Mɛi Fioo ko Baaye Nɔ, Mɛi Pii Baaná He Sɛɛ
KƐJƐ bɔfoi lɛ agbii lɛ amli kɛbaa lɛ, Nyɔŋmɔ bɔi Kristofoi anɔkwafoi fioo komɛi ahalamɔ kɛjɛ adesai ateŋ, ni eŋɔɔ amɛ efeɔ ebii. Tsakemɔ ni baa yɛ mɛi ni aŋɔ amɛ afee bii lɛ agbɛfaŋ lɛ da waa aahu akɛ Nyɔŋmɔ Wiemɔ lɛ tsɔɔ enɛ mli akɛ eji fɔmɔ hee. Yiŋtoo ni yɔɔ fɔmɔ hee lɛ sɛɛ ji ni akɛsaa Nyɔŋmɔ tsuji ni afɔ amɛ ekoŋŋ lɛ ato koni amɛtsɔmɔ nɔyelɔi yɛ ŋwɛi. (2 Timoteo 2:12) Bɔni afee ni amɛtsɔmɔ nɔyelɔi lɛ, ateɔ amɛ shi kɛjɛɔ gbele mli kɛyaa ŋwɛi shihilɛ mli. (Romabii 6:3-5) Amɛbaafata Kristo he yɛ ŋwɛi ‘kɛye shikpɔŋ lɛ nɔ akɛ maŋtsɛmɛi.’—Kpojiemɔ 5:10; 11:15.
Shi Nyɔŋmɔ Wiemɔ lɛ kɛɔ akɛ yɛ mɛi ni afɔ amɛ ekoŋŋ lɛ sɛɛ lɛ, mɛi krokomɛi yɛ ni nine baashɛ naanɔ wala nɔ. Atsĩ tã yɛ Biblia lɛ (Hebri Ŋmalɛi lɛ kɛ Kristofoi a-Hela Ŋmalɛi lɛ fɛɛ) mli akɛ, Nyɔŋmɔ baahere kui enyɔ ayiwala—nɔyelɔi akuu bibioo ni baahi shi yɛ ŋwɛi kɛ kuu wulu ni ji nɔyeli lɛ shishibii babaoo ni baahi shi yɛ shikpɔŋ lɛ nɔ. Ákɛ nɔkwɛmɔnɔ lɛ, kadimɔ nɔ ni bɔfo Yohane ŋma eha enanemɛi Kristofoi ni ená fɔmɔ hee lɛ. Ewie kɛkɔ Yesu he akɛ: “Lɛ ji wɔhe eshai lɛ ahe kpatamɔ nɔ̃; shi jeee wɔnɔ̃ [kuu bibioo] lɛ kɛkɛ he, shi moŋ jeŋ muu lɛ fɛɛ [kuu wulu lɛ] nɔ̃ lɛ hu he.”—1 Yohane 2:2.
Nakai nɔŋŋ hu bɔfo Paulo ŋma akɛ: “Bɔɔ nii lɛ [kuu wulu lɛ] agbɛkwɛmɔ kpɛ̃kpɛ̃ɛkpɛ̃ lɛ miimɛ Nyɔŋmɔ bii lɛ [kuu bibioo lɛ] akpojiemɔ lɛ.” (Romabii 8:19-21) Te esa akɛ wɔnu wiemɔi ni bɔfo Yohane kɛ bɔfo Paulo wie lɛ ashishi wɔha tɛŋŋ? Yɛ nɛkɛ gbɛ nɔ: Mɛi ni afɔ amɛ ekoŋŋ lɛ baatsɔmɔ nɔyeli ko ni yɔɔ ŋwɛi lɛ mlibii. Mɛni amɛbaatsu yɛ jɛmɛ? Amɛbaaye amɛbua koni adesai akpekpei abɔ, Nyɔŋmɔ nɔyeli lɛ shishibii, ni baahi shikpɔŋ lɛ nɔ lɛ aná naanɔ jɔɔmɔi. No hewɔ lɛ, Yesu tsɔɔ ekaselɔi lɛ ni amɛsɔle akɛ: ‘Omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.’—Mateo 6:10.
Anaa anɔkwa sane nɛɛ ni kɔɔ kui enyɔ ni abaahere amɛyiwala lɛ he lɛ hu yɛ Hebri Ŋmalɛi lɛ amli. Ákɛ nɔkwɛmɔnɔ lɛ, kadimɔ nɔ ni Yehowa kɛɛ Yesu blematsɛ Abraham lɛ, ekɛɛ lɛ akɛ: “Oseshi lɛ [kuu bibioo lɛ] mli aaajɛ ajɔɔ shikpɔŋ lɛ nɔ jeŋmaji [kuu wulu lɛ] fɛɛ.” (1 Mose 22:18) Hɛɛ, abaajɔɔ jeŋmaji fɛɛ kɛtsɔ Abraham ‘seshi’ lɛ nɔ.
Namɛi feɔ nakai ‘seshi’ lɛ? Yesu Kristo kɛ mɛi ni afɔ amɛ ekoŋŋ, ni ji mɛi ni Nyɔŋmɔ eŋɔ amɛ efee ebii lɛ. Bɔfo Paulo tsɔɔ mli akɛ: “Kɛ́ Kristo nii ji nyɛ lɛ, belɛ Abraham seshibii ji nyɛ.” (Galatabii 3:16, 29) Ni mɛɛ jɔɔmɔi jeŋmaji lɛ fɛɛ nine aaashɛ nɔ kɛtsɔ ‘seshi’ lɛ nɔ? Hegbɛ ni ji Nyɔŋmɔ hiɛ duromɔ ni amɛnine aaashɛ nɔ ekoŋŋ kɛ naanɔ wala ni amɛbaaná yɛ paradeiso shikpɔŋ lɛ nɔ. Lalatsɛ David gba akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29; Yesaia 45:18; Kpojiemɔ 21:1-5.
Lɛɛlɛŋ, mɛi fioo pɛ baaye nɔ yɛ ŋwɛi moŋ, shi mɛi babaoo baaná amɛnɔyeli lɛ he sɛɛ—amɛbaahi shi kɛya naanɔ yɛ shikpɔŋ lɛ nɔ, ni amɛnine baashɛ jɔɔmɔi krokomɛi hu anɔ. Eba akɛ bo kɛ oweku lɛ baafata mɛi ni nine baashɛ naanɔ jɔɔmɔi ni Nyɔŋmɔ Maŋtsɛyeli lɛ kɛaaba lɛ nɔ lɛ ahe.—w09 04/01-E.
[Mfoniri ni yɔɔ baafa 12]
Abaajɔɔ mɛi akpekpei abɔ kɛ naanɔ wala yɛ shikpɔŋ lɛ nɔ. Ani obaafata amɛhe?