be lɛ je shishi kɛjɛ afi 1913 kɛbashi 1513 D.Ŋ.B. Beni Abraham bi Isak fɔ̃ɔ fufɔyeli beni eye afii 5 yɛ 1913 D.Ŋ.B. lɛ, etsɛ bi Ishmael (ni no mli lɛ eye aaafee afii 19 lɛ) ‘ye ehe fɛo.’ Bɔ ni Abraham seshi nɛɛ he fɛo ni aye lɛ ji hiɛdɔɔ sane ha lɛ yɛ faŋŋ yɛ nɔ ni Sara fee yɛ sane lɛ he ni Yehowa hu kpɛlɛ nɔ ni ebiɔ akɛ aha Hagar kɛ ebi Ishmael aya lɛ nɔ lɛ mli. (1 Mose 21:​8-14; Galatabii 4:29) Nɛkɛ afii 400 yiwaa nɛɛ ba naagbee beni ajie Israelbii lɛ kɛjɛ Mizraim nyɔŋyeli mli yɛ afi 1513 D.Ŋ.B. lɛ.

●19:​30-38​—Ani Yehowa kpɛlɛ dãa ni Lot nu etɔ ni ekɛ ebiyei enyɔ lɛ fɔ bihii lɛ nɔ?

Yehowa ekpɛlɛɛɛ bɔlɛnamɔ ni yaa nɔ yɛ wekumɛi ateŋ lɛ nɔ ni asaŋ ekpɛlɛɛɛ dãatɔɔ hu nɔ. (3 Mose 18:​6, 7, 29; 1 Korintobii 6:​9, 10) Agbɛnɛ Abraham wɔfase Lot sumɔɔɔ Sodombii ‘amlakwamɔ nifeemɔi’ lɛ, ni eka shi faŋŋ akɛ eye awerɛho yɛ jeŋba gbonyo ni lɛ diɛŋtsɛ ekɛ ehe wo mli lɛ he, ejaakɛ Mɔ Ni Kaa tsuii Ekwɛɔ lɛ bu lɛ akɛ “jalɔ.” (2 Petro 2:⁠8) Anɔkwale ni eji akɛ Lot biyei lɛ ha lɛ dãa enu ni etɔ lɛ tsɔɔ akɛ amɛyoo akɛ ekpɛlɛŋ bɔlɛ ni ekɛ amɛ aaana nɔ yɛ be mli ni ehiɛ ka shi. Shi akɛ gbɔi yɛ shikpɔŋ lɛ nɔ lɛ, ebiyei lɛ nu he akɛ enɛ ji gbɛ kome pɛ ni amɛaatsɔ nɔ koni amɛbaa Lot weku lɛ shishi bulemɔ yi. Sane nɛɛ yɛ Biblia lɛ mli, jeee ni akɛtee bɔlɛnamɔ he susumɔ shĩ, shi moŋ bɔni afee ni ejie wekukpaa ni ka Moabbii kɛ Amonbii kɛ Abraham sesibii ni ji Israelbii lɛ ateŋ lɛ kpo.

●28:​12, 13​—Yakob lamɔ ni kɔɔ “atswere” he lɛ tsɔɔ mɛni?

“Atswere” lɛ (ni baanyɛ atamɔ tɛi ni ato ashwie shi kɛtee ŋwɛi lɛ) tsɔɔ akɛ sanegbaa ka ŋwɛi kɛ shikpɔŋ teŋ. Etsɔɔ akɛ ŋwɛibɔfoi sɔmɔɔ yɛ Yehowa kɛ adesai ni yɔɔ enɔkpɛlɛmɔ shishi lɛ ateŋ.​—Okɛto Yohane 1:51 he.

●31:19​—Mɛni ji terafim loo shĩa amagai ni Rahel ju kɛjɛ Laban ŋɔɔ lɛ?

Terafim lɛ ji weku nyɔŋmɔi loo amagai. Shitsaa yɛ Mesopotamia tsɔɔ akɛ mɔ ni amagai nɛɛ baa eŋɔɔ lɛ ji mɔ ni yeɔ weku lɛ gboshinii. Ekolɛ enɛ yɛ Rahel jwɛŋmɔ mli, ni esusu he akɛ eyeɔ bem yɛ terafim lɛ ni ekɔlɔ lɛ mli yɛ bɔ ni etsɛ Laban shishiu ewu Yakob lɛ hewɔ. (1 Mose 31:​14-16) Shi nɔ ko bɛ ni tsɔɔ akɛ Yakob bɔ mɔdɛŋ ni ekɛ terafim lɛ atsu nii ni ekɛna weku lɛ gboshinii. Kɛ hoo kwraa lɛ Yakob fite nɛkɛ amagai nɛɛ fɛɛ beni efu maŋsɛɛ nyɔŋmɔi fɛɛ ni eshiabii lɛ kɛha lɛ lɛ.​—1 Mose 35:​1-4.

●44:5​—Ani Yosef kɛ kpulu tsu nii akɛ nɔ ko ni ekɛ klaa?

Yosef etswa efai shi akɛ ebaaka enyɛmimɛi lɛ ni yooo lɛ lɛ ekwɛ. No hewɔ lɛ efa etsulɔ lɛ ni ekɛ niyenii awo amɛkotokui lɛ amli obɔ, ni ekɛ mɔ fɛɛ mɔ shika awo ekotoku mli yɛ naabu gbɛ, ni ekɛ Yosef jwiɛtɛi kpulu lɛ awo Benyamin kotoku lɛ mli. Yosef miitsu nii yɛ enɛɛmɛi fɛɛ mli akɛ wɔjalɔi ashikpɔŋ nɔkwɛlɔ. No hewɔ lɛ eka shi faŋŋ akɛ kpulu lɛ kɛ nɔ ni awie yɛ he lɛ ji gbɛjianɔtoo kɛha lakamɔ. Akɛ Yehowa anɔkwa jálɔ lɛ, Yosef kɛ kpulu lɛ tsuuu nii akɛ nɔ ko ni ekɛ klaa, taakɛ bɔ ni jeee ju Benyamin hu ju diɛŋtsɛ lɛ.

●49:10​—Ani sɔrɔtofeemɔ ko yɛ maŋtsɛtso kɛ nɔyelitso teŋ?

Hɛɛ. Maŋtsɛtso ji tso kuku ko ni nɔyelɔ ko hiɛɔ yɛ edɛ akɛ hegbɛ ni eyɔɔ akɛ maŋtsɛ. Ni nɔyelitso lɛ ji tso kakadaŋŋ ko ni feɔ ehewalɛ ni ekɛ-fãa mɛi lɛ he okadi. Enyɔ nɛɛ fɛɛ ni Yakob wie he lɛ tsɔɔ faŋŋ akɛ hegbɛ kɛ hewalɛ saŋŋ baahi Yuda akutso lɛ mli kɛyashi Shilo lɛ aaaba. Nɛkɛ Yuda seshinyo nɛɛ ji Yesu Kristo, mɔ ni Yehowa kɛ ŋwɛi nɔyeli ewo edɛŋ lɛ. Kristo hiɛ maŋtsɛyeli hegbɛ ni eyɛ hewalɛ ni ekɛaafã hu.​—Lala 2:​8, 9; Yesaia 55:4; Daniel 7:​13, 14.

Nɔ Ni Adamɔɔ Nɔ Anaa Hemɔkɛyeli, Hemɔkɛyeli Kɛ Ekáa

Eka shi faŋŋ akɛ 1 Mose kɛ nɔ ni wɔbaadamɔ nɔ wɔna hemɔkɛyeli, hiɛnɔkamɔ kɛ ekãa haa wɔ. Ekanyaa hemɔkɛyeli yɛ Yehowa mli, kɛ hiɛnɔkamɔ yɛ shiwoo jɔɔmɔ “seshi” lɛ mli. (1 Mose 3:​15; 22:18) Wolo nɛɛ yeɔ ebuaa wɔ hu koni wɔkɛ ekãa akpee wɔsɛɛ be, taakɛ klɛŋklɛŋ Yehowa odasefoi lɛ fee lɛ.

Nakai Nyɔŋmɔ tsuji lɛ “miitao maŋ ni hi fe no, ni ji ŋwɛi nɔ̃ lɛ,” ni Yehowa “esaa maŋ eto amɛ.” (Hebribii 11:​15, 16) Taakɛ amɛkwɛɔ Maŋtsɛyeli gbɛjianɔtoo lɛ yɛ amɛhiɛ gbɛ lɛ, eba akɛ wɔ hu wɔkɛ wɔhe aaafɔ nɔ. Ni eba akɛ wɔɔna anɔkwale hemɔkɛyeli, hiɛnɔkamɔ kɛ ekãa taakɛ nakai Yehowa odasefoi lɛ fee lɛ.

[Mfonirii ni yɔɔ baafa 23]

Yakob kɛ Esau

Yosef

Abraham kɛ Isak

Kain kɛ Habel

Noa